1. (1) ¿Kasa nakumajüinjatka akuwaʼipa na jimaʼaliikana maaʼulu yaa? (2) ¿Jamüshii nnojoliinjanaka mmoluin naya? (Piirakaa sümüin tü ayaakuaakat).

PIAKAI jimaʼaikai, eesüjaʼa anale pümüin pukumajüle pukuwaʼipa süpülapünaa puʼunajaain. Tü wakuwaʼipakat müsü aka saaʼin oʼunaa suluʼumüin wanee mma wattasü, müsüjeseʼe anain pukumajüle sukuwaʼipa tü paaʼinrajatkat maiwaʼaya pia jimaʼalin. Kapüleepejeʼe aaʼinraa tia. Anuu sünüiki wanee majayüt Heather sünülia: «Mmotsü taya süka taneeküinjatüin tü takuwaʼipainjatkat watta kaʼi». Müle pukuwaʼipa mayaa, soto paaʼin tü nümakat Jeʼwaa: «Nnojo piyoʼujaain aaʼin, anii taya pümaa. Nnojo shapaain paaʼin, taya chi Pümaleiwasekai. Shiimain katsüinjeerüin paaʼin tatuma. Shiimainshaata maʼin takaaliinjeechin pia» (Isa. 41:10, TNM).

2. ¿Jamüsü pütüjaaka saaʼu niʼreein pia Jeʼwaa sümaa talatüin paaʼin?

² Keeʼireesü naaʼin Jeʼwaa anainjatüin süneekia putuma tü paaʼinrajatkat watta kaʼi (Ecl. 12:1; Mat. 6:20). Keeʼireesü naaʼin Jeʼwaa talatüinjatüin paaʼin. Piyaawateerü aaʼu tia sutuma tü kasairua nukumajakat, eesü eekai anain shiyolojo, anain shiʼira otta eekai jemetüin. Akaʼaya nia, naaʼinmajüin waya otta nikirajüin waya sünain tü wakuwaʼipainjatkat. Jülüjataa paaʼin jooluʼu tü nümakat  Jeʼwaa namüin na moonooinkana nümaa: «Shia jüneekaka tü kasa tayoutakat [...]. Jülüja jaaʼin, talateena maʼin na aʼyataashiikana tamüin, eekajasaʼa jiakana, eʼreena japülii. Jülüja jaaʼin, aʼwaateena sümaa talatüin naaʼin na aʼyataashiikana tamüin» (Isa. 65:12-14, TNM). Anale tü waneekakat süpüla waaʼinrüin, kojuteechi Jeʼwaa watuma (Prov. 27:11).

3. ¿Kasa anaka süpüla paaʼinrüin naashin Jeʼwaa?

³ ¿Kasa anaka süpüla paaʼinrüin naashin Jeʼwaa? Süpüla talatüinjatüin paaʼin, piʼraajüinjachi Jeʼwaa otta aʼyataainjachi pia nümüin. Alejatia sukumajia wayuu nutuma (Sal. 128:1; Mat. 5:3). Shia naatajatka akuwaʼipa nutuma tü mürütkalüirua, süka jamüin, talatüin shiairua sümaa shiküin, süsüin jee kachoin shiairua. Keeʼireepejeʼe naaʼin Jeʼwaa pukumajüin tü pukuwaʼipainjatkat süpüla talatüinjachin pia otta anain paaʼin. Chi Kakumalakai pia nia chi Maleiwa aikai apüla wayuu, chi talatakai aaʼin otta chi akumajakai waya sünain müin aka nukuwaʼipa (2 Cor. 13:11; 1 Tim. 1:11, TNM; Gén. 1:27). Talateechi maʼin pia püshatüle nukuwaʼipa Maleiwa. Müsü tü Wiwüliakat: «Nia talataleeka chi wayuu asülajakai nuulialeʼeya chi asülajünakai amüin» (Aluw. 20:35, TNM). ¿Eeirü alatüin pümüin tia? Shia wanee kasa paaʼinrajatka tia süpüla talatüinjatüin paaʼin. Müsüjeseʼe keeʼireein naaʼin Jeʼwaa pukumajüin sukuwaʼipa tü paaʼinrajatkat süpüla piiʼiyatüin alin nia püpüla otta alin wayuu püpüla (paashajeʼera Mateo 22:36-39).

