Kepiapuʼushii na kachooinkana taya chaa Estonia. Soʼunnaa tü Segunda Guerra Mundial münakat, akolojooshii naya Alemaniamüin eere joʼuuin taya. Wakolojooka mapa Canadámüin. Kepiashii waya peje sünain tü pueulokot Ottawa, joʼuuchon wepia jee wainma kaliina süʼütpünaa. Wayuu maʼletsesalii waya, ekapejeʼe waya sushuku kaliina.

Soʼu wanee kaʼi, yootushii na aküjaliikana pütchi nüchiki Jehová sümaa tü teikat. Naashajeʼeraka sümüin Alateetkat Mapeena 21:3, 4. Aʼyalajüsü shia sutuma süntüin suluʼumüin saaʼin tia pütchikat. Soʼujeʼereeya tia, ekirajaashii na kachooinkana taya sünain tü Bibliakat jee woutiisamaatüshii naya.

Mayaainjeʼe nnojoluin natüjain maʼin inglés na kachooinkana taya, nayaawata aaʼu naaʼinmaainjatüin tü naʼyataainkat nümüin Maleiwa. Aʼyataashi chi tashikai sünain ayajaa kachueera chaa Sudbury (Ontario), nüsirairüin aikat sünain aʼyatawaa. Mayaainjeʼe mapüsawalin nia süchikijee niʼyataain, ayatüshia nümaain taya sümaa Sylvia, tü tashunuukat sünain aküjaa pütchi. Naaʼinrüin tia saawanoʼu waneepia jee outkajaashii waya semaanawai süpüla wekirajaain sünain Aapiria Wayuu. Nakaalinjain taya na kachooinkana taya süpüla alinjachin tapüla Maleiwa. Müshijeseʼe woutiisain taya soʼu 1956, poloo touyase soʼu tia. Saaʼujee teʼrüin alin maʼin Jehová napüla, ayatüsia aʼyataweein taaʼin nümüin Maleiwa.

Kettaapa tatuma tü bachilleratokot, nnojotsü taaʼinmaain maʼin tü taʼyataainkat nümüin Jehová. Jülüjasü taaʼin iseerüin tachiki tooʼulaküin sukua katünasü jee nnojoleerüin teʼraajüin wainma mma pürekutsoorüle taya, jama manneetseechin taya. Mapa, aʼyataashi taya suluʼu wanee emisora. Kamalainsü maʼin tamüin tia aʼyatawaakat. Eeshi makatawaire taya suulia tü outkajawaakat süka taʼyataʼawalin motsopa kaʼi. Namaashi taya waneepia na manoujainkana. Sünainjee tü tatüjakat suluʼujee tü Bibliakat, tayaawata aaʼu tanouteʼerüinjatüin takuwaʼipa.

Takolojooka mapa Oshawamüin, tü chakat Ontario. Teʼraajaka chayaa Ray Norman sümaa Lesli, tü nuwalakat otta waneinnua pürekutsoot. Kamaneeshii naya tamüin. Saaʼujee teʼrüin talatüin maʼin naya, tayaawata aaʼu taʼwanajaainjatüin tü keeʼireekat taaʼin. Natütüleʼerüin taaʼin süpüla pürekutsoolinjachin taya. Pürekutsootka taya settienpüroʼu soʼu 1966, talatüshi taya sutuma tü taaʼinrakat. Sülataka tamüin waneirua kasa akooʼomüinraka taʼyataain nümüin Maleiwa.

Koleejiaiwaʼaya taya, tepirajüin tü karaloʼuta süpülajatkalü aʼyatawaa suluʼu Weteet, tü chajatkat Toronto (Canadá). Pürekutsootshi taya wanaa sümaa teenajünüin süpüla taʼyataainjachin suluʼu Weteet soʼu pienchi juya. Toʼunule Weteetmüin, eesüjaʼa nnojoleerüle teʼrüin  süchikuaʼa Lesli, wainmajüsü taaʼin, jama müliain taya shiiʼiree. Toʼuraajaka süpüla tatüjaain saaʼu tü taaʼinrajatkat. Toʼunaka Weteetmüin, tapütaaka suulia Lesli, mojushaatasü taaʼin soʼu tia.

