1. ¿Jamüshii eeka wawalayuu nnojoliikana suchuntaain naaʼin ekirajawaa?

KAPÜLEESÜ maʼin namüin na wawalayuukana nantüin sünain tü choʼujaakat namüin. Eeshii na aʼyataakana waneepia shiyaaluʼu napüshi. Eeshii na alatirakana maʼaka jeʼra oora süpüla nantajanain naʼyataaleruʼumüin otta süpüla naleʼejüin nepialuʼumüin. Eeshii na jawatakana maʼin aʼyataain. Makalaka mapüsain maʼin naya jee suluʼujee tia nnojotsü suchuntaain naaʼin ekirajawaa sünain tü Wiwüliakat.

2. ¿Joujawaishi pia ekirajaain?

² Akatalüinjana waya kaʼi süpüla wekirajaain sünain tü Wiwüliakat otta tü karaloʼuta ayuʼnnakat sünainjee, nnojoliinjanapejeʼe waya ekirajaain süpaʼa mma. Müleka wekirajaale, aleeweena maʼin waya nümaa Jeʼwaa otta kateerü woʼu waneepia (1 Tim. 4:15, 16). Eeshii wawalayuu atamaʼawaikana wattachon maalü süpüla ekirajawaa nnojoliiwaʼaya shiyorolo wayuu jee süchikajanainna naya eemerawaa saʼwai. Otta eeshii na ekirajaʼawaikana aipaʼa jee nasakireʼerüin suluʼu naaʼin sümaa nnojoluin kasain ekeʼejüin naaʼin.

3, 4. (1) ¿Kasa naainjaka na Laülashii Jülüjakana Aaʼin na Aküjaliikana Pütchi süka tü karaloʼuta waashajeʼerakat? (2) ¿Kasapülajatü naainjaka tia?

³ Watüjaa aaʼu choʼujaain wakatalüin kaʼi süpüla ekirajawaa. ¿Kasache wekirajaainjatka anain? Eeshiijaʼa wamüle wattain saalii kasa waashajeʼerüinjatka otta nnojoleerüin apütaain kaʼi wapüla süpüla aashajeʼeraa. Eeshii na ountakana tia, eepejeʼe na isakana achiki shia. Natüjaa aaʼu tia na Laülaashii Jülüjakana Aaʼin na Aküjaliikana Pütchi, müsüjeseʼe nnojoluitpain wainmain natuma tü karaloʼuta ojuʼitawaikat otta tü eʼitaanakat suluʼu Internet.

⁴ Nnojoluitpa ojuʼitüin tü karaloʼutakat Anuario de los testigos de Jehová, süka süküjünawalin tü alatakat namüin na wawalayuukana suluʼupünaa jw.org^® otta ojuʼitüsü shia kashiwai suluʼu JW Broadcasting^®. Jee müsia, ojuʼitawaisü tü rewiisütakat Aapiria Wayuu süpülajatka wayuu süpüshuaʼa otta ¡Eeja Waaʼin! apünüintua neʼe süpüla juyakat. Tia, nnojotsü shiiʼireejatüin süpütaain kaʼi wapüla süpüla waaʼinrüin waneirua kasa, süpülajatü waaʼinmaain  maʼin «tü kasa alanaʼaleekat suluʼu anain» (Filip. 1:10, TNM). Wekirajaa sünain kasain alanaʼaleeinjatüin suluʼu anain wamüin otta kasain waaʼinrajatüin süpüla jaloulin wamüin tü wekirajaakalü anain suluʼujee tü Wiwüliakat.

5, 6. ¿Kasa wekirajaainjatka maʼin anain?

⁵ ¿Kasa tü alanaʼaleeinjatkat watuma? Shia wekirajaainjanain weinshi sünain tü Wiwüliakat. Maaʼulu yaa, nnojoluitpa wainmain tü wetsiikulo aashajeʼennakat semaanawai. Sükajee tia, eeshii süpüla wasakireʼerüin suluʼu waaʼin kasain watüjain sünainjee otta wekirajaain sooʼomüin süchiki tü pütchikat. Nnojotsü shiainjatüin neʼe waashajeʼerüin tü kapiitulo eʼitaanakat wapüleerua, antajatü tü pütchikat suluʼumüin waaʼin otta arütkaainjana waya nünainmüin Jeʼwaa sutuma (Sal. 19:14).

