1, 2. ¿Kasa eeka süpüla sülatüin namüin na aʼyataashiikana nümüin Jehová?

 EESÜ süpüla suʼwanajaʼalaa sümüin wakuwaʼipa sutuma wanee kasa alatalaʼa maka wamüin. Soʼu wanee kaʼi nüküjain wanee tottoot nümüin wanee wawala kanüliashi Luis a kanserüin nia jee mamaʼajeechin nia sutuma. Eejatü wanee wawala kanüliaka Monika, saaʼinmaasü maʼin nümaa chi suʼwayuusekai tü naʼyataainkat nümüin Maleiwa. Laülaashi chi suʼwayuusekai suluʼu tü outkajaaleekat. Soʼu wanee kaʼi sütüjaa aaʼu piamain nukuwaʼipa chi suʼwayuusekai. Kakalia nuunjulajüin suulia müin nukuwaʼipa sümüin. Eejatü wanee wawala kanüliaka Olivia, maʼwayuusesat shia. Süpütüin shipia süpüleerua wanee wawai. Süleʼejapa shipialuʼumüin süchikijee sülatüin tü wawaikat, shiʼrüin tü shipiakat sajaʼttaleein. Naya wawalayuukana aʼwanajaʼalaa müsü nakuwaʼipa sutuma tü alatakat namüin. ¿Alatüirü pümüin wanee kasa aʼwanajaaka atuma pukuwaʼipa?

² Tü müliaa shiʼrakat wayuu süpüshuaʼa shia tü müliaa weʼrakat wayakana aʼyataashiikana nümüin Jehová. Eeshii süpüla ayuulin waya otta sülatüin kasa mojusü wamüin. Eepejeʼe sooʼomüin tü müliaa weʼrakat sutuma waʼyataain nümüin Jehová, maʼaka saaʼin süpüleeruaanüin waaʼin saaʼujee wanoujain. Nnojotsü süpüla nüsünneʼerüin woulia Jehová tü kasa alatakat wamüin. Nüküjapejeʼe wamüin nükaalinjeenain waya soʼunnaa tia (Is. 41:10). Sutuma eein nia wamaa soʼunnaa müliaa, eesü süpüla talatüin waaʼin, anain tü waneekakat otta waneepiain waya nümaa. Sünain ekirajaayakat tüü, wekirajaajeerü süchiki pienchisü kasa naaʼinraka Jehová süpüla nükatsüinrüin waaʼin soʼunnaa müliaa otta tü waaʼinrajatkat süpüla wooʼulaain nükaalinjain waya.

 NAAʼINMAJEENA WAYA JEHOVÁ

3. ¿Kasa iseetka wachiki shapaale maʼin waaʼin?

³ Sülatüle kasa mojusü wamüin, eesüjaʼa nnojorüle wayaawatüin saaʼu tü wakuwaʼipainjatkat jee tü waaʼinrüinjatkat. Müsü wakuwaʼipa sutuma mojushaatain maʼin waaʼin otta sutuma shapaain waaʼin. Shia alataka tia namüin na wawalayuu waküjakana achiki suluʼu pütchi waneesia. Müsü Olivia: «Teʼrapa sajaʼttaleein tü tepiakat sutuma tü wawaikat, mojushaatasü taaʼin otta nnojotsü tatüjaain saaʼu tü taaʼinrajatkat». Anuu sünüiki Monika süchiki jamüin saaʼin sutuma tü naaʼinrakat chi suʼwayuusekai: «Aishaatasü tamüin tia müsü sütkünakai taaʼin süka shiʼichi rüi. Nnojotsü taaʼinrüin tü taaʼinrawaikat soʼukaiwai soʼu tia. Eetaayaai jülüjain taaʼin sülatajatüin tamüin tia». ¿Kasa naaʼinraka Jehová süpüla nükaalinjain waya shapaapa maʼin waaʼin?

4. ¿Kasa naapeetka wamüin Maleiwa saashin Filipos 4:6, 7?

