Nakaaliinjia nachonnii na antakana suluʼujee wanee mma naatajatü
«Talataleesia maʼi taaʼin taapapa nachiki na tachooinkana, na takaaliijalakana sünain tü nanoulakat, sünain noonooin waneepia sümaa tü shiimüinkat ekirajünakat anain naya» (3 JUAN 4).
JAYEECHI: 88, 41
1, 2. (1) ¿Kasa alataka namüin noʼutku nachonnii na wawalayuu suluʼujeejanakana wanee mma naatajatü? (2) ¿Jarat tü asakiraairua wekirajaainjatkalü anain?
ANUU nünüiki wanee wawala Joshua nünülia: «Suluʼujeejachi wanee mma naatajatü chi tashikai sümaa tü teikat. Tepichiiwaʼaya taya, yootopuʼushi taya namaa süka tü anüikii naashajaakalü aka jee müsia yootopuʼushi taya namaa na wawalayuukana süka tia anüikiikat. Shiasaʼa tekerotapa suluʼu koleejia, shiaitpa kamalainka tamüin aashawaa süka nanüiki na wayuu wantakana aʼakamüin. Maʼaka jeʼra juya süchikijee tia, nnojotsü tayaawatüin saaʼu tü ekirajünakalü anain sünain tü outkajawaakat jee tayouktüin müinjatüin takuwaʼipa maʼaka naaʼin tashi sümaa tei». Watta naalii na makana akuwaʼipa maʼaka naaʼin Joshua.
2 Maaʼulu yaa, alatüshii suulia 240 miyoone wayuu kepiakana suluʼu wanee mma naatajatü. Kepiale pia namaa na püchonniikana suluʼu wanee mma naatajatü, ¿kasa paaʼinrüinjatka süpüla noonooin waneepia na püchonniikana sümaa «tü shiimüinkat ekirajünakat anain naya»? (3 Juan 4). ¿Kasa eeka süpüla naaʼinrüin na wawalayuukana süpüla nakaaliinjain pia?
ANA JUKUWAʼIPA NAPÜLEERUA NA JÜCHONNIIKANA
3, 4. (1) ¿Kasa naaʼinrajatka na wayuu kachonshiikana süpüla anainjatüin nakuwaʼipa napüleerua nachonnii? (2) ¿Kasa wayuu nnojoluinjatka jülüjain naaʼin na wayuu kachonshiikana?
3 Jiakana kachonshiikana, müleka keeʼireere jaaʼin aleewain na jüchonniikana nümaa Jeʼwaa otta katüin noʼu süpüla kaʼikat süpüshuaʼa, choʼujaashaatasü anainjatüin jukuwaʼipa napüleerua. Jamüsüjaʼa neʼrüle na jüchonniikana sünain shiain palajanain jutuma tü Nuluwataayakat Maleiwa, neʼitaajeerü naaʼin sünain naapeerüin Jeʼwaa namüin tü choʼujaakat namüin süpüla waneʼewai kaʼi (Mat. 6:33, 34, TNM). Shia anaka aluʼu palajanale jutuma tü jiʼyataainkat nümüin Jeʼwaa suulialeʼeya kachiiruain jaaʼin kamaʼanaa wainma korolo. Talata jaaʼin sümaa tü kasa eekat jümaʼana jee jalia jia suulia kojuyaalain nneerü. Anasü jüchajaale sukuwaʼipa süpüla anainjatüin jukuwaʼipa noʼuluʼu Jeʼwaa suulialeʼeya kachiiruain jaaʼin washirüü otta «aʼwaajünaa sütüma wayuu» (paashajeʼera Marcos 10:21, 22; Juan 12:43).
