1. ¿Kasa nuchuntaka maʼin wamüin Jehová? (Piirakaa sümüin tü ayaakuaakat).

 ¿JARAI chi anakai süpüla wachuntuin amüin kaalinwaa nnojorüle watüjaain saaʼu tü waneeküinjatkat jee mojule waaʼin? Nia Jehová. Watüjaa aaʼu naapajeerüin wanüiki. Anuujeseʼe nünüiki wamüin: «Juʼuraaja maʼin waneepia» (1 Tes. 5:17, TNM). Watüjaa aaʼu nuʼunireerüin wakuwaʼipa wachuntule shia nümüin (Prov. 3:5, 6). Süka kamaneein Jehová, eeshii süpüla woʼuraajüin nümüin wainmatua.

2. ¿Kasa wekirajaainjatka anain sünain ekirajaayakat tüü?

² Kojutusü maʼin wamüin süka eein süpüla woʼuraajüin nümüin Jehová. Eesü nnojorüle süpütaain kaʼi wapüla süpüla woʼuraajüin nümüin sutuma kupaain maʼin waya jee shiale sutuma jülüjain waaʼin anainjatüin maʼin wanüiki nümüin. Jalouisü maʼin wamüin tü Bibliakat süpüla watüjaain saaʼu tü wanüikinjatkat woʼuraajapa. Sünain ekirajaayakat tüü, wekirajaajeerü süchiki tü waaʼinrajatkat süpüla wakatalüin kaʼi süpüla woʼuraajüin maʼaka naaʼinrüin shia Jesús. Wekirajaajeerü süchiki jaʼraisü kasa eeka süpüla wachuntuin nümüin Jehová.

3. ¿Kasa nütüjaaka maʼin aaʼu Jesús?

³ Nütüjaa aaʼulu Jesús kojutuin nümüin Jehová nuʼuraajünüle nümüin. Chaiwaʼaya Jesús iipünaa niʼrapuʼuin nusoutuin Jehová namüin na aʼyataakana nümüin. Jamüshijaʼa nia niʼrüin nusoutuin Jehová shiʼipajee tü suchuntakat Ana otta shiʼipajee tü nuchuntakat David, Elías jee waneinnua wayuu (1 Sam. 1:10, 11, 20; 1 Rey. 19:4-6; Sal. 32:5). Müsüjeseʼe nüküjain Jesús namüin na nikirajüinkana noʼuraajüinjanain waneepia nümüin Maleiwa süka nütüjaain saaʼu naapajeerüin nanüiki (Mat. 7:7-11).

4. ¿Kasa watüjaka sünainjee tü naaʼinrakat Jesús?

 ⁴ Anasü maʼin nukuwaʼipa Jesús napüleerua na nikirajüinkana. Wanaa sümaa yaajachin niʼyataain nümüin Maleiwa yaa saaʼu mmakat, oʼuraajüshi nia waneepia. Mayaainjeʼe naaʼinrawalin wainma kasa jee süntawalin watta saalii wayuu nünainmüin, ayatüshia akatalüin nia kaʼi süpüla nuʼuraajüin (Mar. 6:31, 45, 46). Süpüla naashajaain nümaa Maleiwa, atamaashi nia «eeiwaʼaya aikat» (Mar. 1:35). Soʼu wanee kaʼi, «siraasü aikat naaʼu sünain oʼuraajaa». Naaʼinrüin tia süpüla nüneeküinjatüin wanee kasa (Luc. 6:12, 13). Wanee ai süpülapünaa outuin nia, wainmatua nuʼuraajüin nümüin Jehová süka nütüjaain saaʼu tü aainjüneetkat nümüin (Mat. 26:39, 42, 44).

5. ¿Kasa waaʼinrajatka süpüla washatüin nukuwaʼipa Jesús?

