1. Sünainjee tü sümakat 1 Pedro 5:2, ¿kasa niʼitaaka Jehová najapuluʼu na laülaashiikana?

 NIʼITAAIN Jehová najapuluʼu na laülaashiikana naaʼinmajüinjanain na aʼyataashiikana nümüin. Kojutusü namüin naʼyataain napüleerua na wawalayuukana otta nachajaain maʼin sukuwaʼipa süpüla naaʼinmajüin naya (Jer. 23:4; paashajeʼera 1 Pedro 5:2). Anataʼaleesüjaʼa wakuwaʼipa süka eein naya waʼaka.

2. ¿Kasa alatawaika namüin waneinnua laülaashii?

² Eesü waneirua kasa kapüleeka namüin na laülaashiikana süpüla nekeraajüin tü naʼyataainkat. Aʼyataashii maʼin naya süpüla naaʼinmajüin na wawalayuukana. Jülüjataa waaʼin tü kapüleekat nümüin Tony, wanee laülaashi kepiakai chaa Estados Unidos. Niyaawata aaʼu naawalüinjatüin waneirua niʼyataain. Anuu nünüiki: «Sukumajaaiwaʼaya tü ayuuliikat COVID-19, wainma kasa waainjaka süpüla wakumajüin sukuwaʼipa tü outkajawaakat jee tü aküjaakat pütchi. Matüjainsai taya ayoutajawaa sümaa tü aʼyatawaa aapünakat tamüin. Mayaainjeʼe wainmain kasa taaʼinraka süpüla tajaʼttirüin shia müsü matüjainkai saaʼin ajaʼttaa tapüleerua. Saaʼujee tia, nnojolitchipa taya aashajeʼerüin waneepia tü Bibliakat, nnojolitchipa taya ekirajaain tamüiwaʼa jee nnojolitchipa taya oʼuraajawalin». Eetaashi joo wane laülaashi kanüliashi Ilir, kepiashi nia Kosovo. Eejachire kepiain nia joutsü atkawaa jee kapüleesü nümüin jüüjüüin nia sümüin tü naluwataakalü anain na wawalayuu oʼunirakana sukuwaʼipa waʼyataain. Müshi nia: «Mmotshi maʼin taya suchuntapa tamüin Weteet takaalinjainjanain na wawalayuu kepiakana suluʼu wanee pueulo keemaka maʼin otta nnojotsü müin anakai saaʼin tamüin tü aluwataanakalü anain taya». Eeshi wane wawalaya kanüliashi Tim, misioneero nia jee kepiashi nia chaa Asia. Kapüleesü maʼin nümüin naaʼinrüin tü kasa naaʼinrajatkat soʼukaiwai. Müshi nia: «Eesü kaʼi mapüsawaika oʼu taaʼin süpüla takaalinjain na wawalayuukana». ¿Kasa naaʼinrajatka na laülaashiikana kapüleere namüin nekeraajüin tü naʼyataainkat?

3. Laülaashiire waya jee nnojoliire laülaashiin, ¿jamüsü anaka washatüle nukuwaʼipa Gedeón?

 ³ Wainma kasa natüjaka na laülaashiikana nünainjee Gedeón, chi nekiipüʼükai na israelitakana (Heb. 6:12; 11:32). Nuʼtteʼerüin Gedeón na israelitakana noulia naʼünüü jee naaʼinmajüin naya (Juec. 2:16; 1 Crón. 17:6). Eʼitaanüsü najapuluʼu na laülaashiikana naaʼinmajüinjanain na wawalayuukana soʼunnaa müliaa (Aluw. 20:28; 2 Tim. 3:1). Wainma kasa natüjaka sünainjee nukuwaʼipa Gedeón, chi ayaawatakai saaʼu tü isakat nüchiki, chi nnojoikai yaletüin aaʼin, chi jüüjüükai sümüin tü achuntunakat nümüin otta chi achecherakai aaʼin. Sünainjee nukuwaʼipa Gedeón, kojuteerü wamüin tü naaʼinrakat na laülaashiikana wapüleerua jee wakaalinjeena naya (Heb. 13:17).

4. ¿Jamüsü watüjaaka saaʼu niyaawatüin saaʼu Gedeón tü isakat nüchiki jee nnojoluin yaletüin naaʼin?

