Talatüshii waya sümaa nnojoluin wainmain kasa wamaʼana
KASAATSHI DANIEL SÜMAA MIRIAM settienpüroʼu soʼu 2000 otta anapuʼusü maʼin nakuwaʼipa chaa Barcelona (España). Anuu nünüiki Daniel: «Sutuma wainmain wakanain sünain waʼyataain, ekapuʼushii waya suluʼu restaurante eere kojutüin eküülü, oʼunajaapuʼushii waya suluʼupünaa mma wattapünaa otta ayaʼlajapuʼushii waya washeʼin kojutüsü. Jee ojuʼitawaishii waya sünain aküjaa pütchi». Eepejeʼe wanee kasa aʼwanajaaka atuma nakuwaʼipa.
Eesü wanee pütchi atanalaka naaʼin Daniel sünain wanee outkajawaa miyoʼu soʼu 2006. Müshi chi ekirajakai soʼu tia: «¿Wachajaainche maʼin sukuwaʼipa süpüla wakaaliinjain na wayuu sünainmüinkana tü ouktaakat? ¿Woʼunirüinche naya suluʼupünaa tü wopu sünainmüinkat tü kataakalü oʼu waneepia?» (Prov. 24:11). Sünain tia pütchikat, aküjünüsü sünain waküjüinjanain pütchi sümüin wayuu süka kateerüin noʼu waneepia naapaale sümaa tia pütchikat (Aluw. 20:26, 27). Anuu nünüiki Daniel: «Müshi tayakai aaʼin nüküjüin amüin Jeʼwaa tia». Wanee kasa aküjünaka shia talataleein waaʼin sutuma waʼyataain nümüin Jeʼwaa. Nütüjaa aaʼu Daniel shiimain tia süka niʼrüin talatüin saaʼin Miriam sutuma pürekutsoolüin shia.
Sutuma ponoshootoin naaʼin Daniel tia pütchikat, nunoukteʼerüin tü nukuwaʼipakat. Nnojoishi aʼyataain wainma oora, pürekutsootshi nia otta jülüjasü naaʼin talateechin maʼin nia sümaa Miriam noʼunüle sünain akaaliinjaa eere choʼujaain aküjülii pütchi.
TALATÜSÜ WAAʼIN SÜCHIKIJEE TIA
Okolojooshi Daniel sümaa Miriam chaa Panamámüin soʼu tü kashikat maayoʼu 2007, napütüin tü naʼyataainkat. Neʼraajüin tia mmakat süka chajanain naya apasiajaain paala. Aküjüshii naya pütchi suluʼu wanee mma pasanainka sünain tü palaakat Caribe, shia tü kanüliakat Bocas del Toro. Na wayuu kepiakana chayaa naya na ngäber münakana. Daniel sümaa Miriam makatüinjana naya chayaa soʼu mekiisat kashi, kettaashaatasü tü nneerü nanaajaakat süpüla tia.
Suluʼupuʼushii naya anua otta wisiküleetoʼupuʼushii naya chaa eepünaale naküjüin pütchi. Sotusü naaʼin noʼunüinkain 30 kiloometüro saaʼu wisiküleeta otta katuʼushisü maʼin tü mmakat sümaa jaʼishaatain tü kaʼikat. Mapüsashaanashi Daniel soʼu tia, amatsüinjaasü naaʼin. Akalajasaʼa kamaneein na wayuu ngäber neʼraajakana. Kamaneereeshiʼiya naya namüin soʼujee nekirajaain sünain asakaa naya suluʼu nanüiki. Eemaatüshii 23 wayuu nekirajakana sünain tü Wiwüliakat.
¿Kasa naaʼinraka sajaʼlajaapa nanneetse? Müshi Daniel: «Aʼyalajüshii waya sutuma waleʼejaainjanain wachikuaʼa Españamüin. Mojusü waaʼin sutuma wooʼulaainjanain suulia ekirajaa na wayuu ekirajaakana wamaa sünain tü Wiwüliakat». Wanee kashi süchikijee tia, alatüsü wanee kasa anashaatasü namüin. Anuu sünüiki Miriam: «Aneekünüshii waya süpüla pürekutsooluin pesiaat. Talatüshii maʼin waya süka makatüinjanain waya».
TÜ TALATALEEKALÜ ATUMA NAAʼIN
Sutuma suʼwanajaain waneeirua kasa suluʼu nupueulose Jeʼwaa, nnojoliinnapa pürekutsooluin pesiaat Daniel sümaa Miriam soʼujee 2015. ¿Kasakaʼa naaʼinrüin? Neʼitaain naaʼin sünain tü sümakat Salmo 37:5: «Piʼitaa najapuluʼu Jeʼwaa tü alatakat pümüin otta piʼitaa paaʼin nünain süpüla nükaaliinjüin pia». Nünta anainrü Daniel sümaa Miriam wanee aʼyatawaa anaka nümüin süka ayatüin naya pürekutsooluin rekulaat. Chashii naya maaʼulu suluʼu tü mmakat Veraguas (Panamá).
Müshi Daniel: «Süpülapünaa wakolojooin Españajee, nnojotsü watüjaain aaʼu müleka kiʼreenale waya sümaa nnojoluin wainmain kasa wamaʼana. Maaʼulu yaa, nnojotsü wainmain kasa wamaʼana otta nnojotsü kasain choʼujaain wamüin». ¿Kasa talataka atuma naaʼin? Anuu nanüiki: «Talatüsü maʼin naaʼin wayuu sutuma nükaaliinjain na wayuu anamiakana sünain eʼraajaa Jeʼwaa».