1, 2. (1) ¿Jaralii na ekeraajakana anain palajana tü nümakat Jesuu suluʼu Mateo 24:12? (2) ¿Jamüsü watüjaaka saaʼu sutuma tü karalouktakat Aluwataaushikana ayatüin alin Maleiwa napüla na nikirajüinkana Jesuu? (Piirakaa sümüin tü ayaakuaakat).

WANAA sümaa yaajachin Jesuu yaa mmapaʼa nüküjüin tü alatajatkat sülüʼütpa sükalia «sajaʼlajaain kasakat süpüshua». Müshi nia: «Ooʼulaajeerü wayuu wainma suulia aijirawaa» (Mat. 24:3, 12) (paashajeʼera «Pütchi Pütüjaainjatka aaʼu»). Ekeraajüsü tia pütchikat nanain na judío eejanakana nakalioʼu na nikirajüinkana Jesuu. «Waya nupueulosekana Maleiwa», mapuʼushii naya sümaa maalin Maleiwa napüla.

² Aluʼujasaʼa na nikirajüinkana Jesuu, waneʼeya sümüin nakuwaʼipa suulia nakuwaʼipa naya wayuukana. «Ayatshii waneepia sünain ekirajaa otta aküjaa nüchikü Jesús». Akaʼaya naya, neeʼiyatüin sünain alin Maleiwa napüla otta aishii napüla na nawalayuukana jee na nnojoliikana atüjaain saaʼu tü shiimainkat. Anoujashiikana naainnua, ayatüsü muloʼuin naalin Maleiwa napüla (Aluw. 2:44-47; 5:42). Eepejeʼe waneeinnua anoujashii namaiwajana, ooʼulaaka süshakajüin naalin Maleiwa napüla. ¿Jamüsü watüjaaka saaʼu tia?

3. ¿Jamüshiiche nooʼulaaka suulia aijirawaa wainma anoujashii namaiwajana?

³ Nüküjüin Jesuu namüin na anoujashii chajanakana Éfeso  maalinnapain na nawalayuukana napüla maʼaka paalainka nekeroloiwaʼaya sünain anouja (Alat. Map. 2:4). Eesüjaʼa sülatüle tia namüin sutuma nashatüin nakuwaʼipa na wayuu kepiakana pejepünaa nanain. Shia neʼe jülüjapuʼuka naaʼin naya wayuukana tü nakuwaʼipakat neʼe namüiwaʼa (Éf. 2:2, 3). Washinnuu na wayuu kepiapuʼukana Éfeso otta shiapuʼusü jülüjaka naaʼin anainjanain naya sümaa eeinjatüin korolo kojutüsü namaʼana. Akaʼaya suluʼu tia mmakat, watta naalii keejiapuʼukana amüin namaʼüjiraain nakuwaʼipa sümaa wayuu nnojotka naʼwayuusein otta mojutüpuʼusü namüin tü nuluwataakalü anain Maleiwa. Shiapuʼusü naaʼinmaaka maʼin tü kasa suchuntaakat naaʼin suulialeʼeya alin Maleiwa napüla otta alin wayuu napüla.

4. (1) ¿Jamüsü süshakajaka naalin Maleiwa süpüla wayuu maaʼulu yaa? (2) ¿Kasa wekirajaainjatka anain jooluʼu?

⁴ Ekeraajüsü maaʼulu yaa tü nümakat Jesuu süchiki suuʼulaajiraainjatüin wainma wayuu suulia aijirawaa. Ashakajüsü maʼin naalin Maleiwa süpüla wayuu, nnojoluichipa alin maʼin nia napüla. Jamüshiijaʼa na wayuukana, nnojoishi nachajaain Maleiwa süpüla nunoukteʼerüin tü kasa alatakat yaa mmapaʼa, wayuu neʼe tü neʼitaakalü anain naaʼin. Shiasaʼa sutuma tia, ayatüsü ashakajüin naalin Maleiwa süpüla wayuu. Akaʼaya wayakana aʼyataakana nümüin Jeʼwaa, eesü süpüla süshakajüin naalin wapüla maʼaka sülatüin namüin na anoujashii chejeʼewaliikana Éfeso. Müsüjeseʼe wekirajaainjatüin anain jooluʼu tü waaʼinrajatkat süpüla ayatüinjachin alin Maleiwa wapüla, ayatüin kojutüin wamüin tü shiimainkat otta ayatüin alin wapüla na wawalayuukana.

