1, 2. (1) ¿Kasa ayatüinjatka waaʼinrüin süchikijee woutiisaa? (2) ¿Jamüsü waaʼinrajatka tia?

 ¿JEʼRATUA pipitajüin tü pipiakat? Eesüjaʼa wulere maʼin shia putuma süpülapünaa kepiain pia suluʼu. ¿Kaseerü alataka nnojorüle pipitajüin shia? Watteerü saalii wasuura suluʼu jee sümamüla mma. Süpüla ayatüin wulein putuma tü pipiakat, pipitajawalinjatü shia.

² Tia shia tü waaʼinrakat süpüla weeʼiratüin tü jülüjakat waaʼin jee tü wakuwaʼipakat. Shiimain watüjaain saaʼu wanouteʼerüin wakuwaʼipa süpülapünaa woutiisain waya jee wasünneʼerüin «tü kasa yarüttakalü atuma weʼiruku jee tü yarüttakalü atuma tü jülüjakat waaʼin» (2 Cor. 7:1, TNM). Anuupejeʼe tü waaʼinrajatkat naashin chi aluwataaushikai Pablo: «Ayataʼaya jiiʼiratüin tü jülüjakat jaaʼin» (Éf. 4:23, TNM). ¿Jamüsü ayatüinjatka waaʼinrüin tia? Nnojorüle waaʼinrüin tia, amojujaajeerü wakuwaʼipa noʼuluʼu Jehová sutuma tü kasa yarüttüsü joutkat maaʼulu. Suulia sülatüin tia wamüin, wasakireʼerüinjatü waaʼin anale tü jülüjakat waaʼin, tü wakuwaʼipakat jee tü keeʼireekat waaʼin.

3. ¿Kasa waaʼinrajatka süpüla ayatüin weeʼiratüin tü jülüjakat waaʼin? (Roma 12:2).

³ ¿Kasa waaʼinrajatka süpüla ayatüin weeʼiratüin tü jülüjakat waaʼin? (Paashajeʼera Roma 12:2, TNM). Nnojotsü neʼe waaʼinrüinjatüin waneirua kasa anasü süpüla anainjatüin wakuwaʼipa, choʼujaasiaʼaya wasakireʼerüin waaʼin süpüla wayaawatüin saaʼu tü suluʼukat waaʼin otta wanouteʼerüinjatü tü wakuwaʼipakat süpüla anain shia wanaapünaa sümaa tü nuchuntakat Jehová. Nnojotsü waaʼinrüinjatüin tia uwatua, waaʼinrajatü shia waneepia.

4. ¿Kasa waaʼinrajatka suulia wekiiruʼuin tü kasa yarüttüsü joutkat maaʼulu?

 ⁴ Lotopa wakuwaʼipa, mapüleejeerü wamüin waaʼinrüin tü kasa talateetkalü atuma naaʼin Jehová. Sümaʼinruʼu waʼatapajüin tia, ayatüinjana waya aʼyataain süchiirua tia. Süpüla weeʼiratüin tü jülüjakat waaʼin, wayaawatüinjatü aaʼu tü keeʼireekat naaʼin Jehová wapüleerua maʼaka nüküjain shia chi aluwataaushikai Pablo suluʼu Roma 12:2. Suulia wooʼulaain wekiiruʼuin tü kasa mojusü joutkat maaʼulu, anasü wasakireʼerüle waaʼin pansaale tü keeʼireekat waaʼin jee tü waneekakat sümaa tü jülüjakat naaʼin Maleiwa.

5. ¿Kasa waaʼinrajatka süpüla watüjaain saaʼu eejüle waaʼin süpüla tü nükaliakat Jehová? (Piirakaa sümüin tü ayaakuaakalüirua).

⁵ Keeʼireesü naaʼin Jehová eejüinjatüin waaʼin süpüla tü nükaliakat (2 Ped. 3:12, TNM). Anasü wasakireʼerüle waaʼin sünain tüü: «¿Jaʼyasüche taaʼu tayaawatüin saaʼu sülüʼülüin sükalia süpüla sajaʼttüin tü kasa alatakat sainküin mma? ¿Jaʼyasüche saaʼujee tü taneekakat süchiki tü ekirajawaakat jee tü aʼyatawaakat kojutuin maʼin tamüin tü taʼyataainkat nümüin Jehová? ¿Tatüjaa aaʼuche naaʼinmajeechin taya Jehová sümaa tapüshi? ¿Shapaataapa taaʼin saaʼujee tü kasa choʼujaakat tamüin?». Talatüshi maʼin Jehová wachajaale maʼin sukuwaʼipa süpüla pansaainjatüin wakuwaʼipa wanaapünaa sümaa tü nüchekakat (Mat. 6:25-27, 33, TNM; Filip. 4:12, 13).

