Jülüja waaʼin nukuwaʼipa Nicolas sümaa Céline. Ajütünüshii naya sutuma tü Weteet chajatkat Francia naʼakamüin waneinnua wawalayuu. Müshii naya süchiki tü kasa kapüleekat namüin: «Talatüshii maʼin waya wantaiwaʼaya naʼakamüin na wawalayuukana. Shiasaʼa mapa mojusü waaʼin süka wasukajüin na waʼaleewainyuu woutkajaapuʼukana amaa. Nnojoishii aleewain maʼin waya namaa na wawalayuukana süka jekenain waya naʼakamüin». a ¿Kasa paaʼinrajatka süpüla talatüin paaʼin namaa na wawalayuu püntakana aʼakamüin otta süpüla anain paaʼin namaa sünain aʼyatawaa nümüin Maleiwa? ¿Kasa naaʼinrajatka na wawalayuukana süpüla nakaalinjain wanee wawala antaka naʼakamüin? ¿Kasa paaʼinrajatka süpüla pütütüleʼerüin naaʼin na waneinnua otta süpüla natütüleʼerüin paaʼin?

PIENCHISÜ KASA PAAʼINRAJATKA SÜPÜLA SHIKIʼRALAAIN PAAʼIN

1. Puchunta kaalinwaa nümüin Jehová (Sal. 37:5). Jülüja waaʼin sukuwaʼipa Kazumi, kepiasü shia Japón. Aluwataanüshi chi suʼwayuusekai suluʼumüin wanee mma süpüla niʼyataainjachin chayaa. Kiʼrasü maʼin saaʼin Kazumi namaa na wawalayuu suutkajaakana amaa. Eetaairü maʼaka 20 juya shia namaa. ¿Kasa saaʼinraka süpüla shiʼitaain najapuluʼu Jehová tü kasa alatakat sümüin? Müsü shia: «Taküjain nümüin Jehová tü suluʼukat taaʼin, tü kasa mojukalü atuma taaʼin otta tü kasa shapaakalü atuma taaʼin. Nükatsüinrawalin taaʼin soʼu tü kaʼi choʼujaakalü oʼu shia tamüin».

¿Kasa amaa paaʼinrajatka süpüla pütüjaain saaʼu nükaalinjeein pia Jehová? Tü wanoulakat müsü  aka saaʼin wanee maata. Jamüsüjaʼa wanee maata choʼujaasü shiʼyotunüin wüin saaʼu süpüla sümüloʼulaain. Jamüshijaʼa Nicolas chi wachuntayüikai anülia paalapa jülüjasü naaʼin nukuwaʼipa Abrahán, Jesús otta Pablo. Wainma tü kasa naaʼinrakat süpüla naaʼinrüin tü nüchekakat Maleiwa. Niyaawatüinjeseʼe saaʼu Nicolas nükaalinjeechin nia Jehová. Pikirajaale waneepia sünain tü Bibliakat atüjeechi pia süpüleerua pukuwaʼipa suʼwanajaʼalaa sümüle pukuwaʼipa. Wainmeerü tü pütchi pütüjeetkat suluʼujee tü Bibliakat eeka süpüla pükatsüinrüin akajee naaʼin na wawalayuu pukolojookana aʼakamüin.

2. Nnojo puʼwanaajireʼerüin nakuwaʼipa na wawalayuukana (Ecl. 7:10). Akolojooshi Jules chamüin Estados Unidos, chejeʼewai nia Benín. Waneejatü nakuwaʼipa na wayuu kepiakana chaa Estados Unidos. Anuu nünüiki: «Wanaa sümaa teʼraajüin wanee wawala müsü taküjainjatkai saaʼin nümüin süchiki tü alatapuʼukat tamüin otta süchiki tü takuwaʼipakat». Sutuma nnojoluin maajüin nukuwaʼipa chi wawalakai akaaʼinjaashi nia noulia na wawalayuukana. Aʼwanajaapejeʼe nukuwaʼipa niʼraajapa na wawalayuukana. «Tayaawata aaʼulu wanaawain sukuwaʼipa wayuu süpüshuaʼa. Shiaʼala neʼe waneejatka watuma süküjia wanee pütchi. Kojutuinjatü wamüin sukuwaʼipa wayuu», müshi nia. Nnojotsü anain puʼwanaajireʼerüle nakuwaʼipa na wawalayuu pukolojookana aʼakamüin namaa na wawalayuu puutkajaapuʼukana amaa. Anuu sünüiki Anne-Lise, wanee pürekutsoot: «Akolojoosü taya süpüla tatüjainjatüin süpüleerua wanee kasa jeketü. Nnojotsü jülüjain taaʼin wanaawainjatüin tapüla tü kasa aainjünakat chayaa eere tokolojooinjatüin».

