1. ¿Jamüshii kettaajüinjanaka waya süpülapünaa müliain waaʼin atumawaa?

NÜTÜJAA aaʼu Jesuu müliainjanain atumawaa na nikirajüinkana, naapirüinjeseʼe naya süpülapünaa nuʼutunuin aaʼin (Juan 17:14). Müliashii maʼin atumawaa maaʼulu na anoujashiikana nünain Jeʼwaa (2 Tim. 3:12). Mülieena maʼin atumawaa na anoujashiikana sülüʼütpa maʼin sükalia sajaʼttajatüin kasa süpüshuaʼa (Mat. 24:9).

2, 3. (1) ¿Kaseerü alataka mmorüle waya? (2) ¿Kasa wekirajaainjatka anain sünain ekirajaayakat tüü?

² ¿Kasa waaʼinrajatka süpüla kettaajüin waya süpülapünaa müliain waaʼin atumawaa? Nnojotsü choʼujaain jülüjainjatüin waaʼin tü kasa mojusü aainjüneetkat wamüin. Shiale jülüjain waaʼin tia, eeshii süpüla wooʼulaain suulia anoujaa nünain Jeʼwaa nnojoliiwaʼaya wooʼulakünüin aaʼin, alateerü tia wamüin sutuma mmoluin waya jee shapaain waaʼin (Prov. 12:25; 17:22). Soteesü waaʼin niimolojuin waya chi Yolujaakai süpüla wooʼulaain suulia anoujaa (1 Ped. 5:8, 9). ¿Kasache waaʼinrajatka süpüla wachecheraain nünain Jeʼwaa?

³ Sünain ekirajaayakat tüü, wekirajaweerü anain tü waaʼinrajatkat süpüla aleewashaatain waya nümaa Jeʼwaa jee jamüin choʼujaaka waaʼinrüin tia. Aküjüneerü wamüin kasain waaʼinrajatüin süpüla meimmoluin waya jee kasain waaʼinrajatüin kanainre waya naaʼin na wayuukana saalinjee wanoujain.

4. (1) ¿Kasa nnojoluinjatka woʼtchejaain ama saashin Hebreokana 13:5, 6? (2) ¿Jamüsü nnojoluinjatka woʼtchejaain sümaa tia?

⁴ Nnojoluinjatü woʼtchejaain amaa alin waya nüpüla Jeʼwaa jee nnojoleenain waya nüpütüin wamüiwaʼa (paashajeʼera Hebreokana 13:5, 6). Anuu wanee pütchi ashajünaka suluʼu Aapiria  Wayuu: «Chi wayuu aleewakai nümaa Jeʼwaa, niʼitaajeerü naaʼin nünain Jeʼwaa soʼu nuuʼulakünüin aaʼin». Shiimainsaʼaya tia makat. Eejiraweena waya sümaa tü ooʼulakünakalü aka waaʼin müleka aire Jeʼwaa wapüla, weʼitaale waaʼin nünain jee nnojorüle woʼtchejaain sümaa alin waya nüpüla (Mat. 22:36-38; Sant. 5:11).

5. ¿Kasa waaʼinrajatka süpüla wayaawatüin saaʼu alin waya nüpüla Jeʼwaa?

⁵ Waashajeʼera tü Wiwüliakat weinshi süpüla warütkaain nünainmüin Jeʼwaa (Sant. 4:8). Wanaa sümaa waashajeʼerüin tü Wiwüliakat, jülüja waaʼin aipüralin wayuu Jeʼwaa, nümüliajülin jee anamiain nia. Wayaawata aaʼu alin wayuu nüpüla sükajee tü nümakat jee tü naaʼinrakat (Éx. 34:6). Eeshii wayuu manoujainka sünain alin naya nüpüla Maleiwa sünainjee maalin naya süpüla wayuu. Shiale jülüjain waaʼin tia, shia anaka aluʼu washajüle weinshi tü kasa naaʼinrakat Jeʼwaa wapüleerua süpüla nümülialaain aaʼin waalin otta kamaneein nia wamüin (Sal. 78:38, 39; Roma 8:32). Wainmeerü kasa washajaka müleka wasakireʼerüle suluʼu waaʼin sünain tü kasa naaʼinrakat Jeʼwaa wapüleerua otta tü waashajeʼerakat suluʼu tü Wiwüliakat. Kojutule maʼin wamüin tü naaʼinrakat Jeʼwaa, aleewashaateena waya nümaa (Sal. 116:1, 2).

