1, 2. (1) ¿Jamüsü waaʼin weʼrapa woutiisain wanee wayuu? (2) ¿Kasa wekirajaainjatka anain sünain ekirajaayakat tüü?

 ¿EEINNA piʼrüin na wayuu yapakana süpüla woutiisaa? Asoutushii naya shiʼipajee piamasü pütchi asakinnaka anain naya. «Aa», müshii naya sümaa emetuluin nanüiki. Jaʼyasü naaʼu napüshi jee naʼaleewainyuu talatüin naya soʼu tia. Nayuʼnnapa shirokujee tü wüinkat, jaʼyasü saaʼu noʼupünaa talatüin naya jee aʼwatüshii najapü napüshuaʼa na jutkatakana. Watta naalii na woutiisakana semaanawai süpüla naküjaliinjanain pütchi nüchiki Jehová.

² Jülüjale paaʼin woutiisaa, waneejatüjaʼa maʼin tü pukuwaʼipakat noulia na mojulaashiikana süka pürütkaweein nünainmüin Jehová (Sal. 14:1, 2). Ashajünüsü pütchikat tüü pümüin piakai, jaʼitashi tepichiyüire pia jee miyoʼuchire pia. Wainma kasa waʼyataaka anainjee nümüin Jehová, wekirajaajeerü anain apünüinsü neʼe. Ekirajaayakat tüü jalouijeerü namüin na woutiisainnapakana süpüla ayatüin naʼyataain nümüin chi Wamaleiwasekai süpüla kaʼikat süpüshuaʼa.

3. ¿Jamüsü kojutuka namüin na aʼyataashiikana nümüin Jehová tü pütchi shiimainkat nüchiki Maleiwa jee tü lotookalü akuwaʼipaa? (Salmo 119:128, 163).

³ Anuu tü nuluwataakat Jehová namüin na aʼyataashiikana nümüin: «[Anasü] kojutule maʼin jümüin tü shiimainkat» (Zac. 8:19). Nüküjain Jesús anakuwaʼipalin chi wayuu loteekai atuma sukuwaʼipa wanee kasa (Mat. 5:6). Tü wayaawatakat sünainjee tia shia kachiiruainjatüin maʼin waaʼin lotuin wakuwaʼipa, waaʼinrüin kasa eekai anain jee wulein wakuwaʼipa maʼaka nücheküin shia Jehová. Watüjaa aaʼulu kojutuin pümüin tü pütchi shiimainkat nüchiki Maleiwa jee tü lotookalü akuwaʼipaa. Müsüjeseʼe piyoutuin tü alawaakat jee tü mojulawaakat (paashajeʼera Salmo 119:128, 163). Chi eekai aküjain alawaa nüshatüin nukuwaʼipa Satanás, chi aluwataakai  saaʼu wayuu manoujainsat (Juan 8:44; 12:31). Tü keeʼireekat naaʼin chi Yolujaakai shia mojutuinjatüin atumawaa tü nünüliakat Jehová. Ayatüshia nia aküjain alawaa nüchiki chi Wamaleiwasekai soʼujee tü alatakat suluʼu tü apainkat Edén. Naaʼinrüin tia shiiʼiree sunoujainjatüin wayuu niain Jehová wanee aluwataai kapülaka aaʼin nukuwaʼipa neʼe nümüiwaʼa, aküjakai alawaa jee apülajakai suulia wayuu kasa eekai anain (Gén. 3:1, 4, 5). Mojutule sümüin wayuu tü pütchi shiimainkat nüchiki Maleiwa, eeshii süpüla naainjirüin naya Satanás kasa eekai mojuin maʼin (Roma 1:25-31, TNM).

4. ¿Kasa naaʼinraka Jehová süpüla sütüjaanüin aaʼu niain chi Maleiwa aküjakai tü shiimainkat waneepia? (Piirakaa sümüin tü ayaakuaakat).

⁴ Niyoutuin Jehová tü alawaakat, müsüjeseʼe nüküjain tü shiimainkat nüchiki namüin na wayuu aikana apüla nia (Sal. 31:5). Sutuma naaʼinrüin tia, nükaalinjain naya süpüla nnojoluin nemeejünüin nutuma chi Yolujaakai. Nikirajüin Jehová na aʼyataashiikana nümüin süpüla nnojoluin naküjain alawaa jee süpüla naaʼinrüin kasa eekai anain. Sutuma tia, jimatüsü naaʼin otta talatüshii naya süka nayaawatüin saaʼu kojutuin naya nümüin Maleiwa (Prov. 13:5, 6). ¿Müsüche paaʼin soʼujee pikirajaain sünain tü Bibliakat? Pütüjaaichipa aaʼu niain Jehová anakai süpüla oʼunirüin pukuwaʼipa otta sukuwaʼipa wayuu (Sal. 77:13). Müsüjeseʼe keeʼireein maʼin paaʼin paaʼinrüin tü nuluwataakalü anain (Mat. 6:33, TNM). Keeʼireesü maʼin paaʼin püküjain tü shiimainkat nüchiki Maleiwa süpüla sütüjaain saaʼu wayuu alawaain tü nüküjakat Satanás nüchiki. ¿Kasa paaʼinrajatka süpüla puuntuin tia?