⁴ Tü naaʼinrakat Jehová. Nüküjain wamüin Jehová jimateerüin waaʼin nutuma (paashajeʼera Filipos 4:6, 7). Nnojoishi eein wanee wayuu ayaawatakai saaʼu tia jimata aaʼin naapaka Maleiwa. Naya aapünakana amüin tia jimataakalü aaʼin na aleewakana maʼin nümaa Jehová. ¿Eeiria piʼrüin jutatüin paaʼin suulia shapawaa aaʼin süchikijee puchuntuin maʼin nümüin Jehová? Piʼrüin tia sutuma tü jimataa aaʼin naapakat Maleiwa pümüin.

5. ¿Jamüsü aneetka tü suluʼukat waaʼin jee tü suluʼukat wekii sutuma tü jimataa aaʼin naapakat wamüin Maleiwa?

⁵ Saashin Filipos 4:7 jimateerü waaʼin nutuma Maleiwa jee naaʼinmajeerü tü suluʼukat waaʼin jee tü suluʼukat wekii. Tü pütchi «naaʼinmajeerü» makat sünainjeejatü tü naaʼinrapuʼukat na surulaatkana sümaiwa paala süpüla naaʼinmajüin wanee pueulo suulia sushutunuin saaʼu. Sutuma saaʼinmajünüin tü soʼukot pueulo natuma, eeshii süpüla natunkuin süka anakalü akuwaʼipa na wayuu kepiakana suluʼu. Müsia neʼe tü naaʼinrakat Jehová wapüleerua. Sutuma naaʼinmajüin tü suluʼukat waaʼin jee tü suluʼukat wekii, anasü waaʼin soʼunnaa müliaa (Sal. 4:8). Jaʼitairü nnojoluin sunoutamaatüin tü alatakat wamüin, eesü süpüla jimatüin waaʼin soʼunnaa maʼaka jimatüin saaʼin Ana soʼunnaa tü alatakat sümüin (1 Sam. 1:16-18). Jimatüle waaʼin, wayaawateerü saaʼu tü waaʼinrajatkat jee aneerü tü waneekakat.

6. ¿Kasa waaʼinrajatka süpüla jimatüin waaʼin nutuma Maleiwa? (Piirakaa sümüin tü ayaakuaakat).

⁶ Tü waaʼinrajatkat. Eesü süpüla wachuntuin nümüin Jehová naaʼinmajüinjanain waya maʼaka nuchuntuin wanee wayuu nümüin wanee surulaat süpüla naaʼinmajüinjachin nia. Woʼuraaja waneepia nümüin Jehová  jimataleepaʼaya waaʼin nutuma (Luc. 11:9; 1 Tes. 5:17). Shiaʼaya naaʼinrakat Luis sümaa Ana, tü nuʼwayuusekat, wanaa sümaa süküjünüin nümüin mamaʼajeechin nia sutuma tü ayuulii nünainkat. Anuu nünüiki: «Eetaayaai jülüjain waaʼin kapüleein maʼin nümüin wanee wayuu tü naaʼinrajatkat soʼunnaa ayuulin nia, maʼaka saaʼin tü tratamiento nüneeküinjatkat. Jimatapejeʼe taaʼin sutuma tachuntuin maʼin nümüin Maleiwa soʼunnaa tia». Oʼuraajüshii naya waneepia, nachuntuin maʼin nümüin Jehová süpüla naapüinjatüin wanee jimataa aaʼin namüin, süpüla naaʼinmajüinjatüin tü suluʼukat naaʼin otta süpüla anainjatüin tü naneekakat. Nayaawata aaʼu naapüin Jehová namüin tü nachuntakat nümüin. Sülatülejeʼeya pümüin wanee kasa kapüleeka maʼin, ayataʼaya puʼuraajüin waneepia. Piʼreetkalaka naapüin pümüin Jehová wanee jimataa aaʼin, naaʼinmajeerü tü suluʼukat paaʼin jee tü suluʼukat pikii (Roma 12:12).

KATSÜINJEERÜ WAAʼIN NUTUMA JEHOVÁ

7. ¿Jamüsü waaʼin weʼrüle maʼin müliaa?

