1, 2. ¿Jamüshi nnojolinjachikai piyüülajaain nnojoiyüire keraain pia süpüla woutiisaa? (Piirakaa sümüin tü ayaakuaakalüirua sünainka süta tü rewiisütakat).

 WOUTIISEERE pia, anasü tü paaʼinreekat. ¿Keraashiche pia süpüla woutiisaa? Keraalejeʼeya pia jee keraalejeʼeya pia neʼrüin na laülaashiikana, anashi woutiisamaatüle pia. Talateechikalaka pia sünain aʼyatawaa nümüin Jehová.

² Nnojo piyüülajaain süküjünüle pümüin isayülüin püpüleerua woutiisain pia jee shiale jülüjain paaʼin isayülüin püpüleerua tia. Ayataʼaya piʼyataain süchiirua süpüla puuntuin woutiisain pia jaʼitashi jintülin pia jee miyoʼuchire pia.

3. (1) ¿Jamüsü nünüiki chi wayuu chejeʼewaikai Etiopía nümüin Felipe? (Aluwataaushikana 8:36, 38). (2) ¿Kasa eeka süpüla wasakireʼerüin anain waaʼin nüchiki?

³ (Paashajeʼera Aluwataaushikana 8:36, 38, TNM). Anuu nünüiki wanee wayuu chejeʼewai Etiopía nümüin Felipe: «Anainjaʼa woutiisale taya, ¿kasakaʼa ataʼülüin takuwaʼipa?». Woutiiseeshi maʼin chia wayuukai. ¿Shiimainchejeʼe keraain nia süpüla woutiisaa?

4. ¿Jamüsü wayaawataka aaʼu nütüjaweein sooʼomüin nüchiki Maleiwa chi wayuu chejeʼewaikai Etiopía?

⁴ Chia wayuukai, «chejeejachi Jerusalénjee sünain aʼwaajaa Maleiwa» (Aluw. 8:27, TNM). Eeshijaʼa süpüla niain wanee wayuu aapaakai sümaa tü nanoujakalü anain na judíokana. Atüjashi nia nüchiki Jehová süka niʼraajüin tü Pütchi Ashajuushikat suluʼu Hebreo, atüjeeshi maʼin nia sooʼomüin nüchiki Jehová. ¿Kasa naaʼinraka chia wayuukai nüpanapajapa nia Felipe? Aashajeʼetshi nia tü pütchi nüshajakat Isaías (Aluw. 8:28).  Tia pütchi naashajeʼerakat nnojotsü shiyaawatamaatüin aaʼu wayuu. Nnojotsü anain neʼe naaʼin chia wayuukai sümaa tü kasa choʼujaakat süpüla nütüjaain aaʼu wanee wayuu palajana nüchiki Maleiwa, atüjeeshi nia sooʼomüin.

5. ¿Kasa naaʼinraka chi wayuu chejeʼewaikai Etiopía sutuma tü nikirajaaitpakalü achiki?

⁵ Chia wayuukai aʼyataashi nia sümüin Candace, tü aluwataasükat naaʼu na wayuu chejeʼewaliikana Etiopía, «nia kajapuluʼuka süwashirüin» (Aluw. 8:27, TNM). Mayaainjeʼe wainmain niʼyataain, ayatüshia akatalüin nia kaʼi süpüla nuʼwaajüin Jehová. Nnojotsü anain neʼe naaʼin sümaa tü kasa nütüjaakalü aaʼu nüchiki Maleiwa, naaʼinrüinña tü nikirajaakalü anain. Wattasü nukua süpüla nuʼwaajüin Jehová. Oʼunushi nia Etiopíajee chamüinreʼeya Jerusalénmüin. Mayaainjeʼe wattain tia mmakat nüpüleerua jee wainmain nüsapia, ayatüshia nia oʼunuin, jama nuʼwaajeein maʼin Jehová.

