1. ¿Kasa kapüleʼewaika wamüin wountuin?

 ¿EEIRIA kapüleein pümüin puuntuin wanee kasa piʼyataweeka anain nümüin Jehová? b Müle pukuwaʼipa, nnojoishi piain neʼe alatüin amüin tia. Jülüjataa waaʼin tü alatakat nümüin Philip, kapüleesü maʼin nümüin nuuntuin naaʼinrüin wanee kasa naaʼinreeka sünain aʼwaajaa Jehová. Oʼuraajeeshi maʼin nia waneepia otta aneesü maʼin nünüiki yootopa nia nümaa Jehová. Jülüjataa waaʼin sukuwaʼipa Erika, aʼyataasü maʼin shia süchiirua süntajatüin maalü sünain tü outkajawaa süpülajatkalü aküjaa pütchi. Ayatapejeʼeya antanajaain neʼe shia süchikipünaa. Wainmatuairü nuuʼulaküin Tomáš süpüla naashajeʼerüin süpüshuaʼa tü Bibliakat. Anuu nünüiki süchiki tia: «Nnojotsü kamalain maʼin tamüin taashajeʼerüin tü Bibliakat. Tooʼulaküirü apünüintua taashajeʼerüin süpüshuaʼa, nnojotpejeʼe talatayaain süchikijee Levítico».

2. ¿Jamüsü nnojoluinjatka sümalajaain waaʼin kamaʼale saaʼin wamüin wountuin tü waʼyataweekalü anain nümüin Jehová?

² Piʼyataale süchiirua wanee kasa sünain aʼwaajaa Jehová, nnojo sümalajaain paaʼin kamaʼale saaʼin pümüin süpüla puuntuin shia. Jaʼitairü müin mapüleekai saaʼin pümüin tü piʼyataweekalü achiirua nümüin Jehová, choʼujaasiaʼaya piʼyataainjatüin maʼin süchiirua. Sutuma kojutuin pümüin aleewain pia nümaa Jehová, ayatüshia pia sünain tü piʼyataweekalü anain nümüin. Niʼrüin Jehová süpüshuaʼa tü paaʼinrakat, nnojotsü nuchuntuin pümüin wanee kasa iseetka püchiki (Sal. 103:14; Miq. 6:8). Anasü piyaawatüle saaʼu puunteerüle  tü kasa piʼyataweekalü anain. Eere süpüla puuntuin tia aʼyatawaakat, ¿kasa paaʼinrajatka? Wekirajaa süchiki waneirua kasa eeka süpüla waaʼinrüin.

3. ¿Jamüsü keeʼireeinjatka maʼin paaʼin puuntuin paaʼinrüin wanee kasa?

³ Süpüla wountuin tü waʼyataweekalü anain nümüin Maleiwa, keeʼireeinjatü maʼin waaʼin shia. Keeʼireere waaʼin wanee kasa, aʼyataashii maʼin waya süpüleerua. Tia müsü aka saaʼin tü joutai alüʼüjakat wanee anuwa. Ayatüle eein joutai eesü süpüla süntüin tü anuwakat eewarüle shia. Katchinre maʼin tü joutaikat, antamaateerü tü anuwakat. Müsia neʼe wakuwaʼipa keeʼireere maʼin waaʼin wountuin tü waʼyataweekalü anain, eesü süpüla wountuin shia. Anuu nünüiki wanee wawala chejeʼewaikai El Salvador, David nünülia: «Keeʼireere maʼin paaʼin puuntuin wanee kasa, aʼyataashi pia süchiirua tia. Püchajaain maʼin sukuwaʼipa süpüla pümaʼanain tü keeʼireekat paaʼin». ¿Kasa paaʼinrajatka süpüla keeʼireein maʼin paaʼin puuntuin tü piʼyataweekalü anain?

4. ¿Kasa eeka süpüla wachuntuin nümüin Jehová? (Filipos 2:13; piirakaa sümüin tü ayaakuaakat).

