1, 2. ¿Jamüshii woʼunaka juyawai sünain tü Outkajawaakat eere Sotuin Waaʼin Outuin Jesús?

 EEIRÜ maʼaka 2.000 juya süchikijee naapajiraain nikii Jesús waaʼu. Süka naaʼinrüin tia, eesia süpüla katüin woʼu süpüla kaʼikat süpüshuaʼa. Wanee ai süpülapünaa outuin nia, nnojotsü maʼin kapüleein tü naaʼinrakat süpüla niʼitaain sukuwaʼipa tü Ekawaa Aipaʼajatkat nutuma. Nuluwataain na nikirajüinkana süpüla ayatajatüin naaʼinrüin tia süpüla sotuin naaʼin outuin nia naaʼu süka alin naya nüpüla (1 Cor. 11:23-26).

² Wayakana anoujashiikana oonooshii waya sümaa tia pütchikat süka alin maʼin wapüla Jesús (Juan 14:15). Jaʼyeerü waaʼu kojutuin wamüin tü naaʼinrakat Jesús wapüleerua sükalioʼu tü Outkajawaakat eere Sotuin Waaʼin Outuin nia waaʼinrüle tüü: woʼuraajüle, wasakireʼerüle waaʼin sünain tü kasa naaʼinrakat wapüleerua otta müsia waküjale maʼin pütchi süpüla wounejaain wainma wayuu. Kamalainsü maʼin wamüin waaʼinrüin tia. Nnojotsü wooʼulaain kasain ataʼülüin wakuwaʼipa woʼunuinjanain sünain tia outkajawaakat.

3. ¿Kasa wekirajaajeetka anain sünain ekirajaayakat tüü?

³ Wayakana aʼyataakana nümüin Jehová wainma kasa waaʼinraka süpüla sotuin waaʼin outuin Jesús waaʼu. Sünain ekirajaayakat tüü, wekirajaajeerü anain apünüinsü kasa waaʼinraka. Palajana, waaʼinrüin tia outkajawaakat maʼaka nüküjain shia Jesús. Piama, wounejaain na wayuukana süpüla noʼunuin sünain. Otta apünüin, oʼunushii waya sünain jaʼitairü kapüleein shia wamüin.

4. (1) ¿Kasa pütchi aküjünawaika wamüin sünain tü Outkajawaakat eere Sotuin Waaʼin Outuin Jesús? (Lucas 22:19, 20). (2) ¿Jamüsü anaka maʼin wayaawatüle saaʼu tia pütchikat?

⁴ Anuu tü pütchi asoutünakat juyawai sünain tü Outkajawaakat eere Sotuin Waaʼin Outuin Jesús: ¿Jamüshi naapajiraaka nikii Jesús waaʼu? ¿Jamüsü sülaʼajaanaka saainjala wayuu sükajee outuin waneeshia neʼe wayuu? ¿Jaraliinjana ekaka tü pankat jee asaka tü wiinokot? ¿Kasa kayaawaseka tü pankat jee tü wiinokot? (Paashajeʼera Lucas 22:19, 20, TNM). Soʼunnaa tia outkajawaakat, jülüjasü waaʼin tü kasa anasü naaʼinreetkat Jehová napüleerua na kepieenakana yaa saaʼu tü mmakat (Is. 35:5, 6; 65:17, 21-23). Anataʼaleesüjaʼa maʼin süka wayaawatüin saaʼu tia. Eeshii wayuu nnojoliikana ayaawatüin saaʼu tia, nnojoliikana kojutuin amüin naapajiraain nikii Jesús naaʼu otta nnojoliikana aaʼinrüin tia outkajawaakat maʼaka nüküjain shia Jesús namüin na nikirajüinkana. ¿Jamüsü makaʼa shia?

