1. Püküja waneirua kasa kapüleeka wamüin süpüla waneeküin.

 WAINMA kasa waneeküinjatka soʼukaiwai. Eesü tü kasa mapüleekat süpüla waneeküin maʼaka saaʼin tü weküinjatkat jee jalapüshinjanain weisalaain. Eepejeʼe waneirua kasa kapüleekat süpüla waneeküin. Maʼaka saaʼin tü waaʼinrajatkat ayuuire waya, tü waaʼinrajatkat süpüla talatüin waaʼin, anain wakuwaʼipa sümaa wapüshi otta tü waaʼinrajatkat süpüla waʼyataain nümüin Maleiwa. Aneesü watuma tü kasa waneekakat süpüla talatüinjatüin waaʼin jee talatüin naaʼin na wapüshikana. Shiapejeʼe waneeküin kasa anasü süpüla talatüinjatüin naaʼin Jehová watuma (Roma 12:1, 2).

2. ¿Kasa waaʼinrajatka süpüla anain tü kasa waneekakat?

² Sünain ekirajaayakat tüü, wekirajaajeerü anain apünüinsü kasa waaʼinrajatka süpüla anain tü kasa waneekakat. Wasakirüinjatü süchiirua tia, jülüjainjatü waaʼin tü jülüjakat naaʼin Jehová süchiki wanee kasa otta waneeküinjatü tü anainjatkalü atuma wakuwaʼipa. Wekirajaajeerü anain tü waaʼinrajatkat süpüla wayaawatüin saaʼu anale jee mojule wanee kasa (Prov. 2:11).

WASAKIRA SÜCHIIRUA SÜPÜLAPÜNAA WANEEKÜIN WANEE KASA

3. ¿Jamüshii wasakirüinjanakaʼa palajana süpülapünaa waneeküin wanee kasa? Püküja wanee sukuwaʼipa.

³ Süpüla anain sukuwaʼipa tü kasa waneekakat, asakirüinjana waya palajana süchiirua tia. ¿Jamüsü waaʼinrajatka tia? Jamüshijaʼa nuʼunule wanee wayuu pitaaruluʼumüin sutuma ayuulin maʼin nia, ¿aashin nnojoleerüin naapüin chi tottootkai nümüin tü nipinaseinjatkat nnojoire nüsakirüin nia palajana? Müsia neʼe tü  waaʼinrajatkat süpüla anain sukuwaʼipa tü kasa waneekakat.

4. Saashin Proverbios 18:13, ¿kasa waaʼinrajatka süpüla wayaawatüin saaʼu sukuwaʼipa wanee kasa? (Piirakaa sümüin tü ayaakuaakat).

⁴ Süpüla wayaawatüin saaʼu sukuwaʼipa wanee kasa, asakirüinjana waya palajana süchiirua tia. Jamüshiijaʼa wounejaanüle sünain wanee miʼiraa, wasakirüinjachi palajana chi wayuu ounejaakai waya. Eeshii süpüla wasakirüin nia jalainjatüin jee joujainjatüin tia miʼiraakat, jeʼrashiinjanain na wayuu oʼunuinjanaka sünain. Eeinjachire wanee wayuu jülüjainjachikai aaʼin anale sukuwaʼipa tü aainjünüinjatkat, jaralii na oʼunuinjanaka sünain, kasain aainjünüinjatka otta eejeerüle asawaa sünain. Aneerü sukuwaʼipa tü kasa püneekakat pütüjaale saaʼu tia (paashajeʼera Proverbios 18:13).

5. ¿Kasa waaʼinrajatka wayaawatapa saaʼu tü eekat sünainjee tü waneeküinjatkat?

⁵ Pütüjaapa saaʼu süchiki tia, jülüja paaʼin tü eekat sünainjee. ¿Jama pütüjaale saaʼu suʼunuinjatüin wayuu mojutuka amüin tü sümakat tü Bibliakat sünain tü miʼiraakat? ¿Jama nnojoire eein wanee wayuu jülüjainjachikai aaʼin na antakana suulia sülanaʼaleein nasüin? ¿Jama pütüjale saaʼu eejeenain na oʼunakana shiiʼiree asawaa? (1 Ped. 4:3). ¿Oʼuneeiche pia sünain tia miʼiraakat saainjünüle wanaaluʼu sümaa tü outkajawaakat jee wanaaluʼu sümaa tü aküjaakat pütchi? Aneerü sukuwaʼipa tü kasa waneekakat jülüjale waaʼin tü eekat sünainjee. Mayaainjeʼe  watüjaain saaʼu tia anasü watüjaale saaʼu tü nümakat Jehová süchiki tü kasa waneeküinjatkat (Prov. 2:6).

