1. ¿Kasapülajana nikirajaka waya Jeʼwaa?

EESHII süpüla eejiraain waya sümaa wanee kasa eekai sülatüin wamüin, jama niain Jeʼwaa chi Ekirajakai waya (Is. 30:20, 21). Nikirajüin waya waneʼewai wakua sükajee tü Wiwüliakat süpüla wountuin kasa süpüshuaʼa otta yapainjanain waya süpüla waʼyataain nümüin (2 Tim. 3:17, TNM). Sutuma waaʼinrüin tü sümakat tü Wiwüliakat, kekiishii maʼin waya suulialeʼeya «tü wayuu manoujainsatkalüirua» (1 Cor. 3:19; Sal. 119:97-100).

2. ¿Kasa wekirajaainjatka anain sünain ekirajaayakat tüü?

² Waaʼinreein tü suchuntaakat waaʼin sutuma tü namakat na manoujainsaliikana, shieerü wekirajaaka anain tia. Makalaka kapüleein wamüin eejiraain waya sümaa tü namakat na manoujainsaliikana otta sümaa tü naaʼinrakat. Müsüjeseʼe sümüin tü Wiwüliakat: «Kamalainchonsü maʼi nanüiki na aküjüliikana alawaa jümüin. Jalia jia jükanajuʼulaajayaa sütüma tü namakat. Tü nekirajakat anain, pütchi alawaa neʼe, naleʼeruʼujeejatü neʼe, shia tü shikirajapüʼükat anain tü natuushi manoujainsatkalüirua» (Col. 2:8). Sünain ekirajaayakat tüü, ekirajaaneerü anain piamasü kasa naleʼeruʼujeejatka neʼe na manoujainsaliikana otta jamakuwaʼipalin süpüla keejiain shia sümüin wayuu. Wayaawateerü aaʼu malaain neʼe tü namakat otta shiain alanaʼaleein maʼin tü sümakat tü Wiwüliakat.

3, 4. ¿Kasa aʼwanajaaka sünain tü namakat na wayuukana soʼujee juyakat 1900?

³ Soʼujee juyakat 1900, aʼwanajaasü maʼin tü namakat na wayuukana süchiki tü aainjirawaakalü akuwaʼipaa. Süpülapünaa tia, aainjiraapuʼushi neʼe nukuwaʼipa wanee wayuu sümaa nuʼwayuuse otta nnojotpuʼusü aashajaain wayuu süchiki aainjirawaa akuwaʼipaa noʼupala na waneinnua. Aʼwanajaapejeʼe tia otta anashiisü namüin tü kasa mojusükat.

⁴ Soʼu juyakat 1920, watta saalii tü kasa aʼwanajaakat sünain  sukuwaʼipa wayuu. Anuu sünüiki wanee ekirajaasü süchiki kasa eekai sülatüin: «Soʼu tia, eeʼiyatünüsü sümaʼüjiraain sukuwaʼipa wayuu suluʼu peliikula, teatro, noweela, muusika otta sünain tü süchikimaajatkat kasa oikaanüsü». Müshii maaʼinyaakai naaʼin na wayuukana sünain oyonnojoo otta nnojotsü anain sukuwaʼipa naʼanaaya. Jaʼyasü naaʼu shiain naaʼinrüin tü suchuntaakat naaʼin. Süküjatüjülia tü Wiwüliakat müinjatüin nakuwaʼipa sülüʼütpa süpüla sajaʼttüin kasa mojusü (2 Tim. 3:4).

5. ¿Kasa nnojotka mojuin namüin na wayuukana soʼujee tü juyakat 1960?

⁵ Soʼujee 1960, nnojotsü mojuin namüin na wayuukana jaleerüle wanee wayuu, nuuʼulaale wanee wayuu suulia nuʼwayuuse otta kepiajiraale wanee toolo sümaa wanee jierü sümaa nnojoluin kasaalüin naya. Otta müsia sünain tü sünajakat wayuu, jaʼyasü nümaʼüjiraain nukuwaʼipa wanee toolo sümaa wanee jierü. ¿Kasache eeka sünainjee tia? Saashin wanee wayuu ashajaka süchiki kasa eekai sülatüin, «nnojotsü eein wanee kasa apülajaka suulia wayuu tü yarüttaakalü akuwaʼipaa», müshiijeseʼe eein wayuu ooʼulaakana suulia naʼwayuuse, eesü wayuu epijaka süchonnii sümüiwaʼa, eeshii na mojukana maʼin aaʼin otta eeshii na kiʼrakana sünain anajaa shiyaakua wayuu maichesat jee amaʼüjiraasü sukuwaʼipa. Wainma ayuulii eeka sutuma tü amaʼüjirawaakalü akuwaʼipaa, maʼaka saaʼin tü kanüliakat sida. Wayaawatüin sükajee tia malaain neʼe tü namakat na manoujainsaliikana (2 Ped. 2:19).