4, 5. ¿Kasa talataka anainjee Jesuu?

⁴ Anashaatasü süpüla nashatüin nukuwaʼipa Jesuu na jimaʼaliikana. Jintüliiwaʼaya nia, ashaittapuʼushi nia sümaa talatapuʼuin naaʼin. Saashin tü Wiwüliakat, «eesü kaʼi süpüla asirajaa [...] otta kaʼi süpüla wonnataa» (Ecl. 3:4). Ekirajaapejeʼe Jesuu sünain tü Nünüikikat Maleiwa otta aleewashi maʼin nia nümaa Maleiwa. Wanaa sümaa 12 nuuyase, ponusü maʼin naaʼin na ekirajüliikana suluʼu tü aʼwaajüleekat Maleiwa sutuma tü nümakat namüin jee süka nütüjain maʼin asoutaa neʼipajee (Luc. 2:42, 46, 47).

⁵ Miyoʼupa Jesuu, talatüshi nia süka naaʼinrüin tü keeʼireekat naaʼin Maleiwa. Wanee kasa keeʼireeka naaʼin chi Nüshikai shia nüküjainjatüin Jesuu «süchiki anaa sümüin wayuu eekai müliain» otta nüküjain namüin «na moʼusaliikana sünain koʼuinapain naya» (Luc. 4:18, 19). Süküjain Salmo 40:8 jamüin naaʼin Jesuu sünain aaʼinraa tü keeʼireekat naaʼin Maleiwa: «Maleiwakalee, talatüsü taaʼin sünain taaʼinrüin tü keeʼireekat paaʼin». Keejiashaatasü nümüin Jesuu nikirajüin wayuu nüchiki chi Nüshikai (paashajeʼera Lucas 10:21). Soʼu wanee kaʼi, nikirajüin wanee wayuu sünain tü saaʼinrajatkat süpüla suʼwaajüin Maleiwa. Süchikijee tia, müsü nünüiki namüin na nikirajüinkana: «Maa aka wane wayuu eekai talatüin naaʼin emirapa, akaajaa tayakai talateerü maʼin taaʼin müleka taaʼinrüle tü ajütünakat apüla taya nütüma Maleiwa» (Juan 4:31-34). Talatüshi maʼin Jesuu süka alin Maleiwa otta alin wayuu nüpüla. Akaataajaʼa piakai, paaʼinrüle tia, talateechi pia.

6. ¿Jamüsü anaka paashajaale nümaa wanee wawala eekai laülaain naaʼin süchiki tü paaʼinrajatkat?

⁶ Watta naalii wawalayuu pürekutsootkana jimaʼaliiwaʼaya naya otta talatüshii maʼin naya sutuma naaʼinrüin tia. Eeshi süpüla paashajaain namaa noʼutku naya wawalayuukana süchiki tü paaʼinreekat. Piʼrüinche sümüin tü Wiwüliakat  anakuwaʼipalüin wanee kasa «wainmale wayuu asakinnaka süchiirua» (Prov. 15:22). Eesüjaʼa naküjeerüle pümüin wawalayuukana naainnua wainmeerüin kasa pütüjaka pürekutsoorüle pia. Wainma kasa nütüjaka Jesuu nünainjee chi Nüshikai soʼu chajachin nia chaa iipünaa nümaa. Ayatapejeʼe nia atüjain wanaa sümaa yaajachin nia yaa Mmapaʼa süka nüküjain pütchi. Jamüshijaʼa nia, talatüshi süka sütanalüin saaʼin wayuu tü pütchi anasü nüküjakat otta talatüshi nia süka waneepiain nia nümaa Jeʼwaa suʼunnaa niʼrüin müliaa (paashajeʼera Isaías 50:4; Heb. 5:8; Heb.12:2, TNM). ¿Jamüshi talateechika pia piʼyataale waneepia nümüin Jeʼwaa? Wekirajaa sünain tia.