⁵ Tü watüjakat sünainjee nukuwaʼipa Jesús shia wakatalüinjanain kaʼi süpüla woʼuraajüin nümüin Jehová, waaʼinrajatü tia jaʼitainna kupaain maʼin waya. Anasü wakumajüle sukuwaʼipa süpüla woʼuraajüin maʼaka naaʼinrüin shia Jesús. Eeshii süpüla watamaain maalü süpüla woʼuraajüin jee waaʼinrüle shia aipaʼa süchikijee kettaain watuma süpüshuaʼa tü waaʼinrajatkat. Müle shia watuma, atüjaaneerü aaʼu kojutuin wamüin woʼuraajüin nümüin Jehová. Saashin wanee wawala kanüliaka Lynne, talatüsü saaʼin sütüjaapa saaʼu eein süpüla suʼuraajüin nümüin Jehová. Müsü shia: «Müshi aka naaʼin wanee taʼaleewain Jehová tatüjaapa saaʼu naapajüin maʼin tanüiki toʼuraajapa nümüin. Tachajaain maʼin sukuwaʼipa süpüla anainjatüin tanüiki nümüin». Eesüjaʼa müle wakuwaʼipa. Wekirajaa joo süchiki jaʼraisü kasa wachuntajatka nümüin Jehová woʼuraajapa.

6. ¿Jamüshi niainjachika Jehová waʼwaajüin nümüiwaʼa saashin Alateetkat Mapeena 4:9-11?

⁶ Waʼwaajüinjachi Jehová. Jamüshijaʼa chi aluwataaushikai Juan, niʼrüin chaa iipünaa 24 laülaashii sünain aʼwaajaa Jehová sümaa naküjain niainjachin aʼwaajünüin nümüiwaʼa (paashajeʼera Alateetkat Mapeena 4:9-11). Wainma kasa naʼwaajaka aaʼujee Jehová na aapieekana. Süka chain naya nümaa, neʼraajüin maʼin nukuwaʼipa. Sünainjee neʼrüin tü kasa naaʼinrakat Jehová, naʼwaajeein nia (Job 38:4-7).

7. ¿Kasa waküjainjatka nümüin Jehová süpüla waʼwaajüin nia woʼuraajapa nümüin?

 ⁷ Müshiʼiya wayakana, waʼwaajeein Jehová wanaa sümaa woʼuraajüin nümüin. Waaʼinrüin tia wanaa sümaa waküjain nümüin jamüin aika nia wapüla otta jamüin kojutukai nia wamüin. Waashajeʼerapa tü Bibliakat, jülüja waaʼin wanee kasa naaʼinraka Jehová kamalainka wamüin, tü weʼraajeetkalü anainjee nukuwaʼipa (Job 37:23; Roma 11:33). Waaʼinrapa tia, waküja nümüin Jehová tü jülüjakat waaʼin süchiki nukuwaʼipa. Eeshi süpüla waʼwaajüin Jehová saaʼujee nükaalinjain waya jee saaʼujee nükaalinjain na wawalayuukana. Jülüjashii maʼin waya naaʼin jee naaʼinmajüin waya (1 Sam. 1:27; 2:1, 2).

8. ¿Jeʼtsü waneirua kasa waapüinjatka aaʼujee analuʼutka nümüin Jehová? (1 Tesalónica 5:18).

⁸ Waapa analuʼutka nümüin Jehová. Wainma kasa eeka süpüla waapüin aaʼujee analuʼutka nümüin Jehová (paashajeʼera 1 Tesalónica 5:18, TNM). Eeshii süpüla waapüin analuʼutka nümüin saaʼujee tü kasa anasü eekat wamaʼana. Nümaʼanajeejatü Jehová süpüshuaʼa tü kasa anasükat (Sant. 1:17). Jamüshiijaʼa waya eesü süpüla waapüin analuʼutka nümüin saaʼujee anain maʼin tü Mmakat sümaa tü kasa eekat saaʼu. Waapa analuʼutka nümüin saaʼujee katüin woʼu, naaʼujee na wapüshikana, naaʼujee na waʼaleewainkana otta saaʼujee tü kasa anasü naapüinjatkat wamüin mapeena. Waapaʼaya analuʼutka nümüin Jehová saaʼujee aleewain waya nümaa.

9. ¿Jamüsü eeka süpüla motuin waaʼin waapüin tü analuʼutkat saaʼujee tü kasa wamaʼanakat?

