1. (1) ¿Kasa wayuu tü waaʼinrüinjatkat naashin Jeʼwaa? (2) ¿Jameerü wakuwaʼipa waaʼinrüle tü nümakat wamüin Jeʼwaa?

NÜKÜJÜIN wamüin Jeʼwaa tü anakat süpüla waaʼinrüin, nüshajirüin tia suluʼu tü Wiwüliakat. Mojusü nümüin Jeʼwaa waʼwaajüle maleiwayaasü, waʼluwajüle, wepeʼruwaale jee waʼluwajiraale wakuwaʼipa (1 Cor. 6:9, 10). Anuu nünüiki Jesuu namüin na nikirajüinkana: «Juʼuna jumaala sainküin mmakat süpüshua süpüla jüküjainjatüin tachiki sümüin wayuu süpüla sünoujainjatüin tanain. Jikirajeena naya süpüla nayainjanain na tekirajüinkana maa aka jiakana. Je juwoutisaajeena naya saaʼu nünülia chi Tashikai, saaʼu tanülia tayakai chi Nüchonkai, je saaʼu nünülia chi Naaʼinkai Maleiwa. Jikirajeena naya sünain tü taluwataapüʼükat anain jia süpüla noonooinjatüin sümaa. Shiimüin sünain jümaainjachin taya waneepia waneʼereʼeya süntapa tü kaʼi sajaʼlajaweetkat oʼu kasa süpüshua» (Mat. 28:19, 20). Aneena waya müleka waaʼinrüle tü nümakat Jeʼwaa wamüin ooʼulaka tü nümakat Jesuu. Aneerü nakuwaʼipa na kasakana wanain sutumaya jee talateerü naaʼin. Talataleejeetpejeʼe naaʼin Jeʼwaa müleka waküjüle pütchi, wainmeerü kasa anasü weʼreetka waaʼinrüle tia.

2, 3. (1) ¿Jamüsü nnojotka süküjüin tü Wiwüliakat süpüshuaʼa tü kasa waaʼinrajatkat? (2) ¿Jarat tü asakiraa asouktüneetkalü eʼipajee sünain ekirajaayakat tüü? (Piirakaa sümüin tü ayaakuaakat).

² Nnojotsü süküjüin wamüin tü Wiwüliakat süpüshuaʼa tü kasa waaʼinrajatkat.  Jamüsüjaʼa tü Wiwüliakat, nnojotsü süküjüin wamüin jaralüinjatüin tü kuluulu waʼatüinjatkat wanain. Anapajaʼa süka müin sukuwaʼipa nutuma Jeʼwaa, piʼrüinchejeʼe waneejatiaa müin süsheʼinpala wayuu sainküin mmakat süpüshuaʼa ooʼulaka aʼwanajaʼawaisü tia weinshi. Shiainjaʼa matüjüin aʼwanajawaa tü waaʼinrüinjatkat saashin tü Wiwüliakat. Nnojotsü süküjüin tü Wiwüliakat kasain wayuu anaka süpüla waʼyataainjatüin anain jee nnojotsü süküjüin jaralin tü wunuʼu anakat süpüla wepinaseinjatüin ayuuire waya, nnojotsü süküjüin wamüin anaka süpüla washaittüinjatüin. Süpüshuaʼa tü makat, nuuʼulaain waya Jeʼwaa süpüla wayainjanain aneeküin shia; nekiipüʼüle pia na püpüshikana piainjachi aneekaka tia.

³ Eesü nnojoleerüle süküjüin wamüin tü Wiwüliakat tü anakat süpüla waaʼinrüin waneeküinjatpa wanee kasa. Süpülapünaa waaʼinrüin wanee kasa, jülüjeesü waaʼin pütchikalüirua tüü: «¿Jülüjasüche naaʼin Jeʼwaa tü kasa taaʼinrajatkat? ¿Anasüche eera taaʼinrüle süpüshuaʼa tü keeʼireekat taaʼin sümaa nnojoluin mojuin shia saashin tü Wiwüliakat? ¿Jamüsü süpüla tatüjaain saaʼu müleka talateerüle naaʼin Jeʼwaa sutuma tü kasa taaʼinrakat?». Sünain ekirajaayakat tüü, asouktüneerü eʼipajee asakiraakalüirua tia.

