Nütüjaa aaʼu Pablo eein süpüla sumojujaain nunoula wanee wayuu sutuma tü alawaa nikirajakalü anain Satanaa. Nnojotpejeʼe eejayaain naaʼin na anoujashiikana napüshuaʼa. Jamüshiijaʼa noʼutku na anoujashii chajanakana Corinto, aʼwaataashii suluʼu katsüin nanoula otta nnojoliinjanayaa ojutuuin najapuluʼu Satanaa naashin (1 Cor. 10:12). Anuujeseʼe nünüiki Pablo namüin: «Mmotshi taya jaaʼu, maʼaka shimeejünüin Eva sutuma tü wüikat, eesü süpüla sumojujeʼennüin tü jaaʼinkat sümaa sükatannüin suulia tü anoujaakat nünain Kürisüto otta wulein jukuwaʼipa nuʼupala» (2 Cor. 11:3, TNM).

Sutuma tü nümakat Pablo, watüjaa aaʼu eejüinjatüin waaʼin sümaa nnojoluin wanoujaʼayataain sünain kasa süpüshuaʼa. Süpüla paaʼinmajiraainchin suulia naʼalain Satanaa, soteesü paaʼin waneepia eein süpüla sumojujaain punoula nutuma.

Wainma sukuwaʼipa tü kapülajatkat tü alawaakat, eesü eekai süpülajatüin sunoujinnüin wayuu sünain otta suushikajaain süchiirua tü münakat. Propaganda münüsü tia. Saashin wanee karaloʼuta, tü propagandakat sünainpünaasü «alawaa, eeʼiratünüsü sukuwaʼipa wanee pütchi suluʼu alawaain shia, süpülajatü emeejaa wayuu, süpüla naatajatüin tü jülüjakat saaʼin wayuu». Akaʼaya shia, sünainpünaasü «tü aainjirawaakalü akuwaʼipa, tü aaʼinraakat kasa mojusü sümüin wayuu otta amojujeʼeraa sukuwaʼipa wayuu» (Propaganda and Persuasion).

Tü alawaa ekirajünakat sükajee propaganda müsü aka saaʼin wanee weneena kaitaka, nnojotka jaralin eʼrüin shia sümaa meejuuin shia. Jamüsüjaʼa tü alawaa ekirajünakat, eesü wanoujale shia, jama müin shiimainkai saaʼin wamüin. Shiasaʼa mapa,  sumojujeʼerüin tü waaʼinkat. Naashin wanee sociólogo Vance Packard nünülia, wainma kasa saainjaka wayuu sutuma tia alawaakat sümaa nnojoluin natüjawalaain saaʼu. Naashin waneʼeya sociólogo, eeshii wayuu aainjakana kasa kashüülasü sutuma tü propagandakat. Shiasaʼa suluʼujee tia, eeshii na oʼutirakana naaʼin na wayuu suluʼujeejanakana noumain, eesü atkawaa, aʼürülaana anainchii na naatakana eʼiruku otta eekai naatain nunoula (Easily Led—A History of Propaganda).

Mapüleere sümüin wayuu shimeejüin waya, nialeekajaʼa kapüleejeematüin amüin Satanaa. Nütüjaa aaʼu Satanaa tü wakuwaʼipakat, jama jülüjain naaʼin shia nukumajaiwaʼaya Jeʼwaa chi palajachikai wayuu. Shiasaʼa sutuma niain aluwataain saaʼu wayuu sainküin mmakat süpüshuaʼa, wainma sukuwaʼipa nutuma süpüla nuʼwalakajüin tü naʼalainkat sainküin mma (1 Juan 5:19; Juan 8:44). Saashin tü Wiwüliakat, niʼikerüin Satanaa «wayuu sainküin mmakat süpüshua» süka naʼalain, nüsürülüin nekii (Alat. Map. 12:9; 2 Cor. 4:3, 4). ¿Kasa paaʼinrajatka süpüla nnojoluin pimeejünüin nutuma Satanaa?