6. ¿Kasa talataka atuma naaʼin Satanaa?

⁶ Nücheküin maʼin Satanaa sümaʼüjiraain sukuwaʼipa wayuu. Talatüshi nia sutuma mojutuin sümüin wayuu tü sukuwaʼipakat kaʼwayuusee otta tü aainjirawaakalü akuwaʼipaa, tü niʼitaatüjütkalia ekii Maleiwa (Éf. 2:2, TNM). Chi eekai nümaʼüjiraakuʼu nümüin nukuwaʼipa, mojutusat nümüin tü niʼitaatüjütkalia ekii Maleiwa otta suluʼujee tia nnojoleechi katüin oʼu waneepia (1 Cor. 6:9, 10).

7, 8. ¿Jamüsü shiaka anain tü sümakat tü Wiwüliakat süchiki tü aainjirawaakalü akuwaʼipaa suulialeʼeya tü namakat na manoujainsaliikana?

⁷ Na aaʼinrakana tü namakat na manoujainsaliikana, mojutusat namüin tü sümakat tü Wiwüliakat süchiki wuleinjatüin sukuwaʼipa wayuu otta alawaa neʼe tü süküjakat naashin. Eeshiijaʼa namüle: «Nialejeʼe Maleiwa keʼitaalain shikii tü aainjirawaakalü akuwaʼipaa, ¿jamaka nüchecherüinjatka naaʼin wanee wayuu suchuntaapa shia naaʼin?». Müsü nanüiki na wayuukana sutuma nanoujain sünain naaʼinrajatüin wanee wayuu tü suchuntaakat naaʼin. Nnojotpejeʼe müin tia saashin tü Wiwüliakat. Shikirajüin waya sünain nnojoluinjatüin waaʼinrüin süpüshuaʼa tü suchuntaakat  waaʼin, shia waaʼinrajatka tü kasa anasükat, suluʼujee tia wuleerü wakuwaʼipa noʼuluʼu Maleiwa (Col. 3:5). Niʼitaain shikii Maleiwa tü kaʼwayuuseekat, eekalaka süpüla naainjiraain neʼe nukuwaʼipa wanee wayuu sümaa nuʼwayuuse süka nnojoluin mojuin tü naaʼinrakat (1 Cor. 7:8, 9). Nnojoleerü mojuin naaʼin otta nnojoleerü wainmajüin naaʼin maʼaka naaʼin wanee wayuu aʼluwajiraakai nukuwaʼipa.

⁸ Naata maʼin tü sümakat tü Wiwüliakat suulia tü namakat na manoujainsaliikana süchiki tü aainjirawaakalü akuwaʼipaa. Saashin tü Wiwüliakat anasü naaʼin wanee wayuu sutuma naainjiraain nukuwaʼipa sümaa nuʼwayuuse (Prov. 5:18, 19). Süchiaapejeʼe waya suulia wanee kasa, anuu sünüiki: «Jiakana waneʼewai jukua, wuleinjatü tü jukuwaʼipakat otta kojutuinjatü shia jümüin, nnojotsü suchuntaainjatüin jaaʼin jümaʼüjiraain jukuwaʼipa maʼaka suchuntaain naaʼin na wayuu nnojoliikana eʼraajüin Maleiwa» (1 Tes. 4:4, 5, TNM).

9. (1) ¿Kasa akaalinjünaka aka na aʼyataashiikana nümüin Jeʼwaa süpüla naaʼinrüin tü sümakat tü Wiwüliakat soʼujee 1900 sünainmüin 1930? (2) ¿Kasa waaʼinrajatka saashin 1 Juan 2:15, 16? (3) ¿Kasa nnojoluinjatka waaʼinrüin saashin Roma 1:24-27?

⁹ Soʼujee 1900 sünainmüin 1930, na aʼyataashiikana nümüin Jeʼwaa nnojoishii emeejünüin natuma na keejiakana amüin mojulawaa (Éf. 4:19). Shia naaʼinraka tü nümakat Jeʼwaa. Anuu sünüiki tü rewiisütakat Aapiria Wayuu ojuʼitaka maayoʼu 15 soʼu 1926, inküleeruʼu: «Wuleinjatü nakuwaʼipa na tooloyuukana otta na jieyuukana, anainjatü tü jülüjakat naaʼin otta tü naaʼinrakat, kojutuinjatü wanee jierü nutuma wanee toolo, jee wanee toolo sutuma wanee jierü». Jaʼitasü mojuin maʼin nakuwaʼipa na manoujainsaliikana, shia naaʼinraka na aʼyataashiikana nümüin Jeʼwaa tü sümakat tü Wiwüliakat (paashajeʼera 1 Juan 2:15, 16). Waapüin analuʼut nümüin Jeʼwaa saaʼu naapüin wamüin tü Wiwüliakat otta saaʼu naapüin tü choʼujaakat süpüla anainjatüin wanoula, sükajee tia wayoutuin tü namakat na manoujainsaliikana süchiki tü amaʼüjirawaakalü akuwaʼipaa * (paashajeʼera Roma 1:24-27).