6. Saashin Salmo 94:17-19, ¿jamüsü anaka waküjale nümüin Jeʼwaa süpüshuaʼa tü alatakat wamüin?

⁶ Woʼuraaja weinshi. Jülüjataa waaʼin nukuwaʼipa wanee jintüi ojuupatünakai nutuma nüshi. Anasü naaʼin chia jintüikai nümaa chi nüshikai, müshijeseʼe nüküjain nümüin tü kasa mojusü jee tü kasa anasü alatakat nümüin soʼu tia kaʼikat. Meeria wakuwaʼipa nümaa Jeʼwaa müleka waküjale nümüin weinshi süpüshuaʼa tü alatakat wamüin (paashajeʼera Salmo 94:17-19). Waküja nümüin chi Washikai jamüin waaʼin, kasain mmoluin eema waya otta kasain shapaain atuma waaʼin (Lam. 2:19). Sünainjee waaʼinrüin tia, aapüneerü wanee anaa wamüin nutuma Maleiwa maʼaka süküjain shia tü Wiwüliakat (Filip. 4:6, 7). Arütkaweena maʼin waya nünainmüin Jeʼwaa müleka woʼuraajüle weinshi (Roma 8:38, 39).

7. ¿Jamüshii nnojoliinjanaka woʼtchejaain sümaa shikeraajeerüin tü nümakat Jeʼwaa?

⁷ Nnojoluinjatü woʼtchejaain amaa aneerüin kasa süpüshuaʼa sutuma Nuluwataain Jeʼwaa (Núm. 23:19). Nnojoliire wanoujain maʼin sünain tü naaʼinrajatkat Jeʼwaa, mapüleejeerü nümüin Satanaa otta namüin na nümaajanakana neimmolojuin waya (Prov. 24:10; Heb. 2:15). ¿Kasa waaʼinrajatka süpüla wanoujain maʼin sünain tü naaʼinrajatkat Maleiwa süka niainjachin Aluwataain? Anashii wekirajaale sünain tü naaʼinrajatkat Jeʼwaa otta jamüin wanoujaka sünain shikeraajeerüin tü nümakat. Wayaawateerü aaʼu tia sükajee tü alatakat nümüin chi wawalakai Stanley Jones, püreesashi nia soʼu akaratshi juya saalinjee nunoujain. * Anuu nünüiki süchiki tü naaʼinrakat süpüla waneepiain nia nümaa Jeʼwaa: «Katchinsü taaʼin sutuma tatüjaain saaʼu niainjachin aluwataain Maleiwa otta nnojotsü toʼtchejaain amaa tia. Nnojoishi taya aakalüin nachiki na mojulaashiikana». Kanourale maʼin waya  sünain tü naaʼinrajatkat Maleiwa, arütkaweena waya nünainmüin otta nnojoleena waya mmoluin (Prov. 3:25, 26).

8. ¿Jamüsü kojutuinjatka wamüin tü outkajawaakat?

⁸ Waneepia waya sünain tü outkajawaakat. Arütkaashii waya nünainmüin Jeʼwaa sutuma woutkajaain. Kojutule wamüin tü outkajawaakat, eejiraweena waya sümaa tü ooʼulakünakalü aka waaʼin, iseetpajaʼa shia wachiki makatüle waya suulia tü outkajawaakat (Heb. 10:24, 25). Wekirajaa sünain jamüin makaʼa tia. Nnojoliire waya maaʼulu sünain tü outkajawaakat sutuma kasa eekai eein neʼe, nnojoleena waya outkajaain namaa na wawalayuukana süpülajünapa woulia. Waneepiale waya sünain tü outkajawaakat, nnojoleena waya nooʼuleʼerüin na mojulaashiikana. Müsüjeseʼe kojutuinjatüin wamüin tü outkajawaakat maaʼulu yaa. Shiale waaʼinrüin tia, nnojoleena waya ooʼulaain suulia oonowaa sümaa nünüiki Maleiwa, jaʼitasü napülajüin shia woulia na sülaülakana mma jee na mojulaashiikana (Aluw. 5:29).

