ASHAJÜNÜSÜ suluʼu tü Wiwüliakat nanüiki wayuu alatakana amüin kasa mojusü maʼaka sülatüin wamüin (Sant. 5:17). Jamüshijaʼa Pablo, eejiraashi sümaa kasa mojusü, müshi nia: «Mayaainje tacheküin taaʼinreein kasa anasü, ayatsia neʼe taneeküin aaʼinraa tü kasa mojusükat. [...] Aluʼutaʼaleeshija maʼi taya» (Roma 7:21-25). Eesüjaʼa sülatüle wamüin tü alatakat nümüin Pablo. Amülialaasü waaʼin sutuma watüjaain saaʼu jamüin naaʼin, süka jamüin, suchuntaain waaʼin waainjain kasa mojusü.

Nüküjain Pablo suluʼu Galacia 2:20 jamüin naaʼin sutuma naapajiraain nikii Jesuu naaʼu: «Chi Nüchonkai Maleiwa, chi aikai apüla taya sümaa naapajiraain nikii süpüla ouktüin taaʼujee». Nnojotsü nutchejaain amaa Pablo alin nia nüpüla Jesuu. ¿Kojutusüche wamüin naapajiraain nikii Jesuu maʼaka kojutuin shia nümüin Pablo? Eesüjaʼa jülüjale waaʼin maalin waya nüpüla Maleiwa.

Mojule waaʼin saalinjee tü kasa mojusü waaʼinrapuʼukat, eesüjaʼa jülüjale waaʼin maalin waya nüpüla Jeʼwaa otta nnojoluin motuin naaʼin tü waainjalakat. Tü naaʼinrakat Jesuu wapüleerua müsü aka saaʼin wanee asülajuushi wamüin. Eepejeʼe manoujainre waya sünain naapajiraain nikii waaʼu waneʼewai wakua. ¿Nücheküinche Jesuu kojutuinjatüin wamüin tü nüsülajakat wamüin? ¿Kasa waaʼinrajatka süpüla kojutuin shia wamüin? Wekirajaa sünain tia piamasükat pütchi.

Nücheka achikit Jesuu kojutuin wamüin naapajiraain nikii waaʼu, müsü aka saaʼin wanee nüsülajala wamüin. ¿Jamüsü watüjaaka saaʼu nücheküin süchiki tia? Jülüjataa waaʼin tü sümakat Lucas 23:39-43, TNM. Yala aküjüna achikichi wanee wayuu akachennakai naʼatoʼu Jesuu. Nütüjaa aaʼu chia wayuukai mojuin tü naaʼinrakat. Süsalashi nia tia, müshijeseʼe nükachennüin. Sümaiwa paala, naya neʼe akachennaka na wayuu mojulaakana maʼin. Süka shapaain naaʼin chia wayuukai müshi nia nümüin Jesuu: «Motojoyoo taya paaʼin puluwataapa».

¿Jamüsüche nünüiki Jesuu nümüin? Jülüjataa waaʼin niirakaain Jesuu nümüin chia wayuukai sümaa aijashaatain nia. Mayaainjeʼe alin maʼin nümüin tü nütapaʼakat, akulemeraashi nia sümaa nümüin nümüin: «Shiimain tü tamakat pümüin jooluʼu: Eejeechi pia tamaa suluʼu tü Paʼaraiisükat». Nnojotsü nüküjain Jesuu nümüin chia wayuukai nüntüshin süpüla «taashinjatüin wayuu wainma suulia saainjala sünainjee ouktüin» nia (Mat. 20:28). Nüchajaain Jesuu sukuwaʼipa süpüla nüküjain nümüin naapajiraain nikii naaʼu. Müshi nia nümüin: «Eejeechi pia tamaa» jee nüküjain nümüin kepieechin nia suluʼu tü Paʼaraiisükat saaʼujee naapajiraain nikii naaʼu.

Outatüjüiya chia wayuukai, nnojoikalaka niʼyataain nümüin Maleiwa. Nüchekapejeʼe Jesuu nüpüleerua niyaawatüin saaʼu naapajiraain nikii naaʼu, müsü aka saaʼin wanee nüsülajala nümüin. Nücheküle Jesuu tia nüpüleerua wanee wayuu kaainjarai, shialeekajaʼa nüpüleerua wanee anoujashi woutiisakai jee aʼyataakai nümüin Maleiwa. Mayaainjeʼe waaʼinrapuʼuin kasa mojusü, ¿kasa waaʼinrajatka süpüla wayaawatüin saaʼu weʼreenain anaa waneʼewai wakua sünainjee naapajiraain nikii Jesuu waaʼu?