4 Jükatala kaʼi waneepia süpüla namaainjanain jia na jüchonniikana jaʼitainna kupaain maʼin jia. Jüküja namüin talatüin jaaʼin namaa sutuma niain palajanain Jeʼwaa natuma sünain nakuwaʼipa. Nnojo kachiiruain jaaʼin eeinjatüin wainma nneerü jümaʼana otta namaʼana na jüchonniikana shiiʼiree neʼe kapülain jia saaʼin wayuu. Nnojoishii nayainjanain aʼyataain na jüchonniikana süpüla anainjanain jia natuma. Soto jaaʼin jiainjanain anaajaain nneerü napüla, nnojoishii nayainjanain anaajaain jüpüla jiakana (2 Cor. 12:14, TNM).
JIKIRAJA NAYA SÜKA TÜ ANÜIKII NATÜJAKALÜ APÜLEERUA
5. ¿Jamüshii nekirajawalinjanaka nachonnii nüchiki Jeʼwaa na wawalayuu kachonshiikana?
5 Ekeraajüsü tü sümatüjütkalia tü Wiwüliakat sünain shikerotüinjatüin wayuu saʼakajee tü anüikiikat süpüshuaʼa suluʼumüin nupueulose Jeʼwaa (Zac. 8:23). Jiakana kachonshiikana, nnojorüle nayaawatüin aaʼu na jüchonniikana tü pütchi jaashajaakalü aka, kapüleejeerü jümüin jikirajüin naya sünain tü shiimainkat. Naʼakajee napüshuaʼa na wayuu jikirajakana sünain tü Wiwüliakat, naya jülüjüinjanakana maʼin jaaʼin na jüchonniikana. Jee müsia, kateerü noʼu nayakana süpüla kaʼikat süpüshuaʼa neʼraajüle Jeʼwaa (Juan 17:3, TNM). Müshiijeseʼe jikirajawalinjanain naya waneepia sünain tü nikirajakalü anain waya Jeʼwaa (paashajeʼera Deuteronomio 6:6, 7).
Naʼakajee napüshuaʼa na wayuu jikirajakana sünain tü Wiwüliakat, naya jülüjüinjanakana maʼin jaaʼin na jüchonniikana
6. ¿Jamüsü anaka natüjüle na tepichikana süpüleerua nünüiki nashi sümaa nei? (Piirakaa sümüin tü ayaakuaa suluʼukat süpana 9).
6 Na jüchonniikana, eeshii natüjüle mapa nanüiki na wayuu kepiakana suluʼu tü mma jüntakalü aluʼumüin. Eeshiijaʼa natüjüle tia koleejialuʼu jee sutuma namaain naya na aashajaakana süka tia anüikiikat. Atüjeena naya süpüleerua jünüiki jiakana müleka yootowaire jia namaa waneepia süka tü pütchi jaashajaakalü aka. Natüjüle süpüleerua jünüiki jiakana, mapüleejeerü namüin yootoo jümaa otta naküjeerü jümüin tü suluʼukat naaʼin. Wanee kasa anaka maʼin sutuma natüjüin süpüleerua kojuyasü anüikii shia kekiijeenain maʼin naya süpüla aaʼinraa wanee kasa otta natüjeerü apüleerua tü jülüjakat saaʼin wayuu. Akaʼaya naya, eeshii süpüla naküjüin pütchi namüin na aashajaakana süka tü anüiki natüjüitpakalü apüleerua. «Anashaatasü maʼin sutuma naʼakain taya wawalayuu aashajaakana süka anüikii naatajatü. Kamalainsü maʼin tamüin akaaliinjaa eere choʼujaain wawalayuu», müsü sünüiki Carolina, suluʼujeejachi
wanee mma naatajatü chi süshikai sümaa tü shiikat.7. ¿Kasa anaka süpüla naaʼinrüin na kachonshiikana naatale tü pütchi naashajaakalü aka nachonnii?
