1, 2. (1) ¿Jamüsü nountaka na jimaʼaliikana otta na majayünnüükana eejiraain naya nümaa Satanaa otta tü yolujaakalüirua? (Piirakaa sümüin tü ayaakuaakat). (2) ¿Kasa wekirajaainjatka anain?

NAASHIN chi aluwataaushikai Pablo, müshii waya maʼaka naaʼin na surulaatkana. Sünainshii waya wanee atkawaa otta meʼrujusalii na waʼünüükana, nia Satanaa otta tü yolujaa nümaajatkalüirua. Kakaliainna naya sünain atkawaa otta yalayalashii maʼin naya sünain atkawaa. Sünainjee tia, eesüjaʼa müle kapüleekai saaʼin pümüin eejirawaa namaa, shialeekajaʼa jimaʼaire jee majayürüle pia. ¿Eeshiiche süpüla eejiraain na jimaʼaliikana jee na majayünnüükana namaa naya meʼrujusaliikana? Jamüsaʼa, eeshii süpüla eejiraain naya otta shia naaʼinraka tia maaʼulu. ¿Jamüsü süpüla nountüin tia? Shia süka eein nanain nütsüin Jeʼwaa otta tü korolo naapakat Jeʼwaa namüin süpüla natkaayain nümaa Satanaa (paashajeʼera Éfeso 6:10-12).

² Wanaa sümaa nüküjain Pablo süchiki tü atkaayakat, eesüjaʼa shiale jülüjain naaʼin tü atkaaya namaʼanapuʼukat na surulaat chajanakana Roma (Aluw. 28:16). Wekirajaainjatü anain süchiki tia atkaaya nümakat Pablo. Wekirajaajeerü anain tü namakat waneinnua jimaʼalii otta majayünnüü süchiki tü kapüleekat namüin jee tü kasa  anasü neʼrakat sünainjee naapaain tü korolo atkaaya naapakat wamüin Jeʼwaa.

3, 4. ¿Kasa wanaawaka aluʼu tü shiimainkat sümaa tü siʼira naʼatapuʼukat na surulaat chajanakana Roma?

³ (Paashajeʼera Éfeso 6:14). Naashin Pablo, oonowaa «waneepia sümaa tü shiimainkat nüchikikat chi Maleiwakai», müsü aka saaʼin aʼata tü siʼira naʼatapuʼukat na surulaat chajanakana Roma. Eepuʼusü siʼira kanainka kachueera suulia sülanüin naʼapüla na naʼünüükana otta süpülajatü ichein nanain tü nasheʼin kachueera naaʼintoʼupünaakat. Akaʼaya shia, süpülajatü nükacherüin sünain tü chajaruuta otta rüi nülüʼüjakat sünain atkawaa. Ichere nüsiʼirain wanee surulaat nünain, nnojotsü wainmajüin naaʼin nuʼunapa sünain atkawaa.

⁴ Saaʼinmajapuʼuin na surulaatkana tü siʼira nanainpuʼukat suulia naʼapüla na naʼünüükana. Müsia neʼe wakuwaʼipa sutuma tü shiimain watüjakat sünainjee Nünüiki Maleiwa, saaʼinmajüin waya suulia tü alawaa ekirajünakat (Juan 8:31, 32; 1 Juan 4:1). Shiʼipaʼaya kojutuin wamüin tü shiimainkat, mapüleejeerü wamüin pansaain wakuwaʼipa sümaa tü nuluwataakalü anain waya Maleiwa, müle shia watuma, müsü wanainkai saaʼin «tü sheʼin kachueerakat» waaʼintoʼupünaka (Sal. 111:7, 8; 1 Juan 5:3). Akaʼaya wayaawatüle maʼin saaʼu tü shiimainkat, atüjeena waya asoutaa saaʼu tü wanoujakalü anain (1 Ped. 3:15).

5. ¿Jamüsü waküjainjatka tü shiimainkat waneepia?

