«PONUSÜ TAAʼIN süka teʼrüin kamaneein na wawalayuukana», müsü sünüiki Lisa. * Tia shia tü atanatkat saaʼin suʼttaiwaʼaya sünain ekirajawaa tü Bibliakat. Meematüsü tü alatakat sümüin Anne, müsü shia: «Tü atanatkat taaʼin shia kamaneein na wawalayuukana suulialeʼeya tü nekirajakalü anain suluʼujee tü Bibliakat». Lisa otta Anne aküjalii naya pütchi maaʼulu, kamalainsü namüin ekirajawaa sünain tü Bibliakat sümaa nasakireʼerüin naaʼin sünain, shiapejeʼe kamalainpuʼuin namüin neʼrüin kamaneein na wawalayuukana.

¿Kasa waaʼinrajatka süpüla watütüleʼerüin naaʼin na waneinnua? Wekirajaa sünain piamasü kasa waaʼinrajatka, kamaneeinjana waya waashajaapa jee waaʼinrapa kasa napüleerua na waneinnua. Otta wekirajaajeerü anain jaraliin kamaneeinjanain amüin waya.

Aküjünüsü suluʼu Proverbios kapiitulo 31 süchiki wanee jierü kaʼwayuusesü anaka akuwaʼipa sutuma kamaneein shia saashajaapa (Prov. 31:26). Sükajee müin sukuwaʼipa jülüjasü saaʼin anainjatüin sutuma sünüiki saashajaapa. Anasü naaʼinrüle tia na kachonshiikana naashajaapa namaa nachonnii. Natüjaa aaʼulu wainma wayuu nnojoleerüin anain nakuwaʼipa nachonnii airuʼurule nanüiki namüin jee naaʼayajaale naaʼin, süka jamüin, eein süpüla mojuin naaʼin jee nnojoliin jaa namüin. Eekajasaʼa kamaneere naya naashajaapa namaa, mapüleejeerü namüin nachonnii jüüjüüin naya namüin.

Jaʼitainna kachooin waya jee machonle waya, ¿kasa waaʼinrajatka süpüla kamaneeinjanain waya waashajaapa? Eesü wanee kasa waaʼinrajatka saashin Proverbios, tü makat: «Jaʼyasü saaʼu kekiin maʼin shia saashajaapa» (Prov. 31:26). Süpüla kekiinjanain waya waashajaapa, jülüjainjatü waaʼin tü wanüikinjatkat otta tü sukuwaʼipainjatkat. Süpülapünaa waküjain wanee kasa, anasü wasakireʼerüle waaʼin sünain tüü: «¿Jashicheetche wayuu sutuma tü taküjainjatkat? ¿Shiimalereetche saaʼin tü taküjainjatka?» (Prov. 15:1). Anasüjeseʼe jülüjale waaʼin tü kasa alateetkat sutuma tü wamakat.

Anuu sooʼomüin tü waaʼinrajatkat saashin Proverbios: «Eeshi chi eekai mayaawajaain saaʼu nünüiki, müshi nusotokai saaʼin wayuu süka shiʼichi chajaruuta» (Prov. 12:18). Wayaawateerü saaʼu wanüiki waashajaapa, jülüjale waaʼin jameerüin naaʼin na waneinnua sutuma. Kamaneere waya waashajaapa, nnojoleerü airuʼuluin wanüiki jee nnojoleena waya aaʼayajaain saaʼin wayuu (Éf. 4:31, 32). Otta müsia, wanouteʼereerü tü kasa mojusü jülüjakat waaʼin nachiki na waneinnua sümaa wounteerüin waküjain pütchi analuʼut atütüleʼereetka saaʼin wayuu. Niʼitaain wapüleerua Jehová tü sukuwaʼipainjatkat watuma. Jamüshijaʼa nia, nütütüleʼerüin naaʼin Elías wanaa sümaa mmoluin nia. Naaʼinrüin tia wanaa sümaa nüküjain pütchi analuʼut nümüin nükajee wanee aapiee (1 Rey. 19:12). Nnojoishii neʼe aküjainjanain waya pütchi analuʼut namüin na waneinnua süpüla kamaneeinjanain waya, aaʼinrüinjanaʼaya waya kasa anasü napüleerua. ¿Jamüsü süpüla wountuin tia?

Washatüin nukuwaʼipa Jehová kamaneere waya waashajaapa jee waaʼinrapa kasa anasü napüleerua na waneinnua (Éf. 4:32; 5:1, 2).  Anuu sünüiki Lisa, tü wachuntayütkalü anülia paalapa süchiki tü naaʼinrakat na Aküjaliikana pütchi wanaa sümaa kamaneein naya sümüin: «Wanaa sümaa ‹akolojooinjana jia› wamünalaʼa amüin, ainküsü taaʼin sümaa tapüshi. Nayasaʼa piamashii wawalayuu sümaa naʼwayuuse, ashaʼwalaashii naya suulia aʼyatawaa süpüla nantamaatüin sünain akaalinjaa waya. Soʼu tia nnojotyülia taya ekirajaain sünain tü Bibliakat». Sutuma kamaneein naya wawalayuukana sümüin, oʼttusü shia sünain ekirajawaa tü Bibliakat.

