1. ¿Kasa talataka maʼin atuma waaʼin?

TALATÜSÜ maʼin waaʼin süka nakooʼomüinraain na aʼyataashiikana nümüin Jeʼwaa. Tia shia sutuma müin waya maʼaka saaʼin wanee luusa chuwataka. Jamüsüjaʼa suʼunnaa tü juya alatakat, alatüshii suulia poloo miyoone na wayuu wekirajakana sainküin mmaka süpüshuaʼa. Jee kojuya miyoone wayuu oʼunakana sünain tü Outkajawaakat eere Sotuin Waaʼin Outuin Jesuu otta nekirajaa anainrü aishaatain wayuu nüpüla Jeʼwaa, nuluwataainjeseʼe chi Nüchonkai süpüla naapajiraain nikii waaʼu (1 Juan 4:9).

2, 3. (1) ¿Kasa eeka süpüla kapüleein anainjee paaʼinwain waya sünain aʼwaajaa Jeʼwaa? (2) ¿Kasa wekirajaainjatka anain sünain ekirajaayakat tüü?

² Watta naalii wawalayuu naatawaikana anüikii sainküin mmaka. Nnojotpejeʼe kapüleein wamüin paaʼinwain waya sünain aʼwaajaa Jeʼwaa sutuma tia (Alat. Map. 7:9). Jaʼitairü naatain wanüiki otta jaʼitaina jalain kepiain waya, eeshii süpüla müin waya maʼaka saaʼin wanee luusa chuwataka pasanain sünain wayuu (Filip. 2:15).

³ Waʼwaajüin Jeʼwaa sükajee waʼyataain nümüin, sükajee paaʼinwain  waya otta sükajee eejüin waaʼin süpüla nükalia. Sünain ekirajaayakat tüü, wekirajaajeerü anain tü waaʼinrajatkat süpüla müin aka waya saaʼin wanee luusa sünain tia apünüinsükat kasa (paashajeʼera Mateo 5:14-16).

4, 5. (1) ¿Kasa maa waaʼinrajatka süpüla müin warattuuikai saaʼin tü mmakat watuma? (2) ¿Kasa eeka sünainjee kamaneein waya sümüin wayuu? (Piirakaa sümüin tü ayaakuaa suluʼukat süpana 21).

⁴ Sükajee waküjain pütchi otta wekirajüin wayuu, müsü warattuukai saaʼin watuma tü mmakat (Mat. 28:19, 20). Soʼu 1925, eejatü wanee pütchi suluʼu tü rewiisütakat The Watch Tower ojuʼitaka juunioʼu 1, müsü sünülia «Luz en la oscuridad». Anuu sünüiki: «Nnojoishi süpüla waneepiainjachin wanee wayuu nümaa chi Senyotkai maaʼutpünaa [...] nnojoire müin nia maʼaka saaʼin wanee luusa warattuuika maʼin». Sümaka süchikijee: «Naaʼinrüinjatü tia sükajee nüküjain tü pütchi anasükat sümüin wayuu sainküin mma otta sükajee pansaain nukuwaʼipa sümaa tü nümakat Maleiwa». Waküjale pütchi otta wulere wakuwaʼipa noʼuluʼu Jeʼwaa, waʼwaajeechi nia sükajee tia. Jülüjasü saaʼin wayuu tü wakuwaʼipakat waküjapa pütchi. Wakulemeraale otta kamaneere waya sünain asakaa wayuu, aneerü sünüiki wayuu wachiki otta nüchiki chi Wamaleiwasekai.

⁵ Anuu nünüiki Jesuu namüin na nikirajüinkana: «Jikerolapa suluʼu tü miichikat, ‹Eeshi Maleiwa jümaa›, meena jia namüin na kepiakana suluʼu» (Mat. 10:12). Chaa eepuʼule nüküjain pütchi Jesuu, kamaneepuʼushii na wayuukana namüin na antakana nepialuʼumüin sümaa nnojoliin neʼraajüin. Nnojotpejeʼe müin sukuwaʼipa tia maaʼulu sainküin tü mmakat. Eeshii wayuu eekai wainmajüin naaʼin otta eekai jashichin süntüle wayuu naatajannuu nepialuʼumüin. Akatsaʼa aneerüin naaʼin müleka weeʼiyatüle nojutü namüin sümaa kamaneein waya namüin. Müsia neʼe sukuwaʼipa aküjaa pütchi süka tü kareetachonkat eere jouluin wayuu, nakulemeraale na wawalayuukana sümaa nasaküin na wayuu alatakana eere naya, eeshii narütkaajeenale süpüla aapawaa karaloʼuta jee shiale süpüla yootuin naya namaa.