⁴ Nnojotsü yaletüin naaʼin Gedeón otta niyaawata aaʼu tü isakat nüchiki. b Nütüjaapa saaʼu Gedeón nüneeküin nia Jehová süpüla taashinjanain nutuma na israelitakana noulia na madianitakana, müshi nia sümaa nnojoluin yaletüin naaʼin: «Naya palitchonkana na tapüshikana naʼakajee na nüikeyuukana Manasés otta müshia tayakai taya chi emülieekai naʼakajee na tawalayuukana» (Juec. 6:15). «Wayuʼulaa neʼe taya, nnojoishi taya kettaain süpüla tia aʼyatawaakat», eesüjaʼa jülüjale naaʼin tia Gedeón. Nütüjaapejeʼe saaʼu Jehová nuunteerüin tia otta nükaalinjainña nia.

5. ¿Kasa kapüleejeetka atuma namüin na laülaashiikana nayaawatüin saaʼu tü isakat nachiki jee nnojoluin yaletüin naaʼin?

⁵ Nachajaain maʼin sukuwaʼipa na laülaashiikana süpüla nayaawatüin saaʼu tü isakat nachiki otta süpüla nnojoluin yaletüin naaʼin (Miq. 6:8; Aluw. 20:18, 19). Nnojoishii naya aʼwaataain saaʼujee tü natüjakat jee tü nountakat noulia na waneinnua. Nnojoishii ayüülajaain naya mojukuwaʼiparüle natuma wanee kasa. Eejeerü waneirua kasa kapüleejeetka namüin. Eeshijaʼa eere wanee laülaashi achekaka wainma aʼyatawaa otta niyaawatüle saaʼu mapa iseerüin nüchiki naaʼinrüin süpüshuaʼa tia. Eesüjaʼa süküjünüle nümüin anain maʼin nutuma tü niʼyataainkat otta shiyoujunule tü kasa mojukat nutuma. Sülatüle tia namüin na laülaashiikana, ¿kasa naaʼinrajatka süpüla nashatüin nukuwaʼipa Gedeón?

6. Maʼaka naaʼin Gedeón, ¿kasa naaʼinrajatka na laülaashiikana süpüla nayaawatüin saaʼu tü isakat nachiki? (Piirakaa sümüin tü ayaakuaakat).

⁶ Juchunta kaalinwaa. Chi wayuu ayaawatakai saaʼu tü isakat nüchiki, nütüjaa aaʼu eejeerüin kaʼi iseetka nüchiki naaʼinrüin süpüshuaʼa tü aʼyatawaa aapünakat nümüin. Niyaawata aaʼu tia Gedeón, müshijeseʼe nuchuntuin kaalinwaa (Juec. 6:27, 35; 7:24). Naaʼinrüinña tia na laülaashii  kekiikana. Müshi Tony chi wachuntayüikai anülia suluʼu pütchi piama: «Kiʼrashi taya sünain aʼyatawaa, jama tekirajünüin jintüliiwaʼaya taya süpüla müinjatüin takuwaʼipa. Müshijeseʼe matüjain taya ayoutajawaa sümaa tü aʼyatawaa aapünakat tamüin jaʼitairü wainmain maʼin shia tapüleerua. Ekirajaashi taya sümaa taʼwayuuse süchiki tü nukuwaʼipainjatkat wanee wayuu ayaawatakai saaʼu tü isakat nüchiki. Tasakiraka shia süpüla süküjain tamüin tü jülüjakat saaʼin süchiki takuwaʼipa. Teʼrajüinña wanee video ojuʼitaka suluʼu jw.org tü kanüliakat Pikiraja, paapa aʼyatawaa jee laülawaa maʼaka naaʼin Jesús». Anuu tü kasa anasü niʼrakat Tony: «Süka taapüin waneirua aʼyatawaa namüin na waneinnua, anaitpa süpüshuaʼa tü kasa aainjünakat napüleerua na wawalayuukana otta asetaaipa kaʼi tapüla süpüla taaʼinmaain tü takuwaʼipakat nümaa Jehová».