7 Nachonnii na wayuu suluʼujeejanakana wanee mma naatajatü, nashatüin nakuwaʼipa otta nanüiki na wayuu kepiakana suluʼu tü mma nantakalü aluʼumüin. Shiasaʼa sutuma tia, nnojoliinnapa naya yooteein süka nünüiki nashi sümaa sünüiki nei otta motusü naaʼin mapa. Müle nakuwaʼipa na jüchonniikana, anashii jikirajaale sünain tü pütchi naashajaakalü aka, jaʼitairü nnojoluin jütüjüin süpüshuaʼa. Mapüleejeeria jümüin jükaaliinjain jüchonnii süpüla nanoujainjanain müleka jütüjaale saaʼu kasain naashajaain achiki, kasain kamalain namüin süpüla nashaittüin, nanajüin otta naapajüin jee jamüin nakuwaʼipa sünain koleejia. Anashii jüsakirüle na naprofesootsekana nachiki. Shiimain kapüleein ekirajawaa sünain wanee anüiki naatajatü otta eeshi kakaliale wayuu süpüla nütüjüin, eʼreenapejeʼe jia kasa anasü jikirajaale maʼin sünain otta nnojorüle yaletüin jaaʼin. ¿Kaseerü jaaʼinraka moʼulaa sümüle nikii wanee jüchon? ¿Aashin jüchajaweerüin sukuwaʼipa süpüla yootuin jia nümaa chi jüchonkai? Müsia neʼe tü jaaʼinrajatkat naashajaale na jüchonniikana süka wanee anüiki naatajatü, ¿aashimüin? *
8. Mayaapejeʼe kapüleein atüjaa wanee anüikii naatajatü, ¿kasa naaʼinrüinjatka na wayuu kachonshiikana süpüla nakaaliinjain nachonnii?
8 Kapüleesü namüin noʼutku na wayuu oʼunakana suluʼumüin wanee mma naatajatü, naashajaain süka tü pütchi naashajaakalü aka na nachonniikana. Sutuma tia, kapüleesü namüin nekirajüin naya sünain tü Nünüikikat Maleiwa (2 Tim. 3:15). ¿Alatüsü jümüin tia? Eepejeʼe süpüla jükaaliinjain na jüchonniikana süpüla neʼraajüinjachin Jeʼwaa sümaa alinjachin nia napüla. Anuu nünüiki Shan, wanee laülaashi suluʼu tü outkajaaleekat: «Shipijüin waya maama sümüiwaʼa, nnojotsü sütüjain maʼin tü pütchi waashajaakalü aka, müshia tayakai sümaa tü tawalayuukalüirua, nnojotsü watüjüin maʼin sünüiki maama. Weʼrawalin maama sünain ekirajawaa, oʼuraajaa otta suʼunirüin sukuwaʼipa tü aʼwaajaakat Maleiwa wamaa. Suluʼujee tia, weʼitaakalaka suluʼu waaʼin choʼujaashaatain weʼraajüinjachin Jeʼwaa».
9. ¿Kasa naaʼinrajatka na kachonshiikana süpüla nekirajünüin nachonnii suluʼu piamasü anüiki?
9 Eesüjaʼa choʼujaale nekirajünüin na tepichikana suluʼu piamasü anüikii, süka jamüin, naatain tü pütchi naashajaakalü aka koleejialuʼu suulia tü naashajaakalü aka nepialuʼu. Müshiijeseʼe eein wawalayuu ekirajaka nachonnii suluʼu piamasü anüikii, naaʼinrüin tia sükajee karalouktairua, pütchi akürawaajuushi jee videoirua. Na wawalayuu oʼunakana namaa nachonnii suluʼu wanee mma naatajatü, nekirajüinjana maʼin na nachonniikana sünain aleewaa nümaa Jeʼwaa.
¿JARAT TÜ OUTKAJAALEE JUʼUNAJATKALÜ ALUʼUMÜIN?
10. (1) ¿Jaralinjachi aneekaka jalainjatüin suutkajaain nüpüshi wanee wawala? (2) ¿Kasa naaʼinrajatka wanee wayuu süpülapünaa nüneeküin tü anakat süpüla nüpüshi?