5. ¿Jamüshi alinjachika Maleiwa wapüla?

⁵ ¿Jarai aʼireeinjachika wapüla suulia kasa süpüshuaʼa? Anuu nünüiki Jesuu: «‹Alinjachi püpüla Jeʼwaa süka süpüshuaʼa paaʼin, süka süpüshuaʼa pukuwaʼipa otta süka tü jülüjakat paaʼin›. Tüü, shia tü alanaʼaleekat saʼakajee tü pütchi aapünakat nümüin Moisés» (Mat. 22:37, 38, TNM). Aire wapüla Jeʼwaa, oonoojeena waya sümaa tü nuluwataakalü anain waya, achechereena waya waaʼin suʼunnaa weʼrüin müliaa otta walerajeerü tü kasa mojusükat (paashajeʼera Salmo 97:10). Nüchajaapejeʼe sukuwaʼipa Satanaa otta tü kasa nuluwataakalü aaʼu süpüla wooʼulaainjanain suulia alin Maleiwa wapüla.

6. ¿Kasa alataka namüin na wayuukana maaliijaapa Maleiwa napüla?

⁶ Waneejatshaana tü jülüjakat naaʼin na wayuukana süchiki tü aijirawaakat. Nnojoishi alin Maleiwa napüla, shia neʼe kapülaka naaʼin «nakuaippa neʼe namüiwa» (2 Tim. 3:2). Suchuntüin naaʼin tü neirakaakat amüin jee «aʼwaatawaa suluʼu nawashirüin ooʼulaka suluʼu tü naaʼinrakat» (1 Juan 2:16). Naapirüin waya Pablo süchiki tü eekat süpüla sülatüin wamüin shiale neʼe kapülain waaʼin wakuwaʼipa wamüiwaʼa. Müshi nia: «Shiale jülüjain waaʼin tü suchuntaakat saaʼin weʼiruku, oukteena waya saaliijee tia». ¿Jamüshii oukteenaka waya saaliijee tia? Shia süka nüʼünüüin Maleiwa na kapülakana aaʼin nakuwaʼipa neʼe namüiwaʼa (Roma 8:6, 7, TNM). Na wayuu kachiiruakana aaʼin washirüü ooʼulaka na amaʼüjiraakana nakuwaʼipa, eʼreena namüliala (1 Cor. 6:18; 1 Tim. 6:9, 10).

7. ¿Kasa wayuu tü eekat süpüla amojujeʼerüin wakuwaʼipa maaʼulu yaa?

⁷ Nnojoishi eein wanee Maleiwa saashin wainma wayuu, eeshii na nnojoliikana anoujain sünain suuntüin wayuu sütüjaain saaʼu süpüshuaʼa tü shiimainkat otta eeshii na anoujakana sünain tü evolucionkat. Naya wayuukana, nemeʼejüin saaʼin wayuu süpüla sunoujainjatüin sünain tü evolucionkat, naaʼinrüin tia shiiʼiree maalinjachin Maleiwa süpüla wayuu otta nnojoluin sunoujain sünain eein nia. Otta müsia naashin nayakana, chi eekai nunoujain nünain  Maleiwa, wayuʼulaa neʼe matüjüinsai karaloukta. Otta müsia, watta saalii wayuu kojutüleeka maʼin amüin na cientiificokana nuulialeʼeya chi Kakumalakai kasa süpüshuaʼa (Roma 1:25). Müleka wanaawale waaʼin namaa naya wayuukana, amojujaajeerü wakuwaʼipa nümaa Jeʼwaa otta maaliinjeechi nia wapüla (Heb. 3:12).

8. (1) ¿Kasa eeka süpüla mojuin atuma naaʼin na aʼyataashiikana nümüin Jeʼwaa? (2) ¿Jamüsü sütütüleʼeraka waaʼin Salmo 136?

