1. ¿Kasa wainmajaka maʼin atuma saaʼin wayuu maaʼulu?

WAINMA iküleesia eeka maaʼulu jee na wayuu suluʼukana naküjain nanoujain nünain Maleiwa maʼaka nücheküin naashin. Müsüjeseʼe wainmain wayuu wainmajaka aaʼin jee asakiraka saaʼin sünain tüü: «¿Waneesüche neʼe tü iküleesia shiimainkat?, ¿nüchekataapa Maleiwa süpüshuaʼa tü iküleesiakalüirua?». ¿Jama wayakana? ¿Wanoujainche sünain wayain na aküjaliikana pütchi nüchiki Jeʼwaa ekirajakana tü shiimainkat süchiki tü Bibliakat? ¿Wayache neʼe aʼwaajaka Maleiwa maʼaka nücheküin shia? ¿Jamüsü wanoujainjatka sünain tia? Wekirajaa süchiki tia.

2. ¿Jamüsü nütüjaaka saaʼu Pablo shiimain tü nunoujakalü anain? (1 Tesalónica 1:5).

² Nütüjaa aaʼu Pablo shiimain tü kasa nunoujakalü anain nüchiki Maleiwa (paashajeʼera 1 Tesalónica 1:5). Nnojotsü nunoujain neʼe Pablo sünain tia sutuma talatüin naaʼin, shia sutuma nikirajaain maʼin sünain Nünüiki Maleiwa. Nunouja anainrü Pablo saapünüin «tia pütchikat wamüin waya anoujashiikana wapüshua nütüma chi Naaʼinkai Maleiwa» (2 Tim. 3:16). Sutuma nikirajaain sünain, niyaawata aaʼu Pablo niain Jesuu chi nüjünalakai Maleiwa. Nnojotpejeʼe jamajatüin tia namüin na laülaashiikana napüleerua na judíokana. Anoujashii naya nünain Maleiwa naashin, atüjaanapejeʼe saaʼu sutuma tü naaʼinrakat alawaain tia (Tito 1:16). Nnojotsü wanaawain nukuwaʼipa Pablo namaa, nnojotsü nunoujain neʼe sünain süpüshi tü sümakat Nünüiki Maleiwa. Tü naaʼinrakat shia nikirajüin süchiki süpüshuaʼa tü nuluwataakalü anain Maleiwa jee oonooshi nia sümaa (Aluw. 20:27).

3. ¿Watüjaainjatche saaʼu süpüshuaʼa tü wasakitkalü anain süpüla wayaawatüin saaʼu shiimainre tü wanoujakalü anain? (Paashajeʼera tü pütchikat « Wainmashaata maʼin tü kasa nukumajakat Jeʼwaa sümaa tü jülüjakat naaʼin»).

³ Eeshii na jülüjakana aaʼin nasoutuinjatüin na suluʼukana tü iküleesia shiimainkat süpüshuaʼa tü nasakitkalü anain na wayuukana,  jaʼitairü eeka nnojoluin süküjain tü Bibliakat. ¿Müinjatche sukuwaʼipa tia? Anuu nünüiki Pablo namüin na anoujashiikana: «Anakaja müleka jülüjüle jaaʼin sünain tü jaaʼinrakat, jütüjaaiwa saaʼu müleka anale, müleka mojule». Mayaainjeʼe müin nünüiki Pablo, niyaawata aaʼu wainmain tü kasa nnojotkat nütüjaain saaʼu (1 Tes. 5:21). Naashin niakai «cheʼojaayülia wamüin ekirajünaa sünain tü nüchekakat chi Maleiwakai wapüleerua» otta «müsü müsatakai saaʼin tü kasa weʼrakat suluʼu wanee rouya aainjuushi süka kachueera» (1 Cor. 13:9; 13:12, TNM). Nnojotsü nütüjaain aaʼu Pablo süpüshuaʼa tü kasa nüchikikat chi Maleiwakai. Müshiʼiya wayakana, nnojotsü watüjaain saaʼu tia. Niyaawatapejeʼe saaʼu Pablo tü sümakat tü Ashajuushikat nüchiki Jeʼwaa. Sutuma tia, nütüjaa aaʼu shiimain tü nunoujakalü anain.

4. (1) ¿Kasa waaʼinrajatka süpüla wayaawatüin saaʼu wayain na aküjaliikana pütchi nüchiki Jeʼwaa na anoujashii shiimainshiikana? (2) ¿Kasa wekirajaajeetka anain sünain ekirajaayakat tüü?

