1. ¿Kasa pütüjaaka aaʼu puʼttaiwaʼaya sünain ekirajawaa sünain tü Bibliakat?

 ¿SOTUSÜCHE PAAʼIN tü pikirajaakalü anain puʼttaiwaʼaya sünain ekirajawaa sünain tü Bibliakat? Eesüjaʼa ponule paaʼin pütüjaapa saaʼu kanüliain Maleiwa. Eesüjaʼa anale paaʼin pütüjaapa saaʼu nnojoluin müliain wayuu nutuma Maleiwa saʼaka siki. Eesüjaʼa talatüle paaʼin pütüjaapa saaʼu piʼreenain suluʼu tü Paʼaraiisükat na püpüshi outuinnapakana.

2. Püküja waneirua kasa paaʼinraka sutuma laülaain paaʼin sünain anoujaa (Éfeso 5:1, 2).

² Akooʼomüinraasü naalin Jehová püpüla sümaʼainruʼu pikirajaain sünain tü Bibliakat. Sutuma paaʼinrüin tia kachiiruasü paaʼin paaʼinrüin tü pikirajaakalü anain. Anasü tü kasa püneekakat sünainjee paaʼinrüin tü sümakat tü Bibliakat, punouteʼerüin tü jülüjakat paaʼin jee tü paaʼinrakat süpüla talatüin Maleiwa putuma, püshatüin nukuwaʼipa chi Püshi iipünaajachikai maʼaka nüshatüin wanee jintüi nukuwaʼipa chi nüshikai (paashajeʼera Éfeso 5: 1, 2, TNM).

3. ¿Kasa wasakirüinjatka anain waaʼin?

³ Wasakira waaʼin sünain tüü: «¿Aireeshiche maʼin Jehová tapüla süchikijee woutiisain taya? ¿Wanaawasüche maʼin tü jülüjakat taaʼin sümaa tü jülüjakat naaʼin Jehová? ¿Takaalinjeeinche maʼin na wawalayuukana saaʼujee alin naya tapüla maʼaka alin naya nüpüla Jehová?». Nnojo wayüülajaain nnojoliire alin maʼin wapüla na wawalayuukana maʼakaapuʼu paala jee nnojoire alin maʼin wapüla Maleiwa maʼakaapuʼu paala. Alatüsü tia namüin na anoujashii namaiwajanakana. Nnojoliipejeʼe niyüülajüin naya Jesús, müshiʼiya wayakana nnojoishii niyüülajüin waya maaʼulu (Alat. Map. 2:4, 7, TNM). Nütüjaa aaʼu eein süpüla wakooʼomüinrüin naalin Jehová otta na wawalayuukana wapüla.

4. ¿Kasa wekirajaainjatka anain sünain ekirajaayakat tüü?

 ⁴ Sünain ekirajaayakat tüü, wekirajaajeerü anain tü waaʼinrajatkat süpüla wakooʼomüinrüin naalin Jehová otta na waneinnua wapüla. Wekirajaajeerü anain jamüin aneetka wakuwaʼipa otta nakuwaʼipa na waneinnua waaʼinrüle tia.

5, 6. (1) ¿Jamüsü kapüleeka nümüin Pablo niʼyataain nümüin Maleiwa? (2) ¿Jamüshi ayataka niʼyataain nümüin Maleiwa?

⁵ Wainma kasa talataka atuma naaʼin chi aluwataaushikai Pablo sünain aʼyatawaa nümüin Jehová, eepejeʼe tü kasa kapüleekat nümüin. Wattasü nukua sünain awaraijawaa mayaainjeʼe eein süpüla jamajüin nia atumawaa. Ajachijashi nia «sutuma wüinsiraa shiroku süchi», sajachijain nia kaʼruwarannuu otta müliashi nia natuma na nüʼünüükana (2 Cor. 11:23-27, TNM). Eeshii anoujashii mojutukana amüin tü naaʼinrakat Pablo napüleerua (2 Cor. 10:10; Filip. 4:15).

⁶ ¿Jamüshi ayataka Pablo niʼyataain nümüin Maleiwa? Shia saaʼujee niʼraajüin nukuwaʼipa Jehová. Nuuntuin niʼraajüin nukuwaʼipa Jehová saaʼujee nikirajaain sünain tü Pütchi Ashajuushikat otta saaʼujee tü kasa naaʼinrakat Jehová nüpüleerua. Niyaawata aaʼu alin nia nüpüla Jehová (Roma 8:38, 39; Éf. 2:4, 5, TNM). Müshijeseʼe alin maʼin Jehová nüpüla Pablo otta aʼyataashi maʼin nia napüleerua na aneekuushikana (Heb. 6:10, TNM).