⁷ Weʼrüle maʼin müliaa, kapüleejeerü wamüin wachecherüin waaʼin jee nnojoleerü wayaawatüin saaʼu tü waaʼinrajatkat. Jamüsüjaʼa wanee anuwa soʼunnaa wanee wawai, eesü süpüla shiʼyaatuuin sutuma muloʼuin sümüna tü palaakat. Wayakana müshii aka saaʼin tü anuwakat jee tü wawaikat müsü aka saaʼin tü alatakat wamüin. Mojule waaʼin jee shapaale waaʼin sutuma tü alatakat wamüin müsü aka saaʼin sümüna tü palaa aʼyaatakat tü anuwakat. Shia tü alatakat sümüin Ana wanaa sümaa nünaajaain Luis, chi suʼwayuusekai. Müsü shia: «Eesü mojuwaire taaʼin, ‹aluʼuwatsia taya›, maʼwaisü taya suluʼu taaʼin. Eepejeʼe waneirua kaʼi jashichika oʼu taya süka nnojoluichipain Luis». Eesü kaʼi müin sümüiwaʼakai saaʼin tia wawalakat, eesü jashichiwaire jee shapaʼawaire saaʼin sutuma isain süchiki tü naaʼinrapuʼukat chi suʼwayuusekai. Müsü chajatkai saaʼin pasanain sünain tü palaakat soʼunnaa wanee wawai. ¿Kasa naaʼinraka Jehová süpüla nükatsüinrüin waaʼin soʼunnaa shapaain maʼin waaʼin?

8. ¿Kasa naaʼinraka Jehová wapüleerua saashin 1 Pedro 5:10?

⁸ Tü naaʼinrakat Jehová. Nüküjain wamüin Jehová katsüinjeerüin waaʼin nutuma (paashajeʼera 1 Pedro 5:10). Jamüsüjaʼa wanee anuwa soʼunnaa wanee wawai, eesü süpüla yuunatüin shia sutuma sümüna tü palaakat. Suulia yuunatüin maʼin shia, katünasü atumawaa suupünaajee. Sutuma müin shia, nnojoishii müliaajüin na suluʼukana. Anasü tü anuwakat sutuma tü sütünakat suwataale. Müsia neʼe wakuwaʼipa, katsüinjeere waaʼin nutuma  Jehová soʼunnaa müliaa, acheküshiʼiya waneepiain waya nümaa.

9. ¿Jamüsü waaʼin wekirajaale sünain tü naapakat wamüin Jehová nakajee na wawalayuukana? (Piirakaa sümüin tü ayaakuaakat).

⁹ Tü waaʼinrajatkat. Shapaale maʼin waaʼin sutuma tü kasa alatakat wamüin, ayataʼaya woʼuraajüin waneepia, woutkajaain jee waküjain pütchi. Eesüjaʼa kapüleere wamüin waaʼinrüin tü waʼyataainkat maʼakaapuʼu nümüin Jehová. Niyaawatapejeʼe saaʼu tü alatakat wamüin (anasü paashajeʼerüle Lucas 21:1-4). Pükatala kaʼi süpüla pikirajaain pümüiwaʼa sünain tü Bibliakat sümaa püsakireʼerüin paaʼin sünain. Wainma pütchi jee video naapaka wamüin Jehová nakajee na wawalayuukana süpüla wachecherüin waaʼin soʼunnaa müliaa. Süpüla puusütüin sünain tü pikirajaweekalü anain, püchajaa shia suluʼu JW Library^®, Índice de las publicaciones Watch Tower otta Nachajaayainjatü pütchi na aküjaliikana pütchi nüchiki Jehová. Saashin Monika, tü wachuntayütkalü anülia paalapa, shiyaawatapa saaʼu mojeerüin maʼin saaʼin ekirajaasü shia sükajee tia. Eesü shikirajaʼawaire anain tü pütchikat jashiee, piama oʼupünaa otta waneepia nümaa Jehová. Shikirajaa anainrü tia waneʼereeya anapa saaʼin. Müsü shia: «Shapaasü maʼin taaʼin sümaʼainruʼu tachajaain tü pütchi tekirajaainjatkalü anain. Anapejeʼe taaʼin süchikijee tia. Müshi nukoʼojookai aaʼin Jehová tanain. Soʼunnaa tekirajaain, tayaawata aaʼu niyaawatüin saaʼu Jehová jamüin taaʼin jee sünain nükaalinjain taya». Eesü süpüla nüchecherüin Jehová paaʼin soʼunnaa müliaa (Sal. 119:143, 144).

NÜKAALINJEENA WAYA JEHOVÁ

10. ¿Jamüsü waaʼin soʼunnaa weʼrüin müliaa?