⁸ Sutuma niain aluwataain Satanaa saaʼu tü mmakat, wainma tü kasa mojuwaikalü atuma waaʼin (1 Juan 5:19). Waapüle waaʼin sünain mojuukalü aaʼin, eemiajaweerü wanoula otta ashakajeerü tü naaliinkat Maleiwa wapüla. Eesü seemiajaale wanoula sutuma manneetsein waya, sutuma ayuulin waya jee shiale sutuma laülaainnain waya. Eesü mojule waaʼin saaʼu nnojoluin anain maʼin watuma wanee kasa waaʼinraka. Eesü mojuwaire waaʼin saaʼu nnojoluin shikeraajüin wanee kasa waʼatapajaka. Jaʼitairü kasain alatüin wamüin, nnojo jülüjain waaʼin niyüülajüin waya Maleiwa. Soto waaʼin tü sümakat Salmo 136:23 nüchiki Jeʼwaa: «Nükaaliinjain waya suʼunnaa mojushaatain waaʼin, süka jamüin, aishaateenain waya nüpüla süpüla kaʼikat süpüshuaʼa». Weʼitaa maʼin waaʼin sünain naapeerüin wanüiki Jeʼwaa wachuntapa kaaliinwaa nümüin otta nusoukteechin wamüin (Sal. 116:1; 136:24-26, TNM).

9. ¿Jamüsü ayataka muloʼuin naalin Maleiwa nüpüla Pablo?

⁹ Sotusü naaʼin Pablo waneepia tü naaʼinrakat Jeʼwaa nüpüleerua, shiasaʼa sutuma tia, akatsüinraasü naaʼin. Anuu nünüiki: «Nia teenakaka chi Maleiwakai süpüla nükaalinjain taya. Nnojoleechi taya mmolüin seema tü saaʼinreetkat tü taʼünüükolüirua» (Heb. 13:6). Eejiraashi Pablo sümaa tü alatakat nümüin süka niʼitaain naaʼin nünain Jeʼwaa. Ayatüsia naaʼinrüin tia suʼunnaa süpüshuaʼa tü alatakat nümüin. Jamüshijaʼa soʼu püreesain nia, niʼitaain naaʼin nünain Jeʼwaa. Müshijeseʼe nuluwataain karaloukta süpüla nütütüleʼerüin naaʼin na anoujashiikana (Éf. 4:1; Filip. 1:7; File. 1). Ayatüsia muloʼuin naalin Jeʼwaa nüpüla Pablo mayaapejeʼe wainmain tü kasa mojusü alatakat nümüin. Niʼitaain naaʼin Pablo nünain «chi Maleiwa amüliajüikai,  chi amüliajakai waya suʼunnaa müliaa» (2 Cor. 1:3, 4, TNM). ¿Kasa waaʼinrajatka süpüla washatüin nukuwaʼipa Pablo?

10. ¿Kasa waaʼinrajatka süpüla ayatüinjatüin muloʼuin naalin Jeʼwaa wapüla?

¹⁰ Nüküjüin Pablo tü waaʼinrajatkat süpüla ayatüinjatüin muloʼuin naalin Maleiwa wapüla, müshi nia: «Nnojoleena jia ooʼulaain suulia achuntaa nümüin chi Maleiwakai, ayata jia sünain waneepia». Anuu wanee pütchi nüshajaka: «Jüchunta waneepia nümüin Maleiwa» (1 Tes. 5:17; Roma 12:12). ¿Jamüshii aleewajiraleeka waya nümaa Jeʼwaa woʼuraajüle nümüin? Shia süka waashajaain nümaa (Sal. 86:3). Arütkaashii maʼin waya nünainmüin chi Washi iipünaajachikai wanaa sümaa waküjüin nümüin tü jülüjakat waaʼin sümaa tü suluʼukat waaʼin (Sal. 65:2). Muloʼuleesia tü naaliinkat Jeʼwaa wapüla weʼrüle nusouktüin shiʼipajee tü wachuntakat nümüin. Wayaawata aaʼu pejein nia «nanain napüshuaʼa na achuntakana nünülia» (Sal. 145:18). Weʼitaale waaʼin sünain alin waya nüpüla Jeʼwaa sümaa nükaaliinjain waya, eejiraajeena waya sümaa tü alatakat wamüin maaʼulu otta mapa.

11, 12. ¿Kasa waaʼinrajatka süpüla kojutüleeinjatüin wamüin tü shiimainkat?