Nakolojoole na laülaashiikana nnojotsü anain naʼwanaajireʼerüle tü kasa aainjünakat eere nantüin sümaa tü kasa aainjünakat eere noutkajaapuʼuin paala. Mayaainjeʼe eein süpüla waneejatüin sukuwaʼipa tü kasa aainjünakat chayaa nnojotsü mojuin shia. Süpülapünaa püküjain wanee kasa anaka süpüla saainjünüin anasü piʼraajüle nakuwaʼipa na wawalayuukana (Ecl. 3:1, 7₂). Nnojotsü anain püpüleeruale naaʼin na wawalayuukana shiiʼiree naaʼinrüin tü püchekakat. Shia anaka aluʼu anale pukuwaʼipa napüleerua (2 Cor. 1:24).

3. Paaʼinra kasa namaa (Filip. 1:27). Kapüleesü tü okolojowaakat otta kaluʼusü mapüsaa. Anapejeʼe maʼin puutkajaamaatüle. Eerejeʼe süpüla, puutkajaa namaa na wawalayuukana suluʼu tü Piichi Outkajaaleekat. Kapüleejeerü namüin na wawalayuukana nayaawatüin saaʼu tü kasa choʼujaakat pümüin nnojoire puutkajaain namaa. Jülüja waaʼin tü saaʼinrakat Lucinda sümaa tü piamasükat süchonnii nakolojoopa suluʼumüin wanee pueulo miyoʼu chakat Sudáfrica. Müsü shia: «Taaʼinramaatüin tü aküjünakat tamüin süpüla anain taaʼin namaa na wawalayuukana. Aküjawaisü taya pütchi namaa waneʼewai nakua otta asoutusü taya sünain tü outkajawaakat. Chaa tepialuʼu outkajaʼawaishii na wawalayuukana süpülapünaa naküjain pütchi».

Pükaalinjamaatüle na wawalayuukana sünain tü aʼyatawaa aainjünüinjatkat nümüin Maleiwa meechi paaʼinwakai paaʼin namaa sünain aküjaa  tü pütchi anakat maʼin. Naküjain na laülaashiikana sümüin Anee-Lise, tü wachuntayütkalü anülia paalapa, anain sujuʼitüle namaa napüshuaʼa na wawalayuukana sünain aküjaa pütchi. Anuukalaka sünüiki: «Sutuma taaʼinrüin tia aleewamaatüsü taya namaa na wawalayuukana». Müleka piʼyataale suluʼu tü Piichi Outkajaaleekat sünain epitajaa, sünain anoutaa wanee kasa sünain jee shiale sünain aaʼinraa waneirua kasa, nayaawateerü saaʼu na wawalayuukana anain paaʼin namaa. Paaʼinrüle tia kiʼramaateerü paaʼin sümaa talatüin paaʼin.

4. Piʼraaja naya süpüla aleewain pia namaa (2 Cor. 6:11-13). Mapüleejeerü pümüin aleewa sümaa wayuu kachipünaale paaʼin sukuwaʼipa. Anashi yootule pia namaa na wawalayuukana süpülapünaa otta sajaʼttapa tü outkajawaakat süpüla piʼraajüin naya. Piʼraaja nanülia napüshuaʼa. Kamaneere pia namüin, anamiale pia namüin otta piʼraajüle nanülia, aneerü naaʼin pümaa otta aleeweena naya pümaa.

Nnojo piiʼiratüin pukuwaʼipa shiiʼiree neʼe anain naaʼin pümaa na wawalayuukana. Puuʼulaa neʼraajaiwa pukuwaʼipa. Waaʼinra tü saaʼinrakat Lucinda. «Wounejaʼawalin wepialuʼumüin na wawalayuukana. Wainmainna na waʼaleewainyuukana maaʼulu sutuma waaʼinrüin tia», müsü sünüiki.

