1. ¿Kasa naaʼinraka Jehová süchikijee kaainjalain Adán sümaa Eva? (Génesis 3:15).

 SÜCHIKIJEE kaainjalain Adán sümaa Eva niweetiramaatüin Jehová wanee pütchi anainjatka atuma nakuwaʼipa na naikeyuukana, shia tü sümakat Génesis 3:15, TNM (paashajeʼera).

2. ¿Jamüsü anaka maʼin tü pütchi aküjünakat suluʼu Génesis 3:15?

² Wousüta anainrü tia pütchikat suluʼu tü palajatkat karaloʼuta suluʼuka tü Bibliakat. Pansaasü tü sümakat sümaa tü sümakat tü wane karaloʼutairua eeka suluʼu tü Bibliakat. Sutuma kasapüin wanee karaloʼuta nnojotsü ojunujaain tü süpanakalüirua, kottusü süpüshuaʼa. Tü pütchi aküjünakat suluʼu Génesis 3:15 müsü aka saaʼin süsapü tia karaloʼutakat süka kottuin sutuma tü pütchi aküjünakat suluʼu tü Bibliakat. ¿Kasa saashajaaka maʼin achiki tü Bibliakat? Aashajaasü süchiki nuluwataain Maleiwa wanee oʼtteʼerüinjachikai wayuu, chi ajaʼttirüinjachikai chi Yolujaakai namaa na nümaajanakana. * Anataʼaleesüjaʼa maʼin tia pütchikat namüin na aikana apüla Jehová.

3. ¿Kasa wekirajaainjatka anain sünain ekirajaayakat tüü?

³ Sünain ekirajaayakat tüü wekirajaweerü anain waneirua pütchi asakinnaka süchiirua tü sümakat Génesis 3:15, shia tüü: ¿Jaralii na saashajaakana achiki tia pütchikat? ¿Jamüsü sukuwaʼipa shikeraajia? ¿Jamüsü anaka wakuwaʼipa sutuma?

4. (1) ¿Jarat tü wüikat? (2) ¿Jamüsü watüjaaka saaʼu tia?

⁴ Suluʼu Génesis 3:14, 15 aashajaasü süchiki wanee wüi, süchiki suuʼuliwoʼu tia wüikat, süchiki wanee jierü otta süchiki  suuʼuliwoʼu tia jietkat. Sükajee tü Bibliakat eesü süpüla wayaawatüin saaʼu jaraliin naya. * ¿Jarat tü wüikat? Nnojotsü süpüla wülin shia, jama nnojoluin süpüla shiyaawatüin saaʼu süsalainjatüin saainjala nutuma Jehová, tü nümakat suluʼu tü apainkat Edén. Saashin Alateetkat Mapeena 12:9 nia chi wüi nümaiwajachikai, chi Satanás münakai. ¿Jaraliikaʼa joo na suuʼuliwoʼukana tia wüikat?

5. ¿Jaralii na suuʼuliwoʼukana tü wüikat?

⁵ Eesü saashajaʼawaire tü Bibliakat süchiki nüikeyuu wanee wayuu jaʼitashii nnojoliin nüpüshin naya. Müshii nüikeyuukai naaʼin sükajee wanaawain tü nakuwaʼipakat jee tü jülüjakat naaʼin wanaa nümaa. Müsüjeseʼe suuʼuliwoʼuin tü wüikat na aapiee eʼrüliijaakana wayumüin, na wayuu ayoutakana Jehová otta na ayoutakana na aʼyataakana nümüin Maleiwa maʼaka naaʼinrüin shia Satanás. Noʼutku naya aapieekana, naya na ashakatakana iipünaajee nükalioʼu Noé otta na wayuu mojulaakana ashatakana nukuwaʼipa chi Yolujaakai, chi nashikai (Gén. 6:1, 2, TNM; Juan 8:44; 1 Juan 5:19; Jud. 6).

6. ¿Jamüsü watüjaaka saaʼu nnojoluin shiain Eva tü jierü aashajaanakalü achiki suluʼu Génesis 3:15?

⁶ Waashajaa joo süchiki jaralüin tü jietkat. ¿Shiachejeʼe Eva? Nnojotsü shiain. Süküjain Génesis 3:15 nuchuwerajaajeerüin shikii tü wüikat suuʼuliwoʼu tü jietkat. Wekirajaaitpa anain niain Satanás tü wüikat, chi aapiee mojulaakai maʼin. Nnojoikalaka süpüla niain wanee suuʼuliwoʼu Eva ajaʼttirüinjachikai Satanás, jama wayuujeechin nia sümaa nnojoleerüin lotuin nukuwaʼipa. ¿Jaraikaʼa joo chi ajaʼttirüinjachikai Satanás?