JÜLÜJA WAAʼIN TÜ JÜLÜJAKAT NAAʼIN JEHOVÁ

6. Saashin Santiago 1:5, ¿jamüsü wachuntuinjatkaʼa kaalinwaa nümüin Jehová?

⁶ Wachunta nümüin Jehová süpüla jülüjainjatüin waaʼin tü jülüjakat naaʼin süchiki wanee kasa. Kekiijeenaka waya nutuma jee nnojoleena niyoujain waya saaʼujee tia (paashajeʼera Santiago 1:5). Kekiire waya, aneerü tü kasa waneekakat.

7. ¿Kasa waaʼinrajatka süpüla watüjaain saaʼu tü jülüjakat naaʼin Jehová süchiki tü waneeküinjatkat? Püküja wanee sukuwaʼipa.

⁷ Wachuntapa kaalinwaa nümüin Jehová jülüja waaʼin tü naaʼinrakat süpüla nusoutuin wamüin. Maaʼawale waya suluʼu wanee mma, wasakirüin na wayuu kepiakana suluʼu tia mmakat sümaa jülüjain maʼin waaʼin tü namakat wamüin. Müsia neʼe wakuwaʼipa wachuntapa kaalinwaa nümüin Jehová, müsü jülüjakai waaʼin nünüiki wachajaale suluʼu tü Bibliakat pütchi wayaawateetkalü atuma anale nümüin Jehová tü waneeküinjatkat. Jülüjataa waaʼin tü waashajaaitpakalü achiki suluʼu pütchi 4. Süpülapünaa waneeküin woʼunuinjanale sünain tü miʼiraakat, anasü jülüjale waaʼin tü sümakat tü Bibliakat süchiki tü miʼiraa aainjünakat süpüla süsaainjatüin wayuu sünain, süchiki jameerüin wakuwaʼipa nnojoliire anain na waʼaleewajaakana amaa. Otta jülüjainjatü waaʼin tü sümakat tü Bibliakat  süchiki waaʼinmaainjatüin maʼin tü waʼyataainkat nümüin Maleiwa suulialeʼeya jülüjain waaʼin wakuwaʼipa neʼe wamüiwaʼa (Mat. 6:33; Roma 13:13; 1 Cor. 15:33).

8. ¿Kasa paaʼinrajatka süpüla puusütüin sünain tü pütchi pütüjaweekalü aaʼu? (Piirakaa sümüin tü ayaakuaakat).

⁸ Eesü choʼujaale pümüin pükaalinjünüin süpüla puusütüin sünain tü pütchi pütüjaweekalü aaʼu. Eesü süpüla puchuntuin kaalinwaa nümüin wanee wawala laülaakai aaʼin sünain anouja. Anasü püchajaale sukuwaʼipa süpüla pikirajaain süchiirua tia. Anasü pikirajaale sünain tü karaloʼutakat Nachajaayainjatü pütchi na aküjaliikana pütchi nüchiki Jehová jee shiale sünain tü karaloʼutakat Pütchi suluʼujeejatka tü Bibliakalü aneetka atuma nakuwaʼipa na anoujashiikana. Aneesü watuma tü kasa waneekakat süpüla talatüin naaʼin Jehová wamaa.

9. ¿Kasa waaʼinrajatka süpüla wayaawatüin saaʼu anale nümüin Jehová tü waneeküinjatkat? (Éfeso 5:17).

⁹ Süpüla wayaawatüin saaʼu anale noʼuluʼu Jehová tü kasa waneeküinjatkat weʼraajüinjatü tü nukuwaʼipakat. Aküjünüsü suluʼu Proverbios 9:10 weʼraajüinjachin chi wulekai akuwaʼipa süpüla wayaawatüin saaʼu wanee kasa. Müsüjeseʼe anain weʼraajüle nukuwaʼipa Jehová, tü naaʼinrüinjatkat mapeena, tü anakat noʼuluʼu jee tü mojukat noʼuluʼu. Süpülapünaa waneeküin wanee kasa wasakira waaʼin sünain tüü: «¿Anasüche noʼuluʼu Jehová tü taneeküinjatkat?» (paashajeʼera Éfeso 5:17).