7. Maʼaka naaʼin Gedeón, ¿kasa naaʼinrajatka na laülaashiikana shiyoujunule tü naaʼinrakat? (Santiago 3:13).

⁷ Jüchechera jaaʼin suulia jashiee shiyoujunule jiʼyataain. Sülatüle tia nümüin wanee laülaashi, anasü nüshatüle nukuwaʼipa Gedeón. Niyaawata aaʼu Gedeón eein waneirua kasa nuʼtchejaaka amaa jee nnojoishi jashichin nia namüin na nüpüshikana Efraín wanaa sümaa nayoujain tü naaʼinrakat (Juec. 8:1-3). Süka nnojoluin yaletüin naaʼin, naapajüin nanüiki otta kemeʼeriasü nünüiki süpüla niimaleʼerüin naaʼin. Na laülaashii kekiikana nashatüin nukuwaʼipa Gedeón. Shiyoujünüle tü naaʼinrakat nutuma wanee wayuu, naapajüin nünüiki otta nnojoishii asounnajaain naya nümüin (paashajeʼera Santiago 3:13). Saaʼujee naaʼinrüin tia, ayatüshii anajiraain na wawalayuukana.

8. ¿Kasa naaʼinrajatka na laülaashiikana naʼwaajüle naya na wawalayuukana? Püküja tü naaʼinrakat wanee laülaashi.

⁸ Kojuta jutuma Jehová. «Puluwataa waaʼu», müshii na israelitakana nümüin Gedeón saaʼujee nükanajüin na madianitakana. Nüküjapejeʼe Gedeón namüin niainjachin Jehová aluwataain naaʼu (Juec. 8:22, 23). ¿Kasa naaʼinrajatka na laülaashiikana süpüla nashatüin nukuwaʼipa Gedeón? Niainjachi kojutuka natuma Jehová saaʼujee tü kasa nountakat (1 Cor. 4:6, 7). «Shia tekirajaka anain tü Bibliakat, ekirajünüshii waya nutuma ‹chi achepchiee oonookai jee kekiikai maʼin›», eesü süpüla müin nünüiki wanee laülaashi süküjünüle nümüin nütüjain maʼin ekirajaa. «¿Aʼwaajünüshiche Jehová sünainjee sukuwaʼipa tekirajia, tayataapa neʼe aʼwaajünüin nuulia?», anasü nasakirawaire naaʼin na laülaashiikana sünain tia. Jülüjataa waaʼin nukuwaʼipa Timothy. Nuʼttaiwaʼaya sünain laülaashin nia, kamalainsü maʼin nümüin nikirajüin sünain tü pütchi süpülajatkat wayuu süpüshuaʼa. Müshi nia süchiki tia: «Suʼttianainjee tanüiki, wattapuʼusü saalii tü pütchi taashajaakalü achiki, kayaawasepuʼusü shia tatuma otta mapuʼusü tanüiki maʼaka nanüiki na wayuu karaloʼutamaajakana. Naʼwaajüin taya na wawalayuukana nuulialeʼeya Jehová jee suulialeʼeya kojutuin namüin tü Bibliakat». Nunouteʼeraka mapa Timothy sukuwaʼipa tü nikirajiakat suulia naʼwaajüin nia na waneinnua (Prov. 27:21). Anuu nünüiki süchiki tü kasa anasü niʼrakat: «Eeshii wawalayuu aküjaka tamüin jaloulin namüin tü pütchi tekirajakalü anain. Saaʼujee naaʼinrüin tü pütchi naapajakat, alatüshii naya süchikumüin namüliala, nachecherüin naaʼin soʼunnaa müliaa jee aleewashii maʼin naya nümaa Jehová. Talatüsü maʼin taaʼin süka nuʼwaajünüichipain Jehová sükajee sukuwaʼipa tekirajia».

9. ¿Jamüsü kapüleeka nümüin Gedeón jüüjüüin nia nümüin Maleiwa jee yalayalain naaʼin? (Piirakaa sümüin tü ayaakuaa sünainkat süta tü rewiisütakat).

⁹ Süchikijee nüneekünüin Gedeón nutuma Jehová süpüla nekiipüʼüinjachin nia na israelitakana, eesü waneirua kasa alataka nümüin kapüleeka atuma jüüjüüin nia nümüin Maleiwa otta kapüleeka atuma nümüin yalayalain naaʼin. Achuntunusü nümüin najaʼttirüinjatüin tü aʼajülee nukumajakat chi nüshikai nümüin Baal (Juec. 6:25, 26). Kakalia mapa, nüsakajaka Gedeón watta naalii surulaat. Nüküjaka piantua Jehová nümüin paliʼirüinjanain na surulaat nümaainjanakana (Juec. 7:2-7). Nuchuntaka Jehová nümüin nushutuinjachin saʼwai naaʼu na naʼünüükana (Juec. 7:9-11).