⁴ Puchunta nümüin Jehová keeʼireeinjatüin maʼin paaʼin puuntuin tü piʼyataweekalü anain nümüin. Eesü süpüla naaʼinrüin Jehová tia püpüleerua sükajee tü nüpülainkat (paashajeʼera Filipos 2:13). Eeshii waʼyataale süchiirua wanee kasa nümüin Jehová süka shiain tü waaʼinrajatkat, nnojotsiaajeʼe mojuin waaʼinrüle tia. Alatüsü tia sümüin wanee wawala kanüliakat Norina, chejeʼewat shia Uganda. Aʼyataasü shia süchiirua shikirajüinjatüin wanee wayuu sünain tü Bibliakat. Nnojotpejeʼe keeʼireein maʼin saaʼin tia süka nnojoluin sütüjain maʼin ekirajaa wayuu süküjainruʼu. Anuu sünüiki süchiki tü saaʼinrakat: «Tachuntashaatain maʼin nümüin Jehová keeʼireeinjatüin taaʼin tekirajüin wanee wayuu sünain tü Bibliakat, taaʼinrüinjeseʼe waneirua kasa süpüla tatüjainjatüin ekirajaa wayuu. Shiasaʼa maʼaka jeʼra kaʼi süchikijee tia, ekirajeesü taya wayuu sünain tü Bibliakat. Soʼu tü juya taʼyataakalü achiirua süpüla tekirajüin wayuu, tountuin tia. Tekirajaka piamasü wayuu».

5. ¿Kasa jülüjainjatka waaʼin süpüla keeʼireein waaʼin wountuin tü waʼyataweekalü anain nümüin Jehová?

⁵ Püsakireʼera paaʼin sünain tü naaʼinrakat Jehová püpüleerua (Sal. 143:5). Shia naaʼinraka Pablo tia, müshijeseʼe niʼyataain nümüin Jehová süka süpüshuaʼa naaʼin (1 Cor. 15:9, 10; 1 Tim. 1:12-14). Müshiʼiya wayakana, keeʼireejeerü waaʼin wountuin tü waʼyataweekalü anain nümüin Jehová jülüjale waaʼin tü kasa naaʼinrakat wapüleerua (Sal. 116:12). Anuu tü sümakat wanee wawala süchiki tü saaʼinrakat süpüla suuntuin pürekutsoolüin rekulaat shia, chejeʼewat shia Honduras: «Jülüjasü taaʼin alin maʼin taya nüpüla Jehová. Nüntirüin taya naʼakamüin na wayuu aʼyataakana nümüin jee naaʼinmajüin taya. Jülüjapa taaʼin tia, akooʼomüinraasü maʼin tü naalinkat Jehová tapüla otta pürekutsooleesü maʼin taya».

6. Püküja süchiki wanee kasa waaʼinrajatka süpüla keeʼireein waaʼin wountuin tü kasa waʼyataweekalü anain.

⁶ Paaʼinmaa tü kasa anasü piʼreekat puuntule tü piʼyataweekalü anain. Jülüjataa waaʼin sukuwaʼipa Erika tü wachuntayütkalü anülia suluʼu pütchi waneesia. Anuu tü saaʼinrakat süpüla süntüin  maalü sünain tü outkajawaa süpülajatkalü aküjaa pütchi: «Jülüjasü taaʼin tü kasa anasü teʼreetkat tantüle maalü sünain tü outkajawaakat, maʼaka saaʼin tasakeenain na wawalayuukana, yooteerüin taya namaa otta taapajeerüin tü pütchi jalouijeetkat tamüin süpüla aküjaa pütchi». Süka saaʼinmaain Erika tü kasa eejeetkat sünainjee tia, suuntuin tü shiʼyataakalü achiirua. ¿Jama piakai? ¿Kasa anasü piʼreetka puuntule tü piʼyataweekalü anain? Jamüshijaʼa piʼyataale süchiirua paashajeʼerüin maʼin tü Bibliakat jee shiale anain maʼin pünüiki putuma puʼuraajapa, aleeweechi maʼin pia nümaa Jehová puuntule shia (Sal. 145:18, 19). Piʼyataale süchiirua anainjatüin pukuwaʼipa sünain anoujaa, aneerü pukuwaʼipa namaa na waneinnua puuntule shia (Col. 3:14). Anuu sooʼomüin kasa paaʼinrajatka süpüla puuntuin tü piʼyataweekalü anain: püshaja süchiki jamüin piʼyataweeka sünain tia, pünaʼlawai sümüin suulia motuin shia paaʼin. Anuu nünüiki Tomáš chi wachuntayüikai anülia paalapa: «Tayaawatüle saaʼu tü kasa anasü eejeetkat sutuma tü kasa taʼyataweekalü anain, nnojoishi taya ooʼulaain suulia tia».

