Na aipiruashii wayuu kaʼapülakana, naya na aapiee ajaʼttirakana Jerusalén otta nayainjana ajaʼttiraka tü kasa nuluwataakalü aaʼu Satanaa soʼu Armagedón. Jeketü apansaajünüin wamüin tia pütchikat. Wekirajaa jamüin choʼujaaka süpansaajünüin tia.

Soʼu 607 nüpülapünaa Kürisüto, niʼrüin Ezequiel nutuma Jeʼwaa tü kasa alatajatkat chaa Jerusalén süpülapünaa sajaʼttinnüin. Tü kasa niʼrakat Ezequiel shia mojulaajüin maʼin tü wayuuirua chajatkat Jerusalén. Niʼrüin aipiruashii wayuu kaʼapülashii, tü naʼapülakat aʼyülüjia wayuu. Niʼraka joo wanee wayuu kasheʼinshi kuluulu liino, eejatü najapuluʼu wanee iitachon tintamaajatü (Ezeq. 8:6-12; 9:2, 3). Nümaka Jeʼwaa nümüin chia wayuukai: «Pülata suluʼupünaa tü pueulokot Jerusalén, pejeerajaiwa neʼipoʼunain na wayuu eʼrakana maʼin müliaa sutuma tü kasa kashüülasü aainjünakat suluʼu». Na aipiruashii wayuu kaʼapülakana, nuluwataala naya Jeʼwaa süpüla noʼutüinjatüin saaʼin süpüshuaʼa tü wayuu mejeerujuukalü eʼipoʼunain (Ezeq. 9:4-7, TNM). ¿Kasa shikirajaka anain waya tü niʼrakat Ezequiel? ¿Jarai chi wayuu kajapuluʼukai wanee iitachon tintamaajatü?

Nüküjatüjülia Ezequiel tia pütchikat soʼu 612 nüpülapünaa Kürisüto. Ekeraajüsü tü kasa niʼrakat Ezequiel jaʼrai juya süchikijee, wanaa sümaa saapünüin shikii Jerusalén nutuma Maleiwa sümüin Babilonia. Nüneeküin Jeʼwaa Babilonia süpüla sajaʼlajeʼerüin tü nupueulosekat saaliijee moonooin naya nümaa (Jer. 25:9, 15-18). ¿Kasa alataka namüin na wayuu eʼrakana maʼin müliaa sutuma tü kasa kashüülasü aainjünakat Jerusalén? Nuʼtteʼerüin naya Jeʼwaa.

Sünain tü niʼrakat Ezequiel, nnojoishi niain  ejeerajüin wayuu otta nnojoishi nia yalajachin sünain ajaʼlajeʼeraa Jerusalén. Naya na aapieekana ajaʼttiraka Jerusalén. Tü niʼrakat Ezequiel shiiʼiyatüin wamüin tü kasa alatakat chaa iipünaa. Niʼitaain Jeʼwaa najapuluʼu na aapieekana süpüla najaʼlajeʼerüin na mojulaashiikana jee naaʼinmajüin na anamiakana süpüla noʼttaain. *

Piantuainjatü ekeraajüin tia pütchikat. ¿Joujeerü shikeraajaka süchikuaʼa otta jameerü sukuwaʼipa? Paala sümaiwa, aküjünapuʼusü suluʼu tü karalouktairua eekat wamaʼana, nayain na anoujashii chainjanakana iipünaa chi wayuu kajapuluʼukai wanee iitachon tintamaajatü. Eʼitaanayaasü waaʼinruʼu nejeetse na wayuu oʼttaainjanakana naapajapa tü pütchikat otta naapaapa sümaa. Jooluʼu choʼujaaitpa wanoukteʼerüin tü watüjaapuʼukalü aaʼu. Wekirajaa anainrü jekenainka tü sümakat Mateo 25:31-33, wayaawataka saaʼu niain Jesuu aneekünüin süpüla süsalain saainjala wayuu nutuma. Naaʼinreerü tia suʼunnaa tü müliaa miyoʼusükat. Soʼu tia, nüneekeena Jesuu jaraliin na wayuu makana aka saaʼin anneerü süpüla noʼtteʼennüin otta jaraliin na makana aka saaʼin kaaʼula süpüla najaʼlajeʼennüin.

