1. ¿Jamüsü choʼujaaka eejüinjatüin waaʼin süpüla tü alatakat maaʼutpünaa yaa? Püküja süchiki wanee sukuwaʼipa (piirakaa sümüin tü ayaakuaakat).

MAA chakai paaʼin sünain wanee outkajawaa miyoʼu alüʼütka süpüla oʼttaa. Niasaʼa chi wawala shikiipüʼükai, chashi saaʼu tü aashajaaleekat sümaa «wattaʼa maalü tawalayuu», nümüin namüin napüshuaʼa na jutkatakana. Eʼitaanajatü tü muusikakat. Natüjaa aaʼu na jutkatüshiikana naikkalaainjanain sünain aapajaa tü muusikakat jee tü ekirajünajatkalü anain. Eepejeʼe na nnojoliikana jülüjain aaʼin nünüiki chi wawala shikiipüʼükai tü outkajawaakat jee shiale nnojoluin naapajüin tü muusikakat. Sutuma nnojoluin eejüin naaʼin, nnojotsü natüjaain aaʼu suʼttüitpain tü outkajawaakat, warai müshii neʼe otta yootojoʼotshii naya namaa naʼaleewainyuu. Tü waküjakalü achiki, shiiʼiyatüin tü eekat süpüla sülatüin nnojorüle eejüin waaʼin süpüla tü alatakat maaʼutpünaa yaa. Shikirajüin waya tia sünain eejüinjatüin waaʼin. ¿Kasa wayuu eejüinjatka apüla waaʼin?

2. ¿Jamüsü nüküjaka Jesuu namüin na nikirajüinkana sünain eeinjatüin naaʼin?

² Nüküjüin Jesuu namüin na nikirajüinkana eeinjatüin naaʼin süpüla «tü sükaliajatkat sajaʼlajaain kasakat süpüshua», yapainjana süpüla tia kaʼikat naashin Jesuu. Müshi nia: «Anakaja müleka eere jaaʼin tapüla tayakai, chi Jüsenyotsekai, süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma». Süchikijee, kojuyatua nümüin namüin: «Anakaja müleka eere jaaʼin» (Mat. 24:3; paashajeʼera Marcos 13:32-37). Saashin tü karalouktakat Mateo,  aashajaashi Jesuu süchiki tia namaa na nikirajüinkana. Müshi nia: «Anakaja müleka eere jaaʼin tapüla tayakai, chi Jüsenyotsekai, süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma». Nümaka süchikijee: «Anashii müleka keraajüle jia sümaa eein jaaʼin tapüla tayakai, chi Shipayakai Wayuu». Anuu nünüiki Jesuu: «Anakaja müleka yapale jia sünain eein jaaʼin tapüla tayakai, süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma» (Mat. 24:42-44; 25:13).

3. ¿Jamüsü jülüjainjatka maʼin waaʼin tü naapirakalü anain waya Jesuu?

³ Jaa müshii waya sümüin tü nümakat Jesuu süka watüjaain saaʼu sülüʼülüin sükalia sajaʼttajatüin kasakat süpüshuaʼa otta choʼujaʼalaa neʼe palit kaʼi süpüla süntüin tü müliaa miyoʼusükat (Dan. 12:4; Mat. 24:21). Maʼaka nüküjatüjülin Jesuu, aküjünüsü maʼin pütchi süchiki Nuluwataaya Maleiwa sutuma tü nupueulosekat suluʼu Mmakat süpüshuaʼa. Aküjüshi Jesuu süchiki wanee kasa alatajatkaʼaya, eeinjatü maʼin atkawaa, ayuulii, sukutkujaain mma, jamü, kaainjalaa otta müliain wayuu atumaa sainküin mmakat. Müsia maaʼulu yaa, wainma maʼin na shikiipüʼükana tü iküleesiakalüirua emeejaka na wayuukana (Mat. 24:7, 11, 12, 14; Luc. 21:11). Keeʼireesü maʼin waaʼin süntüin sükalia nüntajatka oʼu Jesuu süpüla naaʼinrüin tü keeʼireekat naaʼin chi Nüshikai (Mar. 13:26, 27).