6, 7. ¿Kasa naaʼinraka chi wayuu chejeʼewaikai Etiopía süpüla nukooʼomüinrüin naalin Jehová nüpüla?

⁶ Nikirajüin Felipe chia wayuukai süpüla niyaawatüin saaʼu tü pütchi choʼujaakat maʼin süpüla nütüjaain aaʼu, maʼaka saaʼin tü ekirajünakalü anain niain Jesús chi Mesíaskai (Aluw. 8:34, 35). Nütüjaapa saaʼu süpüshuaʼa tü naaʼinrakat Jesús nüpüleerua, antüsü tia suluʼumüin naaʼin. ¿Kasakaʼa joo naaʼinrajatüin sutuma nütüjaain saaʼu tia? Eesüjaʼa nüneeküle ayatüinña müin nukuwaʼipa jee anain naaʼin sümaa tü nütüjaakalü aaʼu wanaa namaa na judíokana. Nnojotpejeʼe naaʼinrüin tia süka aishaatain maʼin Jehová otta Jesús nüpüla. Müshijeseʼe woutiisain nia jee nuushikajaain süchiirua nukuwaʼipa Jesús. Nuwoutiisajakalaka nia Felipe, jama niʼrüin keraain nia.

⁷ Sünainjee nukuwaʼipa chi wayuu chejeʼewaikai Etiopía, pütüjaajeerü aaʼu tü paaʼinrajatkat süpüla keraain pia süpüla woutiisaa. «Anainjaʼa woutiisale taya, ¿kasakaʼa ataʼülüin takuwaʼipa?», meerü pünüiki maʼaka naaʼin. Anuu tü naaʼinrakat chia wayuukai: ayatüshi ekirajaain nia nüchiki Maleiwa, naaʼinrüin tü nikirajaakalü anain jee nukooʼomüinrüin naalin Jehová nüpüla. Anashii wekirajaale süchiki tü paaʼinrajatkat süpüla püshatüin tü naaʼinrakat.

8. ¿Kasa waaʼinrajatka saashin Juan 17:3?

⁸ (Paashajeʼera Juan 17:3, TNM). ¿Ekirajaweesüche paaʼin sünain tü Bibliakat pütüjaapa saaʼu tia nümakat Jesús? Wainma na aaʼinrakana tia. Ayatüinjanaʼaya waya ekirajaain nüchiki chi Maleiwa shiimainshikai, waaʼinrüinjatü tia waneepia (Ecl. 3:11). Ekirajaajeena waya nüchiki Maleiwa süpüla kaʼikat süpüshuaʼa. Sümaʼinruʼu weʼraajüin nukuwaʼipa Jehová, aleeweena maʼin waya nümaa (Sal. 73:28).

9. ¿Kasa ayatüinjatka waaʼinrüin watüjaapa saaʼu tü kasa choʼujaakat watüjaain aaʼu palajana nüchiki Maleiwa?

 ⁹ Woʼttapa sünain ekirajawaa nüchiki Jehová, ekirajaashii waya sünain «tü kasa sütüjaainjatkalü aaʼu wayuu palajana nüchiki Maleiwa». Tia müsü aka saaʼin tü leechi nüsüinjatkat wanee joʼuu naashin Pablo, nüküjain tia namüin na anoujashii hebreokana (Heb. 5:12; 6:1, TNM). Süchikijee nümüin Pablo tia, nüküjain namüin na anoujashiikana ayatüinjanain nekirajaain sooʼomüin nüchiki Maleiwa, nnojotsü neʼe anainjatüin naaʼin sümaa tü kasa natüjaaitpakalü aaʼu nüchiki. ¿Ayateeshiche pia ekirajaain sooʼomüin tü sümakat tü Bibliakat? ¿Ayateesüche pukooʼomüinrüin tü punoulakat? ¿Ayateeshiche pia ekirajaain sooʼomüin nüchiki Jehová otta süchiki tü keeʼireekat naaʼin?