4, 5. ¿Jamüsü sünainpünaaka wakuwaʼipa jee nakuwaʼipa na waneeinnua tü kasa waneekakat?

⁴ Watta naalii wayuu nnojoliikana jülüjain naaʼin tü nümakat Maleiwa süpülapünaa naaʼinrüin wanee kasa. Wayakana naata sümüin wakuwaʼipa süka shiain waaʼinreein tü talatakalü atuma naaʼin Jeʼwaa. Süpülapünaa waaʼinrüin wanee kasa, acheküsü wekirajaain sünain palajana anale shia saashin tü Wiwüliakat. Saashin tü Wiwüliakat, kojutüshaatasü nümüin Jeʼwaa tü ishakat, kojutüsü shia wamüinyaʼasa (Gén. 9:4; Aluw. 15:28, 29). Wachunta kaaliinwaa nümüin Jeʼwaa süpüla waneeküinjatüin kasa anasü.

⁵ Sünainpünaasü wakuwaʼipa tü kasa waneekakat. Jamüsüjaʼa waneeküle wanee kasa anaka noʼuluʼu Jeʼwaa, aleewaleejeena waya nümaa. Waneeküle wanee kasa mojuka nümüin, nnojoleena waya naʼaleewain. Sünainpünaasü nakuwaʼipa na waneeinnua tü kasa waneekakat. Müleka mojule süneekia watuma wanee kasa, eeshii süpüla jashichin na wawalayuukana sutuma jee eesü süpüla sümalajaain nanoula sutuma. ¿Aashin nnojoluin waaʼinreein tia? Nnojoishii waya aainjeein wanee kasa mojujiraajeenaka atuma na wawalayuukana. Tü anaʼleekalia maʼin shia anale süneekia watuma wanee kasa waaʼinrajatka (paashajeʼera Roma 14:19 otta Galacia 6:7).

6. ¿Kasa waaʼinrajatka nnojorüle süküjüin wamüin tü Wiwüliakat tü waneeküinjatkat?

⁶ Nnojorüle süküjüin wamüin tü Wiwüliakat tü waaʼinrüinjatkat süpüla waneeküin wanee kasa, ¿kasa eeka süpüla waaʼinrüin? Nnojo waaʼinrüin wanee kasa anaka neʼe saaʼin wamüin, waaʼinra tü watüjaakalü aaʼu sünain anain nümüin Jeʼwaa. Waaʼinrüle tia, weʼitaashaatain waaʼin sünain nükaaliinjeenain waya Jeʼwaa süpüla anainjatüin sukuwaʼipa watuma wanee kasa (paashajeʼera Salmo 37:5).

7. ¿Kasa waaʼinrüinjatka nnojorüle süküjüin tü Wiwüliakat tü anakat süpüla waaʼinrüin naashin Jeʼwaa?

⁷ ¿Jamüsü süpüla watüjaain saaʼu tü kasa anakat nümüin Jeʼwaa? Anuu tü sümakat Éfeso 5:17: «Shia anaka aluʼu müleka jiyaawatüle saaʼu tü nüchekakat [Jeʼwaa] chi Senyotkai jüpüleerua». Nnojorüle süküjüin tü Wiwüliakat tü anakat süpüla waaʼinrüin, shia anaka aluʼu wachajaale sukuwaʼipa süpüla watüjaain saaʼu tü nüchekakat Jeʼwaa süpüla waaʼinrüin (paashajeʼera «Pütchi pütüjaainjatka aaʼu»). ¿Kasa waaʼinrüinjatka süpüla watüjaain saaʼu tia? Oʼuraajüinjana waya nümüin otta wooʼulaainjatü nuʼunirüin wakuwaʼipa nükajee chi naaʼinkai.