Niyaawata aaʼu Pablo naapajiraain nikii Jesuu naaʼu sükajee nuluwataain nia sünain aküjaa pütchi. Müshi Pablo  süchiki tia: «Taapüin analuʼut nümüin chi Wasenyotsekai Jesucristo süka katsüintpain taaʼin nütüma süpüla taʼyataain nümüin. Nüneeküin taya paala süka nütüjaain saaʼu sünain tekeraajeerüin waneepia tü kasa eʼitaanüinjatkat tapüla. Niʼitaain taya süpüla aküjaa nüchiki sümüin wayuu süpüshua, eereje eʼrüipüʼüin wayumüin taya nümüin süka tanüiki je mayaashiije teipirapüʼüin na anoujashiikana» (1 Tim. 1:12-14). Sükajee saapünüin nümüin Pablo tia aʼyatawaakat, niyaawata aaʼulu sümülialaain naaʼin Jesuu naalin, alin nia nüpüla otta nütüjaain saaʼu Jesuu nikeraajeerüin Pablo tia aʼyatawaakat. Nuluwataain waya Jesuu waneʼewai wakua sünain aküjaa pütchi (Mat. 28:19, 20). ¿Kojutusüche wamüin tia aʼyatawaakat maʼaka kojutuin shia nümüin Pablo?

Jülüjaa waaʼin tü alatakat nümüin Albert, alüʼütsü süpüla 34 juya nia sünain nujuʼitinnüin naʼakajee na wawalayuukana, aleʼejapejeʼe nia jekenainka. Anuu nünüiki: «Sotusü taaʼin waneepia tü kasa mojusü taaʼinrapuʼukat. Anapejeʼe taaʼin tojuʼitapa sünain aküjaa pütchi, jülüjasü taaʼin nuluwataain taya Jesuu sünain aküjaa pütchi maʼaka nuluwataain Pablo. Anasü taaʼin jee talatüshi taya süka jülüjain taaʼin tia. Anasü tü jülüjakat taaʼin tachiki jee süchiki tü anaa teʼreetkat mapeena» (Sal. 51:3).

Jashichipuʼu maʼin Allan jee wainma tü kasa mojusü naaʼinrapuʼukat süpülapünaa nikirajaain nüchiki Jeʼwaa. Müshi nia: «Sotoyülia taaʼin tü kasa mojusü taaʼinrapuʼukat sümüin wayuu. Eesü mojule taaʼin sutuma tia. Taapapejeʼe analuʼut nümüin Jeʼwaa saaʼu taküjain pütchi sümüin wayuu mayaainjeʼe nnojoluin lotuin takuwaʼipa. Sükajee saapaain wayuu sümaa tü pütchi taküjakat, tayaawata aaʼu aipüralin jee anamiain maʼin Jeʼwaa. Tatüjaa aaʼu nüneeküin taya süpüla takaalinjain na wayuu makana aka saaʼin takuwaʼipa paala».

Shia waaʼinmaaka aaʼinraa kasa anasü otta anasü tü jülüjakat waaʼin waküjale maʼin pütchi. Jee müsia, watüjaa aaʼu nümülialaain Jesuu waalin, alin waya nüpüla jee niʼitaain naaʼin wanain.

Eesüjaʼa ayateerüle mojuin waaʼin saalinjee tü kasa mojusü waaʼinrapuʼukat. Waneʼereʼeya anain waaʼin sajaʼttapa tü kasa mojusü nuluwataakalü aaʼu Satanaa. ¿Kasa waaʼinrajatka süpüla nnojoluin mojuin maʼin waaʼin?

Anayaapuʼusü nukuwaʼipa Jean noʼupalapünaa na waneinnua, mojuwaisü naaʼin sünainjee sotowalin naaʼin tü naaʼinrapuʼukat jimaʼaiwaʼaya nia. Eepejeʼe tü anakalü atuma naaʼin, anuu nünüiki: «Anasü taaʼin sutuma tatüjaain saaʼu miyoʼuin Maleiwa suulia tü waaʼinkat» (1 Juan 3:19, 20, TNM). Akaʼaya wayakana, anasü waaʼin sutuma niyaawatüin saaʼu Jeʼwaa otta Jesuu tü wakuwaʼipakat, natüjaa aaʼulu eein tü kasa mojusü waainjakat. Soto waaʼin alin waya nüpüla Jeʼwaa otta nüpüla Jesuu müshiijeseʼe taashin waya natuma. Nnojoishi outuin Jesuu naaʼu wayuu eekai lotuin akuwaʼipa, outushi nia süpüla nuʼtteʼerüin wayuu eekai kaainjaralin (1 Tim. 1:15).

Taashishii waya nutuma Jesuu, müsü aka saaʼin wanee nüsülajala tia wamüin, wayaawateerü aaʼu tia waaʼinrüle piamasü kasa: wasakireʼerüinjatü waaʼin sünain tü naaʼinrakat Jesuu süpüleerua wayuu otta aʼyataainjana maʼin waya sünain aküjaa pütchi, nuluwataain waya sünain tia. Waaʼinrüle tia, wanaaweerü waaʼin nümaa Pablo sünain maa: Nia Jesuu «chi aikai apüla taya sümaa naapajiraain nikii süpüla ouktüin taaʼujee».