1, 2. (1) ¿Kasa alataka namüin waneinnua wawalayuu? (2) ¿Jamüsü naaʼin sutuma tia?

JÜLÜJATAA waaʼin tü alatakat namüin apünüinshii wawalayuu: Eeshi wanee wawala jimaʼai antünakai anain wanee ayuulii aisü, maʼlainsat naaʼin sutuma. Eetaashi wanee wawala 50 nuuyase süsapoʼumüin, ojutunushi suulia niʼyataain otta nnojotsü nuusütüin wane shiiʼiraka. Eetaasü wanee wawala jaʼapüirü, jülüjasü saaʼin isaitpain süchiki sükooʼomüinrüin shiʼyataain nümüin Jeʼwaa.

² Sülatüirüle pümüin tü alatakat namüin naya wawalayuukana, eesüjaʼa jülüjale paaʼin nnojoluin kasain anain apüla pia. Suluʼujee tia, eesüjaʼa mojule paaʼin, nnojorüle anain tü jülüjakat paaʼin püchikijiraa jee mojujiraale pia namaa na waneinnua.

3. (1) ¿Jamüsü watüjaaka saaʼu mojutuin wayuu nümüin Satanaa? (2) ¿Jaralii na wanaawakana aaʼin nümaa?

³ Wanaawasü naaʼin na manoujainsaliikana nümaa Satanaa, nnojotsü kojutuin wayuu nümüin. Mayaainjeʼe nütüjaain saaʼu outeerüin Eva nnojorüle soonooin sümaa nünüiki Maleiwa, nüküjain sümüin eein süpüla laülaain shia saaʼu sukuwaʼipa nnojorüle soonooin sümaa nünüiki Maleiwa. Nuʼunirüin Satanaa sukuwaʼipa tü iküleesia ekirajakat sünain alawaa, tü poliitikakat otta nuʼunirüin sukuwaʼipa oikawaa jee ayaʼlajaa wanee kasa. Nnojotkalaka ponuin waaʼin mojutuin jee müliain saaʼin wayuu natuma na poliitikokana, na shikiipüʼükana tü iküleesia ekirajakat sünain alawaa otta na wayuu aʼyataakana sünain oikaa jee ayaʼlajaa kasa.

4. ¿Kasa wekirajaainjatka anain sünain ekirajaayakat tüü?

⁴ Naatapejeʼe nukuwaʼipa Jeʼwaa, nücheka achikit watüjaainjatüin saaʼu kojutuin waya nümüin otta nükaalinjeena waya müle nnojotkai kasain anain apüla waya saaʼin wamüin (Sal. 136:23;  Roma 12:3). Sünain ekirajaayakat tüü, wekirajaajeerü anain süchiki tü naaʼinrakat Jeʼwaa süpüla nükaalinjain waya ayuuire waya, maʼyataainre waya otta jülüjale waaʼin isaitpain wachiki waʼyataain nümüin süka laülaainnain waya. Wekirajaa palajana sünain jamüin wanoujaka sünain kojutuin waya nümüin Jeʼwaa.

5. ¿Jamüsü watüjaaka saaʼu sülanaʼaleein wojutu nümüin Jeʼwaa?

⁵ Mayaainjeʼe nukumajalain waya Jeʼwaa süka sümamüla mma, alanaʼaleesia maʼin wojutu nümüin (Gén. 2:7). Wekirajaa sünain waneirua kasa wayaawataka akajee kojutuin waya nümüin Jeʼwaa. Jamüshiijaʼa waya nukumajüin waya sünain müin aka nukuwaʼipa (Gén. 1:27). Naata wakuwaʼipa nutuma Jeʼwaa suulia tü waneirua kasa nukumajalakat saaʼu tü Mmakat. Niʼitaain waya süpüla laülaainjanain waya saaʼu tü kasa mmapajatkat jee saaʼu tü kasa shirokujatkat palaa, saaʼu tü kasa waawatakat iipünaapünaa jee saaʼu tü kasa mmapaʼajatkat süpüshuaʼaleʼeya (Sal. 8:4-8).

6. ¿Kasa maa wayaawataka anainjee kojutuin wayuu nümüin Jeʼwaa?

⁶ Mayaainjeʼe kaainjalain Adán, nnojotsü mojutuin wayuu nümüin Jeʼwaa suluʼujee tia. Kojutushaatashii waya nümüin, müshijeseʼe naapüin nikii chi Nüchonkai waaʼu süpüla taashinjanain waya suulia waainjala (1 Juan 4:9, 10). Süka naapajiraain nikii Jesuu saaʼu waainjala, asoʼiraajeerü naaʼin na wayuu outakana sünainjee naainjala Adán, na wayuu aaʼinrapuʼukana kasa anasü otta na aaʼinrapuʼukana kasa mojusü (Aluw. 24:15). Nüküjain Jeʼwaa suluʼu tü Wiwüliakat jamüin kojutuka waya nümüin, nnojotsü shiain sünainjee anain waya, kaʼletsein waya jee tepichijain waya (Aluw. 10:34, 35).