Aʼyataashi taya eere süshijaanüin nasheʼin na aʼyataakana suluʼu Weteet jee mapa, secretaarioshi taya. Taapaka süchiki pürekutsoolüin pesiaat Lesli chayaa Gatineau (Quebec). «¿Jamüsüche sukuwaʼipa Lesli chayaa?», maa müshi taya. Eesü jülüjawaire taaʼin analejeʼeya tü taneekakat sünain aʼyatawaa nümüin Maleiwa. Talatashaatasü taaʼin taapapa süchiki niʼyataainjachin Ray yaa Weteet, chi suwalakai Lesli. Nuluwataanaka süpüla yaainjachin nia tamaa suluʼu takuattase. Yootoko taya tachikuaʼa sümaa Lesli. Kasaatshii waya peʼureeroʼu 27 soʼu 1971, kettaapa tatuma tü pienchikat juya suchuntaka tamüin Weteet.

Aluwataanüshii waya Quebecmüin süpüla wakaalinjain na wawalayuu aashajaakana francés. Maʼaka jeʼra juya süchikijee tia, aneekünüshi taya süpüla talapalaain naaʼu na wawalayuukana. Nnojotsü taʼatapajüin saapünüinjatüin tamüin tia aʼyatawaakat, 28 neʼe touyase soʼu tia, müsüjeseʼe wainmajüin taaʼin. Sütütüleʼerapejeʼe maʼin taaʼin tü sümakat Jeremías 1:7, 8. Kojuyatua seewaain Lesli sutuma kemion, eesü matunkuinwaire shia. Saaʼujee tia, wainmajüsü waaʼin aneerüle watuma tü waʼyataainkat napüleerua na wawalayuukana. «Naapüle wamüin Jehová wanee aʼyatawaa, anasü wooʼulaküle shia», müsü sünüiki Lesli tamüin süpüla sütütüleʼerüin taaʼin. Anaka wamüin walapalaain naaʼu na wawalayuukana, waaʼinrüin tia aʼyatawaakat soʼu 17 juya.

Nnojotsü asetaain maʼin kaʼi tapüla süpüla sümaainjachin taya Lesli. Atüjapejeʼe taya sünainjee wanee kasa teʼraka. Soʼu wanee kaʼi, ataletünüsü tü timbrekat, wattaʼa maalüjatü tia jee luunoʼulajatü. Tajutatpa tü puettoʼukot, nnojotsü jaralüin teʼrüin, shiaʼala neʼe eejatka tapüla wanee canasta kaluʼuka wanee kuluulu, süchon wunuʼu, keesü, pan, wiino otta iita. Otta yala, eejatü wanee pütchi ashajünaka. «Pümaa puʼwayuuse sünain awaraijawaa», müsü tia pütchikat. Anasü maʼin tia kaʼikat süpüla awaraijawaa, taküjapejeʼe sümüin Lesli nnojolinjachin taya oʼunuin sümaa süka tekirajaainjachin sünain waneirua pütchi taküjainjatka. «Anakajaʼa», sümaka tamüin sümaa mojuleematüin saaʼin. Taikalaapa süpüla ekirajawaa, mojujaasü taaʼin. Sotojooka taaʼin tü sümakat Éfeso 5:25, 28. Sotojoosü taaʼin tia pütchikat nutuma Jehová süpüla jülüjainjatüin taaʼin jamüin saaʼin tü taʼwayuusekat. «Joʼuya», tamaka sümüin Lesli süchikijee toʼuraajüin. Talatüsü maʼin saaʼin Lesli. Kemionluʼushii waya jee wantaka sotpaʼamüin wanee süchi, wakumajaka eeinjanale wojoyolooin. Talatüshii maʼin waya soʼu tia. Waleʼejapa wepialuʼumüin, ayatüsia asetaain kaʼi tapüla süpüla tekirajaainjachin.

Talatüshii maʼin waya saaʼujee wawaraijaain naaʼu na wawalayuu kepiakana chaa Columbia Británica chamüinreʼeya Terranova. Ekeraajüsü tü keeʼireetüjütkalia taaʼin jintüliiwaʼaya taya, wainmaitpa mma teʼraajaka. Kojuyatua jülüjain taaʼin anain toʼunule suluʼu tü Ekirajüleekat Galaad. Nnojoipejeʼe oʼuneein taya suluʼumüin wanee mma naatajatü otta jülüjapuʼusü taaʼin napülajatüin tia na wawalayuu atüjashiikana maʼin.  Mmotshi taya suulia misioneeroin taya süka eein süpüla taluwataanüin Áfricamüin eere jouluin ayuulii jee atkawaa. Anasü taaʼin sünain aʼyatawaa nümüin Jehová chaa Canadá.