⁴ ¿Kasa waaʼinrajatka süpüla wayaawatüin saaʼu wayain na aküjaliikana pütchi nüchiki Jeʼwaa na anoujashii shiimainshiikana? Süpüla watüjaain saaʼu tia, eesü süpüla waʼwanaajireʼerüin tü sukuwaʼipakat nuʼwaajia Maleiwa watuma sümaa tü sukuwaʼipakat nuʼwaajia Maleiwa nutuma Jesuu. Anuu tü naaʼinrajatkat na anoujashii shiimainshiikana: (1) nnojoluinjatü naʼwaajüin shiyaakua wanee kasa, (2) kojutuinjatü natuma nünülia Maleiwa, (3) kojutuinjatü namüin tü shikirajakalü anain tü Bibliakat otta (4) aijiraainjana maʼin naya.

5. (1) ¿Kasa nnojotka naaʼinrüin Jesuu nuʼwaajapa Maleiwa? (2) ¿Kasa waaʼinrajatka süpüla washatüin nukuwaʼipa?

⁵ Chaiwaʼaya Jesuu chaa iipünaa otta yaaiwaʼaya nia yaa mmapaʼa, nia neʼe nuʼwaajaka Jeʼwaa süka alin nia nüpüla (Luc. 4:8). Otta nikirajüin na nikirajüinkana süpüla naaʼinrüinya tia jee nnojoishi naʼwaajüin Jeʼwaa sükajee shiyaakua wanee  kasa. Sutuma meʼrujuin Maleiwa nnojotsü süpüla nakumajüin na wayuukana wanee niyaakua (Is. 46:5). ¿Jama tü shiyaakua wayuu nakumajakat na wayuukana süpüla noʼuraajüin namüin? Anuu tü piamakat pütchi saʼakajee tü Poloosükat Pütchi aapünaka nümüin Moisés: «Nnojo pukumajüin shiyaakua wanee kasa makalü aka saaʼin tü kasa chakalü iipünaa, tü yaakat yaa mmapaʼa otta tü shirokujatkat palaa. Nnojo püsapainkain pia sümülatuʼu tia» (Éx. 20:4, 5). Na wayuu keeʼireekana aaʼin talatüin Maleiwa natuma, nayaawatüin saaʼu nnojoluin nücheküin Jeʼwaa nuʼwaajünüin sükajee ayaakuaa.

6. ¿Jaralii na nashatakana akuwaʼipa na aküjaliikana pütchi nüchiki Jeʼwaa?

⁶ Naashin na ekirajaakana süchiirua sukuwaʼipa wayuu sümaiwajatü, nia neʼe Maleiwa naʼwaajaka na anoujashii namaiwajanakana. Süküjain wanee karaloʼuta sümaajatka nakuwaʼipa na anoujashii namaiwajanakana, nayoutashaatain eeinjatüin shiyaakua wanee kasa süpüla suʼwaajünüin suluʼu tü aʼwaajüleekat Maleiwa (History of the Christian Church). Müshiʼiya waya aküjaliikana pütchi nüchiki Jeʼwaa, washatüin nakuwaʼipa na anoujashii namaiwajanakana. Nnojoishii waya oʼuraajüin sümüin shiyaakua «santo», shiyaakua aapiee otta nnojoireeshiʼiya waya oʼuraajüin nümüin Jesuu. Jee müsia nnojotsü waʼwaajüin wanteera jee waneirua kasa makalü aka saaʼin tia. Jaʼitairü kasain alatüin wamüin, ayatüshii waya jüüjüüin sümüin tü nümakat Jesuu, tü makat: «Nia juʼwaajüinjachika, chi Jümaleiwasekai nümüiwa» (Mat. 4:10).

7. ¿Kasa naataka oulia nakuwaʼipa na aküjaliikana pütchi nüchiki Jeʼwaa suulia tü wane iküleesiakalüirua?