5. Süchikijee outayaa namüin na aluwataaushikana, ¿kasa naaʼinraka na wayuukana süpüla sotuin naaʼin outuin Jesús?

⁵ Napütaapa neʼe palit na aluwataaushikana süchikijee outayaa namüin na wane, eejana na anoujayaashii ekirajakana na wawalayuukana sünain alawaa (Mat. 13:24-27, 37-39). Naʼwanajaain «tü pütchi shiimainsükat süpüla wanaawainjatüin naaʼin na anoujashiikana namaa jee noushikajaainjanain süchiirua nakuwaʼipa» (Aluw. 20:29, 30, TNM). Wanee kasa naʼwanajaaka shia nnojoluin «wwatuain neʼe naapajiraain nikii [Jesús] süpüla ouktaa, motüinjatka akajee naaʼin saainjala wayuu wainma». Naatasü maʼin tü nekirajakalü anain suulia tü sümakat tü Bibliakat süka nekirajüin naapajiraainjachin nikii Jesús waneepia saaʼu saainjala wayuu (Heb. 9:27, 28). Maaʼulu yaa, wainma wayuu anoujaka sünain tiaʼaya, oʼunushii naya sünain miisa semaanawai jee shiale soʼukaiwai eere saapünüin tü pankat jee tü wiinokot. Nanouja anainrü ishajaain tü wiinokot otta niʼirukujaain Jesús tü pankat sünain tia miisakat. Nekapa tü pankat jee nasapa tü wiinokot, jülüjasü naaʼin naapajiraain nikii Jesús nüchikuaʼa naaʼu. Mayaainjeʼe eein waneirua iküleesia nnojotka aainjain shia waneepia, nnojotsü nayaawatüin maʼin aaʼu jamaluʼuluin shia. Eeshii noʼutku wayuu asakitkana müleka shiimainre sülaʼajaanüin naainjala saaʼujee outuin Jesús. Nasakirüin naaʼin sünain tia süka nanoujinnüin anain nnojoluin kasain saamüin outuin Jesús saaʼu naainjala. ¿Kasakaʼa naaʼinrüin na anoujashii shiimainshiikana süpüla natüjaain saaʼu na wayuukana outuin Jesucristo naaʼu? ¿Jamüsü sukuwaʼipa natuma süpüla sotowalin naaʼin tia na wayuukana?

6. ¿Kasa nayaawataka aaʼu na ekirajaaliikana sünain tü Bibliakat soʼu 1872?

⁶ Soʼu tü juyakat 1870 eejana waneinnua ekirajaakana sünain tü Bibliakat, chi shikiishikai tia nia Charles Taze Russell. Nekirajaa maʼin anainrü tü Bibliakat süpüla nayaawatüin maʼin saaʼu jamüin choʼujaaka outuin Jesús otta jamüin sotuinjachika nia naaʼin. Soʼu 1872, nayaawata aaʼu sükajee tü Bibliakat naakajirüin Jesús wayuu suulia saainjala, nnojotsü nounjulajüin achiki tü nekirajaakalü anain. Naküjain shia suluʼu karaloʼuta, periódico jee rewiisüta. Oʼttushiijeseʼe naya sünain aaʼinraa tü Outkajawaakat eere Sotuin Waaʼin Outuin Jesús uwatua süpüla juyakat maʼaka naaʼinrüin shia na anoujashii eejanakana nükalioʼu Jesús.

7. ¿Jamüsü wakuwaʼipa maaʼulu sutuma tü nekirajaakalü anain na ekirajaaliikana sünain tü Bibliakat?

⁷ Anasü maʼin tü naaʼinrakat na ekirajaaliikana sünain tü Bibliakat nutuma Jehová. ¿Jamüsü wakuwaʼipa sutuma tü naaʼinrakat? Saaʼujee tia, kojutusü maʼin wamüin naapajiraain nikii Jesús waaʼu otta tü kasa eejeetkat sutuma (1 Juan 2:1, 2). Watüjaaitpa aaʼu süküjain tü Bibliakat eein piamasü shiʼipapaʼa wayuu katüinjatka oʼu süpüla kaʼikat süpüshuaʼa: palitchoinjana na chainjanakana chaa iipünaa jee wattainjana naalii na kepiainjanakana yaa mmapaʼa. Aleewashii maʼin waya nümaa  Jehová sutuma wasakireʼerüin waaʼin sünain alin maʼin waya nüpüla otta anain maʼin wakuwaʼipa waneʼewai wakua saaʼujee naapajiraain nikii Jesús waaʼu (1 Ped. 3:18, TNM; 1 Juan 4:9, TNM). Müshiijeseʼe wounejaain na wayuukana maʼaka naaʼinrapuʼuin shia na wawalayuukana süpüla noʼunajanain sünain tü Ekawaa Aipaʼajatkat nutuma chi Señotkai maʼaka nüküjain shia Jesús.