Soʼu 1992 jutatüsü wakuwaʼipa süpüla waʼyataain nümüin Maleiwa suluʼu waneirua mma sulujutka tü kanüliakapuʼukat Unión Soviética. Wasakinnaka wacheküle wakolojooin Estoniamüin süpüla misioneeroin waya. Süka nnojoluin waʼatapajüin tia, oʼuraajüshii waya süpüla watüjaain saaʼu tü waaʼinrajatkat. «Naapüle wamüin Jehová wanee aʼyatawaa, anasü wooʼulaküle shia», müshii waya. Waapaaka tia aʼyatawaakat, anasü taaʼin süka nnojoliin waluwataanüin Áfricamüin.

Wekirajaamaataka sünain tü anüikiikat estonio. Sülatapa maʼaka jeʼra kashi süchikijee wantüin, waluwataanaka sünain alapalawaa naaʼu na wawalayuu outkajaakana suluʼu 46 outkajaalee otta waneirua grupo. Chajatü tia Estonia, Letonia, Lituania otta Kaliningrado (Rusia). Müshiijeseʼe wekirajaainjanain sünain tü anüikiikat letón, lituano otta ruso. Kapüleesü maʼin wamüin wekirajaain sünain tia anüikiikat, kojutupejeʼe namüin na wawalayuukana tü waaʼinrakat napüleerua jee nakaalinjain maʼin waya. Soʼu 1999, akumajünüsü wanee Weteet chaa Estonia. Aneekünüshi taya süpüla taʼyataainjachin namaa na wawalayuu jülüjakana aaʼin tü aʼyatawaa aainjünakat suluʼu tia Weteetkat. Aʼyataajiraashi taya nümaa Toomas Edur, Lembit Reile otta Tommi Kauko.

Weʼraajaka suluʼupünaa tia mmakat na wawalayuu ajünajaanakana Siberiamüin. Talatüshii naya waneepia mayaainjeʼe müliain naya atumawaa suluʼu tü kaatsetkat otta wattain naya noulia napüshi. Talatüsü naaʼin waneepia jee yalayalasü naaʼin sünain aküjaa tü pütchi anakat maʼin. Tü watüjakat nanainjee shia eein süpüla wachecherüin waaʼin soʼunnaa müliaa sümaa talatüin waaʼin.

Aʼyataashii waya waneepia jee nnojoishii waya achuntuin kaʼi süpüla weemeraain. Saaʼujee tia, mapüsasü maʼin Lesli. Süküjünaka wamüin mapa sünainjatüin Lesli tü ayuulii fibromialgia münakat. Jülüjaka waaʼin anain waleʼejüle wachikuaʼa Canadámüin. Jülüjasü taaʼin iseerüin wachiki woʼunuin suluʼumüin tü Ekirajawaa Napülajatkat na Shikiipüʼükana Weteet sümaa Naʼwayuuse, tü aainjünüinjatkat Patterson (Nueva York). Woʼuraajaka süpüla watüjaain saaʼu tü waaʼinrajatkat. Woʼunaka sünain tia ekirajawaakat. Anakalaka wakuwaʼipa nutuma Jehová. Soʼu chajanain waya, eʼrajaanüsü Lesli. Süka saawalaain Lesli, ayatüshii waya aʼyataain nümüin Jehová maʼakaapuʼu.

Waleʼejapa Estoniamüin soʼu 2008, eenajaanüshi taya sutuma tü Weteet chakat eejeere sukumajünüin tü waʼyataainkat nümüin Maleiwa, aipaʼajatü tia. Aküjünüsü wamüin wacheküle woʼunuin chamüin República Democrática del Congo, wattasü taaʼin sutuma tia. Waküjainjatü waneemüin kaʼi wacheküle tia aʼyatawaakat. Soʼu aikat tia, nnojotsü taküjain tia sümüin Lesli süpüla sutunkuinjatüin süka anakalü akuwaʼipa. Matunkuinsai taya soʼu tia. Taküjain nümüin Jehová shapaain maʼin taaʼin saaʼujee takolojooinjachin Áfricamüin.

