1. ¿Kasa aʼwanajaaka maaʼulu suluʼu waneirua mma?

SÜMAIWA paala oʼunapuʼushii na wayuukana suluʼu wanee iküleesia. Aʼwanajaapajaʼa tia maaʼulu. Awainmalaashii maʼin na wayuu manoulakana. * Suluʼu waneirua mma, wainma na makana nnojoliin naya suluʼupünaain wanee iküleesia * (Mat. 24:12).

2. ¿Jamüshii nawainmalaaka maʼin na wayuu manoulakana?

² ¿Jamüshiiche nawainmalaaka maʼin na wayuu manoulakana? Eeshii na aaʼinmaakana tü talatüinjatkalü atuma naaʼin jee tü kasa alatakat namüin (Luc. 8:14). Eeshii na manoulaleekana. Eeshiʼiya na kanoulakana, nnojoliipejeʼe naya suluʼupünaain wanee iküleesia süka nnojoluin napülajatüin shia naashin, nnojotsü kasain saamüin tü anoujaakat jee nnojotsü pansaain shia sümaa tü namakat na cientiificokana naashin. Eesü süküjünüle namüin suluʼupünaa raawia, telewisoot jee Internet sukumajaasüin tü kasakalüirua sümüiwaʼa otta eeshii nekirajünüle sünain tia suluʼu koleejiaa jee natuma naʼaleewainyuu. Nnojotpejeʼe pansaain tü aküjünakat namüin süpüla nanoujainjanain nünain Maleiwa. Eeshii na wayuu mojushiikana amüin sünainpünaain poliitika na shikiipüʼükana iküleesia jee shiain naaʼinmaain tü nneetkat. Suluʼu waneirua mma eesü kasa napülajaka na sülaülashiikana mma noulia na anoujashiikana.

3. ¿Kasapülajatü ekirajaayakat tüü?

³ Nuluwataain waya Jesuu sünain wekirajüin wayuu sainküin tü mmakat (Mat. 28:19). ¿Kasache waaʼinrajatka süpüla alinjachin Maleiwa napüla na wayuu manoulakana jee süpüla noushikajaain nüchiirua Kürisüto? Shia jülüjeeka maʼin waaʼin naateerüin tü namakat  shiʼipajee tü wamakat namüin, tia oʼunusü süchiirua jamüin nakuwaʼipa eejanale joʼuuin naya. Jamüshiijaʼa na joʼuushiikana Europa naata nanüiki süchiki tü anoujaakat noulia na chajanakana joʼuuin Asia. Chaa Europa, wainma na atüjaakana saaʼu süpüshi sünüiki tü Wiwüliakat otta eeshii naapüle süchiki niain Maleiwa kakumajalain kasa süpüshuaʼa. Akaajasaʼa chaa Asia, wainma na nnojoliikana atüjaain saaʼu sünüiki tü Wiwüliakat jee nnojotsü nanoujain anain niain Maleiwa kakumajalain kasa süpüshuaʼa. Ekirajaayakat tüü, süpülajatü watüjaain saaʼu tü waaʼinrajatkat süpüla nanoujain nünain Maleiwa na wayuu manoulakana, jaʼitasü naatain noumain jee tü nanoujakalü anain.

4. ¿Jamüsü jülüjainjatka waaʼin eejeenain na wayuu anoujakana?

⁴ Jülüja waaʼin eejeenain na wayuu anoujakana. Wainma na wayuu aneekakana naküjaliin pütchi nüchiki Jeʼwaa mayaainjeʼe manoulain naya paala. Eeshii na anakana akuwaʼipa, müsüjeseʼe mojushiin namüin tü kasa mojusü naainjakat na shikiipüʼükana tü iküleesiakat otta eeshii na wayuu mojupuʼukana akuwaʼipa. Wainma na ooʼulaakana suulia tü yarüttapuʼukalü atuma nakuwaʼipa. Nükaalinjeena waya Jeʼwaa süpüla wantüin nanain na wayuu «kettaakana süpüla katüin noʼu waneepia» (Aluw. 13:48, TNM; 1 Tim. 2:3, 4).

5. ¿Kasa waaʼinrajatka süpüla naapaain na wayuukana sümaa tü pütchi waküjakat?