10, 11. ¿Kasa süküjatüjütkalia tü Wiwüliakat süchiki tü nakuwaʼipainjatkat na wayuukana?

¹⁰ Süküjatüjülia tü Wiwüliakat eeinjanain «wayuu eekai kapülain naaʼin nakuaippa neʼe namüiwa» (2 Tim. 3:1, 2). Müsüjeseʼe nnojoluin ponuin waaʼin weʼrüle yaletüin saaʼin wayuu. Saashin wanee karaloʼuta ojuʼitaka soʼujee 1970, ojuʼitayaa müsü «karaloʼuta süpülajatka kojutuin wanee wayuu nümüinjiraa». Eesü karaloʼuta aküjapuʼuka namüin na wayuukana «natüjaainjatüin saaʼu jetsüin nakuwaʼipa, nnojoliinjanain naya japülin saaʼujee otta kojutuinjanain naya namüinjiraa». Eesü wanee karaloʼuta aküjaka niainjachin kojutuin wanee wayuu noulia na waneinnua, nnojolin eein wanee wayuu eekai müin aka naaʼin, eekai anashichoin otta eekai kamalain sümüin wayuu. Saashin tia karaloʼutakat, niainjachi kapülaka saaʼin wayuu nümüiwaʼa, niainjachi aneekaka nümüiwaʼa tü anakat saaʼin nümüin.

¹¹ Nnojotsü ponuin waaʼin tia. Shia saaʼinrajatka Eva tia naashin Satanaa. Nüküjain sümüin eein süpüla müin shia maʼaka naaʼin Maleiwa sünain shiyaawatüin saaʼu «tü anasükat je tü mojusükat» (Gén. 3:5). Maaʼulu yaa, wainma wayuu yaletaka aaʼin, nnojotsü jaralüinjatüin aküjain namüin kasain anain jee kasain mojuin, jaʼitaichi niain Maleiwa aküjain namüin. Shia jülüjaka naaʼin tia süchiki tü nakuwaʼipainjatkat sünain kasaalüü.

12. ¿Jamüsü nanüiki na manoujainsaliikana süchiki nukuwaʼipa wanee wayuu sünain kaʼwayuusee?

¹² Süküjain tü Wiwüliakat kojutuinjatüin nuʼwayuuse wanee wayuu nümüin, akaʼaya tü jietkat, kojutuinjachi nia sümüin otta nekeraajüinjatü nanüiki. Nnojoishii ooʼulaajiraainjanain naya. Anuu tü sümakat tü Wiwüliakat: «Müshijeseʼe  nükatalaainjachin maaʼulu yaa wane wayuu shipialuʼujee nii je nipialuʼujee nüshi süpüla waneeshinjachin sünain saʼaniraainjatüin nükuaippa nümüiwa sümaa nuʼwayuuse süpüla paaʼinwajiraainjanain naya» (Gén. 2:24). Naatapejeʼe tü namakat na manoujainsaliikana süchiki tü nukuwaʼipainjatkat wanee wayuu sünain kaʼwayuusee otta shiainjatü kapülaka naaʼin wanee wayuu tü kasa suchuntaakat naaʼin naashin. Anuu sünüiki wanee karaloʼuta aashajaaka süchiki nooʼulaajiraain na kaʼwayuuseshiikana: «Mapuʼusü nanüiki na wayuu kasaatshiikana: ‹Nnojoleena waya ooʼulaajiraain waneʼereʼeya outapa waya›, akaajasaʼa jooluʼu eesü müle nanüiki: ‹Nnojoleena waya ooʼulaajiraain waneʼereʼeya maalinjiraapa waya›». Süka müin nanüiki na wayuukana, ooʼulaajiraashii naya otta mojushaatasü naaʼin saalinjee tia. Müsüjeseʼe malaain neʼe tü namakat na manoujainsaliikana süchiki nukuwaʼipa wanee wayuu sünain kaʼwayuusee.

13. ¿Jamüshii nülerajaka Jeʼwaa na yaletakana aaʼin?