7. ¿Jamüsü kamalainka namüin wainma jimaʼalii ekirajaa wayuu sünain tü shiimainkat?

⁷ Naashin Jesuu, wekirajüinjana na wayuukana sünain tü shiimainkat süpüla nanoujainjanain (Mat. 28:19, 20). Müleka piʼyataale sünain tia, talateechi maʼin pia otta kojuteechi Jeʼwaa putuma. Nnojoipejeʼe atüjamaateechin pia uatuwoʼushi, atüjeechi pia shiʼipaʼaya. Anuu nünüiki wanee wawala pürekutsootka jintüliiwaʼaya nia, müshi nia: «Keejiasü tamüin aʼyatawaa waneepia nümüin Jeʼwaa süka shiain wanee sukuwaʼipa süpüla teeʼiyatüin alin nia tapüla. Toʼttaiwaʼaya sünain pürekutsoolin taya, nnojotsü tantüin anain wayuu ekirajaweeka sünain tü Wiwüliakat. Toʼunaka suluʼu wanee mma wattasü otta kojuyashii na tekirajakana nnojoluiwaʼaya waneein kashi taya chaʼayaa. Niasaʼa wanee tekirajüin, oʼunushi sünain tü outkajawaakat. Mapa, toʼunaka piama kashi sünain tü Ekirajawaakat sünain tü Wiwüliakat napüla na Tooloyuu Maʼwayuusekana otta tajütünaka suluʼumüin wanee mma naatajatü. Pienchishii wayuu tekirajakana chayaa. Kamalainshaatasü tamüin ekirajaa wayuu sünain tü shiimainkat süka teʼrüin suʼwanajaain nakuwaʼipa nutuma chi naaʼinkai Maleiwa» * (1 Tes. 2:19).

8. ¿Kasa naaʼinrüitka waneinnua jimaʼalii süpüla naküjain pütchi namüin wainma wayuu?

⁸ Eeshii jimaʼalii eekai nekirajaain sünain wanee anüikii naatajatü. Anuu nünüiki wanee wawala chejeʼewai Norteamérica, Jacob nünülia: «Akaratshiiwaʼaya touyase, wainma tepichi chejeʼewalii Vietnam koleejiakana tamaa. Süka tekirajeein naya nüchiki Jeʼwaa, tekirajaa anainrü tü nanüikikat. Shiapuʼusü tekirajaaka maʼin anain tü rewiisütakat Aapiria Wayuu suluʼu vietnamita otta taʼwanaajireʼerüin shia sümaa tü ojuʼitakat suluʼu inkülee. Aʼaleewajaashi taya namaa waneinnua wawalayuu suluʼukana tü outkajaaleekat vietnamita pejeka sünain tepia. Shiasaʼa 18 touyase, pürekutsootshi taya. Mapa, oʼunushi taya sünain tü Ekirajawaakat sünain tü Wiwüliakat napüla na Tooloyuu Maʼwayuusekana. Anashaatasü tia ekirajawaakat süka sükaaliinjain taya süpüla tekeraajüin tü taʼyataainkat eere toutkajaain suluʼu tü anüikiikat vietnamita. Pürekutsootshi taya otta tayaʼala neʼe laülaashika suluʼu tia outkajaaleekat. Wainma wayuu chejeʼewaliikana Vietnam ponokana aaʼin sutuma tatüjain süpüleerua tü nanüikikat. Nounejaʼawalin taya nepialuʼumüin otta eeshii eekai tekirajüin sünain tü Wiwüliakat. Woutiisaina noʼutku na tekirajüinkana» (anasü paashajeʼerüle Aluwataaushikana 2:7, 8).

9. ¿Kaseerü pütüjaka pikirajüle wayuu sünain tü shiimainkat?