KAMANEE WAYA NAMÜIN NA ANTAKANA

Eeshii wawalayuu mmotkana aaʼin süpüla noʼunuin suluʼumüin tü Piichi Outkajaaleekat eere nnojoliin neʼraajüin na wawalayuukana. ¿Kasa paaʼinrajatka süpüla pükaalinjain wanee wawala akolojooka jaʼakamüin? Anuu tü nümakat chi aluwataaushikai Pablo: «Kamaneejiraainjana jia maʼaka kamaneein Cristo jümüin» (Roma 15:7). Nashatüinjatü na laülaashiikana nukuwaʼipa Cristo otta nakaalinjüinjana na wawalayuu akolojookana naʼakamüin süpüla anain naaʼin namaa (paashajeʼera tü pütchikat « Tü paaʼinrajatkat pukolojooinjachire»). Eeshii süpüla nakaalinjain napüshuaʼa na wawalayuukana na akolojookana naʼakamüin.

Süpüla kamaneein waya namüin na wawalayuu akolojookana waʼakamüin, wounejaa naya wepialuʼumüin otta wakaalinja naya sünain aaʼinraa waneirua  kasa. Jamüsüjaʼa wanee wawala sükaalinjain wane wawala akolojooka süpüla shiʼraajüin tü pueulokot otta süpüla saapaain eʼejetuu. Anasü saaʼin tü wawala akolojookat otta mapüleesat sümüin shikiʼralaain saaʼin.

LAÜLAAJEERÜ PAAʼIN SÜNAIN ANOUJAA

Pukolojoole naʼakamüin waneinnua wawalayuu eesüjaʼa mmorüle paaʼin jee shapaale paaʼin. Jülüjataa waaʼin wanee wüchiichon ekirajaakai süpüla awataa. Eeshi mmorüle nia soʼu tü palajatkat nukua nuuʼulaküin nuwatüin. Nuuntapa nuwatüin eeshi süpüla wattakualüin nia. Aneerü pukuwaʼipa noʼuluʼu Jehová püchajaale sukuwaʼipa süpüla nnojoluin mmoluin paaʼin. Anuu tü nümakat Nicolas sümaa Céline: «Wanaa sümaa wakolojooin wainma tü watüjakalü apüleerua. Ekiʼralaasü waaʼin naʼaka na wayuu naatakana akuwaʼipa woulia otta anoutaasü wakuwaʼipa». Anuu tü nümakat Jean-Charles chi wachuntayüikai anülia paalapa süchiki tü kasa anasü neʼrakat na nüpüshikana: «Sutumajee wakolojooin naʼakamüin waneinnua wawalayuu laülaasü naaʼin na wachonniikana sünain anoujaa jee aleewashii naya nümaa Jehová. Maʼaka jeʼra kashi ekirajüsü tü wachonkat sünain tü outkajawaakat otta müshia chi wachonkai aküjashi pütchi sümaa nnojolin woutiisain nia».

¿Kasa paaʼinrajatka isale püchiki pukolojooin eere choʼujaain Aküjalii pütchi? Anasü paaʼinrüle waneirua kasa ashajünaka sünain pütchikat tüü. Paaʼinrüle tia meechi pukulojookai aaʼin naʼakamüin na wawalayuu puutkajaakana amaa. Puchunta kaalinwaa nümüin Jehová, paaʼinra namaa na wawalayuukana tü kasa naaʼinrawaikat, püküja pütchi namaa, aleewa pia namaa na nnojoliikana piʼraajüin otta pükooʼomüinra naalin na aleewakana amaa pia. Anasü jülüjale paaʼin wanee kasa anaka süpüla paaʼinrüin süpüla pükaalinjain na wawalayuu akolojookana otta na wawalayuu outkajaakana pümaa. Aijiraale waya ayaawatüneerü aaʼu wayain na anoujashii shiimainshiikana otta aleeweena maʼin waya nümaa Jehová (Juan 13:35). Talateechi maʼin Jehová sümaa tü paaʼinrakat (Heb. 13:16).

Mayaainjeʼe kapüleein tü okolojowaakat wainma na wawalayuu ekiʼralaakana aaʼin eere nantüin otta talatüsü naaʼin namaa na wawalayuu noutkajaakana amaa. Müshia piakai, puunteerü tia. Anuu tü sümakat Anee-Lise: «Pukolojoole naʼakamüin waneinnua wawalayuu akooʼomüinraajeena na wawalayuu aikana püpüla». Wanaa sümaa sukolojooin Kazumi wainma tü kasa shiʼrakat naaʼinrüin Jehová süpüleerua. Müshi Jules: «Wainmainnapa taʼaleewainyuu otta anasü taaʼin namaa. Kiʼraichipa maʼin taya namaa, nnojoluichipa taya oʼuneein».