⁷ Eʼnnaajünüshii maʼin maaʼulu na shikiipüʼükana tü iküleesiakalüirua jee wainma wayuu namaakana sümaa müin naʼwaajünakai aaʼin natuma. Wotusü natuma tü iküleesia kaluʼukat naya, noiküin tü karaloʼuta nashajakat, watta saalii nneerü aapünaka namüin otta oonooshii na wayuukana sümaa nanüiki. Eetaayaai meerüin nakuwaʼipa niale Jesuu yalain namaa. Eekajasaʼa wayakana na anoujashii shiimainshiikana, nnojoishii waya oushikajaain süchiirua sukuwaʼipa wayuu. Mayaainjeʼe kojutuin wamüin na laülaakana wapüleerua sünain anoujaa shia woʼunaka achiirua tü nümakat Jesuu, tü makat: «Pawalaawashii jia jüpüshua» (Mat. 23:8-10). Nnojoishii waya aʼwaajüin wayuu jaʼitashi niale wanee shikiipüʼü iküleesia jee niale wanee sülaülashi mma. Nnojoishii sünainpünaain waya tü nanoujakalü anain, nnojoishii sünainpünaain waya poliitika otta nnojoishii waya sünainpünaain nakuwaʼipa na manoujainsaliikana. Naata maʼin wakuwaʼipa noulia (Juan 18:36).

8. ¿Jamüsü watüjaaka saaʼu keeʼireein naaʼin Jeʼwaa kojutuin watuma tü nünüliakat jee waküjainjatüin shia sümüin wayuu?

⁸ Anuu nünüiki Jesuu soʼu wanee kaʼi sünain oʼuraajaa: «Taata, kojuta putuma tü pünüliakat». Nusoutaka Jeʼwaa nümüin iipünaajee sünain nüküjain kojutuinjatüin shia nutuma (Juan 12:28, TNM). Wanaa sümaa nüküjain pütchi Jesuu yaaiwaʼaya nia yaa mmapaʼa, kojutusü nutuma nünülia chi Nüshikai (Juan 17:26, TNM). Müsüjeseʼe kojutuin namüin na anoujashii shiimainshiikana nünüliamaajanain naya Maleiwa otta naküjain sümüin wayuu kasaichin nünülia.

9. ¿Jamüsü sütüjaanaka aaʼu kojutuin namüin na anoujashii namaiwajanakana tü nünüliakat Maleiwa?

⁹ Soʼu nakalia na aluwataaushikana, süchikijeechon sukumajaain tü anoujaakat natuma na oushikajaakana süchiirua nukuwaʼipa Jesuu, eirakaashi Jeʼwaa «sümüin tü wayuukoluirua süpüla nüneeküin naʼakajee wanee pueulo nünüliamaainjatka» (Aluw. 15:14, TNM). Talatüshii maʼin naya anoujashiikana süka nanüliamaajanain Maleiwa otta süka naküjain tü nünüliakat sümüin wayuu. Nachuntuin nünülia Maleiwa naküjapa pütchi jee nashajapa tü Bibliakat. * Sutuma tia, atüjaana aaʼuchii nayain na nanüliamaajanakana Maleiwa (Aluw. 2:14; 2:21, TNM).

10. ¿Jamüsü watüjaaka saaʼu nayain anain na Aküjaliikana pütchi süpüla nünüliamaain Jeʼwaa?

 ¹⁰ ¿Nayache anaka süpüla nanüliamaain Jeʼwaa na Aküjaliikana pütchi? Wekirajaa sünain tia. Maaʼulu yaa, wainma kasa naaʼinraka na shikiipüʼükana tü iküleesiakalüirua süpüla nnojoluin sütüjaanüin aaʼu nünülia Maleiwa. Naaʼinrüin tia wanaa sümaa nasünneʼerüin tü nünüliakat suluʼujee tü Biblia nashajakat otta napülajüin shia suulia suchuntunüin naʼwaajapa Maleiwa. * Nayapejeʼe neʼe na aküjaliikana pütchi nüchiki Jeʼwaa kojutuka atuma nünülia Maleiwa. Waya aküjaka nünülia Maleiwa sümüin wayuu suulia tü wane iküleesiakalüirua. Wachajaain maʼin sukuwaʼipa süpüla pansaain wakuwaʼipa süka nünüliamaajanain waya Jeʼwaa (Is. 43:10-12). Alatüsü suulia 240 miyoone Biblia Traducción del Nuevo Mundo weʼinprimiijaka, ashajünüsü nünülia Jeʼwaa suluʼu eere nasünneʼerüin na shikiipüʼükana tü iküleesiakalüirua suluʼujee tü wane Bibliakalüirua. Otta alatüsü suulia 1.000 anüikii tü karaloʼutairua ashajünaka aluʼu nünülia Jeʼwaa.

11. ¿Kasa nayoutaka na anoujashii namaiwajanakana sutuma kojutuin namüin tü shiimain nüchikikat Maleiwa?