6. ¿Kasa naaʼinraka wanee wawalayuu laülaainna süpüla ayatüin naya sünain aküjaa pütchi?

⁶ Eeshi wanee wawala sümaa nuʼwayuuse chejeʼewalii Inglaterra, laülaainnain naya otta isairü nachiki aküjaa pütchi sainküin piichi süka ayuulin maʼin naya. Neʼitaaka wanee meesa sümaa rewiisüta otta karaloʼutairua soʼuluʼu nepia süpüla naküjain pütchi namüin na alatakana yalapünaa. Süka kepiain naya peje sünain wanee koleejia, neʼitaain tü karaloʼutakalüirua suʼunnaa tü oora nalatawaikalü oʼu na wayuu asaajüinjanakana nachonnii koleejialuʼujee. Eeshii wayuu eekai nalüʼüjüin tü karaloʼutakat Los jóvenes preguntan volúmen 1 jee 2 otta waneirua poyeeto. Eeka wanee pürekutsoolü aküjaiwaka pütchi namaa naya wawalayuukana. Neʼrüin na wayuukana kamaneein tia wawalakat otta na wawalayuu laülaakana, müshijeseʼe eein wanee wayuu ekirajaakai sünain tü Wiwüliakat naʼakajee na alatawaikana sünain asaajaa nachonnii.

7. ¿Kasa waaʼinrajatka süpüla wakaaliinjain na wayuu antakana suluʼujee wanee mma naatajatü?

⁷ Maaʼutpünaa yaa, watta naalii na wayuu oʼunakana noumainpaʼajee süpüla kepiaa suluʼu wanee mma naatajatü. ¿Kasaka waaʼinrüinjatüin süpüla neʼraajüin Jeʼwaa naya wayuukana? Tü waaʼinrajatkat palajana shia wekirajaale sünain asakaa naya suluʼu nanüiki. Eesü süpüla wainküin tia wekirajaale süka JW Language otta eesü süpüla wekirajaain sünain waneirua pütchi anaka namüin süpüla yootuin waya namaa. Süchikijee tia, eesü süpüla waküjain namüin süchiki tü paajinakat jw.org sümaa weeʼiyatüin namüin video jee karaloʼutairua eeka suluʼu nanüiki (Deut. 10:19).

8, 9. (1) ¿Kasa ekirajünaka anain waya sünain tü outkajawaakat Wakuwaʼipa otta Waʼyataain nümüin Maleiwa? (2) ¿Kasa naaʼinrajatka na wawalayuukana süpüla nasoutuin nachonnii sünain tü outkajawaakat?

 ⁸ Nikirajüin waya Jeʼwaa sükajee tü outkajawaakat Wakuwaʼipa otta Waʼyataain nümüin Maleiwa süpüla watüjainjanain aküjaa pütchi. Sutuma tü kasa ekirajünakalü anain waya sünain outkajawaakat tia, nnojoishii mmoluwaain waya waküjapa pütchi jee wouyantapa wachikuaʼa eemüin na wayuukana.

⁹ Ponusü maʼin naaʼin na wayuu antakana sünain tü outkajawaakat wanaa sümaa nasoutuin na tepichikana shiʼipajee tü asakinnakalü anain. Eeshii süpüla pikirajüin na püchonniikana süpüla nasoutuin sükajee nanüiki shiʼipajee tü asakinnakalü anain. Eeshii na wayuu ekirajaweekana sünain tü Wiwüliakat sutuma naapüin nanüiki na tepichikana sünain tü outkajawaakat (1 Cor. 14:24, 25).

10. ¿Jamüshii paaʼinwajiraajeenaka na wayuukana naʼwaajüle Jeʼwaa sümaa napüshi?

