1. ¿Jamüsü anakaʼa maʼin sotule waaʼin juyawai tü kaʼi outakalü oʼu Jesús?

 ANASÜ MAʼIN wakuwaʼipa saaʼujee nuluwataain Jehová chi Nüchonkai süpüla naapajiraainjachin nikii waaʼu (2 Cor. 9:15). Saaʼujee naapajiraain nikii Jesús waaʼu, eeshii süpüla aleewain maʼin waya nümaa Jehová otta katüin woʼu süpüla kaʼikat süpüshuaʼa. Naapüin Jehová nikii chi Nüchonkai waaʼu saaʼujee alin waya nüpüla. Waapüinjatü analuʼutka nümüin Jehová saaʼujee naaʼinrüin tia (Roma 5:8). Süpüla ayatüin kojutuin wamüin naapajiraain nikii Jesús waaʼu, nuluwataain waya Jesús süpüla sotuinjatüin waaʼin juyawai tü kaʼi outakalü oʼu nia (Luc. 22:19, 20).

2. ¿Kasa wekirajaainjatka anain sünain ekirajaayakat tüü?

² Soʼu juyakat tüü, outkajaweena waya süpüla sotuin waaʼin outuin Jesús aaʼuriiroʼu 12 soʼu 2025. Waʼatapajüin maʼin tia kaʼikat. Sülüʼülaapa tia outkajawaakat, anasü wakatarüle kaʼi süpüla jülüjain waaʼin tü naainjakat Jehová otta Jesús wapüleerua. Sünain ekirajaayakat tüü, wekirajaajeerü anain tü watüjakat sünainjee nukuwaʼipa Jehová otta Jesús sutuma naapajiraain nikii Jesús waaʼu. Sünain tü wane ekirajaayakat, wekirajaajeerü anain jamüin anakaʼa wakuwaʼipa sutuma tü naainjakat nayakana wapüleerua otta tü waaʼinrajatkat süpüla jaʼyain waaʼu kojutuin shia wamüin.

¿KASA WATÜJAKA NÜNAINJEE JEHOVÁ SAAʼUJEE NAAPÜIN NIKII JESÚS WAAʼU?

3. ¿Jamüsü süpüla taashin suulia kaainjalaa jee outaa watta saalii wayuu nünainjee waneeshia neʼe wayuu? (Piirakaa sümüin tü ayaakuaakat).

³ Tü watüjakat sünainjee naapüin Jehová nikii chi Nüchonkai waaʼu shia kojutuin nümüin tü lotookalü akuwaʼipa (Deut. 32:4).  Kaainjalashi jee outushi Adán sutuma nnojolin noonooin sümaa nünüiki Jehová. Müshiijeseʼe kaainjalain jee outuin waya, jama nüikeyuuin waya Adán (Roma 5:12). Nuluwataain Jehová chi Nüchonkai süpüla taashinjanain waya suulia kaainjalaa jee outaa. ¿Jamüsü süpüla taashin watta saalii wayuu suulia kaainjalaa jee outaa sünainjee neʼe outuin waneeshia wayuu? Anuu nünüiki chi aluwataaushikai Pablo süchiki tia: «Sünainjee nnojolin noonooin waneeshia wayuu kaainjalasü wayuu süpüshuaʼa. Aluʼujasaʼa sünainjee noonooin waneeshia wayuu, loteerü sukuwaʼipa wayuu süpüshuaʼa» (Roma 5:19; 1 Tim. 2:6). Tü nüküjeekalü achiki Pablo shia kaainjalain jee outuin wayuu süpüshuaʼa sünainjee moonooin waneeshia wayuu sümaa nünüiki Maleiwa. Taashipejeʼe waya suulia kaainjalaa jee outaa sükajee noonooin waneeshia wayuu lotokoi akuwaʼipa sümaa nünüiki Maleiwa.

4. ¿Jamüshiiche nnojoika nuuʼulaain Jehová katüin noʼu waneepia na nüikeyuukana Adán oonookana sümaa nünüiki?

⁴ ¿Choʼujaashiche outuin Jesús süpüla nuʼtteʼerüin waya? ¿Jamüshiiche nnojoliikaʼa nuuʼulaain Jehová katüin noʼu waneepia na nüikeyuukana Adán oonookana sümaa nünüiki? «Anoutaasüjeʼe tü kasa alatakat naaʼinrüle Jehová tia», eeshiijaʼa wamüle. Sotuinjatpejeʼe waaʼin lotuin nukuwaʼipa Jehová woulialeʼeya wayakana. Müsüjeseʼe nnojoluin nuuʼulaain tia mayaa. Kasalajanasü nutuma naainjala Adán.