¹¹ Kojutüsü tü shiimainkat wamüin wayakana anoujashiikana. Tü shiimainkat shia tü Nünüikikat Maleiwa. Naashin Jesuu, tü shiimainkat shia tü Nünüikikat chi Nüshikai (Juan 17:17). Süpüla kojutüinjatüin wamüin tü shiimainkat, watüjaainjatü aaʼu tü shikirajakat tü Wiwüliakat (Col. 1:10). Eepejeʼe wanee kasa waaʼinrajatka. Nüküjüin tia chi ashajakai Salmo 119 (paashajeʼera Salmo 119:97-100). Jülüjainjatü waaʼin tü waashajeʼerakat sükaaluʼuwai wanee kaʼi. Wachajaale sukuwaʼipa süpüla weʼitaainjatüin suluʼu wakuwaʼipa tü shiimainkat, kojutüleejeeria shia wamüin.

¹² Anuu nünüiki chi ashajakai Salmo 119: «Müsü aka saaʼin wanee kasa eekai jemetüin maʼin tamüin tü pünüikikat, jemetaleesia tamüin suulialeʼeya tü mapakat» (Sal. 119:103, TNM). Tü karalouktairua aapünakat wamüin sutuma nupueulose Maleiwa, müsü aka saaʼin wanee eküülü eekai jemetüin maʼin. Jamüsüjaʼa weküle wanee eküülü eekai jemetüin maʼin, nnojotsü womokojooin, wakünajachon shia süka jemetüin seʼejü wamüin. Akaataajaʼa neʼe wekirajaapa sünain tü karalouktairua ayuʼluushikat suluʼujee tü Wiwüliakat, nnojoishii waya kajaalapüinjanain wekirajaapa sünain. Sutuma tia, kamalainjeerü wamüin ekirajawaa sünain tü shiimainkat. Akaʼaya shia, nnojoleerü motuin waaʼin otta wakaaliinjeerü wayuu sükajee (Ecl. 12:10).

13. ¿Jamüsü kojutüpuʼuka nümüin Jeremías tü Nünüikikat Maleiwa? ¿Kasa naaʼinraka sutuma tia?

¹³ Kojutüpuʼusü tü Nünüikikat Maleiwa nümüin Jeremías. Müshi nia: «Antüna anainrü tü pünüikikat, tekaka shia. Talatüsü maʼin taaʼin sutuma tü pünüikikat; eʼnnaajünüshi taya sükajee tü pünüliakat piakai Jeʼwaa, chi wainmakai asurulaatse» (Jer. 15:16, TNM). Kojutüsü nümüin Jeremías tü Nünüikikat Maleiwa sümaa nikiiruʼuin shia waneepia. Müsüjeseʼe kojutüin nümüin niʼnnaajünüin süka nünülia Jeʼwaa sümaa nüküjüin tü nünüikikat sümüin wayuu. Akaataajaʼa neʼe wayakana, kojutüle wamüin tü shiimainkat, kojuteerü wamüinya waküjüliin pütchi nüchiki Jeʼwaa otta waküjüin maaʼulu tü süchikikat Nuluwataaya.

14. ¿Kasa maa waaʼinrajatka süpüla kojutüleeinjatüin wamüin tü shiimain suluʼukat tü Wiwüliakat?

¹⁴ ¿Kasa maa waaʼinrajatka süpüla kojutüleeinjatüin wamüin tü shiimain suluʼukat tü Wiwüliakat? Oʼunüinjana waya waneepia sünain tü outkajawaakat süka nikirajüin waya Jeʼwaa sükajee. Tü wanee nikirajakalü akajee waya Jeʼwaa sünain tü Wiwüliakat shia tü rewiisütakat Aapiria Wayuu, waaʼinrüin tia semaanawai. Süpüla  anainjatüin maʼin wakuwaʼipa sünainjee tia outkajawaakat, acheküsü wekirajaainjatüin sünain tü rewiisütakat wepialuʼujee. Jamüshiijaʼa waya, eeshii süpüla waashajeʼerüin süpüshuaʼa tü wetsiikulo ojuʼitakat suluʼu tü ekirajaayakat. Maaʼulu yaa, wainma wawalayuu kamaʼanaka tü rewiisütakat suluʼu naserulaatse jee shiale suluʼu tableta. Eesü tü rewiisütakat suluʼu wainma anüikii suluʼu jw.org jee suluʼu JW Library. Eesü waneeirua rewiisüta adescargaajuushi mapüleeka aluʼu achajawaa tü pütchi suluʼujeejatkat tü Wiwüliakat. Jaʼitairü jamüin sukuwaʼipa watuma süpüla wekirajaain sünain tü rewiisütakat, ayatüinjatü waashajeʼerüin tü wetsiikulokalüirua sümaa wasakireʼerüin waaʼin sünain. Waaʼinrüle tia, kojutüleejeeria wamüin tü shiimain suluʼukat tü Wiwüliakat (paashajeʼera Salmo 1:2).

