1, 2. ¿Kasa niyaawataka aaʼu Pedro süchikijee nülatirüin wanee ai sünain olojoo jime?

CHAJANA olojuin jime akaratshishii nikirajüin Jesuu chaa eekai tü palaakat Galilea. «Nalatirüin aikat süpüshua sünain masirüin naya». Shiasaʼa waneemüin kaʼi, watta maalü, eejachi wanee wayuu shaʼwatüin sotpaʼa tü palaakat sünain nünanajaa nümüin naya, chia wayuukai nia Jesuu, shiajaʼa süchikijee süsoʼiraain naaʼin. Nümaka namüin: «‹Jujutüle tü jukusüinkat wopujeeruʼu sünain tü anuakat, anteena jia sünain jime› [...]. Shiasa najutakalaka tü nakusüinkat shirokumüin tü palaakat, kasitkalaka naya jime watta maʼi saalin. Isasü nachiki ayuʼlaa süka jawatüin shia noulia» (Juan 21:1-6).

² Asayuunajüshii naya jime sümaa pan nutuma Jesuu. Nümakalaka nümüin Simón Pedro: «Simón nüchonkai Juan, ¿alanaʼaleesü taalin püpüla suulialeʼeya tüüirua?». Sutuma nütüjaain aaʼu Jesuu kamalain maʼin nümüin Pedro olojoo jime, eesüjaʼa shiale nüsakireein anain nia jaralüin kojutüin maʼin nümüin, niale niakai sümaa tü nikirajakalü anain jee shiale tü niʼyataainkat sünain olojoo jime. Nümaka Pedro nümüin Jesuu: «Senyotkalee,  pütüjaa aaʼut sümaa alin pia tapüla» (Juan 21:15). Niyaawata aaʼu Pedro alinjachin Jesuu nüpüla suulialeʼeya wanee kasa. Soʼujeʼereʼeya kaʼikat tia, niiʼiyatüin shiimain alin Jesuu nüpüla, müshijeseʼe nüküjüin maʼin pütchi. Akaʼaya nia, nükaaliinjain maʼin na anoujashiikana.

3. ¿Kasa eejüinjatka oulia waaʼin?

³ ¿Kasa watüjaka sünainjee tü nümakat Jesuu nümüin Pedro? Shia eejüinjatüin waaʼin suulia süshakajüin sütsüin tü naalinkat Kürisüto wapüla. Nütüjaatüjülia aaʼu Jesuu shapaainjatüin saaʼin wayuu maaʼulu otta wainmainjatüin kasa eejiraakalü amaa naya. Wanaa sümaa nüküjüin Jesuu nüchiki wanee wayuu apünajakai waüyee, nüküjüin eeinjatüin wayuu aapaaka sümaa tü aküjünakat namüin süchiki Nuluwataaya Maleiwa sümaa talataa. Shiasaʼa mapa, mojuteerü namüin tia pütchikat otta nnojoleerü talatüin naaʼin sümaa, «sükajee shapaain naaʼin saaʼu tü katüinjatkat atüma noʼu» süka jamüin, «kachiiruain maʼi naaʼin shiiʼiree washirüü» (Mat. 13:19-22; Mar. 4:19). Nnojorüle eejüin waaʼin wayakana, eesü süpüla nnojoluin anain maʼin watuma tü waʼyataainkat nümüin sutuma shapaain maʼin waaʼin. Müshijeseʼe nümüin Jesuu namüin na nikirajüinkana: «Jülüja jaaʼin tü jukuwaʼipakat suulia shiain jülüjain jaaʼin waneepia ekawaa, asawaa jee suulia shapaain jaaʼin sutuma tü kasa choʼujaakat jümüin» (Luc. 21:34, TNM).

4. ¿Jamüsü süpüla watüjaain saaʼu ayatüle muloʼuin naalin Kürisüto wapüla? (Piirakaa sümüin tü ayaakuaa suluʼukat süpana 21).