10. ¿Kasa kapüleejeetka aaʼujee nümüin wanee laülaashi jüüjüüin nia sümüin tü münakat nümüin?

¹⁰ Jüüjüüinjana na laülaashiikana sümüin tü münakat  namüin (Sant. 3:17). Jüüjüüle wanee laülaashi naaʼinrüin tü sümakat tü Bibliakat otta naaʼinrüin tü naluwataakalü anain na wawalayuu oʼunirakana sukuwaʼipa waʼyataain. Saaʼujee naaʼinrüin tia, anasü nukuwaʼipa napüleerua na waneinnua. Anuu waneirua kasa kapüleejeetka aaʼujee namüin na laülaashiikana jüüjüüin naya sümüin tü münakat namüin: eesü suluwataanüle namüin watta saalii kasa, eesü sunoutunawaire tü aluwataanakalü anain naya, eesü wainmajüle naaʼin anale tü achuntunakat namüin otta eesü naaʼinrüinjatüle wanee kasa eeka süpüla püreesain anainjee naya. Sülatüle tia nümüin wanee laülaashi, ¿kasa naaʼinrajatka süpüla jüüjüüin nia sümüin tü münakat nümüin maʼaka naaʼinrüin shia Gedeón?

11. ¿Kasa naaʼinrajatka na laülaashiikana süpüla jüüjüüin naya sümüin tü münakat namüin?

¹¹ Jiyaawata saaʼu tü aluwataanakalü anain jia otta jaaʼinra shia. Nüküjain Jehová nümüin Gedeón tü naaʼinrüinjatkat süpüla najaʼttirüin tü aʼajülee nukumajakat chi nüshikai nümüin Baal. Nüküjainña Jehová nümüin tü naaʼinrajatkat süpüla nukumajüin wanee aʼajülee nümüin otta jaralüinjatüin tü mürüt nuʼutuinjatkalü aaʼin. Nnojotsü niyoutajaain amaalü Gedeón tü aluwataanakalü anain nia, naaʼinramaatüin shia. Maaʼulu yaa, aluwataanüsü waneirua kasa naaʼinrajatka na laülaashiikana natuma na wawalayuu oʼunirakana sukuwaʼipa waʼyataain. Aluwataanüsü tia namüin süpüla naaʼinmajüin waya otta süpüla nakatchinrüin wanoula. Aishii maʼin wapüla na laülaashiikana saaʼujee jüüjüüin naya sümüin tü münakat namüin. Saaʼujee müin nakuwaʼipa, anasü nakuwaʼipa na wawalayuu outkajaakana namaa (Sal. 119:112).

12. Sunoutunapa wanee kasa natuma na wawalayuu oʼunirakana sukuwaʼipa waʼyataain, ¿kasa naaʼinrajatka na laülaashiikana süpüla noonooin sümaa tü sümakat Hebreokana 13:17?

¹² Jüüjüü jia sümüin tü anoutunakalü akuwaʼipa. Soto waaʼin nuchuntuin Jehová nümüin Gedeón paliʼirüinjanain na surulaat nümaainjanakana (Juec. 7:8). «¿Anasüche taaʼinrüle tü achuntunakat tamüin? ¿Akanajeenache waya?», eesüjaʼa jülüjale naaʼin tia Gedeón. Ayatapejeʼe jüüjüüin Gedeón sümüin tü eeʼiratünakalü akuwaʼipa. ¿Kasa naaʼinrajatka na laülaashiikana süpüla nashatüin nukuwaʼipa Gedeón? Jüüjüüinjana naya sümüin tü anoutunakalü akuwaʼipa natuma na wawalayuu oʼunirakana sukuwaʼipa waʼyataain (paashajeʼera Hebreokana 13:17, TNM). Jamüsüjaʼa soʼu 2014, na Laülaashii Jülüjakana Aaʼin na Aküjaliikana pütchi, nanoutuin sukuwaʼipa tü nneerü aapaanakat süpüla sukumajünüin Piichi Outkajaalee jee Piichi süpülajatka Outkajawaa Miyoʼu (2 Cor. 8:12-14). Sümaiwa paala, aʼanapinnapuʼushii nneerü na wawalayuukana süpüla nakumajüin Piichi Outkajaalee jee nawalaajüinjatü tia nneetkat mapa. Eekajasaʼa jooluʼu aapaanüsü tü nneerü nasülajakat na wawalayuu eekana sainküin mmakat süpüla sukumajünüin tia piichikalüirua eere choʼujaain shia. Aainjünüsia tia jaʼitairü palitchon tü nneerü nasülajakat na wawalayuukana. Naapapa wanee laülaashi kanüliashi José süchiki tü anoutunuinjatkat, wainmajüsü naaʼin. «Aneerü sukuwaʼipa tü anoutunakat suluʼu waneirua mma. Eekajasaʼa yaʼaya mojeerü sukuwaʼipa. Nnojoleerü akumajünüin yaʼaya waneesiaakaijeʼe neʼe piichi», maa müsü naaʼin. Ayatapejeʼe jüüjüüin nia sümüin tü anoutunakalü akuwaʼipa. Anuu nünüiki süchiki jamüin naainjaka tia: «Sotusü taaʼin teʼitaainjatüin maʼin taaʼin nünain Jehová maʼaka süküjain Proverbios 3:5, 6. Anashaatasü tü kasa  teʼrakat. Teʼrüirü sukumajünüin wainma piichi yaa woumainpaʼa. Asülajüshii waya nneerü süpüla saainjünüin tia aʼyatawaakat suluʼu mma eere maʼletsein na wawalayuukana».