6. ¿Kasa waaʼinrawalinjatka süpüla weeʼiratüin tü jülüjakat waaʼin?

⁶ Wasakireʼerawalinjatü waaʼin anale tü jülüjakat waaʼin, wayaawatüle saaʼu nnojoluin anain shia, wanouteʼerüinjatü. Anuu tü nümakat Pablo namüin na anoujashii chajanakana Corinto: «Ayataʼaya jüsakireʼerüin jaaʼin icherejeʼeya jia süchiirua tü junoujakalü anain, jiyaawatüinjatpejeʼe saaʼu analejeʼeya tia jaaʼinrakat» (2 Cor. 13:5, TNM). Süpüla  katsüinjatüin wanoula nnojoishii neʼe outkajaainjanain waya jee aküjainjanain waya pütchi, wanouteʼerüinjatiaʼaya tü jülüjakat waaʼin, tü kasa mojusü suchuntaakat waaʼin jee tü keeʼireekat waaʼin. Süpüla ayatüinjatüin wanouteʼerüin tü jülüjakat waaʼin, waashajeʼerüinjatü tü Nünüikikat Maleiwa, wanaawainjatü waaʼin sümaa tü jülüjakat naaʼin Jehová otta wanouteʼerüinjatü tü mojukat watuma (1 Cor. 2:14-16, TNM).

7. (1) ¿Kasa amaa waaʼinrajatka saashin Éfeso 4:31, 32? (2) ¿Jamüsüche kapüleeka wamüin waaʼinrüin tia?

⁷ (Paashajeʼera Éfeso 4:31, 32, TNM). Nnojotsü neʼe weeʼiratüinjatüin tü jülüjakat waaʼin, jeketüinjatiaʼaya tü wakuwaʼipakat (Éf. 4:24). Nnojoleerü anoutaain wakuwaʼipa sümüiwaʼa, acheküshii waʼyataainjanain süchiirua wanouteʼerüin tü wakuwaʼipakat suulia jashiee, üttaa aaʼin jee suulia ülüʼüttaa aaʼin sünain wayuu. ¿Jamüsüche kapüleeka wamüin wooʼulaain tia? Shia süka icheshaatain sünain wakuwaʼipa. Aashajaasü tü Bibliakat nüchiki chi jookai süpüla aashichijawaa jee jashiee (Prov. 29:22). Jaʼitashii woutiisain waya, ayatüinjatü wachecherüin waaʼin suulia tü wakuwaʼipapuʼukat paala. Tia shia tü alatakat nümüin wanee wawala. Anashii wekirajaale nüchiki.

8, 9. ¿Jamüsü wayaawataka sünainjee nukuwaʼipa Stephen ayatüinjatüin weeʼiratüin wakuwaʼipa?

⁸ Eeshi wanee wawala Stephen nünülia, kapüleesü nümüin nüchecherüin naaʼin suulia jashiee. Anuu nünüiki: «Soʼu wanee kaʼi, aküjashii waya pütchi suluʼupünaa wanee barrio. Teʼrakalaka wanee kaʼruwarai naapaain taraawiase suluʼujee teʼejena. Tawataaka maʼin nüchiirua, tasaʼwateematapa nia nujutapünaaka tü raawiakat jee ayatüshijaʼa mashaʼwalaain nia. Taküjaka namüin waneinnua wawalayuu süchiki tü taaʼinrakat suulia suʼluwajünüin taraawiase. ‹¿Kasaje paaʼinraka pütaʼürüle chi kaʼruwaraikai?›, nümaka tamüin wanee wawala laülaakai aaʼin sünain anoujaa. Tayaawatakalaka saaʼu isayülüin tapüleerua tanouteʼerüin takuwaʼipa». b

⁹ Sünainjee tü alatakat nümüin Stephen, wayaawata aaʼu eein süpüla ayatataain neʼe tü wakuwaʼipapuʼukat jaʼitasü anoutaayaain tia waaʼinruʼu. Mülejeʼeya wakuwaʼipa, nnojo yüülain waaʼin jee nnojo jülüjain waaʼin mojuin tü wakuwaʼipakat sünain anoujaa. Soto waaʼin tü nümakat chi aluwataaushikai Pablo wanaa sümaa nümüin: «Taainjeepa sümüin wanee kasa eekai anain, shia neʼe taleʼeruʼuka achiki aaʼinraa kasa mojusü» (Roma 7:21-23, TNM). Süka waleʼeruʼuin wapüshuaʼa süchiki kaainjalaa, eesüjaʼa waaʼinreerüle süchikuaʼa wanee kasa yarütteetka atuma wakuwaʼipa, maʼaka yarüttüin süchikuaʼa wanee piichi sutuma wasuura jee sümamüla mma. Müshiijeseʼe waʼyataainjanain süchiirua wulein wakuwaʼipa. ¿Kasa waaʼinrajatka süpüla wountuin tia?