7. ¿Kasa maa wanoujakalü anainjee kojutuin waya nümüin Jeʼwaa?

⁷ Wainma tü kasa naaʼinrakat Jeʼwaa wapüleerua saaʼu alin waya nüpüla. Nüntirüin waya nünainmüin otta nütüjaa aaʼu jüüjüüin waya sümüin tü pütchi anasükat (Juan 6:44). Arütkaashi Jeʼwaa wanainmüin süka niʼrüin warütkaain nünainmüin (Sant. 4:8). Aishii waya nüpüla Jeʼwaa makalaka wainmain tü kasa naaʼinrakat süpüleerua nikirajüin waya. Nütüjaa aaʼu jamüin maʼin wakuwaʼipa otta nütüjaa aaʼu tü wountakat. Nüchiaainya waya süka alin waya nüpüla (Prov. 3:11, 12). ¡Aikanache maʼin waya nüpüla Jeʼwaa naaʼinraka tia wapüleerua!

8. Sünainjee tü sümakat Salmo 18:27-29, ¿jamüsü aneetka waaʼin soʼunnaa tü kasa mojusü alatakat wamüin?

⁸ Nütüjaa aaʼu David alin nia nüpüla Jeʼwaa otta nükaalinjain nia, nüchecherüinjeseʼe naaʼin wanaa sümaa «wayuu nnojoikai kasain anain apüla» nümünüin (2 Sam. 16:5-7). Mojule maʼin waaʼin jee wainmale kasa mojusü alataka wamüin, nükaalinjeena waya Jeʼwaa suulia yüülain waaʼin suluʼujee tia otta süpüla walatüin süchikumüin (paashajeʼera Salmo 18:27-29). Nükaalinjeena waya Jeʼwaa, nnojoleetka eein wanee kasa ataʼülaka wakuwaʼipa suulia aʼyatawaa nümüin sümaa talatüin waaʼin (Roma 8:31). Wekirajaa sünain apünüinsü kasa sotuinjatka anainjee waaʼin alin waya nüpüla Jeʼwaa jee kojutuin waya nümüin.

9. ¿Jamüsü waaʼin ayuuire waya?

⁹ Mojusü waaʼin sutuma ayuulin waya otta jülüjasü waaʼin nnojoluinnapain jaloulin waya. Japüliwaasü waaʼin süka isain wachiki aaʼinraa waneirua kasa otta wachuntajanain kaalinwaa namüin na waneinnua. Jaʼitairü nnojoluin sütüjaain saaʼu wayuu ayuulin waya, eesüjaʼa japüliwaale waaʼin süka isaitpain wachiki aaʼinraa tü kasa waaʼinrapuʼukat sümaiwa. Nükatchinrapejeʼe waaʼin Jeʼwaa. ¿Kasa naaʼinraka süpüla nükatchinrüin waaʼin?

10. ¿Kasa atütüleʼereetka waaʼin ayuuire waya saashin Proverbios 12:25?

 ¹⁰ Atütülaajeerü waaʼin anale pütchi wamüin ayuuire waya (paashajeʼera Proverbios 12:25). * Watta saalii pütchi anasü nüküjaka Jeʼwaa suluʼu tü Wiwüliakat. Süsoʼirüin waaʼin tia sünain kojutuin maʼin waya nümüin Jeʼwaa, jaʼitashii ayuulin waya (Sal. 31:19; 41:3). Waashajeʼerawaire tia pütchikat, nnojoleerü mojuin maʼin waaʼin sutuma ayuulin waya.

11. ¿Kasa naaʼinraka Jeʼwaa nüpüleerua Jorge?