7. ¿Kasa naaʼinraka Julio sümaa tü nuʼwayuusekat süpüla nountuin tü naʼyataweekalü anain?

⁷ Namaa pia wayuu atütüleʼereenakana paaʼin (Prov. 13:20). Akolojoweeshi Julio sümaa tü nuʼwayuusekat süpüla nakooʼomüinrüin naʼyataain sünain aküjaa pütchi. Anuu nünüiki süchiki tü naaʼinrakat süpüla nountuin tia: «Aleewashii maʼin waya namaa wawalayuu atütüleʼerakana waaʼin otta yootushii waya namaa süchiki tü kasa waʼyataweekalü anain. Noʼutku nayakana nountuin tü kasa waʼyataweekalü anain. Makalaka naküjeerüin wamüin süchiki tü jalouijeetkat wamüin. Nasakirawalin waya jamüirüin watuma tü waaʼinrakat jee natütüleʼerawalin waaʼin süpüla ayatüinjatüin waaʼinrüin shia».

8. ¿Kaseerü alataka nnojorüle waʼyataain sünain tü keeʼireekat waaʼin sutuma nnojoluin waaʼin sünain? (Piirakaa sümüin tü ayaakuaakat).

⁸ Eesü kaʼi nnojotka oʼu waaʼinreein kasa. ¿Ooʼulaajeenache waya suulia tü waʼyataweekalü anain sutuma tia? Nnojottaa. Waashajaa sooʼomüin süchiki tü anuwakat sümaa tü joutaikat. Eesü süpüla sülüʼüjünüin tü anuwakat sutuma tü joutaikat eewarüle shia, eejeetpejeʼe kaʼi matchinjeetka oʼu tü joutaikat otta kaʼi nnojorüleejeetka oʼu shia. ¿Nnojotsüche süpüla nuʼunirüin chi anuwapuʼukai tü anuwakat saaʼujee tia? Eesü süpüla nuʼunirüin shia süka eein waneirua anuwa kamotootseka jee waneirua eesü unia sünain. Meeria wakuwaʼipa süka eejeerüin kaʼi kuʼlajaweetka oʼu waaʼin süpüla waʼyataain süchiirua tü waʼyataweekalü anain. Müle wakuwaʼipa, washata tü naaʼinrakat chi anuwapuʼukai, chi ayateechikai oʼunirüin tü anuwakat jaʼitairü nnojoluin eein joutai. Eesü süpüla ayatüin waʼyataain süchiirua tü waʼyataweekalü anain, jaʼitairü nnojoluin waaʼin sünain. Watüjaa aaʼu kapüleein tia, aneetpejeʼe wakuwaʼipa waaʼinrüle shia. Wekirajaa jooluʼu jamüin anaka waaʼinrüle tia.

9. ¿Jamüshii waʼyataainjanaka maʼin süchiirua wanee kasa waʼyataweeka anain nümüin Jehová jaʼitairü nnojoluin waaʼin sünain?

⁹ Keeʼireesü naaʼin Jehová waʼyataainjanain nümüin süka süpüshuaʼa waaʼin sümaa talatüin waaʼin (Sal. 100:2; 2 Cor. 9:7). ¿Jamüshii waʼyataainjanaka  maʼin süchiirua wanee kasa waʼyataweeka anain nümüin Jehová jaʼitairü nnojoluin waaʼin sünain? Jülüjataa waaʼin nukuwaʼipa chi aluwataaushikai Pablo. Müshi nia: «Müshi tasheʼejakai saaʼin tatapaʼa jee müsü aka saaʼin wanee tachepchia» (1 Cor. 9:25-27, TNM). Mayaainjeʼe nnojoluin naaʼin Pablo sünain aaʼinraa tü keeʼireekat naaʼin Jehová, ayatüsia nüchajaain maʼin sukuwaʼipa süpüla naaʼinrüin tia. ¿Talatüsüche naaʼin Jehová sümaa tü niʼyataainkat Pablo? Jamüsaʼa shia. Naapüin Jehová naʼanasia nümüin süka niʼyataain maʼin Pablo süchiirua tü nüchekakat nüpüleerua (2 Tim. 4:7, 8, TNM).