8. ¿Kasa naaʼinraka Jesuu süpüla nütüjaain saaʼu tü nüchekakat Jeʼwaa nüpüleerua?

⁸ Nüchajaain Jesuu sukuwaʼipa süpüla naaʼinrüin waneepia tü nüchekakat Jeʼwaa nüpüleerua.  Müshijeseʼe nuchuntüshinkain Jesuu kaaliinwaa nümüin Jeʼwaa süpülapünaa nikirüinjanain watta naaliin wayuu müliakana sutuma jamü (Mat. 14:17-20; 15:34-37). Wanaa sümaa nuchuntüinkain chi Yolujaakai nümüin Jesuu panjaainjatüin nutuma tü ipakalüirua, niyouktajaa amaalü Jesuu tia (paashajeʼera Mateo 4:2-4). Nnojotsü naainjain tia Jesuu, nnojotsü nuchuntüin Jesuu nümüin Jeʼwaa chi nütchinkai süpüla anainjatüin neʼe nukuwaʼipa nümüiwaʼa. Nütüjaa aaʼu Jesuu nuʼunireerüin Jeʼwaa nukuwaʼipa otta nikireechin nia soʼu tü kaʼi choʼujaakalü oʼu shia nümüin.

9, 10. ¿Kasa akaaliinjeenaka waya süpüla waneeküin wanee kasa anasü? Piʼitaa wanee sukuwaʼipa.

⁹ Aneerü süneekia tü kasa waaʼinrüinjatkat müleka washatüle nukuwaʼipa Jesuu jee wooʼulaale niain Jeʼwaa oʼunirüin wakuwaʼipa. Müsü sünüiki tü Wiwüliakat: «Piʼitaa maʼin paaʼin nünain Jeʼwaa, nnojo piʼitaain paaʼin sünain tü pütüjaakalü aaʼu. Jülüja paaʼin nia sünain süpüshuaʼa tü kasa paaʼinrakat süpüla lotuinjatüin pukuwaʼipa nutuma. Nnojo puʼwaataain suluʼu kekiin maʼin pia paashin, mmoluwaa pia neema Jeʼwaa jee pükatalaa suulia tü kasa mojusükat» (Prov. 3:5-7, TNM). Wekirajaapa sünain tü Wiwüliakat, wayaawata aaʼu tü jülüjakat naaʼin Jeʼwaa otta waaʼinreerü tü kasa keeʼireekat naaʼin. Müleka watüjaale maʼin saaʼu tü jülüjakat naaʼin Jeʼwaa, mapüleʼereejeeria wamüin aaʼinraa tü anakat nümüin. Ooʼulaka müsia, waaʼinreerü süka süpüshuaʼa waaʼin tü nuluwataakalü anain waya (Eze. 11:19).

¹⁰ Eetaalasü wanee wayuu ayaʼlajaaka, shiʼrüinjeseʼe wanee sapaata anajüsü maʼin, kojutüpejeʼe maʼin shiairua. Nnojotsü shiyaʼlajüin tü sapaatakat wayuukot tia süka sütüjaain saaʼu nnojoleerüin anain nümüin chi suʼwayuusekai süka kojutüin maʼin shia. Makaʼa sütüjaain saaʼu tia shia süka kakaliairüin shia kasaalüin nümaa chi suʼwayuusekai jee shiʼraajüitpain nukuwaʼipa. Akaataajaʼa neʼe watüjaale saaʼu tü jülüjakat naaʼin Jeʼwaa, waaʼinreerü tü kasa anakat nümüin waneepia süka weʼraajüitpain nukuwaʼipa.