¹⁰ Wanee sukuwaʼipa süpüla müin warattuuikai saaʼin watuma tü mmakat shia wanaa sümaa paaʼinwajiraain waya namaa na wapüshikana jee namaa na wawalayuukana. Jamüshiijaʼa na wayuu kachonshiikana, nachajaainjatü maʼin sukuwaʼipa süpüla waneepiainjanain naya sünain aʼwaajaa Maleiwa sümaa napüshi. Eeshii na anajawaikana soʼu kaʼikat tia tü programa ojuʼitawaikat kashiwai suluʼu JW Broadcasting. Anashii yootule naya süchiki tü naaʼinrajatkat süpüla neʼitaain suluʼu nakuwaʼipa tü natüjakat sünainjee tü nanajakat. Jülüjeesü maʼin naaʼin na wayuu kachonshiikana naatawalin tü choʼujaakat namüin na tepichikana noulia na jimaʼaliikana, müsüjeseʼe nachajaainjatüin maʼin sukuwaʼipa süpüla natüjainjanain napüshuaʼa sünainjee tü nanajakat (Sal. 148:12, 13).

11-13. ¿Kasa eeka süpüla waaʼinrüin süpüla paaʼinwajiraain na wawalayuukana?

 ¹¹ Eeshii süpüla wakaaliinjain wapüshuaʼa süpüla paaʼinwajiraain waya suluʼu tü outkajaaleekat, jaʼitakajeʼe neʼe na jimaʼaliikana, eeshii süpüla naaʼinrüin tia. Müle shia watuma, wakaaliinjeena na waneinnua süpüla müin warattuuikai saaʼin tü mmakat natuma. Jamüshiijaʼa na jimaʼaliikana, eeshii süpüla yootuin namaa na wawalayuu laülaainnakana otta nasakirüin naya sünain kasain akaaliinjain naya süpüla ayatüin sünain aʼyatawaa nümüin Jeʼwaa suʼunnaa wainma juya. Watteerü maʼin saalii kasa anasü natüjaka na jimaʼaliikana nanainjee wawalayuukana naainnua. Naaʼinrüle tia na jimaʼaliikana, atütülaajeerü naaʼin jee müsia naaʼin na wawalayuu laülaainnakana. Wanee kasa eeka süpüla weʼitaain wapüleerua shia wasaküin na wayuu antakana sünain tü outkajawaakat. Eeshii süpüla wakulemeraain namüin, wakaaliinjain naya süpüla natüjain saaʼu eeinjanale naya aikalaain jee müsia eeshii süpüla weʼraajirüin naya na wawalayuukana. Waaʼinrüle tia, aneerü maʼin naaʼin watuma.

¹² Püneekünüle süpüla piainjachin oʼunirüin sukuwaʼipa tü aküjaakat pütchi, eeshii süpüla pükaaliinjain na wawalayuu laülaainnakana süpüla ayatüin naya sünain aʼyatawaa nümüin Jeʼwaa. Müsüjeseʼe nakumajüinjatüin sukuwaʼipa süpüla naküjainjanain pütchi na wawalayuu laülaainnakana eere nnojoluin kapüleein shia namüin. Eeshii süpüla najütüin wanee wawala jimaʼai süpüla nujuʼitüin sünain aküjaa pütchi namaa. Jülüjeesü naaʼin na laülaashiikana eein na wawalayuu isakana achiki ojuʼitaa sünain aküjaa pütchi süka ayuulin naya jee shiale sutuma waneirua kasa. Nnojorüle nachuntuin na laülaashiikana wanee kasa kapüleeka namüin na wawalayuukana, jaʼitaina miyoʼuyuuin jee tepichijain naya nakaaliinjeena süpüla ayatüin naya sünain aküjaa pütchi sümaa talatüin naaʼin (Lev. 19:32).

¹³ Talatüsü maʼin naaʼin na israeliitakana sutuma paaʼinwajiraain naya sünain aʼwaajaa Jeʼwaa. Anuujeseʼe nünüiki chi salmistakai: «¡Anakatche maʼin kottiraale na wawalayuukana sümaa paaʼinwajiraain naya!» (paashajeʼera Salmo 133:1, 2). Naashin niakai, tü nakuwaʼipakat na israeliitakana suluʼu müin naya paaʼinwain, müsü aka saaʼin tü seita oʼyotunakat saaʼu nikii chi wayuu aneekünakai süpüla wanee aʼyatawaa anasü maʼin; saamatüsü tia seitakat sümaa jemetüin seejuu. Maaʼulu yaa, eesü süpüla anain naaʼin na wawalayuukana watuma sükajee kamaneein otta anamiain waya namüin. Paaʼinweena waya namaa waaʼinrüle tia. ¿Eesüche süpüla püchajaain sukuwaʼipa süpüla piʼraajüin maʼin na wawalayuukana? (2 Cor. 6:11-13, TNM).