Nüküjain Jesuu tü saaʼinrajatkat wayuu süpüla nnojoluin shimeejünüin süka alawaa, müshi nia: «Jiyaawateerü aaʼu tü shiimainkat süpüla jujuittüinjanain sütüma suulia achepchiaa» (Juan 8:31, 32). Sünain wanee atkawaa, choʼujaasü natüjaainjatüin aaʼu na surulaatkana tü shiimainkat suulia nemeejünüin natuma na naʼünüükana, süka jamüin, aküjashii naʼalain na naʼünüükana shiiʼiree nemeejüin naya. Akaʼaya neʼe wayakana, choʼujaasü watüjaainjatüin saaʼu tü shiimainkat suulia nimeejüin waya chi waʼünüükai. Nia Jeʼwaa aküjakai wamüin tü shiimainkat sükajee tü Wiwüliakat. Aküjünüsü wamüin yala tü waaʼinrajatkat suulia nimeejüin waya Satanaa (2 Tim. 3:16, 17).

Nütüjaapejeʼe aaʼu Satanaa tia. Müshijeseʼe nüchajaain sukuwaʼipa süpüla nnojoluin saashajeʼerüin otta shikirajaain wayuu sünain tü Wiwüliakat, süpüla naatainjatüin tü jülüjakat saaʼin. ¡Jalia pimeejünayaai nutuma Satanaa! (Éf. 6:11). Püchajaainjatü maʼin sukuwaʼipa süpüla piyaawatüinjatüin saaʼu tü shiimainkat (Éf. 3:18, 19). Anasü jülüjale paaʼin tü nümakat Noam Chomsky, müshi nia: «Nnojotsü jaralüinjatüin eʼitaain tü shiimainkat suluʼu wekii. Wayainjana achajaaka shia». Sutuma tia, anashi pikirajaale waneepia sünain tü Nünüikikat Maleiwa, pütüjaweetka saaʼu tü shiimainkat (Aluw. 17:11).

Nnojotsü keeʼireein naaʼin Satanaa jülüjain paaʼin tü anakat süpüla paaʼinrüin otta pikirajaain sünain tü shiimainkat süchiki wanee kasa paapaka. ¿Jamüsüche nnojotka keeʼireein naaʼin tia? Saashin wanee karaloʼuta, sunoujamaata anainrü  wayuu wanee alawaa müleka nnojorüle shikirajaain süchiirua süpüla sütüjaain saaʼu shiimainre shia (Media and Society in the Twentieth Century). Müsüjeseʼe nnojoluin anain, punoujamaatüle wanee kasa münakat pümüin (Prov. 14:15). Jülüjeesü paaʼin palajana sümaa püsakireʼerüin paaʼin sünain müleka shiimainre shia, piʼrüinche niʼitaain Maleiwa tia sünain pukuwaʼipa süpüla pükatsüinrüin punoula (Prov. 2:10-15; Roma 12:1, 2, TNM).

Eeshii surulaat eekai neimmolojuin naʼünüü sükajee alawaa, süpüla nnojoluin yapain naya süpüla atkawaa. Nachajaain sukuwaʼipa süpüla natkaajiraain na naʼünüükana jee shiale süpüla nakaaʼinjaain noulia na waneinnua. Naashin wanee shikiipüʼü surulaat chejeʼewai Alemania, ayamuluushii naya sünain tü kanüliakat Primera Guerra Mundial sutuma naʼalain na naʼünüükana. Amalajaashii neʼe na wayuukana naashin maʼaka sümalajaain wanee atpanaa sutuma sujuula wanee wüi. Müsia neʼe tü naaʼinrakat Satanaa maaʼulu, nüchajaain sukuwaʼipa süpüla nnojoluin paaʼinwain waya namaa na wawalayuukana shiiʼiree niyamülüin waya. Jamüshijaʼa nia, eeshii mojujiraale na wawalayuukana nutuma otta nüchajaain sukuwaʼipa süpüla nakaaʼinjaain suulia nupueulose Jeʼwaa na yüülakana aaʼin sutuma tü naaʼinrakat wanee wawala namüin.