⁵ Woonoo amaat tü sümakat tü Wiwüliakat otta waküjain tü shiimainkat süka kojutuin maʼin wamüin tü Nünüikikat Maleiwa. Nimeejüin maʼin Satanaa wayuu sükajee tü alawaakat. Mojusü nukuwaʼipa chi eekai nüküjain naʼalain otta numojujain nukuwaʼipa chi nüküjakai amüin alawaa (Juan 8:44). Müsüjeseʼe wachajaain maʼin sukuwaʼipa süpüla nnojoluin waküjain alawaa mayaapejeʼe waleʼeruʼuin tü kaainjalaakat (Éf. 4:25). Kapüleepejeʼe tia, anuusaʼa sünüiki Abigail, 18 suuyase: «Müsü nnojotkai anain aküjaa tü shiimainkat waneepia, shialeekajaʼa choʼujaale waküjain alawaa süpüla wanoutuin wanee kasa». ¿Jamüsüche süchajaaka sukuwaʼipa Abigail süpüla nnojoluin süküjain alawaa? Müsü shia: «Shia süpüla anainjatüin taaʼin nuʼupala Jeʼwaa otta sükajee tia, nütüjaa aaʼu chi tashikai, tü teikat otta na taʼaleewainkana sünain matüjain taya aküjaa alawaa». Anuu sünüiki Victoria, 23 suuyase: «Wanaa sümaa püküjain tü shiimainkat otta pusoutuin saaʼu tü punoujakalü anain, meeʼerapalasü pia atumawaa. Eʼrapajaʼa wayuu kasa anasü sünainjee aküjaa tü shiimainkat, nnojoleerü müin mmotkai saaʼin, arütkaajeerü nünainmüin Jeʼwaa otta kojuteerü pia namüin na wayuu aikana apüla pia». Anashaatasü maʼin poonoole sümaa tü shiimainkat, tü makalü aka saaʼin tü siʼira nanaipuʼukat na surulaat chajanakana Roma.

6, 7. ¿Kasa wanaawaka aluʼu «tü sheʼin kachueerakat» sümaa tü lotookalü akuwaʼipaa?

⁶ «Tü sheʼin kachueerakat» nanainpuʼuka na surulaat chajanakana Roma, aainjünawaisü süka kachueera pachaʼawasü. Naaʼintoʼupünaasü jee saaʼupünaasü nütünakii tü kachueera aainjünakalü aka tia sheʼinkat. Tia kachueera pachaʼawakat, aütaanüsü sünain paaʼata süka gancho otta hebilla aainjuushi süka kachueeraya.  Kajapuʼushii na surulaatkana sutuma «tü sheʼin kachueerakat» otta nanoutawalinjatü tü eekai sumojujaain sünain. Nnojotpejeʼe alatüin jatü otta chajaruuta nanainmüin sutuma tia sheʼinkat, saaʼinmajüin tü naaʼinkat jee waneirua kasa nüleʼeruʼuka.

⁷ Tü nuluwataakalü anain waya Jeʼwaa saaʼinmajüin tü waaʼinkat, müsüjeseʼe müin shia maʼaka saaʼin «tü sheʼin kachueerakat» (Prov. 4:23). Nnojotsü niiʼiratüin wanee surulaat tü nüsheʼin kachueerakat sümaa wanee eekai jawaʼawain. Akaataajaʼa wayakana, nnojotsü weeʼiratüin tü nuluwataakalü anain waya Jeʼwaa sümaa tü jülüjakat neʼe waaʼin wamüiwaʼa. Nnojoishii waya atüjain maʼin maʼaka naaʼin Jeʼwaa otta nnojotsü süpüla saaʼinmajüin tü waaʼinkat tü jülüjakat neʼe waaʼin wamüiwaʼa (Prov. 3:5, 6). Sutuma tia, choʼujaasü wanaʼlawalin sümüin «tü sheʼin kachueerakat» wanainka süpüla watüjaain saaʼu müleka saaʼinmajüle tü waaʼinkat.

8. ¿Jamüsü anaka oonowaa sümaa tü nuluwataakalü anain Jeʼwaa?

⁸ ¿Müsüche kapükai saaʼin pukuwaʼipa sutuma tü nuluwataakalü anain Jeʼwaa? Anuu nünüiki Daniel, 21 nuuyase: «Asirajüshii taka na profesootkana jee na takonpainyeetsekana sutuma taaʼinrüin tü sümakat tü Wiwüliakat. Mmoleʼeshi taya otta mojushaatasü taaʼin waneepia sutuma tia». ¿Jamakaʼa naaʼin Daniel maaʼulu? Anuu nünüiki: «Tayaawata aaʼu mapa tü kasa anasü eekat sünainjee oonowaa sümaa tü nuluwataakalü anain Jeʼwaa. Noʼutku na kamaatalapuʼukana taya, akaijüliishii yüi mapa otta eeshii eekai nojuʼitüin suulia koleejiaa. Mojushaatasü nakuwaʼipa mapa. Naaʼinmajüin waya Jeʼwaa suulia müin wakuwaʼipa». Anuu sünüiki wanee jintut Madison sünülia, 15 suuyase: «Kapüleesü tamüin oonowaa nümaa Jeʼwaa otta kapüleesü tamüin nnojoluin wanaawain taya namaa na takonpainyeetsekana». ¿Kasakaʼa saaʼinrüin Madison süpüla eejiraain shia sümaa tia? Anuu sünüiki: «Jülüjasü taaʼin nünüliamaain taya Maleiwa otta jülüjasü taaʼin nushutüin Satanaa taaʼu sükajee nuuʼulaküin taaʼin. Wanaa sümaa eejiraain taya sümaa tia, anasü taaʼin».

