1. ¿Jamüsü watüjaaka saaʼu nürütkaweein maʼin wanainmüin Jehová?

 NÜCHEKÜIN Jehová warütkaainjanain nünainmüin (Sant. 4:8). Nücheküin niainjachin Wamaleiwasein, niainjachin Washin otta niainjachin waʼaleewain. Asoutushi nia sümüin tü wachuntakat nümüin otta nümüliajüin waya soʼunnaa müliaa. Nikirajüin waya sümaa nuʼunirüin wakuwaʼipa nakajee na wawalayuu oʼunirakana sukuwaʼipa waʼyataain. ¿Kasa waaʼinrajatka süpüla warütkaain maʼin nünainmüin?

2. ¿Kasa waaʼinrajatka süpüla warütkaain nünainmüin Jehová?

² Arütkaashii waya nünainmüin Jehová woʼuraajüle, waashajeʼerüle tü Nünüikikat sümaa wasakireʼerüin waaʼin sünain. Waaʼinrüle tia, aijeechi nia wapüla otta kojuteechi nia wamüin. Keeʼireejeerü waaʼin woonooin sümaa nünüiki otta waʼwaajeechi nia (Alat. Map. 4:11). Sümaʼinruʼu weʼraajüin maʼin nukuwaʼipa weʼitaajeerü maʼin waaʼin nünain otta nanain na wawalayuu niʼitaakana süpüla naaʼinmajüin waya.

3. (1) ¿Kasa naaʼinraka chi Yolujaakai süpüla nükayaleʼerüin waya nuulia Jehová? (2) ¿Kasa waaʼinrajatka süpüla nnojoliin wakayalaain nuulia chi Wamaleiwasekai otta noulia na oʼunirakana sukuwaʼipa waʼyataain? (Sal. 31:13, 14).

³ Nüchajaapejeʼe sukuwaʼipa chi Yolujaakai süpüla nükayaleʼerüin waya nuulia Jehová, shialeekajaʼa soʼunnaa müliaa. Nüchajaain sukuwaʼipa süpüla wainmajüin waaʼin nünain Jehová otta nanain na oʼunirakana sukuwaʼipa waʼyataain. Eepejeʼe süpüla wayamülüin nia. Katsüinre wanoula otta weʼitaale maʼin waaʼin nünain Jehová, nnojoleena waya akayalaain nuulia otta noulia na oʼunirakana sukuwaʼipa waʼyataain (paashajeʼera Salmo 31:13, 14).

4. ¿Kasa wekirajaainjatka anain sünain ekirajaayakat tüü?

⁴ Sünain ekirajaayakat tüü, wekirajaajeerü anain apünüinsü kasa eeka süpüla naainjain wamüin na manoujainsaliikana, tü eekat süpüla wainmajüin atuma waaʼin nünain Jehová otta nanain  na wawalayuu oʼunirakana sukuwaʼipa waʼyataain. ¿Jamüsü eeka süpüla sükayaleʼerüin waya tia nuulia Maleiwa? ¿Kasa waaʼinrajatka süpüla wayamülüin Satanás?

5. ¿Jamüsü süpüla wainmajüin waaʼin nünain Jehová otta nanain na oʼunirakana sukuwaʼipa waʼyataain sutuma tü müliaa weʼrakat?

⁵ Eesü wachecherawaire waaʼin napüleeruapa waaʼin na wapüshi manoujainkana jee maʼyataainre waya. ¿Jamüsü süpüla sükayaleʼerüin waya tia nuulia Jehová otta wainmajüin waaʼin nanain na oʼunirakana sukuwaʼipa waʼyataain? Kakaliale müliain waya eesüjaʼa jülüjale waaʼin mepin tü alatakat wamüin otta seemiajaain wanoula. Najayateein wakuwaʼipa Satanás soʼu tia süpüla jülüjain waaʼin maalin waya nüpüla Jehová. Keeʼireesü naaʼin süntajaain suluʼu wekii niain Jehová kasirüin tü alatakat wamüin namaa na oʼunirakana sukuwaʼipa waʼyataain. Alatüsü tiaya namüin waneinnua israelita soʼunnaa chajanain naya Egipto. Nanouja anainrü paala nuluwataaushin Moisés nümaa Aarón nutuma Jehová süpüla taashinjanain naya suulia achepchia (Éx. 4:29-31). Shiasaʼa nükooʼomüinrapa faraón tü namülialakat, nia kasitka naashin Moisés nümaa Aarón tü alatakat namüin. Müshii naya namüin: «Nnaaʼasa aʼürülaain wanain jooluʼu faraón jutuma namaa na aʼyataashiikana nümüin. Jiʼitaaipa chajaruuta najapuluʼu süpüla noʼutuin waaʼin» (Éx. 5:19-21). ¡Mojutaʼaleesüjaʼa tü naaʼinrakat! Neʼitaain naaʼu nayain kasirüin tü alatakat namüin piamashii wayuu waneepiakana nümaa Jehová. Kakaliaichire piʼrüin pümüliala, ¿kasa paaʼinrajatka süpüla ayatüin piʼitaain paaʼin nünain Jehová otta nanain na oʼunirakana sukuwaʼipa waʼyataain?