13. (1) ¿Kasa niyaawataka maʼin aaʼu Gedeón? (2) ¿Kasa naaʼinrajatka na laülaashiikana süpüla meimmoluinjanain naya maʼaka naaʼin Gedeón? (Piirakaa sümüin tü ayaakuaakat).

¹³ Yalayala jaaʼin sünain aaʼinraa tü nüchekakat Jehová. Mayaainjeʼe eein süpüla jamajüin Gedeón sünain aaʼinraa tü nüchekakat Jehová jee mmoluin nia, ayatüshia jüüjüüin nia nümüin Jehová (Juec. 9:17). Niiʼiyatapa Jehová waneirua kasa nümüin Gedeón, niyaawata aaʼu eein nia nümaa otta nükaalinjeechin nia süpüla nuʼtteʼerüin na israelitakana. Maʼaka naaʼin Gedeón, meimmoluinsalii na laülaashii kepiakana suluʼu mma eere süpülajünüin noulia tü naʼyataainkat nümüin Maleiwa. Ayatüsia nakumajüin sukuwaʼipa tü outkajawaakat jee tü aküjaakat pütchi mayaainjeʼe eein süpüla püreesain naya atumawaa, nasakiijünüin natuma pulusiia, nojotunuin suulia naʼyataain jee müliain naya atumawaa. c Soʼunnaa tü müliaa miyoʼukat meimmoluinjana na laülaashiikana süpüla jüüjüüin naya sümüin tü münakat namüin mayaainjeʼe eein süpüla jamajüin naya atumawaa. Eesüjaʼa süküjüneerüle namüin jamüinjatüin sukuwaʼipa süküjia tü pütchi süliainjatkat wayuu, tü makalü aka saaʼin shiʼichiise juya. Eesüjaʼa süküjüneerüle namüin tü naaʼinrajatkat süpüla nakaalinjain waya nushutapa waaʼu Gog chi chejeʼewaikai Magog (Ezeq. 38:18; Alat. Map. 16:21).

14. ¿Jamüsü choʼujaaka nüchecherüinjatüin naaʼin Gedeón sünain aaʼinraa tü nüchekakat Jehová?

¹⁴ Wainma maʼin niʼyataain Gedeón wanaa sümaa nekiipüʼüin nia na israelitakana, mapüsawaishi nia sünain aaʼinraa tia aʼyatawaakat. Wanaa sümaa niyamülüin na madianitakana, apantajaashii naya nüpüleerua. Aipaʼajatü tia atkawaakat. Niipiraka naya Gedeón eejee tü nasapüshii chakat Jezreel chamüinreeya eejatüle tü süchikat Jordán, eejatü watta saalii mojuin keipüsesü soʼutpünaa tia süchikat (Juec. 7:22). ¿Nuuʼulaainche naya isajüin? ¡Nnojottaa! Ayatüshia nia namaa na 300 wayuu nümaajanakana sünain eipiraa na madianitakana. Mayaainjeʼe mapüsain naya, ayatüshii nasaʼwatüin naya jee nakanajüin naya (Juec. 8:4-12).

15. ¿Jamüsü choʼujaaka nachecherüinjatüin naaʼin na laülaashiikana sünain aaʼinraa tü nüchekakat Jehová?

