1. ¿Kasa jülüjaka maʼin naaʼin na wayuukana maaʼulu yaa?

 MAAʼULU YAA wainma wayuu jülüjakana aaʼin nakuwaʼipa namüiwaʼa. Jamüshiijaʼa naya neʼitaain nayaakua jee waneirua kasa naainjaka suluʼupünaa redes sociales süpüla kojutuin naya sutuma wayuu. Palitchonpejeʼe na wayuu kojutukana amüin Jehová. Sünain ekirajaayakat tüü, wekirajaajeerü anain tü waaʼinrajatkat süpüla kojutuin watuma Jehová otta jamüin waʼwaajüinjachikai nia. Wekirajaajeerü anain kasain waʼwaajüin akajee Jehová otta tü naaʼinreetkat soʼu palitchon juya süpüla kojutuinjachin nia atumawaa.

TÜ WAAʼINRAJATKAT SÜPÜLA KOJUTUIN WATUMA JEHOVÁ

2. ¿Kasa pülasü naainjaka Jehová saaʼu tü uuchikat Sinaí? (Piirakaa sümüin tü ayaakua sünainkat süta tü rewiisütakat).

² Ashajünüsü suluʼu tü Bibliakat pülashin maʼin Jehová, müshijeseʼe waʼwaajüinjachin nia. Süchikijee taashin na israelitakana nutuma Jehová noulia na egipciokana, naaʼinrüin Jehová waneirua kasa pülasü. Maa chakai waaʼin namaa na israelitakana wanaa sümaa jutkatüin naya süʼütpaʼa tü uuchikat Sinaí süpüla naapajüinjatüin tü nüküjainjatkat Maleiwa namüin. Sümaʼainruʼu tia, asirumajaasü saaʼu tü uuchikat, atüttüsü jee kayaasü maʼin shia. Kaitüsü wanee müsü aka saaʼin sümüsain siki sünainjee tü uuchikat otta jaʼyasü shiʼira wanee suʼuwa paaʼa (Éx. 19:16-18; 24:17; Sal. 68:8). Ponokajasaʼa naaʼin na israelitakana neʼrapa tü naainjakat Jehová sükajee tü nüpülainkat.

3. ¿Kasa waaʼinrajatka süpüla kojutuinjachin Jehová watuma?

 ³ ¿Kasa waaʼinrajatka süpüla kojutuin Jehová watuma? Wanee kasa waaʼinrajatka shia waashajaain namaa na wayuukana süchiki tü kasa pülasü naainjakat Jehová jee süchiki tü nukuwaʼipakat. Kojutushi nia watuma waapüle analuʼutkat nümüin saaʼujee tü kasa wountakat waaʼinrüin (Is. 26:12). Anasü washatüle nukuwaʼipa David, chi aluwataashikai. Jamüshijaʼa nia, nuʼwaajüin Jehová wanaa sümaa nuʼuraajüin nümüin noʼupala na israelitakana. Anuu nünüiki: «Jehovákalee pia neʼe pümüiwaʼa chi Miyoʼushikai jee chi Pülashikai maʼin, pia neʼe chi kanainjeejachikai tü kasa anakat maʼin jee pia chi kojutuinjachikai sutuma wayuu, jama pümaʼanajeejatüin süpüshuaʼa tü kasa chakat iipünaa jee tü yaakat saaʼu tü mmakat». Kettaapa nünüiki David aʼwaajünüshi Jehová natuma napüshuaʼa na israelitakana (1 Crón. 29:11, 20).

4. ¿Kasa naainjaka Jesús aʼwaajünaka akajee Jehová?

