¿Jamüsü sumojujeʼereetka nüpaala chi ayaʼlajüinjachikai Rut kasaarüle nia sümaa? (Rut 4:1, 6).

Sümaiwa paala, nünaajaale wanee wayuu sümaa machooin nia sümüin nuʼwayuuse, eesü waneirua kasa akumajünüinjatka akuwaʼipa: jaralüinjatüin kamüin tü nuumainkat jee kaseerüin alatüin sümüin tü niʼirukukat. Aküjünüsü suluʼu tü Pütchi Aapünakat nümüin Moisés tü aainjünajatkat.

Outule wanee wayuu jee shiale nuiküin tü nuumainkat saaʼujee niʼrüin choʼujawaa, eesü süpüla niyaʼlajüin süchikuaʼa tia mmakat wanee nuwala jee niale wanee nüpüshicheʼechon. Sutuma saainjünüin tia, ayatüsia namüin tia mmakat na nüpüshikana chia wayuukai (Lev. 25:23-28; Núm. 27:8-11).

¿Kasa aainjünüinjatka suulia amüloulin niʼiruku chi outushikai? Niainjachi eisatka chi nuwalakai nüchikumüin süpüla kachoinjachin nia sümüin. Matrimonio de levirato jee shiale matrimonio de cuñado, münüsü tia alijunaikiruʼu. Sutuma müin sukuwaʼipa, ayatüsia eein niʼiruku chi wayuu outushikai jee aapünüsü tü nuumainkat nümüin chi süchonkai. Sutuma saainjünüin tia, anasü sukuwaʼipa tü wayuu eekai outuin aʼwayuuse (Deut. 5:5-7; Mat. 22:23-28). Shiaʼaya tia alatakat sümüin Rut, niisalüin shia wanee nüpüshi Elimélec.

Jülüjataa waaʼin sukuwaʼipa Noemí. Elimélec nünülia chi suʼwayuusekai. Anaajaashi chi suʼwayuusekai otta mapa anaajaashii na piamashiikana süchonnii. Nnojoikalaka eein joo chi aaʼinmajüinjachikai shia (Rut 1:1-5). Antüsü Noemí sümaa Rut, tü saʼütkat, chamüin Judá. Eejachi wanee nüpüshi chi outushikai, Boaz nünülia. Shiasaʼa Noemí suluwataaka Rut süpüla suchuntajatüin nümüin Boaz anain niyaʼlajüle süchikuaʼa tü nuumainpuʼukat müliashii (Rut 2:1, 19, 20; 3:1-4). Nütüjaapejeʼe saaʼu Boaz eein wanee nüpüshicheʼechon maʼin chi suʼwayuusekai Noemí, chi eekai süpüla ayaʼlajüin süchikuaʼa tia mmakat (Rut 3:9, 12, 13). «Waʼle», münüshi neʼe nia suluʼu tü Bibliakat.

Anasü nümüin chia wayuukai paala niyaʼlajüin tü nuumainkat Elimélec (Rut 4:1-4). Mayaainjeʼe kojuteerüin tia mmakat nüpüleerua, anasü nümüin süka nütüjaain saaʼu laülaairüin Noemí jee nnojoleerüin kachooin shia nümüin, chi aapünajachikai amüin tü nuumainkat Elimélec. Anayaasü naaʼinruʼu tü naaʼinrakat süka nümüinjeerüin tia mmakat.

Nütüjaapa saaʼu chi wayuukai kasaalüinjachin nia sümaa Rut, niyouta achikit niyaʼlajüinjatüin tü nuumainkat Elimélec. Müshi nia: «Nnojotsü süpüla tayaʼlajüin shia, sumojujeʼeraleere tü apaalaakat tapüla» (Rut 4:5, 6). ¿Kasa niyoutaka anainjee tia?

Kasaarüle chia wayuukai sümaa Rut jee niale wanee nüpüshicheʼechon müliashii jee kachontaale Rut nümüin, aapünüinjatü tü nuumainkat Elimélec nümüin chi süchonkai. ¿Jamüsü sumojujeʼereetka nüpaala chia wayuukai kasaarüle nia sümaa Rut? Tia nnojotsü süküjain tü Bibliakat. Eesü waneirua kasa eeka süpüla nnojolin kasaalüin atuma nia sümaa Rut.

• Palajana, eesüjaʼa jülüjale naaʼin amülouijeerüin nünneetse süka saapüneerüin tia nuumainkat Elimélec nümüin chi süchonkai Rut, nnojoleerü aapünüin nümüin.

• Piama, aʼyataainjachi nia shiyaaluʼu Noemí sümaa Rut.

• Apünüin, kojuyale süchonnii Rut nümüin chia wayuukai, akatajiraanajatü nakaaluʼu tü nuumainkat namaa na wane nüchonniikana.

• Pienchi, machonrejeʼe chia wayuukai süpülapünaa kasaalüin nia sümaa Rut, aapünüinjatü tü nuumainkat Elimélec sümaʼaleeya tü nuumainkat nümüin chi süchonkai Rut. Nüpaala chia wayuukai nünülialuʼuinjatü Elimélec nünainjee chi süchonkai Rut. Nnojotkalaka numojujeʼereein tü nüpaalaakat sünainjee nükaalinjain Noemí. Müsüjeseʼe anain nümüin niainjachin Boaz ayaʼlajüin tia mmakat, jama niain chi nüchikumüinkai anaka süpüla aaʼinraa tia. Anakalaka nümüin Boaz niyaʼlajüin tia mmakat süka nücheküin ayatüinjatüin nünülialuʼuin müliashii tü apaalaakat (Rut 4:10).

Wayaawatakalaka saaʼu naaʼinmaain chia wayuukai shiʼraajünüin tü nünüliakat jee niyoutuin sumojujaain tü nüpaalaakat. Mojutaʼaleesüjaʼa maʼin tü nukuwaʼipakat. Amülapejeʼe tü naaʼinrakat, nnojotsü jaralüin eʼraajüin tü nünüliakat, amülouisü nutuma wanee kasa anaka maʼin aapünaka nümüin Boaz, shiajaʼa nutuushinjachin Jesucristo, chi Mesíaskai. Mojukalaka maʼin nukuwaʼipa chia wayuukai saaʼujee kapülain naaʼin nukuwaʼipa neʼe nümüiwaʼa jee saaʼujee nnojoliin nükaalinjain na wayuu eʼrakana choʼujawaa (Mat. 1:5; Luc. 3:23, 32).