10. ¿Jamüsü kojutuleekaʼa maʼin wamüin tü nümakat Jehová suulialeʼeya sukuwaʼipa wayuu eere kepiain waya?

¹⁰ Eejeerü kaʼi waneeküinjatka oʼu wanee kasa anaka noʼuluʼu Jehová mojushiijeetka namüin na wapüshikana jee namüin na waʼaleewainyuukana. Eesüjaʼa süpüleeruaanüle saaʼin wanee wawala natuma na wayuu kachooinkana shia süpüla kasaalüinjatüin shia nümaa wanee wayuu washirü jee niale nümaa wanee wayuu eekai süpüla naapüin paʼünaa namüin na süpüshikana. Eeshiijaʼa naaʼinrüle tia mayaainjeʼe nnojoluin anain nunoula chia wayuukai otta eeshiijaʼa naaʼinrüle tia shiiʼiree anain sukuwaʼipa nachon naashin. Anasü jülüjale saaʼin tü wawalakat pütchikat tüü: «¿Aneetche sukuwaʼipa tanoula nutuma chi wayuu kasaalüinjachikai amaa taya? ¿Kasa jülüjaka naaʼin Jehová süchiki tia?». Jalouijeerü maʼin sümüin tü pütchi suluʼukat Mateo 6:33, eere süküjain waaʼinmaainjatüin tü waʼyataainkat nümüin Maleiwa. Mayaainjeʼe kojutuin wamüin na wayuu kachooinkana waya jee kojutuin wamüin sukuwaʼipa wayuu eere kepiain waya, shia kojutuleeka maʼin wamüin talatüin naaʼin Jehová watuma.

WANEEKA TÜ KASA ANEETKALÜ ATUMA WAKUWAʼIPA

11. Saashin Filipos 1:9, 10, ¿kasa choʼujaaka süpüla waneeküin tü anainjatkalü atuma wakuwaʼipa?

¹¹ Pütüjaapa saaʼu tü sümakat tü Bibliakat süchiki tü püneeküinjatkat anasü jülüjale paaʼin aneerüle pukuwaʼipa sutuma (paashajeʼera Filipos 1:9, 10). Süpüla pütüjaain saaʼu tü eejeetkat sünainjee tü kasa püneekakat anasü jülüjale paaʼin anale jee mojule pukuwaʼipa sutuma. Eesü waneirua kasa mapüleejeetka wamüin waneeküin. Eepejeʼe waneirua kapüleejeetka wamüin süpüla wayaawatamaatüin saaʼu anale shia. Pütüjaale saaʼu tü anakat jee tü mojukat noʼuluʼu Jehová aneerü sukuwaʼipa tü kasa püneekakat mayaainjeʼe kapüleein shia pümüin.

12, 13. ¿Jamüsü püneekeetkaʼa tü anakat süpüla piʼyataain anain piyaawatüle saaʼu tü anakat jee tü mojukat noʼuluʼu Jehová?

¹² Jülüjataa waaʼin tüü: Nnojorüle eein wamaʼana süpüla wayaʼlajüin tü kasa choʼujaakat sümüin wapüshi jee wousütüle sünain piamasü kasa eeka süpüla waʼyataain anain. Acheküsü jülüjainjatüin waaʼin palajana tü waaʼinrajatkat sünain tia aʼyatawaakat waneʼewai sukua, tü oora walatirüinjatkat sünain, wattale shia suulia wepia jee waneirua kasa. Eesüjaʼa waneeküle wanee sutuma kamalain wamüin tia aʼyatawaakat jee aneerü maʼin wakanain. Eepejeʼe  waneirua kasa jülüjainjatka waaʼin süpülapünaa waneeküin tü waʼyataainjatkalü anain.

¹³ ¿Kapüleejeetche wamüin woʼunuin sünain tü outkajawaakat sutuma? ¿Nnojoleetche apütaain kaʼi süpüla waashajaain namaa na wapüshikana jee wakaalinjain naya? Wasakirüle waaʼin sünain tia wayaawateerü aaʼu shiain anain maʼin waaʼinmaale tü waʼyataainkat nümüin Jehová jee sukuwaʼipa wapüshi suulialeʼeya waʼyataain maʼin süpüla wakanajüin wainma nneerü. Piyaawatüle saaʼu tia, püneekeerü wanee kasa anaka noʼuluʼu Jehová.