¡Jalia punoujayaai sünain alawaa! Shia paaʼinra tü sümakat tü Nünüikikat Maleiwa otta ayataʼaya pia paaʼinwajiraain namaa na wawalayuukana. Saashin tü Wiwüliakat, shia anaka aluʼu motowaire waaʼin naainjala na wawalayuukana wamüin sümaa wakumajiraain sukuwaʼipa wanee mojujirawaa namaa (Col. 3:13, 14; Mat. 5:23, 24). Süküjainya tü Wiwüliakat tü alateetkat nümüin chi eekai nükaaʼinjaain noulia na wawalayuukana (Prov. 18:1). Anashi püsakirüle paaʼin müleka pimeejünüle maaʼulu nutuma Satanaa. Püsakira paaʼin sünain tüü: «¿Jamüsüinka taaʼin sutuma alin nünüiki wanee tawala tamüin? ¿Kasa taaʼinraka wanaa sümaa tia? ¿Shiache taaʼinraka tü anakat noʼuluʼu Jeʼwaa shiataapa tü anakat noʼuluʼu Satanaa?» (Gal. 5:16-26; Éf. 2:2, 3).

Nnojoire nunoujain wanee surulaat sünain nünüiki chi nikiipüʼüjanakai, nnojoleechi naaʼinruʼuin sünain atkawaa. Eeshii surulaat eekai nnojoluin nanoujain nünüiki chi nikiipüʼüjanakai sutuma naküjünüin amüin alawaa natuma na naʼünüükana. Jamüsüjaʼa mojukuwaʼiparüle wanee kasa nutuma nekiipüʼüjana, eeshii namüle na naʼünüükana: «‹Nnojotsü anain junoujale sünain nünüiki›, ‹ajaʼtteena jia outuin nutuma›». Müsia neʼe tü naaʼinrakat Satanaa. Nüchajaain sukuwaʼipa süpüla nnojoluin wanoujain sünain nanüiki na wawalayuu niʼitaakana Jeʼwaa süpüla laülaain wapüleerua.

 ¿Kasa paaʼinrajatka süpüla ayatüin punoujain sünain tü namakat na wawalayuu laülaakana wapüleerua? Ayatüinjachi pia suluʼuin nupueulose Jeʼwaa otta kojutuinjana pümüin na wawalayuu laülaakana wapüleerua nutuma Jeʼwaa jaʼitairü nnojoluin lotuin nakuwaʼipa (1 Tes. 5:12, 13). Nnojo punoujain nanüiki na ekirajüliikana sünain alawaa jee na wane süʼünüükana nupueulose Maleiwa, jaʼitairü müin shiimainkai saaʼin tü namakat (2 Tes. 2:2; Tito 1:10). Shia paaʼinra tü nümakat Pablo nümüin Timoteo: «Anakaja müleka ayatüle pia sünain tü ekirajünakat anain, tü pünoujakat anain, süka pütüjaain saaʼu sünain shiimüin tü wamakat wayakana na ekirajakana pia» (2 Tim. 3:14, 15). Wainma kasa weʼitaaka aaʼujee waaʼin nünain chi achepchieekai; nia nikirajaka akajee waya Jeʼwaa sünain tü shiimainkat suʼunnaa tü sien juya alatüitpakat (Mat. 24:45-47, TNM; Heb. 13:7, 17).

Eeshii niimolojule waya Satanaa. Nnojotsü jeketüin tia, kakaliairü eimmolojunuin wayuu sükajee alawaa (Easily Led—A History of Propaganda). Naashin wanee ekirajüi chejeʼewai Gran Bretaña Philip M. Taylor nünülia, nayamülüin na asiriokana na naʼünüükana sükajee naainjain kasa kashüülasü otta naʼwalakajüin süchiki sainküin mma. Meechi pia nutuma Satanaa süpüla niimolojuin pia, mmoleechi pia seema wayuu nutuma, mmoleechi pia seema müliain atumawaa otta seema outaa. Naaʼinreerü tia süpüla puuʼulaain suulia aʼyatawaa nümüin Jeʼwaa (Isa. 8:12; Jer. 42:11; Heb. 2:15).