7. ¿Kasa waaʼinrajatka süpüla wakooʼomüinrüin naalin Jehová wapüla?

⁷ Süpüla wakooʼomüinrüin naalin Maleiwa wapüla ekirajaainjana waya sünain tü Bibliakat. Waashajeʼerapa shia wayaawatüinjatü saaʼu tü shikirajeekalü anain waya nüchiki Jehová. Anasü wasakirüle waaʼin sünain tüü: «Sünainjee tü sümakat wetsiikulokot tüü, ¿jamüsü tatüjaaka saaʼu alin taya nüpüla Jehová? ¿Jamüshi alinjachika maʼin tapüla Jehová sünainjee tü sümakat?».

8. ¿Jamüsü sükooʼomüinraaka naalin Jehová wapüla woʼuraajüle nümüin?

⁸ Wanee kasa waaʼinrajatka süpüla wakooʼomüinrüin naalin Jehová wapüla shia waküjale nümüin süpüshuaʼa tü suluʼukat waaʼin (Sal. 25:4, 5). Naapeerü Jehová wanüiki jee nükaalinjeena waya (1 Juan 3:21, 22). Eesü wanee wawala kepiaka chaa Asia, Khanh sünülia. b Müsü shia: «Tekerotoiwaʼaya sünain anoujaa aishi neʼe tapüla Jehová sünainjee tü tekirajaakalü anain nüchiki. Akooʼomüinraapejeʼe maʼin tü naalinkat tapüla teʼrapa nusoutuin tamüin shiʼipajee tü tachuntakat nümüin. Suluʼujee tia kachiiruasü taaʼin taaʼinrüin tü anakalü noʼuluʼu».

9. ¿Jamüsü watüjaaka saaʼu alin maʼin na anoujashiikana nüpüla Timoteo?

⁹ Maʼaka jeʼra juya süchikijee nunoujain Pablo, niʼraajüin wanee jimaʼai anakai maʼin akuwaʼipa, Timoteo nünülia. Aishi Jehová nüpüla otta aisü wayuu nüpüla. Müshi Pablo nüchiki Timoteo namüin na anoujashii chajanakana Filipos: «Nnojoishi eein wanee wayuu tamaa eekai müin aka naaʼin, kapülasü maʼin naaʼin tü jukuwaʼipakat» (Filip. 2:20, TNM). Nnojotsü nüküjain maʼin Pablo tütüin maʼin Timoteo jee nütüjain maʼin ekirajaa. Tü nüküjakat maʼin nüchiki shia aishaatain maʼin nüpüla na anoujashiikana. Eeshiijaʼa naʼatapajüle maʼin na anoujashiikana nüntüinjachin Timoteo namaʼanamüin (1 Cor. 4:17).

10. ¿Kasa saaʼinraka Anna nümaa suʼwayuuse napüleerua na wawalayuukana saaʼujee alin naya napüla?

¹⁰ Wachajaain maʼin sukuwaʼipa süpüla wakaalinjain na wawalayuukana maʼaka naaʼinrüin shia Timoteo (Heb. 13:16). Süchikijee wanee juya miyoʼushaata oʼunusü Anna, tü  wachuntayütkalü anülia suluʼu tü ekirajaayakat 29, nümaa suʼwayuuse nepialuʼumüin waneinnua wawalayuu. Yarüttüsü süpüshuaʼa tü nasheʼinkat naya wawalayuukana sutuma sujutuuin saajuna nepia. Anuu tü sümakat Anna süchiki tü saaʼinrakat nümaa suʼwayuuse: «Walüʼüjaka nasheʼin wepialuʼumüin süpüla washijaain shia jee wapülanchajüin namüin. Mayaainjeʼe nnojoluin kapüleein wamüin waaʼinrüin tia, kojutusü shia namüin. Saaʼujee waaʼinrüin tia aleewashii maʼin waya namaa maaʼulu». Sükaalinjain Anna nümaa suʼwayuuse na wawalayuukana saaʼujee alin naya napüla (1 Juan 3:17, 18).

11. (1) ¿Kasa eeka sünainjee kamaneein waya namüin na waneinnua? (2) Saashin Proverbios 19:17, ¿kasa naaʼinreetka Jehová wapüleerua kamaneere waya sümüin wayuu?