14. ¿Kasa waaʼinrajatka mojushiire namüin na waneinnua tü kasa waneekakat?

¹⁴ Wayaawatüle saaʼu tü anakat jee tü mojukat noʼuluʼu Jehová nnojoleerü waneeküin «wanee kasa mojushiijeetka sümüin wayuu» (Filip. 1:10). Jülüjainjatü waaʼin tia waneekajatpa tü washeʼinkat jee tü wayolojokot. ¿Kaseerü waainjaka mojushiire namüin na wawalayuukana  jee namüin na waneinnua sukuwaʼipa washeʼin jee wayolojo? Wayaawatüle saaʼu tü anakat jee tü mojukat nümüin Jehová kojuteerü wamüin jamüin naaʼin na waneinnua. Saaʼujee alin wapüla wayuu nnojoleerü jülüjain waaʼin wakuwaʼipa neʼe wamüiwaʼa jee nnojoleena aʼalaajaain waya suʼupala wayuu (1 Cor. 10:23, 24, 32; 1 Tim. 2:9, 10). Jülüjale waaʼin tia, jaʼyeerü waaʼu alin wapüla na waneinnua jee kojutuin naya wamüin sükajee tü kasa waneekakat.

15. ¿Kasa jülüjainjatka waaʼin süpülapünaa waneeküin wanee kasa?

¹⁵ Süpülapünaa waneeküin wanee kasa jülüjainjatü waaʼin palajana tü waaʼinrajatkat süpüla wountuin shia. Naashin Jesús jülüjainjatü waaʼin palajana keraale wakuwaʼipa süpülapünaa waaʼinrüin wanee kasa (Luc. 14:28). Süpüla waaʼinrüin tü kasa waneekakat anasü jülüjale waaʼin tü kaʼi walatirüinjatkat sünain, tü nneerü wakataajüinjatkat jee mapüsainjanale maʼin waya sünainjee. Eesüjaʼa choʼujaale waküjain sümüin waʼwayuuse jee namüin wachonnii tü naaʼinrajatkat süpüla nakaalinjain waya süpüla wountuin tü kasa waneekakat. Anasü waaʼinrüle tia namaa süka eein süpüla wayaawatüin saaʼu choʼujaale wanouteʼerüin wanee kasa jee shiale waneeküin wane kasa naata. Yootule waya namaa na wapüshikana süchiki tü kasa waneeküinjatkat, nakaalinjain waya süpüla wountuin shia (Prov. 15:22).

PÜNEEKA KASA ANAKA NOʼULUʼU JEHOVÁ

16. ¿Kasa waaʼinrajatka süpüla anain noʼuluʼu Jehová tü kasa waneekakat? (Paashajeʼera tü pütchikat « Waaʼinrajatka süpüla anain sukuwaʼipa tü kasa waneekakat»).

¹⁶ Waaʼinrüle tü kasa wekirajaaitpakalü anain aneerü tü kasa waneekakat. Wasakirüle süchiirua tü kasa waneeküinjatkat jee wekirajaale sünain tü sümakat tü Bibliakat süchiki, waneekeerü kasa anaka noʼuluʼu Jehová. Süchikijee waaʼinrüin tia, wachunta nümüin Jehová süpüla anain sukuwaʼipa tü kasa waneekakat.

17. ¿Kasa aneetka atuma sukuwaʼipa tü kasa waneekakat?

¹⁷ Mayaainjeʼe anain sukuwaʼipa tü kasa waneekakat nnojotsü anain weʼitaale waaʼin sünain tü kasa watüjakat, shia anaka aluʼu wachuntule kekiwaa nümüin Jehová. Kekiire waya nutuma Jehová, watüjaajeerü aaʼu wanee kasa, wayaawateerü aaʼu shia otta wayaawateerü aaʼu anale jee mojule wanee kasa noʼuluʼu Jehová (Prov. 2:1-5). Nükaalinjeena waya Jehová süpüla waneeküin tü kasa anakat noʼuluʼu (Sal. 23:2, 3).