¹¹ Anuu tü alatakat nümüin Jorge. Wanaa sümaa jimaʼalin nia, oʼttüsü nünain wanee ayuulii matchin matchin maka atuma naaʼin. Suluʼujee müin nia, jülüjasü naaʼin nnojoluin kasain anain apüla nia. Anuu nünüiki Jorge: «Eetaayaai jülüjain taaʼin mojuinjatüin taaʼin sutuma tü ayuulii tanainkat otta japülinjachin taya sutuma. Mayein mayein müshi taya, jülüjaa müsü taaʼin jameerüin takuwaʼipa. Mojusü maʼin taaʼin, müshijeseʼe tachuntüin kaalinwaa nümüin Jeʼwaa». ¿Kasa naaʼinraka Jeʼwaa nüpüleerua Jorge? Anuu nünüiki süchiki tia: «Kapüleesü tamüin jülüjain taaʼin tü taashajeʼerakat, müshijeseʼe taashajeʼerüin neʼe waneirua wetsiikulo suluʼujee Salmos aashajaaka süchiki kachipünaain naaʼin Jeʼwaa na aʼyataakana nümüin. Anasü taaʼin sutuma taashajeʼerüin waneepia tia pütchikat. Eeshii na aküjakana tamüin sütütülaain naaʼin sutuma neʼrüin talatüin taaʼin mayaainjeʼe müin takuwaʼipa. Sünainjee tia, tayaawata aaʼu nusoutuin Jeʼwaa shiʼipajee tanüiki. Nükaalinjain taya süpüla nnojoluin mojuin maʼin taaʼin. Jülüjasü taaʼin tü sümakat tü Wiwüliakat süchiki kojutuin taya nümüin Jeʼwaa mayaainjeʼe müin takuwaʼipa».

12. ¿Kasa waaʼinrajatka süpüla nükaalinjain waya Jeʼwaa soʼunnaa ayuulin waya?

¹² Nütüjaa aaʼu Jeʼwaa mojuin waaʼin sutuma tü alatakat wamüin ayuuire waya. Wachunta  kaalinwaa nümüin süpüla nnojoluinjatüin yüülain maʼin waaʼin sutuma tü alatakat wamüin. Waashajeʼera tü Wiwüliakat süpüla watüjaain saaʼu tü pütchi nütütüleʼerakalü akajee waaʼin Jeʼwaa. Waashajeʼera tü pütchi aashajaakat süchiki kojutuin maʼin nümüin Jeʼwaa na aʼyataakana nümüin. Müle shia watuma, wayaawateerü aaʼu anain maʼin Jeʼwaa namüin na aʼyataakana nümüin (Sal. 84:11).

13. ¿Jamüsü naaʼin wanee wayuu nujutünüle suulia niʼyataain?

¹³ Aʼyataashi maʼin wanee wayuu süpüla naapüinjatüin tü kasa choʼujaakat sümüin nüpüshi. Jamüshijaʼa nujutünüle suulia niʼyataain wanee wawala sümaa nnojoluin nüsirüin shia jee aire shiiʼiree aʼyatawaa nüpüleerua, eesüjaʼa jülüjale naaʼin nnojoluin kasain anain apüla nia. ¿Kasache naaʼinrajatka süpüla jülüjain naaʼin tü kasa anasü naaʼinreetkat Jeʼwaa nüpüleerua?

14. ¿Jamüsü nikeraajaka waneepia Jeʼwaa tü nümakat?

¹⁴ Nikeraajüin Jeʼwaa waneepia tü nümakat (Jos. 21:45; 23:14). Naaʼinrüin tia süpüla kojutuinjachin nia sutuma wayuu. Pansaasü nünüiki süchiki naaʼinmajüinjanain na wayuu aʼyataakana nümüin, müshijeseʼe nikeraajeein waneepia tü nümakat (Sal. 31:1-3). Otta nütüjaa aaʼu Jeʼwaa mojeerüin maʼin waaʼin nnojoliire alin waya nüpüla sümaa nüchoin waya. Nüküjain wamüin naapeerüin wamüin tü wepijaainjatkalü aaʼu otta tü kasa choʼujaakat süpüla katsüin wanoula, nnojoleerü jaralüin ooʼuleʼerüin nia suulia tia (Mat. 6:30-33; Mat. 24:45, TNM).

15. (1) ¿Kasa alataka namüin na anoujashii namaiwajanakana? (2) ¿Kasa weʼitaainjatka anain waaʼin saashin Salmo 37:18, 19?

¹⁵ Jülüjale waaʼin jamüin nikeraajaka Jeʼwaa tü nümakat, aneerü waaʼin süka nükaalinjeenain waya soʼu weʼrüin choʼujawaa. Soto waaʼin nakuwaʼipa na anoujashii namaiwajanakana. Wanaa sümaa müliain naaʼin atumawaa, aʼwalakajaashii  naya sainküin mmakat, nayaʼala neʼe apütaaka chaa Jerusalén na aluwataaushikana (Aluw. 8:1). Sünainjee müin tü alatakat namüin, eʼrüshii naya choʼujawaa. Eeshii na apütakana nepia jee naʼyataain, eepejeʼe Jeʼwaa namaa otta ayatüsia talatüin naaʼin sünain aʼyatawaa nümüin (Aluw. 8:4; Heb. 13:5, 6; Sant. 1:2, 3). Nükaalinjain Jeʼwaa naya anoujashii oonookana waneepia sümaa nünüiki otta nükaalinjeenaʼaya waya (paashajeʼera Salmo 37:18, 19). *

16. ¿Kasa jülüjeetka atuma waaʼin isain wachiki wakooʼomüinrüin waʼyataain nümüin Jeʼwaa?