¹⁰ Weʼrüle maʼin müliaa, eejeerü kaʼi matchinka oʼu waaʼin jee mojuwaika oʼu waaʼin. Jamüshijaʼa neewaale wanee wayuu ayoujiraai, iseerü nüchiki awatawaa. Akaataajaʼa wayakana, eesü süpüla isain wachiki waaʼinrüin waneirua kasa soʼunnaa weʼrüin müliaa jee nnojorüle waaʼin sünain aaʼinraa wanee kasa kamalainpuʼuka wamüin. Maʼaka naaʼin Elías, eesüjaʼa sutunkeere neʼe waaʼin waneepia (1 Rey. 19:5-7). ¿Kasa naaʼinreetka Jehová wapüleerua soʼunnaa matchin waaʼin sutuma tü alatakat wamüin?

11. ¿Kasa amaa naaʼinraka Jehová süpüla nükaalinjain waya? (Salmo 94:18).

¹¹ Tü naaʼinrakat Jehová. Nüküjain wamüin Jehová nükaalinjeenain waya soʼunnaa müliaa (paashajeʼera Salmo 94:18). Maʼaka choʼujaain nükaalinjünüin wanee wayuu ayoujiraai  eewaakai, akaataajaʼa wayakana, choʼujaashii wakaalinjünüin süpüla ayatüinjanain waʼyataain nümüin Jehová. Müshi Jehová wamüin: «Tayakai Jehová, taya chi Pümaleiwasekai, taya ajapuluʼujakai pia süka tü pajapü pikiakat, anuu tanüiki pümüin: ‹Nnojo mmoluin pia. Shiimain takaalinjeechin maʼin pia›» (Is. 41:13). Wanaa sümaa niʼrüin müliaa David jee süpüleeruaanüin naaʼin natuma na nüʼünüükana, niyaawata aaʼu eejachin Jehová nümaa. Müshijeseʼe nümüin nümüin Jehová mayaa: «Pajapuluʼushi taya süka tü pajapü pikiakat» (Sal. 18:35). ¿Kasakaʼa naaʼinrüin Jehová süpüla nükaalinjain waya?

12. ¿Jaralii nükaalinjaka akajee waya Jehová mojupa maʼin waaʼin?

¹² Eesü nükatsüinrawaire waaʼin Jehová nakajee na waneinnua. Wanaa sümaa mojushaatain maʼin naaʼin David, antüshi Jonatán nümaʼanamüin süpüla nükatsüinrüinjatüin naaʼin (1 Sam. 23:16, 17). Müsia neʼe tü naaʼinrakat Jehová nüpüleerua Elías. Nüneeküin Eliseo süpüla nükaalinjainjachin Elías sünain aaʼinraa waneirua kasa (1 Rey. 19:16, 21; 2 Rey. 2:2). Eeshii süpüla nükaalinjain waya Jehová nakajee na wapüshikana, na waʼaleewainyuukana otta na laülaashiikana. Mojule maʼin waaʼin, wamüiwaʼaweeshii waya. Nnojotsü keeʼireein waaʼin wekeʼejünüin aaʼin. ¿Kasa waaʼinrajatka süpüla wooʼulaain nükaalinjain waya Jehová nakajee na waneinnua?

13. ¿Kasa waaʼinrajatka süpüla wooʼulaain nükaalinjain waya Jehová? (Piirakaa sümüin tü ayaakuaakat).

¹³ Tü waaʼinrajatkat. Nnojo wakaaʼinjaain noulia na waneinnua. Wakaaʼinjaale noulia, jülüjeerü neʼe waaʼin wakuwaʼipa wamüiwaʼa jee tü alatakat wamüin. Suluʼujee tia, mojeerü tü kasa waneekakat (Prov. 18:1). Sülatüle kasa mojusü wamüin, eeshii wamüiwaʼaweere waya, nnojotsü mojuin tia. Aluʼujasaʼa wamüiwaʼaweere waya waneepia, mojuinjaʼa tia, süka jamüin, eein süpüla wayoutuin tü kasa nükaalinjeekalü akajee waya Jehová. Jaʼitairü kapüleein maʼin wamüin tü alatakat, wooʼulaa nükaalinjaiwa waya Jehová nakajee na wapüshikana, na waʼaleewainyuukana otta na laülaashiikana (Prov. 17:17; Is. 32:1, 2).

