1. ¿Jamüsü anaka eejüle waaʼin süpülapünaa sülatalaʼa sümüin wanee kasa?

 JAMÜSÜJAʼA eejüle naaʼin na wayuukana süpülapünaa sukutkujaain mma otta eein wawai, eesü süpüla katüin noʼu otta nakaalinjain na waneinnua süpüla noʼttaainjanain. «Eejüle saaʼin wayuu süpülapünaa sülatalaʼa sümüin wanee kasa, eesü süpüla katüin soʼu», müsü wanee organización akaalinjaka wayuu chakat Europa.

2. ¿Jamüsü eejüinjatka waaʼin süpülapünaa suʼttuin tü müliaa miyoʼukat? (Mateo 24:44).

² Oʼttalaa meerü tü müliaa miyoʼukat (Mat. 24:21). Jamüsüjaʼa sukutkujaale tü mmakat nnojotsü saapirüin wayuu. Eekajasaʼa wayakana, eejüsü waaʼin süpüla tü müliaa miyoʼukat süka watüjaain saaʼu sünteerüin shia. Eetaairüjaʼa maʼaka 2.000 juya alatüitpaka süchikijee nüküjain Jesús namüin na nikirajüinkana eejüinjatüin naaʼin süpüla tia kaʼikat (paashajeʼera Mateo 24:44). Waaʼinrüle tü nümakat Jesús, katsüinjeerü waaʼin soʼunnaa tia kaʼikat otta wakaalinjeena na waneinnua süpüla katsüin naaʼin (Luc. 21:36).

3. ¿Jamüsü choʼujaajeetka wachecherüin waaʼin, wamüliajiraain jee aijiraain waya soʼunnaa tü müliaa miyoʼukat?

³ Eesü apünüinsü kasa waaʼinrajatka süpüla eejüin waaʼin süpüla tü müliaa miyoʼukat. Waluwataanüle sünain aküjaa tü pütchi süliainjatkat wayuu jee nayoutule tü pütchi wamüinjatkat, ¿kasa waaʼinrajatka süpüla wountuin waküjain tia pütchikat? (Alat. Map. 16:21). Choʼujaasü wachecherüin waaʼin süpüla woonooin nümaa Jehová otta süpüla weʼitaain waaʼin sünain naaʼinmajeenain waya. ¿Kasa waaʼinrajatka weʼrüle amüloulin noulia na wawalayuukana süpüshuaʼa tü kasa namaʼanakat? (Hab. 3:17, 18). Choʼujaashii wamüliajüin naya süpüla waapüin tü kasa choʼujaakat namüin. ¿Jameerü wakuwaʼipa namaa na wawalayuukana kepiajiraale waya namaa suluʼu wanee piichi joʼuuchon saaʼujee nashutuin waaʼu na sülaülashiikana mma? (Ezeq. 38:10-12). Choʼujaashii aijiraain waya namaa.

4. ¿Kasa ayatüinjatka waaʼinrüin saashin tü Bibliakat?

 ⁴ Saashin tü Bibliakat choʼujaasü maʼin wachecherüinjatüin waaʼin, wamüliajiraainjanain jee aijiraainjanain waya. Müsü Lucas 21:19: «Oʼttaajeena jia jüchecherüle jaaʼin». Müsü sünüiki Colosas 3:12: «Jümülialaa [jaaʼin] naalin na waneinnua». Otta 1 Tesalónica 4:9, 10, müsü mayaa: «Nikirajüin jia Maleiwa süpüla aijiraainjanain jia. [...] Tawalayuu, shiapejeʼe anain jaaʼinraleere maʼin tia». Jaʼyasü naaʼu na anoujashiikana naaʼinrüin tü nümakat Pablo, ayatüinjatpejeʼe naaʼinrüin tia waneepia. Shiainjatü waaʼinraka tia. Wekirajaa süchiki tü naaʼinrakat naya na anoujashiikana otta tü waaʼinrajatkat süpüla washatüin nakuwaʼipa. Waaʼinrüle tia, eejeerü waaʼin süpüla tü müliaa miyoʼukat.