10 Na antakana suluʼujee wanee mma naatajatü, outkajaainjana namaa na wawalayuu nantakana aʼakamüin jaʼitairü naatain nanüiki noulia. Naaʼinrüinjatü tia, wattale naya noulia na wawalayuu wanaawakana anüikii namaa (Sal. 146:9). Eere wanee outkajaalee pejeka napüleerua eere saashajaanüin aka tü nanüikikat, acheküshi nüneeküin chi toolokoi jaralüin anain napüla na nüpüshikana. Süpülapünaa süpüshuaʼa tia, jülüjainjatü naaʼin palajana tü naaʼinrajatkat sümaa nuchuntüin kaaliinwaa nümüin Jeʼwaa. Akaʼaya nia, yootuinjachi sümaa nuʼwayuuse jee namaa nüchonnii (1 Cor. 11:3). ¿Kasa jülüjainjatka naaʼin süpülapünaa nüneeküin tü naaʼinrajatkat? ¿Jarat tü pütchi suluʼujeejatkat tü Wiwüliakat akaaliinjeechika nia?
11, 12. (1) ¿Jamüsü choʼujaaka nayaawatüinjatüin saaʼu na tepichikana tü anüikii ekirajünakalü aka sünain tü outkajawaakat? (2) ¿Jamüshii nnojoliika naashajaweein na tepichikana süka nünüiki nashi jee nei?
1 Corinto 14:9, 11). Akaʼaya na tepichikana, eeshii nnojorüle naküjüin tü suluʼukat naaʼin sükajee tü nanüiki joʼuujiraakalü amaa naya. Eeshii tepichi eekai natüjüin asouktaa shiʼipajee tü asakinnakalü anain sünain tü outkajawaakat suluʼu nünüiki nashi jee nei, eeshii eekai natüjüin eeʼiyataa sukuwaʼipa aküjaa pütchi otta ekirajaa sünain tü outkajawaakat, nnojotpejeʼe shiawalain naashajaain aka tia pütchikat naküjüinjanapa tü jülüjakat naaʼin.
11 Jülüjainjatü naaʼin na wayuu kachonshiikana tü anakat namüin nachonnii. Nnojoleena atüjain neʼe na tepichikana sünainjee tü ekirajünakalü anain motsomüin sünain tü outkajawaakat, choʼujaasü nekirajünüin sooʼomüin süpüla nayaawatüin saaʼu tü shiimainkat. Aluʼujasaʼa noʼunüle sünain wanee outkajawaa aainjünaka suluʼu tü anüikii naashajaakalü aka, atüjeena naya sutuma naapajüin neʼe tü pütchikat. Eesü sainküle naaʼin na kachonshiikana sutuma natüjaleein maʼin nachonnii nüchiki Jeʼwaa suluʼu tia anüikiikat. Kapüleejeerüinjaʼa namüin natüjüin suluʼu wanee anüikii naatajatü (paashajeʼera12 Tü nukuwaʼipakat wanee jintüi jee tü jülüjakat naaʼin, nnojotsü akumajaain neʼe sutuma tü anüikii naashajaakalü aka, sünainpünaasü shiayaa tü niʼrakat sünain nukuwaʼipa chi nüshikai, tü niikat jee tü nanoujakalü anain. Shiaʼaya sümaka Esther tia, tü nuwalakat Joshua. Nimiyoʼulaapa Joshua, mamalainsat nümüin nukuwaʼipa chi nüshikai jee tü niikat. Nnojorüle wanaawain naaʼin na tepichikana sümaa nakuwaʼipa nashi jee nei, eeshii süpüla nnojoluin naashajaweein süka nanüiki otta nnojoluin nanoujeein. ¿Kasaka naaʼinrüinjatüin na kachonshiikana süpüla nakaaliinjain nachonnii?
13, 14. (1) ¿Jamüshii nalataaka waneeinnua wawalayuu suluʼumüin wanee outkajaalee eere saashajaanüin süka tü anüikii natüjakat na nachonniikana? (2) ¿Kasa naaʼinrajatka na kachonshiikana süpüla icheinjatüin nanoula?