NÜMÜLIALEERÜ WAAʼIN JEHOVÁ

14. ¿Kasa eeka süpüla mmoluin atuma waya?

¹⁴ Eejeerü kaʼi mmoleenaka oʼu waya. Ashajünüsü suluʼu tü Bibliakat nachiki waneinnua wayuu aʼyataapuʼukana nümüin Jehová mmotpuʼukana neema na naʼünüükana otta sutuma waneirua kasa alataka namüin  (Sal. 18:4; 55:1, 5). Eeshiijaʼa mmorüle waya sutuma napüleeruaanüin waaʼin na koleejiajiraakana wamaa, na aʼyataajiraakana wamaa, na wapüshikana jee shiale sutuma wanee ayuulii mepisat. Soʼunnaa tia, choʼujaashii waaʼinmajünüin maʼaka choʼujaain naaʼinmajünüin wanee joʼuu. ¿Kasa naaʼinraka Jehová soʼunnaa tia süpüla nükaalinjain waya?

15. Sünainjee tü sümakat Salmo 94:19, ¿kasa naaʼinreetka Jehová wapüleerua?

¹⁵ Tü naaʼinrakat Jehová. Nütütüleʼerüin jee nümülialüin waaʼin Jehová soʼunnaa müliaa (paashajeʼera Salmo 94:19). Jülüjataa waaʼin wanee jintutchon mmotka jee nnojotka atunkeein sutuma shiyaa jee sütürüla wanee juya wawaimaajatü. Niasaʼa chi süshikai, nüpataaka shia nutuʼupünaa. Nümülialaka saaʼin jee sutunkaka. Mayaainjeʼe ayatüin shiʼitüin tü juyakat, anasü saaʼin tü jintutchonkat süka nutuʼuitpain shia chi süshikai. Müsia neʼe tü naaʼinrakat Jehová wapüleerua mmotpa waya, müshii nüpataakai waaʼin nutuʼupünaa süpüla nümülialüin waaʼin. ¿Kasa waaʼinrajatka süpüla wooʼulaain nümülialüin waaʼin Jehová?

16. ¿Kasa waaʼinrajatka süpüla nümülialüin waaʼin Jehová? (Piirakaa sümüin tü ayaakuaakat).

¹⁶ Tü waaʼinrajatkat. Kiʼrainjana waya sünain oʼuraajaa otta sünain aashajeʼeraa tü Bibliakat (Sal. 77:1, 12-14). Sülatüle kasa mojusü wamüin, achuntamaateena waya kaalinwaa nümüin chi Washi iipünaajachikai. Waküja nümüin Jehová tü kasa shapaakalü atuma waaʼin otta tü mmotkalü atuma waaʼin. Wooʼulaa nükaalinjaiwa waya otta nümülialaiwa waaʼin sükajee tü Bibliakat (Sal. 119:28). Eesü süpüla sümülialüin waaʼin waneirua pütchi suluʼuka tü Bibliakat maʼaka saaʼin tü aküjünakat suluʼu tü karaloʼutakat Job, Salmos, Proverbios otta tü nüküjakalü achiki Jesús suluʼu Mateo kapiitulo 6. Puʼuraajüle nümüin Jehová jee paashajeʼerüle tü Bibliakat, nümülialeerü paaʼin.

17. ¿Kasa jülüjainjatka waaʼin waneepia?

¹⁷ Jaʼitairü kasain maʼin tü alatakat wamüin, eejeechi wamaa Jehová waneepia süpüla nükaalinjain waya. Nnojoleena waya nüpütüin wamüiwaʼa (Sal. 23:4; 94:14). Jülüja waaʼin waneepia naaʼinmajeenain waya, katsüinjeerüin waaʼin nutuma, nükaalinjeenain waya jee nümülialeʼerüin waaʼin. Müshinka Isaías nümüin Jehová mayaa: «Paaʼinmajeena na eʼitaakana naaʼin pünain jee eʼreena naya wanee anaa putuma saaʼujee naaʼinrüin tia» (Is. 26:3). Ayataʼaya piʼitaain paaʼin nünain Jehová otta puuʼulaa nükaalinjaiwa pia. Paaʼinrüle tia, katsüinjeerü paaʼin soʼunnaa müliaa.