5. ¿Kasa naaʼinraka na anoujashii namaiwajanakana süpüla nachecherüin naaʼin?

⁵ Choʼujaasü nachecherüin naaʼin na anoujashii namaiwajanakana soʼunnaa tü alatakat namüin (Heb. 10:36). Neʼrüin tü müliaa neʼrakat na wayuu eejanakana nakalioʼu. Eesiaʼaya tü müliaa neʼrakat saaʼujee tü nanoulakat, müliashii naya natuma nekiipüʼü na judíokana, natuma na aluwataakana saaʼu Roma otta natuma na napüshi manoujainkana (Mat. 10:21). Ekirajüshii alawaa na anoujayaashiikana shiiʼiree nnojoliin paaʼinwaain naya, müsüjeseʼe nayoutuinjatüin tia alawaakat na anoujashiikana (Aluw. 20:29, 30). Soʼunnaa tia ayatüsia nachecherüin naaʼin na anoujashiikana süpüla waneepiain naya nümaa Maleiwa (Alat. Map. 2:3). Nountuin tia süka jülüjain naaʼin nakuwaʼipa na wayuu namaiwajanakana, na achechetkana aaʼin soʼunnaa müliaa maʼaka naaʼin Job (Sant. 5:10, 11). Nachuntuin nümüin Jehová katsüinwaa aaʼin (Aluw. 4:29-31). Jülüjasü naaʼin neʼreenain kasa anasü nutuma chi Maleiwakai saaʼujee nachecherüin naaʼin soʼunnaa müliaa (Aluw. 5:41).

6. ¿Kasa watüjaka sünainjee tü saaʼinrakat Merita süpüla süchecherüin saaʼin soʼunnaa müliaa?

⁶ Müshiʼiya wayakana, eesü süpüla wachecherüin waaʼin soʼunnaa müliaa müleka jülüjale waaʼin nakuwaʼipa na wayuu saashajaakana achiki tü Bibliakat otta nachiki na wayuu saashajaakana achiki tü karaloʼuta wamaʼanakat. Shiaʼaya saaʼinraka tia wanee wawala kanüliaka Merita, chejeʼewat shia Albania. Ayatüsia süchecherüin saaʼin mayaainjeʼe müliain maʼin natuma na süpüshikana saaʼujee sunoujain. Müsü shia: «Antüsü suluʼumüin taaʼin taashajeʼerapa tü nüchikimaajatkat Job. Eʼrüshi maʼin nümüliala otta nnojotsü nütüjaain saaʼu jaralin kasirüin tü müliaa niʼrakat. ‹Jaʼitaichi outuin taya, ayatajachia neʼe taya nümaa Jehová›, müshi nia suluʼu Job 27:5. Sünainjee tia, jülüjasü taaʼin nnojoluin antapünaain tü müliaa teʼrakat sümaa tü müliaa niʼrakat Job. Tatüjaa aaʼuchi jaralin kasirüin tü müliaa teʼrakat».

7. Mayaainjeʼe nnojoluin piʼrüin müliaa maaʼulu, ¿kasa puchuntawalinjatka nümüin Jehová?

⁷ Wanee kasa waaʼinrajatka süpüla wachecherüin waaʼin shia waküjale nümüin Jehová tü kasa shapaakalü atuma waaʼin (Filip. 4:6; 1 Tes. 5:17). Mayaainjeʼe nnojoluin piʼrüin müliaa maaʼulu, ¿achuntushiche pia kaalinwaa nümüin Jehová jashichire pia jee nnojorüle pütüjaain saaʼu tü paaʼinrajatkat? Puchuntawaire kaalinwaa nümüin Jehová süpüla tü paaʼinrajatkat soʼukaiwai, paaʼinreʼeria tia mapeena piʼrapa pümüliala. Piyaawateetkalaka saaʼu nükaalinjeechin pia Jehová soʼu tü kaʼi choʼujaakalü oʼu shia pümüin (Sal. 27:1, 3).