13 Shiainjatü kapülaleeka naaʼin na wawalayuu kachonshiikana «tü jalouikat» namüin na nachonniikana suulialeʼeya jülüjain naaʼin nakuwaʼipa neʼe namüiwaʼa (1 Cor. 10:24). Anuu nünüiki Samuel, chi nüshikai Joshua otta Esther: «Tayaawata aaʼu sümaa taʼwayuuse jaralin tü anüikii atanatka naaʼin na wachonniikana süpüla nekirajaain sünain tü shiimainkat. Woʼuraajaka nümüin Jeʼwaa süpüla wachuntüin kekiiwaa nümüin. Nnojotpejeʼe shiain naapüin Jeʼwaa wamüin tü wachuntakat. Weʼrapa nnojoluin natüjain maʼin na wachonniikana sünainjee tü outkajawaa aainjünakat suluʼu wanüiki, alataashii waya suluʼumüin wanee outkajaalee eere saashajaanüin süka tü anüikii natüjakat. Oʼunawaishii waya namaa sünain tü outkajawaakat jee ojuʼitawaishii waya namaa sünain aküjaa pütchi. Wounejaʼawalin na wawalayuukana sünain ekawaa wepialuʼu otta oʼunawaishii waya sünain awaraijawaa wünaʼapü. Sutuma tia, neʼraajüin maʼin na wachonniikana tü wawalayuukalüirua otta aleewashii naya nümaa Jeʼwaa sümaa müin nia maʼaka naaʼin Nashi namüin, nnojoishi naʼwaajaʼalüin neʼe. Anaʼleesia tia wamüin suulialeʼeya natüjüin süpüleerua tü wanüikikat».
14 «Süpüla icheinjatüin wanoula, oʼunapuʼushi taya sümaa tü taʼwayuusekat sünain tü outkajawaa aainjünakat suluʼu wanüiki. Wainma kasa waainjapuʼuka otta mapüsashi waya sünainjee tia. Nükaaliinjapejeʼe waya Jeʼwaa, müsüjeseʼe waapüin tü analuʼutkat nümüin. Maaʼulu yaa, na apünüinshiikana wachonnii, aʼyataashii waneepia nümüin Jeʼwaa», müshi Samuel.
TÜ NAAʼINRAJATKAT NA JIMAʼALIIKANA JEE NA MAJAYÜNNÜÜKANA
15. ¿Jamüsü sütüjaaka aaʼu Kristina anain maʼin sümüin suluʼule shia wanee outkajaalee eere saashajaanüin aka tü anüikii sütüjakat?
15 Miyoʼupa na tepichikana, eeshii süpüla nayaawatüin saaʼu shiain anain suluʼule naya wanee outkajaalee eere saashajaanüin tü anüikii natüjakalü apüleerua. Müle shia, nnojoishii «nayouktüin waya na wachonniikana» müinjanain na wayuu kachonshiikana. Anuu sünüiki wanee wawala Kristina sünülia: Aluw. 2:11, 41). Wanaa sümaa 18 suuyase Kristina, aashajaasü shia nümaa chi süshikai jee tü shiikat otta sülataaka suluʼumüin wanee outkajaalee eere saashajaanüin süka tü anüikii sütüjakalü apüleerua. Anuu sünüiki: «Wainma kasa taaʼinraka sünain aʼyatawaa nümüin Jeʼwaa sutuma tekirajaain nüchiki suluʼu tü anüikii taashajaakalü aka koleejialuʼu». Pürekutsootsü Kristina mapa otta talatüsü maʼin shia.
«Eesia tayaawatüin mojukuʼu müsü tü anüikii naashajaakalü aka chi tashikai sümaa tü teikat, kapüleepejeʼe tamüin ayaawataa saaʼu tü münakat sünain tü outkajawaakat. Wanaa sümaa 12 touyase, oʼunüsü taya sünain wanee outkajawaa miyoʼu aainjünaka suluʼu tü anüikii taashajaakalü aka koleejialuʼu. Aluʼuinjaʼa jooluʼu, tayaawatüitpa aaʼu tü shiimainkat. Wanaa sümaa toʼttüin sünain oʼuraajaa süka tü anüikii taashajaakalü aka koleejialuʼu, tayaawata aaʼu taashajaain nümaa Jeʼwaa suluʼujee taaʼin» (16. ¿Jamüsü talataka Nadia sutuma ayatüin shia suutkajaain namaa na wawalayuu aashajaakana suluʼu nünüiki süshi sümaa shii?