Taküjaka waneemüin kaʼi sümüin Lesli tü aküjünakat tamüin. «Nia ounejaaka waya Jehová Áfricamüin. ¿Jamüsü süpüla watüjaain saaʼu wounteerüle tia aʼyatawaakat jee talateerüle waaʼin nnojorüle wooʼulaküin shia?», maa müsü waaʼin. 16 juya waʼyataain nümüin  Jehová chaa Estonia. Woʼunaka Kinsasamüin tü mma chakat República Democrática del Congo, wüittuuisü maʼin tü jardín sulujutkat Weteet jee jimatuuisü maʼin chayaa. Wantapa suluʼumüin wakuatse, shiʼitaatüjülia Lesli wanee pütchi ashajuushikat wamüin. «Talata jia eepünaale jia», müsü tia pütchikat. Weʼraajapa na wawalayuukana, wekirajapa wayuu sünain tü Bibliakat jee waʼyataapa sünain tü naʼyataakalü anain na misioneerokana, wayaawata aaʼu eein süpüla talatüin waaʼin chayaa. Waluwataanaka mapa süpüla walapalaain saaʼu 13 Weteet chakat África. Talatüshii maʼin waya, wainma sukuwaʼipa wayuu weʼraajaka jee weʼraajüin wainma pueulo. Nnojoluichipa mmoluin taya saaʼujee chainjachin taya Áfricamüin. Waapüin maʼin analuʼutka nümüin Jehová saaʼujee nuluwataain waya chamüin.

Chaa Kinsasa wooʼulaküin wainma seʼejü eküülü, wooʼulaküin seʼejü wüchiichein. Süka weʼrüin nekaajüin tia na wawalayuukana, wooʼulaküin seʼejü otta jemetüsü shia wamüin.

Oʼunapuʼushii waya wüinpümüin sünainjee Congo süpüla watütüleʼerüin naaʼin na wawalayuukana otta süpüla weʼikajaain tü kasa choʼujaakat namüin. Suluʼupünaa tia wainma guerrilla, ashutapuʼushii naya saaʼu wainma pueulo jee müliapuʼusü natuma jieyuu jee tepichi. Wainma na wawalayuu maʼletsekana chayaa. Antüsü suluʼumüin waaʼin weʼrapa shiimain maʼin namüin nasoʼiraainjanain aaʼin na outushiikana, weʼrapa alin maʼin napüla Jehová jee weʼrapa jüüjüüin maʼin naya namüin na wawalayuu oʼunirakana sukuwaʼipa waʼyataain. Saaʼujee weʼrüin anain nakuwaʼipa na wawalayuukana, jülüjasü waaʼin kasain waʼyataain anainjee nümüin Jehová otta sükatsüinrüin wanoula. Eeshii waneinnua wawalayuu amülouikana epia otta aʼttiee. Tü tatüjakat sünainjee tia shia eein süpüla yüülaa sümüin tü kasa wamaʼanakat, shiainjatpejeʼe waaʼinmaain maʼin tü wakuwaʼipakat nümaa Jehová. Mayaainjeʼe neʼrüin maʼin namüliala na wawalayuukana, nnojotsü yüülain naaʼin. Saaʼujee anain nakuwaʼipa wapüleerua, sükatchinrüin waaʼin soʼunnaa müliaa jee ayuulii.

Aapünüsü wamüin wanee jeketü aʼyatawaa. Aluwataanüshii waya süpüla waʼyataain suluʼu tü Weteet chakat Hong Kong. Nnojorüleejaʼa weʼitaain saaʼu chainjanain waya chaa Asia. Saaʼujee weʼrüin nükaalinjain waya Jehová sünain tü waʼyataainkat nümüin,  nnojotsü wainmajüin waaʼin sünain okolojowaa chamüin. Soʼu 2013, oʼunushii waya Hong Kongmüin, apütaashii waya noulia na waʼaleewainyuukana, mojusü waaʼin nachiirua jee mojusü waaʼin saaʼujee woʼunuin Áfricajee.

