1. ¿Kasa neʼraka na wayuu palajanakana akua suluʼumüin tü Piichi Outkajaaleekat? (Piirakaa sümüin tü ayaakuaakat).

 JÜLÜJATAA WAAʼIN wanee wayuu sümaa nuʼwayuuse palajanakana akua suluʼumüin tü Piichi Outkajaaleekat. Ponoshootosü maʼin naaʼin neʼrapa kamaneein maʼin na wawalayuukana namüin otta aijiraain maʼin naya. Wopuluʼupa naya nepialuʼumüin, sümaka tü nuʼwayuusekat nümüin: «Naata maʼin nakuwaʼipa naya wayuukana, anasü taaʼin namaa».

2. ¿Jamüshii nooʼulaaka waneinnua wawalayuu suulia naʼyataain nümüin Jehová?

² Anasü maʼin nakuwaʼipa na aʼyataashiikana nümüin Jehová süka aijiraain maʼin naya. Watüjaapejeʼe saaʼu nnojoluin lotuin maʼin wakuwaʼipa wayakana aküjaliikana pütchi nüchiki Jehová (1 Juan 1:8). Weʼraajapa maʼin na wawalayuukana, eesüjaʼa weʼrüle maʼin tü kasa mojukat natuma (Roma 3:23). Saalinjee tia eeshii na ooʼulaakana suulia naʼyataain nümüin Jehová. ¡Mojutaʼaleesüjaʼa tia!

3. ¿Jamüshii süpüla natüjaanüin aaʼu jaraliin na oushikajaakana süchiirua nukuwaʼipa Cristo? (Juan 13:34, 35).

³ Jülüjataa waaʼin tü sümakat Juan 13:34, 35, TNM (paashajeʼera). ¿Jamüshii süpüla natüjaanüin aaʼu jaraliin na oushikajaakana süchiirua nukuwaʼipa Cristo? Shia saaʼujee aijiraain naya, nnojotsü shiain saaʼujee lotuin maʼin nakuwaʼipa. «Aijiraale jia waneʼewai jukua, jiyaawateerü aaʼu tekirajanain jia», nnojoishi müin Jesús. Shiainjaʼa nümakat tüü: «Aijiraale jia waneʼewai jukua, shiyaawateerü aaʼu wayuu tekirajanain jia». Nüküjain Jesús nayaawateerüin aaʼu na nikirajüinkana otta shiyaawateerüin saaʼu wayuu jaraliin na anoujashii shiimainshiikana saaʼujee aijiraain maʼin naya.

4. ¿Kasa eeka süpüla nasakirüin anain waneinnua wayuu?

 ⁴ Anuu waneirua kasa eeka süpüla nasakirüin anain na nnojoliikana Aküjaliin pütchi: «¿Jamüshii wayaawataka aaʼu na anoujashii shiimainshiikana saaʼujee aijiraain maʼin naya? ¿Kasa naaʼinraka Jesús süpüla sütüjaanüin aaʼu alin nüpüla na aluwataaushikana? ¿Kasa waaʼinrajatka süpüla washatüin tü naaʼinrakat Jesús?». Müshiʼiya wayakana woutiisainnapakana, anasü wasakirüle waaʼin sünain tia. Waaʼinrüle tia, aijiraajeena maʼin waya, jaʼitasü nnojoluin müin anakai saaʼin wamüin tü naaʼinrakat na wawalayuukana (Éf. 5:2).

5. ¿Kasa nüküjeeka achiki Jesús suluʼu Juan 15:12, 13?

⁵ Nüküjain Jesús nayaawatüneenain aaʼu na oushikajaakana süchiirua nukuwaʼipa saaʼujee aijiraain naya otta nüküjain tü nounteetkat sünainjee müin nakuwaʼipa (paashajeʼera Juan 15:12, 13, TNM). Anuu tü nuluwataakalü anain naya: «Aijiraainjana jia waneʼewai jukua maʼaka alin jia tapüla». ¿Kasa nüküjeeka achiki Jesús yala? Tü nüküjeekalü achiki shia naapajiraajeechin ekii wanee anoujashi naaʼu wanee nuwala shiimainre alin nia nüpüla. b

6. ¿Jamüshii aijiraainjanaka waya saashin tü Nünüikikat Maleiwa?