9. ¿Jamüsü anaka wekirajaale sünain waneirua wetsiikulo süpüla sotuin shia waaʼin süpülapünaa müliain waaʼin atumawaa?

⁹ Ekirajaainjana waya sünain tü wetsiikulo kamalainkat wamüin süpüla sotuinjatüin shia waaʼin (Mat. 13:52). Eesüjaʼa motule waaʼin jamüin sünüiki wanee wetsiikulo, eepejeʼe süpüla sotuin shia waaʼin sükajee naapüin Maleiwa wamüin chi naaʼinkai (Juan 14:26). Anuu nünüiki wanee wawala püreesakai paala chaa Alemania oriental: «Akaijasaʼa tekirajaain paala sünain waneirua wetsiikulo, sünainjee tia asakireʼetshi taya suluʼu taaʼin süchiki tü sümakat tü Wiwüliakat sümaʼinruʼu püreesain taya». Ayatüshi nia arütkaain nünainmüin Jeʼwaa sutuma sotuin naaʼin tia wetsiikulokot otta waneepiashi nia nümaa.

10. ¿Jamüshii wekirajaainjanaka sünain tü jayeechi weeʼirajakat nümüin Jeʼwaa?

¹⁰ Ekirajaainjana waya sünain tü jayeechikalüirua otta weeʼirajüinjatü shia nümüin Jeʼwaa. Soʼu chajachin püreesain Pablo nümaa Silas chaa Filipos, eeʼirajüshii naya nümüin Jeʼwaa tü jayeechi nekirajaakalü anain paala (Aluw. 16:25). Müsia neʼe tü naaʼinrakat na wawalayuu chajanakana amaanüin Siberia. Anuu tü sümakat tü wawalakat Mariya Fedun: «Shia weeʼirajaka süpüshuaʼa tü jayeechi wekirajaakalü anain paala suluʼujee tü karaloʼuta weeʼirajiakat». Saashin tia wawalakat, atütülaasü naaʼin napüshuaʼa na wawalayuukana sutuma tü jayeechikat otta arütkaashii naya nünainmüin Jeʼwaa. ¿Atütülaasüche waaʼin sutuma tü jayeechi kamalainkat wamüin? Shia anaka aluʼu wekirajaale sünain maaʼulu süpüla sotuinjatüin shia waaʼin mapeena (paashajeʼera tü pütchikat « ¡Meimmoluin taya putuma!»).

11, 12. (1) ¿Jamüshi meimmoluinka David saashin 1 Samuel 17:37, 45-47? (2) ¿Kasa watüjaka sünainjee tü naaʼinrakat David?

¹¹ Meimmoluinjana waya süpüla eejiraain waya sümaa tü ooʼulakünakalü aka waaʼin. ¿Kasa waaʼinrajatka mmoleʼere waya? Soto waaʼin nnojolin meimmoluin wanee wayuu sutuma miyoʼusenuuin nia, katsüin nia jee nütüjain maʼin. Wekirajaa sünain tü naaʼinrakat David. Atkaashi nia nümaa Goliat jimaʼaiwaʼaya nia. Motsoshi David nuulia Goliat otta matchinsai nia nuulia. Nnojoishi joo nia keraain süpüla atkawaa jee nnojotsü kasain nütkaayainjatüin. Meimmoluinpejeʼe nia, müshijeseʼe nujuʼitaain niʼipomüin Goliat.

¹² ¿Jamüshiche meimmoluinka David? Shia süka niʼitaain naaʼin sünain nükaalinjeechin nia Jeʼwaa (paashajeʼera 1 Samuel 17:37, 45-47). Nnojotsü jülüjain naaʼin David motsoin nia nuulia Goliat, shia kachipünaaka naaʼin miyoʼuleeinya Jeʼwaa nuulia Goliat. Anuu tü watüjakat sünainjee tü naaʼinrakat David: meimmoluinjeena waya müleka weʼitaale waaʼin sünain nükaalinjeenain waya Jeʼwaa otta jülüjale waaʼin pülashaatain maʼin nia noulia na müliakana atuma waaʼin (2 Crón. 20:15; Sal. 16:8). ¿Kasa waaʼinrajatka maaʼulu süpüla meimmoluin waya süpülapünaa müliain waaʼin atumawaa?