11. ¿Kasa wasakireʼerüinjatka waaʼin waashajeʼerapa jee wekirajaapa sünain tü Wiwüliakat? (Paashajeʼera tü pütchikat  «Paashajeʼerapa tü Wiwüliakat, püsakireʼera paaʼin tüü»).

¹¹ ¿Jamüsü süpüla watüjaain saaʼu tü jülüjakat naaʼin Jeʼwaa? Süpüla watüjaain saaʼu tia, acheküshii waashajeʼerüin jee wekirajaain sünain tü Wiwüliakat. Waaʼinrapa tia, wasakireʼera waaʼin sünain tüü: «¿Kasa shikirajaka anain taya tia nüchiki Jeʼwaa? ¿Jamüsü makaʼa sukuwaʼipa tia nutuma?». Washata nukuwaʼipa David wanaa sümaa nümüin: «Jeʼwaakalee, piʼraajira taya tü püpünakat. Pikiraja taya sünain tü shiimainkat, süka jamüin, piain chi Tamaleiwase akaaliinjakai taya. Taʼatapajüin pia waneepia süpüla pükaaliinjüinjachin taya» (Sal. 25:4, 5, TNM). Watüjapa wanee kasa nüchiki Jeʼwaa, wachajaa suluʼu wekii joujain anain süpüla waaʼinrüin tia. Eesü süpüla wasakireʼerüin waaʼin sünain tüü: «¿Jamüsüche süpüla taaʼinrüin tüü tepialuʼu, taʼyataaleruʼu, takoleejiaseruʼu jee sünain tü aküjaakat pütchi?». «Sülatüle tamüin tüü, taaʼinreerü tü makat mayaa» wamüle, watüjaajeerü aaʼu tü nüchekakat Jeʼwaa wapüleerua.

12. ¿Kasa sükaaliinjeenaka anain waya tü karalouktairua eekat wamaʼana jee tü outkajawaakalüirua?

¹² ¿Jarat tü wanee kasa akaaliinjeenakat waya süpüla watüjaain saaʼu tü jülüjakat naaʼin Jeʼwaa? Shia jülüjale maʼin waaʼin tü shikirajakalü anain waya tü nupueulosekat Jeʼwaa süchiki tü Wiwüliakat. Waneeküinjanale wanee kasa jee watüjaweere saaʼu anale shia, acheküsü wachajaainjatüin shia suluʼu Índice de las publicaciones Watch Tower otta Nachajaayainjatü pütchi na aküjüliikana pütchi nüchiki Jeʼwaa. Tü wanee kasa akaaliinjeenakat waya shia jülüjale waaʼin tü ekirajünakat sünain tü outkajawaakat, wayalerüle wajapü süpüla wasouktüin shiʼipajee wanee asakiraa jee wasakireʼerüle waaʼin sünain tü wekirajaakalü anain. Waaʼinrüle tia, aneerü süneekia watuma wanee kasa jee eʼreena waya kasa anasü sünainjee tia nutuma Jeʼwaa.

13. ¿Kasa aneetka watuma watüjaale saaʼu tü jülüjakat naaʼin Jeʼwaa jee wasakireʼerüle waaʼin sünain tia? Piʼitaa wanee shiyaawase.

