1, 2. ¿Kasa pansaainjatka suluʼu waaʼin? (Piirakaa sümüin tü ayaakuaakat).

WEKIRAJAAITPA anain sünain ekirajaaya apünüin, nnojolin anain Jeʼwaa süpüla aluwatawaa naashin chi Yolujaakai. Jee müsia naashin niakai aneerü nakuwaʼipa na wayuukana laülaale naya saaʼu nakuwaʼipa namüiwaʼa. ¿Shiimainchejeʼe tia? Laülaale na wayuukana saaʼu nakuwaʼipa namüiwaʼa sümaa katüin noʼu süpüla kaʼikat süpüshuaʼa, ¿anaʼleejeetche nakuwaʼipa suulialeʼeya niain Maleiwa aluwataain naaʼu? ¿Talateetche paaʼin müle pukuwaʼipa saaʼin pümüin?

² Nnojotsü jaralüin asoutuinjatüin pooʼopünaa tü pütchikat. Jülüjüinjatü maʼin waaʼin tia süpülapünaa wasoutuin. Pansaainjatü suluʼu waaʼin niain neʼe Jeʼwaa anaka süpüla aluwatawaa, anain sukuwaʼipa nuluwataaya otta weeʼiyatüinjatü kojutuin shia wamüin. Süküjain wamüin tü Wiwüliakat jamüin weʼitaainjatka waaʼin sünain anain sukuwaʼipa nuluwataaya Maleiwa. Wekirajaa sünain tü sümakat tü Wiwüliakat süchiki niainjachin neʼe Jeʼwaa Laülaaka saaʼu kasa süpüshuaʼa.

3. ¿Jamüshi niaka neʼe Jeʼwaa anain süpüla Aluwatawaa?

³ Nia neʼe Jeʼwaa anaka süpüla aluwatawaa süka niain chi Maleiwa pülashikai maʼin otta niain chi Kakumalakai kasa süpüshuaʼa (1 Crón. 29:11; Aluw. 4:24). Anuu nanüiki na 144.000 anoujashii chainjanakana aluwataain wanaa nümaa Kürisüto: «Maleiwakalee, waʼwaajüin pia süka piainjaʼa neʼe piakai aluwataain waaʼu. Alanaʼaleeshia maʼi pia sünain anain je sünain pülashin, süka piainjaʼa kakumalain kasakat süpüshua suluʼu tü püchekakat paaʼinyaka» (Alat. Map. 4:11). Süka niain Jeʼwaa kakumalain kasa süpüshuaʼa, nia neʼe niakai nümüiwaʼa aluwataainjachika naaʼu na wayuukana otta naaʼu na aapieekana.

4. ¿Jamüsü nnojotka anain wayoutule Jeʼwaa sutuma laülaain waya saaʼu wakuwaʼipa wamüiwaʼa?

⁴ Aluʼujasaʼa Satanaa, nnojotsü kasainjatüin nuluwataain aaʼu süka nnojoluin kasain nukumajüin. Yaletüsü maʼin naaʼin Satanaa nümaa Adán otta Eva wanaa sümaa neʼrüliijaain wayumüin nümüin Jeʼwaa otta nayoutuin niainjachin aluwataain naaʼu (Jer. 10:23). Shiimainya eein süpüla naneeküin tü keeʼireekat naaʼin namüiwaʼa jee naneeküin nakatalaainjanale nuulia Jeʼwaa. ¿Anasüche nayoutule Jeʼwaa sutuma laülaain naya saaʼu nakuwaʼipa namüiwaʼa? Nnojottaa. Mayaapejeʼe wainmain kasa anasü waneekaka waneepia süka eein süpüla waneeküin süka waaʼin wamüiwaʼa tü keeʼireekat waaʼin, nnojotsü anain weʼrüliijaale wayumüin nümüin chi Kakumalakai waya. Waaʼinrüle tia, nnojotsü anain mmata tü waneekakat süka waaʼin wamüiwaʼa. Choʼujaashaatasü wamüin wayakana wapüshuaʼa niain Jeʼwaa laülaain waaʼu.

5. ¿Jamüsü watüjaaka saaʼu lotuin sukuwaʼipa süpüshuaʼa tü naaʼinrakat Maleiwa?