⁹ Wainmeerü kasa pütüjaka pikirajüle wayuu sünain tü shiimainkat. Jamüshijaʼa pia, tüteechi pia sünain aʼyatawaa, atüjeechi pia yootoo sümaa wayuu, nnojoleechi pia japüleʼein otta nnojoleerü mojuin saaʼin wayuu putuma (Prov. 21:5; 2 Tim. 2:24). Akaʼaya pia, talateechi maʼin pia süka pütüjaweerüin saaʼu tü  sümakat tü Wiwüliakat süchiki tü punoujakalü anain. Jee müsia, atüjeechi pia aʼyataajirawaa nümaa Jeʼwaa (1 Cor. 3:9, TNM).

10. ¿Jamüsü eeka süpüla talatüin paaʼin sünain ekirajaa wayuu mayaainjeʼe palitchon na aapajakana tü pütchi anasükat?

¹⁰ Jaʼitaichi kepiain pia eere mamalain sümüin wayuu aapajaa tü pütchi anasükat, eeshi süpüla talatüin pia sünain ekirajaa wayuu. ¿Suluʼu jamüin? Wayakana wapüshuaʼa wachajaain wayuu anamia eekai shikirajaweein sünain tü Wiwüliakat. Waneeshire chi wawala antakai nünain wanee wayuu eekai nikirajaweein, talatüshii waya wanaa nümaa süka wojuʼitüin wapüshuaʼa sünain achajawaa wayuu eekai shikirajaweein. Jamüshijaʼa wanee wawala Brandon nünülia, mekietsatshi juya nia sünain pürekutsoolin eere mamalain sümüin wayuu aapajaa tü pütchi anasükat. Anuu nünüiki Brandon: «Kamalainsü maʼin tamüin aküjaa pütchi süka shiain tü nuluwataakalü anain waya Jeʼwaa. Pürekutsootshi taya süchikijee tajaʼttirüin takoleejiase. Kamalainsü tamüin tatütüleʼerüin naaʼin na jimaʼaliikana otta na majayünnüükana eere toutkajaain. Otta talatüsü taaʼin teʼrapa sükatsüinraain tü nanoulakat. Süchikijee toʼunuin sünain tü Ekirajawaakat sünain tü Wiwüliakat napüla na Tooloyuu Maʼwayuusekana, ajütünüshi taya suluʼumüin wanee mma otta pürekutsootshi taya. Mayaainjeʼe nnojoluin eein wanee tekirajüin eekai woutiisain, eeshii waneinnua wawalayuu ountakana tia. Talatashaatasü taaʼin süka taʼyataain waneepia nümüin Maleiwa süpüla tekirajüin wayuu (Ecl. 11:6).

TÜ EEKAT SÜPÜLA PIʼYATAAIN ANAIN

11. ¿Kasa naaʼinraka wainma jimaʼalii süpüla nakooʼomüinrüin naʼyataain nümüin Jeʼwaa?

¹¹ Wainma tü kasa eekat süpüla paaʼinrüin süpüla pukooʼomüinrüin piʼyataain nümüin Maleiwa. Eeshii jimaʼalii akaaliinjaka sünain akumajaa piichi outkajaalee. Choʼujaayülia sukumajünüin watta saalii Piichi Outkajaalee. Püchajaale sukuwaʼipa süpüla piʼyataain sünain tia, kojuteechi Maleiwa putuma otta talateechi pia. Shiimainya talatüin maʼin paaʼin piʼyataajiraale namaa na wawalayuukana. Jamüshijaʼa piʼyataale sünain akumajaa piichi eeinjachire nuʼwaajünüin Jeʼwaa, wainmeerü tü kasa pütüjeetkat sünainjee, atüjeechi pia süpüleerua paaʼinmajiraain suulia pasiruwaain pia sünain aʼyatawaa, tüteechi pia sünain aʼyatawaa otta jüüjüweechi pia namüin na laülaakana paaʼu.

12. ¿Kasa maa eeka süpüla paaʼinrüin pürekutsoorüle pia?