10. ¿Jamüsü kapüleeka nümüin wanee wayuu ekirajawaa?

¹⁰ Eeshi wayuu kapüleekai amüin ekirajawaa. ¿Kapüleesüche pümüin ekirajawaa? ¿Ekirajünüshiche pia suluʼu koleejia sünain aashajeʼeraa jee sünain ekirajawaa? ¿Kamalainsüche pümüin ekirajawaa? ¿Jülüjasüche paaʼin nnojoluin jüüjüüin pikii süpüla piyaawatüin saaʼu tü sümakat wanee karaloʼuta? Mülejeʼeya pukuwaʼipa, nnojoishi neʼe piain alatüin amüin tia. Nükaalinjeechi pia Jehová süpüla kamalain pümüin ekirajawaa, jama niain chi Atüjakai maʼin ekirajaa wayuu.

11. ¿Jamüshi niaka Jehová chi Atüjakai maʼin ekirajaa wayuu?

¹¹ Nüküjain Jehová niain chi Atüjakai maʼin ekirajaa wayuu (Is. 30:20, 21). Wanaa sümaa nikirajüin na wayuukana nnojotsü nüpüleeruain naaʼin, kamaneeshi nia namüin, niyaawata aaʼu tü nakuwaʼipakat otta jülüjasü naaʼin waneepia tü kasa anakat natuma (Sal. 130:3). Nnojotsü nuchuntuin wamüin wanee kasa eekai isain wachiki. Anasü sotule waaʼin niain kakumalain tü wekiikat süpüla wattain saalii kasa watüjaainjatka aaʼu (Sal. 139:14). Nukumajüin waya süpüla kamalainjatüin wamüin ekirajawaa jee nücheküin ayatüinjanain wekirajaain süpüla kaʼikat süpüshuaʼa sümaa talatüin waaʼin. Anasüjeseʼe waʼyataale süchiirua müinmaʼa yaa süpüla keeʼireeinjatüin waaʼin watüjaain sooʼomüin tü shikirajakalü anain tü Bibliakat (1 Ped. 2:2). ¿Kasa paaʼinrajatka süpüla puuntuin tia? Anashi piʼyataale süchiirua paashajeʼerüin jee pikirajaain sünain tü Bibliakat weinshi (Jos. 1:8). Nükaalinjeechi pia Jehová süpüla kamalain pümüin aashajeʼeraa jee pikirajaain nüchiki.

12. ¿Jamüshii wekirajaainjanaka nüchiki Jesús jee süchiki tü niʼyataainkat sünain aküjaa pütchi?

¹² Anashi pükatarüle kaʼi süpüla püsakireʼerüin paaʼin sünain tü nukuwaʼipakat Jesús jee sünain tü niʼyataainkat sünain aküjaa pütchi. Oushikajaainjachi pia süchiirua nukuwaʼipa Cristo süpüla ayatüin piʼyataain nümüin Jehová, shialeekajaʼa maaʼulu soʼunnaa keemain maʼin tü mmapaʼakat (1 Ped. 2:21). Nüküjain Jesús namüin na nikirajüinkana neʼreenain müliaa (Luc. 14:27, 28). Nütüjaapejeʼe saaʼu noonoojeenain nümaa Maleiwa maʼaka naaʼin (Juan 16:33, TNM). Pikirajaa süchiki nukuwaʼipa Jesús jee kachiirua paaʼin püshatüin tü nukuwaʼipakat waneepia.

13. (1) ¿Kasa ayatüinjatka puchuntuin maʼin nümüin Jehová? (2) ¿Jamüsü paaʼinrajatka tia?

