1-3. (1) ¿Jaratche tü akuwaʼipaa wanoukteʼerüinjatkat süchikijee woutiisain waya jaʼitairü kapüleein shia wamüin? (2) ¿Kasa tü eekat süpüla wasakireʼerüin anain waaʼin kapüleere wamüin anoukteʼeraa wakuwaʼipa? (Piirakaa sümüin tü ayaakuaakat).

NNOJOLUIWAʼAYA nüküjülin pütchi nüchiki Jeʼwaa Kevin, nüshaittajaa akat tü nünneetsekat, akaijüishi nia, asüi maʼin nia otta akaijapuʼushi nia tü yüikat. ^[1] Shiasaʼa nütüjapa nüchiki Jeʼwaa, aleeweeshi nia nümaa. Wainmapajaʼa kasa nunoukteʼeraka sünain nukuwaʼipa süpülapünaa nuwoutisaajünüin. Anouktaasü nukuwaʼipa sutuma nükaaliinjain nia Jeʼwaa otta sutuma naaʼinrüin tü sümakat tü Wiwüliakat (Heb. 4:12, TNM).

² Ayatüsü nunoukteʼerüin nukuwaʼipa Kevin süchikijee woutiisain nia (Éf. 4:31, 32). Nnojoishi jameeyaain nia atumawaa, jashichijaamaatüshi neʼe. Niyaawata aaʼu kapüleeshaatain nümüin nüchecherüin naaʼin suulia tia. Kapüleeshaatasü nümüin Kevin nunoukteʼerüin tia nukuwaʼipakat suulia tü wanee kasa mojusü naainjapuʼukat süpülapünaa nuwoutisaajünüin. Achuntüshijeseʼe nia kaaliinwaa nümüin Jeʼwaa otta nikirajaaka sünain tü Wiwüliakat sümaa jülüjashaatain naaʼin tü nikirajaakalü anain. Anouktaasü nukuwaʼipa mapa sutuma naaʼinrüin tia.

 ³ Akaajaʼa paala wayakana, wanoukteʼerüin wakuwaʼipa süpüla woutiisainjanain waya. Shiajaʼa waaʼinraka tü sümakat tü Wiwüliakat. Wayaawatapejeʼe saaʼu sünain eeyülin tü wanoukteʼerüinjatkat sünain wakuwaʼipa. Waaʼinrüinjatü tia süpüla wasaʼwatüin nukuwaʼipa Maleiwa otta nukuwaʼipa Kürisüto (Éf. 5:1, 2; 1 Ped. 2:21). Eesüjaʼa wayaawatüle saaʼu kaʼyounaraliin waya otta waashajaakuʼu wamüin süchiki wayuu. Eesü nnojorüle waaʼinrüin tü anasükat süka mmoluin waya seema tü süküjeetkat wayuu wachiki yalapünaa. Eeshiijaʼa kakaliainnale waya sünain wanoukteʼerüin wakuwaʼipa, ayatapejeʼe waaʼinrüin tü kasa mojusü eejiraakalü amaa waya paala. Suluʼujee tia, eeshii wasakireʼerüle waaʼin sünain tüü: «¿Jamüsü kapüleeka maʼin tamüin tanoukteʼerüin takuwaʼipa? ¿Kasa taaʼinrajatka süpüla tanoukteʼerüin takuwaʼipa wanaapünaa sümaa tü sümakat tü Wiwüliakat?».

4. ¿Kasa wayuu tü nnojotkat watalateʼerüin atuma naaʼin Jeʼwaa waneepia?

⁴ Aishaatashi wapüla Jeʼwaa, tü keeʼireekat waaʼin shia watalateʼerüin naaʼin süka süpüshuaʼa waaʼin. Nnojotpejeʼe wountüin tia waneepia süka waleʼeruʼuin tü kaainjalaakat. Müshii waya maʼaka naaʼin Pablo, eesü nnojorüle wountüin waaʼinrüin waneepia tü kasa anasükat mayaapejeʼe waaʼinreein shia (Roma 7:17, 18; Sant. 3:2).