¹² Anuu nünüiki wanee wawala Kevin nünülia: «Keeʼireetüjülia taaʼin jintüliiwaʼaya taya taʼyataain waneepia nümüin Maleiwa. Pürekutsootshi taya wanaa sümaa 19 touyase. Shiasaʼa süpüla tayaʼlajüin tü kasa eekai choʼujaain tamüin, aʼyataapuʼushi taya maʼaka jeʼra kaʼi semaanawai nümaa wanee wawala. Akumajapuʼushi taya piichi nümaa chi wawalakai. Tatüjaka eʼitawaa saajuna piichi, shiwentaanase jee supuettoʼuse. Mapa, piama juya taya sünain akaaliinjaa sünain anouteʼeraa Piichi Outkajaalee otta nepia na wawalayuu ajaʼttakana epia sutuma wawai. Taapapa süchiki choʼujaain wawalayuu süpüla akumajaa Piichi Outkajaalee chaa Sudáfrica, tepirajüin wanee karaloʼuta  süpüla toʼunajachin chamüin. Tounejünaka chejee. Chaa África, ajütünawaishi taya eere sukumajünüin Piichi Outkajaalee. Maaʼatshii neʼe pawalaawakai aaʼin wayakana aʼyataakana sünain tü akumajaakat Piichi Outkajaalee. Kottüshii waya eere kepiain waya, kottüshii waya wekirajaapa sünain tü Wiwüliakat otta aʼyataajiraashii waya sümaa kottüin. Kamalainsü tamüinya aküjaa pütchi namaa na wawalayuu kepiakana eere wajütünawaliin. Talatashaatashi maʼin taya maaʼulu sutuma takumajatüjülin tü takuwaʼipainjatkat jintüliiwaʼaya taya».

13. ¿Jamüshii talataka na jimaʼalii aʼyataakana nümüin Jeʼwaa suluʼu Weteet?

¹³ Wainma wawalayuu pürekutsootpuʼukana aʼyataakana suluʼu Weteet maaʼulu. Talatüshi maʼin wayuu niʼyataale suluʼu Weteet süka nümüinjatüin Jeʼwaa süpüshuaʼa tü aaʼinnakat chaʼayaa. Na wawalayuu aʼyataakana suluʼu Weteet, akaaliinjashii naya süpüla eeinjatüin Wiwülia otta waneirua karaloʼutairua süpülajatka sütüjaain aaʼu wayuu tü shiimainkat. Anuu nünüiki wanee weteliita Dustin nünülia: «Wanaa sümaa mekietsalüin touyase, teʼitaain tapüleerua taʼyataainjachin waneepia nümüin Jeʼwaa. Pürekutsootshi taya süchikijee tajaʼttirüin takoleejiase. Wanee juya shiatapünaamüin süchikijee tia, ounejünüshi taya süpüla taʼyataain suluʼu Weteet. Yaa Weteet ekirajünüshi taya sünain aʼyatawaa süka tü eʼinpürimiijiakat karaloʼuta otta süpüleerua computador. Wanee kasa kamalainka tamüin suluʼu Weteet shia süka wayain aküjünüin amüin palajana tü süchikikat naʼyataain na wawalayuukana sainküin mmakat. Anasü maʼin yaawaa suluʼu Weteet süka  wakaaliinjain wayuu sükajee tü waʼyataainkat süpüla naʼaleewajaain nümaa Maleiwa».

14. ¿Kasa paaʼinrajatka süpüla yapainjachin pia süpüla aʼyatawaa waneepia nümüin Jeʼwaa?