4. (1) ¿Jamüsü watüjaaka saaʼu sünain nütüjaaitpain aaʼu Jesuu joujeerüin suʼttüin Armagedón? (2) Mayaapejeʼe nnojoluin watüjaain aaʼu joujeerüin süntüin tü müliaa miyoʼusükat, ¿kasa wayuu tü watüjaakalü aaʼu?

⁴ Watüjaa aaʼu jalapüshin suʼttawalüin tü outkajawaakat miyoʼu, nnojotpejeʼe watüjaain aaʼu joujeerüin maʼin süntüin tü müliaa miyoʼusükat. «Nnojotsü sütüjaain aaʼu wayuu joujaleerüin sülatüin tü taküjaitpakat achiki jümüin. Jaʼitakaje na aapiee chakana iipünaa, nnojotsü natüjaain aaʼu. Nia neʼe chi Tashikai Maleiwa atüjaaka saaʼu nümüiwa», müshi Jesuu yaaiwaʼaya nia Mmapaʼa (Mat. 24:36). Süka niainjachin Jesuu shikiipüʼüin tü atkawaa kanüliakat Armagedón, nütüjaaitpa aaʼu joujeerüin suʼttüin tia atkawaakat (Alat. Map. 19:11-16). Eekajasaʼa wayakana, nnojotsü watüjaain aaʼu joujeerüin maʼin süntüin sükalia sajaʼlajaainjatka oʼu kasa süpüshuaʼa. Choʼujaasü eejüin waaʼin süpüla kaʼikat tia. Kettaaitpa nutuma Jeʼwaa sükalia tü müliaa miyoʼusükat otta alüʼütsü maʼin shia. Saashin tü Wiwüliakat, «nnojoleerü kamaʼain shia» (paashajeʼera Habacuc 2:1-3). ¿Jamüsü watüjaaka saaʼu sülüʼülüin maʼin tia kaʼikat?

5. Püküja wanee sukuwaʼipa eeʼiyataka sünain nikeraajüin Jeʼwaa nünüiki soʼu tü kaʼi nüneekakat.

⁵ Ekeraajüsü süpüshuaʼa tü nümakat Jeʼwaa soʼu tü kaʼi nüneekatüjütkalia süpüla nikeraajüin. Jamüsüjaʼa 14 nisán soʼu juyakat 1513 nüpülapünaa Kürisüto, taashishii nutuma Jeʼwaa na israeliitakana Egiptojee. Mapa süchikijee tia, nüshajüin Moisés sünain taashin na israeliitakana nutuma Jeʼwaa shikeraajapa 430 juya, taashishii naya nutuma «soʼu kaʼikat tia» (Éx. 12:40-42, TNM). Ayaawajünüsü 430 juya soʼujee 14 nisán soʼu 1943 nüpülapünaa Kürisüto, wanaa sümaa nuʼttüin Jeʼwaa sünain ekeraajaa tü pütchi nüpansaajakat nümüin Abraham (Gal. 3:17, 18). Kakalia mapa süchikijee tia, nüküjüin Jeʼwaa nümüin Abraham kepiainjanain na nuuʼuliwoʼukana 400 juya suluʼu wanee mma naata otta eʼrüinjana namüliala sutuma süchepchiainjanain naya tü wayuu koumainkat tia mmakat (Gén. 15:13; Aluw. 7:6). Tia 400 juya ayaawajünüsü soʼujee 1913 nüpülapünaa Kürisüto, wanaa sümaa nimeeʼerainpalaanüin Isaac nutuma Ismael. Ekeraajüsü 400 juya soʼu taashin nutuma Jeʼwaa na israeliitakana Egiptojee (Gén. 21:8-10; Gal. 4:22-29). Weʼrüin sünain niʼitaatüjülüin Jeʼwaa sükalia süpüla taashin nupueulose.