⁴ Eesü süpüla washatüin nukuwaʼipa Pedro süpüla weeʼiyatüin alin wapüla Kürisüto. Waaʼinreerü tia palajanale watuma tü aküjaakat pütchi. ¿Jamüsü süpüla watüjaain saaʼu ayatüle waaʼinrüin tia? Anashii wasakireʼerüle waaʼin sünain tüü: «¿Kasa wayuu tü kojutüleekat maʼin tamüin? ¿Kasa talataka maʼin atuma taaʼin? ¿Shiache sutuma taʼyataain nümüin Jeʼwaa? ¿Waneejattaapa tü talatakalü atuma taaʼin?». Süpüla watüjaain saaʼu tia, wekirajaainjatü anain apünüinsü kasa eeka süpüla süshakajüin atuma naalin Kürisüto wapüla. Tia shia tü aʼyatawaakat, emiʼijaa otta kamaʼanaa wainma korolo.

5. ¿Kasa naaʼinrajatka na shikiipüʼükana napüshi?

⁵ Nnojoishi olojuin neʼe jime Pedro sutuma kamalainpuʼuin shia nümüin. Naaʼinrapuʼuin tia süpüla naapüin tü choʼujaakat sümüin nüpüshi. Akaʼaya maaʼulu yaa, aʼyataainjachi chi toolokoi süpüleerua nuʼwayuuse jee nüchonnii (1 Tim. 5:8). Aʼyataashaatashii maʼin naya süpüla naapüin sümüin napüshi tü choʼujaakat sümüin. Shapaapejeʼe maʼin naaʼin sutuma tia.

6. ¿Jamüsü shapaaka naaʼin wanee wayuu sünainjee tü niʼyataainkat?

⁶ Maaʼulu yaa, aishaatasü maʼin shiiʼiree aʼyatawaa, naya neʼe wainmakana na achajaakana aʼyatawaa. Sutuma tia, wainma kasa saainjaka wayuu shiiʼiree saapünüin sümüin wanee aʼyatawaa. Wainma wayuu ouktiraaka sünain aʼyatawaa sümaa nnojoluin wainmain nakanain. Ooʼulaka müsia tü konpainyiiakalüirua, shiʼyateʼerüin maʼin wayuu süka nnojoluin shikerojireein sooʼomüin aʼyataannuu. Shiasaʼa sünainjee tia, shapaasü naaʼin na aʼyataakana suluʼu tü konpainyiiakat, mapüsashii  otta ayuuishii naya sünainjee tü naʼyataainkat. Mmotshii nayayaa seema nojutünüin suulia naʼyataain sutuma nnojoluin naaʼinrüin süpüshuaʼa tü nuluwataakalü anain naya chi nalaamainkai.

7, 8. (1) ¿Jarai chi woonookai amaa anüiki waneepia? (2) ¿Kasa niyaawataka aaʼu wanee wawala süchiki tü aʼyatawaakat?

⁷ Wayakana anoujashiikana, nia woonooka amaa anüikii waneepia Jeʼwaa suulialeʼeya wayuu jee nuulialeʼeya chi walaamainkai (Luc. 10:27). Aʼyataashii neʼe waya süpüleerua tü choʼujaakat wamüin otta süpüla ayatüin waʼyataain nümüin Jeʼwaa. Eejüinjatpejeʼe waaʼin suulia sumojujaain wakuwaʼipa nümaa Jeʼwaa sutuma tü waʼyataainkat. Wekirajaa nüchiki wanee wawala chejeʼewai Tailandia. Anuu nünüiki: «Akumajüipuʼushi taya computador tamaiwa. Anapuʼusü maʼin tia aʼyatawaakat, shiajaʼa neʼe sünanin taya waneepia. Nnojotpuʼusü apütaain kaʼi süpüla tü taʼyataainkat nümüin Jeʼwaa. Tayaawataka saaʼu choʼujaain tooʼulaain tü taʼyataakalü anain süpüla shiainjatüin palajanain tatuma Nuluwataaya Maleiwa». ¿Kasaka naaʼinrüin chia wawalakai?