16 Jiakana jimaʼaliikana otta majayünnüükana, ¿shia keeʼireeka jaaʼin suluʼuinjanain jia wanee outkajaalee eere saashajaanüin wanee anüikii naata suulia tü naashajaakalü aka jüshi sümaa jii? ¿Jamüsü keeʼireeka jaaʼin tia? ¿Shiache sutuma kooʼomüinweein junoula nünain Jeʼwaa? (Sant. 4:8). ¿Shiache keeʼireeka jaaʼin nnojoluin nütüjaain aaʼu chi jüshikai sümaa tü jiikat süpüshuaʼa tü kasa jaaʼinrakat? ¿Shiataapa sutuma nnojoluin jükaaliinjeein suluʼu tü outkajaalee kaluʼukat jia maaʼulu? Anuu sünüiki Nadia, wanee wawala aʼyataaka suluʼu Weteet: «Wanaa sümaa jimaʼalin chi tawalakai otta majayülüin taya sümaa tü tawalayuukalüirua, alataweeshii waya naʼakamüin na wawalayuu aashajaakana süka tü anüikii naashajaakalü aka na wayuu suluʼujeejanakana tü mma wakolojookalü aluʼumüin». Nütüjaapejeʼe saaʼu chi nashikai sümaa tü neikat nnojoleerüin anain nakuwaʼipa nümaa Jeʼwaa naaʼinrüle tia. Müsü Nadia: «Waapüin maʼin analuʼut namüin saaʼu nachajaain sukuwaʼipa süpüla watüjüin tü nanüikikat otta ayatüin woutkajaain namaa na wawalayuu aashajaakana suluʼu tü nanüikikat. Anasü maʼin wakuwaʼipa sutuma tia otta eesü wayuu wakaaliinjaka sünain eʼraajaa Jeʼwaa».
TÜ EEKAT SÜPÜLA NAAʼINRÜIN NA WANEE WAWALAYUUKANA
17. (1) ¿Jaralii na nuluwataakana Jeʼwaa sünain ekirajaa na tepichikana? (2) ¿Kasa naaʼinrajatka na kachonshiikana kapüleere namüin nekirajüin nachonnii sünain tü shiimainkat?
17 Nuluwataain Jeʼwaa na wayuu kachonshiikana süpüla nayainjanain ekirajüin nachonnii sünain tü shiimainkat. Nnojoishii nayain nuluwataain Jeʼwaa sünain aaʼinraa tia chi natuushikai jee tü noushukot jee shiale wanee wayuu naatajatü (paashajeʼera Proverbios 1:8; 31:10, 27, 28). Eepejeʼe choʼujaale kaaliinwaa namüin na kachonshiikana süka kapüleein namüin nanüiki na wayuu nantakana oumainpaʼamüin. Akaaliinjüneeshii süpüla natanatüin naaʼin na nachonniikana. Nachuntüle kaaliinwaa naya wawalayuukana, nnojotsü shiain sutuma nnojoluin nekirajeein nachonnii. Achuntüshii naya kaaliinwaa süpüla ayatüinjanain nekirajüin naya sünain tü Nünüikikat Jeʼwaa sümaa nachiaain naya süpüla noonooinjanain sümaa (Éf. 6:4). Eeshii süpüla nasakirüin na laülaashiikana suluʼu tü outkajaaleekat süchiki tü anakat süpüla naaʼinrüin naʼwaajapa Maleiwa sümaa napüshi jee eeshii süpüla nasakirüin naya sünain jaralin na wawalayuu anakana süpüla naʼaleewajaain amaa nachonnii.