10. ¿Kasa anasü weʼreetka waʼyataale süchiirua tü waʼyataweekalü anain mayaainjeʼe nnojoluin waaʼin sünain tia?

¹⁰ Talatüsü naaʼin Jehová waʼyataale nümüin sümaa talatüin waaʼin. Talatüsia naaʼin waaʼinrüle tü nüchekakat mayaainjeʼe nnojoluin waaʼin sünain. Aʼyataashii waya süchiirua wanee kasa süka alin wapüla Jehová. Niiʼiyatüin naʼanasia Jehová nümüin Pablo süka niʼyataain maʼin nümüin. Meeria tü naaʼinrakat Jehová wapüleerua (Sal. 126:5). Weʼrüle naʼanasia Jehová, ayateeria keeʼireein waaʼin waʼyataain süchiirua tü waʼyataweekalü anain nümüin. Anuu tü sümakat wanee wawala kanüliakat Lucyna, chejeʼewat shia Polonia: «Eesü kaʼi nnojotka oʼu taaʼin tojuʼitüin sünain aküjaa pütchi, shialeekajaʼa mapüsale taya. Shiasaʼa tojuʼitapa, talatashaatasü maʼin taaʼin taleʼejapa tepialuʼumüin». Wekirajaa jooluʼu süchiki tü waaʼinrajatkat nnojorüle waaʼin sünain tü waʼyataakalü achiirua.

11. ¿Kasa naaʼinraka Jehová süpüla nükaalinjain waya suulia wooʼulaain tü kasa waaʼinrajatkat?

¹¹ Puchunta kaalinwaa nümüin Jehová süpüla püchecherüin paaʼin suulia puuʼulaain tü kasa paaʼinrajatkat. Chi wayuu achechetkai naaʼin, nnojotsü neʼe nüchecherüin naaʼin suulia aaʼinraa kasa mojusü, nüchecherüinña naaʼin suulia kuʼlajaain naaʼin sünain tü naaʼinrajatkat. Soto waaʼin nüchechereerüin naaʼin wanee wayuu sutuma tü nüpülainkat Maleiwa. Anasüjeseʼe wachuntule nümüin Jehová tü nüpülainkat süpüla wachecherüin waaʼin (Luc. 11:13; Gal. 5:22, 23, TNM). David chi wachuntayüikai anülia suluʼu tü pütchikat apünüin, aʼyataashi maʼin nia süchiirua nikirajaainjachin sünain tü Bibliakat nümüiwaʼa. Niyaawata aaʼu nuʼuraajüinjachin maʼin nümüin Jehová süpüla nuuntuin tia. Anuu nünüiki: «Tachuntuin nümüin Jehová süpüla tatüjain tachecherüinjatüin taaʼin. Nükaalinjain taya Jehová süpüla taaʼinrüin tia. Oʼttushi taya sünain ekirajawaa sünain tü Bibliakat, ayatayüiya taya maaʼulu sünain».

12. Saashin Eclesiastés 11:4, ¿kasa waaʼinrajatka süpüla wountuin tü waʼyataweekalü anain?

¹² Nnojo paʼatapajüin tü kaʼi mapüleejeetkalü oʼu pümüin paaʼinrüin wanee kasa. Eesüjaʼa nnojorüle sünteerüin tia kaʼikat. Jimatüle neʼe waya sünain aʼatapajaa süntüin tia kaʼikat, eesüjaʼa nnojoleerüle wountuin tü waʼyataweekalü anain (paashajeʼera Eclesiastés 11:4). Anuu nünüiki wanee wawala kanüliakai Dayniel süchiki tia: «Waʼyataamaatüle sünain wanee kasa suulialeʼeya waʼatapajüin waaʼinrüin tia mapa, eesüjaʼa wayaawatüle saaʼu waneirua kasa eeka süpüla wountuin atuma tü waʼyataweekalü anain». Anuu nünüiki Paul wanee wawala chejeʼewaikai Uganda: «Paaʼinramaatüle tü kasa puunteetkalü atuma tü piʼyataweekalü anain, naapeerü Jehová naʼanasia pümüin» (Mal. 3:10).