7. Sünainjee tü sümakat Alateetkat Mapeena 12:1, 2, 5, 10, ¿jamüsü wayaawataka saaʼu jaralüin tü jierü aashajaanakalü achiki suluʼu Génesis 3:15?

⁷ Tü karaloʼutakat Alateetkat Mapeena süküjain jaralüin tü jierü saashajaakalü achiki  Génesis 3:15 (paashajeʼera Alateetkat Mapeena 12:1, 2, 5, 10). Nnojotsü wayuuin tü aashajaanakalü achiki yala, shiyaawase neʼe. Suupünaa suuʼui eeshi chi kashikai jee sünain shikii eesü wanee kotse kanainsü 12 jolotsü. Jemeyutkalaka shia nümaa wanee joʼuu, niajaʼa Jesús namaa na aluwataainjanakana wanaa nümaa iipünaajee. Süka naluwataainjanain iipünaajee, tia jietkat iipünaajeejatü shia. Müsüjeseʼe shiain tü jietkat na aapiee waneepiakana nümaa Jehová (Gal. 4:26, TNM).

8. (1) ¿Jarai chi shikiishikai suuʼuliwoʼu tü jietkat? (Génesis 22:15-18). (2) ¿Joujachi shikiishin nia suuʼuliwoʼu tü jietkat?

⁸ Sutuma tü Nünüikikat Maleiwa wayaawata aaʼuchi jaralin chi shikiishikai maʼin suuʼuliwoʼu tü jietkat. Süküjain niainjachin wanee nülüin Abrahán (paashajeʼera Génesis 22:15-17; 22:18, TNM). Ekeraajüsü tia pütchikat süka niain Jesús wanee nülüin Abrahán (Luc. 3:23, 34). Suuʼuliwoʼu tia jietkat pülashinjachi maʼin suulia wayuu süpüla najaʼttirüinjachin Satanás. Müsüjeseʼe süntüin tü nüpülainkat Maleiwa naaʼu Jesús wanaa sümaa 30 nuuyase, niakalaka chi Nüchonkai Maleiwa suluʼujee tia. Soʼu kaʼikat tia, nia shikiishikai suuʼuliwoʼu tü jietkat (Gal. 3:16). Süchikijee outuin nia otta süsoʼiraain naaʼin, kojutushi nia nutuma Maleiwa otta naapüin nümüin laülawaa chaa iipünaa jee mmoluʼu. Sutuma tia eesü süpüla najaʼlajeʼerüin tü kasa mojusü naaʼinrakat chi Yolujaakai (Heb. 2:7, TNM; Mat. 28:18; 1 Juan 3:8).

9, 10. (1) ¿Jaralii na wane suuʼuliwoʼukana tü jietkat? (2) ¿Jamüshii süpüla naneekünüin suuʼuliwoʼu tü jietkat? (3) ¿Kasa wekirajaainjatka anain jooluʼu?

⁹ Eejeena wane suuʼuliwoʼu tü jietkat. Chi aluwataaushikai Pablo nüküjain jaraliin na wane suuʼuliwoʼukana tü jietkat sükajee tü pütchi nüküjakat namüin na anoujashii judíokana otta na nnojoliikana judíoin chainjanakana iipünaamüin, müshi nia: «Saaʼu nüpüshinapain jia Cristo, nuuʼuliwoʼu [nüikeyuu, TNM] maʼi jia Abraham, je kamüinjeena jia nütüma Cristo tü kasa anasü nüküjakat achiki Maleiwa nümüin Abraham» (Gal. 3:28, 29). Nüneekapa Jehová wanee anoujashi sükajee tü nüpülainkat, niashi wanee suuʼuliwoʼu tü jietkat. Müshijeseʼe niain Jesucristo namaa na 144.000 aluwataainjanakana nümaa na suuʼuliwoʼukana tü jietkat (Alat. Map. 14:1). Napüshuaʼa nayakana nachajaain sukuwaʼipa süpüla wanaawain tü jülüjakat naaʼin jee süpüla nashatüin tü nukuwaʼipakat Jehová, chi Nashikai.

¹⁰ Watüjaaitpa aaʼu jaraliin na saashajaakana achiki Génesis 3:15, wekirajaainjatü anain jooluʼu tü naaʼinrakat Jehová süpüla nikeraajüin nünüiki otta jamüin anaka wakuwaʼipa sutuma tia.

11. ¿Kasa saaʼinraka tü wüikat süpüla süchotüin shiineʼe nuuʼui chi suuʼuliwoʼukai tü jietkat?

