1. ¿Kasa waaʼinrajatka süpüla talatüinjatüin naaʼin Jehová watuma?

 WASÜLAJÜLE nümüin wanee waʼaleewain wanee kasa choʼujaaka maʼin nümüin maʼaka saaʼin wanee nüsheʼin jee nünaajaale shia sümaa nnojoluin naʼatüin shia nünain, nnojoleerü anashin wamüin tia. Eekajasaʼa weʼrüle naʼatüin shia nünain talateena waya süka kojutuin shia nümüin. Tia meematsü aka saaʼin tü naainjakat Jehová wapüleerua, nuluwataain chi Nüchonkai süpüla outuinjachin nia waaʼu. Talatakajasaʼa naaʼin Jehová niʼrüle kojutuin wamüin tü naainjakat wapüleerua saaʼujee alin waya nüpüla (Juan 3:16; Roma 5:7, 8).

2. ¿Kasa wekirajaainjatka anain sünain ekirajaayakat tüü?

² Kakaliainnale waya sünain anoujaa eesüjaʼa nnojorüle kojutuin maʼin wamüin naapajiraain nikii Jesús waaʼu. Sülatüle tia wamüin meerü wanaajaakai saaʼin tü kasa nüsülajakat Jehová wamüin. Suulia sülatajüin tia wamüin, anasü wasakireʼerawaire waaʼin sünain tü naainjakat Jehová otta Jesús wapüleerua. Wekirajaajeerü anain tia sünain ekirajaayakat tüü otta tü kasa weʼrakat maaʼulu saaʼujee naapajiraain nikii Jesús waaʼu jee tü kasa anasü weʼreetkat mapeena sutuma. Wane kasa wekirajaainjatka anain shia tü waaʼinrajatkat süpüla kojutuin wamüin tü naainjakat Jehová wapüleerua. Waaʼinrüinjatü tia sülüʼütpa tü kaʼi eere sotuin waaʼin outuin Jesús.

TÜ KASA ANASÜ WEʼRAKAT MAAʼULU YAA

3. Püküja wanee kasa weʼraka maaʼulu saaʼujee naapajiraain nikii Jesús waaʼu.

³ Wainma kasa anasü weʼraka maaʼulu yaa saaʼujee naapajiraain nikii Jesús waaʼu, maʼaka saaʼin motuin naaʼin Jehová waainjala. Naaʼinrüin tia Jehová saaʼujee alin waya nüpüla. Anuu nünüiki  David sutuma kojutuin nümüin tü naainjakat Jehová nüpüleerua: «Anamia maʼin pia Jehová jee motusü paaʼin naainjala wanee wayuu» (Sal. 86:5; 103:3, 10-13).

4. ¿Jaralii na anakana akuwaʼipa saaʼujee naapüin Jehová nikii chi Nüchonkai? (Lucas 5:32; 1 Timoteo 1:15).

⁴ «Nnojoleerü motuin naaʼin Jehová taainjala, jama kaainjaralin maʼin taya», eeshijaʼa nümüle wanee wayuu. Kaleʼeruʼupejeʼe wapüshuaʼa süchiki kaainjalaa. Anuu nünüiki chi aluwataaushikai Pablo: «Nnojoishi keraain taya süpüla ‹aluwataaushi› tamünajachin». Anuupejeʼe nünüiki mapa: «Tountuin aluwataaushin taya saaʼujee miyoʼuin maʼin nümanee chi Maleiwakai tamüin» (1 Cor. 15:9, 10). Moteerü naaʼin Jehová waainjala wayaawajüle suulia. Naaʼinrüin tia saaʼujee alin waya nüpüla. Mojule waaʼin sutuma jülüjain waaʼin nnojoleerüin motuin naaʼin Jehová waainjala, sotuinjatü waaʼin nnojoluin naapajiraain nikii Jesús naaʼu na wayuu lotokana akuwaʼipa. Naapüin nikii naaʼu na kaainjaraliikana süpüla nayaawajaain suulia naainjala (paashajeʼera Lucas 5:32; 1 Timoteo 1:15).

5. ¿Jamüsü nnojotkaʼa anain jülüjale waaʼin motuinjatüin naaʼin Jehová waainjala saaʼujee waʼyataain nümüin?

⁵ Nnojotsü motuin naaʼin Jehová tü kasa anasü waainjakat nüpüleerua (Heb. 6:10). Nnojotpejeʼe jülüjainjatüin waaʼin moteerüin naaʼin Jehová waainjala sutuma kakaliain waya aʼyataain nümüin. Nnojotsü naapüin Jehová nikii chi Nüchonkai saaʼujee anain maʼin tü waʼyataainkat nümüin. Naapüin shia wamüin saaʼujee alin waya nüpüla. Jülüjale waaʼin motuinjatüin naaʼin Jehová waainjala saaʼujee tü waʼyataainkat nümüin, meerü mojutukai saaʼin wamüin naapajiraain nikii Jesús waaʼu (anasü paashajeʼerüle Galacia 2:21).