Anasü namüin na tepichikana namaain naya na wawalayuukana jee müsia nümüin chi nashikai jee tü neikat. (Paashajeʼera tü pütchikat 18 otta 19).
18, 19. (1) ¿Kasa eeka süpüla naaʼinrüin waneeinnua wawalayuu süpüla nakaaliinjain na jimaʼaliikana jee na majayünnüükana? (2) ¿Kasa ayatüinjatka naaʼinrüin na wayuu kachonshiikana?
18 Wanee kasa eeka süpüla naaʼinrüin na kachonshiikana süpüla nakaaliinjain nachonnii shia nounejaʼawaire nepialuʼumüin waneeinnua wawalayuu soʼu tü ai naʼwaajakalü oʼu Maleiwa sümaa napüshi. Watta naalii jimaʼalii otta majayünnüü atüjaka nanainjee na wawalayuu nojuʼitakana amaa sünain aküjaa pütchi jee na naaʼinrakana amaa wanee kasa (Prov. 27:17). Anuu nünüiki Shan: «Sotushii taaʼin na wawalayuu akaaliinjakana taya. Nakaaliinjain taya sünain yapain tatuma tü pütchi tekirajakalü anain sünain tü outkajawaakat, wainma kasa tatüjaka. Kamalainpuʼusü tamüin wanaa sümaa woutkalaain süpüla ashaittaa jee süpüla waaʼinrüin wanee kasa».
19 Na wawalayuu akaaliinjakana na kachonshiikana, sotuinjatü naaʼin sünain natütüleʼerüinjatüin naaʼin na tepichikana süpüla kojutüin nashi jee nei namüin. Müsüjeseʼe anainjatüin nanüiki nüchiki nashi jee nei na tepichikana otta kojutüinjatü namüin nayain niʼitaain Jeʼwaa süpüla nekirajüin nachonnii. Akaʼaya naya wawalayuukana, nnojotsü naaʼinrüinjatüin wanee kasa eeka süpüla mojushiin namüin na wawalayuukana jee namüin na nnojoliikana anoujain (1 Ped. 2:12). Jaʼitainna achuntüin kaaliinwaa na kachonshiikana, sotuinjatü naaʼin nayain eʼitaanüin ajapuluʼu nekirajüinjanain nachonnii sünain tü shiimainkat. Jülüjeesü naaʼin jamüin nakaaliinjia nachonnii natuma na wawalayuu akaaliinjakana naya.
20. ¿Kasa naaʼinrajatka na kachonshiikana süpüla naʼyataainjanain nachonnii nümüin Jeʼwaa?
20 Jiakana kachonshiikana, juchunta kaaliinwaa nümüin Jeʼwaa otta ayata jia masütaajüin süchiirua akaaliinjaa na jüchonniikana (paashajeʼera 2 Crónicas 15:7). Kapüla jaaʼin tü jalouijeetkat namüin na jüchonniikana suulia shiain jülüjain neʼe jaaʼin jukuwaʼipa jümüiwaʼa. Jüchajaa sukuwaʼipa süpüla sütanalüin naaʼin na jüchonniikana tü Nünüikikat Maleiwa. Jiʼitaa jaaʼin sünain naʼyataajeenain nümüin Jeʼwaa. Meerü jaaʼin maʼaka naaʼin chi aluwataaushikai Juan jiʼrapa na jüchonniikana sünain aaʼinraa tü sümakat tü Wiwüliakat jee nashatapa jukuwaʼipa. Anuu nünüiki Juan: «Talataleesia maʼi taaʼin taapapa nachiki na tachooinkana, na takaaliijalakana sünain tü nanoulakat, sünain noonooin waneepia sümaa tü shiimüinkat ekirajünakat anain naya» (3 Juan 4).
^ püt. 7 Paashajeʼera tü pütchikat «Usted puede aprender otro idioma», suluʼusü ¡Despertad! ojuʼitaka maatsoʼu 2007, süpana 10-12.