1, 2. (1) ¿Kasa süküjaka wamüin Proverbios 16:31 nachiki na wawalayuu laülaayuukana? (2) ¿Kasa wekirajaajeetka anain sünain ekirajaayakat tüü?

CHAA Arkansas (Estados Unidos) eesü wanee parque eere wainmain maʼin diamante jachitüin mmoluʼu. Mayaainjeʼe neʼrüin shia na wayuu awaraijaakana, nnojotsü nayaawatüin saaʼu sujutu süka sütaluʼuyülüin shia.

² Na wawalayuu laülaayuu waneepiakana nümaa Jeʼwaa müshii aka saaʼin tia diamantekat. Saashin tü Bibliakat kojutushi wanee wayuu eekai laülaain (paashajeʼera Proverbios 16:31; 20:29). Eepejeʼe süpüla nnojoluin müin wayaawatakai saaʼin nojutu wamüin. Alanaʼaleesia nojutu na wawalayuu laülayuukana namüin na jimaʼaliikana jee na majayünnüükana suuliaʼaleʼeya wanee korolo kojutusü. Sünain ekirajaayakat tüü, wekirajaajeerü anain tüü: ¿jamüshii maka aka saaʼin wanee korolo kojutusü nümüin Jeʼwaa na wawalayuu laülaayuukana?, ¿jamüshii kojutuka naya sümüin nupueulose Jeʼwaa?, ¿kasa waaʼinrajatka süpüla watüjain sünainjee nakuwaʼipa?

3. Sünainjee tü sümakat Salmo 92:12-15, ¿jamüsü watüjaaka saaʼu kojutuin nümüin Jeʼwaa na wawalayuu laülaayuukana?

³ Kojutushii nümüin Jeʼwaa na wawalayuu laülaayuukana. Nütüjaa aaʼu tü suluʼukat naaʼin jee tü nakuwaʼipakat. Sutuma kakaliainnain naya sünain aʼyatawaa nümüin Jeʼwaa, wainma kasa natüjaka. Talatüshi maʼin Jeʼwaa namaa süka nekirajüin na jimaʼaliikana jee na majayünnüükana (Job 12:12; Prov. 1:1-4). Kojutusü nümüin Jeʼwaa nachecherüin naaʼin soʼunnaa müliaa (Mal. 3:16). Mayaainjeʼe sülatawalin namüin kasa mojusü, jaʼyasü naaʼu kanoulain naya nünain Jeʼwaa. Maaʼulu yaa naʼatapashaatain  tü naapüinjatkat Maleiwa namüin suulialeʼeya paala noʼttaiwaʼaya sünain anoujaa. Aishii naya nüpüla Jeʼwaa süka ayatüin naküjain pütchi nüchiki (paashajeʼera Salmo 92:12-15).

4. ¿Kasa eeka süpüla sütütüleʼerüin naaʼin na wawalayuu laülaayuukana?

⁴ Laülaaichire pia soto paaʼin nnojoluin motuin naaʼin Jeʼwaa tü kasa anasü paaʼinrapuʼukat (Heb. 6:10). Sutuma püküjain pütchi sümaa talatüin paaʼin, talatüshi Jeʼwaa pümaa. Püchecherüiria paaʼin soʼunnaa kasa kapüleesü, kojutusü pümüin tü nümakat Maleiwa süchiki wuleinjatüin sukuwaʼipa wayuu nuʼupala, anasü putuma tü aʼyatawaa aapünakat pümüin suluʼu nupueulose Maleiwa jee pikirajüin na waneinnua süpüla natüjain. Jüüjüüshi pia sümüin tü anoutunakat sutuma nupueulose Maleiwa. Otta müsia pükaalinjain jee pütütüleʼerüin naaʼin na wawalayuu aʼyataakana waneepia nümüin Jeʼwaa. Aishi maʼin pia nüpüla Jeʼwaa, nnojoleena niyüülajüin na waneepiakana nümaa (Sal. 37:28). Anuu nünüiki Jeʼwaa: «Jaʼitairü kasuuin puʼwala, ayateechi takaalinjain pia» (Is. 46:4). Nnojo jülüjain paaʼin nnojolin jaloulin pia namüin na wawalayuukana, choʼujaashi pia namüin.

5. ¿Kasa jülüjainjatka naaʼin na wawalayuu laülaayuukana?

⁵ Wainma kasa eeka süpüla naaʼinrüin na wawalayuu laülaayuukana. Eeshiijaʼa nnojoliire katchin maʼin naya maʼakaapuʼu paala, wainma kasa natüjaka apüleerua süka nalatüinnapain süchikumüin wainma kasa. Eesü süpüla naapüin Jeʼwaa namüin waneirua aʼyatawaa maʼaka naapapuʼuin shia paala namüin waneinnua aʼyataalii nümüin. Wekirajaa sünain tia.

