1. ¿Jamüsü kojutukaʼa wamüin tü pütchi shiimain suluʼujeejatkat tü Bibliakat?

 WAYA aʼyataashiikana nümüin Jehová kojutusü wamüin tü pütchi suluʼujeejatkat tü Nünüikikat Maleiwa. Kanoulashii waya sünainjee tü sümakat (Roma 10:17). Niʼitaain shikii Jehová tü anoujaakat nünain Jesús süpüla nnojoliinjanain wemeejünüin sükajee tü pütchi alawaakat (1 Tim. 3:15). Jüüjüüshii waya namüin na wawalayuu oʼunirakana sukuwaʼipa waʼyataain, jama nekirajüin waya sünain tü pütchi shiimain suluʼujeejatkat tü Bibliakat jee nakaalinjain waya süpüla waaʼinrüin tü nüchekakat Maleiwa (Heb. 13:17).

2. Sünainjee tü sümakat Santiago 5:19, ¿kasa eejüinjatka oulia naaʼin na aʼyataashiikana nümüin Jehová?

² Mayaainjeʼe woonooin sümaa tü pütchi shiimainkat otta jüüjüüin waya namüin na wawalayuu oʼunirakana sukuwaʼipa waʼyataain eeshiʼiya süpüla wemeejünüin (paashajeʼera Santiago 5:19). Talateechi Satanás niʼrüle mojutuin wamüin tü pütchi suluʼukat tü Bibliakat otta tü pütchi naluwataakalü anain waya na wawalayuu oʼunirakana sukuwaʼipa waʼyataain (Éf. 4:14).

3. ¿Jamüshii woonooinjanakaʼa sümaa tü pütchi shiimainkat? (Éfeso 6:13, 14).

³ (Paashajeʼera Éfeso 6:13, 14). Soʼu palit kaʼi nimeejeena chi Yolujaakai na sülaülashiikana mma süpüla peʼipaain naya nümaa Jehová (Apoc. 16:13, 14). Watüjaa aaʼulia nüchajaajeerüin sukuwaʼipa Satanás süpüla nimeejüin na aʼyataashiikana nümüin Jehová (Apoc. 12:9). Müsüjeseʼe wayaawatüinjatüin saaʼu tü pütchi shiimainkat suulia tü pütchi alawaakat otta woonooinjanain sümaa tü pütchi shiimainkat (Roma 6:17; 1 Ped. 1:22). Waaʼinrüle tia oʼttaajeena waya süchikumüin tü kaʼi shiʼreetkat maʼin oʼu wayuu müliaa.

4. ¿Kasa wekirajaainjatka anain sünain ekirajaayakat tüü?

 ⁴ Sünain ekirajaayakat tüü wekirajaajeerü anain piamasü kasa waaʼinrajatka süpüla wayaawatüin saaʼu tü pütchi shiimain suluʼujeejatkat tü Bibliakat otta süpüla jüüjüüin waya namüin na wawalayuu oʼunirakana sukuwaʼipa waʼyataain. Otta wekirajaajeerü anain apünüinsü kasa waaʼinrajatka süpüla ayatüin woonooin sümaa tü pütchi shiimainkat.

WAAʼINRAJATKA SÜPÜLA WAYAAWATÜIN SAAʼU TÜ PÜTCHI SHIIMAINKAT

5. ¿Jamüsü wayaawatüinjatkaʼa saaʼu tü pütchi shiimainkat süpüla nnojoluin waaʼinrüin wanee kasa mojuka nümüin Jehová?

⁵ Mmoluinjana waya saaʼu waaʼinrüin wanee kasa mojuka nümüin Jehová. Waaʼinreerü tia süka alin maʼin nia wapüla. Süka talateein maʼin watuma Jehová wayaawatüinjatü saaʼu tü kasa eekai anain suulia tü kasa eekai mojuin otta wayaawatüinjatü saaʼu tü pütchi shiimainkat suulia tü pütchi alawaakat (Prov. 2:3-6; Heb. 5:14). Wainma tü kasa süchekakat wayuu mojuka nümüin Maleiwa. Nnojoire alin maʼin wapüla Maleiwa eesüjaʼa süpüla waaʼinrüin tü nachekakat na wayuukana shiiʼiree talatüin naya wamaa.