9-11. (1) Müshii waʼatakai wanain wanee sapaata maaʼulu, ¿kasa kayaawaseka tia? (2) ¿Kasa paaʼinrajatka süpüla anain paaʼin sünain aküjaa pütchi?

⁹ (Paashajeʼera Éfeso 6:15). Nnojoishi yapain wanee surulaat romaano süpüla atkawaa nnojorüle naʼatüin nünain tü nüsapaatse atkaayakat. Tia sapaatakat aainjuushi süka paaʼata ejittaaushi otta apünüintuasü shia. Kettaashaanasü nanain na surulaatkana sümaa ichein shia.

¹⁰ Na surulaat chajanakana Roma naʼatapuʼuin nanain tü nasapaatsekat süpüla yapainjanain naya süpüla atkawaa, maaʼulu yaa müshii waʼatakai wanain wanee sapaata maʼaka saaʼin tia süpüla waküjainjanain tü pütchi anasükat (Isa. 52:7; Roma 10:14, 15). Ayatapajaʼa choʼujaain maʼin wamüin meimmoluinjanain waya süpüla aküjaa pütchi. Anuu nünüiki wanee jimaʼai Bo nünülia, 20 nuuyase: «Mmotpuʼushi taya tamaiwa seema aküjaa pütchi namüin na takonpainyeetsekana suluʼu koleejiaka. Eesü shiale sutuma japülin taya. Nnojotpejeʼe tayaawatüin aaʼu jamüin japüika taya. Aluʼujasaʼa jooluʼu, kamalainshaatasü tamüin aküjaa pütchi namüin na wanaawakana ouyase tama».

¹¹ Watta naalii jimaʼalii otta majayünnüü  ayaawatakana saaʼu anain naaʼin sünain aküjaa pütchi yapatüjürüle natuma tü nanüikinjatkat. ¿Kasaka paaʼinrüinjatüin süpüla yapain putuma tü pünüikinjatkat? Anuu sünüiki Julia, 16 suuyase: «Toʼunapa koleejialuʼumüin, alüʼüjawaisü taya karaloʼutairua suluʼu taaʼawalia otta taapajüin nanüiki na takonpainyeetsekana süchiki wanee kasa jee süchiki tü nanoujakalü anain. Sutuma tia, tatüjaa aaʼu tü anakat süpüla taküjain namüin. Yapale tatuma tü tanüikinjatkat, tatüjaajeerü aaʼu tü taküjainjatkat namüin süpüla anain nakuwaʼipa». Eesü wanee majayüt Makenzie sünülia, 23 suuyase, müsü sünüiki: «Kamaneere pia otta jülüjale paaʼin tü namakat na pukonpainyeetsekana, pütüjaajeerü aaʼu tü alatakat namüin. Taashajeʼerawalin süpüshuaʼa tü pütchi napülajatkat na jimaʼaliikana jee na majayünnüükana. Sutuma taaʼinrüin tia, taashajeʼerüin wanee pütchi eekai anain namüin suluʼujee tü Wiwüliakat otta jw.org». Yapale pia süpüla aküjaa pütchi, müsü aka saaʼin paʼatüle pünain wanee sapaata eekai kettaashaatain pünain.

12, 13. ¿Kasa wayu tü makalü aka saaʼin jatü nutuma Satanaa?

¹² (Paashajeʼera Éfeso 6:16). Jutpünasü tü taapüla nalüʼüjapuʼukat na surulaat chajanakana  Roma, antaleesia natünakiimüinreʼeya. Anashaatasü süka nnojoluin süpüla sülatüin nanainmüin najatüin jee nachajaruutse na naʼünüükana.