5. (1) ¿Kasa wanoukteʼeraka sünainjee wakuwaʼipa süpüla woutiisain waya? (2) ¿Kasa waaʼinraka sutuma waleʼeruʼuyülin tü kaainjalaakat?

⁵ Süpüla woutiisain waya jee süpüla waküjüliinjanain pütchi nüchiki Jeʼwaa, ooʼulaashii waya suulia aaʼinraa tü kasa niyouktakat Jeʼwaa (1 Cor. 6:9, 10). Ayatüsia eein tü kasa woʼtchejaakalü amaa süka waleʼeruʼuyülin tü kaainjalaakat, jaʼitainna neʼe kakaliainnain waya woutiisain (Col. 3:9, 10). Eesüjaʼa süntajaale wanee jamaʼiree suluʼu waaʼin shiiʼiree aaʼinraa kasa mojusü. Eesü shiale isain wachiki wachecherüin waaʼin suulia sujuʼinajaain tü wakuwaʼipapuʼukat süpülapünaa wanoujain. Eeshii kakaliainnale waya eejiraain sümaa wanee wakuwaʼipa nnojotka anain.

6, 7. (1) ¿Jamüshi aleewaka Maleiwa wamaa mayaapejeʼe waleʼeruʼuin tü kaainjalaakat? (2) ¿Jamüshii ayatüinjanaka wachuntüin nümüin Jeʼwaa nülatirai woulia tü waainjalakat?

⁶ Eeshii süpüla waʼyataain nümüin Jeʼwaa otta naʼaleewain waya mayaapejeʼe waleʼeruʼuin tü kaainjalaakat. Makaʼa naʼaleewain waya Jeʼwaa, shia süka niʼrüin kasa anasü suluʼu waaʼin jee keeʼireesü naaʼin naʼaleewain waya (Juan 6:44). Nütüjaa aaʼu Jeʼwaa waleʼeruʼuin tü kaainjalaakat müshiijeseʼe woʼtchejaain sümaa waneeirua kasa. Mayaapejeʼe müin wakuwaʼipa, anasü nümüin Jeʼwaa waʼaleewainjachin nia.

⁷ Sutuma aishaatain waya nüpüla Jeʼwaa, nuluwataain chi Nüchonkai yaa Mmapaʼamüin süpüla naapüinjatüin nikii saaʼu wayuu süpüshuaʼa süpüla nülaʼajaainjatüin saainjala (Juan 3:16). Waaʼinrüle wanee kasa eekai mojuin, wachunta nümüin Jeʼwaa nülatirai sooʼopünaa naaʼin waainjala. Nülatirüin Jeʼwaa sooʼopünaa naaʼin waainjala süka naapajiraaichipain nikii Jesuu saaʼu waainjala, ayatapejeʼe aleewain nia wamaa (Roma 7:24, 25; 1 Juan 2:1, 2). Aapajiraashi Jesuu nikii naaʼu na wayuu ooʼulaakana suulia naainjala. Mojule waaʼin sutuma waaʼinrüin kasa mojusü, ayataʼaya wachuntüin nümüin Jeʼwaa nülatirai sooʼopünaa naaʼin waainjala. Nnojorüle waaʼinrüin tia süka mojulaain waya waashin, müshijaʼa aka naaʼin chi wayuu nnojoikai oʼlojoweein najapü mayaapejeʼe nütüjaain saaʼu yarüttüin shia. Talatashaatasü waaʼin sutuma naʼaleewain waya Jeʼwaa mayaapejeʼe waleʼeruʼuin tü kaainjalaakat (paashajeʼera 1 Timoteo 1:15).

8. ¿Jamüsü choʼujaaka wanoukteʼerawalinjatüin wakuwaʼipa?