¹¹ Kojutusü nümüin Jesuu tü shiimain nüchikikat Maleiwa otta tü keeʼireekat naaʼin Maleiwa süpüleerua wayuu. Pansaasü nukuwaʼipa sümaa jee nikirajüin wayuu süchiki (Juan 18:37). Müshiʼiya na oushikajaakana süchiirua nukuwaʼipa, kojutusü maʼin namüin tü shiimain nüchikikat Maleiwa (Juan 4:23, 24). «Tü wopu  nümaʼanajeejatkat Maleiwa», nümüsü amüin Pedro tü nanoujakalü anain na anoujashii namaiwajanakana (2 Ped. 2:2, TNM). Sutuma kojutuin namüin naya anoujashiikana tü shiimain nüchikikat Maleiwa, nayoutuin tü nekirajakalü anain na anoujayaashiikana. Nayoutuin sukuwaʼipapala wayuu nnojotka pansaain sümaa tü nümakat Maleiwa otta tü shikirajakat wayuu süleʼeruʼujeejatü neʼe (Col. 2:8). Müshiʼiya na anoujashii shiimainshiikana maaʼulu, nachajaain maʼin sukuwaʼipa süpüla pansaain nakuwaʼipa sümaa tü nuchuntakat Maleiwa (3 Juan 3, 4). Naaʼinrüin tia wanaa sümaa nachajaain maʼin sukuwaʼipa süpüla pansaain tü nanoujakalü anain otta tü nakuwaʼipakat wanaapünaa sümaa tü nümakat Maleiwa suluʼu tü Nünüikikat.

12. (1) ¿Kasa naaʼinraka na wawalayuu oʼunirakana sukuwaʼipa tü waʼyataainkat nayaawatapa saaʼu sunoutunüinjatüin wanee kasa? (2) ¿Jamüsü naaʼinraka tia?

¹² Nayaawata aaʼu na aküjaliikana pütchi nüchiki Jeʼwaa eein süpüla noʼtchejaain sümaa wanee pütchi shikirajaka anain tü Bibliakat jee shiale tü aaʼinnajatkat süpüla suʼuninnüin nakuwaʼipa na wawalayuukana. Nnojoluinjatsüjeseʼe ponuin waaʼin süka nüküjatüjülin Jeʼwaa suluʼu tü Nünüikikat kooʼomüinjatüin mapa tü sütüjaakalü aaʼu nupueulose nüchiki (Col. 1:9, 10). Nüküjain wamüin Jeʼwaa shiʼipaʼaya tü shiimain nüchikikat. Müsüjeseʼe nnojoluinjatüin washapajaain aaʼin süpüla watüjaamaatüin saaʼu tia (Prov. 4:18). Nayaawatapa saaʼu na wawalayuu oʼunirakana sukuwaʼipa tü waʼyataainkat süpansaajünüinjatüin wanee pütchi jee shiale saainjünüinjatüin wanee kasa, naaʼinramaatüin shia. Wainma na shikiipüʼükana iküleesia aʼwanajaaka tü nekirajakalü anain süpüla kamalainjatüin shia namüin na wayuu outkajaakana namaa otta süpüla sücheküinjatüin wayuu süpüshuaʼa. Eekajasaʼa na aküjaliikana pütchi nüchiki Jeʼwaa wanouteʼerüin wanee kasa süpüla aleewain maʼin waya nümaa Jeʼwaa jee süpüla waʼwaajüin nia maʼaka naaʼinrüin shia Jesuu (Sant. 4:4). Wanouteʼerüin wanee kasa shia sutuma wayaawatüin maʼin saaʼu tü sümakat tü Bibliakat, nnojotsü shiain sutuma wanaawain waaʼin sümaa tü jülüjakat saaʼin wayuu (1 Tes. 2:3, 4).

13. (1) ¿Jarat tü akuwaʼipaa jaʼyakat maʼin naaʼu na anoujashii shiimainshiikana? (2) ¿Jamüsü sütüjaanaka aaʼu aijiraain na aküjaliikana pütchi nüchiki Jeʼwaa maaʼulu?