¹³ Wanee kasa maka aka saaʼin jatü nutuma Satanaa shia tü alawaa nümakat nüchiki Jeʼwaa. Nunoujireein pia Satanaa sünain nnojoluin kasajachin pia nümüin Jeʼwaa otta maalin pia nüpüla. Maʼwaisü Ida, wanee majayüt 19 suuyase. Anuu sünüiki: «Müshi wattakai naaʼin Jeʼwaa toulia otta müshi nnojoikai aleeweein nia tamaa». ¿Kasaka saaʼinrüin süpüla eejiraain shia sümaa tia? Müsü shia: «Akatsüinraasü maʼin tanoula sutuma tü outkajawaakat. Sümaiwa, oʼunapuʼusü neʼe taya sünain tü outkajawaakat sümaa nnojoluin tasoutayaain shiʼipajee tü asakinnakalü anain. Taaʼinruʼu tayaka, nnojotsü jaralüin kasajatüin amüin tasoutule sünain outkajawaaka. Eekajasaʼa maaʼutpünaa yaa, tekirajaa anainrü tü pütchi süpülajatkat tü outkajawaakat otta asoutawaisü taya piantua jee apünüintua. Eesü kapüleere tamüin aaʼinraa tia, anapejeʼe maʼin taaʼin tasoutawaipa sünain tü outkajawaakat otta natütüleʼerüin taaʼin na tawalayuukana. Oʼunusü taya süchikijee tü outkajawaakat sümaa tatüjaain saaʼu alin taya nüpüla Jeʼwaa».

14. ¿Kasa watüjaka sünainjee tü alatakat sümüin Ida?

¹⁴ Eesü wanee kasa watüjaka sünainjee tü alatakat sümüin Ida: tü taapüla nalüʼüjapuʼukat na surulaat chajanakana Roma matüjainsat aʼwanajawaa sajaʼapüin, eekajasaʼa tü wanoulakat eesü süpüla katsüinjaain jee matsüinjaain, waya neʼe aneekaka tia (Mat. 14:31; 2 Tes. 1:3). Choʼujaasüjeseʼe maʼin wakatsüinrüin tü wanoulakat.

15, 16. ¿Kasa wanaawaka aluʼu tü waʼatapajakat sümaa tü uwon kachueerakat?

¹⁵ (Paashajeʼera Éfeso 6:17). Tü uwon kachueera nanainpuʼukat na surulaat chajanakana Roma suuliajatü sheewaʼalaain nekii, nanut otta noʼupünaa. Otta eesü uwon eekai kajapuluʼujiain süpüla najapüipain shia chi surulaatkai.

¹⁶ Maʼaka nnojoluin sheewain nikii wanee surulaat sutuma naʼatüin nünain tü uwon kachueerakat, anasü tü wekiiruʼujutkat sutuma waʼatapajüin woʼtteʼennüinjanain (1 Tes. 5:8; Prov. 3:21). Sutuma tü waʼatapajakat, jülüjasü waaʼin waneepia tü naaʼinrajatkat Jeʼwaa otta nnojotsü amatsüinjaain wanoula sutuma tü eekai sülatüin wamüin (Sal. 27:1, 14; Aluw. 24:15). Süpüla anainjatüin tü wekiiruʼujutkat, wanoujainjatü sünain shiimain shikeraajeerüin tü waʼatapajakat. Müinjatü waʼatakai wanain tü uwon kachueerakat, nnojotsü wajapüipainjatüin neʼe shia.

17, 18. (1) ¿Kasa naaʼinraka Satanaa süpüla waakatüin tü uwon kachueera wanainkat? (2) ¿Kasa waaʼinrajatka süka nnojoluin wemeejünüin nutuma Satanaa?

¹⁷ ¿Kasa naaʼinraka Satanaa süpüla waakatüin tü uwon kachueera wanainkat? Jülüjataa paaʼin tü naaʼinreekat nümüin Jesuu. Nütüjaakajasaʼa aaʼu Satanaa naʼatapajüin Jesuu tü kaʼi nuluwataainjachikalü oʼu saaʼu wayuu yaa mmapaʼa. Eʼrüinjachi Jesuu nümüliala süpülapünaa tia jee oʼutunajachi aaʼin. Shiasaʼa süchikijee tia, naʼatapajüinjatü tü kaʼi nüneekakat Jeʼwaa süpüla niʼitaain nia sünain aluwatawaa. Sutuma tia, ooʼulakünüsü naaʼin Jesuu nutuma Satanaa süpüla nuluwataamaatüinjachin. Nüküjain Satanaa nümüin Jesuu naapüinjatüin tü suumainkalüirua wayuu nümüin süpüla nuluwataainjachin saaʼu müleka nuʼwaajüle nia (Luc. 4:5-7). Nütüja aaʼu Satanaa naapüinjatüin Jeʼwaa wamüin wainma kasa suluʼupa waya tü mma jeketkat, waʼatapajüinjatpajaʼa tü sükaliakat tia nutuma Jeʼwaa otta eʼrüinjana waya wamüliala süpülapünaa tia. Sutuma tia, nuuʼulaküin waaʼin Satanaa süpüla kachiiruain waaʼin kamaʼanaa wainma korolo maaʼulu. Shia keeʼireeka naaʼin  palajanain watuma tia kasakalüirua suulialeʼeya Nuluwataaya Maleiwa (Mat. 6:31-33, TNM).