13. ¿Jamüsü anaka waaʼinrüle shiʼipaʼaya tü kasa wounteetkalü atuma tü waʼyataweekalü anain?

¹³ Paaʼinra shiʼipaʼaya tü kasa puunteetkalü atuma tü piʼyataweekalü anain. Eesü nnojorüle waaʼin sünain tü waʼyataweekalü anain jülüjale waaʼin nnojoleerüin wountuin shia. Müle pukuwaʼipa, nnojo jülüjain paaʼin paaʼinramaatüinjatüin süpüshuaʼa tü kasa puunteetkalü atuma tü piʼyataweekalü anain. Jamüshijaʼa piʼyataweere süchiirua punouteʼerüin wanee kasa sünain pukuwaʼipa jee isale püchiki punouteʼeramaatüin shia, anasü punouteʼerüle shia shiʼipaʼaya. Piʼyataale süchiirua paashajeʼerüin tü Bibliakat süpüshuaʼa, anasü paashajeʼerüle shia paliʼirawai soʼukaiwai. Tomáš chi wachuntayüikai anülia paalapa,  kapüleesü maʼin nümüin nuuntuin naashajeʼerüin tü Bibliakat süpüshuaʼa soʼu wanee juya. Anuuka nünüiki süchiki tia: «Süka tayaawatüin saaʼu iseerüin tachiki taashajeʼerüin shia süpüshuaʼa soʼu wanee juya, toʼttaka tachikuaʼa sünain aashajeʼeraa shia sümaa nnojoluin jülüjain taaʼin taashajeʼerüinjatüin shia süpüla wanee juya. Tü taaʼinrakat shia taashajeʼerüin palitchon pütchi soʼukaiwai sümaa tasakireʼerüin taaʼin süchiki tü tekirajaakalü anain. Saaʼujee taaʼinrüin tia, kamalain kamalain müsü tamüin taashajeʼerüin tü Bibliakat». Naashajeʼerawalin Tomáš tü Bibliakat soʼukaiwai süka kamalainpain maʼin nümüin. Nuuntakalaka tü niʼyataakalü achiirua, naashajeʼerüitpa tü Bibliakat süpüshuaʼa. c

14. Püküja süchiki waneirua kasa iseetka atuma wountuin tü waʼyataweekalü anain.

¹⁴ Mayaainjeʼe keeʼireein waaʼin wountuin tü kasa waʼyataweekalü anain, eesüjaʼa sülatalaʼa sümüle wanee kasa wamüin kapüleejeetka atuma wountuin tü waʼyataweekalü anain nümüin Jehová (Ecl. 9:11). Eesüjaʼa sülatüle wamüin wanee müliaa mojeetka atuma waaʼin jee matchinjeetka atuma waaʼin (Prov. 24:10). Eesüjaʼa waaʼinrüle wanee kasa nnojotka anain sutuma waleʼeruʼuin süchiki tü kaainjalaakat. Saaʼujee tia, eesüjaʼa nnojoleerüle wekeraajüin tü waʼyataweekalü anain maaʼulu (Roma 7:23). Eesüjaʼa kapüleere wamüin wountuin tü waʼyataweekalü anain sutuma mapüsain waya (Mat. 26:43). ¿Kasa waaʼinrajatka suulia sümalajaain waaʼin süchiirua tü waʼyataweekalü anain?

15. Sülatüle wamüin wanee kasa mojusü, ¿jamüshii nnojoliinjanaka wooʼulaain suulia tü waʼyataweekalü anain nümüin Jehová? (Salmo 145:14).