⁵ Wanee kasa anaka anainjee nuluwataaya Maleiwa shia lotoshootoin sukuwaʼipa süpüshuaʼa tü kasa naaʼinrakat. Müshi nia: «Taya tayakai Jeʼwaa, chi aipüraikai maʼin, chi lotokoi akuwaʼipa sümüin wayuu saaʼu mmaka. Kamalainshaatasü tamüin aaʼinraa tia» (Jer. 9:24, TNM). Nia Jeʼwaa shikiishikai tü lotookat akuwaʼipa. Nnojoishi nia asakirüin süchiirua tü namakat na wayuukana süpüla nütüjaain saaʼu tü anakat süpüla naaʼinrüin. Lotoshoonosü sukuwaʼipa tü nuluwataakalü anain wayuu. Anuu sünüiki tü Wiwüliakat: «Lotusü maʼin sukuwaʼipa tü puluwataayakat [Jeʼwaa]». Sutuma pütchikat tüü, watüjaa aaʼu lotuin sukuwaʼipa süpüshuaʼa tü nuluwataakalü anain wayuu, tü nümakat jee tü naaʼinrakat (Sal. 89:14, TNM; 119:128). Eekajasaʼa Satanaa, isasü maʼin nüchiki lotuinjatüin sukuwaʼipa nutuma tü kasa nuluwataakalü aaʼu eereje «mojusü nuluwataaya Jeʼwaa» nümüin.

6. ¿Jamüsü watüjaaka saaʼu niain Jeʼwaa anaka süpüla aluwatawaa?

⁶ Eesüya wanee kasa anaka anainjee nuluwataaya Maleiwa, shia süka nütüjain maʼin sümaa kekiishaatain maʼin nia süpüla aaʼinmajaa tü kasa nukumalakat. Jamüshijaʼa nia, naapüin pülaa nümüin chi Nüchonkai süpüla eiyajaa ayuulii mepika sümaʼana tottoolu (Mat. 4:23, 24; Mar. 5:25-29). Nnojotsü ponuin naaʼin Maleiwa tü kasa pülasü naaʼinrakat Jesuu,  nütüjaa aaʼu tü eekat waleʼeruʼupünaa jee nnojotsü kapüleein nümüin eiyajaa wanee ayuulii. Akaʼaya Maleiwa, nütüjaa aaʼu tü sukuwaʼipakat süpüla nüsoʼireʼerüin naaʼin na outushiikana jee süpüla nnojoluin sukutkujaain mma otta süsetüin wüin.

7. ¿Jamüshi kekiʼireeka maʼin Jeʼwaa noulialeʼeya na nuluwataakana aaʼu Satanaa?

⁷ Na wayuu nuluwataakana aaʼu Satanaa, ayatüshii sünain achajawaa sukuwaʼipa süpüla najaʼlajeʼerüin tü atkawaakat noumainpaʼa otta suluʼupünaa mmaka süpüshuaʼa. Niapejeʼe neʼe Jeʼwaa atüjaaka saaʼu tü eeinjatkalü atuma tü anaakat sainküin mma (Isa. 2:3, 4; 54:13). Sutuma watüjaain aaʼu tü nukuwaʼipakat Maleiwa sünain nütüjain maʼin otta kekiin maʼin nia, wanaaweerü waaʼin nümaa Pablo sünain maa: «Anashii waʼwaajüle chi Maleiwakai. Kekiishaatashi maʼi nia. Nütüjaa aaʼulu kasa süpüshua. Nnojotsü wayaawatüin aaʼu süpüshua tü kasa anasü naaʼinrakat» (Roma 11:33).

8. ¿Kasa kamalainka pümüin sünainjee sukuwaʼipa nuluwataaya Maleiwa?

⁸ Nnojotsü süküjain neʼe tü Wiwüliakat niain Jeʼwaa aluwataainjachika, süküjaleeinya jamüin anaʼleeka tü sukuwaʼipakat nuluwataaya. Wanee kasa anaʼleeka anainjee, shia süka alin nüpüla na nuluwataakana aaʼu. Anasü waaʼin süka watüjaain aaʼu niain «wanee Maleiwa amüliajüi, anashi maʼin, kamaʼashi süpüla jashichijawaa, aipürai maʼin nia otta shiimain maʼin tü nümakat» (Éx. 34:6, TNM). Kojutushii waya nümüin Jeʼwaa, jülüjashaanashii waya naaʼin jee wainma kasa anasü naapaka wamüin. Alawaa neʼe tü nümakat Satanaa süchiki nüpülajüin Jeʼwaa woulia kasa anasü. Ichaʼasaʼa naapüin chi Nüchon aishikai maʼin nüpüla süpüla katüinjatüin woʼu waneepia (paashajeʼera Salmo 84:11 otta Roma 8:32).

9. ¿Jamüsü watüjaaka saaʼu jülüjüin waya naaʼin Maleiwa waneʼewai wakua?