¹¹ Saashin Génesis 3:15, tü wüikat süchoteerü shiineʼe nuuʼui chi suuʼuliwoʼukai tü jietkat. Ekeraajüsü tia wanaa sümaa nootuin Satanás na judíokana otta na romanokana süpüla noʼutuin naaʼin chi Nüchonkai Maleiwa (Luc. 23:13, 20-24). Eʼikaale shiineʼe nuuʼui wanee wayuu alatüsü maʼaka jeʼra kaʼi süpüla nükoyojuin nüchikuaʼa. Akaʼaya Jesús alatüsü maʼaka jeʼra kaʼi jimatüin nia, jama outuin nia soʼu apünüin kaʼi (Mat. 16:21).

12. ¿Joujeerü otta jameerü sukuwaʼipa süpüla süchuwerajaanüin shikii tü wüikat?

¹² Süpüla shikeraajüin tü sümakat Génesis 3:15, asoʼiraainjatü naaʼin Jesús. Saashin tia pütchikat chi suuʼuliwoʼukai tü jietkat nüchuwerajaainjatü shikii tü wüikat. Müsüjeseʼe süshatüinjatüin sülioʼu shiineʼe nuuʼui Jesús. Asoʼiraasü naaʼin süchikijee outuin nia soʼu  apünüin kaʼi, meʼrujusai nia otta nnojoleechi outuin nia piantua. Kettaapa sükalia nutuma Maleiwa, oʼutuneechi aaʼin Satanás nutuma Jesús (Heb. 2:14). Na aluwataainjanakana nümaa Cristo nakaalinjeechi nia süpüla najaʼttirüinjanain na nüʼünüükana Maleiwa, na suuʼuliwoʼukana tü wüikat (Alat. Map. 17:14; 20:4, 10). *

13. ¿Jamüsü anaka wakuwaʼipa sutuma shikeraajüin tü sümakat Génesis 3:15?

¹³ Piale wanee aʼyataai nümüin Maleiwa, anasü pukuwaʼipa sutuma shikeraajüin tü sümakat Génesis 3:15. Ashakatüshi Jesús mmapaʼamüin suluʼu wayuuin nia otta nüshatüin maʼin nukuwaʼipa chi Nüshikai (Juan 14:9). Nükaalinjainña waya sükajee nukuwaʼipa süpüla weʼraajüin Jehová otta süpüla alin nia wapüla. Nükaalinjain waya sükajee tü nikirajakalü anain otta sükajee tü naaʼinrakat süpüla nuʼunirüin nakuwaʼipa na anoujashiikana maaʼulu. Nikirajüin waya süchiki tü wakuwaʼipainjatkat süpüla talatüin Jehová wamaa. Anasia wakuwaʼipa sutuma outuin Jesús, tü shiyaawasekat süchotünüin nuuʼui. Soʼu süsoʼiraain naaʼin, antüshi nia nümaʼanamüin Maleiwa süpüla naapüin sujutu nüsha amülaka süpüla nülaʼajaain tü waainjalakat woulia (1 Juan 1:7).

14. ¿Jamüsü watüjaaka saaʼu nnojoleerüin shikeraajamaatüin tü pütchi nüküjakat Jehová suluʼu tü apainkat Edén?

¹⁴ Tü pütchi nüküjakat Jehová suluʼu tü apainkat Edén nnojoluinjatü ekeraajamaatüin shia, alatüinjatü wainma juya süpüla kooʼuliwoʼuinjatüin tü jietkat, süpüla nükotchirüinjanain chi Yolujaakai na nümaajanakana otta süpüla paʼünüüwajiraainjatüin suuʼuliwoʼu tü wüikat sümaa suuʼuliwoʼu tü jietkat. ¿Jamüsü anaka watüjaale saaʼu tia? Süpülajatü eejüin waaʼin. Na wayuu nuluwataakana aaʼu Satanás aʼürülaajeena naya nanain na aʼyataakana nümüin Jehová. Shiaʼaya tia nüküjaka Jesús namüin na nikirajüinkana kojuya juya mapa (Mar. 13:13; Juan 17:14). Wayaawatakalaka saaʼu shikeraajüin tia pütchikat, shialeekajaʼa maaʼulu soʼunnaa tü 100 juya alatüitpakat. ¿Jamüsü waküjaka tia?

15. (1) ¿Jamüshii naʼürülaaka wanain na wayuukana maaʼulu? (2) ¿Jamüshii nnojoliinjanaka mmoluin waya neema Satanás?