5. ¿Jamüsü watüjaakaʼa saaʼu loteerüin süpüshuaʼa tü kasa naainjainjatkat Jehová?

⁵ Nnojoire naapüin Jehová nikii chi Nüchonkai jee nuuʼulaale katüin noʼu süpüla kaʼikat süpüshuaʼa na nüikeyuukana Adán mayaainjeʼe nnojoluin lotuin nakuwaʼipa, eesüjaʼa jülüjale saaʼin wayuu nnojolin kasajatüin nümüin Jehová sukuwaʼipa wayuu otta eesüjaʼa jülüjale saaʼin nnojoleerüin nikeraajüin nünüiki. Watüjaa aaʼu nikeraajeerüin Jehová tü nümatüjütkalia wamüin, jama naapüin nikii chi Nüchon aishikai nüpüla süpüla outuinjachin nia waaʼu. Sükajee tia, wayaawata aaʼulu lotuin nukuwaʼipa Jehová sünain süpüshuaʼa tü kasa naainjakat.

6. ¿Jarat tü wane kasa watüjakat nüchiki Jehová sünainjee naapajiraain nikii Jesús waaʼu? (1 Juan 4:9, 10).

⁶ Wane kasa watüjaka sünainjee naapajiraain nikii Jesús waaʼu shia alin maʼin waya nüpüla Jehová (Juan 3:16; paashajeʼera 1 Juan 4:9, 10). Naapüin Jehová nikii chi Nüchonkai süpüla katüinjatüin woʼu süpüla kaʼikat süpüshuaʼa jee süpüla naʼakain waya na nüpüshikana. Kaainjalapa Adán noʼuluʼu Maleiwa nnojoluichipa nia naʼakain na nüpüshikana, müshiijeseʼe nnojoluin joʼuuin waya naʼaka na nüpüshikana Jehová. Shiasaʼa saaʼujee naapajiraain nikii Jesús waaʼu, eeinnapa süpüla naʼakain waya na nüpüshikana Maleiwa kanoulale waya nünain jee woonoole sümaa nünüiki. Otta müsia saaʼujee naapajiraain nikii Jesús waaʼu, eesü süpüla motuin naaʼin  Jehová waainjala, eeshii süpüla aleewain waya nümaa jee namaa na wawalayuukana. Shiimain miyoʼuin maʼin waalin nüpüla Jehová (Roma 5:10, 11).

7. ¿Kasa wayaawataka anainjee miyoʼuin waalin nüpüla Jehová?

⁷ Wayaawata aaʼu alin maʼin waya nüpüla Jehová sutuma nuuʼulaain müliain jee outuin chi Nüchonkai saaʼu waainjala. Naashin Satanás iseerü wachiki jüüjüüin waya nümüin Jehová weʼrüle müliaa. Nuuʼulaainjeseʼe Jehová müliain Jesús süpülapünaa outuin nia süpüla watüjain saaʼu alawaain tü nümakat Satanás (Job 2:1-5; 1 Ped. 2:21). Niʼrüin Jehová sirumatuʼujee wanaa sümaa meeʼerapalain chi Nüchonkai natuma na nüʼünüükana, niʼyaajünüin, nükachennüin sünain wanee wunuʼu jee nuʼutunüin aaʼin (Mat. 27:28-31, 39). Nnojotsü isain nüchiki Jehová nükaalinjain chi Nüchonkai. Eesüjaʼa süpüla naaʼinrüin tia soʼu sümüin wayuu nüchiki: «Akaalinjünüshijeʼeya nia nutuma Maleiwa kateetkalaka noʼu» (Mat. 27:42, 43). Naaʼinrülejeʼeya tia Jehová nnojoishijeʼe eein wanee wayuu outuinjachika süpüla taashinjatüin wayuu nutuma suulia kaainjalaa jee outaa, müshijeseʼe nuuʼulaain Jehová müliain chi Nüchonkai outaleepa nia.

8. ¿Jamüsü watüjaakaʼa saaʼu mojushaatain maʼin naaʼin Jehová niʼrapa müliain chi Nüchonkai? (Piirakaa sümüin tü ayaakuaakat).