Eesü wayuu sainküinjee mmakat süpüshuaʼa suluʼu Hong Kong. Kapüleesü maʼin wamüin wekirajaain sünain tü anüikiikat chino. Kamaneeshii maʼin wamüin na wawalayuukana jee wekaajüin tü eküülü nekaajakat. Akooʼomüinraasü tü aʼyatawaa aainjünakat suluʼu Weteet jee akooʼomüinraasü tü impuesto nachuntakat na sülaülashiikana mma sümüin Weteet. Saaʼujee tia, nakolojeʼerüin Weteet na Laülaashii Jülüjakana Aaʼin na Aküjaliikana pütchi jee noiküin tü piichi eejatüle Weteet. Soʼu 2015, akolojooshii waya chamüin Corea del Sur. Ayatayüliʼiya waya aʼyataain nümüin Jehová yaʼayaa. Kapüleesü maʼin wamüin wekirajaain sünain tü anüikiikat coreano. «Atüjeena jia aashajawaa coreano», mapajeʼe wamüin na wawalayuukana süpüla natütüleʼerüin waaʼin.

Nukumajüin waya Jehová süpüla aleewainjanain waya sümaa wayuu sümaa alinjatüin shia wapüla. Kapüleesü sümüin wayuu saaʼinrüin tia. Watüjaapejeʼe saaʼu aleewamaatüin waya namaa na wawalayuukana warütkaale nanainmüin jee kamaneere waya namüin (2 Cor. 6:11).

Wainma kasa watüjaka sünainjee waʼyataain nümüin Jehová. Nikirajüin waya Jehová süpüla anainjatüin waaʼin sümaa wayuu maʼleekalia. Wayaawatüinjatü saaʼu alin waya nüpüla Jehová jee wayaawatüinjatü saaʼu tü naaʼinrakat süpüla nuʼunirüin wakuwaʼipa. Mojuwaisü waaʼin jülüjapa waaʼin mojule washoʼu namüin na waneinnua, katchinpejeʼe waaʼin waashajeʼerapa tü pütchi nashajakat wamüin na waʼaleewainyuukana. Wayaawatüitpa aaʼu naapüin wamüin Jehová tü wachuntakat nümüin otta nükatchinrüin waaʼin soʼu tü kaʼi choʼujaakalü oʼu shia wamüin.

Tayaawatüitpa aaʼu sümaa Lesli kottiraainjanain waya jee yootojiraainjanain waya jaʼitairü wainmain tü waʼyataainkat. Jee müsia asirajüinjana waya mojule suchuntia watuma wanee pütchi suluʼu tü anüikii wekirajaakalü anain. Jülüjasü waaʼin aipaʼawai wanee kasa anasü waapüinjatka aaʼujee analuʼutka nümüin Jehová.

Yüü, nnojorüleejaʼa teʼitaain saaʼu misioneeroinjachin taya jee teʼraajüinjatüin wainma mma. Süka nükaalinjain taya Jehová, tayaawatüitpa aaʼu eein süpüla tountuin kasa eekai eein. Talatüshi maʼin taya saaʼujee tia. Wanaawasü taaʼin nümaa Jeremías wanaa sümaa nümüin mayaa: «Jehovákalee, pimeejüinyaʼala taya, nnojotsü teʼitaain paaʼu sünain müinjatüin takuwaʼipa putuma» (Jer. 20:7). Nnojotsü waʼatapajüin wainmainjatüin tü kasa anasü naapakat wamüin Jehová. Tooʼulaküitpa sukua katünasü jee wainmairü mma weʼraajaka. Alapalaashii waya naaʼu na wawalayuu suluʼukana tü Weteet chakat Asia, América, África, Europa otta Oceanía. Taapüin maʼin analuʼutka sümüin Lesli saaʼujee sükaalinjain taya sünain aaʼinraa tü taʼyataainkat nümüin Maleiwa.

Süpüshuaʼa tü waaʼinrakat waaʼinrüin shia süka alin wapüla Jehová. Saaʼujee tü kasa anasü weʼrakat maaʼulu, wayaawata aaʼu aneerüin maʼin wakuwaʼipa katapa woʼu süpüla kaʼikat süpüshuaʼa nutuma Jehová jee naapapa wamüin süpüshuaʼa tü kasa anasü suchuntaakat waaʼin (Sal. 145:16).