⁹ Aishii nüpüla Jeʼwaa napüshuaʼa na aʼyataakana nümüin otta jülüjashaatashii naya naaʼin waneʼewai nakua. Soto waaʼin tü alatakat sümaiwa paala chaa Israel. Suʼunnaa 300 juya, kekiipüʼüjanashii na israeliitakana nutuma Jeʼwaa süpüla nükaaliinjain naya otta nayamülüin na naʼünüükana. Soʼutpünaa tia, jülüjüshii naya naaʼin waneʼewai nakua. Wanee wayuu jülüjaka naaʼin shia Rut, nnojotpuʼusü shia israeliitain otta wainma kasa süpütaka süpüleerua suʼwaajüin Jeʼwaa wanaa sümaa nupueulose. Anasü sukuwaʼipa Rut nutuma Jeʼwaa, kaʼwayuusesü otta kachonsü shia. Süsoʼiraapa aaʼin Rut, sütüjaajeerü aaʼu nutuushin chi Mesíaskai chi süchonkai jee sütüjaajeerü aaʼu nüshajirüin Jeʼwaa süchiki tü sukuwaʼipakat suluʼu wanee karaloʼuta sünüliamaajatka. ¿Jameetche saaʼin sütüjaapa saaʼu tia? (Rut 4:13; Mat. 1:5, 16).

10. ¿Jamüsü watüjaaka saaʼu nnojoluin müliain nutuma Jeʼwaa na nuluwataakana aaʼu?

¹⁰ Nnojoishii müliain nutuma Jeʼwaa na nuluwataakana aaʼu. Talatüsü naaʼin na wayuu oonookana nümaa Jeʼwaa otta nnojoishii naya nüpüleeruain aaʼin (2 Cor. 3:17). Anuʼusa nünüiki David nüchiki Jeʼwaa: «Kojutushaanashi sümaa miyoʼushaanain nia, katchinshi sümaa miyoʼuin talataa eere nia» (1 Crón. 16:7, 27, TNM). Müshi wanee salmista Etán nünülia: «Anataʼaleeshijaʼa maʼin na wayuu aʼwaajakana pia sümaa talatüin naaʼin. Jeʼwaakalee, oʼunüshii naya eepünaale warattuulin putuma, talatüshii naya waneepia sümaa tü  pünüliakat otta anashaatashii naya saaʼu lotuin sukuwaʼipa tü paaʼinrakat» (Sal. 89:15, 16, TNM).

11. ¿Kasa waaʼinrüinjatka süpüla watüjaain aaʼu shiain anaʼleein tü nuluwataayakat Maleiwa?

¹¹ Jülüjüle waaʼin waneepia anamiain maʼin Jeʼwaa, watüjaajeerü aaʼu shiain anaʼleein tü nuluwataayakat. Wanaaweerü waaʼin nümaa chi salmistakai sünain maa: «Anaʼleesia maʼin alatiraa wanee kaʼi suluʼu süpaatiase tü aʼwaajüleekat Maleiwa suulialeʼeya alatiraa miit kaʼi jalapünaa yaa» (Sal. 84:10, TNM). Süka nukumalain waya Jeʼwaa, nütüjaa aaʼu tü choʼujaakat wamüin süpüla talatüinjatüin waaʼin otta keeʼireeshaatasü naaʼin naapüin shia wamüin. Süpüshuaʼa tü nuluwataakalü anain waya Jeʼwaa süpülajatü anain wakuwaʼipa otta talateerü maʼin waaʼin jüüjüüle waya nümüin jaʼitairü kapüleein tia wamüin (paashajeʼera Isaías 48:17).

12. ¿Jamüsü kojutuka wamüin tü nuluwataayakat Maleiwa?

¹² Saashin tü Wiwüliakat, kettaapa tü Miit Juya Nuluwataainjatkalü oʼu Jesuu eejeena waneinnua wayuu eʼrüliinjanaka wayumüin sümüin nuluwataaya Maleiwa (Alat. Map. 20:7, 8). ¿Jamüsü naaʼinreetka tia? Shia süka nimeejeenain naya Satanaa süpüla yaletüinjatüin naaʼin, nnojotsü jeketüin tia nutuma. Nunoujireena naya sünain eein süpüla katüin noʼu süpüla kaʼika süpüshuaʼa jaʼitaina nnojoluin jaa namüin nümüin Jeʼwaa. Nnojotpejeʼe shiimain tia. Müsüjeseʼe anain wasakirüle waaʼin sünain tüü: «¿Tanoujeetche tia alawaakat?». Aire wapüla Jeʼwaa sümaa waʼyataain nümüin sutuma anamiain maʼin nia otta niain Aluwataain saaʼu kasa süpüshuaʼa, wayoutamaateerü tü naʼalainkat Satanaa. Keeʼireejeerü waaʼin niain laülaain Jeʼwaa saaʼu wakuwaʼipa waneepia süka alin nüpüla na nuluwataakana aaʼu.