8. ¿Kasa naaʼinraka na aʼyataakana nümüin Jehová süpüla nounejaain na wayuukana sünain tü Outkajawaakat eere Sotuin Waaʼin Outuin Jesús? (Piirakaa sümüin tü ayaakuaakalüirua).

⁸ Kakaliainna na aʼyataakana nümüin Jehová nounejaain na wayuukana sünain tü Outkajawaakat eere Sotuin Waaʼin Outuin Jesús. Soʼu 1881 suluʼu tü rewiisütakat Aapiria Wayuu, ounejaanüshii na wawalayuu chejeʼewaliikana Estados Unidos süpüla noutkajaain suluʼu wanee piichi chaa Allegheny (Pensilvania) süpüla naaʼinrüin tia outkajawaakat. Mapa, outkajaʼawaishii na wawalayuukana suluʼu tü piichi noutkajaaleekat süpüla tia outkajawaakat. Maatsoʼu soʼu 1940, aküjünüsü namüin na aküjaliikana pütchi eein süpüla nounejaain na wayuu oʼuneekana sünain tia outkajawaakat. Soʼu 1960, aluwataasü Weteet karaloʼuta ounejaaya wayuu namüin na wawalayuukana. Soʼujeʼereʼeya tia, watta saalii karaloʼuta ounejaaya neitajaka na aküjaliikana pütchi nüchiki Jehová. ¿Jamüshii waʼyataaka maʼin sünain ounejawaa wayuu?

9, 10. ¿Jaralii na anakana akuwaʼipa sutuma wounejaain naya sünain tü Outkajawaakat eere Sotuin Waaʼin Outuin Jesús? (Juan 3:16).

⁹ Wane kasa wounejaaka aaʼujee na wayuukana sünain tü Outkajawaakat eere Sotuin Waaʼin Outuin Jesús shia süka keeʼireein maʼin waaʼin natüjaain saaʼu tü naaʼinrakat Jehová otta Jesús wapüleerua (paashajeʼera Juan 3:16, TNM). Keeʼireesü maʼin waaʼin neʼraajüin Jehová na wayuukana  otta naʼyataweein nümüin saaʼujee tü pütchi naapajakat sünain tia outkajawaakat. Nnojoliipejeʼe neʼe nayain wounejaain namüiwaʼa.

¹⁰ Eeshii waneeinna wayuu wounejaakana sünain tü outkajawaakat: naya na eemiajaakana anoula. Wounejaain naya sünain tü Outkajawaakat eere Sotuin Waaʼin Outuin Jesús süpüla sotuin naaʼin ayatüinña alin naya nüpüla Maleiwa. Talatüsü maʼin waaʼin weʼrapa naya sünain tü outkajawaakat. Sotusü naaʼin soʼu aikat tia talatapuʼuin maʼin naya sünain aʼyatawaa nümüin Jehová. Jülüjataa waaʼin sukuwaʼipa Mónica, b oʼttusü shia sünain aküjaa pütchi süchikuaʼa soʼunnaa tü ayuuliikat COVID-19. Soʼu tü juyakat 2021, oʼunusü shia sünain tü Outkajawaakat eere Sotuin Waaʼin Outuin Jesús, anuu tü sümakat süchikijee tia: «Anasü maʼin takuwaʼipa soʼu tia süka toʼttuin tachikuaʼa sünain aküjaa pütchi jee sünain ounejawaa wayuu sünain tü Outkajawaakat eere Sotuin Waaʼin Outuin Jesús. 20 juya taya sünain nnojoluin taaʼinrüin tia. Taaʼinrüin tia süka süpüshuaʼa taaʼin süpüla taapüin maʼin analuʼut nümüin Jehová nümaa Jesús saaʼujee tü naaʼinrakat tapüleerua» (Sal. 103:1-4). Jaʼitainna oʼunuin jee moʼunuin na wayuu wounejaakana, ayatüsia wachajaain sukuwaʼipa süpüla wounejaain na wayuukana süka watüjaain saaʼu kojutuin tia nümüin Jehová.