6. ¿Jamüsü nakuwaʼipa na polooshiikana ajayajülii sutuma neimmolojooin?

⁶ Mmorüle maʼin waya saaʼu tü saaʼinreetkat wayuu wamüin suulialeʼeya kojutuin watuma chi Maleiwakai, eesüjaʼa süpüla woonooin sümaa pütchi alawaa. Jülüjataa waaʼin nakuwaʼipa na polooshiikana piamamüin ajayajülii oʼunakana sünain anaʼlawaa tü mma naapüinjatkat Jehová namüin na israelitakana. Eeshii polooshii ajayajülii eimmolojookana napüleerua na cananeokana, jaʼyasü naaʼu nnojolin alin maʼin Jehová napüla. Müshiijeseʼe namüin: «Nnojoishii süpüla washutüin naaʼu naya wayuukana, katchinjüshii maʼin naya woulia» (Núm. 13:27-31). Shiimain katchinjüin maʼin na cananeokana noulia na israelitakana. Nnojotpejeʼe lotuin tü namakat wanaa  sümaa namüin «nnojoishii süpüla washutüin naaʼu naya wayuukana». Nnojotsü jülüjain naaʼin tü nüchekakat Jehová napüleerua na israelitakana otta tü kasa pülasü naainjakat napüleerua paala. Jülüjalejeʼe naaʼin süpüshuaʼa tia nayaawatüinje saaʼu nnojoleenain eejiraain na cananeokana nümaa chi Maleiwa Pülashikai. Eejanapejeʼe piamashii ajayajülii nnojoliika wanaawain aaʼin namaa. Josué nünülia wanee otta Caleb nünülia chi wane. Wayuu kanoulashii naya otta talateeshi Jehová natuma. Müshiijeseʼe namüin namüin na israelitakana: «Talatülejeʼe Jehová wamaa, nuʼunireena waya suluʼumüin tia mmakat jee napeeria shia wamüin» (Núm. 14:6-9).

7. ¿Kasa waaʼinrajatka süpüla eejüin maʼin waaʼin suulia waaʼinrüin wanee kasa mojuka nümüin Jehová? (Piirakaa sümüin tü ayaakuaakat).

⁷ Eejeerü maʼin waaʼin suulia waaʼinrüin wanee kasa mojuka nümüin Jehová jülüjale waaʼin palajana tü mojukat nümüin süpülapünaa waneeküin wanee kasa (Sal. 16:8). Püsakireʼera paaʼin sünain tüü paashajeʼerapa wanee aküjalaa suluʼujee tü Bibliakat: «¿Kasaje taaʼinraka chajachire taya nümaa chi wayuu ashajünakai achiki?». Maa chakai paaʼin sünain aapajaa tü pütchi mojusü naküjakat na polooshiikana ajayajülii. ¿Punoujeetche nanüiki? ¿Eimmolojoweetche paaʼin süpüleerua wayuu? ¿Püchecherataajeetpa paaʼin sutuma alin maʼin püpüla Jehová otta sutuma paaʼinreein tü nüchekakat? Wainma na israelita nnojoliikana oonooin sümaa nünüiki Josué otta Caleb. Müshiijeseʼe nnojoliin nantüin suluʼumüin tü Mma Anasükat (Núm. 14:10, 22, 23).

8. ¿Jamüsü nnojoluinjatkaʼa yaletüin waaʼin?