¹⁴ ¿Kasa paaʼinrajatka süpüla yapainjachin pia süpüla aʼyatawaa waneepia nümüin Jeʼwaa? Shia choʼujaaka laülaainjatüin paaʼin sünain anoujaa. Paaʼinrüle tia, aneerü maʼin tü piʼyataainkat nümüin Jeʼwaa. Müsüjeseʼe choʼujaain pikirajaain waneepia sünain tü Nünüikikat Maleiwa sümaa püsakireʼerüin paaʼin sünain jee püchajaweein sukuwaʼipa süpüla pusoutuin shiʼipajee tü asakinnakalü anain sünain tü outkajawaakat. Püküjale pütchi koleejialuʼu, atüjeechi maʼin pia mapa. Kojuta pümüin na wayuukana, kamaneeinjachi pia püsakitpa naya sünain jamüin nanüiki süchiki wanee kasa otta jülüja paaʼin tü nanüikikat. Anashi pükaaliinjale sünain epitajaa tü Piichi Outkajaaleekat jee sünain anouteʼeraa wanee kasa sünain. Talatüshi Jeʼwaa namaa na wayuu nnojoliikana yaletüin aaʼin jee na keejiakana amüin akaaliinjaa (paashajeʼera Salmo 110:3; Aluw. 6:1-3). Süka anain maʼin naashajaala na anoujashiikana nüchiki Timoteo, nümaashi nia Pablo süpüla nüküjainjachin pütchi nümaa eepünaale noʼunuin (Aluw. 16:1-5).

15. ¿Kasa eeka süpüla paaʼinrüin süpüla piʼyataain pürekutsootpa pia?

¹⁵ Wainma wawalayuu aʼyataakana waneepia nümüin Jeʼwaa sümaa naʼyataain süpüleerua tü choʼujaakat namüin (Aluw. 18:2, 3). Eeshi süpüla paainjain wanee curso eekai nnojoluin kakaliain maʼin süpüla piʼyataain süpüleerua tü choʼujaakat pümüin pürekutsootpa pia. Püsakira chi wawala alapalaakai waaʼu otta waneinnua pürekutsoot kasain anain süpüla piʼyataain anain. Paaʼinra tü sümakat tü Wiwüliakat, «piʼitaa najapuluʼu Jeʼwaa süpüshuaʼa tü kasa paaʼinrüinjatkat, müle shia putuma, ekeraajeerü tü kasa paaʼinrüinjatkat» (Prov. 16:3, TNM; 20:18).

16. ¿Jamüshi anaka piʼyataale waneepia nümüin Jeʼwaa maiwaʼaya pia jimaʼalin?

¹⁶ Shiimainshaata keeʼireein naaʼin Jeʼwaa talatüinjachin pia watta kaʼi (paashajeʼera 1 Timoteo 6:18, 19, TNM). Piʼyataale waneepia nümüin Jeʼwaa, namaajeechi pia na wawalayuu aʼyataakana waneepia nümüin. Sutuma tia, laülaajeerü paaʼin sünain anoujaa. Wainma wawalayuu anakana akuwaʼipa sümaa naʼwayuuse sutuma noʼttatüjüliin sünain pürekutsooliin naya tepichijaiwaʼaya naya. Eeshii wawalayuu pürekutsoottüjüliikana süpülapünaa kaʼwayuusein naya otta ayatüshii naya pürekutsooliin sümaa naʼwayuuse (Roma 16:3, 4).

17, 18. ¿Kasa paaʼinrajatka süpüla naapüin Jeʼwaa pümüin tü keeʼireekat paaʼin?

¹⁷ Anuu sünüiki Salmo 20:4 nüchiki Jeʼwaa: «Kasataalejeseʼe naapüin Jeʼwaa pümüin tü keeʼireekat paaʼin sümaa anakuwaʼipalüin nutuma süpüshuaʼa tü paaʼinrakat». Püneeküinjatpa tü paaʼinrajatkat, anasü jülüjale paaʼin kasain maʼin tü paaʼinreekat. Anasü jülüjale paaʼin tü naaʼinrakat Jeʼwaa maaʼulu jee tü eekat süpüla paaʼinrüin sünain aʼyatawaa nümüin. Shiasaʼa süchikijee tia, shia püneeka aaʼinraa tü anakat noʼuluʼu Jeʼwaa.

¹⁸ Piʼyataale waneepia nümüin Jeʼwaa otta kojutule nia pümüin, talateechi maʼin pia. Talateerü maʼin «paaʼin sünain aaʼinraa tü keeʼireekat naaʼin Jeʼwaa otta naapeerü pümüin tü suchuntakat paaʼin» (Sal. 37:4, TNM).