11. ¿Jamüsü watüjaaka saaʼu anain wakuwaʼipa nutuma Jehová sünain ounejawaa na wayuukana? (Ageo 2:7).

¹¹ Wainma kasa anasü eeka nutuma Jehová sutuma wounejaain na wayuukana sünain tü Outkajawaakat eere Sotuin Waaʼin Outuin Jesús. Jamüsüjaʼa soʼu 2021, wainma na outkajaakana wamaa mayaainjeʼe süpülajünüin woulia wojuʼitüin sutuma tü ayuuliikat COVID-19. Outkajaashii 21.367.603 wayuu, alanaʼaleeshiʼiya naya noulia na aküjaliikana pütchi nüchiki Jehová eekana sainküin mmakat. Mayaainjeʼe talatüin waaʼin sutuma weʼrüin noʼunuin watta naalii wayuu sünain tia, anasü sotule waaʼin kojutuin nümüin Jehová naya wayuukana waneʼewai nakua (Luc. 15:7; 1 Tim. 2:3, 4). Wounejaapa na wayuukana watüjaa aaʼu nükaalinjain waya Jehová süpüla wantüin nanain na wayuu aapajeekana tü pütchikat (paashajeʼera Ageo 2:7).

12. ¿Kasa eeka süpüla kapüleein atuma wamüin woʼunuin sünain tü Outkajawaakat eere Sotuin Waaʼin Outuin Jesús? (Piirakaa sümüin tü ayaakuaakat).

¹² Nüküjatüjülia Jesús mülieenain waya sülüʼütpa sükalia süpüla sajaʼttüin kasa mojusü maʼaka saaʼin shiyoutule wapüshi wanoujain, wapüleeruaanüle aaʼin saaʼujee wanoujain jee shiale sutuma atkawaa, ayuulii jee waneirua kasa (Mat. 10:36; Mar. 13:9; Luc. 21:10, 11). Sülatüle wamüin tia, eesü süpüla kapüleein wamüin woʼunuin sünain tü Outkajawaakat eere Sotuin Waaʼin Outuin Jesús. ¿Kasa naaʼinraka na wawalayuu alatakana amüin tia? ¿Kasa naaʼinraka Jehová süpüla nükaalinjain naya?

13. ¿Jamüsü anaka nukuwaʼipa Artiom nutuma Jehová süka yalayalain naaʼin sünain aainjaa tü Outkajawaakat eere Sotuin Waaʼin Outuin Jesús suluʼu tü kaatsetkat?

¹³ Püreesale waya. Na wawalayuu püreesakana saaʼujee nanoula, nachajaain maʼin sukuwaʼipa naaʼinrüinjatüin tü Outkajawaakat eere Sotuin Waaʼin Outuin Jesús. Jülüjataa waaʼin nukuwaʼipa Artiom. Püreesashi nia soʼu 2020 soʼunnaa sükalia tü Outkajawaakat eere Sotuin Waaʼin Outuin Jesús. 17 meetüro seeruluin tü kuatta eejachire püreesain nia. Eeshii nekerotinnüle jaʼraishii püreesashii suluʼu. Mayaainjeʼe püreesain nia, nünta anainrü tü choʼujaakat süpüla naaʼinrüin tü Outkajawaakat eere Sotuin Waaʼin Outuin Jesús otta müsia yapasü nutuma tü pütchikat. Eepejeʼe wanee kasa ataʼülaka nukuwaʼipa, tia shia nakaijüliin sümaa yarüttüin nanüiki na püreesakana nümaa. Nüküjaka Artiom namüin eere süpüla nnojoliin nakamüjüin jee nnojoluin yarüttüin nanüiki soʼu wanee oora. «Aa», namakalaka nümüin. Anuu nünüiki Artiom: «Taküjain namüin eere süpüla taküjain süchiki jamüin waainjaka tü  Outkajawaakat eere Sotuin Waaʼin Outuin Jesús». Mayaainjeʼe naküjain nümüin nnojoluin kachipünaain naaʼin tü outkajawaakat, keeʼireesü naaʼin natüjaain sooʼomüin süchiki tia neʼrapa tü naaʼinrakat sünain tü outkajawaakat.

14. ¿Kasa saaʼinraka Weteet suluʼu waneirua mma süpüla naainjain na wawalayuukana tü Outkajawaakat eere Sotuin Waaʼin Outuin Jesús soʼunnaa tü ayuuliikat COVID-19?