⁴ Wanaa sümaa yaajachin Jesús saaʼu tü mmakat, wainma tü kasa naainjakat aʼwaajünaka anainjee chi Nüshikai. Jamüshijaʼa naainjapa wanee kasa pülasü nüküjain namüin na wayuukana nuuntuin naaʼinrüin süpüshuaʼa tia sükajee tü nüpülainkat Jehová (Mar. 5:18-20). Wanee kasa naaʼinraka Jesús aʼwaajünaka akajee Jehová shia sükajee sukuwaʼipa nünüiki otta sükajee nukuwaʼipa namaa na waneinnua. Wanaa sümaa chajachin Jesús sünain ekirajaa suluʼu tü ekirajüleekat nüchiki Maleiwa eejatü yala «wanee wayuu polooirü mekiisatmüin juya kaleʼeruʼuin yolujaa. Ayuuisü maʼin shia sutuma, jokotusü tia wayuukat jee isasü süchiki püchiratüin shia». Niʼrapa Jesús tia wayuukat, amülialaasü naaʼin saalii, nürütkaaka sünainmüin jee nümaka sümüin: «‹Nii waaʼiraa, awatüitpa puulia tia ayuuliikat›. Niʼitaainjeseʼe Jesús najapü saaʼu tü wayuukat jee püchiratalaa sümaka, suʼwaajakalaka Maleiwa» (Luc. 13:10-13). Sutuma saawalaain jee anain saaʼin tia wayuukat suʼwaajüin Jehová. Anasü washatüle sukuwaʼipa tia wayuukat.

¿JAMÜSHI WAʼWAAJÜINJACHIKAʼA JEHOVÁ?

5. ¿Jamüshi kojutuinjachikaʼa watuma Jehová?

⁵ Waʼwaajüin Jehová saaʼujee kojutuin nia wamüin. Kojutushi watuma Jehová saaʼujee anain maʼin tü nukuwaʼipakat jee pülashi maʼin nia (Sal. 96:4-7). Kekiishi maʼin nia, weʼrüin tia saaʼujee tü kasa nukumalakat, katüsü woʼu nutuma jee naapüin tü kasa choʼujaakat wamüin (Apoc. 4:11). Waneepiashi nia wamaa (Apoc. 15:4). Anasü süpüshuaʼa tü kasa naainjakat jee nikeraajüin waneepia tü nümakat (Jos. 23:14). Pansaasü tü nümakat Jeremías nüchiki Jehová wanaa sümaa nümüin mayaa: «Nnojoishi eein wanee eekai müin aka paaʼin naʼakajee na kekiishiikana otta naʼakajee na süʼlaülashiikana mma» (Jer. 10:6, 7). Wainma tü kasa waʼwaajüinjachikai anainjee chi Washi iipünaajachikai, nnojoishi neʼe kojutuinjachin nia watuma, alinjachi nia wapüla.

6. ¿Jamüshi aikaʼa wapüla Jehová?

⁶ Waʼwaajüin Jehová saaʼujee alin maʼin nia wapüla. Aishi wapüla Jehová saaʼujee anain maʼin nukuwaʼipa. Jamüshijaʼa nia amüliajüi nia wayuu (Sal. 103:13; Is. 49:15). Kapülasü naaʼin wakuwaʼipa otta aisü nümüin wamüliala (Zac. 2:8). Nükaalinjain waya süpüla aleewain waya nümaa (Sal. 25:14; Aluw. 17:27). Nnojotsü yaletüin naaʼin. Anuu sünüiki tü Bibliakat nüchiki: «Müshi nejepülaakai aaʼin Jehová süpüla niʼrüin tü alatakat chaa sirumatuʼu otta tü alatakat saaʼu tü Mmakat jee süpüla niyalerüin chi wayuu müliakai aaʼin» (Sal. 113:6, 7). Saaʼujee müin nukuwaʼipa Jehová waʼwaajeein maʼin nia (Sal. 86:12).

7. ¿Kasa waküjeeka sümüin wayuu?

⁷ Waʼwaajüin Jehová süpüla shiʼraajüin  wayuu tü nukuwaʼipakat. Wainma wayuu nnojotka eʼraajüin maʼin nukuwaʼipa Maleiwa sutuma tü alawaa nüküjakat Satanás nüchiki. «Müsü süsürünnakai aaʼin nekii nutuma» (2 Cor. 4:4). Nunoujireein na wayuukana nnojoluin motuin naaʼin Jehová saainjala wayuu, nnojoluin kachipünaain naaʼin nakuwaʼipa jee niain kasirüin tü müliaa neʼrakat. Sutuma weʼraajüin nukuwaʼipa Jehová waküjeein shia sümüin wayuu. Waaʼinrüin tia saaʼujee kojuteein nia watuma (Is. 43:10). Anashii wekirajaale sünain tü sümakat Salmo 96 süchiki tü kasa waʼwaajüinjachikalü anainjee Jehová.