⁶ ¿Kasa amaa wekirajaainjatka anain? Wekirajaainjatü anain Aapiria Wayuu, tü karaloʼuta ekirajaanakalü anain namaa na wawalayuukana otta wekeraajüinjatü tü outkajawaa aainjünakat shiatapünaa semaanakat. Jee müsia waashajeʼerüinjatü süpüshuaʼa tü rewiisütakat Aapiria Wayuu otta ¡Eeja Waaʼin!

7. ¿Mojuinjatche waaʼin nnojorüle waashajeʼerüin süpüshuaʼa tü eʼitaanakat suluʼu jw.org otta tü eekat suluʼu JW Broadcasting?

⁷ Eepejeʼe süpüla pümüin: «¿Kasa taaʼinrajatka süpüla tountüin taashajeʼerüin süpüshuaʼa tü eekat suluʼu jw.org otta tü eekat suluʼu JW Broadcasting? Watta maʼin saalii tia». Jülüjataa paaʼin tüü: Jamüsüjaʼa sünain wanee ekawaa, wainma eküülü. Soʼuyaa sümüsü otta jemetüsü maʼin shia. Iseetpejeʼe nachiki na wayuukana neküin süpüshuaʼa tia eküütkat. Müsüjeseʼe shiain naneeküin tü nekajatkat neʼe. Müinjatia neʼe sukuwaʼipa watuma, shiainjatü waneekaka tü waashajeʼerüinjatkat jee tü wanajüinjatkat. Nnojotsü mojuinjatüin waaʼin sünainjee nnojoluin waashajeʼerüin süpüshuaʼa tü karaloʼutakat jee tü eʼitaanakat suluʼu Internet. Wekirajaa sünain kasain waaʼinrajatüin süpüla anainjatüin wekirajaaya otta tü waaʼinrajatkat süpüla jaloulin wamüin tü wekirajaakalü anain.

8. (1) ¿Kasa waaʼinrajatka süpüla wekeraajüin tü ekirajaanajatkat sünain Aapiria Wayuu? (2) ¿Kasa akaalinjeenaka waya süpüla waaʼinrüin tia?

⁸ Wekirajaale sünain wanee kasa, nnojotsü waashajeʼerüin neʼe tü pütchikat sooʼopünaa waaʼin sümaa wejeettüin tü susoutiakat. Jülüjainjatü maʼin waaʼin tü waashajeʼerakat süpüla watüjainjanain sünainjee. Wekirajaa sünain tü waaʼinrajatkat süpüla wekeraajüin tü ekirajaanajatkat sünain Aapiria Wayuu. Waashajeʼerüinjatü palajana süchiki tü wekirajaainjatkalü anain, tü eekat suʼttiajee tü ekirajaayakat. Süchikijee, shiainjatü waashajeʼeraka tü sünüliakat, tü sünüliacheinkat otta tü pütchi asakinnakalü anain sajaʼlajaayamüin tü ekirajaayakat. Keraapa tia, shiainjatü waashajeʼeraka süpüshuaʼa tü pütchikat sümaa nnojoluin washapajaain otta jülüjainjatü shia waaʼin. Shiainjatü jülüjaka waaʼin tü pütchi eekat suʼttiajee wanee pütchi. Tia shia tü apansaajakat maʼin kasain saashajaain achiki wanee pütchi. Sümaʼinruʼu waashajeʼerüin tü ekirajaayakat, jülüja waaʼin jamüin sünainpünaaka tü pütchikat tü sünüliakat otta tü sünüliacheinkat. Washaja tü pütchi nnojotkat watüjaain aaʼu jamaluʼuluin shia otta tü pütchi wekirajaweekalü anain.

