ACHIKII
«Aʼyataweeshi taya nümüin Jehová»
OʼUNAJANA waya süchikijee wawaraijaain naaʼu waneinnua wayuu kepiakana pejepünaa sünain tü pueulokot Granbori suluʼu tü mmakat Surinam, unaʼapüjatü tia pueulokot. Woʼunaka suluʼu wanee anuwa shirokupünaa tü süchikat Tapanahoni. Wopuluʼupa waya süsheʼetuuka tü sümotootsekat sünain wanee ipa, shimerotoka. Ainkuushaatasü maʼin taaʼin sutuma. Mayaainjeʼe wainmatuain takua suluʼu anuwa sünain alapalawaa naaʼu na wawalayuukana, matüjainsai taya katünaa.
Süpülapünaa taküjain jümüin süchiki tü alatakat mapa, taküjainjatü jümüin palajana jamakuwaʼipalin taʼyataain waneepia nümüin Jehová.
Joʼuushi taya soʼu 1942 suluʼu tü mmakat Curazao, tia pasanainsü sünain palaa. Chejeʼewai chi tashikai Surinam, nukolojooka chamüin Curazao süpüla niʼyataain chayaa. Woutiisashi nia maʼaka piama juya süpülapünaa joʼuuin taya, nia noʼutku na wayuu palajanakana woutiisain chayaa. a Ekirajaashi nia wamaa sünain tü Bibliakat semaanawai mayaainjeʼe eein kaʼi nnojotka oʼu waaʼin sünain ekirajawaa. 14 touyase, okolojooshii waya wachikuaʼa chamüin Surinam süpüla waaʼinmajüin tü woushukot süka laülaain shia.
ANASÜ TAKUWAʼIPA NATUMA TAʼALEEWAINYUU
Chapa taya Surinam aleewashi maʼin taya namaa na jimaʼalii aaʼinmaakana naʼyataain nümüin Jehová. Wayuu müloʼuyuu naya toulia jee pürekutsoot rekulaat naya. Yootopa naya süchiki tü nakuwaʼipakat sünain aküjaa pütchi, jaʼyasü naaʼu talatüin naya. Süchikijee tü outkajawaakat, yootopuʼushii waya süchiki tü sümakat tü Bibliakat sümaʼinruʼu wanajüin tü shüliwaikat aipoʼu. Tayaawata aaʼu natuma tü keeʼireekat taaʼin: taʼyataainjachin nümüin Jehová. Woutiisakalaka taya 16 touyase jee pürekutsootshi taya rekulaat 18 touyase.
ANASÜ MAʼIN TÜ TATÜJAAKALÜ AAʼU
Pürekutsootpa taya chaa Paramaribo.
Wainma kasa tatüjaka sümaʼinruʼu pürekutsoolin taya. Jalouisü maʼin tamüin tia sümaʼinruʼu taʼyataain waneepia nümüin Jehová. Wanee kasa tatüjaka shia choʼujaain maʼin tekirajüin na wawalayuukana. Pürekutsootpa taya, nikirajüin taya wanee wawala misioneero kanüliakai Willem van Seijl süpüla tatüjainjachin süpüleerua tü aʼyatawaa aapünakat tamüin suluʼu tü outkajaaleekat. b Soʼu tia, nnojotsü antapünaain suluʼu tekii choʼujaain maʼin tatüjainjachin süpüleerua tia. Wanee juya süchikijee tia, aneekünüshi taya süpüla pürekutsoolinjachin taya pesiaat. Toʼunaka sünain akaalinjaa na wawalayuu kepiakana unaʼapü chaa Surinam. Kojutushaatasü maʼin tamüin süka nekirajüin taya na wawalayuukana. Müsia jooluʼu tashatüin nakuwaʼipa, tekirajüin na waneinnua.
Wanee kasa tatüjaka shia anain maʼin nnojorüle wainmain kasa wamaʼana sümaa watüjain süpüleerua jeʼrainjatüin nneerü wakataajüin. Suʼttapa wanee kashi takumajüin sukuwaʼipa nümaa chi tawala chajachikai tamaa süpüla watüjaainjatüin saaʼu jeʼrain tü eküülü choʼujaakat wamüin süpüla tü wane semaanakalüirua. Süchikijee tia, eeshi toʼunule jee niale niakai oʼunuin pueulopaʼamüin sünain ayaʼlajaa tü kasa choʼujaakat wamüin. Kasetirainjatü watuma tü nneerü aapünakat wamüin, paliʼirüinjatü weküin süpüla süsetaainjatüin süpüla wanee kashi. Sajaʼttüle tü eküütkat süpülapünaa sajaʼttüin tü kashikat, nnojoleerü jaralüin akaalinjain waya. Süka tekirajünüin jimaʼaliiwaʼaya taya sünain nnojoluin choʼujaain wainmain kasa tamaʼana jee tatüjainjachin süpüleerua jeʼrainjatüin tanneetse takataajüin, taaʼinmaasü maʼin aʼyatawaa nümüin Jehová.