⁹ ¿Kasa waapüinjatka aaʼujee analuʼutka nümüin Jehová waneʼewai wakua? Eesü süpüla motuin waaʼin waapüin analuʼutka nümüin Jehová saaʼujee kepiain waya naʼaka wayuu matüjainkana aapaa analuʼut. Maaʼulu yaa, wainma wayuu aʼyataakana süchiirua namaʼanain waneirua kasa. Suluʼujee tia, motusü naaʼin naapüin analuʼutka saaʼujee tü kasa namaʼanakat. Washatüle nakuwaʼipa naya wayuukana, eesü süpüla shiain woʼuraajüin neʼe apüleerua tü kasa choʼujaakat wamüin. Suulia majüin wakuwaʼipa, ayataʼaya waapüin analuʼutka nümüin Jehová saaʼujee süpüshuaʼa tü kasa naapakat wamüin (Luc. 6:45).

10. ¿Kasa anasü shiʼraka wanee wawala saaʼujee saapawalin analuʼutka nümüin Jehová? (Piirakaa sümüin tü ayaakuaakat).

¹⁰ Wachechereerü waaʼin soʼunnaa müliaa waapüle analuʼutka nümüin Jehová. Jülüjataa waaʼin sukuwaʼipa wanee wawala kanüliakat Kyung-sook, ashajünüsü süchiki sukuwaʼipa suluʼu Aapiria Wayuu ojuʼitaka eneeroʼu 15 soʼu 2015 (alijunaikiruʼusü). Aküjünüsü sümüin ayuulin susoso sutuma kanset. Anuu sünüiki tü wawalakat: «Mojusü maʼin taaʼin tatüjaapa saaʼu ayuulin taya. Mmotsü maʼin taya seema outaa». ¿Kasa atütüleʼeraka saaʼin? Oʼunawaisü shia suluʼumüin tü balcón sulujutkat shipia, oʼuraajüsü shia yala sümaa emetuluin sünüiki, saapawalin analuʼutka  nümüin Jehová saaʼujee jaʼraisü kasa anasü naaʼinraka süpüleerua soʼukaiwai. Anasü saaʼin sünainjee saaʼinrüin tia jee müsia süküjawalin suluʼujee saaʼin alin Jehová süpüla. Shiyaawata aaʼu nükaalinjain Jehová na aʼyataakana nümüin soʼunnaa müliaa otta müsia wainmaleeinña tü kasa anasü weʼrakat suulialeʼeya tü müliaa alatakat wamüin. Maʼaka saaʼin Kyung-sook, wainma kasa waapüinjatka aaʼujee analuʼutka nümüin Jehová, jaʼitasü kasain alatüin wamüin. Waapüle analuʼutka nümüin Jehová, wachechereerü waaʼin soʼunnaa müliaa otta aneerü waaʼin.

11. ¿Jamüshii yalayalainjanaka aaʼin na nikirajüinkana Jesús?

¹¹ Wachunta nümüin Jehová yalayalaa aaʼin süpüla waküjain pütchi. Anuu nünüiki Jesús namüin na nikirajüinkana süpülapünaachon nuʼunuin iipünaamüin: «Jüküjeenakalaka pütchi tachiki sainküinpünaa Jerusalén, Judeapünaa, Samariapünaa otta sainküinpünaa mmakat» (Aluw. 1:8, TNM; Luc. 24:46-48, TNM). Shiasaʼa mapa, amaanüshi Pedro nümaa Juan suluʼumüin tü kanüliakat Sanedrín natuma na laülaashiikana napüleerua na judíokana. Neimmolojokalaka naya shiiʼiree nnojoliinjanain naküjain pütchi (Aluw. 4:18, 21). ¿Jamakaʼa naaʼin Pedro otta Juan sutumajee tia?

12. ¿Kasa naaʼinraka na nikirajüinkana Jesús saashin Aluwataaushikana 4:29, 31?

¹² Nusoutakalaka Pedro otta Juan namüin na eimmolojokana naya, müshii naya: «Jiajaʼa atüjaaka saaʼu jiakana analejeʼeya nümüin Maleiwa woonooin sümaa jünüiki suulialeʼeya woonooin sümaa nünüiki niakai. Eekajasaʼa wayakana nnojoliireejaʼa süpüla wooʼulaainjanain suulia aashajawaa süchiki tü kasa weʼrakat otta tü waapakalü achiki» (Aluw. 4:19, 20, TNM). Shiasaʼa najütünapa achiki, noʼunaka eemüin na wane nikirajüinkana Jesús jee noʼuraajaka napüshuaʼa süpüla ayatüinjatüin naaʼinrüin tü keeʼireekat naaʼin Maleiwa. Müshii naya: «Pükaalinja waya püchepchiakana süpüla yalayalain waaʼin sünain aküjaa tü pünüikikat». Nükaalinjakalaka naya Jehová (paashajeʼera Aluwataaushikana 4:29, 31, TNM).