6. ¿Jamüsü watüjaaka saaʼu nuʼtteʼereerüin Jeʼwaa tü nupueulosekat?

⁶ Noʼuluku na taashikana nutuma Jeʼwaa Egiptojee nia Josué. Kakalia süchikijee tia, müshi Josué namüin na israeliitakana: «Jütüjaashanta  aaʼu shikeraajüin süpüshuaʼa tü nümakat jümüin chi Jümaleiwasekai Jeʼwaa. Jiʼrüin shikeraajüin süpüshuaʼa tü nümakat. Nnojotsü eein waneesiaakaijeʼe pütchi eekai nnojoluin shikeraajüin» (Jos. 23:2, 14, TNM). Nüküjüin Jeʼwaa wamüin nuʼtteʼereenain waya suʼunnaa tü müliaa miyoʼusükat otta kateerüin woʼu nutuma waneepia. Weʼitaa waaʼin sünain nikeraajeerüin Jeʼwaa tü nümakat. Müsüjeseʼe eejüinjatüin waaʼin maaʼulu süpüla suluʼuinjanain waya tü mma jeketkat.

7, 8. (1) ¿Kasa naaʼinrapuʼuka na aaʼinmajüliikana pueulo sümaiwa paala? ¿Kasa shikirajaka anain waya tia? (2) ¿Kasaje alataka nutunküle wanee aaʼinmajüi pueulo? Püküja süchiki tü alatakat chaa Jerusalén sümaiwa.

⁷ Wekirajaa nachiki na aaʼinmajapuʼukana pueulo sümaiwa. Miyoʼu maʼin süsepü Jerusalén otta waneeirua pueulo sümaiwajatü suulia shikerojüin tü naʼünüükalüirua nanainmüin. Na aaʼinmajüliikana, saaʼupuʼushii naya süsepü tü pueulokot süpüla neʼrüinjatüin wayuu wattajee. Eeshii na aaʼinmajapuʼukana soʼu tü pueulokot. Eejüinjatü naaʼin soʼukai otta saʼwai. Shiasaʼa neʼrüle na naʼünüükana kaʼyatajee, naapirüin na wayuu sulujunakana tü pueulokot (Is. 62:6). Natüjaa aaʼu nnojoliinjanain natunküin otta eeinjatüin naaʼin sünain tü neʼrakat anooipaʼa sünain tü pueulokot. Nnojorüle naaʼinrüin tia, eesü süpüla ouktüin watta saalii wayuu (Ezeq. 33:6).

⁸ Soʼu juyakat 70 soʼu wakalia, nashuta aaʼu Jerusalén na surulaat roomajeʼewaliikana. Naashin Josefo, wanee judío ashajüikai süchiki sukuwaʼipa wayuu sümaiwajatkat, atunküshii waneeinnua aaʼinmajülii soʼu tia, nekerotoko na romaanokana, naʼajaka tü aʼwaajüleekat otta najaʼlajeʼerüin tü pueulokot. Müsü sukuwaʼipa süpüla sajaʼlajaain tü müliaa neʼrakat na judíokana, shiairüjaʼa tü müliaa keemakat maʼin neʼrüirükat tia.

9. ¿Kasa tü nnojotkat sütüjaain aaʼu watta saalii wayuu?

⁹ Maaʼulu yaa, eeshii surulaat natuma na aluwataaliikana saaʼu mma sünain aaʼinmajaa noumain eere tü sülüjülekat otta naaʼinmajüin shiaʼaya sükajee tü tecnología münakat. Naaʼinrüin tia suulia jamajüin atumawaa na kepiakana suluʼu tü mma naluwataakalü aaʼu. Nnojotpejeʼe natüjaain aaʼu na aluwataaliikana eein wanee aluwataaya pülashaatasü maʼin chaa iipünaa otta nia shikiipüʼüka Jesuu. Soʼu palit kaʼi, atkaajeerü tia aluwataayakat sümaa süpüshuaʼa tü aluwataayairua eekat Mmapaʼa (Is. 9:6, 7; 56:10; Dan. 2:44). Keeʼireesü waaʼin süntüin sükalia tia atkawaakat otta yapeeshii waya süpüla. Eesüjeseʼe waaʼin sünain tü pütchi suluʼujeejatkat tü Wiwüliakat ekeraajaka maaʼulu otta ayatüshii waya aʼyataain waneepia nümüin Jeʼwaa (Sal. 130:6).