5. ¿Kasa paaʼinrajatka süpüla jaʼyain paaʼu kojutuin pümüin tü pütchi shiimainkat jee tü lotookalü akuwaʼipaa?

⁵ Saaʼujee tü pukuwaʼipakat natüjaajeerü aaʼu na waneinnua piyoutuin tü alawaa nüküjakat Satanás nüchiki Jehová, asouteechi pia saaʼu tü punoujakalü anain, püchekeerü nuluwataain Maleiwa paaʼu jee oonoweechi pia sümaa tü nuluwataakalü anain. Süpüla jaʼyainjatüin paaʼu tia, oʼuraajüinjachi pia nümüin Jehová süpüla püküjain nümüin piʼyataainjachin nümüin süpüla kaʼikat süpüshuaʼa. Süchikijee tia, woutiisainjachi pia süpüla sütüjaain saaʼu wayuu paapüitpain paaʼin nümüin Maleiwa. Süpüla woutiisainjachin pia, kojutuinjatü pümüin tü pütchi shiimainkat nüchiki Maleiwa jee tü lotookalü akuwaʼipaa.

6. Saashin Salmo 45:4, ¿kasa aika aaʼujee wapüla Jesucristo?

⁶ ¿Jamüshi aika püpüla Jesucristo? Aküjünüsü suluʼu Salmo 45:4 (paashajeʼera), waneirua kasa aika aaʼujee nia wapüla. Nükaalinjain waya  Jesús süpüla watüjaain saaʼu tü shiimainkat nüchiki Maleiwa, süpüla nnojoluinjatüin yaletüin waaʼin jee lotuinjatüin wakuwaʼipa. Kojutule wamüin tü shiimainkat nüchiki Maleiwa jee tü lotookalü akuwaʼipaa, aishijaʼamata wapüla Jesús. Anasü jülüjale waaʼin yalayalain naaʼin Jesús sünain aküjaa tü pütchi shiimainkat nüchiki Maleiwa jee kachiiruain naaʼin tü lotookalü akuwaʼipaa (Juan 18:37). ¿Kasa naaʼinraka Jesús süpüla nikirajüin waya suulia yaletüin waaʼin?

7. ¿Jamüsü paaʼin sutuma nnojoluin yaletüin naaʼin Jesús?

⁷ Saaʼujee tü nüküjakat Jesús jee tü naaʼinrakat, atüjaana aaʼuchi nnojoluin yaletüin naaʼin. Nüküjain nuuntuin kasa süpüshuaʼa süka nükaalinjain nia chi Nüshikai jee nnojotsü naaʼinrüin wanee kasa shiiʼiree nuʼwaajünüin natuma na waneinnua (Mar. 10:17, 18, TNM; Juan 5:19). ¿Jamüsü paaʼin sutuma nnojoluin yaletüin naaʼin chi Nüchonkai Maleiwa? ¿Aashin akooʼomüinraain naalin püpüla jee püshateein maʼin nukuwaʼipa? Süka nüshatüin maʼin Jesús nukuwaʼipa chi Nüshikai, nnojotsü yaletüin naaʼin (Sal. 18:35; Heb. 1:3). ¿Aashin aleeweein maʼin pia nümaa Jesús sünainjee tia?

8. ¿Jamüshi wachekaka niain Jesús aluwataain waaʼu?

⁸ Wacheküin niainjachin aluwataain Jesús waaʼu, jama niain chi anakai süpüla aluwatawaa saaʼu wayuu. Nüneeküin nia Jehová süpüla nuluwataainjachin otta nikirajüin nia süpüla nütüjain süpüleerua tia (Is. 50:4, 5). Jülüjataa waaʼin tü naaʼinrakat Jesús wapüleerua süka müleʼushaatain tü waalinkat nüpüla (Juan 13:1). Süka niain Jesús aluwataain waaʼu, alinjachi nia wapüla süka süpüshuaʼa waaʼin. Naashin Jesús, aire nia napüla na wayuukana, naaʼinreerü tü nuluwataakalü anain naya. «Taʼaleewainyuu», müshi nia namüin (Juan 14:15; 15:14, 15). Anataʼaleesüjaʼa tü wakuwaʼipakat süka eein süpüla aleewain waya nümaa chi Nüchonkai Jehová.