⁸ Anuu sooʼomüin nünüiki chi wawalakai: «Eetaashi maʼaka wanee juya taya sünain achajawaa sukuwaʼipa tü taʼyataainjatkalü anain. Taʼyataaka sünain oikkaa helado. Toʼttaiwaʼaya sünain tia aʼyatawaakat, mojushichon takanain otta mojuwaisü taaʼin sutuma tia. Wanaa sümaa tantiraain namaa na taʼyataajiraapuʼukana amaa, nemeeʼerainpalashi taya otta nasakirapuʼuin taya jamüin kamalainka tamüin oikkaa helado suulialeʼeya aʼyatawaa sünain akumajaa computador suluʼu wanee oficina kaluʼuka aire. Tachuntaka kaaliinwaa nümüin Jeʼwaa süpüla tachecherüin taaʼin jee süpüla eeinjatüin kaʼi süpüla kooʼomüin taʼyataain nümüin. Anaataasü tü takuwaʼipakat mapa. Tatüjaa aaʼu jaralin tü helado jemetakat namüin na wayuu ayaʼlajakana toulia otta jemetaleesia shia tatuma mapa. Jee müsia, toikkapuʼuin süpüshuaʼa tü taainjakat soʼu wanee kaʼi. Wainmaleesia takanain maaʼulu suulialeʼeya tü takanainkat takumajaiwaʼaya computador. Nnojoluitpa shapaain taaʼin, talatüshi taya sutuma nnojoluitpain apüleeruaanüin taaʼin. Shiapejeʼe anashaatain tamüin tarütkaaichipain maʼin nünainmüin Jeʼwaa» (paashajeʼera Mateo 5:3, 6).

9. ¿Kasa waaʼinrajatka süpüla nnojoluinjatüin sülanaʼaleein sujutü wamüin tü waʼyataainkat?

⁹ Kamalainshaatasü nümüin Jeʼwaa waʼyataaliin, shiimain weʼreenain kasa anasü sünainjee (Prov. 12:14). Nnojotpejeʼe shiainjatüin kojutüleein wamüin tü aʼyatawaakat suulia tü waʼyataainkat nümüin Jeʼwaa. Anuʼusa nünüiki Jesuu soʼu naashajaain süchiki tü choʼujaakat wamüin, müshi nia: «Ayata jüchajaain palajana tü nuluwataayakat Maleiwa otta tü lotookalü akuwaʼipa. Shiasaʼa süpüshuaʼa tü wanee kasakalüirua, aapüneerü jümüin» (Mat. 6:33, TNM). ¿Jamüsü süpüla watüjaain saaʼu shiale alanaʼaleein ojutü wamüin tü waʼyataainkat suulialeʼeya kasa süpüshuaʼa? Anashii wasakirüle waaʼin sünain tüü: «¿Kamalainshaatasüche maʼin tamüin tü taʼyataainkat? ¿Kulajüsüche taaʼin sünain aʼyatawaa nümüin Jeʼwaa?». Wasouktapa shiʼipajee pütchikalüirua tüü, wayaawateerü aaʼu jaralüin kojutüin maʼin wamüin.

10. ¿Kasa nikirajeeka anain waya Jesuu?

¹⁰ Nikirajüin waya Jesuu sünain tü  kojutüleeinjatkat wamüin. Jamüsüjaʼa soʼu wanee kaʼi, chajachi nia shipialuʼu María otta Marta. Tütüwaa müsü Marta sünain aʼlakajawaa niküin Jesuu, eekajasaʼa María, aikkalaasü nüʼütpaʼa sünain aapajaa tü nikirajakalü anain. Jashichika Marta sutuma nnojoluin sükaaliinjain shia María, nümaka Jesuu sümüin: «Tü kasa anakat süpüla paaʼinraa, shia tü saaʼinrakat María sünain jülüjain saaʼin tü kasa anasü tekirajakat anain. Nnojotsü wanaain sümaa tooʼuleʼeraa shia suulia saaʼinrüin tüü» (Luc. 10:38-42). ¿Kasa nikirajeeka anain waya Jesuu? Shia jülüjainjatüin waaʼin tü nikirajakalü anain süpüla weeʼiyatüin sünain alin nia wapüla jee suulia waaʼinmaain wanee kasa naata suulia. Shiainjatü kojutüleeka maʼin wamüin tü wakuwaʼipakat nümaa Jeʼwaa.