6, 7. Püküja süchiki nakuwaʼipa waneinnua wayuu laülaayuu namaiwajana eʼrakana kasa anasü nutuma Maleiwa sutuma waneepiain naya nümaa.

⁶ Aküjünüsü suluʼu tü Bibliakat süchiki nakuwaʼipa waneinnua wayuu aʼyataakana nümüin Jeʼwaa mayaainjeʼe laülaayuuin naya. Noʼutku naya wayuukana nia Moisés, 80 nuuyase wanaa sümaa nüneekünüin süpüla nünüikimaainjachin nia Maleiwa jee nekiipüʼüinjachin nia na israeliitakana. Jee wane nia Daniel, eesüjaʼa süpüla sülatüin 90 nuuyase, ayatapejeʼe nünüikimaajachin nia Jeʼwaa. Otta waneʼeya nia chi aluwataaushikai Juan, eesüjaʼa süpüla sülatüin 90 nuuyase wanaa sümaa nüshajüin tü karaloʼuta Alateetkat Mapeena.

 ⁷ Wainma na wayuu aʼyataapuʼukana nümüin Maleiwa sümaiwa nnojoliikana eʼraajünüin maʼin sutuma wayuu. Niʼraajapejeʼe naya Jeʼwaa, wainma kasa anasü naapaka namüin jee kojutushii naya nümüin. Noʼutku naya wayuukana, nia Simeón, wayuu anashi nia noʼuluʼu Maleiwa süka jüüjüüin waneepia nümüin. Mayaainjeʼe nnojoluin saashajaain maʼin tü Bibliakat nüchiki Simeón, niʼraajüin maʼin nia Jeʼwaa jee nüküjain nümüin nnojolinjachin outuin nia süpülapünaa niʼrüin Kürisüto. Nüneeküin nia Jeʼwaa süpüla nüküjainjatüin wanee pütchi ekeraajüinjatka nünain Jesuu jee sünain tü niikat (Luc. 2:22, 25-35). Eetaasü waneʼeya, Ana sünülia. Shia wanee wayuu outa aʼwayuuset jee nünüikimaajatü shia Maleiwa, 84 suuyase. Matüjainsat shia ojuʼitaa suluʼujee tü piichi aʼwaajüleekat Maleiwa. Kojutusü nümüin Maleiwa Ana süka waneepiain shia nümaa otta nnojoluin outuin shia süpülapünaa shiʼrüin Kürisüto (Luc. 2:36-38).

8, 9. ¿Kasa ayataka naaʼinrüin na wawalayuu jieyuu outakana aʼwayuuse?

⁸ Maaʼulu yaa, wainma na wawalayuu laülaayuu anakana akuwaʼipa napüleerua na jimaʼaliikana jee na majayünnüükana. Jülüjataa waaʼin tü saaʼinrakat wanee wawala kanüliakat Lois Didur, pürekutsootsü pesiaat shia wanaa sümaa 21 suuyase chaa Canadá. Kasaatsü shia nümaa wanee wawala kanüliakai John otta wainma juya nalapalaain naaʼu na wawalayuukana. Shiasaʼa mapa, aʼyataashii naya suluʼu tü Weteet chajatkat Canadá, alatüsü suulia 20 juya naʼyataain chayaa. Ounejaanüshii naya süpüla naʼyataainjanain nümüin Maleiwa chaa Ucrania wanaa sümaa 58 suuyase. «Laülaainna waya süpüla wakolojooinjanain suluʼumüin wanee mma naata», ¿müshiiche naya? Nnojo, naapaa amaat tia aʼyatawaakat otta aneekünüshi Jhon süpüla napüshin na Laülaashii Jülüjakana aaʼin tü Aʼyatawaakat suluʼu tü Weteet chajatkat Ucrania. Akaratshi juya mapa, anaajaashi chi suʼwayuusekai jee makatüsü shia suluʼu tia Weteetkat. Mayaainjeʼe 81 suuyase maaʼulu, ayatüsia aʼyataain nümüin Jeʼwaa chaa Ucrania jee aisü maʼin shia napüla na wawalayuukana.

⁹ Eeshii waneinnua wawalayuu nnojoliikana eʼraajünüin maʼin outapa naʼwayuuse maʼaka saaʼin Lois. Kojutpejeʼe naya nümüin Jeʼwaa. Nnojotsü motuin naaʼin Jeʼwaa tü kasa naaʼinrakat süpüla nakaalinjain naʼwayuuse soʼunnaa wainma juya otta kojutusü nümüin süka waneepiain naya nümaa (1 Tim. 5:3). Otta atütülaasia naaʼin na jimaʼaliikana jee na majayünnüükana nanainjee.