10, 11. (1) ¿Kasa waaʼinmajiraainjanaka oulia? ¿Jamüshii waaʼinmajiraainjanaka suulia tia? (2) ¿Jamüsü pütüjaaka aaʼu nüsürülüin shikii wayuu chi Yolujaakai suulia shiyaawatüin saaʼu tü pütchi ekeraajakat maaʼulu yaa?

¹⁰ Wanee wayuu aʼyataakai saʼwai, atunkeeshaatasü naaʼin jayuuweematapa, ashutüsü naaʼu tü lapükat süka mapüsain maʼin nia. Müsia neʼe tü wakuwaʼipakat maaʼulu yaa süka sülüʼülüin sükalia sajaʼttajatkat oʼu kasa süpüshuaʼa. Jülüjeesü waaʼin wakuwaʼipa süpüla eejüinjatüin waaʼin. Kapüleejeerü maʼin wamüin eejüin waaʼin suʼunnaa sülüʼülüin sükalia sajaʼttajatkat oʼu kasa süpüshuaʼa. Mojeerü wakuwaʼipa nnojorüle eejüin waaʼin maaʼulu yaa. Wekirajaa sünain apünüinsü kasa eeka süpüla nnojoluin eejüin atuma waaʼin sünain wanoula.

¹¹ Nimeejüin wayuu chi Yolujaakai. Maʼaka jeʼra kaʼi süpülapünaa nütaʼünüin Jesuu, apünüintua nüküjüin namüin na nikirajüinkana niain Satanaa aluwataain saaʼu tü wayuu manoujainsatkalüirua (Juan 12:31; 14:30; 16:11). Nimeejüin wayuu Satanaa sükajee tü iküleesiairua ekirajakat sünain alawaa. Müsüjeseʼe wainmain wayuu nnojotka anoujain sünain shikeraajüin tü sümakat tü Wiwüliakat süchiki tü alatajatkat maaʼulu, süpülapünaa sajaʼttüin kasakat süpüshuaʼa (Sof. 1:14). Nüsürülüin Satanaa shikii wayuu suulia shiyaawatüin saaʼu tia (2 Cor. 4:3-6). Sutuma tia, wainma wayuu nnojotka aapajeein wanüiki  waküjüinjatpa namüin sülüʼülüin sükalia sajaʼttajatkat oʼu kasa süpüshuaʼa otta nuluwataaichipain Jesuu maaʼulu. «Nnojotsü kasajatüin tamüin», maʼwaishii naya wamüin.

12. ¿Jamüshii nnojoliinjanaka woonooin sümaa naʼalain Satanaa?

