Laülaapuʼushi chi tashikai suluʼu tü kanüliakat Iglesia Unida de Canadá, nuluwataain taya sümaa tü tawalakat süpüla woʼunuin rimiinkoʼuluwai suluʼumüin tü ekirajülee napülajatkat na tepichikana sulujutka tia iküleesiakat. Aleʼeja müshii waya las 11 süpüla chain waya nümaa suluʼu tü iküleesiakat. Oʼunawaishii waya aliika sümaa tü weikat suluʼumüin tü Piichi Outkajaaleekat. Naata nakuwaʼipa na wayuu sulujunakana tü iküleesia kaluʼukat tü teikat.

Aleewasü maʼin tü teikat sümaa Marion otta nümaa Bob Hutcheson, chi suʼwayuusekai. Süküjaka namüin tü shikirajaakalü anain suluʼujee tü Bibliakat, woutiisaka naya mapa. Soʼu 1958 aainjünüsü wanee outkajawaa miyoʼu chaa Nueva York eere nantüin na wawalayuu naatakana oumain, «Voluntad Divina» sünülia tia outkajawaakat. Oʼunushi Bob sümaa nuʼwayuuse sünain tia outkajawaakat, namaashii na apünüinshiikana nachonnii jee namaashi taya. Kojutusü maʼin tamüin tü naaʼinrakat tapüleerua. Tayaawatüitpa aaʼu nnojoluin mapüleein tia namüin. Antüsü suluʼumüin taaʼin tü teʼrakat sünain tia outkajawaakat.

Jimaʼaliiwaʼaya taya kepiapuʼushii waya suluʼu wanee granja, kamalainsü tamüin taaʼinmajüin na wamüʼlüinkana. Aʼyataweeshi taya sünain veterinario. Süküjaka tü teikat nümüin wanee laülaashi süchiki tü keeʼireekat taaʼin. Nüküjaka chia laülaashikai  tamüin sülüʼülüin nükalia Jehová. Nüsakiraka taya müleka aneerüle takuwaʼipa nümaa Jehová tekirajaale suluʼu wanee eʼikülee miyoʼu soʼu kojuya juya (2 Tim. 3:1). Tayaawataka saaʼu nnojoluin anain tekirajaale suluʼu wanee eʼikülee miyoʼu.

Nnojotsü tatüjaain saaʼu tü taaʼinrajatkat kettaapa tatuma tü bachilleraatokot. Mayaainjeʼe tojuʼitüin sünain aküjaa pütchi semaanawai, nnojotsü kamalain maʼin tamüin jee nnojoishi pürekutsooleein taya. Nimeʼeja aaʼinchi taya chi tashikai jee chi talaülakai süpüla taʼyataainjachin suluʼu wanee compañía oikaaka seguro chaa Toronto. Süka niʼyataain chi talaülakai chayaa, taapaain tia aʼyatawaakat.

Siraasü kaʼi taaʼu sünain aʼyatawaa otta namaashi taya waneepia na wayuu manoujainkana. Sünainjee tia, eeshi makatawaire taya suulia tü outkajawaakat otta eeshi nnojoiwaire tojuʼitüin sünain aküjaa pütchi. Soʼu tia kepiapuʼushi taya nümaa chi tatuushikai, nnojoishi Aküjalin pütchi. Nünaajaapa chi tatuushikai, tachajaain wanee piichi eeinjachire taya.

Müshi Bob maʼaka naaʼin wanee tashi tamüin otta Marion müsü aka saaʼin wanee tei tamüin, naya kamaaka taya sünain tü outkajawaa miyoʼu aainjünakat soʼu 1958. «Kepieechi pia wamaa», müshii naya tamüin. Nakaalinjain maʼin taya süpüla aleewain taya nümaa Jehová. Woutiisashi taya soʼu 1960 nümaa John, wanee nüchon Bob. Aküjeeshi maʼin taya pütchi teʼrapa pürekutsoolin John. Sutuma neʼrüin na wawalayuukana laülaain taaʼin sünain anoujaa, aneekünüshi taya süpüla shikiipüʼüin taya tü outkajawaa kanüliakat Ekirajawaa süpüla Aküjaa Pütchi. a

Kasaatshi taya sümaa Randi Berge soʼu 1966, pürekutsootsü shia jee akolojoweesü shia eere choʼujaain Aküjalii pütchi. Nütütüleʼerüin waaʼin chi wawala alapalaaikai waaʼu süpüla wakaalinjain na wayuu kepiakana chaa Orilla (Ontario). Wakolojooka chamüin.