13. (1) ¿Kasa waaʼinrajatka süpüla meimmoluin waya? (2) ¿Jamüshii meimmoluinjeenaka waya waaʼinrüle tia?

¹³ Meimmoluinjeena waya müleka waküjale pütchi süchiki tü sukuwaʼipakat Aluwatawaa nutuma Maleiwa. Waaʼinrüle tia, weʼitaajeerü waaʼin nünain Jeʼwaa otta yalayaleerü waaʼin sünain aashajawaa sümaa wayuu (Prov. 29:25). Jamüshijaʼa wanee wayuu naainjale ejercicio, katchinsü naaʼin, akaatajaʼa waya, katchinjeerü waaʼin süpüla meimmoluinjanain waya waküjale pütchi sainküin piichi, suluʼupünaa oikaalee, eere jouluin wayuu otta eepünaale waya. Meimmoluinre waya sünain aküjaa pütchi maaʼulu, wounteerü waküjain pütchi süpülajünapa woulia (1 Tes. 2:1, 2).

14, 15. ¿Kasa watüjaka sünainjee tü saaʼinrakat tü wawalakat Nancy Yuen otta Valentina Garnovskaya?

¹⁴ Joʼu wekirajaai sünain tü saaʼinrakat piamasü wawalayuu meimmoluinka aaʼin. Nancy Yuen sünülia wanee. Wanee meetüro shiatapünaamüin sajaʼapüin, meimmoluinpejeʼe shia. * Püreesasü shia soʼu 20 juya chaa China sünainjee süküjain pütchi. «Macheʼekatche maʼin», müshii na pulusiia asakiijakana shia.

¹⁵ Tü wane wawalakat shia Valentina Garnovskaya,  püreesasü shia apünüintua sutuma tü Unión Soviética münapuʼukat, eetaasü maʼaka 21 juya sünain püreesain shia. * Masütaajusat shia sünain aküjaa pütchi, müsüjeseʼe «wayuu kaainjarat», namüin na pulusiiakana sümüin. ¿Jamüshiiche meimmoluinka naya wawalayuukana? Shia süka neʼitaain naaʼin sünain nükaalinjain naya Jeʼwaa.

16. ¿Kasa jülüjainjatka waaʼin süpüla meimmoluin waya?

¹⁶ Meimmoluinjeena waya müleka nnojorüle jülüjain waaʼin katchin waya jee watüjain maʼin. Shia jülüjainjatka waaʼin nükaalinjeenain waya Jeʼwaa otta nieechi atkaaka wapüleerua (Deut. 1:29, 30; Zac. 4:6). Waaʼinrüle tia, meimmoluinjeena waya.

17, 18. (1) ¿Jamüsü nünüiki Jesuu suluʼu Juan 15:18-21 süchiki tü naaʼinrajatkat na mojulaashiikana? (2) ¿Jamüshii kanainka waya naaʼin na mojulaashiikana?

¹⁷ Anasü waaʼin kojutule waya sümüin wayuu, nnojotpejeʼe jülüjainjatüin waaʼin mojuteenain waya sutuma wayuu nnojoliire weʼraajünüin maʼin. Anuu nünüiki Jesuu: «Anataʼaleeshiijaʼa maʼi jia shiʼrakana amüin wayuu jooluʼu saaliije anoujaa tanain tayakai, chi Shipayakai Wayuu, mayaasüje kanain jia saaʼin wayuu, mayaasüje süjünajaain jia wayuu sünain mojuin sünüiki jümüin, otta müleka shiyouktüle jia saaʼu mojulaain jia saajüin» (Luc. 6:22). ¿Kasache nüküjeeka achiki Jesuu?