¹² Wainma wayuu nnojotka kasajatüin amüin tü pütchi suluʼujeejatkat tü Wiwüliakat ekeraajaka maaʼulu. Nnojotpejeʼe mojuinjatüin jaaʼin saaʼu nnojoluin kasajatüin namüin tia pütchikat. Watüjaa aaʼu jamüin eejüinjatka waaʼin. Anuu nünüiki Pablo namüin na nuwalayuukana: «Maa aka wane wayuu nipiajachi sünain nnojolüin nütüjaain saaʼu joujaleechin nüntüin wane kaʼruwarai nünainmüin, meeria aka tü wayuukolüirua süpülapünaa tü nükaliakat chi Senyotkai [Jeʼwaa], nnojoleerü sütüjaain aaʼu» (paashajeʼera 1 Tesalónica 5:1-6). Müshi Jesuu: «Anashii müleka keraajüle jia sümaa eein jaaʼin tapüla tayakai, chi Shipayakai Wayuu, süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma» (Luc. 12:39, 40). Soʼu palit kaʼi, nimeejeerü wayuu Satanaa süchikuaʼa, nunoujireerü wayuu sünain eein wanee anaa akuwaʼipaa yaa mmapaʼa. Süntalaa sümeetka tü nükaliakat Jeʼwaa. Ayoʼujaajeerü saaʼin wayuu soʼu tia. Eejeere waaʼin süpüla kaʼikat tia, nnojoishii waya oonooinjanain sümaa naʼalain chi Yolujaakai. Shia anaka aluʼu waaʼinrüle tü nümakat Pablo: «Eeinjatü jaaʼin sünain nüntajachin chi Senyotkai süpüla laülaainjatüin jaaʼin sünain süpüshua tü jaaʼinrakat». Süpüla wountüin waaʼinrüin tia, waashajeʼerüinjatü Wiwüliaka weinshi otta wasakireʼerüinjatü waaʼin sünain tü nümakat Jeʼwaa.

13. (1) ¿Kasa jülüjaka naaʼin na oʼunakana süchiirua nakuwaʼipa na manoujainsaliikana? (2) ¿Kasa waaʼinrajatka süpüla nnojoluinjatüin shiain kachiiruain waaʼin tü kachiiruakat naaʼin na manoujainsaliikana?

¹³ Shia suʼunaka achiirua wayuu nakuwaʼipa na manoujainsaliikana. Wainma wayuu nnojoliika choʼujaain amüin neʼraajüin Maleiwa naashin (Mat. 5:3). Shia kachiiruaka naaʼin tü kasa kachiiruakat naaʼin na manoujainsaliikana (1 Juan 2:16). Akaʼaya, wainma kasa eeka süpüla süshaittüin wayuu maaʼulu. Na waneepiakana sünain shaittaa, shia neʼe jülüjaka naaʼin tü suchuntaakat neʼiruku otta jülüjasü naaʼin tü nakuwaʼipakat neʼe namüiwaʼa (2 Tim. 3:4). Motusü naaʼin tü nakuwaʼipakat nümaa Maleiwa otta nnojotsü jülüjain naaʼin aleewa nümaa. ¿Kasaka waaʼinrüinjatüin süpüla nnojoluinjatüin shiain kachiiruain waaʼin tü kachiiruakat naaʼin na manoujainsaliikana? Naashin Pablo, nnojotsü kachiiruainjatüin waaʼin tü suchuntaakat weʼiruku. Woonoole sümaa tü nümakat Pablo, eejeerü waaʼin sünain tü wanoulakat (Roma 13:11-14).

14. ¿Kasa eejüinjatka oulia waaʼin saashin Lucas 21:34, 35?

¹⁴ Keeʼireesü waaʼin nuʼunirüin wakuwaʼipa chi naaʼinkai Maleiwa, nnojoishii waya oʼuneein süchiirua nakuwaʼipa na manoujainsaliikana. Nükaaliinjain waya Jeʼwaa nükajee chi naaʼinkai süpüla wayaawatüin saaʼu tü alatüinjatkat soʼu palit kaʼi (1 Cor. 2:12, TNM). ^[1] Eeinjatpejeʼe waaʼin suulia motojoʼoluin waaʼin waʼyataain nümüin Jeʼwaa süpüleerua aaʼinraa waneeirua kasa (paashajeʼera Lucas 21:34, 35). Eeshii eekai nemeeʼerainpalain waya sutuma wanoujain sülüʼülüin sükalia sajaʼttajatüin kasa süpüshuaʼa (2 Ped.  3:3-7). Nnojo mojuin jaaʼin sutuma tia. Watüjaa aaʼu sülüʼülüin tia kaʼikat. Keeʼireere waaʼin nuʼunirüin wakuwaʼipa chi naaʼinkai Maleiwa, oʼunüinjana waya waneepia sünain tü outkajawaakat.