9. Püküja wanee kasa woutiisaka aaʼujee waya maʼaka naaʼinrüin shia Jesús.

⁹ Wanee kasa nuluwataaka anain Jesús na nikirajüinkana shia woutiisainjanain naya (Mat. 28:19, 20). Niʼitaain sukuwaʼipa tia napüleerua. Eesü waneirua kasa woutiisaka aaʼujee Jesús, akaataajaʼa wayakana eesü waneirua kasa woutiisaka aaʼujee waya (paashajeʼera tü pütchikat « Naata tü woutiisakalü aaʼujee Jesús suulia tü woutiisakalü aaʼujee na nikirajüinkana»). Wanee kasa woutiisaka aaʼujee Jesús shia süpüla naaʼinmaain tü nüchekakat chi Nüshikai (Heb. 10:7). Wanaa sümaa woutiisain na nikirajüinkana Jesús, atüjaana aaʼulu naapüin naaʼin nümüin Jehová. Eepejeʼe wanee kasa wanaawaka anainjee tü woutiisakalü aaʼujee naya sümaa tü woutiisakalü aaʼujee Jesús, shiajaʼa süpüla naaʼinmaain tü nüchekakat Jehová suulialeʼeya tü keeʼireekat naaʼin. Sutuma naaʼinrüin tia, nashatüin nukuwaʼipa Jesús chi ekirajakai naya.

10. (1) ¿Jamüshi aika püpüla Jesús? (2) ¿Kasa keeʼireejeetka paaʼin paaʼinrüin sutuma alin nia püpüla?

¹⁰ Pütüjaa aaʼuchi niain Jesús chi waneeshikai Nüchon Jehová otta niain chi nüneekakai süpüla nuluwataain waaʼu. Pütüjaa aaʼuchi nnojoluin yaletüin naaʼin jee nüshatüin maʼin nukuwaʼipa chi Nüshikai. Pütüjaa aaʼu tü kasa pülasü naaʼinrakat süpüla nikirüin na outakana jamü, süpüla nümüliajüin naaʼin na mojukana aaʼin jee süpüla naawaleʼerüin na ayuuikana (Mat. 14:14-21). Pütüjaa aaʼu tü kasa naaʼinrakat süpüla nuʼunirüin nakuwaʼipa na aʼyataashiikana nümüin Maleiwa maaʼulu (Mat. 23:10). Otta pütüjaa aaʼu tü kasa anasü naaʼinrajatkat nuluwataapeena saaʼu tü Mmakat. ¿Kasakaʼa paaʼinrüinjatüin aire nia püpüla? Anasü püshatüle tü nukuwaʼipakat (Juan 14:21). Müsüjeseʼe paapüinjatüin paaʼin nümüin Jehová jee woutiisainjachin pia.

11. ¿Kasa woutiisainjachikai maʼin aaʼujee pia?

¹¹ ¿Kasa woutiisainjachikai maʼin aaʼujee pia? Anuu nünüiki Jesús süchiki tü nuluwataakalü anain Maleiwa alanaʼaleeka maʼin saʼakajee tü Pütchi Aapünakat nümüin Moisés: «Alinjachi püpüla Jehová chi Pümaleiwasekai, alinjachi nia püpüla süka süpüshuaʼa paaʼin, sükajee pukuwaʼipa, süka süpüshuaʼa pütchin otta jülüjainjachi  nia paaʼin waneepia» (Mar. 12:30, TNM). ¿Müsüche naalin püpüla Maleiwa?

12. ¿Jamüshi aika püpüla Jehová? (Piirakaa sümüin tü ayaakuaakalüirua).

¹² Watta saalii tü kasa aikalü aaʼujee wapüla Jehová. Pütüjaa aaʼuchi niain kanainjeejachin tü kataakalü oʼuu, niain asülajüin süpüshuaʼa tü kasa eekai anain otta niain aapüin wamüin tü atüjaakat (Sal. 36:9; Sant. 1:17). Süpüshuaʼa tü kasa anasü aapünakat pümüin nümaʼanajeejatü shia Jehová, chi kamaneekai maʼin jee chi aikai maʼin apüla waya.

13. ¿Jamüsü kojutuka maʼin wamüin tü naaʼinrakat Jehová süpüla naakajirüin waya suulia tü kaainjalaakat?