13. ¿Kasa waaʼinrüinjatka süpüla weeʼiyatüin kojutuin wamüin laülaain Jeʼwaa waaʼu?

¹³ Wekirajaaitpa anain niain Jeʼwaa aluwataainjachika saaʼu kasa süpüshuaʼa otta anain maʼin sukuwaʼipa tü nuluwataayakat. Kojutuinjatü tia wamüin sükajee waneepiain waya nümaa Jeʼwaa otta washatüin tü nukuwaʼipakat. Wachajaale maʼin sukuwaʼipa süpüla washatüin nukuwaʼipa Jeʼwaa, weeʼiyateerü kojutuin wamüin laülaain nia waaʼu (paashajeʼera Éfeso 5:1, 2).

14. ¿Kasa naaʼinrajatka na laülaashiikana jee na shikiishiikana napüshi süpüla nashatüin nukuwaʼipa Jeʼwaa?

¹⁴ Wekirajaa anainrü suluʼu tü Wiwüliakat, alin nüpüla Jeʼwaa na nuluwataakana aaʼu. Na shikiishiikana napüshi otta na laülaashii kojutukana amüin sukuwaʼipa nuluwataaya Maleiwa, nashateerü nukuwaʼipa Jeʼwaa otta nnojoleena müliain natuma na wayuu laülaakana aaʼu naya. Aʼyataashi maʼin Pablo süchiirua nüshatüin nukuwaʼipa Jeʼwaa otta Jesuu (1 Cor. 11:1). Müshiijeseʼe nimeʼejüin naaʼin na anoujashiikana süpüla naaʼinrüin tü kasa anasükat, nnojoishii naapülijüin jee nnojoishii nüpüleeruain aaʼin naya süpüla naaʼinrüin tia (Roma 12:1; Éf. 4:1; Filem. 8-10). Nüshatüin Pablo nukuwaʼipa Jeʼwaa. Müinjatüjaʼaya watuma wayakana süka alin wapüla Jeʼwaa otta kojutuin wamüin tü nuluwataayakat.

15. ¿Kasa waaʼinrüinjatka süpüla weeʼiyatüin kojutuin wamüin nuluwataaya Jeʼwaa?

¹⁵ ¿Kasa maa waaʼinrüinjatka süpüla weeʼiyatüin kojutuin wamüin nukuwaʼipa Maleiwa sünain aluwatawaa? Jüüjüüinjana waya namüin na wayuu laülaakana waaʼu nutuma Maleiwa jaʼitairü nnojoluin müin pansaakai saaʼin wamüin tü naluwataakalü anain waya jee jaʼitairü müin mojushiikai saaʼin wamüin. Waaʼinrüinjatü tia süka laülaain Maleiwa saaʼu wakuwaʼipa  sümaa nnojoluin wanaawain waaʼin namaa na manoujainsaliikana (Éf. 5:22, 23; 6:1-3; Heb. 13:17). Jüüjüüle waya nümüin Maleiwa, talateena waya, jama aneein wakuwaʼipa nutuma.

16. Waneeküinjanapa wanee kasa waaʼinrajatka, ¿kasa jülüjüinjatka waaʼin sutuma kojutuin wamüin sukuwaʼipa nuluwataaya Maleiwa?

¹⁶ Waneekapa wanee kasa waaʼinrajatka, atüjaana aaʼu müleka kojutule wamüin nukuwaʼipa Maleiwa sünain aluwatawaa. Nnojotsü nüküjain Jeʼwaa süpüshuaʼa tü kasa waaʼinrajatkat, shia nüküjaka wamüin jamüin nünüiki süchiki wanee kasa. Jamüshijaʼa nia, nnojotsü nüküjain wamüin tü kuluulu waʼatüinjatkat wanain, shia nüküjaka wamüin anainjatüin wayolojo suʼupala wayuu (1 Tim. 2:9, 10). Nnojotsü keeʼireein naaʼin Jeʼwaa waaʼinrüin wanee kasa mojushiijeetka sümüin wayuu (1 Cor. 10:31-33). Waneeküle wanee kasa waaʼinrajatka wanaapünaa sümaa tü nüchekakat Jeʼwaa, weeʼiyateerü kojutuin wamüin sukuwaʼipa nuluwataaya.