¹³ Nnojoishii neʼe ekirajaainjanain waya shiiʼiree wattain saalii pütchi watüjaaka aaʼu, ekirajaainjanaʼaya waya süpüla weʼraajüin nukuwaʼipa Jehová, süpüla alinjachin nia wapüla jee süpüla katsüinjatüin wanoula (1 Cor. 8:1-3, TNM). Ayata pikirajaain nüchiki Jehová otta ayata puchuntuin nümüin nükooʼomüinraiwaʼaya tü punoulakat (Luc. 17:5). Naapeerü pümüin tü puchuntakat nümüin. Katsüinre punoula sutuma tü pikirajaakalü anain nüchiki  chi Wamaleiwasekai, pukooʼomüinreerü tü piʼyataainkat nümüin (Sant. 2:26).

14. ¿Kasa nüküjaka achiki Pedro süpüla wayaawatüin saaʼu jamüin waaʼinrajatka tü wekirajaakalü anain? (Piirakaa sümüin tü ayaakuaakat).

¹⁴ Nüküjain chi aluwataaushikai Pedro naaʼinrüinjatüin tü nekirajaakalü anain na oushikajaakana süchiirua nukuwaʼipa Cristo. Nüküjain tia sükajee nukuwaʼipa Noé. Jamüshijaʼa Jehová, nüküjain nümüin Noé niʼitirüinjatüin wanee juya miyoʼushaata süpüla wüinsirüin na wayuu mojulaashiikana. Nnojoishi neʼe oʼttaainjachin Noé sümaa nüpüshi süka natüjaain saaʼu tü alatajatkat, eeinjatiaʼaya tü kasa naaʼinrajatkat. Aashajaashi Pedro süchiki tü kaʼi isayütkalia oʼu süpüla shiʼitajatüin tü juyakat soʼu nümüin: «Wanaa sümaa naʼatapajüin Maleiwa sukumajünüin tü anuwakat» (1 Ped. 3:20, TNM). Naaʼinrakalaka Noé sümaa nüpüshi tü nuluwataakalü anain naya Jehová, nakumajüinjeseʼe tü anuwa miyoʼushaatakat isaiwaʼaya sükalia süpüla shiʼitüin tü juyakat (Heb. 11:7). Nuʼwanaajireʼerüin Pedro tü woutiisaakat sümaa tü naaʼinrakat Noé. Anuu nünüiki: «Tia kasa alatakat shiyaawase tü woutiisaakat. Shiaʼaya juʼtteʼennaka anainjee tia maaʼulu» (1 Ped. 3:21, TNM). Tü paaʼinrakat süpüla keraain pia süpüla woutiisaa müsü aka saaʼin tü naaʼinrakat Noé sümaa nüpüshi süpüla nakumajüin tü anuwakat. ¿Kasa paaʼinrajatka süpüla keraain pia süpüla woutiisaa?

15. ¿Kasa naaʼinraka wanee wayuu shiimainre niyaawajaain suulia naainjala?

¹⁵ Saʼakajee tü waaʼinrajatkat süpüla keraain waya süpüla woutiisaa shia wayaawajaainjanain suulia waainjala (Aluw. 2:37, 38). Shiimainre niyaawajaain wanee wayuu suulia naainjala, nunouteʼereerü nukuwaʼipa. ¿Ooʼulaashiche pia suulia aaʼinraa kasa eekai mojuin noʼuluʼu Jehová? ¿Ooʼulaashiche pia suulia tü sünainpünaakalü amaʼüjirawaa akuwaʼipaa? ¿Ooʼulaashiche pia suulia akamüjaa jee suulia yarüttüin pünüiki? (1 Cor. 6:9, 10, TNM; 2 Cor. 7:1; Éf. 4:29). Nnojoyürüle puuʼulaain suulia tia, ayataʼaya kachiiruain paaʼin punoutuin pukuwaʼipa. Choʼujaale pükaalinjünüin, paashajaa nümaa chi wawala ekirajakai pia sünain tü Bibliakat jee shiale namaa na laülaashiikana süpüla piyaawatüin saaʼu tü anakat süpüla  paaʼinrüin. Jimaʼaire pia, majayürüle pia jee kepiale pia namaa na kachonkana pia, puchunta kaalinwaa namüin süpüla puuʼulaainjatüin suulia tü kasa mojusü kiʼrakalü anain pia, tü ataʼülakat pukuwaʼipa suulia woutiisain pia.