11. ¿Jamüsü sünüiki tü Wiwüliakat süchiki eemerawaa otta ashaittaa?

¹¹ Wainma tü kasa waaʼinrakat wayakana wapüshuaʼa. Müsüjeseʼe choʼujaʼawalin wamüin weemeraain otta washaittüin süpüla jutatüinjatüin waaʼin. Müsü tü Wiwüliakat: «Anashaatasü maʼin nümüin wanee wayuu niküle, nüsüle otta naaʼinrüle wanee kasa talateetka atuma naaʼin sutuma niʼyataashaatain maʼin» (Ecl. 2:24, TNM). Nütüjaa aaʼu Jesuu choʼujaain namüin na nikirajüinkana neemeraainjanain. Jamüsüjaʼa soʼu wanee kaʼi, aʼyataashaanashii maʼin naya sünain aküjaa pütchi, nümaka Jesuu namüin: «Jooʼuya tamaaiwa jia chamüin eere yüütüülin mmakat süpüla jeemeraainjanain» (Mar. 6:31, 32).

12. ¿Jamüsü eejüinjatka waaʼin suulia shiain jülüjain waaʼin waneepia tü ashaittaakat? Püküja tü alatakat nümüin wanee jimaʼai chejeʼewai Europa.

¹² Eemeraashii waya otta jutatüsü waaʼin washaittüle. Eejüinjatpejeʼe waaʼin suulia shiain jülüjain waaʼin waneepia tü ashaittaakat. Shiapuʼusü jülüjaka naaʼin wainma wayuu tia nükalioʼu Pablo, mapuʼushii naya: «Anashii wemiʼijaale neʼe, süka sülüʼülüin wakalia süpüla ouktaa» (1 Cor. 15:32). Ayatüsia eein wayuu maaʼulu eekai jülüjain saaʼin tia. Jamüsüjaʼa chaa wopumüin sünain Europa, eejachi wanee jimaʼai oʼunawaika sünain tü outkajawaakat. Shiasaʼa sutuma keejiain maʼin nümüin emiʼijaa, ooʼulaashi nia suulia oʼunaa sünain tü outkajawaakat. Mapa, niʼrüin wainmain kasa alataka nümüin sutuma naaʼinmaain tü emiʼijaakat. Nikirajaakalaka nüchikuaʼa sünain tü Wiwüliakat. Mapa süchikijee tia, oʼttüshi nia sünain aküjaa pütchi. Anuu nünüiki süchikijee woutiisain nia: «Shia tamaleekajaʼa makaʼa taya nnojoluin taʼyataatüjülin nümüin Jeʼwaa. Muloʼu maʼin tü talataa saapakat tamüin aʼyatawaa nümüin suulialeʼeya tü saapakat tamüin tü ashaittaakat».

13. (1) Püküja jamüin nnojotka anain waneepiale waya sünain ashaittaa. Püküja wanee shiyaawase. (2) ¿Kasa waaʼinrajatka süpüla nnojoluin shiain waneepiain anain waya tü ashaittaakat?