10. ¿Kasa watüjaka sünainjee nukuwaʼipa Tony?

¹⁰ Eeshii waneinnua wawalayuu laülaayuu aaʼinmajünakana suluʼu piichi napülajatka na laülaayuukana, kojutpejeʼe naya wamüin. Jamüshijaʼa Tony aaʼinmajünüshi nia suluʼu wanee piichi napülajatka na laülaayuukana. Woutiisashi nia akoosütoʼu soʼu 1942 chaa Pensilvania (Estados Unidos), 20 nuuyase soʼu tia. Piama juya shiatapünaamüin püreesain nia süka niyoutuin surulaalüinjachin nia. Tony sümaa Ilda, tü nuʼwayuusekat, nekirajüin na piamashiikana  nachonnii nüchiki Maleiwa joʼuuiwaʼaya naya. Wainma juya niain Tony chi laülaashi akumajakai napüleerua na laülaashiikana tü aainjünajatkat sümüin tü outkajaaleekat. Otta shikiipüʼüpuʼushi nia tü outkajawaakat miyoʼu piantuakat juyawai. Akaʼaya nia niapuʼushi oʼuniraka sukuwaʼipa tü outkajawaakat suluʼu wanee kaatset sümaa nikirajapuʼuin sünain tü Bibliakat chayaa. Mayaainjeʼe 98 nuuyase, ayatüsia nüchajaain sukuwaʼipa süpüla nükooʼomüinrüin niʼyataain nümüin Jeʼwaa jee nükaalinjain na wawalayuukana.

11. ¿Kasa waaʼinrajatka süpüla kojutuin wamüin na wawalayuu kepiakana suluʼu piichi napülajatka na laülaayuukana jee na isakana achiki nojuʼituin nepialuʼujee?

¹¹ Eesü waneirua kasa waaʼinrajatka süpüla kojutuin wamüin na wawalayuu kepiakana suluʼu piichi napülajatka na laülaayuukana jee na isakana achiki nojuʼituin nepialuʼujee sutuma ayuulin naya. Nachajaainjatü sukuwaʼipa na laülaashiikana napüleerua na wawalayuukana süpüla nakaalinjain naya sünain aküjaa pütchi, süpüla noʼunuin sünain tü outkajawaakat jee shiale süpüla naapajüin shia. Eeshii süpüla wawaraijaain naaʼu jee waashajaain namaa suluʼupünaa videollamada. Jülüjainjana maʼin waaʼin na wawalayuu laülaayuu outkajaakana wamaa jee wattain nepia. Eeshii na nnojoliikana aashajaain maʼin süchiki nakuwaʼipa. Akatchinraajeetpejeʼe waaʼin wasakirüle naya süchiki tü kasa anasü neʼrakat sutuma suluʼuin naya nupueulose Jeʼwaa.

12. ¿Jamüshii weʼraajüinjanaka na wawalayuu laülaayuu outkajaakana wamaa?

¹² Eeshii noutkajaale wamaa wawalayuu laülaayuu anakana akuwaʼipa wapüleerua sutuma waneepiain naya nümaa Maleiwa. Jülüjataa waaʼin sukuwaʼipa wanee wawala kanüliakat Harriette, chejeʼewat shia Estados Unidos otta kakaliairü shia sünain aʼyatawaa nümüin Jeʼwaa chaa Nueva Jersey. Sükolojooka süpüla kepiainjatüin shia sümaa tü süchonkat. Nayasaʼa na wawalayuu juutkajaakana amaa jooluʼu nachajaain sukuwaʼipa süpüla neʼraajüinjatüin shia jee nayaawataka saaʼu müin shia namüin maʼaka saaʼin wanee korolo kojutusü. Süküjaka Harriette namüin tü alatakat sümüin wanaa sümaa süküjain pütchi soʼutpünaa tü juyakat 1925 suʼttaiwaʼaya sünain anoujaa. Soʼu tia, sülüʼüjawalüin tü süsepiiyase suʼlojiainjatkalü aka sai müleka süpüreesajinnüle sutuma süküjain pütchi. Jamüsüjaʼa soʼu juyakat 1933, püreesasü shia piantua jee alatitsü shia wanee semaana suluʼu tia kaatsetkat. Sümaʼinruʼu chajatüin shia püreesain, nia chi suʼwayuusekai aaʼinmajaka na apünüinshiikana süchonnii, nnojoishi Aküjalin pütchi chi suʼwayuusekai. Kojuta maʼin wamüin na wawalayuu laülaayuu waneepiakana nümaa Maleiwa maʼaka saaʼin Harriette.

13. ¿Jamüshii kojutuka na wawalayuu laülaayuukana sümüin nupueulose Jeʼwaa?