⁵ Kamanee waya otta watüja süpüleerua wanüiki. Naapaa amaalü na wayuukana tü pütchi waküjakat namüin sükajee anain sukuwaʼipa wanüiki, nnojotsü shiain sükajee tü wamakat namüin. Shia kamalainka namüin kamaneein waya, watüjain süpüleerua wanüiki otta kachipünaain waaʼin nakuwaʼipa. Nnojotsü wapüleeruain naaʼin süpüla naapajüin wanüiki. Shia anaka aluʼu wayaawatüle saaʼu jamüin manoulaka naya otta jamüin jülüjaka naaʼin tia. Eeshii na mamalainkana amüin naashajaain süchiki anoujaa sümaa wayuu nnojotka neʼraajüin. Eeshii na nnojoliikana anain amüin nasakinnüle nüchiki Maleiwa. Eetaashii na japüikana suulia neʼnnüin sünain aashajeʼeraa tü Wiwüliakat. Jaʼitasü kasain jülüjain naaʼin, kojuteeshii naya wamüin (2 Tim. 2:24).

6. (1) ¿Kasa naaʼinraka Pablo süpüla nüküjain pütchi? (2) ¿Kasa waaʼinrajatka süpüla müin wakuwaʼipa maʼaka naaʼin Pablo?

⁶ ¿Kasache waaʼinrajatka eere wanee wayuu mojushiika amüin naashajaanüin amaa süchiki tü Wiwüliakat, nüchiki Maleiwa jee süchiki nukumajalain kasa süpüshuaʼa? Anasü waaʼinrüle tü naaʼinrakat Pablo, nnojotsü nüküjain wanee kasa mojushiika namüin na wayuukana. Jamüshijaʼa nia, soʼu nüküjain pütchi namüin na judíokana, nüküjain namüin jamaluʼuluin tü sümakat tü karaloʼuta Nüchikimaajatkat Maleiwa. Eekajasaʼa soʼu nüküjain pütchi namüin na atüjakana naʼakajee na griegokana chaa suluʼu tü kanüliakat Areópago, nnojotsü naashajeʼerüin namüin tü karaloʼuta Nüchikimaajatkat Maleiwa (Aluw. 17:2, 3, 22-31). ¿Kasa waaʼinrajatka süpüla müin wakuwaʼipa maʼaka naaʼin Pablo? Waashajaale nümaa wanee wayuu manoujainkai sünain tü Wiwüliakat, anasü nnojorüle waashajeʼerüin shia nümüin. Mojushiire namüin na wayuukana neʼnnüin sünain aashajeʼeraa tü Wiwüliakat, anasü weeʼiyatüle namüin tü sümakat sükajee serulaat jee sükajee tableta.

7. ¿Kasa waaʼinrajatka süpüla waaʼinrüin tü naaʼinrakat Pablo saashin 1 Corinto 9:20-23?

⁷ Wamülialaa naalin na wayuukana otta waapaja nanüiki. Anasü wayaawatüle saaʼu jamüin manoulaka na wayuukana (Prov. 20:5). Jülüjataa waaʼin tü naaʼinrakat Pablo. Mayaainjeʼe wayuuin judío nia, aküjashi nia pütchi namüin na nnojoliikana judíoin wanaapünaa sümaa tü nakuwaʼipakat, yootushi nia namaa na eekana ajatüin jee na nnojoliʼireekana ajatüin nüchiki Jeʼwaa otta süchiki tü Nünüikikat. Wayaawateere saaʼu jamüin nakuwaʼipa na wayuukana eere waküjain pütchi jee wamülialaweere naalin, eesüjaʼa süpüla wekirajaain süchiki nakuwaʼipa suluʼu tü karaloʼuta weitajakat jee niale wasakirüin wanee wawala eekai kakaliaichin aküjain pütchi (paashajeʼera 1 Corinto 9:20-23).

8. ¿Kasa waaʼinrajatka süpüla wountuin waküjain pütchi süchiki tü Wiwüliakat?

⁸ Naya wantajanaka anain na kettaakana süpüla  aapajaa nüchiki Maleiwa (Mat. 10:11, TNM). Wounteerü tia, wasakirüle naya jee waapajüle nanüiki. Jamüshijaʼa wanee wawala chejeʼewai Inglaterra, nüsakirüin na wayuukana kasain naaʼinrajatüin süpüla anajiraain naya sümaa naʼwayuuse, süpüla anain nepijia nachonnii jee süpüla eejiraain naya sümaa tü kasa mojusü aainjünakat namüin. Nasoutapa na wayuukana, maʼwaishi nia namüin: «¿Jamüsü saaʼin pümüin pütchikat tüü mayaapejeʼe kakaliairüin süshajünüin?». Suluʼujee tia, niiʼiyatüin suluʼu nüserulaatse waneirua wetsiikulo sümaa nnojoluin nüküjain suluʼujeejatüin shia tü Wiwüliakat.

