Saashin wanee diccionario tü apansaajaakalü anüiki shia «naapüle nünüiki wanee wayuu nuʼupala Maleiwa [...] süchiki tü naaʼinrajatkat» (Diccionario de uso del español, süshajala María Moliner). Eesüjaʼa nüpansaajüle nünüiki wanee wayuu suʼupala wayuu jee süshajünüle.

Sünainjee tü nümakat Jesús, eeshii wayuu jülüjakana aaʼin mojuin nüpansaajüle nünüiki wanee wayuu. Müshi nia: «Nnojo jüpansaajüin jünüiki. [...] Müleka paaʼinrüinjatüle wane kasa, ‘Aaʼ meeshi neʼe pia. Je müleka nnojolüinjatüle paaʼinrüin shia, ‘Nnojoʼ meeshi neʼe pia. Atüjaaneena aaʼu jia sünain pansaain jünüiki sükajee tia. Chi eekai nikirajüin naata suulia tüü, nia chi Kamaʼüraikai» (Mat. 5:33, 34, TNM; 5:35-37). Nütüjaa aaʼu Jesús süshajünüin sünain tü Pütchi Aapünakat nümüin Moisés eein süpüla nüpansaajüin nünüiki wanee israelita saaʼu waneirua kasa otta eejanain waneinnua aʼyataalii nümüin Maleiwa apansaajaka nanüiki saaʼu waneirua kasa (Gén. 14:22, 23, TNM; Éx. 22:10, 11). Otta müsia nütüjaa aaʼu nüpansaajüin nünüiki Jehová namüin waneinnua wayuu (Heb. 6:13-17). Wanaa sümaa «nnojo jüpansaajüin jünüiki» nümüin Jesús, shia nüküjeeka achiki nnojoluinjatüin wapansaajüin wanüiki saaʼu kasa eekai eein otta jülüjainjatü waaʼin kasain wapansaajaka aaʼujee wanüiki. Shiakalaka anain wekeraajüle tü wamakat, jama nücheküin shia Jehová.

¿Kasa paaʼinrajatka suchuntunule pümüin püpansaajüinjatüin pünüiki? Piyaawatüinjatü aaʼu palajana eere süpüla pikeraajüin shia. Iseerüle püchiki, nnojo püpansaajüin pünüiki. Anuu wanee pütchi anasü waaʼinrajatka saashin tü Bibliakat: «Shia anaka aluʼu nnojorüle paapüin pünüiki nnojoluinjatüle pikeraajüin shia» (Ecl. 5:5). Tü wane kasa paaʼinrajatkat shia pikirajaainjatüin süchiirua tü sümakat tü Bibliakat süchiki tü pütchi püpansaajüinjatkat otta püneeka tü paaʼinrajatkat wanaapünaa sümaa tü sümakat. ¿Jarat waneirua pütchi sümaka tü Bibliakat süchiki tü apansaajaakalü anüiki?

Waneirua pütchi apansaajünaka anaka noʼuluʼu Maleiwa. Soʼu kasaalüin piamashii anoujashii, napansaajüin nanüiki. Chi toolokoi otta tü jietkat napansaajüin nanüiki nuʼupala Maleiwa. Naküjain noʼupala na waneinnua aijiraainjanain, naaʼinmajiraainjanain jee kojutujiraainjanain naya süpüla kaʼikat süpüshuaʼa. (Eeshii na kasaatshii nnojoliikana aküjain pütchi makat aka saaʼin tia, napansaajapejeʼe nanüiki noʼupala Maleiwa). Mayaa, atüjaana aaʼu kasaalüin naya jee waneepiainjanain naya süpüla kaʼikat süpüshuaʼa (Gén. 2:24; 1 Cor. 7:39). Makalaka anain maʼin napansaajüle nanüiki na wayuu kasaalüinjanakana, jama anain shia noʼuluʼu Maleiwa.

Waneirua pütchi apansaajünaka mojuka noʼuluʼu Maleiwa. Jamüshiijaʼa na anoujashiikana, nnojotsü napansaajüin nanüiki saaʼu noumain süpüla natkaain saaʼu jee süpüla nayüülajüin Maleiwa. Naaʼinrüle tia, nnojoishiijaʼamata oonooin sümaa nünüiki  Maleiwa. Süka nnojoluin wanaawain naaʼin namaa na manoujainsaliikana, nnojoishii naya sünainpünaain wanee kasachiki eeka noumainpaʼa (Juan 15:19; Is. 2:4; Sant. 1:27).