⁸ Nnojoishi aaʼinrüin Jehová kasa pülasü süpüla nükaalinjain chi Nüchonkai suulia niʼrüin müliaa, nnojoipejeʼe nia mamülialaain saalin wayuu saaʼujee naaʼinrüin tia. Nukumajüin waya Jehová maʼaka saaʼin nukuwaʼipa. Müshiijeseʼe wamülialaain aaʼin saalin wayuu shiʼrapa müliaa weʼrüin. Müshia neʼe niakai, amülialaasü naaʼin saalin wayuu eekai shiʼrüin müliaa. Saashin tü Bibliakat eeshii wayuu namaiwajanakana aaʼinrakana kasa mojuka atuma naaʼin Jehová (Sal. 78:40, 41). Jülüjataa waaʼin nukuwaʼipa Abrahán nümaa Isaac. Nuluwataain Jehová Abrahán süpüla nuʼutajachin naaʼin chi nüchonkai jee naʼajüinjachin nia nümüin (Gén. 22:9-12; Heb. 11:17-19). Eesüjaʼa wainmale tü kasa antajaakat nikiiruʼumüin Abrahán soʼu tia, jama nuʼutajachin naaʼin chi nüchonkai. Jamakajasaʼa naaʼin Jehová niʼrapa müliain maʼin atumawaa chi Nüchonkai sümaa nuʼutunüin aaʼin. Mojukajasaʼa maʼin naaʼin Jehová sutuma tü niʼrakat (Pünaja tü videokot Washata sukuwaʼipa nanoula: Abrahán [shiʼipa 2], suluʼusü jw.org).

9. Sünainjee tü sümakat Roma 8:32, 38, 39, ¿kasa piyaawataka aaʼu süchiki tü paalinkat nüpüla Jehová otta naalin napüla napüshuaʼa na aʼyataakana nümüin?

⁹ Watüjaa aaʼu miyoʼushaatain tü waalinkat nüpüla Jehová suulialeʼeya tü waalinkat nüpüla wanee waʼaleewain jee niale wanee wapüshi (paashajeʼera Roma 8:32, 38, 39). Akaʼaya nia, miyoʼuleesia waalin nüpüla suulialeʼeya waalin wapülajiraa. Jülüjataa paaʼin tüü: ¿Keeʼireesüche maʼin paaʼin katüinjatüin poʼu süpüla kaʼikat süpüshuaʼa? Keeʼireeleesia maʼin naaʼin Jehová tia püpüleerua. ¿Keeʼireesüche paaʼin motuin naaʼin  Jehová tü paainjalakat? Keeʼireeleesia maʼin naaʼin Jehová motuin naaʼin paainjala. Shiajaʼa neʼe nuchuntuin wamüin kojutuinjatüin wamüin naapüin nikii chi Nüchonkai waaʼu, woonooin sümaa nünüiki otta wanoujain nünain. Wayaawata aaʼu tü waalinkat nüpüla Maleiwa sükajee naapüin nikii chi Nüchonkai waaʼu. Suluʼupa waya tü mma jeketükat, wainmeerü maʼin kasa watüjeetka süchiki tü waalinkat nüpüla Jehová (Ecl. 3:11).

TÜ WATÜJAKAT NÜNAINJEE JESÚS SAAʼUJEE NAAPAJIRAAIN NIKII WAAʼU

10. (1) ¿Kasa shapaaka maʼin atuma naaʼin Jesús süpülapünaa outuin nia? (2) ¿Kasa naaʼinraka Jesús süpüla sütüjaanüin aaʼu alawaain tü nümakat Satanás nüchiki Jehová? (Paashajeʼera tü pütchikat « Atüjaana aaʼu lotuin nukuwaʼipa Jehová saaʼujee noonooin Jesús sümaa nünüiki»).

¹⁰ Shapaasü naaʼin Jesús süka nnojoluin keeʼireein naaʼin mojutuinjachin atumawaa chi Nüshikai (Juan 14:31). Süka nülirajünüin Jesús sünain mojuin nünüiki nüchiki Maleiwa otta naainjain kasa mojusü, shapaasü maʼin naaʼin süka eein süpüla mojuin pütchi nüchiki Maleiwa saaʼujee tü alirajünakat anain nia. Müshijeseʼe nümüin nümüin chi Nüshikai: «Tashikalee, nnojo puuʼulaain tasüin tü asüüshi suluʼukat iitakat tüü» (Mat. 26:39). Süka noonooin Jesús waneepia nümaa chi Nüshikai, atüjaana aaʼulu alawaain süpüshuaʼa tü nümakat Satanás nüchiki Jehová.

11. ¿Kasa naaʼinraka Jesús süka aishaatain maʼin wayuu nüpüla? (Juan 13:1).