¿KASA WAʼWAAJÜINJACHIKA ANAINJEE JEHOVÁ?

8. ¿Kasa waʼwaajaka anainjee Jehová? (Salmo 96:1-3).

⁸ (Paashajeʼera Salmo 96:1-3). Eeshii süpüla waʼwaajüin Jehová sükajee wanüiki. Aküjünüsü sünain tia wetsiikulokot neeʼirajüinjanain nümüin Jehová na aʼyataashiikana nümüin, kojutuinjachi nia natuma, naküjainjatü weinshi tü pütchi anasü süchiki suʼttaainjatüin wayuu nutuma otta süchiki tü kasa anasü naaʼinrakat sainküinpünaa mmakat. Waaʼinrüle tia, waʼwaajeechi chi Washi iipünajachikai. Na aʼyataapuʼukana nümüin Jehová naküjapuʼuin maʼin sümüin wayuu süchiki nukuwaʼipa Jehová otta tü kasa anasü naaʼinrakat napüleerua (Dan. 3:16-18; Aluw. 4:29). ¿Kasa waaʼinrajatka süpüla washatüin nakuwaʼipa?

9, 10. ¿Kasa watüjaka sünainjee tü alatakat sümüin Angelina? (Piirakaa sümüin tü ayaakuaakat).

⁹ Jülüjataa waaʼin tü alatakat sümüin wanee wawala Angelina sünülia a, chejeʼewat shia Estados Unidos. Anasü sünüiki nüchiki Jehová sümaa yalayalain saaʼin shiʼyataaleruʼu. Sutuma jeketüin shia sünain shiʼyataain ounejünüsü shia sünain wanee jutkatirawaa namaa na aʼyataajiraakana sümaa süpüla neʼraajiraain nakuwaʼipa. Yapasü sutuma tü wawalakat tü sünüikinjatkat jee tü ayaakuaa shiiʼiyatüinjatkat namüin na aʼyataajiraakana sümaa. Tia shia süpüla neʼrüinjatüin talatüin saaʼin sünain aʼyatawaa nümüin Jehová. Naashajaaka wanee wayuu süpülapünaa tü wawalakat jee nüküjain süchiki tü nukuwaʼipakat. Nüküjain süchiki Aküjaliin pütchi na wayuu kachooinkana nia sümaa nimeeʼerainpalain tü nanoujakalü anain. Anuu sünüiki Angelina süchiki tia: «Mmotkalaka taaʼin sutuma tü nümakat chia wayuukai. ‹Anasü taküjale tü shiimainkat nüchiki Jehová. Alawaa neʼe tü nümakat chia wayuukai›, tamaka suluʼu taaʼin».

 ¹⁰ Süpülapünaa yootuin Angelina, oʼuraajüsü shia suluʼu saaʼin. Sümakalaka nümüin chia wayuukai sümaa kamaneein shia. «Müsia takuwaʼipa maʼaka paaʼin, ekirajünüsü taya nüchiki Jehová natuma na wayuu kachooinkana taya jintuluiwaʼaya taya. Ayatapejeʼe taya anoujain nünain Jehová maaʼulu yaa». Mayaainjeʼe nnojoluin anain nümüin chia wayuukai tü süküjakat tü wawalakat ayatüsü shia kamaneein nümüin. Shiiʼiyataka tü shiyaakuakat namüin na aʼyataajiraakana sümaa eere talatüin saaʼin namaa na wawalayuukana otta süküjain süchiki tü sunoujakalü anain sümaa kojutuin naya sümüin (1 Ped. 3:15). Kettaapa sünüiki tü wawalakat, nüküjain chia wayuukai waneirua kasa anasü niʼrakat soʼu namaapuʼuin nia na Aküjaliikana pütchi. Anuu sünüiki Angelina: «Kojutuinjachi watuma Jehová jee waküjainjatü tü shiimainkat nüchiki». Waʼwaajüin Jehová waküjapa tü shiimainkat nüchiki sümüin wayuu.

11. ¿Kasa naaʼinraka na aʼyataashiikana nümüin Jehová süpüla naaʼinrüin tü sümakat Salmo 96:8?