Eesü pütchi wayaawatüinjatka aaʼu süka waaʼin wamüiwaʼa wapansaajüinjatüle wanüiki. Nüpansaajüinjatüle nünüiki wanee anoujashi, jülüjainjatü naaʼin tü nümakat Jesús wanaa sümaa nümüin: «Anakaja müleka jaaʼinrüle tü nuluwataakat anain César otta jaaʼinrüinjatü tü nuluwataakat anain Maleiwaya» (Luc. 20:25).

Eere wanee anoujashi makateekai suluʼu wanee mma nnojotka nuumain, eesü süküjünüle nümüin nüpansaajüinjatüin nünüiki. Süpüla tia, achuntunusü nümüin naaʼinrüinjatüin wanee kasa nnojotka anain saashin tü Bibliakat süpüla saapünüin nümüin nükaraloʼuse. Nnojoleetpejeʼe naaʼinrüin tia. Eesüjaʼa süpüla suʼwanajaanüin tü achuntunakat nümüin süpüla anain shia nümüin.

Wapansaajüle wanüiki süpüla waaʼinrüin wanee kasa aʼwanajaanaka wapüleerua, eesü süpüla pansaain tü achuntunakat wamüin sümaa tü sümakat Roma 13:1, tü makat: «Tekirajeena joo jia sünain tü anasü jaaʼinrüinjatkat shiʼipajee naluwataain na sülaülashiikana mma». Sünainjee tia, eesü süpüla niyaawatüin saaʼu wanee anoujashi nnojoluin mojuin noʼuluʼu Maleiwa nüpansaajüle nünüiki süpüla naaʼinrüin wanee kasa nachuntaka na sülaülashiikana mma.

Wayaawatüinjatü aaʼu süka waaʼin wamüiwaʼa anale wapansaajüin wanüiki sükajee waapaain jee waaʼinrüin wanee kasa. Sümaiwa paala, na romanokana otta na escitakana napansaajapuʼuin nanüiki saaʼu nachajaruutse natkaayaka. Soʼunnaa naaʼinrüin tia nachuntuin namüin namaleiwase süpüla nakaalinjain naya. Otta na griegokana nayurulüin natüna iipünaamüin süpüla napansaajüin nanüiki. Naaʼinrüin tia süka eein wanee kasa pülasü chaa iipünaa naashin eʼraka naya jee nasoutuinjatka amüin saaʼujee tü naaʼinrakat.

Nnojoleerü nüpansaajüin nünüiki wanee anoujashi niʼitaainjatüle najapü saaʼu wanee kasa aʼwaajünaka, maʼaka saaʼin bandera otta escudo. Eeshijaʼa nümaanüle laülaapialuʼumüin süpüla nüpansaajüin nünüiki sümaa niʼitaainjatüin najapü saaʼu tü Bibliakat, ¿kaseerü naaʼinraka sülatüle tia nümüin? Eesü süpüla naaʼinrüin tia süka süküjain tü Bibliakat nachiki waneinnua wayuu waneepiakana nümaa Maleiwa apansaajaka nanüiki sükajee naaʼinrüin wanee kasa (Gén. 24:2, 3, 9, TNM; 47:29-31, TNM). Waneeküle tia, jülüjainjatü waaʼin wapansaajüin wanüiki nuʼupala Maleiwa. Müsüjeseʼe waküjainjatüin tü shiimainkat waneepia wasakinnapa süchiirua wanee kasa.

Süka kojutuin maʼin wamüin tü wakuwaʼipakat nümaa Jehová, oʼuraajüinjana waya otta jülüjainjatü waaʼin tü waaʼinrajatkat süpülapünaa wapansaajüin wanüiki. Jülüjainjatü waaʼin suulia wapansaajüin wanüiki saaʼu wanee kasa mojeetka atuma waaʼin otta nnojotka anain saashin tü Bibliakat. Wapansaajüle wanüiki, anasü wekeraajüle shia (1 Ped. 2:12).