6. ¿Jamüsü naaʼinmaakaʼa maʼin Pablo tü niʼyataainkat nümüin Jehová?

⁶ Nütüjaa aaʼu Pablo nnojoleerüin motuin naaʼin Jehová naainjala saaʼujee tü niʼyataainkat nümüin, ¿jamaka naaʼinmaaka maʼin tü niʼyataainkat nümüin Jehová? Shia süka kojutuin nümüin tü naainjakat Jehová nüpüleerua (Éf. 3:7). Müsia wakuwaʼipa maaʼulu yaa, nnojoishii waya aʼyataain nümüin Jehová süka süpüshuaʼa waaʼin shiiʼiree motuin naaʼin waainjala. Waaʼinrüin tia sutuma kojutuin wamüin tü naainjakat Jehová wapüleerua.

7. Püküja wanee kasa weʼraka sünainjee naapajiraain nikii Jesús waaʼu (Roma 5:1; Santiago 2:23).

⁷ Wane kasa anasü weʼraka saaʼujee naapajiraain nikii Jesús waaʼu, shia eein süpüla aleewain maʼin waya nümaa Jehová. a Maʼaka wekirajaain sünain tü ekirajaayakat 4 nnojoishii waya joʼuujiraain sümaa aleewaa nümaa Maleiwa. Eepejeʼe süpüla anajiraain jee aleewain waya nümaa Maleiwa saaʼujee naapajiraain nikii Jesús waaʼu (paashajeʼera Roma 5:1; Santiago 2:23).

8. ¿Jamüsü kojutuinjatkaʼa wamüin woʼuraajüin nümüin Maleiwa?

⁸ Saaʼujee aleewain waya nümaa Jehová eeshii süpüla woʼuraajüin nümüin. Nnojotsü neʼe naapajüin Jehová wanüiki woʼuraajapa namaa na wawalayuukana suluʼu tü outkajaaleekat. Naapüinña Jehová wanüiki waneʼewai wakua woʼuraajapa nümüin. Nnojoishii neʼe waya oʼuraajüin nümüin Jehová süpüla jimatüinjatüin waaʼin, oʼuraajüshii waya nümüin süpüla aleewain maʼin waya nümaa (Sal. 65:2; Sant. 4:8; 1 Juan 5:14). Wanaa sümaa yaajachin Jesús mmapaʼa oʼuraajawaishi maʼin nia. Naaʼinrawalin tia süka nütüjaain saaʼu naapajeerüin Jehová nünüiki otta süpüla aleewain maʼin nia nümaa (Luc. 5:16). Waapüin maʼin analuʼutka nümüin Jehová saaʼujee eein süpüla aleewain waya nümaa otta eein süpüla  woʼuraajüin nümüin saaʼujee naapajiraain nikii Jesús waaʼu.

TÜ KASA ANASÜ WEʼREETKAT MAPEENA

9. ¿Kasa weʼreetka mapeena saaʼujee naapajiraain nikii Jesús waaʼu?

⁹ ¿Kasa anasü weʼreetka mapeena saaʼujee naapajiraain nikii Jesús waaʼu? Woonoole sümaa nünüiki Jehová kateerü woʼu süpüla kaʼikat süpüshuaʼa. Wainma na wayuu nnojoliikana anoujain kateerüin woʼu süpüla kaʼikat süpüshuaʼa, jama nnojoluin neʼrüirüin tia, shia neʼe neʼrakat outuin wayuu. Nukumajüin waya Jehová süpüla katüinjatüin woʼu süpüla kaʼikat süpüshuaʼa. Mayaainjeʼe nnojoluin sunoujain wayuu kateerüin woʼu süpüla kaʼikat süpüshuaʼa, watüjaa aaʼu meerüin shia saaʼujee nuluwataain Jehová chi Nüchonkai süpüla outuinjachin nia waaʼu (Roma 8:32).

10. ¿Kasa naʼatapajaka maʼin na wayuu chainjanakana chaa iipünaa jee na yaainjanakana kepiain saaʼu tü mmakat?