⁶ Aijiraainjana maʼin waya saashin tü Nünüikikat Maleiwa. Anuu waneirua wetsiikulo kamalainka namüin wainma wawalayuu: «[Aipürai] maʼin wayuu Maleiwa» (1 Juan 4:8, TNM). «Alinjatü püpüla wayuu maʼaka alin pia püpülajiraa» (Mat. 22:39, TNM). «Chi wayuu aikai apüla wanee wayuu nülatirüin waneepia sooʼopünaa naaʼin tü kasa aainjünakat nümüin» (1 Ped. 4:8, TNM). Otta «chi aikai apüla wayuu matüjainsat ajaʼttaa saalin wayuu  nüpüla» (1 Cor. 13:8, TNM). Shikirajüin waya tia wetsiikulokot otta waneirua wetsiikulo makalü aka saaʼin tia sünain aijiraainjanain maʼin waya.

7. ¿Jamüsü isaka nüchiki Satanás paaʼinwajiraain nutuma na wayuukana otta aijiraain naya?

⁷ Anuu tü jülüjakat naaʼin wainma wayuu: «Wainma na ekirajakana tü pütchi shiimainkat nüchiki Maleiwa naashin, naatapejeʼe tü nekirajakat nüchiki. ¿Jamüshiiche süpüla tatüjaain aaʼu jaraliin na anoujashii shiimainshiikana?». Nnojotsü shiyaawatüin maʼin aaʼu wayuu jaraliin na anoujashii shiimainshiikana sutuma wattain saalii iküleesia eere shikirajünüin alawaa nüchiki Maleiwa, nia Satanás süchiiruakai tia. Isapejeʼe nüchiki Satanás paaʼinwajiraain nutuma na wayuukana jee aijiraain naya. Nia neʼe Jehová ountakai tia, jama niain kanainjeejachin tü aijirawaakat. Sutuma tia naya neʼe ountaka aijiraain na eekana aaʼu tü nüpülainkat Maleiwa otta na anakana akuwaʼipa noʼuluʼu (1 Juan 4:7). Shiajaʼamata nüküjaka aaʼujee Jesús nayaawatüneenain aaʼu na anoujashii shiimainshiikana saaʼujee aijiraain naya.

8, 9. ¿Kasa nayaawataka aaʼu wainma wayuu saaʼujee aijiraain maʼin na aküjaliikana pütchi nüchiki Jehová?

⁸ Maʼaka nüküjatüjülin Jesús, wainma na wayuu ayaawatakana aaʼu jaraliin na anoujashii shiimainshiikana saaʼujee aijiraain naya. Jülüjataa waaʼin nukuwaʼipa wanee wawala kanüliashi Ian. Sotusü naaʼin tü palajatkat nukua sünain wanee outkajawaa miyoʼu aainjünaka suluʼu wanee estadio pejeka sünain nipia. Maʼaka jeʼra kashi süpülapünaa tia, chajachi nia anajüin wanee partido suluʼu tia estadiokot. Anuu nünüiki: «Naata maʼin nakuwaʼipa na Aküjaliikana pütchi, kamaneeshii naya, anasü naʼanaaya otta laülaa aaʼinchii na nachonniikana». Anuu sooʼomüin nünüiki: «Tü ponokot maʼin taaʼin shia teʼrüin talatüin maʼin naya jee paaʼinwain naya, meesü takuwaʼipa maʼaka naaʼin. Nnojotsü sotuin taaʼin tü pütchi ekirajünakalü anain soʼu tia, shia sotoka neʼe taaʼin nakuwaʼipa na Aküjaliikana pütchi». c Müsü wakuwaʼipa mayaa süka aijiraain maʼin waya. Süka alin wapüla na wawalayuukana, kamaneeshii waya namüin otta weeʼiyatüin nojutu wamüin.