¹³ Shaittüinjanale waya wanee kasa, acheküsü anainjatüin otta jutatüin waaʼin sutuma. ¿Waneepiainjanache waya sünain tü ashaittaakat? Jülüja waaʼin tüü: keejiasü wamüin wayakana wapüshuaʼa ekaa torta otta püsiasü. Eepejeʼe süpüla ayuulin waya weküle tia waneepia. Süpüla nnojoluinjanain ayuulin waya, anainjatü weküin. Akaʼaya neʼe, waneepiale waya sünain ashaittaa, amojujaajeerü wakuwaʼipa nümaa Jeʼwaa. ¿Kasaka waaʼinrüinjatüin süpüla nnojoliinjanain waneepiain waya sünain ashaittaa? Washajeein jeʼrain oora walatitka soʼu wanee semaana sünain tü outkajawaakat, sünain aküjaa pütchi jee sünain ekirajawaa sünain tü Wiwüliakat. Süchikijee, washajeetka jeʼrain oora walatitka sünain anajaa telewisoot, ashaittaa videojuegos jee sünain ashaittaa waneeirua kasa. Shiasaʼa waʼwanaajireʼerapa  jeʼrain oora walatitka sünain aʼyatawaa nümüin Jeʼwaa otta jeʼrain walatitka sünain ashaittaa, weʼreerü müleka choʼujaale wanoukteʼerüin wakuwaʼipa (paashajeʼera Éfeso 5:15, 16, TNM).

14. ¿Kasa jülüjainjatka waaʼin süpüla watüjain aneekaa tü anakat süpüla washaittüin?

¹⁴ Nuuʼulaain waya Jeʼwaa waneeküin tü washaitteekalü amüin. Otta müshiʼiya na shikiipüʼükana napüshi eeshii süpüla naneeküin tü nashaittüinjatkat na napüshikana. Suluʼu tü Wiwüliakat, eesü pütchi eeʼiyataka jamüin nünüiki Jeʼwaa süchiki tü shaittaakat. Jülüjale waaʼin tia pütchikalüirua, atüjeena waya aneeka tü anakat süpüla washaittüin. * Nia kaapajalaka wamüin Maleiwa tü shaittaakat (Ecl. 3:12, 13). Shiimain naatawalin tü keejiakat wamüin washaittapa (Gal. 6:4, 5). Eejüinjatpejeʼe waaʼin waneeküinjanapa tü washaittüinjatkat. Anuu nünüiki Jesuu: «Shieerü jülüjaka paaʼin waneepia tü kasa kojutükat pümüin» (Mat. 6:21, TNM). Aire wapüla Jesuu, chi Aluwataakai waaʼu, weeʼiyateerü shiain palajanain watuma Nuluwataaya Maleiwa. ¿Kaseerü weeʼiyataka akajee tia? Sükajee tü jülüjakat waaʼin, wanüikipala jee tü waaʼinrakat (Filip. 1:9, 10).

15, 16. (1) ¿Jamüsü eeka süpüla sumojujaain wanoula kachiiruale waaʼin kamaʼanaa wainma korolo? (2) ¿Jamüsü nünüiki Jesuu süchiki tü kachiiruaakalü aaʼin washirüü?

¹⁵ Maaʼulu yaa, wainma wayuu keeʼireekana aaʼin ayaʼlajaa tü kuluulu jeketkat ojuʼitüin, serulaat, computador jee waneeirua  kasa. Shia kachiiruaka naaʼin kamaʼanaa wainma korolo otta washirüin naya. Anashii wasakirüle waaʼin wayakana anoujashiikana kasain wayuu tü alanaʼaleekat ojutü wamüin. Wasakireʼera waaʼin sünain tüü: «¿Shiache jülüjaka taaʼin waneepia ayaʼlajaa kemion jeketka ojuʼitüin jee tü kuluulu jeketkat ojuʼitüin suulialeʼeya tekirajaain sünain tü outkajawaakat? ¿Nnojoishiche taya oʼuraajüin maʼin otta nnojotsüche taashajeʼerüin maʼin tü Wiwüliakat sutuma wainmain kasa taaʼinraka?». Nnojorüle eejüin waaʼin, shieerü jülüjaka waaʼin kamaʼanaa wainma korolo otta maalinjeechi Kürisüto wapüla. Soto waaʼin tü nümakat Jesuu, müshi nia: «Jalia jia suulia kachiiruaa aaʼin tü washirüükat» (Luc. 12:15). ¿Jamüsü maka nünüiki Jesuu?