Sutuma teʼrüin talatüin maʼin saaʼin Randi sünain aküjaa pütchi, pürekutsootshi taya wantapa chamüin Orilla. Talatüshi maʼin taya wanaa sümaa  tekirajüin wayuu sükajee tü sümakat tü Bibliakat otta müsia süka wakaalinjain wanee wayuu sümaa nuʼwayuuse süpüla naʼyataain nümüin Jehová.

Tantapa Torontomüin teʼraajüin Arnold MacNamara, wanee laülaashi aʼyataaka suluʼu Weteet. «¿Pürekutsooleeshii jia pesiaat?», nümaka wamüin. «Jamüsaʼa shia. Nnojoliipejeʼe waya oʼuneein Quebecmüin», tamaka nümüin. Wanaawasü taaʼin namaa na aashajaakana inglés, na kepiakana chaa Canadá. Naya wayuukana mojutusalii namüin na aashajaakana francés, na kepiakana chaa Quebec. Soʼu tia na wayuu kepiakana Quebec, aainjashii protesta namüin na sülaülashiikana mma süpüla naluwataainjanain namüiwaʼa.

«Chashii suluwataain Weteet na pürekutsoot pesiaatkana Quebecmüin», müshi Arnold tamüin. Tatüjaa aaʼu suʼuneein Randi chamüin, wakolojooka chamüin. Tayaawata aaʼu mapa anain tü waaʼinrakat.

Ekirajünüshii waya soʼu jaʼrai semaana sünain francés. Kettaapa watuma, aluwataanüshii waya nümaa wanee wawala sümaa nuʼwayuuse chamüin Rimouski. Eetaasü maʼaka 540 kiloometüro tia mmakat, palaajeeruʼusü shia sünain Montreal. Atüjaana aaʼu sünain tü outkajawaakat isain maʼin tachiki taashajaain francés. Müsü wanee pütchi taashajeʼeraka: «Süpüla tü outkajawaakat miyoʼu antajana na wüchii chejeʼewaliikana Australia». Shiapejeʼe taküjeein nantajanain na wawalayuu chejeʼewaliikana Australia.

Chaa Rimouski kojuyashii waya suluʼu wanee piichi. Eejatü pienchisü wawalayuu jieyuu yalayalakana aaʼin sünain aküjaa pütchi, eejachi wanee wawala sümaa nuʼwayuuse otta piamasü nachonnii. Akaratshi kuatta sulujutka tia piichikat, wawalaajiraain shia. «Piichi kasuutat», wamüsü shia. Eeshiijaʼa natunkule 14 wayuu suluʼu. Süka pürekutsoolin pesiaat taya sümaa taʼwayuuse, aküjashii waya pütchi wattaʼa maalü sünainmüinreʼeya aipaʼa. Kojutusü maʼin wamüin nojuʼitawalin wamaa na wawalayuukana sünain aküjaa pütchi, jaʼitairü alin maʼin jemiai.

Aleewajiraashii maʼin waya namaa na pürekutsootkana. Aatulajawaishii waya otta aʼlakajaʼawaishii waya tü kanüliakat pierogis, müsü aka saaʼin empanada tia. Wainmatua woutkajaain saawanoʼu aipaʼa süpüla weeʼirajüin jee süpüla wayonnajüin niiʼirain wanee wawala.

Kojuyashii na woutiisakana chaa Rimouski, talatüshii maʼin waya saaʼujee tia. Akooʼomüinraashii maʼin na wawalayuukana, eetaashii maʼaka 35 wawalayuu napüshuaʼa.

Wainma kasa nikirajaka anain waya Jehová chaa Quebec. Nükaalinjain waya süpüla anain watuma waʼyataain, naapüin tü kasa choʼujaakat wamüin, nükaalinjain waya süpüla weʼraajüin nakuwaʼipa na wayuu aashajaakana francés, nükaalinjain waya süpüla kamalain wamüin tü nanüikipalakat otta tü nakuwaʼipakat. Sünainjee tia akooʼomüinraasü naalin wapüla na wayuu naatakana akuwaʼipa (2 Cor. 6:13, TNM).

Suchuntaka mapa Weteet wamüin eere süpüla wakolojooin chamüin Tracadie, shia wanee pueulo sotpaʼaka palaa, wüinpüjeeruʼusü shia sünain tü mmakat Nueva Brunswick. Nnojotsü waʼatapajüin suchuntunuinjatüin wamüin tia. Soʼu tia eeʼiwalajatü neʼe wawalaajüin wanee piichi otta ekirajüshi taya suluʼu wanee koleejia. Wainma na wekirajüin jekenakana aküjain pütchi otta akaalinjashii waya sünain akumajaa wanee Piichi Outkajaalee. Kapüleeka wamüin tü waneeküinjatkat.