6. ¿Kasa watüjaka sünainjee nukuwaʼipa Habacuc? (Habacuc 3:17-19).

⁶ Waküja süpüshuaʼa tü suluʼukat waaʼin nümüin Jehová otta wachunta kaalinwaa nümüin. Wainma müliaa niʼraka Habacuc chi nünüikimaajachikai Maleiwa. Eesüjaʼa nüsakirüle naaʼin shiimainre kachipünaain nia naaʼin Jehová. Nüküjakalaka nümüin jamüin naaʼin. Müshi nia: «Jehovákalee, ¿jeʼratuainjachikai maʼin taya achuntuin kaalinwaa pümüin sümaa nnojoluin paapajüin tanüiki? [...] ¿Jamüshikai piyüülajaka taya sünain anajaa saaʼu kasa mojusü?» (Hab. 1:2, 3). Asoutushi Jehová nümüin (Hab. 2:2, 3). Jülüjapa naaʼin Habacuc tü kasa naaʼinrakat Jehová süpüla taashinjanain nutuma na aʼyataashiikana nümüin, talatüsü naaʼin nüchikuaʼa. Talatüsü naaʼin saaʼu kachipünaain nia naaʼin Jehová otta nükaalinjeechin nia jaʼitasü kasain alatüin nümüin (paashajeʼera Habacuc 3:17-19). ¿Kasa watüjaka sünainjee tia? Weʼrapa müliaa, woʼuraaja nümüin Jehová, waküja nümüin jamüin waaʼin otta weʼitaa waaʼin nünain. Weʼitaa maʼin waaʼin sünain nükatsüinreerüin waaʼin Jehová soʼunnaa müliaa. Weʼrapa nükaalinjain waya, katsüinjeerü wanoula.

7. (1) ¿Kasa nüküjaka wanee süpüshi Shirley sümüin? (2) ¿Kasa saaʼinraka Shirley süpüla ayatüin shiʼitaain saaʼin nünain Jehová?

⁷ Waaʼinmaa tü waʼyataainkat nümüin Jehová. Tia shia tü saaʼinrakat wanee wawala soʼunnaa shiʼrüin müliaa, Shirley sünülia, kepiasü shia chaa Papúa Nueva Guinea. b Maʼletsesat shia sümaa süpüshi otta kapüleʼewaisü namüin nantüin sünain tü nayaalujutkat. Anuu nünüiki wanee süpüshi sümüin süpüla nnojoluinjatüin shiʼitaain saaʼin nünain Jehová: «Mataasü pümakai nükaalinjeerüin pia chi Maleiwakai sükajee tü nüpülainkat. ¿Jalakaʼa joo teʼrüin nükaalinjain pia? Ayatüsia maʼletsein pia. Amüla neʼe püküjain türa nünüikikat Maleiwa». Antajaasü shikiiruʼu Shirley saashin nnojoluin kachipünaain shia naaʼin Jehová sümaa süpüshi. Anuu sooʼomüin  sünüiki: «Toʼuraajamaataka nümüin Jehová, taküjain süpüshuaʼa tü suluʼukat taaʼin. Ayatüsia taashajeʼerüin tü Bibliakat otta tü karaloʼuta aapünakat wamüin, nnojotsü taya ooʼulaain suulia aküjaa pütchi otta suulia outkajawaa». Shiyaawata aaʼu Shirley shiimain naaʼinmajüin Jehová süpüshi, jama nnojoliin nalatirüin jamü otta ayatüin talatüin naaʼin. Anuu sünüiki: «Tayaawata aaʼu nusoutuin tamüin Jehová» (1 Tim. 6:6-8). Waaʼinmaale waʼyataain nümüin Jehová, nnojoleena sükayaleʼerüin waya nuulia tü müliaakat jee tü wainmajaakalü aaʼin.