¹⁵ Nnojo jülüjain paaʼin puuʼulaainjatüin suulia tü kasa piʼyataweekalü anain sutuma tü alatakat pümüin. Eesüjaʼa weʼrüle wainma müliaa saashin tü Bibliakat. Süküjainña tü Bibliakat nükaalinjain waya Jehová süpüla ayatüin waʼyataain süchiirua tü waʼyataweekalü anain nümüin (paashajeʼera Salmo 145:14). Anuu tü nümakat Philip chi wachuntayüikai anülia suluʼu pütchi waneesia: «Nnojotsü  taaʼinmaain maʼin tü kaʼi isakalü oʼu tachiki tountuin tü taʼyataweekalü anain, shia jülüjaka taaʼin tü taaʼinrakat süpüla ayatüin taʼyataain süchiirua tia». Jülüjataa waaʼin tü nümakat David. Müshi nia: «Sülatüle tamüin wanee kasa, nnojotsü shapaain maʼin taaʼin, süka jamüin, tatüjaain saaʼu eein süpüla taaʼinrüin kasa jaʼyeetka atuma alin Jehová tapüla». Shiimain tia nümakat, jaʼyeerü saaʼu wakuwaʼipa talateein naaʼin Jehová watuma ayatüle waʼyataain süchiirua tü waʼyataweekalü anain nümüin mayaainjeʼe sülatüin kasa wamüin. Talatakajasaʼa maʼin naaʼin Jehová niʼrapa tü waaʼinrakat.

16. ¿Kasa jülüjainjatka waaʼin eere wanee kasa ataʼülaka wakuwaʼipa suulia tü waʼyataweekalü anain nümüin Jehová?

¹⁶ Pütüja sünainjee tü kasa kapüleesü alatakat pümüin. Püsakireʼera paaʼin sünain tüü: «¿Kasache taaʼinrajatka suulia sütaʼülüin takuwaʼipa wanee kasa kapüleesü alataka tamüin?» (Prov. 27:12). Nnojorüle wountuin tü waʼyataweekalü anain mayaainjeʼe wooʼulaküin shia wainmatua, ¿waʼwanajaainjatche shia? Süpüla pütüjaain saaʼu puʼwanajaainjatüle tü piʼyataweekalü anain, jülüja paaʼin müleka iseerüle maʼin püchiki puuntuin tü kasa püneekakat. d Nnojotsü jülüjain naaʼin Jehová mojuin pukuwaʼipa sutuma nnojoluin puuntuin wanee kasa saaʼujee isain püchiki paaʼinrüin (2 Cor. 8:12, TNM).

17. ¿Jamüsü jülüjainjatka waaʼin tü kasa wountuitpakat?

¹⁷ Jülüja paaʼin tü puuntuitpakat. Süküjain tü Bibliakat lotuin nukuwaʼipa Maleiwa otta nnojoluin motuin naaʼin tü kasa waaʼinrakat (Heb. 6:10, TNM). Makalaka anain nnojorüle motuin paaʼin tü kasa anasü paaʼinrakaʼaya, maʼaka saaʼin aleewain maʼin pia nümaa Jehová, pujuʼitüin sünain aküjaa pütchi jee woutiisain pia. Maʼaka puuntuin waneirua kasa piʼyataweeka anain nümüin Maleiwa, eesiaʼaya süpüla puuntuin mapeena tü piʼyataweekalü anain nümüin (Filip. 3:16).

18. ¿Kasa sotuinjatka paaʼin sümaʼinruʼu piʼyataain süchiirua tü piʼyataweekalü anain? (Piirakaa sümüin tü ayaakuaakat).

¹⁸ Sükajee nükaalinjain pia Jehová puunteerü tü piʼyataweekalü anain nümüin maʼaka nuuntuin chi anuwapuʼukai nüntüin sümaa talatüin naaʼin eewaire nia. Wainma anuwapuʼu eʼraka kasa kamalainka namüin sümaʼinruʼu eewaliire naya. Müsüjeseʼe nnojoluin müin wattakai saaʼin namüin eewaliire nantüin. Meechia pia, eesü süpüla talatüin paaʼin sümaʼinruʼu puuntuin tü piʼyataweekalü anain nümüin Jehová. Meerü pukuwaʼipa jülüjale paaʼin nükaalinjain pia Jehová (2 Cor. 4:7). Ayatüle piʼyataain süchiirua tü piʼyataweekalü anain nümüin Jehová, wainmeerü kasa anasü piʼraka (Gal. 6:9).