¹⁵ Wainma kasa naaʼinraka na laülaashiikana süpüla naaʼinmajüin na wawalayuukana jee süpüla  naaʼinmajüin napüshi. Saaʼujee naaʼinrüin tia, eeshii mapüsawaire naya, shapaʼawaire naaʼin jee mojuwaire naaʼin. Na laülaashii makana aaʼin, ¿kasa naaʼinrajatka süpüla nashatüin nukuwaʼipa Gedeón?

16, 17. (1) ¿Kasa naaʼinraka Gedeón süpüla ayatüin naaʼinrüin tü nüchekakat Jehová? (2) ¿Kasa natüjaaka maʼin aaʼu na laülaashiikana? (Isaías 40:28-31; piirakaa sümüin tü ayaakuaakat).

¹⁶ Jiʼitaa jaaʼin sünain nükatchinreʼerüin Jehová jaaʼin. Shia naaʼinraka Gedeón tia (Juec. 6:14, 34). Soʼu wanee kaʼi, awataashi Gedeón namaa na nümaajanakana nachiirua piamashii nalaülajana na madianitakana, saaʼujana naya camello napüleerua (Juec. 8:12, 21). Süka nükaalinjain naya Jehová, ayatüshii naya nachiirua, nasaʼwatüin naya jee nataʼülüin naya. Müshiʼiya na laülaashiikana maaʼulu, eesü süpüla neʼitaain naaʼin nünain Jehová chi Maleiwa matüjainkai «mapüsaa jee akulajawaa aaʼin». Nükatsüinreerü Jehová naaʼin soʼu tü kaʼi choʼujaakalü oʼu shia namüin (paashajeʼera Isaías 40:28-31).

¹⁷ Jülüjataa waaʼin tü naaʼinrakat Mattew, wanee laülaashi aʼyataakai napüleerua na wawalayuukana suulia shiʼitaanüin isha nanain. ¿Kasa naaʼinraka süpüla nüchecherüin naaʼin sünain tia aʼyatawaakat? Müshi nia: «Teʼrüirü shikeraajüin tanain tü sümakat Filipos 4:13. Wanaa sümaa mapüsain maʼin taya jee iseematüin tachiki tü taʼyataainkat, tachuntuin maʼin nümüin Jehová nükatsüinrüinjatüin taaʼin süpüla ayatüinjanain takaalinjain na wawalayuukana. Soʼu tia, katsüinsü maʼin taaʼu tü nüpülainkat Maleiwa süpüla tachecherüin taaʼin». Maʼaka naaʼin Gedeón, aʼyataashii maʼin na laülaashiikana süpüla naaʼinmajüin jee nakaalinjain na wawalayuukana. Ayatüsia naaʼinrüin tia jaʼitasü kapüleein shia namüin. Mayaainjeʼe naaʼinrüin süpüshuaʼa tü naʼyataainkat, anasü sotule naaʼin eejeerüin tü kasa isakat nachiki. Natüjaa aaʼu nükaalinjeenain naya Jehová jee nükatchinreʼerüin naaʼin süpüla ayatüin naaʼinrüin tü naʼyataainkat (Sal. 116:1; Filip. 2:13).

18. Sünainjee tü wekirajaaitpakalü anain, ¿kasa naaʼinrajatka na laülaashiikana süpüla nashatüin nukuwaʼipa Gedeón?

¹⁸ Watüjaaitpa aaʼu wainmain kasa natüjaka na laülaashiikana sünainjee nukuwaʼipa Gedeón. Saapünüle namüin wanee aʼyatawaa, anasü nayaawatüle saaʼu eere süpüla nountuin shia. Nnojoluinjatü pülayaain naaʼin süküjünüle namüin anain maʼin tü naʼyataainkat natuma jee nnojoliinjana jashichin naya shiyoujunule naʼyataain. Jüüjüüinjana naya sümüin tü münakat namüin jee meimmoluinjana naya. Choʼujaasü maʼin müinjatüin nakuwaʼipa maaʼulu süka sülüʼülüin süpüla sajaʼttüin tü kasa mojusükat. Jaʼitairü kasain alatüin, natüjaainjatü saaʼu nükaalinjeenain naya Jehová süpüla nachecherüin naaʼin. Waapüin analuʼutka namüin na laülaashiikana saaʼujee tü naaʼinrakat wapüleerua jee kojutushii naya wamüin (Filip. 2:29).