8. ¿Kasa eeka süpüla saainjünüin namüin na wawalayuu laülaakana wapüleerua?

⁸ Aʼwalakajünüsü alawaa jee perulaa nachiki na wawalayuu oʼunirakana sukuwaʼipa waʼyataain suluʼupünaa noticia jee redes sociales (Sal. 31:13). Eeshii waneinnua wawalayuu püreesakana jee alirajünaka sünain kaainjalain naya. Alatüsia tia namüin na anoujashii namaiwajanakana. Alirajünüshi chi aluwataaushikai Pablo jee püreesashi nia sümaa nnojoluin kasain naainjalain. ¿Kasa naaʼinraka na anoujashii eejanakana soʼu kaʼikat tia?

9. ¿Kasa naaʼinraka waneinnua anoujashii püreesapa atumawaa Pablo?

⁹ Wanaa sümaa püreesain chi aluwataaushikai Pablo chaa Roma, eeshii waneinnua anoujashii apütaka nia nümüiwaʼa (2 Tim. 1:8, 15). ¿Japüishiiche naya naaʼujee Pablo saalinjee sülirajüin nia wayuu sünain kaainjalain nia? (2 Tim. 2:8, 9). ¿Mmottaapa naya suulia süpüleeruaanüin naaʼin? Nnojotsü watüjaain saaʼu jamüin napütaka nia nümüiwaʼa, shiapejeʼe watüjaain saaʼu mojuin maʼin naaʼin Pablo saalinjee tia. Eʼrüshi müliaa Pablo naaʼujee otta ajachijünüshi nia saaʼujee nükaalinjeein naya (Aluw. 20:18-21; 2 Cor. 1:8). Jalia waya suulia majüin wakuwaʼipa maʼaka naaʼin naya anoujashiikana. ¿Kasa sotuinjatka waaʼin süpüleeruaanapa naaʼin na wawalayuu laülaakana wapüleerua?

10. (1) ¿Kasa sotuinjatka waaʼin süpüleeruaanapa naaʼin na wawalayuu laülaakana wapüleerua? (2) ¿Jamüsü sotuinjatka waaʼin tia?

¹⁰ Soto waaʼin jamüin süpüleeruaanaka  waaʼin otta jaralin shikiishin tia. Anuu sünüiki 2 Timoteo 3:12: «Chi wayuu eekai keisalain sümüin nukuaippa nuʼupala Maleiwa, shiʼreechi amüin nia wayuu saaliijee nünoujain nünain Jesucristo». Nnojotkalaka ponuin waaʼin nushuteein Satanás naaʼu na wawalayuu laülaakana wapüleerua. Tü keeʼireekat naaʼin shia nooʼulaainjanain suulia waneepiain naya nümaa Jehová otta weimmolojooinjanain (1 Ped. 5:8).

11. ¿Kasa watüjaka nünainjee Onesíforo? (2 Timoteo 1:16-18).

¹¹ Ayata waneepiain waya namaa na wawalayuu laülaakana wapüleerua (paashajeʼera 2 Timoteo 1:16-18). Nükalioʼu Pablo eejachi wanee anoujashi akaalinjaka nia soʼunnaa püreesain. Anuu nünüiki Pablo nüchiki: «Niajaʼa neʼe Onesíforo nümüiwa nnojoika ayüülajüin taya. [...] Kamaneeshi nia tamüin mayaainje püreesain taya». Nüchajaain Onesíforo süpüla nüntüin nünain Pablo jee nükaalinjain nia. Naaʼinrüin tia mayaainjeʼe eein süpüla jamajüin nia atumawaa. ¿Kasa watüjaka nünainjee? Nnojo weimmolojooin neema na waneinnua süpüla wakaalinjain na wawalayuukana soʼunnaa süpüleeruaanüin naaʼin. Wasouta naaʼu na wawalayuukana otta wakaalinja naya (Prov. 17:17). Choʼujaashii wamülialüin naya sümaa wachecherüin naaʼin.

12. ¿Kasa watüjaka nanainjee na wawalayuu chakana Rusia?

¹² Jülüja waaʼin tü naaʼinrakat na wawalayuu chakana Rusia püreesapa atumawaa na wawalayuukana. Nümaanapa wanee wawala laülaapialuʼu, wainma wawalayuu oʼunakana nümaa sünain eʼrajaa nukua süpüla nachecherüin naaʼin. ¿Kasa watüjaka nanainjee? Nnojoliinjana waya eimmolojooin süküjünapa perulaa nachiki na wawalayuu laülaakana wapüleerua, püreesapa naya atumawaa otta süpüleeruaanapa naaʼin. Woʼuraaja naaʼu, waaʼinmaja napüshi otta wachajaa sukuwaʼipa süpüla wakaalinjain naya (Aluw. 12:5; 2 Cor. 1:10, 11).