⁸ Nnojo yaletüin waaʼin. Nüküjain Jehová tü pütchi shiimainkat namüin na wayuu nnojoliikana yaletüin aaʼin (Mat. 11:25). Wekirajaaiwaʼaya sünain tü Bibliakat nnojotsü yaletüin waaʼin otta wacheka achiki wakaalinjünüin natuma na waneinnua (Aluw. 8:30, 31). Anasü ayatüle müin wakuwaʼipa waneepia. Yaletüle waaʼin jülüjeerü waaʼin anaʼleein tü wamakat suulialeʼeya tü sümakat tü Bibliakat otta nnojoleena jüüjüüin waya namüin na wawalayuu oʼunirakana sukuwaʼipa waʼyataain.

9. ¿Kasa waaʼinrajatka suulia yaletüin waaʼin?

⁹ ¿Kasa waaʼinrajatka suulia yaletüin waaʼin? Jülüja waaʼin niain anaʼleein akuwaʼipa Jehová woulia (Sal. 8:3, 4). Wachunta nümüin Jehová nnojoluinjatüin yaletüin waaʼin otta ana wamüin nikirajai waya. Nükaalinjeena waya Jehová süpüla kojutuin wamüin tü jülüjakat naaʼin süchiki wanee kasa. Wayaawata aaʼulu tü jülüjakat naaʼin Jehová sükajee tü Bibliakat otta sükajee tü namakat na wawalayuu oʼunirakana sukuwaʼipa waʼyataain. Paashajeʼerapa tü Bibliakat anasü püchajaale süchiki pütchi piyaawateetka atuma alin nüpüla Jehová na wayuu nnojoliikana yaletüin aaʼin otta üttüin naaʼin nanain na wayuu yaletakana aaʼin. Saapünüle pümüin wanee aʼyatawaa kaawainka, jalia pia suulia yaletajaain paaʼin.

WAAʼINRAJATKA SÜPÜLA WOONOOIN SÜMAA TÜ PÜTCHI SHIIMAINKAT

10. ¿Jaralii na nüneekakana Jehová süpüla nuʼunirüin nakuwaʼipa na anoujashiikana?

¹⁰ Jüüjüü pia waneepia namüin na wawalayuu nüneekakana Jehová süpüla nuʼunirüin sukuwaʼipa tü waʼyataainkat nümüin. Jamüsüjaʼa sümaiwa aneekünüshi Moisés otta Josué nutuma Jehová süpüla nuʼunirüin nakuwaʼipa na israelitakana (Jos. 1:16, 17). Anasü nakuwaʼipa na israelitakana wanaa sümaa kojutuin namüin na wayuu nüneekakana Jehová. Kakalia mapa wanaa sümaa sukumajaain tü anoujaakat nünain Jesús nuʼunirüin Jehová nakuwaʼipa na anoujashiikana nakajee na polooshiikana piamamüin aluwataaushi (Aluw. 8:14, 15). Mapa eejana naʼaka waneinnua laülaashii chajanakana  Jerusalén. «Katsüinsü maʼin nanoula na anoujashiikana jee akooʼomüinraashii maʼin naya weinshi» sükajee jüüjüüin naya namüin na wayuu nüneekakana Jehová süpüla nuʼunirüin nakuwaʼipa (Aluw. 16:4, 5). Müsia maaʼulu, eʼrüshii waya kasa anasü sünainjee jüüjüüin waya namüin na wawalayuu nüneekakana Jehová süpüla nuʼunirüin wakuwaʼipa. ¿Jameerü naaʼin Jehová nnojorüle waaʼinrüin tia? Wekirajaajeerü anain jamüin naaʼin Jehová wanaa sümaa wopuluʼuin na israelitakana suluʼumüin tü mma naapüinjatkat namüin.

11. ¿Jamüsü nakuwaʼipa na wayuu mojutukana amüin na nüneekakana Jehová süpüla nuʼunirüin nakuwaʼipa? (Piirakaa sümüin tü ayaakuaakat).