¹³ Kojutushii na wawalayuu laülaayuukana sümüin nupueulose Jeʼwaa. Neʼrüin naya wawalayuukana tü kasa anasü naapakat Jeʼwaa namüin jee tü naapakat sümüin nupueulose. Atüjashii naya süpüleerua nakuwaʼipa sünainjee tü mojukuwaʼipatkat natuma, makalaka eein süpüla watüjain sünainjee nakuwaʼipa jee tü natüjakalü apüleerua (Prov. 18:4). Wachajaale sukuwaʼipa süpüla weʼraajüin naya, akooʼomüinraajeerü tü wanoulakat.

14. ¿Kasa naaʼinrajatka na jimaʼaliikana jee na majayünnüükana saashin Deuteronomio 32:7?

¹⁴ Wachajaa sukuwaʼipa süpüla yootuin waya namaa na wawalayuu laülaayuukana (paashajeʼera Deuteronomio 32:7). Eeshiijaʼa moʼupainnale naya, isale nachiki nawarairaain jee nnojorüle jaʼyain nanüiki, ayatayütpejeʼe keeʼireein naaʼin jaloulin naya nümüin Jeʼwaa, akaʼaya naya kojutushii nümüin Jeʼwaa sutuma tü naaʼinrapuʼukat (Ecl. 7:1, noota).  Jülüjainjatü waaʼin jamüin kojutukana naya nümüin Jeʼwaa otta kojutuinjana naya wamüinya. Washata nukuwaʼipa Eliseo, aʼalijiraashi nia süka nnojoluin nüpüteein Elías, müshijeseʼe nümüin nümüin apünüintua: «Shiimain nnojoijeechin takatalaain puulia» (2 Rey. 2:2, 4, 6).

15. ¿Kasa anaka süpüla wasakirüin anain na wawalayuu laülaayuukana?

¹⁵ Wasakira na wawalayuu laülaayuukana süpüla kapülainjatüin waaʼin nakuwaʼipa, wayaawatüinjatpejeʼe saaʼu wanüiki waaʼinrapa tia (Prov. 1:5; 20:5; 1 Tim. 5:1, 2). Eeshii süpüla wasakirüin naya sünain tüü: «Jimaʼaliiwaʼaya pia, ¿kasa piyaawataka atuma shiimain tü pikirajaakalü anain suluʼu tü Bibliakat? ¿Kasa aleewaka anainjee pia nümaa Jeʼwaa? ¿Kasa paaʼinraka süpüla ayatüin piʼyataain nümüin Jeʼwaa sümaa talatüin paaʼin?» (1 Tim. 6:6-8). Sümaʼinruʼu naküjain tia wamüin, waapaja nanüiki.

16. Naashajaapa wanee jimaʼai nümaa wanee wawala laülaa, ¿jamüsü sütütülaajiraaka naaʼin?

¹⁶ Naashajaapa wanee jimaʼai nümaa wanee wawala laülaa, atütülaajiraasü naaʼin (Roma 1:12). Niyaawateerü aaʼu chi jimaʼaikai naaʼinmajüin Jeʼwaa na waneepiakana nümaa otta niyaawateerü aaʼu chi laülaakai alin nia apülaa jee talateerü naaʼin sünain aküjaa süchiki tü kasa anasü naaʼinrakat Jeʼwaa nüpüleerua.

17. ¿Jamüshii anaka noʼuluʼu Jeʼwaa na wawalayuu laülaayuukana sülata sülata sümapa tü juyakalüirua?

¹⁷ Wanee wayuu eekai jimaʼalin anashi aaʼinchi nia, shiasaʼa laülaapa nia amülouisü tia nuulia, müsia tü sukuwaʼipakat wanee majayülü. Anapejeʼe naya noʼuluʼu Jeʼwaa sülata sülata sümapa tü juyakalüirua (1 Tes. 1:2, 3, TNM). Müshii naya noʼuluʼu Jeʼwaa süka anain namüin nunouteʼerüin nakuwaʼipa nükajee chi naaʼinkai. Weʼraajüle maʼin na wawalayuu laülaayuukana jee watüjale nanainjee, meena naya maʼaka saaʼin korolo kojutusü wamüin.

18. ¿Kasa wekirajaajeetka anain sünain tü wane ekirajaayakat?

¹⁸ Atütülaasü naaʼin na wawalayuukana sutuma kojutuin namüin na jimaʼaliikana jee na majayünnüükana na wawalayuu laülaayuukana. Atütülaasia naaʼin wanaa sümaa kojutuin namüin na wawalayuu laülaayuukana na joʼuuyuukana noulia. Sünain tü wane ekirajaayakat, wekirajaweerü anain tü eekat süpüla naaʼinrüin na wawalayuu laülaayuukana süpüla kojutuin namüin na jimaʼalii jee na majayünnüü outkajaakana namaa.