¹⁰ Mayaainjeʼe watüjain saaʼu katüinjatüin woʼu süpüla kaʼikat süpüshuaʼa, anasü jülüjale waaʼin jameerüin wakuwaʼipa soʼu tia. Na aneekünakana süpüla chainjanain naya sirumatuʼu naʼatapajüin maʼin tü kaʼi naluwataainjatkalü oʼu nümaa Cristo saaʼu tü mmakat (Apoc. 20:6). Na wayuu kepiainjanakana saaʼu tü mmakat naʼatapajüin tü kaʼi najaʼttirüinjatkalü oʼu Maleiwa tü müliaakat (Apoc. 21:3, 4). Nnojotsü alanaʼaleein nakuwaʼipa na wayuu kepiainjanakana chaa sirumatuʼu noulia na kepiainjanakana yaa saaʼu tü mmakat, jama wakumajuushin süpüla kepiaa saaʼu tü mmakat. Talateerü maʼin waaʼin kepiapa waya süpüla kaʼikat süpüshuaʼa yaa saaʼu tü mmakat.

11, 12. ¿Kasa tü weʼreekat maʼin amüin paʼaraiisüpa tü mmakat? (Piirakaa sümüin tü ayaakuaakat).

¹¹ Jülüjataa waaʼin jameerüin wakuwaʼipa suluʼupa waya tü paʼaraiisükat, nnojoleerü outaa, nnojoleerü ayuulii jee nnojoleerü shapaain waaʼin saaʼu wanee kasa (Is. 25:8; 33:24). Naapeerü wamüin Jehová süpüshuaʼa tü suchuntaakat waaʼin. Puunteerü paaʼinrüin wainma kasa paʼaraiisüpa tü mmakat maʼaka saaʼin pikirajaain süchiki sukuwaʼipa tü wüchiicheinkalüirua,  pütüjain eeʼirajaa jee pütüjain adibujaaja. Choʼujaajeena wayuu atüjakana süpüleerua akumajaa miichi, choʼujaajeena wayuu süpüla napünajüin jee naʼlakajaain otta choʼujaajeena wayuu akumajüinjanakana tü kasa waʼyataainjatkalü aka (Is. 35:1; 65:21). Sutuma kateerüin poʼu süpüla kaʼikat süpüshuaʼa pütüjeerü apüleerua wainma kasa. ¡Anakatche maʼin tia!

¹² Talatashaateerü maʼin waaʼin nasoʼiraapa aaʼin na outushiikana (Aluw. 24:15). Otta talateerü maʼin waaʼin wekirajaapa maʼin süchiki nukuwaʼipa Jehová otta süchiki tü kasa nukumalakat (Sal. 104:24; Is. 11:9). Talateerü maʼin waaʼin süka nnojoleenain waya kaainjalain nuʼupala Maleiwa suluʼupa waya tü paʼaraiisükat. Sutuma waʼatapajüin maʼin tü kasa anasü eeinjatkat mapeena, nnojoleerü waaʼinrüin wanee kasa mojusü talateetka atuma waaʼin motsoʼomüin neʼe (Heb. 11:25). Nnojotsü eein wanee kasa anaʼleeka suulia tü kasa anasü weʼrüinjatkat mapeena nutuma Jehová. Shiimain Paʼaraiiseerüin tü mmakat nutuma Jehová saaʼujee naapüin nikii chi Nüchonkai waaʼu.

¿KASA WAAʼINRAJATKA SUTUMA KOJUTUIN WAMÜIN TÜ NAAINJAKAT JEHOVÁ WAPÜLEERUA?

13. ¿Kasa waaʼinrajatka sutuma kojutuin wamüin tü naainjakat Jehová wapüleerua? (2 Corinto 6:1).

¹³ ¿Kasa waaʼinrajatka sutuma kojutuin wamüin naapüin Jehová nikii chi Nüchonkai waaʼu? Waaʼinmaainjatü tü waʼyataainkat nümüin Jehová (Mat. 6:33). Outushi Jesús «napüleerua napüshuaʼa na wayuu katakana oʼu süpüla nnojoluinjatüin naaʼinrüin tü suchuntaakat neʼe naaʼin, shia naaʼinrajatka tü nuluwataakalü anain chi outakai napüleerua jee asoʼireʼennakai aaʼin süchikijee outaa» (2 Cor. 5:15). Wachajaale maʼin sukuwaʼipa süpüla waʼyataain nümüin Jehová jaʼyeerü waaʼu kojutuin wamüin tü naainjakat wapüleerua (paashajeʼera 2 Corinto 6:1).

14. ¿Kasa waaʼinrajatka kanoulale waya nünain Jehová jee woonoole sümaa nünüiki?

¹⁴ Wane kasa waaʼinrajatka süpüla jaʼyain waaʼu kojutuin wamüin tü naainjakat Jehová wapüleerua, shia kanoulale waya nünain jee woonoole sümaa nünüiki. Jülüjainjatü waaʼin tü keeʼireekat naaʼin Jehová wapüleerua waneekajatpa tü wekirajaainjatkalü anain kettaapa watuma tü koleejiakat jee tü waʼyataainjatkalü anain (1 Cor. 10:31; 2 Cor. 5:7). Jaʼyale waaʼu sünainjee tü kasa waaʼinrakat kanoulain waya, aleeweena maʼin waya nümaa Jehová otta katchinjeerü wanoula nünain jee sünain tü kasa eejeetkat nutuma (Roma 5:3-5; Sant. 2:21, 22).