¿Kasa shikirajaka anain waya tü niʼrakat Ezequiel? Anuu jaʼraisü kasa:

1.  Süpülapünaa sajaʼttinnüin Jerusalén, nuluwataain Jeʼwaa Ezequiel, Isaías otta Jeremías süpüla naapirüin tü wayuukalüirua süchiki tü alatajatkat. Maaʼulu yaa, nükaaliinjain Jeʼwaa na anoujashii chainjanakana iipünaa süpüla nekirajüin na aʼyataashiikana nümüin jee süpüla naapirüin wayuu süpülapünaa suʼttüin tü müliaa miyoʼusükat. Müshiʼiya naya, akaaliinjünüshii sünain aapiraa wayuu natuma napüshuaʼa na aʼyataashiikana nümüin Maleiwa (Mat. 24:45-47, TNM).

2.  Nnojotsü niʼitaain Ezequiel nejeetse na wayuu oʼttaainjanakana. Müshiʼiya na aʼyataashiikana nümüin Maleiwa maaʼulu yaa, nnojotsü naaʼinrüin tia. Aküjüshii neʼe pütchi otta naapirüin wayuu süchiki tü alatajatkat soʼu palit kaʼi. Nakaaliinjain naya na aapieekana süpüla naküjüin pütchi sainküin mmaka süpüshuaʼa (Alat. Map. 14:6).

3.  Soʼu nükalia Ezequiel, na wayuu oʼttaakana nnojotsü ejeerajünüin neʼipoʼunain. Akaʼaya na oʼttaainjanakana süchikijee tü müliaa miyoʼusükat, nnojoleerü aaʼinnüin tia namüin. ¿Kasaka naaʼinrüinjatüin süpüla noʼttaainjanain? Oushikajaamaatüinjana naya süchiirua nukuwaʼipa Kürisüto, naapüinjatü naaʼin nümüin Maleiwa otta nakaaliinjüinjana na nuwalayuukana Kürisüto sünain aküjaa süchiki Nuluwataaya Maleiwa (Mat. 25:35-40, TNM). Suʼunnaa tü müliaa miyoʼusükat, müsü shiʼitaaneetkai nanain naya wayuukana nejeetse süpüla noʼttaainjanain.

4.  Chi wayuu kajapuluʼukai wanee iitachon tintamaajatü, nia Jesuu. Suʼunnaa tü müliaa miyoʼusükat, meerü niʼitaakai saaʼin nejeetse nanain na wayuu wattakana aalii süka müin naya maʼaka saaʼin anneerü nümüin. Kateetkalaka noʼu süpüla kaʼikat süpüshuaʼa yaa Mmapaʼa (Mat. 25:34, 46, TNM). *

5.  Müshiʼiya na aipiruashii wayuu kaʼapülakana, naya na aapiee nümaainjanakana Jesuu. Najaʼttireena soʼu palit kaʼi na wayuu mojulaashiikana jee müsia süpüshuaʼa tü kasa mojusükat (Ezeq. 10:2, 6, 7; Alat. Map. 19:11-21).

Sutuma tü jaʼraisükat kasa wekirajaaitpaka anain, weʼitaain waaʼin sünain nuʼtteʼereenain Jeʼwaa na waneepiakana nümaa najaʼlajeʼerapa na mojulaashiikana (2 Ped. 2:9; 3:9). Jee müsia wayaawata aaʼu choʼujaain maʼin waküjüin pütchi maaʼulu yaa. Choʼujaasü maʼin saapinnüin süpüshuaʼa wayuu süchiki tü alatajatkat, süka jamüin, sülüʼülaain sükalia sajaʼttajatkat oʼu kasakat süpüshuaʼa (Mat. 24:14).