9. (1) ¿Jamüsü waashajeʼerüinjatka tü wetsiikulokalüirua wekirajaapa sünain Aapiria Wayuu? (2) ¿Jamüinjatü sukuwaʼipa watuma? (3) ¿Kasa amaa waaʼinrajatka saashin Josué 1:8?

⁹ Wekirajaale sünain tü rewiisütakat Aapiria Wayuu, ekirajaashii waya sünain tü Wiwüliakat. Makalaka waashajeʼerüinjatüin tü wetsiikulo eʼitaanakat suluʼu, shialeekajaʼa maʼin tü aashajeʼennajatkat sünain tü outkajawaakat. Jülüjeesü maʼin waaʼin sünüiki tü wetsiikulokot süpüla wayaawatüin saaʼu jamüin sünainpünaaka shia tü pütchikat. Jee müsia, wasakireʼera suluʼu waaʼin  sünain tü wetsiikulokot otta jülüja waaʼin kasain waaʼinrajatüin süpüla woonooin sümaa sünüiki (paashajeʼera Josué 1:8).

10. Sünainjee tü sümakat Hebreokana 5:14, ¿jamüshii nekirajünüinjanaka na tepichikana soʼu tü ai naʼwaajakalü oʼu Maleiwa sümaa napüshi süpüla natüjainjanain ekirajawaa jee achajawaa wanee pütchi?

¹⁰ Waashajaa süchiki tü ai waʼwaajakalü oʼu Maleiwa sümaa wapüshi. Shia nachekaka na kachonshiikana anainjatüin naaʼin nachonnii sünain aʼwaajaa Maleiwa semaanawai. Yapainjatü natuma na kachonshiikana tü nekirajaainjatkalü anain, nnojotpejeʼe choʼujaain naaʼinrüin wanee drama jee waneirua kasa semaanawai, maʼaka saaʼin nanajüin tü ojuʼitawaikat kashiwai suluʼu JW Broadcasting jee shiale nakumajüin shiyaakua wanee kasa, maʼaka saaʼin shiyaakua tü anuwa nukumajakat Noé. Shiapejeʼe choʼujaain maʼin nekirajünüin na tepichikana natuma na kachonshiikana naya süpüla natüjainjanain ekirajawaa. Atüjainjana na tepichikana süpüleerua ekeraajaa tü ekirajaanajatkalü anain sünain tü outkajawaakat otta atüjainjana naya ekirajawaa süchiki tü asakinnakalü anain naya suluʼu nakoleejiase (paashajeʼera Hebreokana 5:14). Nekirajaale sünain wanee pütchi suluʼujeejatka tü Wiwüliakat chaa nepialuʼu, mapüleejeerü namüin jülüjain naaʼin tü ekirajünakat sünain tü outkajawaakat otta sünain wanee outkajawaa miyoʼu, nnojotka eʼitaanüin anain video. Jeʼrainjatüle sümaa tü wekirajaakalü anain nümaa wanee jintüi, oʼunusü süchiirua jeʼrain nuuyase, keiwaʼarale jee meiwaʼarale nia.

11. ¿Jamüshii natüjainjanaka ekirajawaa na wayuu wekirajakana sünain tü Wiwüliakat?

¹¹ Akaʼaya na wayuu wekirajakana sünain tü Wiwüliakat, atüjainjana ekirajawaa. Noʼttaiwaʼaya sünain ekirajawaa, talatüshii waya namaa süka nejeettüin susoutia tü pütchi nekirajaainjatkalü anain jee shiale tü ekirajaanajatkalü anain sünain tü outkajawaakat. Shiapejeʼe choʼujaain natüjainjanain ekirajawaa namüiwaʼa süpüla kooʼomüinjatüin tü natüjaakalü aaʼu. Sünainjee tia, nnojoleena nasakiramaatüin na waneinnua sünain kasain naaʼinrajatüin sülatüle wanee kasa namüin, nekirajaweerü anain tia suluʼu tü karaloʼuta ayuʼluushikat suluʼujee tü Wiwüliakat otta natüjaweerü aaʼu tü naaʼinrajatkat.