¹¹ Washatüin nukuwaʼipa Jehová kamaneere waya namüin na waneinnua jee waaʼinrüle kasa anasü napüleerua. Eesü nnojorüle watüjaain saaʼu analejeʼeya namüin na waneinnua tü kasa waaʼinrakat napüleerua. Sotusü saaʼin Khanh, tü wachuntayütkalü anülia suluʼu pütchi 8, tü naaʼinrakat waneinnua wawalayuu süpüleerua. Anuu sünüiki süchiki tia: «Kojutusü maʼin tamüin tü naaʼinrakat na wawalayuukana tapüleerua süpüla namaain taya sünain aküjaa pütchi. Kamaneeshii naya tamüin, nasaajüin taya, nounejaain taya sünain ekawaa jee neʼikajaain taya tepialuʼumüin. Nnojotpuʼusü tayaawatüin saaʼu wainmain maʼin tü kasa naaʼinrakat tapüleerua. Tatüjaaitpa aaʼu naaʼinrüin tia süka alin taya napüla». Nnojo waʼatapajüin saapünüinjatüin analuʼutka wamüin saaʼujee tü waaʼinrakat. Sümakalaka Khanh: «Aainjeesü taya kasa anasü napüleerua naya wawalayuukana, shiajaʼa neʼe nnojoluin tatüjaain saaʼu jalain kepiain noʼutku nayakana maaʼulu. Müsüjeseʼe tachuntuin nümüin Jehová walaaiwa naya nutuma saaʼujee tü kasa naaʼinrapuʼukat tapüleerua». Nütüjaa aaʼu Jehová süpüshuaʼa tü kasa waaʼinrakat napüleerua na waneinnua jaʼitairü müin malaacheinkai  saaʼin wamüin. Kojutusü maʼin nümüin tü waaʼinrakat, müsü aka saaʼin wanee nujuyaala woulia (paashajeʼera Proverbios 19:17).

12. ¿Kasa naaʼinrajatka na wawalayuukana süpüla nakaalinjain na wawalayuu outkajaakana namaa? (Piirakaa sümüin tü ayaakuaakat).

¹² Piale wanee wawala, ¿kasa paaʼinrajatka süpüla jaʼyain paaʼu alin püpüla na wawalayuukana? Anashii pükaalinjale naya. Wanee wawala jimaʼai kanüliashi Jordan nüsakirüin wanee laülaashi süchiki tü naaʼinrajatkat süpüla nükaalinjain maʼin na wawalayuukana. Nüküjaka chi laülaashikai nümüin süchiki waneirua kasa anasü naaʼinraka otta süchiki waneirua kasa naaʼinrajatka, maʼaka saaʼin nüntajachin maalü sünain tü outkajawaakat süpüla nüsaküin na wawalayuukana, nusoutuinjachin sünain tü outkajawaakat, nujuʼituinjachin semaanawai sünain aküjaa pütchi namaa na wawalayuu nüküjakana amaa pütchi otta nüchajaainjatüin sukuwaʼipa süpüla nükaalinjain na wawalayuukana. Saaʼujee naaʼinrüin tia Jordan, kettaashi nia süpüla saapünüin sooʼomüin aʼyatawaa nümüin otta akooʼomüinraasü naalin na wawalayuukana nüpüla. Niyaawata aaʼu Jordan nnojoluinjatüin naʼatapajüin niʼipajanainjachin nia na laülaashiikana süpüla nükaalinjain na wawalayuukana. Nüneekünüle süpüla tia aʼyatawaakat, ayatüinjana nükaalinjain na wawalayuukana (1 Tim. 3:8-10, 13, TNM).

13. ¿Jamüshi nüneekünaka Christian süpüla laülaainjachin nia nüchikuaʼa?

¹³ Laülaashire pia sümaiwa jee shiale neʼipajanapuʼuin pia na laülaashiikana, anasü jülüjale paaʼin nnojoluin motuin naaʼin Jehová tü paaʼinrapuʼukat saaʼujee alin nia püpüla jee saaʼujee alin püpüla na wawalayuukana (1 Cor. 15:58). Jülüjasü naaʼin maaʼulu tü paaʼinrakat saaʼujee alin nia püpüla. Mojushaatasü naaʼin wanee wawala kanüliashi Christian sutuma nnojolinjachin laülaashin nia suluʼu tü outkajaaleekat. Anuu nünüiki: «Nnojoishi taya ayüülajaain.  Mayaainjeʼe nnojolin laülaashin taya, taaʼinmaasü maʼin tü taʼyataainkat nümüin Jehová». Aneekünüshi nia mapa süpüla laülaainjachin nia nüchikuaʼa. «Wainmajüsü taaʼin anale süpüla taapaain süchikuaʼa tia aʼyatawaakat, taapaapejeʼe shia süka tayaawatüin saaʼu nümüliajüin taya Jehová otta süka taʼyataweein nümüin jee namüin na wawalayuukana saaʼujee alin naya tapüla», müshi Christian.

14. ¿Kasa watüjaka sünainjee sukuwaʼipa Elena?