13. ¿Kasa watüjaka sünainjee nukuwaʼipa chi wawalakai Jin-hyuk?

¹³ Süpülajünüle woulia tü aküjaakat pütchi natuma na sülaülashiikana mma, anasü washatüle nakuwaʼipa na nikirajüinkana Jesús. Tia shia tü naaʼinrakat chi wawalakai Jin-hyuk wanaa sümaa püreesain nia saaʼujee nnojolin sünainpünaain atkawaa jee política. Eʼitaanüshi nia sünain aaʼinmajaa na püreesashii akatannakana namüiwaʼa noulia na wane püreesashiikana. Apülajünüsü nuulia chi wawalakai yootuinjachin nia namaa süchiki tü Bibliakat. Shia neʼe nüsakirüinjanaka anain naya süchiki tü choʼujaakat namüin. Nuchuntakalaka chi wawalakai nümüin Jehová kekiwaa jee yalayalaa aaʼin süpüla nüküjain pütchi namüin (Aluw. 5:29, TNM). Anuu nünüiki chi wawalakai Jin-hyuk: «Asoutushi Jehová tamüin shiʼipajee tü tachuntakat nümüin. Kekiishi taya jee yalayalasü taaʼin nutuma süpüla taküjain pütchi. Wainma na püreesashii tekirajakana sünain tü Bibliakat, tekirajüin naya soʼu jaʼrai minuuto soʼuluʼu tü kuatta eejanale süttüin naya atumawaa. Ashajawaishi taya aipaʼa karaloʼuta süpüla taapüin shia waneemüin kaʼi namüin na püreesashiikana». Maʼaka naaʼin chi wawalakai Jin-hyuk, eesü süpüla wachuntuin nümüin Jehová yalayalaa aaʼin jee kekiwaa süpüla waküjain pütchi. Watüjaa maʼin aaʼulu nükaalinjeenain waya.

14. ¿Kasa paaʼinrajatka süpüla püchecherüin paaʼin soʼunnaa müliaa? (Salmo 37:3, 5).

 ¹⁴ Wachunta nümüin Jehová nükatchinraiwa waaʼin soʼunnaa müliaa. Eeshii weʼrüle müliaa sutuma outuin wapüshi, wapüleeruaanüle aaʼin saaʼujee wanoula, ayuuire waya, mojule waaʼin jee sülatüle kasa namüin na wapüshikana. Akooʼomüinraasü tü müliaa weʼrakat maaʼulu sutuma eein atkawaa otta sutuma tü ayuulii keemakat maʼin eeka maaʼulu. Müsüjeseʼe anain püküjale nümüin Jehová süpüshuaʼaleʼeya tü shapaakalü atuma paaʼin. Yooto pia nümaa maʼaka yootooin pia nümaa wanee paʼaleewain. Weʼitaa waaʼin sünain nükaalinjeenain waya Jehová (paashajeʼera Salmo 37:3, 5).

15. ¿Jamüsü sükatchinraajeetka waaʼin soʼunnaa müliaa woʼuraajüle nümüin Maleiwa? Püküja tü saaʼinrakat wanee wawala.

¹⁵ Wachechereerü waaʼin soʼunnaa müliaa woʼuraajüle maʼin nümüin Jehová (Roma 12:12). Nütüjaa aaʼulu Jehová tü alatakat namüin na aʼyataakana nümüin otta naapajüin nanüiki nachuntapa kaalinwaa nümüin (Sal. 145:18, 19). Tia shia tü shiʼrakat wanee wawala pürekutsoot, Kristie sünülia, 29 suuyase. Ayuuijaʼalaʼa müsü shia. Sutumajee tia mojusü saaʼin waneepia. Shiasaʼa mapa, aküjünüsü sümüin ayuulin tü shiikat sutuma wanee ayuulii outasiroʼu. Anuuka sünüiki Kristie: «Tachuntashaatain maʼin nümüin Jehová katchinjatüin taaʼin süpüla talatüin süchikumüin tü alatakat tamüin. Tachajaain maʼin sukuwaʼipa süpüla ayatüinjatüin toutkajaʼawalin otta tekirajaʼawalin sünain tü Bibliakat. Shia akatchinraka taaʼin toʼuraajawalin nümüin Jehová. Atütülaasü maʼin taaʼin süka tatüjaain saaʼu naaʼinmajüin taya Jehová. Mayaainjeʼe nnojoluin anamaatüin taya sutuma tü ayuuliikat, jutatüsü taaʼin sutuma toʼuraajüin nümüin Jehová». Soto waaʼin «nuʼtteʼerüin Jehová na wayuu anoujakana nünain suulia tü kasa mojusü ooʼulakünakalü akajee naaʼin» (2 Ped. 2:9, TNM).