⁸ Sutuma waleʼeruʼuin tü kaainjalaakat, eejüinjatü waaʼin suulia waainjain kasa mojusü. Nüküjüin Jeʼwaa jaralüinjatüin tü nukuwaʼipakat wanee wayuu aleeweere nia nümaa (Sal. 15:1-5). Aleeweere waya nümaa Maleiwa, acheküsü washatüinjatüin nukuwaʼipa jee müsia nukuwaʼipa chi Nüchonkai. Wachecherüinjatü waaʼin  suulia waaʼinrüin tü kasa mojusü suchuntaakat waaʼin otta wasünneʼerüinjatü shia suluʼujee waaʼin. Jaʼitainna kakaliainnain waya woutiisain, ayatüinjatia wanoukteʼerawalin wakuwaʼipa (2 Cor. 13:11).

9. ¿Jamüsü watüjaaka saaʼu nnojoluin suʼwanajaamaatüin nukuwaʼipa wanee wayuu?

⁹ Müsü nünüiki Pablo yaa: «Je jiakana paala, süchepchiapüʼüshii jia jaainjala, süka keejiain jümüin oonowaa sümaa alawaa, je süka jaaʼinrüin tü mojusü yarüttakat atüma jaaʼin. Je jooluʼu saaʼu jünoujain nünain Cristo, anashii müleka juuʼulaale suulia tü kasa mojusü jaaʼinrapüʼükat je tü mojusü jülüjapüʼükat jaaʼin». Nümaka süchikijee: «Je saaʼu shiiʼiranajaaitpain jukuaippa, anakaja jaaʼinrüle waneepia tü nüchekakat chi Maleiwakai jüpüleerua süpüla müinjanain aka jia naaʼin sünain jaaʼinrüin tü anasükat saaʼu jükatannüinapain suulia jaainjala» (Éf. 4:22-24). Ayatüinjatü wachajaain sukuwaʼipa süpüla shiiʼiranajaain waaʼin. Jaʼitainna kakaliainnain waʼyataain nümüin Jeʼwaa, eeshii süpüla ayatüin watüjain sünainjee nukuwaʼipa. Sükaaliinjeena waya tü Wiwüliakat süpüla washatüin nukuwaʼipa Jeʼwaa.

10. (1) ¿Kasa waaʼinrüinjatka süpüla sükaaliinjain waya tü Wiwüliakat? (2) ¿Kasa tü eekat süpüla nüsakirüin anain naaʼin wanee wayuu?

¹⁰ Wapüshuaʼa wayakana, waaʼinreein tü sümakat tü Wiwüliakat. Wachajaainjatpejeʼe sukuwaʼipa süpüla wanoukteʼerüin wakuwaʼipa. ¿Jamüsü choʼujaaka maʼin waaʼinrüin tia? ¿Nnojoishiiche süpüla nükaaliinjain waya Jeʼwaa süpüla mapüleejaain wamüin aaʼinraa tü anasükat?

11-13. ¿Jamüsü keeʼireeka naaʼin Jeʼwaa wachajaainjatüin sukuwaʼipa süpüla wanoukteʼerüin wakuwaʼipa?

¹¹ Nnojotsü kasain isain nüchiki Jeʼwaa, pülashaatashi maʼin nia. Jaʼyasü tia sünain süpüshuaʼa tü kasa nukumajakat. Jamüshijaʼa chi Kaʼikai jaʼishaatashi maʼin, nnojotpejeʼe antüin süpüshuaʼa tü naaʼayulakat yaa Mmapaʼamüin, süpüshi neʼe, müsüjeseʼe katüin soʼu süpüshuaʼa tü  kasakalüirua yaa mmapaʼa (Sal. 74:16; Is. 40:26). Naapüin Jeʼwaa chi nütchinkai namüin na wayuu aʼyataakana nümüin müleka choʼujaale shia namüin (Is. 40:29). Suluʼujee tia, eeshi chi eekai nümüin: «¿Jamüshi nnojoika nükaaliinjain taya Jeʼwaa süpüla mapüleeinjatüin tamüin anoukteʼeraa takuwaʼipa?».