15. ¿Kasa waaʼinrajatka sülüʼülapa tü kaʼi eere Sotuin Waaʼin Outuin Jesús?

¹⁵ Wane kasa waaʼinrajatka süpüla jaʼyain waaʼu kojutuin wamüin naapüin Jehová nikii chi Nüchonkai waaʼu, shia wajayatüle tü kaʼi süpülapünaakat tü Outkajawaakat eere Sotuin Waaʼin Outuin Jesús. Wakumajüinjatü sukuwaʼipa süpüla woʼunuin sünain  tia outkajawaakat jee wounejaainjatü wayuu sünain (1 Tim. 2:4). Waküja namüin na wayuukana kasapülajatü tia outkajawaakat. Anasü weeʼiyatüle namüin tü videokot ¿Jamüshi outaka Jesús? jee shiale tü videokot Puutkajaa wamaa süpüla sotuin waaʼin outuin Jesús, suluʼuka jw.org. Nounejaainjana na laülaashiikana na eemiajaakana anoula. Miyoʼujeerü maʼin talata chaa iipünaa nüleʼejüle nünainmüin Jehová wanee wayuu eemiajaakai anoula (Luc. 15:4-7). Anashii wasaküle na wayuu kakaliainnakana moutkajaain wamaa otta na palajanakana akua sünain. Wachajaa sukuwaʼipa süpüla anainjatüin naaʼin napüshuaʼa na wayuu antakana (Roma 12:13).

16. ¿Jamüsü anakaʼa wakooʼomüinrüle tü waʼyataainkat nümüin Jehová sülüʼütpa tü kaʼi eere Sotuin Waaʼin Outuin Jesús?

¹⁶ Wane kasa eeka süpüla waaʼinrüin sülüʼülapa tü kaʼi eere Sotuin Waaʼin Outuin Jesús, shia kooʼomüin watuma tü waʼyataainkat nümüin Maleiwa. Waaʼinrüle tia, jaʼyeerü waaʼu kojutuin wamüin tü naainjakat Jehová otta Jesús wapüleerua. Waküjale maʼin pütchi wayaawateerü aaʼu tü naainjakat Jehová süpüla nükaalinjain waya otta katchinjeerü maʼin wanoula nünain (1 Cor. 3:9). Anashii waashajeʼerüle tü pütchi aashajeʼennajatkat sükalioʼu tü outkajawaakat eere Sotuin Waaʼin Outuin Jesús ojuʼitakat sünain tü karaloʼutakat Pikirajaa waneepia sünain tü Nüchikimaajatkat Maleiwa otta tü ojuʼitakat sünain tü karaloʼutakat Wekirajaayainjatü sünain tü outkajawaakat. Eeshii süpüla wekirajaain sünain tia wetsiikulokot soʼu tü kaʼi waʼwaajakalü oʼu Maleiwa sümaa wapüshi.

17. ¿Kasa waaʼinrajatka süpüla talatüin naaʼin Jehová watuma? (Paashajeʼera tü pütchikat « Waaʼinrajatka süpüla kojutuin wamüin tü naainjakat Jehová wapüleerua»).

¹⁷ Nnojo shapaain paaʼin isale püchiki pükooʼomüinrüin tü piʼyataainkat nümüin Jehová. Soto paaʼin nnojoleerüin niyoujireʼerüin Jehová tü paaʼinrakat sümaa tü naaʼinrakat na waneinnua. Nütüjaa aaʼu Jehová tü suluʼukat paaʼin jee talatüshi nia pümaa saaʼujee kojutuin pümüin naapüin nikii chi Nüchonkai paaʼu (1 Sam. 16:7; Mar. 12:41-44).

18. ¿Jamüsü kojutukaʼa maʼin wamüin tü naainjakat Jehová otta Jesús wapüleerua?

¹⁸ Saaʼujee naapajiraain nikii Jesús waaʼu eesü süpüla motuin naaʼin Jehová waainjala, eeshii süpüla aleewain waya nümaa otta eeshii süpüla katüin woʼu süpüla kaʼikat süpüshuaʼa suluʼu tü Paʼaraiisükat. Jaʼyainjatü waaʼu sükajee tü waaʼinrakat kojutuin wamüin tü naainjakat Jehová wapüleerua (1 Juan 4:19). Saaʼujee alin waya nüpüla Jesús jee naapajiraain nikii waaʼu jaʼyainjatü waaʼu sükajee tü waaʼinrakat kojutuin tia wamüin (Juan 15:13).