Wainma na miyoʼukana naʼaka na wayuu mojutukana atumawaa na jieyuukana. Jülüjataa waaʼin nünüiki wanee wawala alapalaai naaʼu na wawalayuu chakana Bolivia, Hans nünülia. Müshi nia: «Eeshii wayuu tooloyuu miyoʼukana naʼaka na wayuu mojutukana atumawaa na jieyuukana, suluʼusü naaʼin nayain na tooloyuukana alanaʼaleein ojutu noulialeʼeya na jieyuukana». Anuu nünüiki Shengxian, wanee laülaashi chejeʼewaikai Taiwán: «Eere kepiain taya, nnojotsü anain namüin na tooloyuukana naküjale na jieyuukana tü anakat süpüla naaʼinrüin. Eeshi süpüla mojutuin atumawaa wanee wayuu nüsakirüle wanee wayuu jierü süchiki tü anakat süpüla naainjain». Otta eeshii waneinnua tooloyuu mojutukana atumawaa na jieyuukana wanaa sümaa nemeʼerajaain naka.

Jaʼitaichi miyoʼuin wanee wayuu naʼaka na mojutukana atumawaa na jieyuukana, eesü süpüla nunouteʼerüin nukuwaʼipa (Éf. 4:22-24). Nuunteerü tia nüshatüle nukuwaʼipa Jehová. Wekirajaa süchiki tü naaʼinrakat Jehová süpüla kojutuin nümüin na jieyuukana, tü naaʼinrajatkat na wawalayuukana süpüla kojutuin naya namüin otta tü naaʼinrajatkat na laülaashiikana süpüla anain nakuwaʼipa napüleerua na waneinnua.

NUKUWAʼIPA JEHOVÁ NAMAA NA JIEYUUKANA

Anasü maʼin nukuwaʼipa Jehová namaa na jieyuukana. Chi Washikai Maleiwa amüliajüi nia wayuu, aishii nüpüla napüshuaʼa na nüchonniikana (Juan 3:16). Kojutushii nümüin na wawalayuu jieyuu aʼyataakana nümüin otta aishii naya nüpüla. Wekirajaa süchiki tü naaʼinrakat Jehová napüleerua.

Nnojotsü koʼuin nukuwaʼipa namüin na jieyuukana. Nukumajüin Jehová wayuu toolo jee wayuu jierü maʼaka saaʼin nukuwaʼipa (Gén. 1:27). Nnojoishi nukumajüin wanee wayuu toolo süpüla kekiinjachin jee nütüjainjachin maʼin suulia wanee wayuu jierü  (2 Crón. 19:7). Nukumajüin naya süpüla nountuin nayaawatüin saaʼu tü sümakat tü Bibliakat otta süpüla nashatüin nukuwaʼipa. Kojutushii maʼin nümüin Jehová na tooloyuu jee na jieyuu kanoulakana nünain, eesü süpüla naapüin kataa oʼuu namüin süpüla kaʼikat süpüshuaʼa jaʼitainna yaainjanale naya kepiain yaa mmapaʼa jee chainjanale kepiain naya chaa iipünaa süpüla naluwataainjanain jee sacerdoteinjanain naya (2 Ped. 1:1). Wayaawatakalaka saaʼu nnojoluin koʼuin nukuwaʼipa Jehová namüin na jieyuukana.

Naapajüin nanüiki. Jülüjasü naaʼin Jehová jamüin naaʼin na jieyuukana jee tü alatakat namüin. Jamüshijaʼa nia naapajüin sünüiki Raquel otta Ana, naapüin tü nachuntakat nümüin (Gén. 30:22; 1 Sam. 1:10, 11, 19, 20). Nüshajirüinña suluʼu tü Bibliakat nachiki waneinnua wayuu tooloyuu aapajakana nanüiki na jieyuukana. Soʼu wanee kaʼi nuchuntuin Jehová nümüin Abrahán noonooinjachin sümaa sünüiki Sara, tü nuʼwayuusekat. Naaʼinrakalaka tia (Gén. 21:12-14). Naaʼinrüin David tü sümakat Abigaíl. «¡Anataʼaleeshijaʼa maʼin chi Maleiwakai [...] makaʼa nuluwataain pia tanainmüin!», müshi nia sümüin (1 Sam. 25:32-35). Jee müshia Jesús, chi ashatakai maʼin nukuwaʼipa chi Nüshikai, oonooshi nia sümaa sünüiki María, tü niikat (Juan 2:3-10). Wayaawatakalaka saaʼu kojutuin nümüin Jehová na jieyuukana. Niiʼiyatüin Jehová nojutu wanaa sümaa naapajüin nanüiki.