15. ¿Kasa alataka nümüin Pedro, Santiago otta Juan? ¿Jamüsü eeka süpüla sülatüin wamüin tia?

¹⁵ Kapüleejeerü wamüin eejüin waaʼin sutuma tü jookalü apüla waya. Nütüjaa aaʼu Jesuu waleʼeruʼuin tü kaainjalaakat otta nütüjaa aaʼu eein tü jookalü apüla waya. Jülüja waaʼin tü alatakat wanee ai süpülapünaa nuʼutünüin aaʼin Jesuu. Mayaainjeʼe maainjalain nia, achuntüshi nia kaaliinwaa nümüin Jeʼwaa süpüla jüüjüüin nia nümüin waneepia. Nuchuntüin nümüin Pedro, Santiago otta Juan nnojoliinjanain natunküin suʼunnaa nuʼuraajüin. Nnojotsü nayaawatüin aaʼu jamüin nnojoliinjanaka natunküin soʼu tia. Sutuma mapüsajüin maʼin naya, atunkajüshii nüpüla Jesuu. Aluʼusaʼa Jesuu, nnojoishi atunküin mayaapejeʼe mapüsain maʼin nia, shia jülüjaka naaʼin oʼuraajaa nümüin chi Nüshikai. Shia naaʼinrajatkaʼaya tia Pedro, Santiago otta Juan (Mar. 14:32-41).

16. ¿Kasa waaʼinrajatka süpüla eeinjatüin waaʼin naashin Jesuu suluʼu Lucas 21:36?

¹⁶ ¿Kasa akaaliinjeenaka waya süpüla eejüin waaʼin jee süpüla yapain waya süpüla tü nükaliakat Jeʼwaa? Keeʼireeinjatü waaʼin aaʼinraa tü anasükat. Nnojotpejeʼe shiainjatüin neʼe waaʼinrüin tia. Maʼaka jeʼra kaʼi süpülapünaa nuʼutünüin aaʼin Jesuu, nüküjüin namüin na nikirajüinkana sünain ayatüinjanain nachuntüin kaaliinwaa nümüin Jeʼwaa (paashajeʼera Lucas 21:36). Süpüla eejüinjatüin waaʼin maaʼulu yaa, oʼuraajüinjana waya waneepia (1 Ped. 4:7, TNM).

17. ¿Kasa waaʼinrajatka süpüla yapain waya süpüla tü alatajatkat soʼu palit kaʼi?

¹⁷ Nüküjüin Jesuu namüin na nikirajüinkana sajaʼttajatüin kasakat süpüshuaʼa «soʼuweena wane kaʼi matüjaajuukat aaʼu» (Mat. 24:44). Müsüjeseʼe eeinjatüin waaʼin waneepia süpüla tia kaʼikat. Nnojotsü kachiiruainjatüin waaʼin tü kachiiruakat naaʼin na nuluwataakana aaʼu Satanaa. Jaʼitairü müin anayaakai saaʼin tü kachiiruakat naaʼin, watüjaa aaʼu nnojoluin anain shia, nnojoleena waya talatüin sutuma. Nüküjüin wamüin Jeʼwaa nümaa Jesuu tü waaʼinrajatkat süpüla eejüinjatüin waaʼin. Sutuma tia, eeinjatü waaʼin sünain tü alatajatkat saashin tü Wiwüliakat otta eeinjatü waaʼin sünain tü eekai shikeraajüin maaʼulu yaa. Ayataʼaya waya aleewain maʼin nümaa Jeʼwaa otta palajana watuma tü Nuluwataayakat. Waaʼinrüle tia, yapeena waya süpüla tü kaʼi sajaʼlajaainjatkat oʼu kasa süpüshuaʼa (Alat. Map. 22:20). Nnojo motuin jaaʼin woʼttaajeenain yapale waya süpüla tia kaʼikat.