13. ¿Jamüsü süpüla wainmajüin waaʼin naaʼu Jehová otta naaʼu na wawalayuukana sutuma waturaanüin?

¹³ Eeshii süpüla naturaain waya waneinnua wapüshi manoujainkana, na aʼyataajiraakana wamaa jee na koleejiajiraakana wamaa saaʼujee waküjain pütchi otta süka kojutuin wamüin tü pütchi nuluwataakalü anain waya Jehová süpüla wulein wakuwaʼipa (1 Ped. 4:4). Eesü süpüla müin nanüiki wamüin: «Kamaneeshi pia, kapüpejeʼe pukuwaʼipa sutuma tü anoujaakat». Eeshiijaʼa nayoujale waya saaʼujee tü wakuwaʼipakat namüin na ojuʼitinnakana waʼakajee sümaa namüin wamüin: «‹Aisü wayuu wapüla›, mapajeʼe jia sümaa müin jukuwaʼipa mayaa». Waapapa tia pütchikat, eesüjaʼa wainmajüle waaʼin sümaa wasakireʼerüin waaʼin sünain tüü: «¿Nuchuntuinche tamüin Jehová kasa kapüleeka süpüla taaʼinrüin? ¿Shiimainchejeʼe wainmain kasa napülajaka toulia na wawalayuu oʼunirakana sukuwaʼipa waʼyataain?». Pikiiruʼule tia, ¿kasa paaʼinrajatka suulia pükayalaain nuulia Jehová otta noulia na wawalayuukana?

14. ¿Kasa waaʼinrajatka suturaale waya wayuu süka kojutuin wamüin tü nuluwataakalü anain Jehová? (Salmo 119:50-52).

¹⁴ Ayata waaʼinrüin tü nuluwataakalü anain Jehová. Ayatüsia naaʼinrüin Job tü nuluwataakalü anain Jehová mayaainjeʼe suturaain nia wayuu. Eejachi wanee naʼaleewainyaashi Job nimeejeein nia shiiʼiree nunoujain nnojoluin kasajatüin nümüin Maleiwa naaʼinrüle tü nuluwataakalü anain (Job 4:17, 18; 22:3). Nnojoipejeʼe oonooin Job sümaa tia alawaakat. Nütüjaa aaʼu anain tü nuluwataakalü anain Jehová süchiki tü anakat jee tü mojukat jee oonooshi nia waneepia sümaa. Nnojotsü nuuʼulaain shimeejüin nia wayuu süpüla yarüttüin nukuwaʼipa noʼuluʼu Maleiwa (Job 27:5, 6).  ¿Kasa watüjaka nünainjee? Waturaanapa, nnojoluinjatü wainmajüin waaʼin anale tü pütchi nuluwataakalü anain Jehová. Jülüja waaʼin jamüin anaka wakuwaʼipa sutuma waaʼinrüin tü nümakat Maleiwa. ¿Aashin kojuyatuairüin weʼrüin anain wakuwaʼipa sutuma? Ayata suchuntaain waaʼin naʼakain waya na wawalayuu kojutukana amüin tü nuluwataakalü anain Maleiwa. Waaʼinrüle tia, nnojoleena waya akayalaain nuulia Jehová, jaʼitashii suturaain waya wayuu (paashajeʼera Salmo 119:50-52).

15. ¿Jamüsü suturaanaka Brizit?

¹⁵ Waashajaa süchiki sukuwaʼipa Brizit, wanee wawala kepiaka chaa India. Aturaanüsü maʼin shia natuma na süpüshikana saaʼujee Süküjalüin pütchi. Woutiisasü shia soʼu 1997 otta maʼyataainra nümaka chi suʼwayuusekai, manoujainsai nia. Nakolojookalaka eemüin nüpüshi chi suʼwayuusekai, wattajatü tia pueulokot. Akooʼomüinraapejeʼe tü kasa alatakat sümüin Brizit chayaa. Süka alin shiiʼiree aʼyatawaa nüpüleerua chi suʼwayuusekai, shiʼyataaka maʼin otta wattajatü suulia tü Piichi Outkajaaleekat, maʼaka saaʼin 350 kiloometüro. Saaʼujee Süküjalüin pütchi eʼrüliishii wayumüin sümüin na nüpüshikana chi suʼwayuusekai. Süka kapüleein maʼin sümüin Brizit tü alatakat, akolojooshii nachikuaʼa. Shiasaʼa sülatalaʼa sümaka wanee kasa, anaajaashi chi suʼwayuusekai, shiasaʼa mapa anaajaasü wanee süchon sutuma kanserüin shia, 12 suuyase neʼe. Akaʼaya na süpüshikana Brizit, neʼitaain saaʼu shiain kasirüin tü alatakat sümüin. Nnojotsüjeʼe alatüin tia sümüin naashin nnojorüle süküjalüin pütchi nüchiki Jehová. Ayatapejeʼe shiʼitaain saaʼin nünain Jehová.