12. ¿Kasa eeka süpüla jülüjain waaʼin wekirajaapa?

¹² Nnojorüle kamalain wamüin ekirajawaa, nnojoleerü jamajatüin wamüin tü wekirajaakalü anain. Eepejeʼe kasa anasü weʼreetka sünainjee wekirajaain. Woʼttaiwaʼaya sünain ekirajawaa, nnojotsü choʼujaain kamaʼainjanain waya sünain, kooʼomüin kooʼomüin meerü watuma shiʼipaʼaya. Shia anaka aluʼu pansaale watuma kasain wekirajaain eeʼiree. Shia jülüjainjatka maʼin waaʼin aleewaleeinjanain waya nümaa Jeʼwaa. Eepejeʼe  süpüla jülüjain waaʼin tü wanüikinjatkat sümüin wanee wayuu asakiraka waya sünain wanee kasa jee shiale wachajaain wanee pütchi sünainpünaaka tü alatakat wamüin.

13. (1) ¿Kasa eeka süpüla paaʼinrüin püküjeere namüin na koleejiajiraakana pümaa kasain punoujain anain? (2) ¿Kasa paaʼinrajatka süpüla poonooin sümaa tü sümakat Colosas 4:6?

¹³ Jülüjataa paaʼin tü eekat süpüla paaʼinrüin jimaʼaire jee majayürüle pia. Eeshii nanoujayaa namüle na koleejiajiraakana pümaa sünain sukumajaain wanee kasa sümüiwaʼa. Pikirajeein na waneinnua sünain tü sümakat tü Wiwüliakat, isapejeʼe shia püchiki paaʼinruʼu. Müshijeseʼe pikirajaainjachin sünain tü Wiwüliakat. Piamasü tü kasa puunteekalü amüin sünainjee pikirajaain. Tü palajatkat shia püchecheraain süchiirua tü punoujakalü anain, niain Jeʼwaa kakumalain kasa süpüshuaʼa. Otta tü wanee shia püküjainjatüin jamüin sünüiki tü Wiwüliakat süchiki wanee kasa (Roma 1:20; 1 Ped. 3:15). Püsakirüinjatü paaʼin palajana jamüin nanoujaka na koleejiajiraakana pümaa sünain sukumajaain kasa sümüiwaʼa. Jee süchikijee tia, ekirajaainjachi pia sünain jamüin sünüiki tü Wiwüliakat süchiki tia. Piyaawateerü aaʼu nnojoluin kapüleein asoutaa saaʼu tü punoujakalü anain. Wainma wayuu anoujaka sünain sukumajaain kasa sümüiwaʼa süka naküjalain shia na wayuu kojutukana namüin. Pütüjaajeerü aaʼu jamüinjatüin pünüiki namüin na asakirakana pia sükajee pikirajaain sünain tü pütchikat (paashajeʼera Colosas 4:6).

14-16. (1) ¿Kasa waaʼinrajatka süpüla wekirajaain sünain wanee karaloʼuta suluʼujeejatka tü Wiwüliakat? (2) ¿Jamüsü wayaawateetka maʼin saaʼu tü nüshajalakat Amós sünainjee tü sümakat 2 Reyes otta 2 Crónicas? (Paashajeʼera tü pütchikat « Wekirajaa maʼin nachiki na wayuu saashajaakana achiki tü Wiwüliakat»).

¹⁴ Tü karaloʼuta nüshajakat Oseas sünainmüinreʼeya tü nüshajakat Malaquías, palitchon pütchi suluʼuka. Jülüjataa waaʼin wekirajaainjanain sünain tü outkajawaakat süchiki wanee karaloʼuta nashajakat naya wayuukana. Nnojorüle watüjaain saaʼu jamapuʼuin nukuwaʼipa chi ashajakai tü karaloʼutakat, shia anaka aluʼu wekirajaale sünain. ¿Jamüinjatü sukuwaʼipa watuma?