8. ¿Jamüsü watüjaaka saaʼu wachechereerüin waaʼin süntapa tü müliaa miyoʼukat wachecherüle waaʼin maaʼulu? (Santiago 1:2-4; piirakaa sümüin tü ayaakuaakat).

⁸ Wachecherüle waaʼin soʼunnaa tü müliaa weʼrakat maaʼulu, wachechereʼeria waaʼin soʼunnaa tü müliaa miyoʼukat (Roma 5:3). Wainma na wawalayuu jülüjakana aaʼin eein süpüla nachecherüin naaʼin soʼunnaa wanee müliaa saaʼujee tü müliaa neʼrüitpakat. Nayaawatapa  saaʼu nükaalinjain naya Jehová, katchinjeerü maʼin nanoula süntapa süchikuaʼa wanee müliaa nanainmüin (paashajeʼera Santiago 1:2-4). Eesü wanee wawala kanüliaka Mira, pürekutsoot shia jee kepiasü shia chaa Albania. Jülüjasü saaʼin shiʼrüin maʼin müliaa suulialeʼeya wayuu. Shiyaawatapejeʼe saaʼu nükaalinjain shia Jehová sünain süpüshuaʼa tü kasa alatakat sümüin soʼunnaa tü 20 juya alatüitpakat. «Wainmatuairü nükaalinjain taya Jehová soʼunnaa tü müliaa teʼrakat. ¿Jamüsü tooʼulaainjatka jooluʼu suulia aʼyatawaa nümüin?», maa müsü saaʼin. Akaʼaya piakai, anasü jülüjale paaʼin süpüshuaʼa tü kasa naaʼinrakat Jehová püpüleerua süpüla püchecherüin paaʼin soʼunnaa tü müliaa piʼrakat. Nnojotsü motuin naaʼin Jehová tü kasa paaʼinrakat süpüla püchecherüin paaʼin soʼunnaa wanee müliaa. Saaʼujee paaʼinrüin tia, eʼreechi pia kasa anasü nutuma (Mat. 5:10-12). Sutuma pütüjaichipain süpüleerua püchecherüin paaʼin soʼunnaa müliaa, paaʼinreʼeria tia süntapa tü müliaa miyoʼukat.

9. ¿Kasa naaʼinraka na anoujashii chajanakana Antioquía süka sümülialaain naaʼin naalin na anoujashii chajanakana Judea?

⁹ Jülüjataa waaʼin tü alatakat namüin na anoujashii chajanakana Judea soʼunnaa süntüin nanainmüin wanee jamü aisü maʼin. Nayasaʼa na wawalayuu chajanakana Antioquía suluʼu tü mmakat Siria, amülialaasü naaʼin naalin natüjaapa saaʼu tü alatakat namüin, eekalaka tü kasa naaʼinrakat napüleerua. «Nakumajüin sukuwaʼipa süpüla naluwataainjatüin wanee kasa akaalinjiainjatka na nawalayuu chajanakana kepiain Judea. Naaʼinrüin tia wanaapünaa sümaa tü kasa eekat namaʼana» (Aluw. 11:27-30, TNM). Mayaainjeʼe wattajatüin nepia naya anoujashiikana, ayatüsia nachajaain sukuwaʼipa na anoujashii chajanakana Antioquía süpüla nakaalinjain naya (1 Juan 3:17, 18).

10. ¿Kasa waaʼinrajatka süpüla wamüliajüin na wawalayuu eʼrakana müliaa? (Piirakaa sümüin tü ayaakuaakat).