14. ¿Kasa paaʼinrajatka süpüla müin pia maʼaka saaʼin wanee luusa chuwatüsü pasanain nanain na wayuu kepiakana pejepünaa pünain?

¹⁴ Eeshii süpüla müin waya maʼaka saaʼin wanee luusa chuwatüsü pasanain nanain na wayuu kepiakana pejepünaa wanain. Kamaneere waya namüin eeshii süpüla nekirajaweein sünain tü shiimainkat. Anasü püsakireʼerüle paaʼin sünain tüü: «¿Jamüsü nanüiki tachiki na kepiakana pejepünaa tanain? ¿Wulesüche sümaa nnojoluin kasain walakatüin kasa tepiapaʼa? ¿Anasüche shiyolojo tü wanee piichikalüirua sünainjee? ¿Takaaliinjawalinche na kepiakana pejepünaa tanain?». Yootopa pia namaa na wawalayuukana, püsakira naya sünain jamüin nanüiki na kepiakana pejepünaa nanain, napüshi, na koleejiajiraakana namaa otta na aʼyataajiraakana namaa sutuma neʼrüin anain maʼin nakuwaʼipa noʼupala (Éf. 5:9, TNM).

15. ¿Jamüsü eejüinjatka maʼin waaʼin?

¹⁵ Süpüla ayatüinjanain waya müin aka wanee luusa chuwatüsü, jülüjeesü waaʼin sülüʼülüin sükalia süpüla sajaʼttüin kasaka süpüshuaʼa. Kojuyatua müin nünüiki Jesuu namüin na nikirajüinkana: «Anakaja müleka eere jaaʼin» (Mat.  24:42; 25:13; 26:41). Müleka wattayürüle sükalia tü müliaa miyoʼusükat saaʼin wamüin, nnojoleerü eejüin waaʼin süpüla aküjaa pütchi sümüin wayuu (Mat. 24:21). Meena waya maʼaka saaʼin wanee luusa eekai sümatsüinjaain jee eekai shiyokojooin.

16, 17. ¿Kasa waaʼinrajatka süpüla eejüin waaʼin?

¹⁶ Choʼujaasü eejüinjatüin maʼin waaʼin maaʼulu süka sumojujaain maʼin tü mmapaʼakat. Watüjaa aaʼu sajaʼlajaweerüin kasaka süpüshuaʼa soʼu tü kaʼi nüneekakalü Jeʼwaa süpüla (Mat. 24:42-44). Nnojotsü ashapajaainjatüin waaʼin sümaʼinruʼu waʼatapajüin tia kaʼikat otta eejüinjatü waaʼin waneepia. Waashajeʼerüinjatü Nünüiki Maleiwa waneepia otta eeinjatü waaʼin sünain achuntaa nümüin (1 Ped. 4:7). Washata nakuwaʼipa na wawalayuu kakaliainakana sünain aʼyatawaa nümüin Jeʼwaa. Eesü süpüla paashajeʼerüin nachiki waneinnua wawalayuu maʼaka saaʼin tü aküjünakat suluʼu tü pütchikat «Siete décadas aferrado a la falda de un judío», suluʼusü Aapiria Wayuu ojuʼitaka aaʼuriiroʼu 15 soʼu 2012, süpana 18 sünainmüin 21 (alijunaikiruʼusü).

¹⁷ Waneepia waya sünain tü waʼyataainkat nümüin Jeʼwaa. Waaʼinra kasa anasü napüleerua na waneinnua otta namaa waya na wawalayuukana. Talateerü waaʼin waaʼinrüle tia otta meerü mamaʼakai saaʼin wamüin tü kaʼikat (Éf. 5:16). Wainma kasa naaʼinraka na wawalayuukana sünain aʼyatawaa nümüin Maleiwa soʼutpünaa  juyaka 1900. Wainmaleepejeʼe kasa wountaka waaʼinrüin maaʼulu sutuma nükaaliinjain waya Jeʼwaa. Tia müsü aka saaʼin wanee luusa chuwatuuika maʼin atuma tü mmapaʼakat.