¹¹ Süka naapajiraain nikii Jesús süpüla outaa waaʼu, watüjaa aaʼu kojutuin maʼin nümüin sukuwaʼipa wayuu, nayapejeʼe kojutuleein nümüin na nikirajüinkana (Prov. 8:31; paashajeʼera Juan 13:1). Nütüjaa aaʼu Jesús wainmainjatüin tü kasa alatakat nümüin yaa mmapaʼa sümaa niʼrüinjachin maʼin müliaa süpülapünaa outaa. Nnojotpejeʼe nikeraajüin neʼe tü niʼyataainkat nümüin Jehová saaʼujee nuluwataain nia sünain aaʼinraa  tia. Nikeraajüin shia süka alin wayuu nüpüla, nikirajeein shia jee nükaalinjeein shia. Jaʼitakajeʼe neʼe süpülapünaa outuin nia, nuʼlojooin nooʼui na nikirajüinkana süpüla nikirajüin naya sünain waneirua kasa anashaatasü maʼin jee süpüla nütütüleʼerüin naaʼin (Juan 13:12-15). Shiasaʼa süchikijee tia, soʼu nükachennüin sünain tü wunuʼukot, nüküjain nümüin chi wayuu mojulaashi yalajachikai naʼatoʼu sünain eejeechin nia suluʼu tü paʼaraiisükat jee müsia nuchuntuin nümüin Juan süpüla naaʼinmajüinjatüin María, tü niikat (Luc. 23:42, 43; Juan 19:26, 27). Süka naapajiraain nikii Jesús saaʼu wayuu, kojutuin shia nümüin jee kamaneein nia sümüin, atüjaana aaʼu aishaatain maʼin wayuu nüpüla.

12. ¿Kasa ayatayütka naaʼinrüin Jesús wapüleerua?

¹² Mayaainjeʼe outuichipain Cristo süpüla najaʼlajeʼerüin tü kaainjalakat, ayatüshia nia aainjain kasa anasü wapüleerua (Roma 6:10). Ayatayüiya nia aʼyataain süchiirua naapüin kasa anasü wamüin süka naapajiraain nikii waaʼu. Wainma maʼin tü kasa naainjakat wapüleerua süka nuluwataaichipain. Niain chi laülaashikai napüleerua na sacerdotekana otta niain wekiipüʼüjanain waya anoujashiikana (1 Cor. 15:25; Éf. 5:23; Heb. 2:17). Akaʼaya nia nuutkajeʼereein na anoujashii chainjanakana chaa iipünaa jee müshiʼiya na wattakana naalii wayuu yaainjanakana kepiain yaa mmapaʼa. Kettaalejeeria tia nutuma süpülapünaa sülatüin tü kaʼi shiʼreetkalü oʼu maʼin wayuu müliaa (Mat. 25:32; Mar. 13:27). a Jee müshia Jesús jülüjasü naaʼin eeinjatüin waneepia tü pütchi nekirajaainjatkalü anain na aʼyataashiikana nümüin Jehová maaʼulu yaa (Mat. 24:45). Soʼunnaa tü miitkat juya nuluwataainjatkalü oʼu ayateechia nia aʼyataain wapüleerua süpüla nükaalinjain waya. Naapüin Jehová nikii chi Nüchonkai waaʼu süpüla katüinjatüin woʼu waneepia jee süpüla naaʼinrüinjatüin wainma kasa anasü wapüleerua.

AYATAʼAYA PIKIRAJAAIN

13. ¿Jamüsü süpüla piyaawatüin saaʼu tü paalinkat nüpüla Jehová otta Cristo sükajee püsakireʼerüin paaʼin sünain tü paashajeʼerakat?

¹³ Püsakireʼerüle paaʼin sünain tü paashajeʼerakat, atüjeechi maʼin pia süchiki tü paalinkat nüpüla Jehová otta Jesucristo. Kojuya kaʼi süpülapünaa tü Outkajawaakat eere Sotuin Waaʼin Outuin Jesús, eesüjaʼa süpüla paashajeʼerüin tü karaloʼutakat Mateo, Marcos, Lucas jee shiale Juan. Nnojotsü choʼujaain paashajeʼerüinjatüin wainma pütchi uwatuwoʼushi. Anasü paashajeʼerüle shia süpüla pütüjaainjatüin maʼin saaʼu  jamüin alinjachika maʼin püpüla Jehová otta Jesús jee anasü paaʼinrüle tüü: püküja namüin na waneinnua tü kasa pütüjakat sünainjee tü paashajeʼerakat.