¹⁰ Eeshii süpüla wamüliajüin na wawalayuu eʼrakana müliaa. Anuu tü waaʼinrajatkat süpüla wakaalinjain naya: waküja namüin na laülaashiikana wakaalinjeein, wasülaja nneerü süpüla ayatüin saainjünüin tü aʼyatawaakat nümüin Maleiwa sainküinpünaa mmakat otta woʼuraaja napüleerua (Prov. 17:17). b Soʼu 2020, alatüsü suulia 950 Comités de Socorro akumajünaka süpüla nakaalinjünüin na wawalayuukana soʼunnaa tü ayuuliikat COVID-19. Waapüin maʼin analuʼutka namüin na wawalayuu akaalinjakana. Saaʼujee namüliajüin na wawalayuukana, asülajüshii naya kasa namüin, nakatsüinrüin tü nanoulakat, nakumajüin nepia jee shiale nanoutuin shia, eeshii na akumajakana Piichi Outkajaalee (anasü paashajeʼerüle 2 Corinto 8:1-4, TNM).

11. ¿Jamüshii nuʼwaajünaka Jehová sünainjee wamüliajiraain?

¹¹ Ponusü maʼin naaʼin na wayuukana neʼrapa wakaalinjain na wawalayuu eʼrakana namüliala. Jülüjataa waaʼin tü naaʼinrakat wanee wayuu napüleerua na wawalayuukana soʼu 2019. Soʼunnaa tia ajaʼttaleesia wanee Piichi Outkajaalee chajatka Bahamas sutuma tü wawai kanüliakat Dorian. Wanaa sümaa nakumajüinjatüin na wawalayuukana tü Piichi Outkajaaleekat, nasakirüin wanee wayuu kuʼyamaikai piichi süchiki jeʼrainjatüin sujuʼitaka aaʼu waneirua kasa choʼujaaka sümüin tia piichikat. Müshi nia: «Takaalinjeena jia. Taapeerü jümüin süpüshuaʼa tü kasa choʼujaajeetkat süpüla sukumajüin tü piichikat jee nnojoleerü tachekajüin jümüin tü taʼyataainkat. Ponusü maʼin taaʼin süka teʼrüin aijiraain maʼin jia». Wainma na wayuu nnojoliikana eʼraajüin nukuwaʼipa Jehová, jülüjapejeʼe naaʼin tü wakuwaʼipakat sünain aʼwaajaa Jehová. Talatüshii maʼin  waya süka narütkaain na wayuukana nünainmüin chi Maleiwa amüliajüikai sünainjee tü waaʼinrakat napüleerua na wawalayuukana (Éf. 2:4, TNM).

12. ¿Jamüsü eejeetka waaʼin süpüla tü müliaa miyoʼukat wamüliajiraale maaʼulu? (Alateetkat Mapeena 13:16, 17).

¹² ¿Jamüsü choʼujaajeetka wamüliajiraain soʼunnaa tü müliaa miyoʼukat? Saashin tü Bibliakat na wayuu nnojoliikana namaain na sülaülashiikana mma, mülieena naya atumawaa maaʼulu otta soʼunnaa tü müliaa miyoʼukat (paashajeʼera Alateetkat Mapeena 13:16, 17). Eesüjaʼa choʼujaajeerüle saapünüin namüin na wawalayuukana tü kasa choʼujaakat namüin. Nüntapeena Jesús süpüla süsalainjatüin nutuma saainjala wayuu, ¿aashin wacheküin niʼrüin waya wamüliajiraain? Waaʼinrüle tia, aapüneerü wamüin «tü kasa anasü eejeetkat sutuma nuluwataain Maleiwa» (Mat. 25:34-40, TNM).

13. ¿Kasa naaʼinraka na anoujashii namaiwajanakana süpüla aijiraain maʼin naya? (Roma 15:7).