¹³ Aneerü süneekia watuma wanee kasa müleka watüjaale saaʼu tü jülüjakat naaʼin Jeʼwaa jee wasakireʼerüle waaʼin sünain tia. Jülüja waaʼin tüü: jamüshiijaʼa pürekutsooleere waya, eesüjaʼa süpüla wanoukteʼerüitpain wakuwaʼipa. Ayatapejeʼe wainmajüin waaʼin süka nnojoluin watüjaain saaʼu talateenale waya süka nnojoleenain waʼyataain maʼin jee wainmain kasa wamaʼana. Nnojotsü süküjüin tü Wiwüliakat sünain pürekutsoolüinjanain waya süpüla waʼyataainjanain nümüin Jeʼwaa. Wainmeetpejeʼe kasa anasü weʼreetka nutuma Jeʼwaa shiale palajanain watuma tü Nuluwataayakat naashin Jesuu (paashajeʼera Lucas 18:29, 30, TNM). Saashin tü Wiwüliakat, talatashaateerü naaʼin Jeʼwaa watuma müleka wachajaale sukuwaʼipa süpüla waʼwaajüin nia. Tü keeʼireekat naaʼin Jeʼwaa shia talatüin maʼin waaʼin sünain aʼyatawaa nümüin (Sal. 119:108; 2 Cor. 9:7). Woʼuraajüle nümüin Jeʼwaa jee wasakireʼerüle waaʼin sünain tia, nükaaliinjeena waya süpüla waneeküin tü wounteetkat süpüla waʼyataain nümüin. Wainmeerü kasa anasü weʼreetka nutuma Jeʼwaa sünainjee waaʼinrüin tia.

14. ¿Jamüsü süpüla watüjaain saaʼu müleka anale nümüin Jeʼwaa waʼanaaya?

¹⁴ Anuutaa joo wanee sukuwaʼipaya: eesü kuluulu keejiaka maʼin wamüin süpüla washeʼinjatüin shia, watüjaapejeʼe saaʼu mojushiijeerüin shia namüin na wawalayuukana waʼatüle shia wanain. Nnojotpejeʼe ashajünüin suluʼu tü Wiwüliakat müleka anale shia jee mojule shia. ¿Jamüsü süpüla watüjaain saaʼu anale nümüin Jeʼwaa tü waʼanaayakat? Anuu tü pütchi sümakat tü Wiwüliakat: «Na jieyuu aʼwaajakana chi Maleiwakai, tü anainjatkat atüma nayolojo suʼupala wayuu, nnojolüinjatü sükajeejatüin naʼanaain süka kuluulu kojutkat maʼi, nnojolüinjatü sükajeejatüin aaʼinraa kasa sünain naʼwala, je nnojolüinjatü sükajeejatüin naʼanaain cheʼesaa je aüliijanaa eekai kojutüin maʼi. Tü eʼnnajatkat nanain na jieyuukana, shiainjatü tü kamanewaakat sünain aaʼinraa  kasa anasü sümüin wayuu süpüshua» (1 Tim. 2:9, 10). Pütchikat tüü, namüinjatü na wawalayuu jieyuukana jee na tooloyuukana. Laülaale waaʼin, nnojoleerü waʼatüin wanain wanee kuluulu mojushiijeetka namüin na wawalayuukana. Nnojoleerü waainjain wanee kasa mojushiika namüin süka alin naya wapüla (1 Cor. 10:23, 24; Filip. 3:17). Wasakireʼerüle waaʼin sünain tü nümakat Jeʼwaa suluʼu tü Wiwüliakat, waneekeerü wanee kasa talateetka atuma naaʼin.

15, 16. (1) ¿Jamüsü naaʼin Jeʼwaa müleka jülüjakuʼu müle waaʼin amaʼüjirawaa wakuwaʼipa? (2) ¿Jamüsü süpüla watüjaain saaʼu müleka anale nümüin Jeʼwaa tü kasa wanajakat, waapajakat jee washaittakat? (3) ¿Kasa waaʼinrajatka süpülapünaa waneeküin wanee kasa waaʼinrajatka?