16. ¿Kasa paaʼinrajatka süpüla kiʼrain pia sünain aaʼinraa tü anainjatkalü atuma punoula?

¹⁶ Choʼujaashi kiʼrain pia sünain aaʼinraa tü kasa anainjatkalü atuma punoula. Paaʼinrüin tia puutkajaʼawaire jee piyalerawaire pajapü sünain tü outkajawaakat (Heb. 10:24, 25). Püneekanapa süpüla püküjain pütchi wanaa namaa na wawalayuukana, anashi pujuʼitawaire sünain aaʼinraa tia. Paaʼinrüle tia, kamalainjeerü maʼin shia pümüin (2 Tim. 4:5). Jimaʼaire pia, majayürüle pia jee ayatayüire kepiain pia namaa na wayuu kachonkana pia, anasü püsakireʼerüle paaʼin sünain tüü: «¿Nachiiruashiche taya waneepia süpüla toutkajaainjachin jee taküjainjachin pütchi? ¿Taaʼinrataapa tia süka taaʼin tamüiwaʼa?». Paaʼinrüle tia sükajee paaʼin pümüiwaʼa, jaʼyeerü paaʼu kanoulain pia, alin püpüla Jehová jee kojutuin pümüin tü naapakat pümüin. Kiʼrale pia sünain aaʼinraa tü anainjatkalü atuma punoula, puʼwaajeechi Jehová, meerü püsülajakai aaʼin wanee kasa nümüin (2 Ped. 3:11, TNM; Heb. 13:15). Nnojorüle waapüin mojusheeka wanee kasa nümüin Jehová, talateechi maʼin nia wamaa, jama nücheküin waapüin kasa nümüin süka waaʼin wamüiwaʼa (anasü paashajeʼerüle 2 Cor. 9:7). Akaʼaya wayakana, talateerü maʼin waaʼin waʼyataale nümüin Jehová süka süpüshuaʼa waaʼin.

17, 18. (1) ¿Kasa paaʼinrajatka süpüla keraain pia süpüla woutiisaa? (2) ¿Jamüsü paaʼinrajatka tia? (Proverbios 3:3-6).

¹⁷ Eejeerü tü kasa kapüleejeetkat pümüin süpüla woutiisain pia. Eeshijaʼa süpüla shimeeʼerainpalain pia wayuu saaʼujee punoujain jee süpüleeruaale paaʼin (2 Tim. 3:12). Eesüjaʼa iseerüle püchiki püchecherüin paaʼin suulia wanee kasa mojusü kiʼrapuʼuka anain pia. Eesüjaʼa mojule maʼin paaʼin sutuma isayülüin püpüleerua keraain pia süpüla woutiisaa. ¿Kasa paaʼinrajatka suulia piyüülajaain? Alinjachi maʼin Jehová püpüla.

¹⁸ Tü alanaʼaleekat suluʼu anain shia alinjachin püpüla Jehová (paashajeʼera Proverbios 3:3-6). Shiimainrejeʼe alin püpüla Jehová süka süpüshuaʼa paaʼin, alateechi pia süchikumüin tü müliaa piʼreetkat. Kojuyatua süküjain tü Bibliakat muloʼushaatain naalin nüpüla Jehová na aʼyataashiikana nümüin, nnojoleenain naya nüpütüin namüiwaʼa jee nnojoleerüin  ajaʼttüin naalin nüpüla (Sal. 100:5). Nukumajüin pia Maleiwa maʼaka saaʼin nukuwaʼipa (Gén. 1:26). ¿Kasa paaʼinrajatka süpüla muloʼuinjatüin saalin wayuu püpüla maʼaka naaʼinrüin shia Jehová?