 Achuntushii maʼin waya nümüin Jehová süpüla watüjaain saaʼu tü waaʼinrajatkat. Wakolojooka chaa Tracadie, naata maʼin sukuwaʼipa suulia Rimouski. Makatüshii waya chayaa süka shiain tü keeʼireekat naaʼin Jehová wapüleerua. Weʼitaaka najapuluʼu Jehová tü wakuwaʼipakat, weʼraka nükaalinjain waya (Mal. 3:10). Mapüleesat tamüin tekiʼralaain chayaa sutuma anain maʼin sukuwaʼipa Randi. Wayuu kanoulasü shia otta kemeerat shia.

Waneeshia neʼe chi laülaashikai napüleerua na wawalayuukana chaa Tracadie, Robert Ross nünülia, Linda sünülia nuʼwayuuse. Pürekutsoot naya jee akolojooshii naya chamüin. Makataka naya chayaa joʼuupa chi neʼiruʼumakai. Mayaainjeʼe kupaain naya sünain epijaa chi nachonkai, ayatüsia natütüleʼerüin waaʼin sutuma kamaneein naya wamüin otta sutuma yalayalain maʼin naaʼin sünain aküjaa pütchi.

Wanaa sümaa piamain juya pürekutsooliin waya chayaa Tracadie, aneekünüshi taya süpüla talapalaain naaʼu na wawalayuukana. Akaratshi juya talapalaain naaʼu na wawalayuu aashajaakana inglés. Waluwataanaka mapa süpüla walapalaain naaʼu na wawalayuu aashajaakana francés chaa Quebec. Léonce Crépeault nünülia chi wawala anaʼlakai sümüin taʼyataain. Nüküjawalin tamüin anain maʼin tü pütchi tekirajakalü anain. b «¿Kasa paaʼinrajatka süpüla jaloulin maʼin namüin na wawalayuukana tü pütchi pikirajakalü anain?», nümaka tamüin. Sutuma nükaalinjain taya mapüleesat tatuma tekirajia.

Sotusü taaʼin tü outkajawaa miyoʼu kanüliakat «Fe Victoriosa» eere nantüin wawalayuu sainküinjee mmaka süpüshuaʼa. Aainjünüsü shia chaa Montreal soʼu 1978. Aʼyataashi taya suluʼu Depertamento de alimentos. Antajana 80.000 wayuu. Soʼu tia, aʼwanajaanüsü sukuwaʼipa tü aainjünakat süpüla aʼlakajawaa, aʼwanajaanüsü tü aʼlakajaayakat otta tü eküülü aʼlakajaanüinjatkat. Eejatü maʼaka 20 nevera eere sünaajaanüin tü eküütkat, mojuwaipejeʼe shia. Kamaʼa waʼatapajüin süpüla wekerotuinjanain suluʼu tia estadiokot. Wanee kaʼi süpülapünaa tü outkajawaakat miyoʼu, eejatü wanee ashaitaa. Müshiijeseʼe wekerotuin suluʼumüin süseʼeruʼu aikat. Wachuwajaainjatü tü hornokot süpüla waʼlakajaain tü sayuunakat süpülapünaa jaʼyuuin. Mapüsashii maʼin waya. Atüjapejeʼe taya sünainjee laülaain naaʼin otta kemeeraliin na wawalayuu taʼyataajiraakana amaa. Ayatayüiya taya aleewain namaa. Anasü maʼin tia  outkajawaa chajatkat Quebec eere müliapuʼuin waya atumawaa soʼunnaa 1940 sünainmüin 1960.

Atüjashi taya nanainjee na laülaashii akumajakana sukuwaʼipa outkajawaa miyoʼu aainjünaka chaa Montreal. Soʼu tia nia David Splane chi shikiipüʼükai tü outkajawaakat miyoʼu, napüshi nia maaʼulu na Laülaashii Jülüjakana aaʼin na Aküjaliikana pütchi. Shikiipüʼüshi taya mapa tü outkajawaakat miyoʼu. Nükaalinjain maʼin taya David.