¹⁵ Saashin tü Wiwüliakat, mojusü naaʼin Jeʼwaa naaʼinrüle wanee wayuu kasa mojusü otta jülüjale naaʼin kasa mojusü (paashajeʼera Génesis 6:5, 6). Watüjaa aaʼu nnojoluin anain nümüin Jeʼwaa jülüjakuʼu müle waaʼin wamaʼüjiraain wakuwaʼipa. Jülüjakuʼu müle waaʼin tia, waaʼinreerü shia mapa. Müsüjeseʼe keeʼireein naaʼin Jeʼwaa jülüjain waaʼin kasa anasü, kasa wulesü. Müsü sünüiki tü Wiwüliakat: «¿Jameerü nukuaippa chi eekai kekiin nütüma chi Maleiwakai chakai iipünaa? Wuleerü naaʼin. Nnojoleechi aʼülüjiraain namaa na nuwalayuukana, anamieechi nia namüin, jüüjüüjeechi nia namüin. Amüliajeechi nia waneepia na eekai niʼrüin sünain müliaa. Naaʼinreerü kasa anasü sümüin wayuu süpüshua. Nnojoleechi kachekalaʼatalin nia wayuu. Je nnojoleechi piamain oʼupünaa» (Sant. 3:17). Saashin tü Wiwüliakat, nnojotsü wanajüinjatüin jee waapajüinjatüin kasa yarüttüsü suulia joo jülüjain waaʼin kasa mojusü. Watüjaale saaʼu tü kasa anakat nümüin Jeʼwaa, nnojoleerü choʼujaain wasakiijakuʼu wamüin na wawalayuukana anale süpüla waashajeʼerüin wanee karaloukta, jaralin tü peliikula wanajüinjatkat otta tü washaittajaainjatkat.

¹⁶ Waneeküinjanapa wanee kasa, shia waaʼinrüinjatka tü anakat naashin Jeʼwaa. Shiainjatüle waneeküin wanee kasa kapüleesü, acheküshii wachuntüinjanain kaaliinwaa nümüin wanee laülaashi jee niale wanee wawala laülaakai aaʼin jee kakaliaichikai sünain anoujaa (Tito 2:3-5; Sant. 5:13-15). Nnojo wachuntüin nümüin niainjachin aneeküin wooʼopünaa tü waaʼinrajatkat. Müsü sünüiki tü Wiwüliakat: «Jütüjaa saaʼu wasouktinneenain waneʼewai wakua nuʼupala Maleiwa soʼuweena wane kaʼi saaʼu süpüshua tü waaʼinrakat, müleka anale, müleka mojule» (Gal. 6:5). Tü waaʼinrajatkat shia jülüjain waaʼin tü sümakat tü Wiwüliakat, mapa süchikijee, waneeka wamüsia tü waaʼinrajatkat (Heb. 5:14).

17. ¿Kasa anasü weʼreetka waaʼinrüle tü anakat nümüin Jeʼwaa?

¹⁷ Waneeküle wanee kasa anaka nümüin Jeʼwaa, aleeweena maʼin waya nümaa, talateerü naaʼin wamaa jee wainmeerü kasa anasü weʼreetka nutuma (Sant. 4:8). Katsüinjeerü wanoula sutuma tia makat. Wasakireʼera waaʼin sünain tü sümakat tü Wiwüliakat süpüla watüjaain saaʼu tü jülüjakat naaʼin Jeʼwaa. Ayateenapejeʼe waya atüjain wainma kasa nüchiki Jeʼwaa (Job 26:14). Wekirajaale maʼin nüchiki Jeʼwaa, kekiijeena maʼin waya jee aneerü süneekia watuma tü kasa waaʼinrajatkat (Prov. 2:1-5). Na wayuukana napüshuaʼa, naʼwanajaʼawaliin tü jülüjakat naaʼin otta müsia tü kasa naaʼinrajatkat, aluʼuinjaʼa Jeʼwaa matüjüinsai aʼwanajawaa nukuwaʼipa. Saashin tü Wiwüliakat, tü nüneekakat Jeʼwaa jee tü jülüjakat naaʼin eejeerü shia süpüla kaʼikat süpüshuaʼa (Sal. 33:11). Aneerü süneekia watuma tü waaʼinrajatkat jülüjale waaʼin tü jülüjakat naaʼin Jeʼwaa jee waaʼinrüle tü anakat nümüin.