¹⁶ Anuu sooʼomüin nünüiki Jesuu: «Maa aka kojutaʼatüle piamashii laama nütüma chi aʼyataaikai sünain alin nüpüla wane je sünain maalin nüpüla chi waneʼe, meechi aka Maleiwa jütüma müleka shiale kachiiruain jaaʼin tü washirüükat nuulialeʼeya» (Mat. 6:24). Nnojoishi süpüla waʼwaajüinjachin Jeʼwaa sümaa kachiiruain waaʼin tü washirüükat. Sutuma waleʼeruʼuin tü kaainjalaakat, ayatüinjana waya eejiraain sümaa tü kasa suchuntaakat weʼiruku, maʼaka saaʼin keeʼirewaa aaʼin kamaʼanaa wainma korolo (Éf. 2:3, TNM).

17. (1) ¿Jamüsü kapüleeka namüin waneeinnua wayuu nooʼulaain suulia kachiiruain naaʼin washirüü? (2) ¿Kasa waaʼinrajatka süpüla nnojoluin kachiiruain waaʼin kamaʼanaa wainma korolo?

¹⁷ Watta naalii wayuu naaʼinmaaka maaʼin tü suchuntaakat naaʼin, müsüjeseʼe shiain alanaʼaleein ojutü namüin kamaʼanaa wainma korolo (paashajeʼera 1 Corinto 2:14). Sutuma tia, isasü nachiki nayaawatüin saaʼu tü anasükat süpüla naaʼinrüinjatüin shia jee sünain tü mojusükat süpüla nayouktüinjatüin shia (Heb. 5:11-14). Eesüjaʼa suchuntaale maʼin naaʼin kamaʼanaa wainma korolo, jaʼitairü wainmain shia namaʼana, suchuntaain naaʼin sooʼomüin (Ecl. 5:10). Nnojoleerü jülüjain waaʼin kamaʼanaa wainma korolo waashajeʼerüle tü Wiwüliakat waneepia. Katsüinjeena waya sutuma süpüla eejiraain waya sümaa tia suchuntaakat waaʼin (1 Ped. 2:2). Jülüjasü naaʼin Jesuu waneepia tü nünüikikat Jeʼwaa, müshijeseʼe nüchecherüin naaʼin soʼu nuuʼulakünüin aaʼin nutuma chi Yolujaakai (Mat. 4:8-10). Süpüla nnojoluinjatüin kachiiruain waaʼin tü washirüükat, waaʼinrüinjatü tü nümakat Jeʼwaa wamüin. Waaʼinrüle tia, weeʼiyateerü nümüin Jesuu sünain alin maʼin nia wapüla suulialeʼeya kamaʼanaa wainma korolo.

18. ¿Kasa sotuinjatka waaʼin wayakana?

¹⁸ «¿Alanaʼaleesü taalin püpüla suulialeʼeya tüüirua?» wanaa sümaa nümüin Jesuu nümüin Pedro, tü nüküjeekat achiki Jesuu shia palajanainjatüin nutuma Pedro tü aʼyatawaakat nümüin Jeʼwaa. «Shiʼipa ipa miyoʼu» münüshi Pedro, süka jamüin, ichein nia waneepia sünain aʼyatawaa nümüin Jeʼwaa (Aluw. 4:5-20). Müshiʼiya wayakana, sotuinjatü waaʼin waneepia alinjachi wapüla Jesuu. Eeja waaʼin suulia sülanaʼaleein sujutü watuma tü aʼyatawaakat, tü shaittaakat otta süchiiruain waaʼin wainmain korolo wamaʼana. Waaʼinrüle shia, meerü wanüiki maʼaka naaʼin Pedro wanaa sümaa nümüin: «Senyotkalee, pütüjaa aaʼut sümaa alin pia tapüla».