⁹ Meematüsü tü alatakat nümüin wanee wawala kanüliashi John. Soʼu tü palajatkat nukua suluʼumüin tü Piichi Outkajaaleekat, ponusü maʼin naaʼin kamaneein maʼin na wawalayuukana jee anain maʼin nakuwaʼipa. Anuu nünüiki: «Süka teʼrüin aijiraain maʼin naya, tayaawata aaʼuchii nayain na anoujashii shiimainshiikana». d Tü neʼrakat naya piamashiikana wawalayuu shia tü neʼrakat wainma wayuu nayaawataka atuma nayain na aküjaliikana pütchi nüchiki Jehová na anoujashii shiimainshiikana.

10. ¿Kasa kapüleejeetka atuma alin wapüla na wawalayuukana? (Paashajeʼera tü nootakat).

¹⁰ Wekirajaaitpa anain nnojoluin lotuin maʼin nakuwaʼipa na wawalayuukana. Eejeerü kaʼi naküjeetka jee naaʼinreetka oʼu wanee kasa aijeetka wamüin (Sant. 3:2). e Sülatüle tia, eesüjaʼa kapüleere wamüin alin wapüla na wawalayuukana. Wekirajaa sünain tü naaʼinrakat Jesús süpüla ayatüin alin nüpüla na nikirajüinkana mayaainjeʼe naaʼinrüin  wanee kasa mojushiika nümüin (Juan 13:15, TNM).

11. ¿Jamüsü mojuka nukuwaʼipa Santiago nümaa Juan soʼu wanee kaʼi? (Piirakaa sümüin tü ayaakuaakalüirua).

¹¹ Nütüjaa aaʼu Jesús eejeerüin tü kasa mojukat natuma na nikirajüinkana. Nükaalinjain naya süpüla nanoutuin tü kasa mojukat natuma süpüla anain nakuwaʼipa noʼuluʼu Jehová. Jamüshijaʼa Santiago nümaa Juan, naküjain sümüin tü neikat anain suchuntule nümüin Jesús nooʼopünaa süpüla naikaleʼerüin naya naʼatoʼu sünain aluwatawaa (Mat. 20:20, 21). Jaʼyasü naaʼu sükajee tü naaʼinrakat yaletüin naaʼin (Prov. 16:18).

12. ¿Jamüsü wayaawataka saaʼu nnojolin niain neʼe Santiago nümaa Juan mojuka akuwaʼipa?

¹² Nnojoishi niain neʼe Santiago nümaa Juan mojuka akuwaʼipa soʼu tia. Jülüjataa waaʼin tü naaʼinrakat na wane aluwataaushikana, anuu sünüiki tü Bibliakat süchiki tia: «Naapapa tia na polooshiikana nikirajüin Jesús, naashichijaakalaka nooʼomüin na piamashii wayuu achuntakana aikalawaa naʼatoʼu Jesús» (Mat. 20:24, TNM). Eeshiijaʼa naaʼayajiraale soʼu tia. «¿Jaraliisa joo jia süpüla juchuntuin aikalawaa naʼatoʼu Jesús sünain aluwatawaa? Nnojoishii jiain neʼe jümüiwaʼa aʼyataajiraain maʼin nümaa Jesús. Saapünüle tia jümüin, aapünüinjatiaʼaya wamüinña», eeshiijaʼa namüle. Nnojoishii aijiraain maʼin naya soʼu tia.

13. ¿Jamüsü nukuwaʼipa Jesús namaa na aluwataaushikana mayaainjeʼe eein tü kasa mojukat natuma? (Mateo 20:25-28).