¹³ Ayaawatüna aaʼuchii aijiraain na anoujashii namaiwajanakana. Eepejeʼe kapüleere namüin tia. Jülüjataa waaʼin nakuwaʼipa na anoujashii chajanakana Roma. Naatawaisü tü nakuwaʼipakat, eeshii eekai judíoin otta ekirajünüshii naya süpüla naaʼinrüin tü Pütchi Aapünakat nümüin Moisés. Eeshii eekai nnojolin judíoin, eeshii eekai wattajeʼewaliin otta naatayaa müsü nakuwaʼipa. Eeshii eekai achepchieein, na nnojoliikana achepchieein otta eeshii na kachepchiakana. ¿Kasa naaʼinraka süpüla aijiraain naya? Naaʼinrüin tü nümakat chi aluwataaushikai Pablo. «Kamaneejiraainjana jia», müshi nia namüin (paashajeʼera Roma 15:7, TNM). Tü pütchi «kamaneejiraainjana jia» makat shia süküjeeka achiki nukuwaʼipa wanee wayuu kapülaka aaʼin na niʼiyoukana jee nüchajaale süchiki sukuwaʼipa süpüla naʼaleewajaain namaa na wayuu antakana nipialuʼumüin. Nüküjain Pablo nümüin Filemón tü nukuwaʼipainjatkat nümüin Onésimo, chi nüchepchia aʼluwataakai nuulia otta chi antajachikai nipialuʼumüin nüchikuaʼa. «Kamanee pia nümüin Onésimo», müshi Pablo nümüin (Filem. 17, TNM). Watta saalii tü kasa nütüjaakalü aaʼu Áquila otta Priscila nüchiki Jesucristo nuulia Apolos, ayatapejeʼe naya kamaneein nümüin Apolos jee namaashi nia (Aluw. 18:26). Mayaainjeʼe müin nakuwaʼipa na anoujashiikana, ayatüshii paaʼinwajiraain naya jee kamaneejiraain naya.

14. ¿Kasa saaʼinraka Anna nümaa suʼwayuuse süpüla natüjaain saaʼu na wawalayuukana alin naya napüla?

¹⁴ Eesiaʼaya süpüla sütüjaanüin aaʼu alin wapüla na wawalayuukana kamaneere waya namüin jee aleewale waya namaa. Waaʼinrüle tia aijeena waya napüla na wawalayuukana (2 Cor. 6:11-13). Shiaʼaya saaʼinraka tia Anna nümaa chi suʼwayuusekai, misioneero naya suluʼu wanee mma chaa África Occidental, aluwataanüshii naya mapa suluʼu wanee mma naata chayaa. Nantapaʼaya neʼe chamüin oʼttusü tü ayuuliikat COVID 19, nnojoliika kottuin naya namaa na wawalayuukana. ¿Kasa naaʼinraka süpüla natüjaain saaʼu na wawalayuukana alin maʼin naya napüla? Yootushii naya namaa suluʼupünaa videoconferencia jee naküjain namüin neʼraajeein maʼin naya. Antüsü suluʼumüin naaʼin na wawalayuukana tü naaʼinrakat. Nayamaajüinjeseʼe naya jee aluwataashii naya mensaje namüin. ¿Jamüsü nachajaaka sukuwaʼipa na misioneerokana süpüla neʼraajüin na wawalayuukana? Müsü Anna süchiki tia: «Nnojotsü motuin taaʼin tü naaʼinrapuʼukat paala na wawalayuukana tapüleerua otta napüleerua na tapüshikana. Talatüshii naya wanaa wamaa weʼrapa kasa anasü nutuma chi Maleiwakai otta nakaalinjain waya soʼunnaa wanee müliaa. Sutuma jülüjain taaʼin tia, aainjeesü taya kasa anasü napüleerua na wawalayuukana süpüla natüjaain saaʼu alin naya tapüla».

15. Sünainjee tü saaʼinrakat Vanessa, ¿kasa waaʼinrajatka süpüla ayatüin alin wapüla na wawalayuukana? (Piirakaa sümüin tü ayaakuaakat).