19. ¿Kasa paaʼinrajatka süpüla paapüin analuʼut nümüin Jehová saaʼujee tü kasa naaʼinrakat püpüleerua? (Galacia 2:20).

¹⁹ Atüjainjachi pia aapaa analuʼut (1 Tes. 5:18). Anasü püsakireʼerüle paaʼin soʼukaiwai sünain tüü: «¿Kasa naaʼinraka Jehová tapüleerua soʼukai süka alin taya nüpüla?». Puʼuraajapa, paapa tü analuʼutkat nümüin saaʼujee tü kasa naapakat pümüin. Anasü piyaawatüle saaʼu naaʼinrüin tia Jehová püpüleerua süka alin pia nüpüla. Tia shia tü niyaawatakalü aaʼu Pablo (paashajeʼera Galacia 2:20, TNM). Anasü püsakireʼerüle paaʼin sünain tüü: «¿Kasa taaʼinrajatka kojutule tamüin tü naaʼinrakat Jehová tapüleerua?». Aire püpüla Jehová, püchechereerü paaʼin suuʼulakünapa paaʼin, püchechereerü paaʼin soʼunnaa müliaa otta kireechi pia sünain aaʼinraa tü anainjatkalü atuma punoula. Paaʼinrüle tia soʼukaiwai, atüjaaneerü aaʼu alin püpüla chi Washi iipünaajachikai.

20. (1) ¿Kasa paaʼinrajatka süpüla paapüin paaʼin nümüin Jehová? (2) ¿Jamüsü anaka maʼin paaʼinrüle tia?

²⁰ Muloʼutpa maʼin naalin Jehová püpüla, oʼuraajeechi pia nümüin süpüla paapüin paaʼin nümüin. Paapapa paaʼin nümüin Jehová, nieechi aluwataakai saaʼu pukuwaʼipa süpüla kaʼikat süpüshuaʼa. Paapapa paaʼin nümüin Jehová, püküjain nümüin piʼyataainjachin nümüin süpüla kaʼikat süpüshuaʼa jaʼitasü kasain alatüin pümüin. Uwatua neʼe waaʼinrüin tia jee nnojotsü shaitaain. Shiapejeʼe anain maʼin tia saʼakajee süpüshuaʼa tü kasa püneekakat (Sal. 50:14). Nüchajaweerü sukuwaʼipa Satanás süpüla puuʼulaainjachin suulia alin püpüla Jehová otta süpüla puuʼulaainjachin suulia aʼyatawaa nümüin. ¡Jalia pia nuulia! (Job 27:5). Süka muloʼushaatain naalin püpüla chi Washi iipünaajachikai, pikeraajeerü tü pünüikikat wanaa sümaa paapüin paaʼin nümüin jee aleeweechi maʼin pia nümaa.

21. ¿Jamüsü nnojotka sajaʼttüin tü waʼyataainkat nümüin Jehová woutiisapa waya?

²¹ Süchikijee paapüin paaʼin nümüin Jehová, püküja namüin na laülaashiikana woutiiseein pia. Anasü sotule paaʼin nnojoluin ajaʼlajaain püpüleerua tü piʼyataainkat nümüin Jehová woutiisapa pia, suʼttia neʼe tia. Anasü pukooʼomüinrüle maʼin naalin püpüla chi Washi iipünaajachikai jee ayatüinjatü kachiiruain paaʼin pukooʼomüinrüin naalin püpüla. Paaʼinrüle tia, keraajeechi pia süpüla woutiisaa. Talateechi maʼin pia soʼu tü kaʼi woutiisainjachikalü oʼu pia otta eejeerü sooʼomüin tü kasa talatüinjatkalü atuma paaʼin süchikijee tia. Kasataalejeseʼe pukooʼomüinrüin naalin Jehová püpüla jee naalin püpüla chi Nüchonkai.