¹⁶ Nülaülaʼalaapa wanee wayuu eesü jülüjale naaʼin iseerüin nüchiki nukooʼomüinrüin niʼyataain nümüin Jeʼwaa. Eesüjaʼa jülüjale naaʼin tia David laülaapa nia (Sal. 71:9). ¿Kasa naaʼinreetka Jeʼwaa süpüla nükaalinjain waya müle wakuwaʼipa?

17. ¿Kasa watüjaka sünainjee tü alatakat sümüin tü wawalakat Jheri?

¹⁷ Anuu tü alatakat sümüin tü wawalakat Jheri. Ounejaanüsü shia sünain wanee ekirajawaa süpülajatka anoutaa tü Piichi Outkajaaleekat. Nnojotpejeʼe shia oʼuneein. Anuu sünüiki: «Laülaairü taya, wayuu outa aʼwayuuset taya otta isasü tachiki tia aʼyatawaakat. Nnojotsü kasain anain apülaa taya». Wanee ai süpülapünaa suʼttüin tia ekirajawaakat, achuntusü shia nümüin Jeʼwaa süka süpüshuaʼa saaʼin. Waneemüin kaʼi, oʼunusü shia suluʼumüin tü Outkajaaleekat, ayatapejeʼe shia wainmajüin saaʼin. Sünain tia ekirajawaakat, nüküjain wanee wawala ekirajakai anaʼleein nümüin Jeʼwaa anashiire wamüin nikirajüin waya. Anuu sünüiki Jheri süchiki tia: «Jülüjaa müsü taaʼin tü nümakat chi wawalakai, ‹shiapejeʼe tacheküin nikirajüin taya Jeʼwaa›, tamaka suluʼu taaʼin. Aʼyalajüsü taya  süka tayaawatüin saaʼu nusoutuin Jeʼwaa shiʼipajee tü tachuntakat nümüin. Tayaawata aaʼu jaloulin taya nümüin Jeʼwaa otta nikirajeein taya süpüla taʼyataain nümüin». Anuu sünüiki Jheri mapa: «Mmoluwaasü taaʼin otta mojusü taaʼin wanaa sümaa tantüin sünain tia ekirajawaakat. Shiasaʼa süchikijee tia ekirajawaakat, yalayalasü taaʼin otta jülüjasü taaʼin jaloulin taya nümüin Jeʼwaa».

18. ¿Kasa süküjaka tü Wiwüliakat süchiki kojutuin nümüin Jeʼwaa tü waʼyataainkat nümüin jaʼitashii laülaain waya?

¹⁸ Laülaapa waya, sotuinjatü waaʼin jaloulin waya nümüin Jeʼwaa (Sal. 92:12-15). Nüküjain Jesuu kojutuin maʼin nümüin Jeʼwaa tü waaʼinrakat süpüla waʼyataain nümüin, jaʼitairü müin nnojotkai wainmain saaʼin wamüin (Luc. 21:2-4). Jülüja waaʼin tü eeyütkat süpüla waaʼinrüin. Eeshii süpüla waküjain pütchi nüchiki Jeʼwaa, wachuntuin nüpüleerua wanee wawala otta eeshii süpüla watütüleʼerüin naaʼin na wawalayuukana süpüla ayatüin naʼyataain nümüin Jeʼwaa. «Aʼyataajiraashii tamaa», müshi Jeʼwaa wachiki süka niʼrüin jüüjüüin waya nümüin, nnojotsü shiain saaʼujee tü watüjakalü apüleerua (1 Cor. 3:5-9).

19. ¿Kasa sotuinjatka waaʼin saashin Roma 8:38, 39?

¹⁹ Talatüsü maʼin waaʼin süka wanoujain nünain Jeʼwaa, chi Maleiwa kojutukai amüin waʼyataain nümüin. Nukumajala waya süpüla waʼyataain nümüin otta talatüsü maʼin waaʼin süka wanoujain nünain (Alat. Map. 4:11). Eeshiijaʼa nnojoliire kasain anain apüla waya naashin na manoujainsaliikana, nnojotpejeʼe müin tü jülüjakat naaʼin Jeʼwaa wachiki (Heb. 11:16, 38). Mojule maʼin waaʼin saalinjee ayuulin waya, weʼrüin choʼujawaa jee laülaainnain waya, soteesü waaʼin nnojoluin eein wanee kasa eeka süpüla amalajeʼerüin tü waalinkat nüpüla chi Washi iipünaajachikai (paashajeʼera Roma 8:38, 39).