Wane kasa tatüjaka shia anain maʼin wekirajüle na wayuukana suluʼu tü anüikii naashajaakalü aluʼu. Miyoʼushi taya sünain aashajawaa tü anüikiikat holandés, inglés, papiamento otta surinamés (sranan münüsü shiayaa), tü anüikii saashajaakat wayuu chaa Surinam. Wanaa sümaa chajanain waya naʼaka na wayuu kepiakana unaʼapü, tayaawata aaʼu anain waküjale pütchi namüin suluʼu tü anüikii naashajaakalü aka, süka jamüin, naapaain maʼin amaa shia. Kapüleesü maʼin tamüin taashajaain waneirua anüikii maʼaka saaʼin saramacano süka eein pütchi emetuluinjatka watuma jee eesü tü eekai jiattainjatüin watuma. Anapejeʼe maʼin süka tekirajaain sünain tia anüikiikat süka wainmain na wayuu takaalinjakana sünain ayaawataa saaʼu tü sümakat tü Bibliakat suluʼu nanüiki.
Eepejeʼe tü kasa totchejaakalü amaa. Jamüsüjaʼa soʼu wanee kaʼi wanaa sümaa tasakirüin wanee tekirajüin sünain tü Bibliakat aashajaaka saramacano jamüin saaʼin sutuma alin süleʼe, shia neʼe tasakiraka anain ipuorüle shia. Mayaainjeʼe sülatawalin tamüin tia, ayatüsia tekirajüin wayuu suluʼu sünüiki.
TAAPAAIN WANEIRUA AʼYATAWAA
Soʼu 1970 aneekünüshi taya süpüla talapalaainjachin naaʼu na wawalayuukana. Soʼu juyakat tia, teeʼiyatüin tü videokot «Visitando la central mundial de los testigos de Jehová» namüin na wayuu kepiakana chaa unaʼapü. Süpüla woʼunajanain chamüin, anuwaluʼushii waya. Kachisesü maʼin tü anuwakat sümaa planta eléctrica, kosoliina, lámpara otta müsia tü eʼrajiakat video. Oʼuna müshiija waya sümaa tü wachisekalüirua sotpaʼajee tü süchikat chamüin eeinjanale waya. Tü sotokat maʼin taaʼin shia kojutuin maʼin namüin na wayuukana tü natüjaakalü aaʼu suluʼujee tia. Talatüshi maʼin taya süka tekirajüin naya nüchiki Maleiwa otta nachiki na aʼyataakana nümüin. Anaʼleesia maʼin tü naapakat tamüin Jehová suulialeʼeya tü mapüsaa teʼrakat sutuma wainmain kasa taaʼinraka.
WANEE JIIKU APÜNÜINTUASÜ
Kasaatshi taya sümaa Ethel settienpüroʼu soʼu 1971.
Tatüjaa aaʼu wainmain kasa eeka süpüla taaʼinrüin sünain aʼyatawaa nümüin Jehová sutuma maʼwayuusein taya, keeʼireepejeʼe taaʼin tachajaain wanee wayuu anaka süpüla taʼwayuuseein. Tachuntuin maʼin nümüin Jehová süpüla tantüin sünain wanee wayuu eekai süpüla shiʼyataain tamaa sünain akaalinjaa na wayuu kepiakana chaa unaʼapü. Maʼaka wanee juya süchikijee tia, teʼraajaka wanee wawala pürekutsoot pesiaat kanüliasü Ethel. Jintuluiwaʼaya shia süshateein maʼin nukuwaʼipa chi aluwataaushikai Pablo, aküjeesü maʼin pütchi maʼaka naaʼin. Kasaatshii waya soʼu 1971 jee ayatüshi taya alapalaain naaʼu na wawalayuukana sümaa.