¹⁸ Wainmainna na wawalayuu jimaʼalii otta majayünnüü emeejünakana nutuma Satanaa. Anuu sünüiki wanee majayüt Kiana sünülia, 20 suuyase: «Tatüjaa aaʼu shiain neʼe anoutaajeerüin atuma wakuwaʼipa tü Nuluwataayakat Maleiwa». ¿Kasa jülüjaka saaʼin Kiana otta kasa saaʼinraka sutuma sütüjaain saaʼu tia? Jülüjasü saaʼin yüüʼülaa sümeerüin süpüshuaʼa tü kasa kachiiruakat naaʼin na manoujainsaliikana, nnojotsü jülüjain saaʼin ekirajawaa suluʼu wanee eʼikülee miyoʼu süpüla wainmain nneerü sükanain, shia saaʼinmaaka aʼyatawaa nümüin Jeʼwaa.

19, 20. ¿Kasa waaʼinrajatka süpüla watüjain maʼin süpüleerua tü Wiwüliakat?

¹⁹ Shiatapünaa meetüro sajaʼapüin tü chajaruuta nalüʼüjapuʼukat na surulaat chajanakana Roma sümaiwa (20 pulgadas). Atüjashii maʼin naya atkawaa süka tia chajaruutakat sutuma nekirajaain waneepia.

²⁰ Naashin Pablo, tü Nünüikikat Maleiwa müsü aka saaʼin wanee chajaruuta naapaka wamüin Jeʼwaa. Choʼujaapejeʼe watüjain maʼin süpüleerua süpüla wasoutuin saaʼu tü wanoujakalü anain jee süpüla wanoutuin tü jülüjakat waaʼin (2 Cor. 10:4, 5, TNM; 2 Tim. 2:15). ¿Kasa paaʼinrajatka süpüla pütüjain maʼin süpüleerua tü Wiwüliakat? Anuu nünüiki Sebastian, 21 nuuyase: «Wanaa sümaa taashajeʼerüin tü Wiwüliakat, tashajüin wanee wetsiikulo sünainjee wanee kapiitulo taashajeʼerakat. Tashajajüin tü wetsiikuloirua kamalainkat tamüin. Sutuma taaʼinrüin tia, wanaawasü tü jülüjakat taaʼin sümaa tü jülüjakat naaʼin Jeʼwaa». Anuu sooʼomüin nünüiki Daniel, chi waküjakai achiki suluʼu ekirajaaya 8: «Suʼunnaa taashajeʼerüin tü Wiwüliakat, taneekajüin tü wetsiikuloirua taashajeʼerüinjatkat sümüin wayuu taküjapa pütchi. Anasü sümüin wayuu kamalainre pümüin tü Wiwüliakat otta püchajaale sukuwaʼipa süpüla pükaaliinjain naya».

21. ¿Jamüshii nnojoliinjanaka mmoluin waya neema Satanaa otta seema tü yolujaakalüirua?

²¹ Sutuma tü namakat na jimaʼalii jee na majayünnüü wachuntakana anülia sünain ekirajaayakat tüü, wayaawata aaʼu nnojoliinjanain waya mmoluin neema Satanaa otta tü yolujaakalüirua. Mayaapejeʼe pülain naya, nnojotsü alanaʼaleein napülain suulialeʼeya nüpülain Jeʼwaa. Akaʼaya naya, nnojotsü katüin noʼu süpüla kaʼikat süpüshuaʼa. Alüʼütsü maʼin nakalia süpüla nasürünnüin soʼu miit juya, Nuluwataapa Jesuu saaʼu tü Mmakat, süchikijee tia ajaʼlajeʼennüinjana (Alat. Map. 20:1-3, 7-10). Watüjaaitpa aaʼu nüchiki chi waʼünüükai, tü nimeejakalü aka waya otta tü keeʼireekat naaʼin. Eeshii süpüla eejiraain waya nümaa chi Yolujaakai süka nükaaliinjain waya Jeʼwaa.