Nnojo puuʼulaain niimolojuin pia Satanaa otta kaainjalain pia nuulia Jeʼwaa nutuma. Anuu nünüiki Jesuu: «Nnojo mmolüin jia seema wayuu eekai suʼuteein jaaʼin. Müleka juʼutünüle aaʼin, tü ajaʼtteetkat, shia neʼe tü jiʼirukukat. Nnojoleerü kasain saaʼinrüin tü wayuukolüirua jüka süchikijee» (Luc. 12:4). Piʼitaa paaʼin sünain naaʼinmajeechin pia Jeʼwaa waneepia, naapeerü sütsüin paaʼin otta nükaaliinjeechi pia suulia piyamünnüin nutuma Satanaa (2 Cor. 4:7-9; 1 Ped. 3:14).

Shiimainya eein süpüla mmoluin pia. Anapejeʼe sotule paaʼin tü nümakat Jeʼwaa nümüin Josué, müshi nia: «Yalayala paaʼin jee meimmoluin pia. Nnojo mmoluin pia, tayakai Jeʼwaa chi Pümaleiwasekai, eeshi taya pümaa eepünaale puʼunuin» (Jos. 1:9, TNM). Shapaale paaʼin, puʼuraajamaata nümüin Jeʼwaa otta püküja nümüin süpüshuaʼa tü ashapataakalü atuma paaʼin. Paaʼinrüle tia, aneerü paaʼin nutuma Jeʼwaa otta yapeechi pia süpüla ayoutaa tü alawaa nikirajakalü anain Satanaa (Filip. 4:6, 7; Filip. 4:13, TNM).

¿Sotusü paaʼin tü alawaa niimolojokot akajee Rabsaqué na nupueulosekana Maleiwa? Nunoujireein naya sünain nnojoleechin jaralin akaaliinjain naya noulia na asiriokana, jaʼitakajeʼe neʼe Jeʼwaa naashin, nnojoleena nükaaliinjain naya. Naashin Rabsaqué, nia Jeʼwaa ajütaka naya süpüla najaʼlajeʼerüin Jerusalén. Anuujeseʼe nünüiki Jeʼwaa nümüin chi aluwataakai saaʼu Judá soʼu tia: «Nnojo mmoluin pia sutuma tü paapüitpakat, tü pütchi airuʼutkat namaka tachiki na aʼyataashiikana nümüin chi aluwataakai saaʼu mmakat Asiria» (2 Rey. 18:22-25; 2 Rey 19:6, TNM). Süchikijee tia, nüjütaka Jeʼwaa wanee aapiee oʼutaka saaʼin 185.000 surulaat asirio soʼu wanee ai (2 Rey. 19:35).

Eeshijaʼa pünajüichire wanee peliikula eere nimeejünüinjachin wanee wayuu ojuʼitakai suluʼu. Shiasaʼa sutuma pütüjaain saaʼu tia, müshi pümeekai nümüin: «Nnojo poonooin sümaa. Emeejünüshi taa pia». Müsia neʼe nakuwaʼipa na aapieekana, neʼrüin waya chaa iipünaajee otta müshii namakai aaʼin wamüin: «Jalia jia, nimeejüin taa jia Satanaa».

Nnojo poonooin sümaa naʼalain Satanaa (Prov. 26:24, 25). Nia poonoo amaa anüiki Jeʼwaa otta piʼitaa paaʼin nünain (Prov. 3:5-7). Anuu nünüiki pümüin süka alin pia nüpüla: «Kekii maʼin pia tachonchee otta pütalateʼera taaʼin» (Prov. 27:11, TNM). Paaʼinrüle tia, aneerü tü jülüjakat paaʼin otta nnojoleerü punoujain anain tü alawaakat.