¹³ Anasü maʼin tü naaʼinrakat Jehová süpüla naakajirüin waya suulia tü kaainjalaakat. Jülüjataa waaʼin aijiraain maʼin Jehová nümaa chi Nüchonkai. Nüküjain Jesús alin nia nüpüla chi Nüshikai jee alin nia nüpülaya (Juan 10:17; 14:31). Süka kakaliashaatain Jesús nümaa chi Nüshikai chaa iipünaa nnojoliiwaʼaya nüntüin yaa mmapaʼamüin, aijiraashii maʼin naya (Prov. 8:22, 23, 30). Aikajasaʼa maʼin nümüin Jehová nuuʼulaain müliain jee outuin chi Nüchonkai. Süka aishaatain wayuu süpüshuaʼa nüpüla Jehová, naapüin nikii chi Nüchon aishikai maʼin nüpüla süpüla katüinjatüin soʼu jee katüinjatüin poʼu süpüla kaʼikat süpüshuaʼa (Juan 3:16, TNM; Gal. 2:20, TNM). Tia shia maʼin tü aikat aaʼujee wapüla Maleiwa.

14. ¿Kasa tü anaʼleekat maʼin süpüla paaʼinrüin?

¹⁴ Sümaʼinruʼu pikirajaain sooʼomüin nüchiki  Jehová, akooʼomüinraasü tü naalinkat püpüla. Watüjaa aaʼuchi aleeweein maʼin pia nümaa Jehová maaʼulu jee süpüla kaʼikat süpüshuaʼa, eesü süpüla puuntuin tia. Eeshi süpüla talatüin Jehová putuma sükajee pünüiki jee sükajee tü paaʼinrakat. Shiaʼaya keeʼireeka maʼin naaʼin Jehová paaʼinrüin tia (Prov. 23:15, 16). Saaʼujee tü kasa püneekakat, atüjaaneerü aaʼu shiimainre alin maʼin nia püpüla (1 Juan 5:3). Tü anaʼleekat maʼin süpüla paaʼinrüin shia poonooin waneepia sümaa nünüiki Jehová.

15. ¿Kasa paaʼinrajatka süpüla sütüjaanüin aaʼu alin püpüla Jehová?

¹⁵ ¿Kasa paaʼinrajatka süpüla sütüjaanüin aaʼu alin püpüla Jehová chi Maleiwa shiimainshikai? Oʼuraajüinjachi pia nümüin süpüla püküjain nümüin paapüinjatüin paaʼin nümüin (Sal. 40:8). Süpüla sütüjaain saaʼu wayuu paapüitpain paaʼin nümüin Maleiwa, woutiisainjachi pia. Wekirajaaitpa anain talatüin maʼin pia soʼu tü kaʼi woutiisakalü oʼu pia jee aʼwanaajaʼaleesia pukuwaʼipa soʼuleʼeya kaʼikat tia. Shiainjatü joo paaʼinmaaka maʼin tü piʼyataainkat nümüin Maleiwa suulialeʼeya tü keeʼireekat paaʼin (Roma 14:8, TNM; 1 Ped. 4:1, 2). Eesüjaʼa jülüjale paaʼin nnojoluin shaitaain tü woutiisaakat. Püneekülejeʼeya woutiisain pia, watteerü saalii tü kasa anasü piʼreetkat, wekirajaa süchiki tia.

16. Sünainjee tü sümakat Salmo 41:12, ¿kasa naapeetka Jehová namüin na aʼyataakana nümüin?

¹⁶ Müleʼu maʼin nümanee Jehová, nnojoishi eein wanee wayuu makai aka naaʼin. Wainmaleejeeria tü kasa anasü naapeetkat pümüin suulialeʼeya tü paapakat nümüin (Mar. 10:29, 30). Jaʼitasü piʼrüin keemain maʼin tü mmapaʼakat, eeshi süpüla talatüin pia nutuma Jehová. Tia shia tü palajatkat kasa anasü piʼraka sutuma woutiisain pia. Eeshi süpüla piʼyataain nümüin chi Washikai Maleiwa süpüla kaʼikat süpüshuaʼa, eesü süpüla sukooʼomüinraain naalin Jehová püpüla otta tü paalinkat nüpüla jee kateerü poʼu süpüla kaʼikat süpüshuaʼa maʼaka eejeechin nia süpüla kaʼikat süpüshuaʼa (paashajeʼera Salmo 41:12).

17. ¿Kasa eeka süpüla paapüin nümüin Jehová?