¹⁵ Aikalaashi Jesús sünain aluwatawaa chaa iipünaa soʼu 1914 jee süchikijeechon tia nüjünajaain Satanás iipünaajee. Müinmaʼa yaa naʼatapajüin chi Yolujaakai nükalia süpüla nuʼutunuin naaʼin, nnojoishi süpüla jalapünaainjachin nia (Alat. Map. 12:9, 12). Nnojoipejeʼe jimatüin nia sümaʼinruʼu naʼatapajüin tia kaʼikat. Süka jashichishaatain maʼin nia, ashutushi nia naaʼu na aʼyataakana nümüin Maleiwa (Alat. Map. 12:13, 17). Müshiijeseʼe naʼürülaain wanain na wayuukana maaʼulu. Nnojoliinjanapejeʼe mmoluin waya neema Satanás namaa na nümaajanakana. Yalayalainjatü waaʼin maʼaka naaʼin chi aluwataaushikai Pablo, chi makai anüiki: «Jaʼitairü wainmain tü waʼünüükalüirua saaliijee tü wanoulakat nünain Cristo, shiimüin wayamüleerüin shia, sükajee niain Maleiwa akaaliijüin waya» (Roma 8:31). Eekalaka süpüla weʼitaain waaʼin nünain Jehová jama weʼrüin shikeraajüin süpüshi tü pütchi aküjünakat suluʼu Génesis 3:15.

16-18. ¿Jamüsü naaʼin Curtis, Ursula otta Jessica sutuma nayaawatüin saaʼu tü sümakat Génesis 3:15?

¹⁶ Sutuma tü pütchi nümakat Jehová suluʼu Génesis 3:15 süchecherüin waaʼin soʼunnaa tü müliaa weʼrakat. Anuu nünüiki Curtis wanee wawala misioneero chakai Guam: «Eesü kasa alatawaika tamüin otta müshi tayüülajaweekai aaʼin sünain anoujaa nünain Jehová. Sülatapa  tia tamüin ayatüsia teʼitaain taaʼin nünain Jehová sutuma jülüjain taaʼin tü pütchi aküjünakat suluʼu Génesis 3:15». Naʼatapajüin maʼin Curtis tü kaʼi najaʼttirüinjatkalü oʼu Jehová tü kasa müliakalü atuma waaʼin.

¹⁷ Ursula shia wanee wawala kepiaka chaa Baviera, tü chakat Alemania. Sütüjaa aaʼu shiimain nünüikin Maleiwa tü Bibliakat sükajee shiyaawatüin saaʼu tü aküjünakat suluʼu Génesis 3:15. Ponusü maʼin saaʼin süka wanaawain süpüshuaʼa tü pütchi aküjünatüjütkalia achiki suluʼu tü Bibliakat sümaa tü sümakat Génesis 3:15. Anuu sooʼomüin sünüiki: «Sütanalüin taaʼin süka nüchajaamaatüin sukuwaʼipa Jehová süpüla nnojoluinjatüin sajaʼttüin wayuu saalinjee naainjala Adán».

¹⁸ Anuu sünüiki Jessica wanee wawala chejeʼewat Micronesia: «Sotusü taaʼin jamüin taaʼin wanaa sümaa tayaawatüin saaʼu shiimain tü tekirajaakalü anain suluʼujee tü Bibliakat. Tayaawata aaʼu shikeraajüin tü sümakat Génesis 3:15. Sutuma tia tayaawata aaʼulu nnojoluin shiain keeʼireein naaʼin Jehová weʼrüin tü müliaa weʼrakat maaʼulu. Tatüjaa aaʼulu anain maʼin wakuwaʼipa maaʼulu otta aneerüin shia mapeena süka waʼyataain nümüin Jehová».

19. ¿Jamüsü watüjaaka saaʼu shikeraajeerüin süpüshuaʼa tü sümakat Génesis 3:15?

¹⁹ Wekirajaaitpa anain shikeraajüin shiʼipaʼaya tü sümakat Génesis 3:15. Watüjaaitpa aaʼu jaraliin na suuʼuliwoʼukana tü jietkat otta jaraliin na suuʼuliwoʼukana tü wüikat. Nia Jesús chi shikiishikai suuʼuliwoʼu tü jietkat, chi ashatakai sülioʼu shiineʼe nuuʼui. Aluwataaichipa nia chaa iipünaa, pülashi maʼin nia otta nnojoleechi outuin nia piantua. Maʼaka shikeraajüitpain süpüshi tü sümakat Génesis 3:15, watüjaa aaʼu süchuwerajaaneerüin shikii tü wüikat. Aneena na waneepiakana nümaa Maleiwa najaʼttinnapa Satanás. Sümaʼinruʼu süntüin tia kaʼikat nnojo sümalajaain waaʼin, weʼitaa waaʼin nünain chi Wamaleiwasekai. Sükajee suuʼuliwoʼu tü jietkat, aneena nutuma Jehová napüshuaʼa na wayuukana sainküinpünaa mmakat (Gén. 22:18, TNM).