9. ¿Jamüinjatü wanüiki namüin na wayuu nnojoliikana jamajanain amüin yootoo nüchiki Maleiwa?

⁹ ¿Kasache waaʼinrajatka süpüla sütanalüin naaʼin tü pütchikat na wayuu nnojoliikana jamajanain amüin yootoo nüchiki Maleiwa? Shia anaka aluʼu waashajaale namaa süchiki wanee kasa neʼraajaka. Eeshii wayuu kamalainkana amüin aashajawaa süchiki wüchii. Eesü süpüla müin wanüiki namüin: «Na akumajakana tü emiyoʼujiakat pütchi shia nekirajaaka anain sukuwaʼipa sücheʼe wüchii süpüla anain saapajia, akaataajaʼa na akumajakana tü ayujiakat ayaakuaa, shia nekirajaaka anain tü soʼukot. ¿Jamüsüche saaʼin pümüin? ¿Akumajuushiche sücheʼe tü wüchiikat sümaa tü soʼukot? ¿Jaraiche kakumalaka shia?». Süchikijee waapajüin nanüiki, eesü süpüla müin wanüiki namüin: «Wanaa sümaa shikirajaanüin achiirua jamüin sukuwaʼipa sukumajia sücheʼe wüchii jee soʼu, eeshiijaʼa wasakirüle suluʼu waaʼin jaralin kakumalain shia. Anasü maʼin saaʼin tamüin tü nüsakirakalü anain wanee wayuu nümaiwajachi, asakitshi nia sünain eere süpüla niʼrüin chi kakumalakai tü woʼukot jee eere süpüla naapüin nünüiki chi kakumalakai tü wacheʼekat. Naashin chia wayuukai, atüjasü wayuu nutuma chi kakumalakai tü wacheʼekat sümaa tü woʼukot. Eeshii científico wanaawakana anüiki nümaa chia wayuukai» (Sal. 94:9, 10). Süchikijee tia, eesü süpüla weeʼiyatüin wanee video namüin na wayuukana suluʼujee jw.org^® süpüshi tü kanüliakat «Opiniones sobre el origen de la vida», suluʼusü «Entrevistas y experiencias» (pünaʼla alijunaikiruʼu suluʼu PUBLICACIONES > VIDEOS). Otta eesü süpüla paapüin namüin tü poyeetokot ¿Es la vida obra de un Creador? jee shiale El origen de la vida. Cinco cuestiones dignas de análisis.

10. ¿Jarat tü wane sukuwaʼipainjatkat watuma süpüla yootuin waya namaa na nnojoliikana jamajanain amüin yootoo nüchiki Maleiwa?

¹⁰ Wainma na wayuu jülüjakana aaʼin aneein nakuwaʼipa watta kaʼi. Ayoʼujaapejeʼe naaʼin sutuma sajaʼttinneerüin tü Mmakat naashin. Naashin wanee wawala alapalaakai naaʼu na wawalayuukana chaa Noruega, na wayuu nnojoliikana jamajanain amüin yootoo nüchiki Maleiwa, shia naashajaweeka achiki tü alatakat sainküin mma. Maʼwaishi nia namüin na wayuukana süchikijee nüsaküin naya: «¿Anoutaweetche wakuwaʼipa mapeena? ¿Jaraiche chi anouteʼereechikai tia? ¿Niache wanee poliitiko nümaa wanee científico?  ¿Eetaapa chi atüjakai süpüleerua?». Süchikijee naapajüin nanüiki na wayuukana, nüküjain otta eesü naashajeʼerüle wanee wetsiikulo namüin aashajaaka süchiki anainjatüin sukuwaʼipa wayuu mapeena. Eeshii na kamalainkana amüin tü sümakat tü Wiwüliakat süchiki nnojoleerüin sajaʼttinnüin tü Mmakat otta eʼreenain anaa süpüla kaʼika süpüshuaʼa na anamiakana (Sal. 37:29; Ecl. 1:4).

11. (1) ¿Jamüsü wachajaainjatka sukuwaʼipa süpüla yootuin waya namaa na wayuukana? (2) ¿Kasa jülüjainjatka waaʼin naashin Pablo suluʼu Roma 1:14-16?