17, 18. ¿Kasa eeka süpüla naaʼinrüin na kasaatshiikana süpüla neeʼiyatüin kojutuin namüin tü nuluwataayakat Jeʼwaa?

¹⁷ Wekirajaa jooluʼu sünain tü naaʼinrajatkat na kasaatshiikana süpüla neeʼiyatüin kojutuin namüin tü nuluwataayakat Jeʼwaa. Eeshii wayuu kasaatkana kapüleekana amüin kepiajiraa sümaa naʼwayuuse otta mojujiraashii naya. ¿Kasakaʼa anain süpüla naaʼinrüin? Anasü jülüjüle naaʼin nukuwaʼipa Jeʼwaa namaa na israeliitakana. Naashin Jeʼwaa müshi kasaatkai  naaʼin sümaa tü pueulokot Israel (Isa. 54:5; 62:4). Wainmatua mojuin naaʼin Jeʼwaa natuma na israeliitakana. Müsü aka saaʼin mojujiraale wanee wayuu sümaa nuʼwayuuse. Nnojotpejeʼe nuuʼulaajaain Jeʼwaa tü pueulokot Israel, wainmatua nülatirüin sooʼopünaa naaʼin tü saainjalakat otta ayatüshia nia süchiirua nikeraajüin tü pütchi pansaatüjütkalia nutuma sümüin (paashajeʼera Salmo 106:43-45).

¹⁸ Na wawalayuu kasaatshii aikana apüla Jeʼwaa, nashatüin tü nukuwaʼipakat. Jaʼitairü mojuin maʼin nakuwaʼipa sümaa naʼwayuuse nnojoishii naya aaʼinrüin wanee kasa mojuka nümüin Jeʼwaa shiiʼiree nooʼulaain suulia naʼwayuuse. Natüjaa aaʼu niain Jeʼwaa aʼaniraain atuma nakuwaʼipa otta nnojotsü keeʼireein naaʼin nooʼulaajiraain. Saashin tü Wiwüliakat, shia neʼe eeka süpüla nooʼulaajiraain anainjee na kasaatshiikana müleka nümaʼüjiraale nukuwaʼipa chi toolokoi jee shiale tü jietkat. Nooʼulaajiraale sünainjee tia, eesü süpüla nachajaain wanee naʼwayuuse (Mat. 19:5, 6, 9). Nachajaale sukuwaʼipa na wawalayuukana süpüla anajiraain naya sümaa naʼwayuuse, neeʼiyatüin kojutuin namüin sukuwaʼipa nuluwataaya Jeʼwaa.

19. ¿Kasa waaʼinrajatka kaainjarale waya?

¹⁹ Sutuma waleʼeruʼuin tü kaainjalaakat, eesü mojuwaijeerüle naaʼin Jeʼwaa watuma. Nütüjaa aaʼu Jeʼwaa tia, shiasaʼa sutuma alin waya nüpüla, naapüin chi Nüchonkai süpüla naapajiraain nikii waaʼu. Müsüjeseʼe wachuntuinjatüin nümüin Jeʼwaa motuin naaʼin waainjala kaainjalapa waya (1 Juan 2:1, 2). Suulia mojukuʼu müin waaʼin saaʼu waainjala, shia anaka aluʼu jülüjüle waaʼin tü wanouteʼerüinjatkat sünainjee wakuwaʼipa. Nnojoliire wakatalaain nuulia Jeʼwaa, moteerü naaʼin waainjala otta nümülialeena waya. Jee sükajee tia, ayateena waya aʼyataain nümüin (Sal. 103:3).

20. ¿Jamüsü kojutuinjatka wamüin maaʼulu tü nukuwaʼipakat Maleiwa sünain aluwatawaa?

²⁰ Aluwataajeechi Jeʼwaa saaʼu wayuu süpüshuaʼa suluʼu tü mma anasükat otta nikirajeena waya sünain tü nukuwaʼipakat (Isa. 11:9). Nikirajapejeʼe waya maaʼulu sünain tia. Alüʼütsü maʼin sükalia süpüla nnojoluinjatüin jaralin mojuin anüiki süchiki nuluwataaya Maleiwa. Kojuta wamüin maaʼulu tü nuluwataayakat Jeʼwaa sükajee woonooin nümaa, waʼyataain nümüin waneepia otta wachajaain sukuwaʼipa süpüla washatüin nukuwaʼipa sünain süpüshuaʼa tü kasa waaʼinrakat.