¹⁷ Paapapa paaʼin nümüin chi Washikai Maleiwa jee woutiisapa pia, paapüin nümüin wanee kasa anashaatasü maʼin. Süpüshuaʼa tü kasa anasü pümaʼanakat jee tü talatakalü atuma paaʼin, nümaʼanajeejatü shia Jehová. ¿Jama piakai? ¿Kasa eeka süpüla paapüin nümüin? Tü kasa eekat süpüla  paapüin nümüin chi Kakumalakai tü kasa chakalü iipünaa jee tü yaakat mmapaʼa, shia poonoole waneepia sümaa nünüiki jee paaʼinmaale tü piʼyataainkat nümüin (Job 1:8; 41:11; Prov. 27:11). Nnojotsü eein wanee kasa makalü aka saaʼin tia suluʼu anaʼleein maʼin süpüla paaʼinrüin. Tü woutiisainjachikai aaʼujee pia shia süka alin püpüla Jehová.

18. ¿Jarat tü pütchi püsakireʼerüinjatkalü anain paaʼin?

¹⁸ Sünainjee tü wekirajaaitpakalü anain, ¿pücheküinche woutiisain pia? Piajaʼa neʼe atüjaaka saaʼu tia. Anasü püsakireʼerüle paaʼin sünain pütchikat tüü: «¿Keraashiche taya süpüla woutiisaa?» (Aluw. 8:36). Soto paaʼin tü apünüinsükat kasa woutiisainjachikai aaʼujee pia. Palajana, shia süka kojutuin pümüin tü pütchi shiimainkat nüchiki Maleiwa jee tü lotookalü akuwaʼipaa. Anasü püsakireʼerüle paaʼin sünain tüü: «¿Taʼatapajüinche maʼin tü kaʼi nnojoluinjatkalü oʼu süküjain wayuu alawaa nüchiki Maleiwa sümaa saaʼinrajatüin tü nuluwataakalü anain?». Piama, shia süka alin püpüla Jesucristo. Anasü püsakireʼerüle paaʼin sünain tüü: «¿Tacheküinche niain chi Nüchonkai Maleiwa aluwataain taaʼu sümaa tashatüin maʼin nukuwaʼipa?». Otta apünüin, shia süka alin püpüla Jehová, tia shia tü anaʼleekat maʼin süpüla woutiisain aaʼujee pia. Anasü püsakireʼerüle paaʼin sünain tüü: «¿Aʼyataweeshiche taya nümüin Jehová süpüla talatüinjachin nia tatuma?». «Aa», pümüle sümüin tia pütchikalüirua, ¿kasakaʼa joo ataʼülüin pukuwaʼipa suulia woutiisain pia? (Aluw. 16:33).

19. ¿Jamüsü nnojoluinjatka wainmajüin paaʼin suulia woutiisain pia? Püküja wanee sukuwaʼipa (Juan 4:34).

¹⁹ Nnojotyürüle pütüjaain saaʼu anale süpüla woutiisain pia, jülüja paaʼin wanee kasa nüküjaka Jesús (paashajeʼera Juan 4:34, TNM). Naashin Jesús müshi nikakai aaʼin shiale naaʼinrüin tü nuluwataakalü anain chi Nüshikai. ¿Jamüsü nüküjaka tia? Watüjaa aaʼulu anain waaʼin sutuma weküin. Akaʼaya Jesús nütüjaa aaʼulu anain süpüshuaʼa tü nuchuntakat wamüin Jehová. Nnojotsü nuchuntuin Jehová wamüin wanee kasa mojeetka atuma wakuwaʼipa. Tü keeʼireekat maʼin naaʼin Jehová shia woutiisainjachin pia (Aluw. 2:38, TNM). Aneetkalaka pukuwaʼipa paaʼinrüle tia nuchuntakat pümüin. Saapünüle pümüin tü eküülü pikaajakat, ¿wainmajeetche paaʼin suulia piküin shia? Nnojottaa. Süka pütüjaain saaʼu aneerüin pukuwaʼipa sutuma woutiisain pia, nnojo wainmajüin paaʼin suulia aaʼinraa tia.

20. ¿Kasa wekirajaainjatka anain sünain tü wane ekirajaayakat?

²⁰ ¿Kasa ataʼülaka nakuwaʼipa waneinnua wayuu suulia woutiisain naya? Eesüjaʼa jülüjale naaʼin nnojoliin keraain naya süpüla tia. Shiimain nnojoluin shaittaain tü aapaakalü aaʼin nümüin Maleiwa jee tü woutiisaakat. Müsüjeseʼe jülüjainjatüin paaʼin tia, nnojolinjachi ashapajaain pia jee keraainjachi pia süpüla tia. ¿Jama woutiiseere pia? ¿Kasa paaʼinrajatka süpüla puuntuin tia? Tia shia tü wekirajaainjatkalü anain sünain tü wane ekirajaayakat.