¹¹ Wanaa sümaa wopuluʼuin na israelitakana suluʼumüin tü Mma Anasükat, eejana waneinnua israelita kojutukana atumawaa eʼrüliijaaka wayumüin nümüin Moisés otta nümüin Jehová. Müshii naya: «Wulesü nakuwaʼipa napüshuaʼa na wayuu yaakana [nnojoishi niain neʼe Moisés nümüiwaʼa] otta eeshi Jehová namaa» (Núm. 16:1-3). Kojutushii nümüin Jehová napüshuaʼa na israelitakana, niapejeʼe nüneeküin Moisés süpüla nuʼunirüin nakuwaʼipa (Núm. 16:28). Müshii nayounnalaakai aaʼin nümüin Jehová wanaa sümaa nayounnalaain nümüin Moisés, nnojotsü naaʼinmaain tü nüchekakat Jehová, shia jülüjaka neʼe naaʼin neʼnnaajünüin jee kojutuin naya atumawaa. Najaʼlajeʼerüin Jehová na israelita eʼrüliikana wayumüin namaʼaleeya na wanaawakana aaʼin namaa. Watta naalii na outakana soʼu tia (Núm. 16:30-35, 41, 49). Ayatüsia niyoutuin achiki Jehová maaʼulu yaa eein wayuu mojutuka amüin na nüneekakana süpüla nuʼunirüin wakuwaʼipa.

12. ¿Jamüshii jüüjüüinjanakaʼa waya namüin na wawalayuu nüneekakana Jehová süpüla nuʼunirüin wakuwaʼipa?

¹² Wainma kasa jüüjüüka aaʼujee waya namüin na wawalayuu nüneekakana Jehová süpüla nuʼunirüin sukuwaʼipa waʼyataain. Jamüsüjaʼa napansaajüinjatüle wanee pütchi süpüla wanaawain sümaa tü sümakat tü Bibliakat jee shiale nanoutajatüin wanee kasa anainjatka atuma waʼyataain naaʼinramaatüin tia (Prov. 4:18). Naaʼinrüin tia süka naaʼinreein tü nüchekakat  Jehová. Nnojotsü naneeküin wanee kasa süka naaʼin namüiwaʼa. Naaʼinrüin tia wanaapünaa sümaa tü sümakat tü Nünüikikat Maleiwa, tü pütchi anasü oʼunirüinjatkat wakuwaʼipa.

13. (1) ¿Kasa wayu tü pütchi anakat? (2) ¿Jamüsü aneetkaʼa wakuwaʼipa woonoole sümaa tia pütchikat?

¹³ «Ayataʼaya püshatüin sukuwaʼipa tü pütchi anasü paapakat tatuma» (2 Tim. 1:13). Tü pütchi anakat shia tü suluʼujeejatkat tü Bibliakat, tü oʼunirüinjatkat nakuwaʼipa na anoujashiikana (Juan 17:17). Shia tü shikiisükat tü wanoujakalü anain. Nekirajüin waya na wawalayuu oʼunirakana wakuwaʼipa süpüla pansaain tü wanoujakalü anain sümaa tia pütchikat. Aneerü wakuwaʼipa waaʼinrüle tü sümakat tü Bibliakat.

14. ¿Jamüshii nnojoliikaʼa ayatüin noonooin sümaa tü pütchi anakat waneinnua anoujashii?

¹⁴ ¿Jameerü wakuwaʼipa nnojoliire woonooin sümaa tü pütchi anakat? Jülüjataa waaʼin tü alatakat sümaiwa namüin waneinnua anoujashii. Eejana waneinnua anoujashii aʼwalakajakana alawaa süchiki süntüitpain nükalia Jehová. Eesüjaʼa eejatüle wanee karaloʼuta ashajünaka süchiki tia, nia kashajalaka Pablo tia karaloʼutakat naküjainruʼu. Noonoo amaalü waneinnua anoujashii chajanakana Tesalónica tü alawaa aküjünakat jee naʼwalakajüin shia. Nnojotsüjeʼe nanoujain anain tü alawaakat jülüjaleje naaʼin tü nümakat Pablo namüin wanaa sümaa eejachin nia namaa (2 Tes. 2:1-5). Nüküjain Pablo namüin nnojoluinjatüin noonooin amaa süpüshuaʼa tü pütchi naapakat yalapünaa. Süpüla nnojoliinjanain nemeejünüin piantua, müshi Pablo namüin suluʼu tü chiiruaajatkat karaloʼuta nüshajaka namüin: «Tayakai Pablo tashajüin karaloʼutakat tüü süpüla tasaküin jia, maʼwaisia tanüiki tashajapa wanee karaloʼuta süpüla jütüjaain saaʼu tashajalain shia» (2 Tes. 3:17).