10. ¿Kasa waaʼinrajatka süpüla wayamülüin tü kasa mojusü jookalü apüla waya? (1 Juan 5:14, 15).

¹⁰ Waküja nümüin Jehová tü kasa mojusü jookalü apüla waya sümaa weʼitaainjatüin waaʼin sünain naapajeerüin wanüiki jee nükaalinjeenain waya (paashajeʼera 1 Juan 5:14, 15). Mayaainjeʼe watüjaain saaʼu nnojoleerüin nüsünneʼerüin Jehová woulia tia uwatuwoʼushi, watüjaa aaʼu nükaalinjeenain waya süpüla wachecherüin waaʼin suulia tia (1 Ped. 5:10). ¿Kasa waaʼinrajatka süpüla pansaainjatüin wakuwaʼipa wanaapünaa sümaa tü wachuntakat nümüin Maleiwa? Nnojoliinjana waya sünainpünaain wanee kasa waaʼinreetka atuma wanee kasa mojusü joopuʼuka apüla waya. Jamüshiijaʼa waya, nnojoluinjatü wanajüin peliikula, programa suluʼujee telewisoot  jee waashajeʼerüin karaloʼuta sünainpünaaka tü kasa mojusü joopuʼukalü apüla waya jee nnojo wooʼulaain wekiiruʼuin tü kasa mojusükat (Filip. 4:8; Col. 3:2, TNM).

11. ¿Kasa waaʼinrajatka süpüla jeketüinjatüin wakuwaʼipa?

¹¹ Nnojotsü neʼe wooʼulaainjatüin suulia tü wakuwaʼipapuʼukat, aʼyataainjanaʼaya waya süchiirua süpüla jeketüinjatüin shia. ¿Kasa waaʼinrajatka süpüla wountuin tia? Weʼraajüinjachi maʼin Jehová, weʼraajüinjatü tü nukuwaʼipakat otta washatüinjatü shia (Éf. 5:1, 2). Waashajeʼerapa suluʼujee tü Bibliakat wanee aküjalaa aashajaaka süchiki motuin naaʼin Jehová saainjala wayuu, anasü wasakireʼerüle waaʼin sünain tüü: «¿Motusüche taaʼin naainjala na waneinnua?». Waashajeʼerapa suluʼujee tü Bibliakat süchiki sümülialaain naaʼin Jehová naalin na wayuu alatakana amüin kasa mojusü, anasü wasakireʼerüle waaʼin sünain tüü: «¿Amülialaasüche taaʼin naalin na wawalayuu eʼrakana choʼujawaa sümaa takaalinjain naya?». Ayataʼaya weeʼiratüin tü jülüjakat waaʼin süpüla jeketüinjatüin wakuwaʼipa otta nnojo wayüülajaain isale maʼin shia wachiki.

12. ¿Jamüsü wayaawataka sünainjee nukuwaʼipa Stephen sunoutaain sukuwaʼipa wayuu sutuma tü Bibliakat?

¹² Niiʼiratüin shiʼipaʼaya nukuwaʼipa Stephen, chi wachuntayüikai anülia suluʼu pütchi 8. Müshi nia: «Soʼujee woutiisain taya, eesü kaʼi kapüleeka oʼu tamüin tachecherüin taaʼin suulia jashiee. Jashicheepa taya, oʼunajaashi taya suulia tatkaʼalaain neʼe jee shiale tachajaain sukuwaʼipa süpüla teimaleʼerüin tü alatakat. Wainma wayuu aküjaka tamüin anain maʼin tü taaʼinrakat süpüla tachecherüin taaʼin suulia jashiee, akaʼaya taʼwayuuse, müsia sünüiki. Ponusü maʼin taaʼin süka müitpain takuwaʼipa. Tatüjaa aaʼu tanouteʼerüin takuwaʼipa sutuma tü sümakat tü Bibliakat, isasüjeʼe tachiki tanouteʼerüin shia süka taaʼin tamüiwaʼa».