 ¹³ ¿Kasa naaʼinraka Jesús soʼu tia? Nnojoishi jashichin nia namüin otta nnojotsü nüküjain namüin nüchajaainjanain waneinnua wayuu anakana akuwaʼipa noulia, na eekana kamaneein sümaa nnojoluin yaletüin naaʼin. Tü naaʼinrakat Jesús shia naashajaain namaa süka anakalü akuwaʼipa, jama niyaawatüin saaʼu naainjeein tü kasa anakat noʼuluʼu Jehová (paashajeʼera Mateo 20:25-28, TNM). Mayaainjeʼe kojuyatuain naʼülüjiraain saaʼujee jaralinjachin miyoʼuin naʼakajee, ayatüshii alin naya nüpüla Jesús (Mar. 9:34; Luc. 22:24).

14. ¿Jamapuʼusü nakuwaʼipapala na wayuu eejanakana nükalioʼu na aluwataaushikana?

¹⁴ Jülüjasü naaʼin Jesús nakuwaʼipapala na wayuu eejanale miyoʼuin na aluwataaushikana (Juan 2:24, 25). Soʼu nakalia na aluwataaushikana, nekirajapuʼuin na karaloʼutamaajakana otta na fariseokana süchiki nayainjanain kojutuin atumawaa na wayuu aapünakana amüin laülawaa (Mat. 23:6, TNM, anasü pünajüle tü videokot Asientos del frente en la sinagoga suluʼuka noota de estudio suluʼujeejatka Mateo 23:6, [alijunaikiruʼusü]). Yaletüsü naaʼin nekiipüʼü na judíokana (Luc. 18:9-12). f Nütüjaa aaʼu Jesús eein süpüla nashatüin tia akuwaʼipaakat na aluwataaushikana (Prov. 19:11). Nütüjaa aaʼu eejeerüin kaʼi naainjeetka oʼu wanee kasa nnojotka anain jee nnojoishi jashichin nia namüin. Süka nütüjaain saaʼu naainjeein tü kasa anakat noʼuluʼu Jehová, nükaalinjeein naya süpüla nanouteʼerüin tü mojukat natuma, süpüla nnojoluin yaletüin naaʼin jee aijiraain naya.

15. ¿Kasa watüjaka sünainjee tü alatakat nümüin Santiago otta Juan?

¹⁵ Wainma kasa watüjaka sünainjee tü alatakat nümüin Santiago otta Juan. Nnojotsü anain tü nachuntakat nümüin Jesús otta müsia nnojotsü anain tü naaʼinrakat na wane aluwataaushikana süka nnojoliin paaʼinwain naya sutuma. Anapejeʼe tü naaʼinrakat Jesús, ayatüshia kamaneein nia namüin otta ayatüshia alin naya nüpüla. ¿Kasa watüjaka sünainjee tia? Nnojotsü neʼe mojuin naaʼinrüle wanee wawala wanee kasa mojusü, mojusiaʼaya nnojorüle anain tü waaʼinrakat shiʼipajee tia. Aire wamüin tü naaʼinrakat wamüin wanee wawala, anasü wasakirüle waaʼin sünain tüü: «¿Jamüsü aika maʼin tamüin tü naaʼinrakat? ¿Eesüche wanee kasa tanouteʼerüinjatka sünain takuwaʼipa? ¿Alatüsüche nümüin wanee kasa shapaaka atuma naaʼin? ¿Shiache anaka motule taaʼin naainjala mayaainjeʼe alin shia tamüin?». Jaʼyale waaʼu alin wapüla na wawalayuukana, atüjaaneerü aaʼu wayain na anoujashii shiimainshiikana.

16. ¿Jeʼtsü wane kasa watüjaka sünainjee nukuwaʼipa Jesús?