¹⁵ Süka naatawalin wakuwaʼipa namaa na wawalayuu woutkajaakana amaa, ¿kasa waaʼinrajatka  süpüla aijiraain maʼin waya namaa? Waaʼinmaainjatü tü kasa anakat natuma. Eesü wanee wawala kanüliaka Vanessa, kepiasü shia Nueva Zelanda otta mojushiisü sümüin nakuwaʼipa waneinnua wawalayuu outkajaakana sümaa. Suulialeʼeya sükaaʼinjaain noulia, süchajaainña sukuwaʼipa süpüla aleewainjatüin shia namaa. Sutuma saaʼinrüin tia shiyaawata aaʼu jamüin nürütkeʼeraka Jehová naya wayuukana nünainmüin. Müsü shia: «Nüneekünapa taʼwayuuse süpüla nülapalaain naaʼu na wawalayuukana, watta naalii na wawalayuu wantakana aʼakamüin jee naatawaisü tü nakuwaʼipakat. Akalajasaʼa tanouteʼeratüjülüin takuwaʼipa süpüla anain taaʼin namaa na waneinnua. Anasü maʼin tamüin naatawalin nakuwaʼipa na wawalayuukana otta anasü nümüin Jehová nürütkeʼerüin wayuu nünainmüin sulujutka mmakat süpüshuaʼa». ¿Kasa waaʼinrajatka süpüla ayatüin alin wapüla na wawalayuukana? Waaʼinmaainjatü tü kasa anasü naaʼinrakat (2 Cor. 8:24).

16. ¿Jamüshii aijiraainjanaka maʼin waya soʼunnaa tü müliaa miyoʼukat? (Piirakaa sümüin tü ayaakuaakat).

¹⁶ Soʼunnaa tü müliaa miyoʼukat alinjana maʼin wapüla na wawalayuukana. ¿Kasa naaʼinreetka Jehová süpüla naaʼinmajüin waya soʼunnaa tia? Jülüjataa waaʼin tü nuluwataakalü anain Jehová na israelitakana süpüla noʼttaainjanain sushutapa Babilonia naaʼu. Müshi nia namüin: «Jikerota suluʼumüin tü kuatta suluʼukat jipia, jüsürüla tü miichoʼukot jikerotopa. Juunjulaa motsomüin sujuuna sülatüin tü kasachikikat» (Is. 26:20). Eesüjaʼa waaʼinrüinjatüle tia süntapa tü müliaa miyoʼukat. «Tü kuatta suluʼukat jipia» münakana amüin, eeshiijaʼa nayale na wawalayuu woutkajaakana amaa. Paaʼinwajiraale waya namaa na wawalayuukana soʼunnaa tia kaʼikat, naaʼinmajeena waya Jehová maʼaka nüküjatüjülin shia. Nnojotsü neʼe waaʼinmaainjatüin tü kasa anakat natuma na wawalayuukana, alinjanaʼaya maʼin naya wapüla. Nnojorüle waaʼinrüin tia, eeshii süpüla nnojoliin woʼttaain.

17. ¿Kasa waaʼinreetka soʼunnaa tü müliaa miyoʼukat eejüle waaʼin müinmaʼa yaa?

¹⁷ Tü nükaliakat Jehová keemeerü maʼin sümüin wayuu süpüshuaʼa (Sof. 1:14, 15). Eejeeria tü kasa kapüleejeetkat wamüin wayakana aʼyataashiikana nümüin Jehová. Eejüle maʼin waaʼin müinmaʼa yaa, jimateerü waaʼin otta eeshii süpüla wakaalinjain na waneinnua soʼunnaa tia kaʼikat. Wachecherüle waaʼin, alateena waya süchikumüin tü müliaa weʼreetkat. Wamüliajiraale, aaʼinreena waya kasa anasü napüleerua na wawalayuukana süpüla wakaalinjain naya sünain tü kasa choʼujaajeetkat namüin. Aijiraale maʼin waya namaa na wawalayuukana, ayateena paaʼinwajiraain waya namaa. Müinjatü wakuwaʼipa süpüla naapüinjatüin wamüin Jehová tü kataakalü oʼuu süpüla kaʼikat süpüshuaʼa. Nnojoleetkalaka weʼrüin piantua tü kasa müliakalü atuma waaʼin (Is. 65:17).