Eetaasü maʼaka 36 juya walapalaain naaʼu na wawalayuukana. Taneekünaka soʼu 2011 süpüla toʼunirüinjatüin sukuwaʼipa tü Ekirajawaa Napülajatkat na Laülaashiikana. Wainmatua watunkuin suluʼu piichi naatajatü soʼu piama juya neʼe. Mayaainjeʼe kapüleein wamüin tia, anasiaʼaya waaʼin. Sujutaapa wanee semaana, naapüin analuʼutka na laülaashiikana saaʼujee jülüjain naya naaʼin na Laülaashii Jülüjakana aaʼin na Aküjaliikana pütchi sümaa nakatsüinrüin nanoula.

Taneekünaka mapa süpüla toʼunirüin sukuwaʼipa tü Ekirajawaa Napülajatkat na Aküjaliikana pütchi. Shapaʼawaisü naaʼin na wawalayuu ekirajaakana saaʼujee wainmain kasa naaʼinrüinjatka. Ekirajaainjana naya soʼu akaratshi oora, apünüinjana naya oora sünain aainjaa natarease soʼukaiwai otta nekirajaainjatü anain pienchisü jee shiale jaʼraisü pütchi naküjainjatka semaanawai. «Nükaalinjeena jia Jehová süpüla juuntuin tia», maʼwaishi taya nümaa chi teʼipajanakai namüin. Ponoshootosü naaʼin neʼrapa nükaalinjain naya Jehová süpüla nountuin süpüshuaʼa tü naaʼinrajatkat.

Süka kamaneein tü teikat namüin na shikirajakana sünain tü Bibliakat, anoujashii naya. Sutuma anain sukuwaʼipa tü teikat, aʼwanajaasü nukuwaʼipa chi tashikai namüin na wawalayuukana. Sülatapa apünüin kaʼi süchikijee sünaajaain tü teikat, oʼunushi chi tashikai sünain tü outkajawaakat süpüla naapajüin tü pütchi süpülajatkat wayuu süpüshuaʼa. Nnojoishi makatüin nia suulia tü outkajawaakat soʼunnaa 26 juya. Mayaainjeʼe nnojolin woutiisain nia, naküjain tamüin na laülaashiikana niain antawalin palajana suluʼumüin tü Piichi Outkajaaleekat.

Anasü maʼin sukuwaʼipa tü teikat tapüleerua otta süpüleerua tü apünüinsükat tawalayuu. Aʼyataashii maʼin naya nümüin Jehová namaa naʼwayuuse. Wanee, aʼyataasü shia suluʼu tü Weteet chakat Portugal otta tü wane suluʼu tü Weteet chakat Haití.

Maaʼulu yaa pürekutsoot pesiaat taya sümaa taʼwayuuse yaa Hamilton (Ontario). Wanaa sümaa walapalaapuʼuin naaʼu na wawalayuukana, kamalainsü maʼin wamüin oʼunaa namaa sünain anaʼlawaa namüin na wayuu ekirajaweekana sünain tü Bibliakat. Eekajasaʼa müinmaʼa yaa, kamalainsü wamüin wouyantüin namaʼanamüin na wayuu wekirajakana sünain tü Bibliakat otta weʼrüle tü naaʼinrakat süpüla naʼyataain nümüin Maleiwa. Eesü süpüla weʼraajüin maʼin nakuwaʼipa na wawalayuu woutkajaakana amaa. Sükatsüinrüin maʼin waaʼin weʼrapa tü naaʼinrakat Jehová süpüla nükaalinjain naya soʼunnaa müliaa.

Kojutusü maʼin tamüin sümaa taʼwayuuse süpüshuaʼa tü naaʼinrakat na wawalayuukana wapüleerua. Wachajaainjeseʼe sukuwaʼipa süpüla wakaalinjain na waneinnua süpüla naʼyataain maʼin nümüin Maleiwa (2 Cor. 7:6, 7). Eejatü wanee wawala pürekutsoot namaa piamashii süchonnii. Tasakiraka chi suʼwayuusekai eere süpüla pürekutsoolin nia wanaa namaa. «Takaalinjain naya», nümaka tamüin. «Eeshii süpüla nükaalinjain jia Jehová jüpüshuaʼa», tamaka nümüin. Tatütüleʼeraka naaʼin süpüla pürekutsoolinjachin nia. Pürekutsootka nia sülatapa aipirua kashi.

Ayateechia taya sümaa taʼwayuuse sünain aküjaa namüin na wayuu joʼuukana woulia süchiki tü kasa anasü naaʼinrakat Jehová. Wacheküin talatüinjanain naya sünain aʼyatawaa nümüin Jehová maʼaka waaʼin wayakana (Sal. 71:17, 18).