¹⁵ Anasü shiale wasakirüin anain waaʼin palajana kasain watüjaain aaʼu nüchiki chi ashajakai tü karaloʼutakat: jaralin nia, jalapuʼuin nia kepiain otta kasain niʼyataapuʼuin anain. Watüjaale saaʼu tia, wayaawateerü aaʼu jamüin makaʼa süshajia wanee pütchi nutuma jee jamüin naashajaaka süchiki wanee kasa. Waashajeʼerapa tü Wiwüliakat, jülüjataa waaʼin wanee pütchi wayaawataka akajee jamapuʼuin nukuwaʼipa chi ashajakai tü karaloʼutakat.

¹⁶ Süchikijee tia, wekirajaa sünain joujatüin ashajünüin tü karaloʼutakat. Watüjaajeerü aaʼu tia sükajee wanaʼlüin süpana tü Wiwüliakat eere sünülia süpüshuaʼa tü karaloʼuta suluʼukat, eesü tia suʼttiajee tü Wiwüliakat Traducción del Nuevo Mundo de las Santas Escrituras (con referencias). Otta eesü süpüla wanaʼlüin süpana tü Wiwüliakat eere nanülia na nünüikimaajanakana Maleiwa jee na aluwataashiikana saaʼu Israel, eesü tia sünain süpana apünüin suluʼu tü poyeetokot Guía para el estudio de la Palabra de Dios. Süka shiain wekirajaain anain wanee karaloʼuta nüshajalaka wanee nünüikimaajachi Maleiwa, anasü wekirajaale sünain jamapuʼuin sukuwaʼipa wayuu soʼu süshajünüin tia karaloʼutakat. Anasü wekirajaale sünain kasain nunoutajatüin akuwaʼipa chi nünüikimaajachikai Maleiwa otta jaraliin eejanain soʼu nükalia. Jamüsüjaʼa wayaawateere saaʼu jamapuʼuin sukuwaʼipa wayuu soʼu nükalia Amós, eesü süpüla waashajeʼerüin 2 Reyes otta 2 Crónicas eere saashajaanüin achiki Amós 1:1. Jee anasü waashajeʼerüle tü karaloʼuta nüshajakat Oseas süka eejachin nia soʼu nükalia Amós. Sükajee tia, wayaawateerü aaʼu jamapuʼuin sukuwaʼipa wayuu soʼu nükalia Amós (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Püküja jamüin kamalainjeetka wamüin aashajeʼeraa tü Wiwüliakat müleka jülüjale waaʼin tü kasa sünainpünaakat. Eesü süpüla püküjain süchiki tü sümakat tü pütchikat jee shiale wanee naata suulia.

¹⁷ Waashajeʼerapa tü Wiwüliakat, suchuntaainjatü waaʼin watüjeein sooʼomüin tü sümakat. Jülüjataa waaʼin waashajeʼerüin tü nüküjakat Zacarías süchiki outajachin chi Mesíaskai (Zac. 12:10). Waashajeʼerüin sünain tü wetsiikulokot 12, naʼyalajeenain na nüpüshikana Natán sünainjee outuin chi Mesíaskai. Nnojotsü walatirapünaainjatüin tia pütchikat, shia anaka aluʼu wasakireʼerüle waaʼin sünain tüü: «¿Kasaichi chi Mesíaskai nanain na nüpüshikana Natán? ¿Jalasüche eein pütchi sünainpünaaka tia?». Shiakalaka anain wekirajaale sünain tia. Eesü wanee pütchi pasanain sünain süpana tü Wiwüliakat eere süküjünüin süchiki 2 Samuel 5:14, sünain tia wetsiikulokot aküjünüsü nüchoin David chi kanüliakai Natán. Tü wane pütchikat shia Lucas 3:31, eere süküjünüin nuuʼuliwoʼuin Natán Jesuu saaʼujee sutuushin nia María (paashajeʼera Aapiria Wayuu akoosütoʼu 2017, süpana 32, pütchi 4). Anashaatasü maʼin tia. Watüjaa aaʼu nuuʼuliwoʼuin David Jesuu (Mat. 22:42). Alanaʼaleepejeʼe na nüchooinkana David suulia 20. Sutuma watüjaain saaʼu niain Natán kapüshin María, wayaawata aaʼu jamüin nüküjaka Zacarías naʼyalajüinjanain na nüpüshikana Natán saalinjee nuʼutunajachin aaʼin Jesuu.