15. ¿Kasa waaʼinrajatka suulia wemeejünüin? Püküja tü alatakat namüin na wawalayuukana. (Piirakaa sümüin tü ayaakuaakat).

¹⁵ ¿Kasa watüjaka sünainjee tü nüshajakat Pablo namüin na anoujashii chajanakana Tesalónica? Waapüle süchiki wanee pütchi nnojotka pansaain sümaa tü sümakat tü Bibliakat, eejüinjatü waaʼin suulia wemeejünüin. Jamüsüjaʼa sümaiwa aluwataanüsü wanee karaloʼuta namüin na wawalayuu kepiapuʼukana chaa  Unión Soviética. Saashin tia karaloʼutakat akatalaainjana na wawalayuukana noulia na wane anoujashiikana. Müsü nachuntayaakai saaʼin tia namüin na wawalayuu oʼunirakana sukuwaʼipa waʼyataain. Nnojoishii emeejünüin na wawalayuu waneepiakana nümaa Maleiwa. Nayaawata aaʼu nnojoluin pansaain tü achuntunakat namüin suluʼu tia karaloʼutakat sümaa tü ekirajünakalü anain naya. Jamüsüjaʼa maaʼulu yaa nachajaain sukuwaʼipa na waʼünüükana süpüla nnojoliinjanain paaʼinwain waya, nemeejeein waya sükajee tü neʼitaakat suluʼupünaa internet otta redes sociales. Süpüla nnojoluinjatüin sumojujaain wakuwaʼipa wayaawatüinjatü aaʼu pansaale tü pütchi waapakat jee tü waashajeʼerakat sümaa tü ekirajünakalü anain waya (2 Tes. 2:2; 1 Juan 4:1).

16. Sünainjee tü sümakat Roma 16:17, 18, ¿kasa waaʼinrajatka suulia wemeejünüin sükajee pütchi nnojotka pansaain?

¹⁶ Paaʼinwa pia namaa na waneepiakana nümaa Jehová. Nücheka achiki Maleiwa paaʼinwainjanain waya namaa na wawalayuukana sünain aʼwaajaa nia. Wounteerü tia woonoole sümaa tü pütchi shiimainkat. Eeshiijaʼa süpüla nnojoliin paaʼinwain waya wanoujale nünüiki wanee wawala aküjakai pütchi nnojotka pansaain sümaa tü pütchi shiimainkat. Müsüjeseʼe nüküjain Maleiwa wamüin wattaluʼuinjanain waya noulia naya wayuukana (paashajeʼera Roma 16:17, 18).

17. ¿Jameerü wakuwaʼipa wayaawatüle saaʼu tü pütchi shiimainkat otta woonoole sümaa?

¹⁷ Aneerü sukuwaʼipa wanoula wayaawatüle saaʼu tü pütchi shiimainkat otta woonoole sümaa (Éf. 4:15, 16). Nnojoleena nimeejüin waya Satanás sükajee tü pütchi alawaa nikirajakalü anain otta müsia naaʼinmajeena waya Jehová soʼunnaa tü kaʼi shiʼreetkat maʼin oʼu wayuu müliaa. Ayata woonooin waneepia sümaa tü pütchi shiimainkat. Eejeechikalaka wamaa chi Maleiwa jimatakai atuma saaʼin wayuu (Filip. 4:8, 9).