13. ¿Kasa waaʼinrajatka süpüla suchuntaain waaʼin waaʼinrüin kasa anasü? (Galacia 5:16).

¹³ (Paashajeʼera Galacia 5:16, TNM). Kamaneeshi Jehová otta naapüin wamüin tü nüpülainkat süpüla nükaalinjain waya sünain aaʼinraa tü kasa anasükat. Wanaa sümaa woutkajaain jee waashajeʼerüin tü Nünüikikat Maleiwa, wooʼulaain suʼunirüin wakuwaʼipa tü nüpülainkat. Woutkajaapa kottushii waya namaa na wawalayuukana, na achajaakana maʼin sukuwaʼipa süpüla naaʼinrüin tü kasa anasükat. Katsüinkalaka waaʼin suluʼujee tia (Heb. 10:24, 25; 13:7). Wanaa sümaa wachuntuin nümüin Jehová süka süpüshuaʼa waaʼin süpüla nüchecherüin waaʼin suulia tü kasa mojusü jookalü apüla waya, naapeerü wamüin tü nüpülainkat süpüla yalayalain waaʼin jee süpüla ayatüin wachecherüin waaʼin. Waaʼinrüle süpüshuaʼa tia, eesüjaʼa nnojoleerüle süsünneʼerüin woulia tü kasa jookalü apüla waya, süchechereetpejeʼe waaʼin suulia. Nnojoleerü waainjain tü kasa mojusü suchuntaakat weʼiruku, wooʼulaale nuʼunirüin wakuwaʼipa Maleiwa sükajee tü nüpülainkat maʼaka süküjain Galacia 5:16.

14. ¿Kasa waaʼinrajatka süpüla ayatüinjatüin jülüjain waaʼin kasa anasü?

¹⁴ Kiʼrapa waya sünain aaʼinraa tü kasa aleeweenakalü atuma waya nümaa Jehová, anasü ayatüle waaʼinrüin tia jee anasü ayatüle jülüjain waaʼin tü kasa anasükat. ¿Jamüsü waaʼinrüinjatka tia? Süka eein wanee waʼünüü matüjainka eemerawaa, shiajaʼa tü kasa mojusü suchuntaakat waaʼin. Jaʼitainna woutiisain waya, eesüjaʼa suchuntaale waaʼin waneirua kasa eekai mojuin, maʼaka saaʼin tü ashaitaakat saaʼu nneerü, sülanaʼaleere watuma tü asüüshikat jee wanajüle shiyaakua wayuu masheʼinsat (Éf. 5:3, 4). Anuu nünüiki wanee wawala jimaʼai: «Tachecherüin maʼin taaʼin suulia  wanee kasa mojusü suchuntaakat taaʼin, kamalainshii tamüin na toolojiraakana wanaa tamaa. Alatüinjatia taaʼinruʼu tia toulia, isayütpejeʼe tachiki tasünneʼerüin shia suluʼujee taaʼin». ¿Kasa waaʼinrajatka isale wachiki wasünneʼerüin suluʼujee waaʼin wanee kasa eekai mojuin?

15. ¿Jamüsü anaka sotule waaʼin sülatüirüin namüin na waneinnua tü kasa ooʼulakünakalü aka waaʼin? (Piirakaa sümüin tü ayaakuaakat).

¹⁵ Kapüleere wamüin wasünneʼerüin suluʼujee waaʼin wanee kasa mojusü suchuntaaka waaʼin, anasü sotule waaʼin nnojoliin wamüiwaʼain waya. Müsü tü Bibliakat: «Alatüirü namüin na waneinnua tü kasa ooʼulakünakalü aka jaaʼin» (1 Cor. 10:131, TNM). Anuu wanee sukuwaʼipa süküjia tia pütchikat suluʼu wanee Biblia: «Shiaʼaya neʼe suchuntaaka jaaʼin tü kasa mojusü suchuntaakat saaʼin wayuu süpüshuaʼa». Tia pütchikat namüinjatü na anoujashii kepiakana suluʼu tü pueulokot Corinto. Noʼutku nayakana amaʼüjiraapuʼushii nakuwaʼipa, jaleetpuʼushii jee epeʼrüliipuʼushii naya (1 Cor. 6:9-11, TNM). ¿Nnojotsüche suchuntaain naaʼin kasa eekai mojuin nanoujapa? Ayatüsia suchuntaain naaʼin kasa mojusü. Shiimain naneekuushin süpüla naluwataainjanain chaa iipünaa, ayatapejeʼe naleʼeruʼuin süchiki kaainjalaa. Müsüjeseʼe eein süpüla suchuntaʼawalin naaʼin kasa eekai mojuin. Akatsüinraasü waaʼin süka watüjaain saaʼu nalatüinnapain waneinnua süchikumüin tia sümaa nayamülüin shia. Müsüjeseʼe eein süpüla ayatüin katsüin waaʼin sünain anoujaa jee nnojo motuin waaʼin nakuwaʼipa na wawalayuukana sainküin mmakat süpüshuaʼa sünain neʼrüin müliaa maʼaka tü müliaa weʼrakat (1 Ped. 5:9).