¹¹ Shia anaka aluʼu wachajaale sukuwaʼipa süpüla yootuin waya namaa na wayuukana süchiki tü kasa atanaleetkat naaʼin, jama naatawalin sukuwaʼipa wayuu. Tü kamalainkat sümüin wanee wayuu eesü mamalainre shia namüin na waneinnua. Eeshii na anashiika amüin yootoo nüchiki Maleiwa jee süchiki tü Wiwüliakat, eepejeʼe na ayoutakana tia, aluʼusaʼa shiale waashajaain achiki waneirua kasa palajana. Shiapejeʼe jülüjeein waaʼin yootuinjanain waya sümaa wayuu maʼleekalia (paashajeʼera Roma 1:14-16). Nnojo motuin waaʼin niain Jeʼwaa lotuin atuma nanoula na wayuu anamiakana (1 Cor. 3:6, 7).

12. ¿Kasa waaʼinrüinjatka süpüla waküjain pütchi namüin na nnojoliikana antapünaain suluʼu nekii eein chi Maleiwakai?

¹² Sainküinpünaa tü mmakat, eeshii nantiraale na wawalayuukana namaa wayuu chejeʼewalii Asia. Noʼutku naya wayuukana, suluʼujeejana mma eere süpülajünüin aʼyatawaa nümüin Maleiwa. Suluʼu waneirua mma chaa Asia, eeshii na wayuu nnojoliikana antapünaain suluʼu nekii eein wanee Maleiwa kakumajalakai tü kasakalüirua. Eeshii wayuu atüjaweekana aaʼu nüchiki Maleiwa, müshiijeseʼe nekirajaain sünain tü Wiwüliakat süküjünapa achiki namüin. Eepejeʼe waneinnua nnojoliikana ekirajaweein süchiki wanee kasa naataka suulia tü nanoujakalü anain. ¿Kasache waaʼinrajatka süpüla waküjain namüin nüchiki Maleiwa? Eeshii wawalayuu kakaliainnakana sünain aküjaa pütchi, yootushii namaa na wayuukana eepünaale naya, kachipünaasü naaʼin nakuwaʼipa. Shiasaʼa anashiipa namüin na wayuukana, naküjain namüin jamüin anaka nakuwaʼipa sutuma tü sümakat tü Wiwüliakat.

13. ¿Kasa eeka süpüla sütanalaain atuma naaʼin na wayuukana? (Piirakaa sümüin tü ayaakuaa sünainkat süta tü rewiisütakat).

¹³ Shia atanalaka naaʼin na wayuukana tü sümakat tü Wiwüliakat (Ecl. 7:12). Eesü wanee wawala chaa Nueva York aküjaka pütchi namüin na wayuu aashajaakana chino mandarín, anuu sünüiki: «Shia tachajaaka akuwaʼipa kachipünaainjatüin taaʼin nakuwaʼipa na wayuukana otta jülüjainjatüin taaʼin nanüiki. Taapüle süchiki jekenain naya antüin, tasakirüin naya süchiki jamüin nakuwaʼipa, nantüle sünain aʼyatawaa jee kamaneere wayuu namüin». Sutuma saaʼinrüin tia, yootusü shia namaa na wayuukana süchiki tü sümakat tü Wiwüliakat. Anuu tü sümakat tü wawalakat müleka anashiire shia namüin na wayuukana: «¿Kasache waaʼinrajatka süpüla anajiraain waya namaa na waneinnua? Anuu tü sümakat tü Wiwüliakat: ‹Chi wayuu aikaleʼerakai shikii tü atkawaakat müshi aka naaʼin chi wayuu ajütakai süchiki wüin eekai miyoʼuin, müshijeseʼe puʼunajachin süpülapünaa eein wanee atkawaa›. ¿Mojujiraweenache waya namaa na waneinnua waaʼinrüle tü sümakat tü pütchikat?» (Prov. 17:14). Sünainjee müin sukuwaʼipa tia watuma, wayaawateerü aaʼu jaralin anain süpüla wouyantüin amaʼanamüin.

14. ¿Kasa naaʼinraka wanee wawala chaa Asia süpüla nüküjain pütchi namüin na wayuu manoulakana nünain Maleiwa?