¹⁴ Aishiʼiya napüla na aʼyataashiikana nümüin Jehová na wayuu nnojoliikana anoujain (Mat. 22:37-39). Anuu sünüiki wanee wawala Elena sünülia, kepiasü shia República de Georgia: «Ojuʼitapuʼusü taya sünain aküjaa pütchi saaʼujee alin neʼe tapüla Jehová. Shiasaʼa miyoʼupa naalin tapüla chi Tashi iipünaajachikai, akooʼomüinraasü naalin na wayuukana tapüla. Süpüla süntüin suluʼumüin naaʼin tü pütchi taküjakat, jülüjapuʼusü taaʼin jamüin naaʼin. Müshiijeseʼe takaalinjeein maʼin naya» (Roma 10:13-15, TNM).

15, 16. Maʼaka weʼrüin suluʼu tü ayaakuaakat, ¿kasa weʼraka aire wapüla na waneinnua?

¹⁵ Eesü kasa anasü neʼraka na waneinnua aire wapüla na wawalayuukana. Soʼunnaa tü ayuuliikat COVID-19, nükaalinjain Paolo sümaa nuʼwayuuse waneinnua wawalayuu laülaayuu süpüla natüjain aküjaa pütchi sükajee tableta otta teleepono. Eejatü wanee wawala laülaa kapüleeka sümüin aküjaka pütchi süka teleepono. Atüjasü shia mapa, suunejaaka na süpüshikana sünain tü Outkajawaakat eere Sotuin Waaʼin Outuin  Jesús. 60 napüshuaʼa na outkajaakana suluʼupünaa videoconferencia soʼu tia. Saaʼujee tü naaʼinrakat Paolo sümaa nuʼwayuuse, anasü sukuwaʼipa tü wawala laülaakat namaa na süpüshikana. Anuu wanee pütchi süshajaka nümüin Paolo: «Anayaawatsejeʼe saaʼujee pikirajüin na laülaayuukana. Nnojoleerü motuin taaʼin süpüshuaʼa tü jaaʼinrakat wapüleerua otta tü naaʼinrakat Jehová süpüla naaʼinmajüin waya».

¹⁶ Eesü kasa nütüjaka Paolo sünainjee tü kasa naaʼinrakat. Niyaawata aaʼu anain maʼin aire wapüla wayuu suulialeʼeya watüjain süpüleerua wainma kasa. Anuu nünüiki: «Alapalaapuʼushi taya naaʼu na wawalayuukana. Eesü nnojorüle sotuin naaʼin na wawalayuukana tü pütchi tekirajakat, eepejeʼe süpüla sotuin naaʼin tü taaʼinrapuʼukat napüleerua».

17. ¿Jameerü wakuwaʼipa aire wapüla na waneinnua?

¹⁷ Eesü kasa anasü weʼraka aire wapüla na waneinnua. Jülüja waaʼin tü naaʼinrakat Jonathan, wanee wawala kepiakai chaa Nueva Zelanda. Niʼrüin wanee wawala pürekutsoot aküjakai pütchi nümüiwaʼa, kaleʼujatü tia otta saawanoʼulajatü shia. «Müliasü naaʼin chi wawalakai nümüiwaʼa, anashi tojuʼitüle nümaa saawanoʼu», müshi nia nüleʼeruʼu. Nnojotsü antapünaain nikiiruʼu aneerüin nukuwaʼipa saaʼujee kamaneein nia. Anuu nünüiki Jonathan: «Soʼu tia nnojotsü kamalain maʼin tamüin aküjaa pütchi. Shiasaʼa teʼrapa nütüjain maʼin ekirajaa chia wawalakai, aküjeeshi maʼin taya pütchi. Aleewashi taya nümaa jee nükaalinjain taya süpüla laülaain taaʼin sünain anoujaa, süpüla talatüin taaʼin sünain aküjaa pütchi otta süpüla aleewain maʼin taya nümaa Jehová».

18. ¿Kasa keeʼireeka naaʼin Jehová waaʼinrüin?

¹⁸ Keeʼireesü naaʼin Jehová wakooʼomüinrüin naalin wapüla jee naalin wapüla na waneinnua. Wekirajaaitpa anain waashajeʼerüinjatüin tü Bibliakat sümaa wasakireʼerüinjatüin waaʼin sünain, oʼuraajüinjana waya waneepia nümüin Jehová süpüla wakooʼomüinrüin tü naalinkat wapüla otta wakaalinjainjanain na wawalayuukana süpüla jaʼyain waaʼu alin naya wapüla. Wakooʼomüinrüle tü naalinkat Jehová wapüla jee tü naalinkat wapüla na wawalayuukana, aleeweena maʼin waya namaa süpüla kaʼikat süpüshuaʼa.