¹¹ (Paashajeʼera Salmo 96:8). Waʼwaajüin Jehová sükajee tü kasa eekat wamaʼana. Kakaliaichi naʼwaajüin Jehová na aʼyataashiikana nümüin sükajee tü kasa eekat namaʼana (Prov. 3:9). Jamüshiijaʼa na israelitakana asülajüshii kasa süpüla sukumajünüin jee sunoutunuin tü aʼwaajüleekat Maleiwa (2 Rey. 12:4, 5; 1 Crón. 29:3-9). Soʼu nükalioʼu Jesús eejana waneinnua anoujashii aapakana nümüin Jesús jee namüin na aluwataaushikana wanee kasa choʼujaale shia namüin (Luc. 8:1-3). Na anoujashii namaiwajanakana naluwataain kasa namüin na nawalayuukana süpüla nakaalinjain naya (Aluw. 11:27-29). Müsia maaʼulu yaa eeshii süpüla waʼwaajüin Jehová sükajee tü nneerü wasülajakat süpüla wakaalinjain na wawalayuukana sainküin mma jee süküjünüin pütchi.

12. ¿Jamüshi waʼwaajakaʼa Jehová wasülajüle nneerü süpüla nakaalinjünüin na wawalayuukana sainküin mmaka? (Piirakaa sümüin tü ayaakuaakat).

¹² ¿Jamüsü watüjaaka saaʼu eein süpüla waʼwaajüin Jehová sükajee tü nneerü wasülajakat? Wekirajaa sünain tü alatakat sümüin wanee wawala. Soʼu tü juyakat 2020, watta naalii wayuu müliakana sutuma jamü suluʼu tü mmakat Zimbabue sutuma nnojoluin shiʼitüin maʼin tü juyakat. Soʼu tia, aʼyataashii maʼin na wayuukana sünain apotoo tü mmakat süpüla napünajüin. Eejatka wanee wawala Prisca sünülia. Ojuʼitawaisü shia sünain aküjaa pütchi piantua süpüla semaanakat. Sutuma saaʼinrüin tia, meeʼerapalasü shia atumawaa natuma  na wayuu kepiakana pejepünaa sünain. «Outeetsaʼa pia jamü nnojorüle piʼyataain», müshii naya sümüin. «Nnojoishii nüpütüin Jehová namüiwaʼa na aʼyataashiikana nümüin», maʼwaisü tü wawalakat namüin. Shiasaʼa mapa akaalinjünüsü tü wawalakat sükajee tü nneerü nasülajakat na wawalayuukana sainküin tü mmakat. Ponusü naaʼin na wayuu kepiakana pejepünaa sünain neʼrapa tia sümaa namüin sümüin: «Shiimainjaʼa nnojoluin nüpütüin pia pümüiwaʼa chi Maleiwakai. Watüjawee aaʼu sooʼomüin nüchiki». Outkajaashii mapa akaratshishii wayuu naʼakajee.

13. ¿Jamüshi waʼwaajakaʼa Jehová sükajee wakuwaʼipa? (Salmo 96:9).

¹³ (Paashajeʼera Salmo 96:9). Waʼwaajüin Jehová sükajee wakuwaʼipa. Wuleinjatü natapaʼa na sacerdote aʼyataapuʼukana nümüin Maleiwa süpülapünaa nekerotuin suluʼumüin tü aʼwaajüleekat (Éx. 40:30-32). Müsia neʼe wakuwaʼipa, wachajaainjatü sukuwaʼipa süpüla keisalain waya jee wuleinjatüin wakuwaʼipa nuʼupala Maleiwa (Sal. 24:3, 4; 1 Ped. 1:15, 16). Wooʼulaainjatü süpüshuaʼa tü kasa mojusü waaʼinrapuʼukat jee jeketüinjatü tü wakuwaʼipakat süpüla müin shia maʼaka saaʼin tü nukuwaʼipakat Jehová (Col. 3:9, 10). Mayaainjeʼe yarüttüin maʼin nukuwaʼipa wanee wayuu jee mojulaain maʼin nia, eesü süpüla jeketüin tü nukuwaʼipakat nutuma Jehová.

14. ¿Kasa watüjaka sünainjee nukuwaʼipa Jack? (Piirakaa sümüin tü ayaakuaakat).