16. (1) ¿Kasa nnojoluinjatka wekiiruʼuin? (2) ¿Jamüsü nnojoluinjatka wekiiruʼuin tia?

¹⁶ Nnojoluinjatü wekiiruʼuin nnojoleerüin jaralüin ayaawatüin saaʼu jamüin waaʼin sutuma tü kasa mojusü jookalü apüla waya. Waaʼinrüle tia, emeejiraajeena waya waaʼin, jülüjeerü waaʼin mepin tü alatakat wamüin jee iseerü wachiki wayamülüin tü kasa jookalü apüla waya.  Anuupejeʼe sünüiki tü Bibliakat: «Sutuma waneepiain Maleiwa jümaa, nnojoleerü nuuʼulaain suuʼulakünüin jaaʼin süka wanee kasa nnojoleetka jüchecherüin atuma jaaʼin. Suuʼulakünapa jaaʼin nükaalinjeena jia Maleiwa süpüla jüchecherüinjatüin jaaʼin soʼunnaa tia» (1 Cor. 10:132, TNM). Jaʼitairü suchuntuin maʼin waaʼin wanee kasa eekai mojuin, eeshiʼiya süpüla ayatüin woonooin waneepia nümaa Jehová. Süka nükaalinjain waya, nnojoleerü waaʼinrüin tü kasa mojusü suchuntaakat waaʼin.

17. Mayaainjeʼe eejeerüin kaʼi suchuntaajeetka oʼu waaʼin kasa mojusü, ¿kasa eeka süpüla waaʼinrüin?

¹⁷ Soto waaʼin, eejeerüin kaʼi suchuntaajeetka oʼu waaʼin waaʼinrüin kasa mojusü sutuma waleʼeruʼuin süchiki kaainjalaa. Sülatüle wamüin tia, wasünneʼeramaata shia suluʼujee waaʼin maʼaka naaʼinrüin shia José wanaa sümaa nüpantajaain suulia nuʼwayuuse Potifar (Gén. 39:12). Nnojo wooʼulaain süchepchiain waya tü kasa mojusü suchuntaakat waaʼin.

18, 19. ¿Kasa wasakireʼerüinjatka anain waaʼin süpüla ayatüinjatüin waʼyataain süchiirua weeʼiratüin tü jülüjakat waaʼin?

¹⁸ Keeʼireere waaʼin ayatüinjatüin weeʼiratüin tü jülüjakat waaʼin, aʼyataainjana waya süchiirua anain noʼuluʼu Jehová tü wakuwaʼipakat otta tü suluʼukat waaʼin. Anasü wasakirawaire waaʼin sünain tüü: «¿Jaʼyasüche sünainjee tü taaʼinrakat tayaawatüin saaʼu sülüʼülüin sükalia sajaʼttüinjatüin tü kasa mojusü alatakat sainküin mma? ¿Ayatüshiche taya aʼyataain süchiirua jeketüinjatüin takuwaʼipa shiʼipaʼaya? ¿Tooʼulaainche nuʼunirüin Jehová takuwaʼipa sükajee tü nüpülainkat süpüla nnojoluinjatüin taaʼinrüin tü kasa mojusü suchuntaakat taaʼin?».

¹⁹ Wasakireʼerapa waaʼin sünain tia pütchikat, waaʼinmaa tü kasa wanouteʼerüitpakat sünain wakuwaʼipa, nnojo wayüülajaain saalinjee tü isayütkat wachiki wanouteʼerüin. Anasü waaʼinrüle tü sümakat Filipos 3:16 (TNM), tü makat: «Sükatchinraalejeʼeya maʼin wanoula, ayataʼaya wakatchinrüin shia». Waaʼinrüle tia, eʼreena waya kasa anasü nutuma Jehová saaʼujee waʼyataain süchiirua weeʼiratüin tü jülüjakat waaʼin.