Nütüjaa aaʼulu eein süpüla anain natuma tü naʼyataainkat. Nüküjain Jehová sümüin Eva saaʼinmajüinjatüin tü Mmakat nümaa Adán (Gén. 1:28). Wanaawasü sukuwaʼipa Eva nümaa Adán noʼuluʼu Jehová. Aneekünüsü Débora otta Huldá nutuma Jehová süpüla nachiaain na israelitakana. Achiaanüshi wanee nekiipüʼü na israelitakana natuma otta wanee aluwataai (Juec. 4:4-9; 2 Rey. 22:14-20). Müsia maaʼulu naapüin Jehová aʼyatawaa namüin na wawalayuu jieyuukana. Aküjashii naya pütchi, pürekutsoot naya jee misioneero naya. Akaalinjashii naya sünain akumajaa jee sünain anoutaa Piichi Outkajaalee jee Weteet. Eeshii na aʼyataakana suluʼu Weteet otta suluʼu Oficina Remota de Traducción. Nüneeküin naya Jehová süpüla nikeraajüin tü keeʼireekat naaʼin, müshii naya maʼaka saaʼin surulaat suluʼu wattain maʼin naalii (Sal. 68:11). Wayaawatakalaka saaʼu nnojoluin niʼrüin Jehová matchin na jieyuukana jee matüjain naya.

NAAʼINRAJATKA NA WAWALAYUU TOOLOYUUKANA SÜPÜLA NASHATÜIN NUKUWAʼIPA JEHOVÁ NAMÜIN NA JIEYUUKANA

Wawalayuu, süpüla wayaawatüin saaʼu washatüle tü nukuwaʼipakat Jehová namüin na wawalayuu jieyuukana, jülüjainjatü waaʼin tü suluʼukat waaʼin jee tü waaʼinrakat. Süpüla nütüjaain saaʼu wanee wayuu ayuuire tü naaʼinkat, anannüsü sükajee wanee maakina. Müsia tü waaʼinrajatkat süpüla watüjaain saaʼu anale jee mojule tü suluʼukat waaʼin nachiki na jieyuukana. Wasakira wanee waʼaleewain süchiki tü wakuwaʼipakat jee wekirajaa sünain tü Bibliakat. Wekirajaa sooʼomüin süchiki tia.

Wasakira waʼaleewainyuu (Prov. 18:17). Yooto waya namaa waʼaleewainyuu eekai kamaneein jee eekai nnojoliin ichein süchiirua tü namakat. Wasakira naya sünain tüü: «¿Anasüche takuwaʼipa namaa na wawalayuu jieyuukana? ¿Jülüjasüche naaʼin kojutuin naya tamüin? ¿Eesüche wanee kasa tanouteʼerüinjatka sünain takuwaʼipa?». Naküjale wamüin wanee kasa wanouteʼerüinjatka, nnojo jashichin waya namüin, anasü waapaale sümaa tü namakat wamüin.

Wekirajaa sünain tü Nünüikikat Maleiwa. Süpüla wayaawatüin saaʼu anale tü wakuwaʼipakat namaa na wawalayuu jieyuukana, jülüjainjatü waaʼin wanaawale tü suluʼukat waaʼin otta tü waaʼinrakat sümaa tü sümakat tü Bibliakat (Heb. 4:12). Wekirajaapa sünain tü Bibliakat, atüjashii waya nanainjee waneinnua tooloyuu anakana akuwaʼipa namaa na jieyuukana jee müsia nanainjee na nnojoliikana anain akuwaʼipa namaa. Anasü jülüjale waaʼin jaraliin na washatakana akuwaʼipa. Waashajeʼerüle waneesia neʼe wetsiikulo aashajaaka nachiki na jieyuukana, eesüjaʼa süpüla nnojoluin pansaain tü jülüjakat waaʼin nachiki. Anasü waashajeʼerüle kojuyasü wetsiikulo aashajaaka nachiki süpüla pansaainjatüin tü jülüjakat waaʼin sümaa tü jülüjakat naaʼin Maleiwa. Jülüjataa waaʼin tü sümakat 1 Pedro 3:7. Saashin tia pütchikat aaʼinmajünüinjana na jieyuukana maʼaka saaʼinmajünüin wanee iita eekai jooin süpüla susoʼttuin. b ¿Shiache süküjeeka achiki tia wetsiikulokot nnojoliin kekiin maʼin na jieyuukana jee isain nachiki  waneirua kasa? Nnojo. Süpüla pansaain wamüin tü aküjüneekalü achiki sükajee tia wetsiikulokot, anasü jülüjale waaʼin tü sümakat Galacia 3:26-29. Süküjain yala nüneeküin Jehová waneinnua jieyuu jee tooloyuu süpüla naluwataain wanaa nümaa Jesús chaa iipünaa. Wekirajaale sünain tü Bibliakat jee wasakirüle waʼaleewainyuu süchiki tü wakuwaʼipakat, kojuteena watuma na wawalayuu jieyuukana.