Mapüleesat sümüin Ethel shikiʼralaain sünain alapalawaa naaʼu na wawalayuu kepiakana chaa unaʼapü, jama maʼletsein na wayuu kachooinkana shia. Jamüshiijaʼa walapalaainjanapa naaʼu na wawalayuu kepiakana chaa unaʼapü, nnojotsü walüʼüjain wainma kasa. Washijaain washeʼin jee oʼoojushii waya shiroku süchi. Kiʼrashii waya sünain ekaa tü eküülü aapünakat wamüin eere makatüin waya, shiale iwana, piraña jee tü eekat nolojuin na wawalayuukana. Nnojorüle iita, eküshii waya suluʼu süpana pülaʼana, nnojorüle kuchaara, eküshii waya süka wajapü. Sükajee tü waaʼinrakat sünain aʼyatawaa nümüin Jehová, aijiraashii maʼin waya otta aleewashii maʼin waya nümaa maʼaka ichein wanee jiiku apünüintuasü (Ecl. 4:12). Nnojotsü eein wanee kasa talataka atuma waya suulia tia.
Tü taküjakat jümüin paalapa, wanaa sümaa shimerotuin tü anuwakat wamaa, alatüsü süchikijee waleʼejüin unaʼapüjee. Akalajasaʼa eejatüin chaleco salvavida wanain soʼu tia. Piratüsü wüin tü anuwakat, wojotuin tü eküülü sulujutkat tü wayeetakat süpüla wayuʼluin tü wüinkat suluʼujee tü anuwakat.
Süka wojotuin weküin, olojushii waya jime sümaʼinruʼu suʼunuin tü anuwakat shirokupünaa tü süchikat, masitpejeʼe waya. Oʼuraajüshii waya
nümüin Jehová jee wachuntaka nümüin süpüla naapüin wamüin weküin soʼu tia. Shiasaʼa süchikijee woʼuraajüin, nütaʼülaka wanee wawala wanee jime muloʼushaata. Soʼu aikat tia, eküshii waya jaʼraishiikana jee emirashii waya.KAʼWAYUUSESHI, KACHONSHI OTTA ALAPALAASHI TAYA NAAʼU NA WAWALAYUUKANA
Jaʼrai juya süchikijee waʼyataain sünain alapalawaa naaʼu na wawalayuukana, ipuotsü Ethel. Talatüshi maʼin taya sünainjee tia, nnojotpejeʼe tatüjaain saaʼu jameerüin wakuwaʼipa mapeena. Keeʼireesü waaʼin waʼyataain waneepia nümüin Jehová müleka eere süpüla. Joʼuushi Ethniël, chi wachonkai, soʼu 1976 otta chi wane wachonkai, Giovanni, joʼuushi nia piama juya shiatapünaamüin süchikijee.
Soʼu 1983 woutiisashii waneinnua wawalayuu shiroku tü süchikat Tapanahoni, pejesü shia sünain Godo Holo wüinpümüin sünainjee Surinam.
Sutuma wainmain aʼyatawaa chaa Surinam, suchuntuin tamüin Weteet ayatüin talapalaain naaʼu na wawalayuukana chayaa. Tepichijaiwaʼaya na wachonniikana, nnojoishii wainmain maʼin na wawalayuu talapalaakana aaʼu. Sutuma tia, eeshi süpüla talapalaain naaʼu soʼu piama semaana süpüla kashikat jee pürekutsootshi taya eere toutkajaʼawalin namaa na tapüshikana. Oʼunapuʼusü tamaa Ethel otta na wachonniikana tawaraijaapa naaʼu na wawalayuu kepiakana pejepünaa sünain wepia. Oʼunapuʼushi taya tamüiwaʼa sünain tü outkajawaa miyoʼu aainjünakat chaa eere na wawalayuu kepiakana unaʼapü jee tawaraijaainjachipa naaʼu.
Wanaa sümaa talapalaapuʼuin naaʼu na wawalayuukana, oʼunajachi taya suluʼu anuwa eemüin na wawalayuu kepiakana wattapünaa.