¹⁴ Jülüjataa waaʼin tü alatakat nümüin wanee wayuu, Jack nünülia. Mojulaapuʼushi maʼin nia, «yolujaa» münapuʼushi nia sutuma wayuu. Sutuma tü naainjalakat apüreesajinnüshi nia süpüla nuʼutunuinjachin aaʼin. Soʼunnaa püreesain nia, ekirajaashi nia sünain tü Bibliakat nümaa wanee wawala aküjakai pütchi suluʼu tü kaatsetkat. Mayaainjeʼe mojulaapuʼuin maʼin Jack, niiʼiratüin tü nukuwaʼipakat jee woutiisashi nia. Aʼyalajüshii maʼin na waariakana soʼu tü kaʼi nuʼutunakalü oʼu naaʼin Jack, jama neʼrüin niiʼiratüin tü nukuwaʼipakat. Anuu nünüiki wanee surulaat aʼyataakai suluʼu tü kaatsetkat: «Naʼakajee na püreesakana yaʼayaa, niapuʼushi Jack chi mojulaakai maʼin. Anamiapejeʼe nia mapa». Wanee semaana süchikijee nuʼutunuin aaʼin Jack, outkajaashii na wawalayuukana suluʼu tü kaatsetkat maʼaka naaʼinrawalin shia. Soʼu tia, neʼrüin nuutkajaain wanee wayuu nnojoipuʼukai outkajaain. Ponusü naaʼin chia wayuukai niiʼiratüin nukuwaʼipa Jack. Müshijeseʼe nütüjaweein saaʼu tü  naaʼinrajatkat süpüla nuʼwaajüin Jehová. Wayaawata aaʼu sükajee tia eein süpüla waʼwaajüin chi Washi iipünajachikai sükajee tü wakuwaʼipakat (1 Ped. 2:12).

TÜ NAAʼINRAJATKAT JEHOVÁ SÜPÜLA KOJUTUINJACHIN NIA ATUMAWAA

15. ¿Kaseerü naainjaka Jehová süpüla kojutuinjachin nia atumawaa? (Salmo 96:10-13).

¹⁵ (Paashajeʼera Salmo 96:10-13). Ashajünüsü suluʼu Salmo 96 niain Jehová wanee aluwataai lotokoi akuwaʼipa süsalapa saainjala wayuu nutuma. ¿Kaseerü naainjaka Jehová süpüla kojutuinjachin nia atumawaa? Kasalajaneerü nutuma saainjala Babilonia tü kojutukalü atumawaa jee najaʼttireerü shia saaʼujee mojutuin nia sutuma (Apoc. 17:5, 16; 19:1, 2). Eeshiijaʼa nanoujeenale wanaa wamaa waneinnua wayuu neʼrapa sajaʼttinnüin tü iküleesia ekirajakalü alawaa. Soʼu Armagedón najaʼttireena Jehová napüshuaʼa na wayuu nuluwataakana aaʼu Satanás, na mojutukana atuma nia jee yarüttaka atuma tü nünüliakat. Nuʼtteʼereenapejeʼe na wayuu aikana apüla nia, na oonookana sümaa nünüiki otta kojutukana atuma nia (Mar. 8:38; 2 Tes. 1:6-10). Kettaapa tü miitkat juya nuluwataainjatkalü oʼu Cristo jee nuuʼulakapa Satanás nüchikuaʼa naaʼin na wayuukana kojuteerü nutuma Jehová tü nünüliakat (Apoc. 20:7-10). Soʼu kaʼikat tia, «pirateerü maʼin tü mmakat sutuma tü naʼanasiakat Jehová. Maʼaka piratüin wüin tü palaakat» (Hab. 2:14).

16. ¿Kasa wachajaainjatka akuwaʼipa? (Piirakaa sümüin tü ayaakuaakat).

¹⁶ Anashaateerü maʼin tü kaʼi nuʼwaajüneechikalü oʼu Jehová natuma napüshuaʼa na wayuukana. Sümaʼainruʼu waʼatapajüin tia kaʼikat, wachajaa maʼin sukuwaʼipa süpüla kojutuin watuma chi Maleiwakai. Süpüla jülüjain waaʼin tia waneepia naneeküin na Laülaashii Jülüjakana Aaʼin na Aküjaliikana pütchi tü sümakat Salmo 96:8 süpüla shiainjatüin tü pütchi süpülajatkat tü juyakat 2025: «Kojuta jutuma Jehová».