¹⁸ Wekirajaa sünain wanee sukuwaʼipaya. Suluʼu Lucas kapiitulo waneesia, aküjünüsü süchiki nüntüin chi aapiee kanüliakai Gabriel sünainmüin María, anuu nünüiki sümüin: «Kojutshaateechi chi joʼuukai nütüma chi Maleiwa Miyoʼushikai maʼi sümaa: ‹pia Tachonka›, nümeechin nümüin. Aneekuushi chi joʼuukai nütüma Maleiwa süpüla nuluwataainjatüin tü wayuu judíokalüirua, tü nuuʼuliwoʼukalüirua Jacob, maa aka nuluwataapüʼüin paala sümaiwa chi putuushikai David. Müichia nnojolin ooʼulaain suulia aluwatawaa» (Luc. 1:32, 33). Eesüjaʼa shiale jülüjain waaʼin tü nümakat chi aapieekai  palajana, «pia Tachonka», nümünajachin amüin Jesuu nutuma Maleiwa. Nüküjapejeʼe chi aapieekai Gabriel nüneekünüinjachin Jesuu süpüla aluwatawaa. Eeshiijaʼa wamüle jülüjain saaʼin María nuluwataainjachin chi süchonkai. ¿Jülüjasüche saaʼin niainjachin aluwataain Jesuu nüchikumüin Herodes jee nüchikumüin wanee eekai nuluwataain? ¿Jülüjasüche saaʼin shiainjatüin aluwataain saaʼujee nuluwataainjachin chi süchonkai jee kepiainjanain na süpüshikana suluʼu nipia chi aluwataashikai? Nnojotsü süküjain tü Wiwüliakat süsakirüin María sünain tia. Otta nnojotsü suchuntuin suluwanaajiraainjatüin wanaa nümaa Jesuu maʼaka nachuntuin shia piamashii nikirajüin Jesuu (Mat. 20:20-23). Sünainjee tia pütchikat, wayaawata aaʼu nnojoluin yaletüin saaʼin María.

19, 20. Saashin Santiago 1:22-25 otta 4:8, ¿kasa waaʼinmaainjatka wekirajaapa sünain tü Wiwüliakat?

¹⁹ Soto waaʼin shiain waaʼinmaainjatüin warütkaain nünainmüin Jeʼwaa sünainjee wekirajaain sünain tü Wiwüliakat otta tü karaloʼuta ayuʼnnakat sünainjee. Otta müsia wayaawatüinjatü aaʼu jamüin wakuwaʼipa jee kapülainjatü waaʼin wanoutuin shia süpüla talatüin Jeʼwaa watuma (paashajeʼera Santiago 1:22-25; 4:8). Sünainjee tia, wanaa sümaa wekirajaainjanain sünain tü Wiwüliakat, wachuntajatü nümüin Jeʼwaa naapüinjachin chi naaʼinkai wamüin. Wachunta nümüin nükaalinjai waya süpüla watüjain sünainjee tü wekirajaakalü anain otta wayaawataiwa saaʼu tü wanoutajatkalü akuwaʼipa.

²⁰ Anasü müle wakuwaʼipa maʼaka nukuwaʼipa chi wayuu saashajaakai achiki Salmo 1:2, 3: «Shia naaʼinmaaka tü nünüikikat Jeʼwaa, naashajeʼerawalin shia soʼukai jee saʼwai sümaa jiattain nünüiki. [...] Aneerü sukuwaʼipa süpüshuaʼa tü kasa naainjakat».