16. ¿Kasa anasü shiʼraka Brizit sutuma pejein shia nünain Jehová otta nanain na wawalayuukana?

¹⁶ Süka wattajatüin shipia Brizit suulia tü Piichi Outkajaaleekat, nüküjaka sümüin wanee wawala alapalaai naaʼu na wawalayuukana eein süpüla süküjain pütchi eere kepiain shia otta saainjain tü outkajawaakat shipialuʼu. Müsü kapüleekai saaʼin sümüin saaʼinrüin tia, saaʼinrapejeʼe tü nümakat chi wawalakai sümüin. Suʼttaka sünain aküjaa pütchi, sünain aainjaa tü outkajawaakat shipialuʼu otta ekirajaasü shia semaanawai namaa na süchonniikana soʼu  tü ai naʼwaajakalü oʼu Maleiwa. ¿Kasa shiʼraka suluʼujee tia? Wainma na shikirajakana sünain tü Bibliakat otta wainma na woutiisakana mapa. Pürekutsootsü rekulaat shia soʼu 2005. Shiʼrüin naʼanasia Jehová sutuma shiʼitaain saaʼin nünain otta waneepiain shia namaa na wawalayuukana. Aʼyataashii na süchonniikana nümüin Jehová otta eeitpa piamasü outkajaalee peje sünain shipia. Shiyaawata aaʼu Brizit niain Jehová akatchinraka saaʼin soʼunnaa tü müliaa shiʼrakat otta soʼunnaa suturaanüin sutuma süpüshi.

17. ¿Kasa ayatüinjatka waaʼinrüin?

¹⁷ Keeʼireesü naaʼin Satanás jülüjain waaʼin nüpüteenain waya Jehová wamüiwaʼa soʼunnaa müliaa otta sukooʼomüinraajeerüin tü müliaa weʼrakat jüüjüüle waya sümüin tü naluwataakalü anain waya na wawalayuu oʼunirakana sukuwaʼipa waʼyataain. Keeʼireesü naaʼin weimmolojooinjanain süküjünapa perulaa nachiki na wawalayuu laülaakana wapüleerua, süpüleeruaanapa naaʼin otta püreesapa naya atumawaa. Sutuma waturaanüin, keeʼireesü naaʼin Satanás wainmajüin waaʼin sünain tü nuluwataakalü anain waya Jehová otta nanain na wawalayuukana. Watüjaapejeʼe saaʼu tü kasa nimeejeekalü aka waya otta eejüsü waaʼin suulia nimeejüin waya (2 Cor. 2:11, TNM). Wayouta tü nimeejeekalü aka waya, waneepia waya nümaa Jehová otta namaa na wawalayuu oʼunirakana sukuwaʼipa waʼyataain. Soto waaʼin nnojoleenain nüpütüin waya Jehová wamüiwaʼa (Sal. 28:7). Nnojo wooʼulaain kasain akayaleʼerüin waya nuulia Jehová (Roma 8:35-39).

18. ¿Kasa wekirajaainjatka anain sünain tü wane ekirajaayakat?

¹⁸ Sünain ekirajaayakat tüü, wekirajaa anainrü tü kasa mojusü eekat süpüla naaʼinrüin na manoujainsaliikana wamüin. Tia shia tü eekat süpüla wainmajüin atuma waaʼin nünain Jehová otta nanain na wawalayuu oʼunirakana sukuwaʼipa waʼyataain. Eepejeʼe süpüla wainmajüin waaʼin nanain sutuma mojuin waaʼinruʼu wanee kasa naaʼinraka na wawalayuukana. ¿Kasa waaʼinrajatka süpüla walatüin süchikumüin tia? Wekirajaajeerü anain tia sünain tü wane ekirajaayakat.