Akaʼaya Anne, tü wachuntayütkalü anülia paalapa, kojutusü sümüin kamaneein na Aküjaliikana pütchi sümüin. Anuu sünüiki: «Süka shiʼrülüin wayumüin wayuu tamüin, tekiiruʼusü waneepia mamaneein wayuu. ‹¿Jamüshiiche kamaneeka naya tamüin?, eesia tü keeʼireekat naaʼin›, müsü taya taleʼeruʼu teʼraajaiwaʼaya na Aküjaliikana pütchi. Tasünneʼerüin tekiiruʼujee tia süka tayaawatüin saaʼu shiimain kamaneein tamüin tü wayuu ekirajakat taya sünain tü Bibliakat». ¿Kasa anasü eeka sünainjee tia? Anuu sooʼomüin sünüiki: «Taaʼinmaasü maʼin tü tekirajaakalü anain soʼujeʼereʼeya tia».

Tü atanatkat saaʼin Lisa otta Anne shia neʼrüin kamaneein namüin na wawalayuukana.  Sutuma tia ekirajaweeshii naya sünain tü Bibliakat, neʼitaain naaʼin nünain Jehová otta sünain nupueulose.

Eeshii wayuu kamaneekana naashajaapa sümaa nakulemeraain, naaʼinrüin neʼe tia saaʼujee müin sukuwaʼipa nepijia otta saaʼujee müin sukuwaʼipa wayuu eere kepiain naya. Anasü maʼin saaʼinrüle wayuu tia. Kamaneere neʼe waya saaʼujee tia, nnojotsüjaʼamata washatüin nümanee Jehová (anasü paashajeʼerüle Aluwataaushikana 28:2).

Tü kamanewaakat shia süpüshi tü akuwaʼipaa eekat sutuma tü nüpülainkat Maleiwa (Gal. 5:22, 23, TNM). Choʼujaasüjeseʼe eeinjatüin waaʼu tü nüpülainkat Maleiwa süpüla wanouteʼerüin tü jülüjakat waaʼin jee tü waaʼinrakat süpüla shiimain kamaneein waya. Waaʼinrüle tia, washateerü nukuwaʼipa Jehová otta Jesús. Süka washateein nukuwaʼipa Jesús, kapülasü waaʼin sukuwaʼipa wayuu. Wayaawateerü aaʼu kamaneein waya noʼuluʼu Jehová aire nia wapüla jee aire wayuu wapüla.

Mapüleesat kamaneein waya namüin na kamaneekana wamüin jee müsia namüin na weʼraajakana (2 Sam. 2:6). Kamaneeshii waya namüin süpüla waapüin analuʼut namüin saaʼujee tü naaʼinrakat wapüleerua (Col. 3:15). ¿Kasa waaʼinrajatka kapüleere wamüin kamaneein waya nümüin wanee wayuu?

Kamaneeshi maʼin Jehová sümüin wayuu süpüshuaʼa otta nüküjain suluʼu tü Bibliakat tü naaʼinrakat süka kamaneein maʼin nia. Kojuyatua süshajünüin tü pütchikat kamaneeshi maʼin, suluʼu tü Pütchi Ashajuushikat süka Griego. ¿Kasa naaʼinraka Maleiwa süpüla kamaneein maʼin nia wamüin?

Jülüjataa waaʼin tüü, kamaneeshi maʼin Jehová sümüin wayuu süpüshuaʼa süka naapüin tü kasa choʼujaakat sümüin süpüla katüinjatüin soʼu (Mat. 5:45). Akaʼaya nnojoliiwaʼaya weʼraajüin Jehová, kamaneetüjüiya nia wamüin (Éf. 2:4, 5, 8). Naapüin chi aishikai maʼin nüpüla, chi waneeshikai Nüchon süpüla outajachin saaʼu wayuu süpüshuaʼa. Nüküjain chi aluwataaushikai Pablo naakajirüin waya Jehová suulia kaainjalaa süka kamaneein maʼin nia wamüin (Éf. 1:7, TNM). Mayaainjeʼe kaainjalain waya noʼuluʼu Jehová jee mojuin naaʼin watuma, ayatüsia nuʼunirüin wakuwaʼipa sümaa nikirajüin waya. Tü nikirajakalü anain waya jee tü Nünüikikat, müsü aka saaʼin juya meemetüsü (Deut. 32:2). Isakalia wachiki wawalaajüin süpüshuaʼa tü kasa naaʼinrakat wapüleerua. Nnojotsüjeʼe süpüla waʼatapajüin kasa anasü nnojorüle kamaneein maʼin wamüin Jehová (anasü paashajeʼerüle 1 Pedro 1:13, TNM).

Anataʼaleesüjaʼa nukuwaʼipa Jehová süka kamaneein nia. Kamaneeinjanaʼaya waya weinshi sümüin wayuu süpüshuaʼa süpüla washatüin nümanee Jehová (1 Tes. 5:15). Kamaneere waya weinshi, meena aka waya saaʼin siki chuwataka soʼunnaa alin maʼin jemiai. Kamaneere waya watütüleʼereerü naaʼin na wapüshikana, na wawalayuukana, na aʼyataajiraakana wamaa, na koleejiajiraakana wamaa otta na kepiakana waʼütpünaa.

Anasü jülüjale waaʼin aneerüin nakuwaʼipa na wapüshikana jee na wawalayuukana kamaneere waya waashajaapa namaa jee waaʼinrapa kasa anasü napüleerua. Jülüja waaʼin eere waʼaka wanee wawala choʼujaakai nükaalinjünüin nipialuʼu, maʼaka saaʼin shipintajünüin nipia jee nükaalinjünüin sünain ayaʼlajaa kasa. Weʼrüle wanee wayuu soʼunnaa waküjain pütchi choʼujaakai amüin kaalinwaa, ¿eesüche süpüla waaʼinrüin wanee kasa süpüla wakaalinjain nia?

Washata nümanee Jehová. Jaʼyainjatü waaʼu kamaneein waya waashajaapa jee waaʼinrapa kasa anasü napüleerua na waneinnua.