¹⁶ Wanee kasa watüjaka sünainjee tü naaʼinrakat Jesús shia wayaawatüinjatüin saaʼu nakuwaʼipa na wawalayuukana (Prov. 20:5). Nnojotsü süpüla watüjaain saaʼu tü suluʼukat naaʼin wanee wayuu maʼaka naaʼinrüin shia Jesús. Eepejeʼe süpüla nnojoliin jashichijaamaatüin waya namüin na wawalayuukana naaʼinrüle wanee kasa nnojotka anain (Éf. 4:1, 2; 1 Ped. 3:8). Süpüla wountuin tia,  anashii weʼraajüle maʼin naya. Wekirajaa sünain tü naaʼinrakat wanee wawala.

17. ¿Kasa niyaawataka aaʼu wanee wawala alapalaaikai naaʼu na wawalayuukana niʼraajapa maʼin wanee wawala?

¹⁷ Eeshi wanee wawala alapalaaikai naaʼu na wawalayuukana chaa África Oriental. Niʼraajüin chayaa wanee wawala jaʼyakai aaʼu jashichin nia waneepia. ¿Kasa naaʼinraka chi wawala alapalaaikai naaʼu na wawalayuukana? Anuu nünüiki: «‹Anashi nnojoire aleewain maʼin taya nümaa›, nnojoishi müin taya. Tachajaain maʼin sukuwaʼipa süpüla teʼraajüin maʼin nia». Sutuma tü naaʼinrakat niyaawata aaʼu jamüin makaʼa nukuwaʼipa chia wawalakai. Anuu sooʼomüin nünüiki: «Tayaawatapa saaʼu kapüleein nümüin tü naaʼinrakat süpüla nunoujain otta tatüjaapa saaʼu tü nuuntakat sünain aʼyatawaa nümüin Jehová, kojutushi maʼin nia tamüin otta aleewajiraashi maʼin taya nümaa». Wachajaale maʼin sukuwaʼipa süpüla weʼraajüin na wawalayuukana, mapüleejeerü wamüin alin naya wapüla.

18. ¿Kasa eeka süpüla wasakirüin anain waaʼin naaʼinrüle wanee wawala wamüin wanee kasa aika wamüin? (Proverbios 26:20).

¹⁸ Eesüjaʼa jülüjale waaʼin anain yootule waya nümaa wanee wawala aaʼinrakai wanee kasa aika wamüin. Süpülapünaa waaʼinrüin tia, anasü wasakirüle waaʼin sünain tüü: «¿Tatüjaa aaʼuche süpüshuaʼa tü alatakat?» (Prov. 18:13). «¿Naaʼinrüinche tia sümaa nnojoluin alein naaʼin?» (Ecl. 7:20). «¿Eesüche wanee kasa taaʼinraka makalü aka saaʼin tia paala?» (Ecl. 7:21, 22). «Taashajaale nümaa chi wawalakai, ¿akooʼomüinraajeetche tü mojujiraakalü aaʼujee waya?» (Paashajeʼera Proverbios 26:20). Wasakirüle waaʼin sünain tia, eesüjaʼa jülüjale waaʼin anain motule waaʼin tü naaʼinrakat chi wawalakai jee ayatüle alin nia wapüla.

19. ¿Kasa ayatüinjatka waaʼinrüin?

¹⁹ Atüjaana aaʼuchii nayain na aküjaliikana pütchi nüchiki Jehová na anoujashii shiimainshiikana saaʼujee aijiraain naya. ¿Kasa waaʼinrajatka waneʼewai wakua süpüla sütüjaanüin aaʼu wayain na anoujashii shiimainshiikana? Alinjana wapüla na wawalayuukana mayaainjeʼe nnojoluin lotuin maʼin nakuwaʼipa. Waaʼinrüle tia, eesüjaʼa süpüla nayaawatüin saaʼu waneinnua wayuu jaraliin na anoujashii shiimainshiikana otta keeʼireejeerü naaʼin naʼwaajüin Jehová wanaa wamaa, chi Maleiwa aipüraikai wayuu. Ayataʼaya waaʼinrüin kasa eekai anain süpüla sütüjaain saaʼu wayuu shiimain aijiraain waya.