18, 19. ¿Kasa eka süpüla naaʼinrüin na laülaashiikana süpüla waʼyataain nümüin Jeʼwaa süka süpüshuaʼa waaʼin? Püküja tü naaʼinrakat na laülaashiikana napüleerua waneinnua wawalayuu.

¹⁸ Mayaapejeʼe waainjawalin kasa nnojotka anain noʼuluʼu Jeʼwaa, ayatüshii nuuʼulaain waya waʼyataain nümüin. Süpüla eejüin waaʼin jee ayatüin waya sünain aʼyatawaa nümüin, naapüin Jeʼwaa wamüin na laülaashiikana suluʼu tü outkajaaleekat süpüla nakaaliinjain waya (paashajeʼera Éfeso 4:8, 11, 12, TNM). Müsüjeseʼe kapülainjatüin waaʼin wanaa sümaa nülapalaain waaʼu wanee laülaashi otta jülüja waaʼin tü nümakat süpüla watüjain nünainjee.

¹⁹ Eeshi wanee wawala sümaa nuʼwayuuse kepiakana Inglaterra otta mojujiraashii naya, shiasaʼa nachuntaka kaaliinwaa namüin na laülaashiikana. Anuu sünüiki tü wawalakat süchiki tü alatakat namüin: «Nnojotsü nukumajayaain sukuwaʼipa wapüleerua sünain aʼyatawaa nümüin Jeʼwaa». Nümaka chi suʼwayuusekai: «Shiimain nnojoluin anain tatuma nekirajia na tapüshikana otta nnojoliin waneepiain waya sünain tü kaʼi waʼwaajakalü oʼu Maleiwa». Aashajaashii na laülaashiikana namaa süchiki tü nukuwaʼipakat Jesuu sünain naaʼinmajüin na nikirajüinkana jee sünain jülüjain naaʼin tü kasa choʼujaakat namüin. Naküjain na laülaashiikana nümüin chi wawalakai shiain anain nüshatüle nukuwaʼipa Jesuu otta naküjain sümüin tü nuʼwayuusekat nnojoluinjatüin shia kashapajaaralüin. Otta müsia naküjain waneirua kasa anaka süpüla naaʼinrüin naʼwaajüinjanapa Maleiwa namaa na piamashiikana nachonnii (Éf. 5:21-30). Aʼyataashi maʼin chia wawalakai süchiirua nunouteʼerüin tü nukuwaʼipakat. Natütüleʼerüin nia na laülaashiikana süpüla ayatüin nia sünain aaʼinraa tia otta süpüla niʼitaain naaʼin sünain nükaaliinjeechin nia chi naaʼinkai Maleiwa. Sutuma alin naya wawalayuukana napüla na laülaashiikana sümaa kamaneein naya namüin, anasü maʼin nakuwaʼipa.

20. ¿Kasa eeka sünainjee müin waya maʼaka saaʼin wanee luusa chuwataka pasanain sünain wayuu?

²⁰ Anuu sünüiki Salmo 128:1 «Anataʼaleeshijaʼa chi mmoluwaakai neema Jeʼwaa, chi aaʼinrakai tü nuluwataakalü anain». Sünain ekirajaayakat tüü wekirajaa anainrü tü waaʼinrajatkat süpüla müin waya maʼaka saaʼin wanee luusa chuwataka pasanain sünain wayuu. Waaʼinrüin tia sükajee wakaaliinjain wayuu süpüla shiʼyataain nümüin Jeʼwaa, sükajee wachajaain sukuwaʼipa süpüla paaʼinwain na wawalayuukana otta sükajee eejüin waaʼin. Waaʼinrüle tia, talateerü maʼin waaʼin, shiʼreerü wayuu tü kasa anasü waaʼinrakat otta keeʼireejeerü naaʼin naʼwaajüin Jeʼwaa, chi Washi iipünaajachikai (Mat. 5:16, TNM).