¹⁴ ¿Kasa anaka süpüla waküjain namüin na manoulakana nünain Maleiwa? Eeshi wanee wawala kakaliaichikai aküjain pütchi namüin na wayuu manoulasalii chakana Asia, anuu nünüiki: «Yaʼayaa, wanaa sümaa nüküjain wanee wayuu manoulain nia nünain Maleiwa, shia nüküjeeka achiki nnojoluin choʼujaain naʼwaajüin na maleiwayaashii sunoujakana anain wayuu. Taküjawalin namüin nnojoluin shiimain tü namaleiwasekat süka sukumajalain shia wayuu. Taashajeʼerawalin namüin Jeremías 16:20, anuu sünüiki: ‹¿Eeshiche süpüla nukumajüin wanee wayuu niyaakua  nümaleiwase? Nnojotsü maleiwain tü nukumajakat ayaakua›. Süchikijee tia tasakirüin naya kasain waaʼinrajatüin süpüla watüjaain saaʼu jaralin chi Maleiwa shiimainshikai. Jülüjasü taaʼin jamüin nasoutia otta taashajeʼerüin namüin Isaías 41:23: ‹Jüküja süchiki tü kasa alatajatkat mapeena, watüjaaiwa saaʼu shiimain maleiwain jia›. Taashajeʼerüin namüin wanee pütchi nikeraajüinjatka Jeʼwaa».

15. ¿Kasa watüjaka sünainjee tü naaʼinrakat wanee wawala chejeʼewai wüinpümüin sünain Asia?

¹⁵ Jülüjataa waaʼin kasain naaʼinrüin wanee wawala chejeʼewai wüinpümüin sünain Asia nuuyantapa namaʼanamüin na wayuukana. Anuu nünüiki: «Shia taashajeʼeraka namüin pütchi eekai anain maʼin suluʼujee tü Wiwüliakat, tü pütchi ekeraajüitpakat otta anain maʼin sukumajia tü jolotsükalüirua sümaa waneirua kasa chakat iipünaa nutuma Jeʼwaa. Süchikijee tia, taküjain namüin eein wanee Maleiwa kakumajalakai kasa süpüshuaʼa sümaa nütüjain maʼin. Anashiipa namüin na wayuukana shiimain eein chi Maleiwakai, taashajeʼerüin namüin tü sümakat tü Wiwüliakat nüchiki Jeʼwaa».

16. Saashin Hebreokana 11:6, ¿kasa waaʼinrajatka süpüla wekirajüin na wayuukana sünain anoujaa tü sümakat tü Wiwüliakat otta süpüla neʼitaain naaʼin nünain Maleiwa?

¹⁶ Wekirajüle sünain tü Wiwüliakat na wayuu manoulakana, shia anaka aluʼu ayatüle wekirajüin naya süpüla nanoujain sünain shiimain eein wanee Maleiwa kakumajalakai tü kasakalüirua (paashajeʼera Hebreokana 11:6). Wekirajüinjana naya süpüla nanoujain sünain tü sümakat tü Wiwüliakat. Makalaka anain wekirajüle naya kojuyatua sünain wanee pütchi. Soʼu wekirajaain namaa, eesüjaʼa choʼujaale wapansaajüin namüin jamüin shiimainka Nünüikin Maleiwa tü Wiwüliakat. Eesü süpüla shiain wekirajaain namaa süchiki tü pütchi ekeraajüitpakat, pansaain sünüiki tü Wiwüliakat sümaa tü namakat na cientiificokana jee sümaa tü namakat na ekirajaakana süchiki kasa alatüirü otta anain maʼin tü sümakat tü Wiwüliakat.

17. ¿Kaseerü wakaalinjaka anain na wayuukana aire wapüla naya?

¹⁷ Wakaalinjain na wayuukana süpüla noushikajaain nüchiirua Kürisüto wanaa sümaa alin naya wapüla, jaʼitashii kanoulain jee manoulain naya (1 Cor. 13:1). Wekirajüinjana na wayuukana sünain tü Wiwüliakat süpüla natüjaain saaʼu alin naya nüpüla Maleiwa otta alinjachin nia napüla. Wainma wayuu woutiisaka juyawai süka alin Maleiwa napüla mayaainjeʼe nnojoluin paala jamajatüin namüin yootoo nüchiki jee manoulaleein naya nünain. Shiakalaka anain jülüjale waaʼin eejeenain na anoujakana nünain Jeʼwaa jee anasü kachipünaale waaʼin sukuwaʼipa wayuu maʼleekalia sümaa alin naya wapüla. Jülüja waaʼin nanüiki otta wayaawata saaʼu jamüin makaʼa nakuwaʼipa. Neʼrüinjatü anain wakuwaʼipa süpüla noushikajaain süchiirua nukuwaʼipa Kürisüto.