15, 16. (1) ¿Kasa nuluwataaka anain Jesuu na nikirajüinkana suluʼu Juan 13:34, 35? (2) ¿Jamüshii süpüla alinjanain na wawalayuukana wapüla aire Maleiwa wapüla otta kojutüle tü Wiwüliakat wamüin?

¹⁵ Soʼu tü ai nütaʼünakalü oʼu Jesuu natuma na nüʼünüükana, müshi nia namüin na nikirajüinkana: «Tü taluwataainjatkat anain jia, kasa jeket. Taluwataain jia jooluʼu sünain aijiraainjanain jia jüpüla waneʼewaire jukua maa aka alin jia tapüla. Müleka shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia» (Juan 13:34, 35).

¹⁶ Naalin na wawalayuukana wapüla sünainpünaasü tü naaliinkat Jeʼwaa wapüla. Jamüshijaʼa maalinre Maleiwa wapüla, nnojoleena alin na wawalayuukana wapülaya. Akaʼaya neʼe maalinre naya wapüla, maalinjeechi Maleiwa wapülaya. Müshi Juan: «Nnojoliireje alin nüpüla [wanee anoujashi] na nuwalayuukana nümaakana, nialeekaja aijeematüin Maleiwa nüpüla, nnojoishija niʼrüin» (1 Juan 4:20). Naalin Jeʼwaa wapüla otta naalin na wawalayuukana, sünainpünaasü sujutü tü Wiwüliakat wamüin. ¿Suluʼu jamüin? Kojutüle wamüin sünüiki tü Wiwüliakat, oonoojeena waya sümüin tü sümakat süchiki alinjachin Maleiwa wapüla otta na wawalayuukana (1 Ped. 1:22; 1 Juan 4:21).

17. ¿Kasa weeʼiyataka akajee alin wapüla na wawalayuukana?

¹⁷ (Paashajeʼera 1 Tesalónica 4:9, 10). ¿Kasa  eeka süpüla waaʼinrüin napüleerua na wawalayuukana süka alin naya wapüla? Eeshi süpüla wakaaliinjain wanee wawala laülaa eekai kapüleein nümüin oʼunaa sünain tü outkajawaakat. Jee eesü süpüla wakaaliinjain wanee wawala oukta aʼwayuuset eeka choʼujaain amüin sukumajünüin wanee kasa chaa shipialuʼu (Sant. 1:27). Eeshii süpüla watütüleʼerüin naaʼin sümaa wamülialüin naaʼin na wawalayuu mojukana aaʼin otta na alatakana amüin wanee kasa (Prov. 12:25; Col. 4:11). Sükajee wanüiki jee tü kasa waaʼinrakat, weeʼiyatüin sünain alin wapüla na wawalayuukana (Gal. 6:10).

18. ¿Kaseerü wanoukteʼeraka atuma wanee mojujirawaa namaa na wawalayuukana?

¹⁸ Süküjatüjülia tü Wiwüliakat eeinjatüin wainma wayuu maaʼulu eekai kapülain naaʼin nakuwaʼipa neʼe namüiwaʼa jee eekai kachiiruain naaʼin washirüü (2 Tim. 3:1, 2). Müsüjeseʼe wachajaainjatüin sukuwaʼipa wayakana anoujashiikana süpüla kooʼomüinjatüin tü naalinkat Jeʼwaa wapüla, kojutüleein tü Wiwüliakat wamüin otta aijiraain waya namaa na wawalayuukana. Süka waleʼeruʼuin tü kaainjalaakat, eeshii mojujiraajeenale waya namaa na wawalayuukana saaʼu wanee kasa. Wanoukteʼeramaateetpajaʼa wanee mojujirawaa süka aijiraain waya (Éf. 4:32; Col. 3:14). Nnojo wooʼulaain süshakajüin tü naalinkat Jeʼwaa wapüla otta naalin na wawalayuukana, ayataʼaya alin naya wapüla. Jee ayataʼaya kojutüin wamüin tü Wiwüliakat.