¹³ Müsü tü Wiwüliakat: «Alerajünüshi nutuma Jeʼwaa chi wayuu yaletakai aaʼin» (Prov. 16:5). ¿Jamüshiiche nülerajaka Jeʼwaa na yaletakana aaʼin? Wanee kasa nülerajaka anainjee naya shia süka nashatüin nukuwaʼipa Satanaa otta nootuin wayuu süpüla müinjatüin sukuwaʼipa. Yaletüsü maʼin naaʼin Satanaa, müsüjeseʼe nuchuntuin nümüin Jesuu nüsapainkainjachin nia otta nuʼwaajüinjachin nia, eerejeʼe niain Jesuu akaalinjain Maleiwa sünain akumajaa kasa süpüshuaʼa (Mat. 4:8, 9; Col. 1:15, 16). Sükajee müin nakuwaʼipa na wayuu yaletakana aaʼin, wayaawata aaʼu malaain neʼe nümüin Jeʼwaa tü namakat na manoujainsaliikana.

14. ¿Jamüsü nnojoluinjatka kapülain waaʼin wakuwaʼipa wamüiwaʼa saashin Roma 12:3?

¹⁴ Sükaalinjain waya tü Wiwüliakat süpüla nnojoluin kapülain waaʼin wakuwaʼipa wamüiwaʼa. Süküjain wamüin kojutuinjanain waya wamüinjiraa. Anuu nünüiki Jesuu: «Na wayuukana napüshua, anashii aire püpüla maa aka alin pia püpülajiraa» (Mat. 19:19). Wayaawatüin sükajee tia, kojutuinjanain waya wapülajiraa sümaa nnojoluinjatüin sülanaʼaleʼeinya wapülain. Süküjain tü Wiwüliakat nnojoliin wayain alanaʼaleʼeinya noulia  na waneinnua. Anuu sünüiki: «Tü kasa anasü jaaʼinrakat sümüin wayuu, nnojo jaaʼinrüin shia süpüla juʼwaajüneein süka ooʼulaka süpüla juʼwaataainjanain suluʼu sümaa pülayaain jaaʼin suulia wayuu. [...] Shia anaka aluʼu kojutule napüshua na juwalayuukana jütüma» (Filip. 2:3; paashajeʼera Roma 12:3).

15. Saaʼin pümüin, ¿jamüsü anaka sukuwaʼipa wayuu sutuma tü sümakat tü Wiwüliakat süchiki nnojoluinjatüin yaletüin waaʼin?

¹⁵ Na wayuu kekiikana maʼin naashin na manoujainsaliikana, nayoutuin tü sümakat tü Wiwüliakat süchiki nnojoluinjatüin yaletüin naaʼin wanee wayuu. Naashin naya wayuukana, eʼnneechi amüin wanee wayuu müleka nnojorüle yaletüin naaʼin. ¿Kasache alataka sutuma yaletüin naaʼin na wayuukana? ¿Talatüshiiche na wayuu kapülakana aaʼin nakuwaʼipa namüiwaʼa? ¿Talatüsüche saaʼin napüshi? ¿Eeshiiche wayuu aleewakana maʼin namaa? ¿Aleewashiiche maʼin naya nümaa Jeʼwaa? ¿Shiache anaka atuma sukuwaʼipa wayuu tü namakat na manoujainsaliikana? ¿Shiataapa tü sümakat tü Wiwüliakat?

16, 17. (1) ¿Kasa waapaka aaʼujee analuʼut nümüin Jeʼwaa? (2) ¿Jamüshii waapaka analuʼut nümüin?

¹⁶ Na aaʼinrakana tü namakat na manoujainsaliikana, müshii aka naaʼin wanee wayuu meʼraajüinkai mma, asakinnakai nutuma wane süchiki jaralüin tü wopu noʼunajatkalü aluʼu. Anuu nünüiki Jesuu nachiki na wayuu kekiishiikana saashin wayuu soʼu nükalia: «Mayaashiije moʼuin naya, eʼitaanüshii naya naashin süpüla neeʼiyatüinjatüin tü wopukot sümüin wayuu eekai moʼuin. Soto jaaʼin wane kasa: Müleka nuʼuninnüle wane wayuu eekai moʼuin nütüma wane eekai moʼuinya, eeshii süpüla nojunuujiraain suluʼu ishi» (Mat. 15:14). Shiimain malaain neʼe nümüin Jeʼwaa tü namakat na manoujainsaliikana.

¹⁷ Anasü maʼin sünüiki tü Wiwüliakat «süpüla wekirajüinjatüin wayuu sünain. Je na aapaakana shia, achiajaaneena naya sütüma suulia kaainjalaa, anouktüneena akuaippa sütüma, je akaaliijüneena naya sütüma sünain aaʼinraa tü kasa anasükat» (2 Tim. 3:16). Waapüin analuʼut nümüin Jeʼwaa saaʼujee naaʼinmajüin waya sükajee nupueulose suulia tü namakat na manoujainsaliikana (Éf. 4:14). Sünainjee naapüin wamüin tü anainjatkalü atuma wanoula, katchinsü waaʼin süpüla woonooin sümaa tü nünüikikat. Anakuwaʼipalii maʼin waya sükajee nuʼunirüin wakuwaʼipa Jeʼwaa süka tü Wiwüliakat.