NAAʼINRAKA NA LAÜLAASHIIKANA SÜPÜLA KOJUTUIN NATUMA NA WAWALAYUU JIEYUUKANA

Süpüla anainjatüin nakuwaʼipa na wawalayuu tooloyuukana namaa na wawalayuu jieyuukana, anasü nashatüle nakuwaʼipa na laülaashiikana. ¿Kasa naaʼinraka na laülaashiikana süpüla anain nakuwaʼipa napüleerua na waneinnua? Wekirajaa sünain waneirua kasa naaʼinraka na laülaashiikana süpüla kojutuin natuma na wawalayuu jieyuukana sümaa alin naya napüla.

Naküjain tü anakat natuma. Anasü nukuwaʼipa Pablo napüleerua na laülaashiikana. Suluʼu tü karaloʼuta namüinjatkat na anoujashii chejeʼewaliikana Roma, nüshajüin Pablo tü kasa anasü naainjakat waneinnua wawalayuu jieyuu (Roma 16:12). Talatakajasaʼa naaʼin naya wawalayuukana saashajeʼennapa namüin tia pütchikat. Müsia maaʼulu, naküjawalin na laülaashiikana namüin na wawalayuu jieyuukana anain maʼin tü nakuwaʼipakat jee tü naaʼinrakat sünain aʼyatawaa nümüin Jehová. Sünainjee tia, anasü naaʼin na wawalayuu jieyuukana jee nayaawata aaʼu kojutuin naya atumawaa. Choʼujaasü süküjünüin tia namüin süpüla ayatüin naʼyataain nümüin Jehová (Prov. 15:23).

Nepelisitaajapa na laülaashiikana na wawalayuu jieyuukana, naküjain namüin tü anakat natuma jee ojuʼitüsü tia suluʼujee naaʼin. Anuu tü sümakat wanee wawala kanüliaka Jessica: «Anasü waaʼin, ‹anasü tü paaʼinrakat› wamünüle amüin. Talatapejeʼe maʼin waaʼin süküjünüle wamüin kasain anain watuma, maʼaka saaʼin anain watuma nekirajia wachonnii süpüla laülaain naaʼin sünain tü outkajawaakat jee shiale sutuma wasaapünaain wanee wekirajüin süpüla wamaain sünain tü outkajawaakat». Naküjale na laülaashiikana namüin na wawalayuu jieyuukana kasain anain natuma, nayaawateerü aaʼu choʼujaain naya namüin na wawalayuukana jee kojutuin naya natuma.

 Naapajüin nanüiki. Süka nnojoluin yaletüin naaʼin na laülaashiikana, nayaawata aaʼu nnojoliin nayain neʼe atüjain süpüleerua wanee kasa. Müshiijeseʼe nasakirüin waneinnua wawalayuu jieyuu süchiki tü anakat süpüla naaʼinrüin. Atütülaasü naaʼin na wawalayuu jieyuukana sutuma tia. ¿Jama na laülaashiikana? ¿Kasa neʼraka suluʼujee tia? Anuu nünüiki Gerardo, wanee laülaashi aʼyataakai suluʼu Weteet: «Anasü maʼin tatuma tü taʼyataainkat taaʼinrüle tü namakat tamüin na wawalayuu jieyuukana. Eeshii na kakaliainakana sünain aainjaa wanee aʼyatawaa noulia na wawalayuu tooloyuukana». Wainma na wawalayuu jieyuu pürekutsootkana. Suluʼujee tia, neʼraajüin maʼin na wayuu naküjakana amüin pütchi otta jalapünaainjanain naya sünain aküjaa pütchi. Müshi Bryan, wanee laülaashi: «Jalouishii maʼin na wawalayuu jieyuukana namüin na wawalayuukana, wainma tü kasa watüjakat nanainjee».

Kojutusü namüin na laülaashiikana tü namakat na wawalayuu jieyuukana süchiki wanee kasa. Anuu nünüiki wanee laülaashi kanüliakai Edward süchiki tia: «Sünainjee tü sümakat wanee wawala jee tü sütüjaakalü aaʼu, eesü süpüla niyaawatüin maʼin saaʼu wanee wawala tü naaʼinrajatkat süpüla nunouteʼerüin wanee kasa otta jamüin saaʼin wayuu» (Prov. 1:5). Nnojorüle süpüla naaʼinrüin na laülaashiikana tü namakat na wawalayuu jieyuukana, kojutusü namüin tü namakat jee tü natüjaakalü aaʼu.