¹⁴ Sutuma tü ayuuliikat COVID-19, nnojoishii outkajaain waya suluʼu tü Piichi Outkajaaleekat süpüla waainjain tü Outkajawaakat eere Sotuin Waaʼin Outuin Jesús, ayatapejeʼe waapajüin tia pütchikat. c Na wawalayuu kamaʼanakana internet naainjain tia outkajawaakat suluʼupünaa videollamada. ¿Jama na wawalayuu nnojoliikana kamaʼanain internet suluʼu waneirua mma? Alatinnüsü tia outkajawaakat suluʼu telewisoot jee müsia raawia. Suluʼu waneirua mma, akürawaajünüsü tia outkajawaakat suluʼu Weteet suluʼu 500 anüikii süpüla naainjain tia outkajawaakat na wawalayuu kepiakana wattapünaa. Eeshii wawalayuu eʼikajaakana tia pütchi akürawaajuushikat namüin naya wawalayuukana.

15. ¿Kasa watüjaka sünainjee Sue, wanee wayuu ekirajaaka sünain tü Bibliakat?

 ¹⁵ Nayoutule na wapüshikana wapüleerua wanoujain. Noʼutku na kapüleekana amüin noʼunuin sünain tü Outkajawaakat eere Sotuin Waaʼin Outuin Jesús, naya na ayoutakana apüshi süpüleerua nanoujain. Tia shia tü alatakat sümüin Sue wanee wayuu ekirajaaka sünain tü Bibliakat. Soʼu 2021, wanee kaʼi süpülapünaa saainjünüin tü Outkajawaakat eere Sotuin Waaʼin Outuin Jesús, süküjain Sue sümüin tü wawala ekirajakat shia nnojoluin süpüla saapajüin tü outkajawaakat süka nayoutuin süpüleerua na süpüshikana tü sunoujakalü anain. Saashajeʼeraka tü wawalakat sümüin tü sümakat Lucas 22:44, süküjaka sümüin anain washatüle nukuwaʼipa Jesús otta wachuntule kaalinwaa nümüin Jehová sülatüle wanee kasa wamüin. Shiasaʼa waneemüin kaʼi, yapasü sutuma Sue tü pankat jee müsia tü wiinokot. Sünajaka suluʼupünaa jw.org tü videokot «Aʼwaajaa Maleiwa wattaʼa maalü soʼu tü kaʼi eeinjatkat tü Outkajawaakat eere Sotuin Waaʼin outuin Jesús». Mapa, shikerotoko suluʼu sukuatse süpüla saapajüin suluʼupünaa teleepono tü Outkajawaakat eere Sotuin Waaʼin Outuin Jesús. Anuu tü süshajakat mapa sümüin tü wawala ekirajakat shia: «Anasü maʼin süka pütütüleʼerüin taaʼin soʼukalinka. Sutuma tia taapajüin tü Outkajawaakat eere Sotuin Waaʼin Outuin Jesús. Nükaalinjain taya Jehová, talatüsü maʼin taya sutuma tia otta taapüin analuʼut nümüin saaʼu tia». Sülatüle pümüin tia, ¿nükaalinjeeiche pia Jehová?

16. ¿Jamüsü watüjaaka maʼin saaʼu aneerüin wakuwaʼipa nutuma Jehová wachajaale maʼin sukuwaʼipa süpüla woʼunuin sünain tü Outkajawaakat eere Sotuin Waaʼin Outuin Jesús? (Roma 8:31, 32).

¹⁶ Kojutusü maʼin nümüin Jehová tü waaʼinrakat süpüla sotuin waaʼin outuin chi Nüchonkai waaʼu. Watüjaa maʼin aaʼu aneerüin wakuwaʼipa nutuma kojutule maʼin wamüin tü naaʼinrakat wapüleerua (paashajeʼera Roma 8:31, 32, TNM). Makalaka anain maʼin nnojoliire makatüin waya suulia tü Outkajawaakat eere Sotuin Waaʼin Outuin Jesús aainjüneetka soʼu juyakat tüü. Waʼyataa maʼin nümüin Jehová sükalioʼu tia outkajawaakat.