16. ¿Jamüsü choʼujaaka nükaalinjain waya Jehová süpüla wachecherüin waaʼin suulia waaʼinrüin kasa mojusü?

 ¹⁶ Wachunta nümüin Jehová nüchecheraiwa waaʼin suulia waainjain kasa mojusü. Wachecherüinjatü waaʼin suulia waaʼinrüin kasa mojusü süka waleʼeruʼuin süchiki tü kaainjalaakat. Nüchajaain maʼin sukuwaʼipa Satanás süpüla naainjirüin waya kasa mojusü. Numojujeʼereein tü kasa jülüjakat waaʼin sükajee peliikula mojuka, sükajee muusika mojuka otta sükajee waneirua kasa. Sünainpünaale waya tia, yarütteerü wakuwaʼipa noʼuluʼu Jehová jee kaainjaleena waya (Mar. 7:21-23; Sant. 1:14, 15).

17. ¿Kasa amaa waaʼinrajatka süpüla wachecherüin waaʼin suulia tü ooʼulakünakalü aka waaʼin? (Piirakaa sümüin tü ayaakuaakat).

¹⁷ Choʼujaashii nükaalinjain waya Jehová süpüla wachecherüin waaʼin suulia tü kasa ooʼulakünakalü aka waaʼin. Anuu nünüiki Jesús wanaa sümaa nikirajüin na nikirajüinkana sünain oʼuraajaa: «Pükaalinja waya suulia suuʼulakünüin waaʼin. Jalia maa waya nuulia chi Yolujaakai» (Mat. 6:13, TNM). Nükaalinjeein waya Jehová, wachuntajatpejeʼe shia nümüin. Nnojoishii neʼe oʼuraajüinjanain waya nümüin Jehová, eejüinjatiaʼaya waaʼin suulia sünainpünaain waya wanee kasa amojujeʼereetka tü suluʼukat waaʼin, tü joutkat maʼin maaʼulu (Sal. 97:10). Süpüla anainjatüin tü jülüjakat waaʼin, acheküsü waashajeʼerüin tü Bibliakat sümaa wekirajaain sünain, acheküshii woutkajaain jee waküjain pütchi. Soto waaʼin nnojoleenain nuuʼulaain waya Jehová suuʼulakünüin waaʼin sükajee wanee kasa nnojoleetka wachecherüin atuma waaʼin (1 Cor. 10:12, 13, TNM).

18. ¿Kasa ayatüinjatka waaʼinrüin wapüshuaʼa?

¹⁸ Süpüla waneepiain waya nümaa Jehová, oʼuraajüinjana maʼin waya nümüin. Keeʼireesü naaʼin Jehová waküjain nümüin süpüshuaʼa tü suluʼukat waaʼin (Sal. 62:8). Anasüjeseʼe pükatarüle kaʼi soʼukaiwai süpüla puʼuraajüin nümüin Jehová süka süpüshuaʼa paaʼin. Puʼwaaja nia jee paapaa analuʼutka nümüin saaʼujee süpüshuaʼa tü kasa anasü naaʼinrakat püpüleerua. Puchunta nümüin süpüla yalayalain paaʼin sünain aküjaa pütchi, süpüla püchecherüin paaʼin soʼunnaa müliaa otta süpüla püchecherüin paaʼin suulia tü ooʼulakünakalü aka paaʼin. Ayataʼaya puʼuraajüin nümüin Jehová, nnojo puuʼulaain sütaʼülüin pukuwaʼipa wanee kasa suulia aaʼinraa tia. ¿Kasa naaʼinraka Jehová süpüla nusoutuin shiʼipajee tü wachuntakat nümüin? Wekirajaajeerü anain tia sünain tü wane ekirajaayakat.