¹² Nuuʼulaain waya Jeʼwaa süpüla wayainjanain aneeküin tü keeʼireekat waaʼin. Nuuʼulaain waneeküin woonooinjanale nümaa. Woonoole sümaa nünüiki Jeʼwaa, weeʼiyatüin nümüin sünain alin nia wapüla otta waaʼinrüin tü anakat nümüin. Naashin Satanaa, nnojoishi niainjachin Jeʼwaa aluwataain waaʼu. Keeʼireepejeʼe waaʼin niainjachin Jeʼwaa aluwataain waaʼu müshiijeseʼe woonooin sümaa nünüiki. Kojutüshaatasü nümüin Jeʼwaa tia (Job 2:3-5; Prov. 27:11). Mayaapejeʼe nnojoluin nükaaliinjain waya Jeʼwaa süpüla mapüleeinjatüin wamüin anoukteʼeraa wakuwaʼipa, weeʼiyatüin nümüin sünain waneepiain waya nümaa jee keeʼireesü waaʼin niainjachin aluwataain waaʼu.

¹³ Naashin Jeʼwaa, wachajaashaatainjatü sukuwaʼipa süpüla washatüinjatüin nukuwaʼipa (Col. 3:12; paashajeʼera 2 Pedro 1:5-7). Tü keeʼireekat naaʼin Jeʼwaa shia wachecherüinjatüin waaʼin suulia jülüjain waaʼin kasa mojusü (Roma 8:5; 12:9). Talatashaatashii waya wountüle wanoukteʼerüin wakuwaʼipa, shialeekajaʼa wachajaale maʼin paala sukuwaʼipa süpüla wountüinjatüin tia.

14, 15. ¿Kasa waaʼinrajatka süpüla anainjatüin takuwaʼipa noʼuluʼu Jeʼwaa? (Paashajeʼera tü pütchikat « Anouktaasü nakuwaʼipa sutuma tü Wiwüliakat jee sutuma oʼuraajaa»).

¹⁴ ¿Kasa waaʼinrajatka süpüla anainjatüin wakuwaʼipa noʼuluʼu Jeʼwaa? Nnojoishii wayainjanain aneeküin tü wanoukteʼerüinjatkat sünainjee wakuwaʼipa. Wooʼulaa niaiwa Jeʼwaa aneeküin tia. Müsü sünüiki Roma 12:2: «Alanaʼaleesia sünain anain tü nüchekakat Maleiwa wapüleerua suulia kasa süpüshua, süka shiain tü talatakat atüma naaʼin. Je sükajee tia, juuʼulaa suulia ashataa nakuaippa na manoujainsaliikana. Nnojo jülüjüin jaaʼin maa aka tü jülüjakat naaʼin nayakana. Müleka juuʼulaale suulia, niiʼirateerü jukuaippa Maleiwa. Sünainjee tüü, juunteerü jiyaawatüin saaʼu tü nüchekakat jüpüleerua, je keeʼireejeerü jaaʼin jaaʼinreein tia». Wounteere wayaawatüin saaʼu tü nüchekakat Jeʼwaa, acheküsü waapaain sümaa tü kasa nikirajakalü aka waya. Waashajeʼerüinjatü tü Wiwüliakat weinshi, wasakireʼerüinjatü waaʼin sünain tü waashajeʼerakat jee wachuntüinjachi nümüin Jeʼwaa chi nütchinkai (Luc. 11:13; Gal. 5:22, 23). Waaʼinrüle tia, nükaaliinjeena waya Jeʼwaa süpüla wountüin wayaawatüin saaʼu tü kasa nüchekakat otta müshiʼiya wayakana, jülüjeerü waaʼin tü jülüjakat naaʼin Jeʼwaa. Suluʼujee tia, kamalainjeerü nümüin Jeʼwaa tü kasa jülüjakat waaʼin jee tü kasa waaʼinrakat. Eejiraainjanapejeʼe waya sümaa tü kasa mojusü suchuntaakat waaʼin (Prov. 4:23).

