TÜ PÜTCHI «eʼejetuu» ashajünakat suluʼu tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, eesü süpüla saashajaain achiki wainma sukuwaʼipa eʼejetuu suluʼu griego (Aluw. 8:28, 29, 38). Eesüjaʼa süpüla miyoʼuin neʼejena chi wayuu chejeʼewaikai Etiopía, nnojotsü joʼuuchon maʼaka saaʼin neʼejena na surulaatkana otta neʼejena na ayoujiraakana. Wekirajaa sünain waneirua kasa wayaawataka atuma müin shia.

Wayuu kojutushi atumawaa chi wayuu chejeʼewaikai Etiopía jee wattajeejachi nia. Saashin tü Bibliakat, aʼyataashi nia sümüin Candace tü aluwataasükat naaʼu na wayuu chejeʼewaliikana Etiopía. Nia kajapuluʼuka süwashirüin tü aluwataasükat (Aluw. 8:27). Soʼu kaʼikat tia, muloʼu maʼin tü mmakat Etiopía. Oʼttusü chejeereʼeya eekai tü mma «Sudán» münakat maaʼulu yaa, chamüinreʼeya uuchijeeruʼu sünain Egipto. Mayaainjeʼe wainmain nüchise, eesüjaʼa niiʼiratüle neʼejena wopuluʼupa nia. Wainma sukuwaʼipa eʼejetuu eejatka nakalioʼu na aluwataaushikana. Eejatü wanee kareeta pienchisü suuʼui sümaa kaajunain shia. Anuu sünüiki wanee karaloʼuta: «Eesü süpüla wainmain nüchise wanee wayuu suluʼu tia kareetakat. Eeshi süpüla nuʼunuin wattamüin suluʼu sümaa anain nia» (Acts—An Exegetical Commentary).

Naashajeʼerüin chi wayuu chejeʼewaikai Etiopía tü nüshajalakat Isaías wanaa sümaa nürütkaain Felipe nünainmüin (Aluw. 8:30). Saashin tü Bibliakat, awataashi Felipe saʼatoʼupünaa tü eʼejetuukat. Naapakalaka nünüiki chia wayuukai sünain aashajeʼeraa tü nüshajalakat Isaías. Nnojotsü akumajuushin tia kareetakat süpüla kawatirüinjatüin. Sutuma tia, eesü süpüla naashajeʼerüin chia wayuukai wanee karaloʼuta sümaʼainruʼu nuʼunuin suluʼu, müshijeseʼe nüsawatüin nia Felipe.

Nuchuntuin chia wayuukai «nümüin Felipe süpüla noʼotooinjachin sümaa nüikalaain naʼatoʼu» (Aluw. 8:31). Nuʼunirüle wanee wayuu neʼejena na ayoujiraakana, shaʼwatüinjachi nia. Eekajasaʼa tü eʼejetuu suʼunajaakalü aluʼu wayuu, jerutsü. Eekalaka süpüla joyojoʼoyüliin naya suluʼu. Müsüjeseʼe süküjain tü Bibliakat nuchuntuin chia wayuukai nümüin Felipe nüikalaain naʼatoʼu.

Sutuma tü sümakat Aluwataaushikana kapiitulo 8 jee sutuma tü kasa ousütünakalü anain natuma na wayuu ekirajaakana süchiirua tü kasa alatüitkat, nnojoluitpa wepintajüin sünain tü karaloʼuta wamaʼanakat niyaakua chi wayuu chejeʼewaikai Etiopía suluʼu neʼejena na surulaatkana jee suluʼu neʼejena na ayoujiraakana. Wepintajüin nia suluʼu wanee eʼejetuu miyoʼu suulialeʼeya tia.