Takumajüin sukuwaʼipa süpüshuaʼa tü taaʼinrajatkat süpüla tekeraajüin tü aʼyatawaa aapünakat tamüin otta süpüla taaʼinmajüin tapüshi. Ekirajaashi taya semaanawai sümaa tapüshi. Toʼunapa sünain alapalawaa naaʼu na wawalayuu kepiakana chaa unaʼapü shia Ethel ekirajapuʼuka wachonnii. Wachajaain maʼin sukuwaʼipa süpüla kottuin waya otta süpüla talatüin naaʼin wachonnii, maʼaka saaʼin washaitüin jee wapasiajaain namaa. Eesü siraale aikat taaʼu süpüla yapain tatuma tü taaʼinrajatkat waneemüin kaʼi sünain aʼyatawaa nümüin Jehová. Müsü sukuwaʼipa Ethel maʼaka süküjünüin suluʼu Proverbios 31:15, tütüsü maʼin shia. Amaalijapuʼusü shia süpüla waashajeʼerüin tü pütchi aashajeʼennakat wattaʼa maalü namaa na wachonniikana jee süpüla kottuin waya sünain asayuunajaa süpülapünaa noʼunuin na wachonniikana suluʼu koleejia. Kojutushaatasü maʼin tamüin tütüin maʼin taʼwayuuse jee sükaalinjain maʼin taya süpüla tekeraajüin süpüshuaʼa tü aʼyatawaa naapakat Jehová tamüin.
Tayakai sümaa Ethel wakaalinjain maʼin wachonnii süpüla alin Jehová napüla otta naʼyataain nümüin. Keeʼireepuʼusü waaʼin naneeküin naʼyataain waneepia nümüin Jehová süka naaʼin namüiwaʼa. Waküjain namüin waneepia tü talatakalü atuma waya sünain aʼyatawaa nümüin Jehová. Waküjapa namüin tü kasa kapüleesü alatakat wamüin, waküjain waneepia tü naaʼinrakat Jehová süpüla nükaalinjain waya. Wachajaain maʼin sukuwaʼipa süpüla aleewain naya namaa na wawalayuu aaʼinmaakana aʼyatawaa nümüin Jehová.
Naapüin Jehová waneepia tü kasa choʼujaakat wamüin. Tachajaapuʼuin maʼin sukuwaʼipa süpüla taaʼinrüin tü achuntunakat suluʼu tü Bibliakat namüin na kachonshiikana. Sutuma tü kasa alatakat tamüin wanaa sümaa pürekutsoolin pesiaat taya naʼaka na wayuu kepiakana unaʼapü, atüjashi taya süpüleerua anaajaa nneerü süpüla wayaʼlajüin tü kasa choʼujaweetkat wamüin mapeena. Mayaainjeʼe müin tia, eesü kaʼi eere choʼujaain wamüin wanee kasa. Niakalaka Jehová akaalinjain waya soʼu tia. Jamüsüjaʼa wanaa sümaa suʼttuin wanee atkawaa chaa Surinam, kapüleesü maʼin ousütaa sünain kasa chayaa, naaʼinmajapejeʼe waya Jehová soʼu tia (Mat. 6:32).
JÜLÜJASÜ TAAʼIN TÜ TAKUWAʼIPAKAT
Tepeʼeruʼujee sünainmüin tekialuʼujee: Sümaa taʼwayuuse Ethel.
Chi wachon miyoʼukai Ethniël sümaa nuʼwayuuse Natalie.
Chi wane wachonkai Giovanni sümaa nuʼwayuuse Christal.
Weʼrüin naaʼinmajüin waya Jehová, anain wakuwaʼipa jee talatüsü waaʼin nutuma. Na wachonniikana nüsülajaka wamüin Jehová jee kojutusü maʼin wamüin wepijüin naya süpüla naʼyataainjanain nümüin, talatüsü maʼin waaʼin süka naneeküin tia. Ethniël otta Giovanni agraduajüshii naya suluʼujee tü ekirajülee eekat natuma na aküjaliikana pütchi nüchiki Jehová jee aʼyataashii naya maaʼulu sümaa naʼwayuuse suluʼu tü Weteet chakat Surinam.
Laülaaichipa taya sümaa Ethel, ayatapejeʼe aʼyataain maʼin waya nümüin Jehová, pürekutsoot pesiaat waya. Kupaashii maʼin waya sünain aaʼinraa tia, nnojotkalaka apütaain kaʼi tapüla süpüla tatüjainjachin katünaa. Talatüsü maʼin taaʼin sutuma tü taaʼinrakat. Sotopa taaʼin tü takuwaʼipapuʼukat, tayaawata aaʼu anain maʼin tü taneekakat: taʼyataain waneepia nümüin Jehová jimaʼaliiwaʼaya taya.
a Paashajeʼera tü karaloʼutakat Anuario de los testigos de Jehová 2002, süpana 70.
b Paashajeʼera tü nüchikimaajatkat Willem van Seijl suluʼu tü pütchikat «La realidad ha superado mis expectativas», ojuʼitaka suluʼu ¡Eeja Waaʼin! oʼutuupüroʼu 8 soʼu 1999 (alijunaikiruʼusü).