¹⁵ Choʼujaasü wekirajaainjatüin sünain tü Wiwüliakat  süka Aapiria Wayuu otta ¡Despertad! Suluʼu karalouktakalüirua tüü wainmashaata tü pütchi akaaliinjeenakat waya süpüla washatüin nukuwaʼipa Jeʼwaa jee müsia süpüla wanoukteʼerüin tü akuwaʼipaa mojusü suchuntaakat waaʼin. «Shiaʼaya maʼin choʼujaaka tamüin tüü», eeshii wamüle waashajeʼerapa wanee pütchi suluʼujee tia karalouktakalüirua jee suluʼujee tü Wiwüliakat shiale. Anasü weisalajüle tia karalouktakat süpüla waashajeʼerawalin shia soʼu wanee kaʼi.

16. ¿Jamüshii nnojoliinjanaka waya amalajaain müleka nnojoyürüle sunouktaain maʼin wakuwaʼipa?

¹⁶ Nnojotsü mamaatüin wakuwaʼipa maʼaka naaʼin Jeʼwaa soʼu wanee kaʼi neʼe, alatajatü wainma kaʼi süpüla tia. Nnojo püshapataain aaʼin müleka nnojoyürüle suʼwanajaain maʼin pukuwaʼipa. Eesü paaʼinrüinjatüle tü sümakat tü Wiwüliakat, jaʼitasü nnojoluin keeʼireein shia paaʼin. Nnojo pümalajaain suulia aaʼinraa tia. Paaʼinreerü tü kasa anasükat maʼaka naaʼin Jeʼwaa müleka jülüjale paaʼin tü jülüjakat naaʼin (Sal. 37:31; Prov. 23:12; Gal. 5:16, 17).

17. ¿Kasa anasü weʼreetka waneepiale waya nümaa Maleiwa?

¹⁷ Kasataalejeseʼe süntamaatüin tü kaʼi lotuinjatkalü oʼu wakuwaʼipa, eere waʼyataainjanain nümüin Jeʼwaa süka süpüshuaʼa waaʼin. Soʼu kaʼikat tia, nnojoleerü kasa mojusü suluʼu waaʼin, mapüleejeerü wamüin ashataa nukuwaʼipa Jeʼwaa. Eepejeʼe süpüla waʼwaajüin Jeʼwaa maaʼulu yaa mayaapejeʼe waleʼeruʼuin tü kaainjalaakat, wountüin tia süka naapajiraain nikii Jesuu. Talateerü naaʼin Jeʼwaa wamaa müleka wachajaale maʼin sukuwaʼipa süpüla wanoukteʼerüin wakuwaʼipa jee weʼitaale suluʼu wakuwaʼipa tü sümakat tü Wiwüliakat.

18, 19. ¿Jamüsü watüjaaka saaʼu sünain sunouktaain sukuwaʼipa wayuu sutuma tü Wiwüliakat?

¹⁸ Sünain tü palajatkalüirua pütchi, wekirajaa anainrü nüchiki chi wawalakai Kevin, chia wawalakai eejiraashi sümaa tü jashieekat. Nüsakireʼerüin naaʼin sünain tü kasa naashajeʼerawaikat suluʼu tü Wiwüliakat jee nüchajaain sukuwaʼipa süpüla nunoukteʼerüin nukuwaʼipa otta oonooshii sümaa tü namakat na wawalayuukana. Mayaapejeʼe kakaliain nia süpüla nunoukteʼerüin nukuwaʼipa, aneekünüshi nia süpüla niʼyataainjachin neʼipajee na laülaashiikana. Maaʼulu yaa, alatüirü 20 juya sünain laülaashin nia. Ayatapejeʼe nia eejiraain sümaa waneeirua kasa mojusü.

¹⁹ Akaataajaʼa neʼe wayakana, eeshii süpüla wanoukteʼerüin wakuwaʼipa maʼaka naaʼin Kevin. Waaʼinrüle tia, aleeweena maʼin waya nümaa Maleiwa (Sal. 25:14). Wachajaa maʼin sukuwaʼipa süpüla wanoukteʼerüin wakuwaʼipa, waaʼinrüle shia, nükaaliinjeena waya Jeʼwaa. Müle sukuwaʼipa watuma, weʼreerü sünain shiimain sunouktaain nukuwaʼipa wayuu sutuma tü Wiwüliakat (Sal. 34:8).