¹³ Eʼraajünüshii na anoujashii eejanakana nükalioʼu Jesuu sutuma anain maʼin nakuwaʼipa, shiapejeʼe eʼraajünüin maʼin naya sutuma aijiraain maʼin naya. Anuu nünüiki Jesuu: «Shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia» (Juan 13:34, 35). Müshiʼiya maaʼulu na aküjaliikana pütchi nüchiki Jeʼwaa, aijiraashii naya jee paaʼinwajiraashii naya suluʼu mmakat süpüshuaʼa. Naata maʼin wakuwaʼipa noulia na wayuu suluʼukana tü wane iküleesiakalüirua, süka jamüin, pawalaawajiraain waya mayaainjeʼe naatain woumain jee wakuwaʼipa. Jaʼyasü waaʼu aijiraain waya kottiraapa waya sünain tü outkajawaakat otta sünain tü outkajawaakat miyoʼu. Suluʼujee tia, wayaawata aaʼu wayain neʼe aʼwaajüin Jeʼwaa maʼaka nücheküin shia.

14. Saashin Colosas 3:12-14, ¿kasa waaʼinrajatka süpüla jaʼyain waaʼu aijiraain maʼin waya?

¹⁴ Saashin tü Bibliakat, aijiraainjana maʼin waya (1 Ped. 4:8). Jaʼyasü waaʼu aijiraain waya wanaa sümaa motuin waaʼin naainjala na waneinnua jee wanaa sümaa waaʼinrüin tü anasükat shiʼipajee eekai shiʼrülüin wayumüin wamüin otta wanaa sümaa wachajaain sukuwaʼipa süpüla kamaneein waya namüin napüshuaʼa na wawalayuukana, jaʼitaichi chi eekai naainjain kasa mojusü wamüin (paashajeʼera Colosas 3:12-14). Süka aijiraain maʼin waya, ayaawatünüsü saaʼu wayain na anoujashii shiimainshiikana.

15. ¿Kasa wanaawaka watuma namaa na anoujashii namaiwajanakana?

¹⁵ Eesü tü kasa wanaawakat watuma namaa na anoujashii namaiwajanakana. Tü sukuwaʼipakat  suʼuniria wakuwaʼipa suluʼu nupueulose Maleiwa shia neʼe tü sukuwaʼipakat neʼitaatüjütkalia na aluwataaushikana sümaiwa. Jamüsüjaʼa maaʼulu, eeshii na wawalayuu alapalaakana waaʼu, eeshii na laülaashiikana wapüleerua sünain anoujaa jee na aʼyataakana neʼipajee (Filip. 1:1; Tito 1:5). Otta kojutusü wamüin tü nümakat Jeʼwaa süchiki tü aainjirawaakalü akuwaʼipaa, süchiki sukuwaʼipa kaʼwayuusee, süchiki tü ishakat otta süchiki tü wakuwaʼipainjatkat nümaa wanee anoujashi ayatakai macheʼein süchiirua kaainjalaa suulia joo sumojujaain wakuwaʼipa nümaa Maleiwa (Aluw. 15:28, 29; 1 Cor. 5:11-13; 6:9, 10; Heb. 13:4).

16. ¿Kasa watüjaka sünainjee Éfeso 4:4-6?

¹⁶ Nüküjatüjülia Jesuu wainmeenain na wayuu anoujayaakana nünain (Mat. 7:21-23). Saashin tü Nünüikikat Maleiwa sülüʼütpa sükalia sajaʼttinnüin tü kasakat süpüshuaʼa, eejeena na piamakana akuwaʼipa «sükajee nanoujayaain nünain Maleiwa» (2 Tim. 3:1, 5). Pansaapejeʼe tü sümakat tü Bibliakat sünain wanaawainjatüin tü nanoujakalü anain na wayuu anakana noʼuluʼu Maleiwa (paashajeʼera Éfeso 4:4-6).

17. ¿Jaralii na anoujashii shiimainshiikana jee ashatakana nukuwaʼipa Jesuu?

¹⁷ ¿Jaraliika na anoujashii shiimainkana? Wekirajaaitpa anain kasain wayaawatüin anainjee jaraliin naya, wekirajaaitpa anain tü nukuwaʼipakat Jesuu sünain aʼwaajaa Maleiwa otta tü nakuwaʼipakat na anoujashii namaiwajanakana. Makalaka eein süpüla waküjain nayain na aküjaliikana pütchi nüchiki Jeʼwaa na anoujashii shiimainkana. Kojutushaatasü wamüin suluʼuin waya nupueulose Jeʼwaa, wayaawatüin saaʼu tü shiimain nüchikikat otta tü keeʼireekat naaʼin süpüleerua wayuu. Ayataʼaya kojutuin wamüin tü shiimain nüchikikat Maleiwa.