14. Saashin Salmo 119:97 jee müsia tü nootakat, ¿kasa waaʼinrajatka süpüla wekirajaain süchiki naapajiraain nikii Jesús waaʼu jee süchiki waneirua kasa? (Piirakaa sümüin tü ayaakuaakat).

¹⁴ Kakaliaichire pia sünain tü anoujaakat, eesüjaʼa jülüjale paaʼin eeyürüle süpüla pütüjain sooʼomüin süchiki nukuwaʼipa Jehová maʼaka saaʼin lotuin nukuwaʼipa, alin wayuu nüpüla otta naapüin nikii chi Nüchonkai waaʼu. Wainmapejeʼe maʼin tü kasa eekat süpüla pütüjain süchiki tia. ¿Kasa paaʼinrajatka süpüla pütüjainjachin sooʼomüin? Ekirajaweeshi pia sünain tü pütchi suluʼukat tü karaloʼutairua eekat wamaʼana. Eere wanee wetsiikulo suluʼujee tü Bibliakat nnojotkat piyaawatüin maʼin aaʼu, pikirajaa süchiirua tia. Shiasaʼa mapa, püsakireʼera paaʼin sünain tü pikirajaakalü anain otta tü pütüjakat nüchiki Jehová, nüchiki chi Nüchonkai otta süchiki tü paalinkat napüla (paashajeʼera Salmo 119:97 otta tü nootakat).

15. ¿Jamüshiiche ayatüinjanakaʼa waya sünain achajawaa pütchi anasü suluʼujee tü Bibliakat?

¹⁵ Nnojo piyüülajaain müleka nnojoire pütüjain wanee kasa jeketü jee wanee kasa kamalainkat pümüin paashajeʼerapa tü Bibliakat. Ekirajawaa sünain tü Bibliakat meematsü aka saaʼin achajawaa süchiki ooro, eesü siraale kaʼi naaʼu na achajaakana ooro jee kakaliale naya sünain tia. Nnojotpejeʼe ashapajaain naaʼin otta ayatüshiʼiya naya sünain achajawaa. Natüjaa aaʼu kojutuin maʼin tü oorokot jaʼitaichi niain wanee niʼipachon neʼe. Tü pütchi anasü watüjakat suluʼujee tü Bibliakat kojutuleesia maʼin suulialeʼeya tü oorokot (Sal. 119:127; Prov. 8:10). Nnojo piyüülajaain aaʼin, ayataʼaya paashajeʼerüin otta pikirajaain sünain tü Bibliakat (Sal. 1:2).

16. ¿Kasa eeka süpüla waaʼinrüin süpüla washatüin nukuwaʼipa Jehová otta nukuwaʼipa Jesús?

¹⁶ Sümaʼainruʼu pikirajaain sünain tü Bibliakat, jülüja paaʼin jamüinjatüin sukuwaʼipa putuma süpüla paaʼinrüin tü pikirajaakalü anain. Jamüshijaʼa pikirajaale süchiki lotuin nukuwaʼipa Jehová, eesü süpüla püshatüin tü nukuwaʼipakat wanaa sümaa nnojolin koʼuin pukuwaʼipa sümüin wayuu. Eesü süpüla püshatüin nukuwaʼipa Jesús sükajee alin püpüla Jehová otta na wayuukana. Pükaalinja na wawalayuukana jaʼitairü kapüleein pümüin aaʼinraa tia jee püküja pütchi sümüin wayuu süpüla neʼrüinjanain kasa anasü sükajee naapajiraain nikii Jesús waaʼu.

17. ¿Kasa wekirajaajeetka anain sünain tü wane ekirajaayakat?

¹⁷ Ayatüle wekirajaain süchiki naapajiraain nikii Jesús waaʼu, aijeechi maʼin wapüla Jehová otta müshia Jesús. Akaʼaya waya aijeenaʼaya waya napülaya (Juan 14:21; Sant. 4:8). Ayataʼaya pikirajaain sünain tü pütchi naapakat Jehová wamüin süchiki tü naaʼinrakat Jesús süpüla naapajiraain nikii waaʼu. Sünain tü wane ekirajaayakat, wekirajaajeerü anain jamüin aneetkaʼa wakuwaʼipa sutuma naapajiraain nikii Jesús waaʼu otta müsia tü waaʼinrajatkat süka kojutuin maʼin wamüin tü naaʼinrakat Jehová wapüleerua süka alin waya nüpüla.