¹⁸ Nnojotsü maluʼuluin nünüiki Jesuu anashiin namüin na anoujashiikana kanain naya saaʼin wayuu, shiajaʼa neʼe naapirüin naya süchiki tü alatajatkat namüin. Kanainshii waya naaʼin na mojulaashiikana süka nnojoluin wanaawain waya namaa, shia waaʼinraka tü nikirajakalü anain Jesuu otta aküjashii waya pütchi süchiki tü nümakat (paashajeʼera Juan 15:18-21). Nia talateeka Jeʼwaa watuma. Kanainshii waya naaʼin na mojulaashiikana sünainjee alin wapüla chi Washikai Jeʼwaa, nnojotpejeʼe mojuin waaʼin sutuma tia.

19. ¿Kasa waaʼinrajatka süpüla waaʼinrüin tü naaʼinrakat na aluwataaushikana?

¹⁹ Nnojo japülin waya saaʼu waküjaliin pütchi nüchiki Jeʼwaa sünainjee tü namakat wachiki na wayuukana jee tü naainjakat wamüin (Miq. 4:5). Wanee kasa akaalinjeekana waya süpüla meimmoluin  waya shia wekirajaale sünain tü naaʼinrakat na aluwataaushikana maʼaka jeʼra kaʼi süchikijee nuʼutunuin aaʼin Jesuu. Natüjaa aaʼu kanain naya naaʼin nekiipüʼü na judíokana (Aluw. 5:17, 18, 27, 28). Oʼunapejeʼe naya weinshi suluʼu tü aʼwaajüleekat otta naküjain sümüin wayuu nikirajanain naya Jesuu (Aluw. 5:42). Nnojotsü naapüin naaʼin sünain mmoluu. Meimmoluinjeena waya nnojoliire japülin waya saaʼu waküjain sümüin wayuu waküjaliin pütchi nüchiki Jeʼwaa, eesü süpüla waaʼinrüin tia waʼyataaleruʼu, koleejialuʼu jee namüin na wayuu kepiakana waʼütpünaa (Aluw. 4:29; Roma 1:16).

20. ¿Jamüshii talataka na aluwataaushikana mayaapejeʼe kanain naya saaʼin wayuu?

²⁰ Talatüshii na aluwataaushikana süka natüjaain saaʼu kanain naya saaʼin wayuu saaʼujee nanoujain. Otta müshiʼiya naya, kojutusü namüin noonooin sümaa nünüiki Jeʼwaa jaʼitasü müliain naaʼin atumawaa (Luc. 6:23; Aluw. 5:41). Anuu tü nüshajakat mapa chi aluwataaushikai Pedro: «Jaʼitairü jiʼrüin müliaa [...] saaʼujee jaaʼinrüin tü anasü nüchekakat Maleiwa jüpüleerua, anataʼaleeshiijaʼa maʼi jia nütüma» (1 Ped. 2:19-21; 3:14). Watüjaale saaʼu kanain waya naaʼin na wayuukana sünainjee wanoujain, ayateenaʼaya waya sünain aʼyatawaa nümüin Jeʼwaa.

21, 22. (1) ¿Kasa paaʼinraka süpüla kettaajüin pia süpülapünaa püpüleeruaanüin aaʼin? (2) ¿Kasa wekirajaajeetka anain sünain tü wane ekirajaayakat?

²¹ Nnojotsü watüjaain aaʼu joujeerüin müliain waaʼin atumawaa jee joujeerüin napülajüin na sülaülakana mma waküjain pütchi. Shiapejeʼe watüjaain saaʼu kettaajeenain waya maaʼulu müleka aleewashaatale waya nümaa Jeʼwaa, wekirajaale süpüla meimmoluin waya otta watüjale süpüleerua tü waaʼinrajatkat kanainre waya saaʼin wayuu. Kettaajüle waya maaʼulu, ayateena waya aʼyataain nümüin Jeʼwaa müliapa waaʼin atumawaa.

²² ¿Kaseetche waaʼinraka müleka süpülajünüle woulia waʼyataain nümüin Jeʼwaa? Sünain tü wane ekirajaayakat, wekirajaajeerü anain tü waaʼinrüinjatkat saashin tü Wiwüliakat sülatapa tia wamüin.