Nekirajüin naya. Kekiire na laülaashiikana nachajaajeerü sukuwaʼipa süpüla nekirajüin na wawalayuu jieyuukana. Eeshii süpüla nekirajüin naya süpüla noʼunirüin sukuwaʼipa tü outkajawaa süpülajatkalü aküjaa pütchi nnojoire eein wanee wawala woutiisakai. Eeshii süpüla nekirajüin naya sünain oʼuniraa maakina jee süpüla natüjain süpüleerua waneirua aʼyataaya choʼujaaka süpüla sukumajünüin piichi jee shiale süpüla sunoutunuin. Jamüshiijaʼa na laülaashiikana suluʼu Weteet, nekirajüin naya süpüla natüjain süpüleerua nanoutuin wanee kasa, natüjain süpüleerua ayaʼlajaa kasa jee ayaawajaa nneerü otta süpüla natüjain süpüleerua computador. Natüjaa aaʼu na laülaashiikana aneerüin natuma na wawalayuu jieyuukana tü aʼyatawaa aapünakat namüin.

Wainma wawalayuu jieyuu akaalinjakana na waneinnua sutuma natüjain nanainjee na laülaashiikana. Na ekirajünakana sünain akumajaa miichi, akaalinjashii naya sünain anoutaa miichi ojuichijaaka sutuma wawai jee shiale sutuma sukutkujaain mma. Na wawalayuu jieyuu ekirajünakana süpüla natüjain süpüleerua aküjaa pütchi eere jouluin wayuu, nekirajüinña waneinnua wawalayuu jieyuu süpüla natüjain wanaa namaa. ¿Jamüsü nanüiki waneinnua wawalayuu jieyuu nachiki na laülaashii ekirajakana naya? Müsü sünüiki Jennifer: «Wanaa sümaa takaalinjain sünain akumajaa wanee Piichi Outkajaalee, eeshi wanee laülaashi akatatka kaʼi süpüla nikirajüin taya. Niʼrüin anain maʼin tatuma tü taʼyataainkat. ‹Anasü maʼin putuma›, müshi nia tamüin. Kamalainsü tamüin taʼyataain nümaa süka kojutuin taya nümüin otta süka nnojoluin waaʼinmajüin naaʼin sünain tü taaʼinrakat».

TÜ WEʼRAKAT SUTUMA KOJUTUIN WAMÜIN NA WAWALAYUU JIEYUUKANA

Maʼaka naaʼin Jehová, aishiʼiya wapüla na wawalayuu jieyuu waneepiakana nümaa, müshii aka saaʼin wapüshi wamüin (1 Tim. 5:1, 2). Kojutusü maʼin wamüin jee talatüshii waya süka waʼwaajüin Jehová wanaa namaa. Anasü waaʼin sutuma nayaawatüin saaʼu alin naya wapüla jee wakaalinjain naya. Müsü sünüiki wanee wawala kanüliaka Vanessa: «Taapashaatain maʼin analuʼutka nümüin Jehová saaʼujee naʼakain taya wawalayuu tooloyuu kojutukana maʼin amüin taya». Müsü wanee wawala chejeʼewat Taiwán: «Taapüin analuʼutka nümüin Jehová otta namüin na wawalayuukana saaʼujee kojutuin waya namüin otta saaʼujee nayaawatüin saaʼu jamüin waaʼin. Akatsüinraasü tanoula sutuma tia jee talatüsü taaʼin süka naʼakain taya na wayuu aʼyataakana nümüin Jehová».

Talatüshi maʼin Jehová niʼrapa nashatüin na wawalayuukana tü nukuwaʼipakat süpüla kojutuin namüin na wawalayuu jieyuukana (Prov. 27:11). Anuu nünüiki wanee wawala laülaashi kanüliakai Benjamin, kepiashi nia Escocia: «Wainma na wayuu tooloyuu mojutukana amüin na jieyuukana. Wacheküinjeseʼe napüleerua na jieyuukana nayaawatüin saaʼu waneejatüin wakuwaʼipa nantapa suluʼumüin tü Piichi Outkajaaleekat». Wachajaa maʼin sukuwaʼipa süpüla washatüin nukuwaʼipa Jehová, ai wapüla na wawalayuu jieyuukana jee kojuta naya wamüin (Roma 12:10).