«Nuuʼulaaitpa tü palajatkat nuʼwayuuse, kasaalüichipa nia sümaa wane», meerü nanüiki. ¿Jamüsüche meetka nanüiki? Anashii wekirajaale sünain tü nümakat Jesús süchiki tü nuuʼulaainjatkalü anainjee nuʼwayuuse wanee wayuu jee kasaalüinjachin nia sümaa wane.

Nüküjain Jesús suluʼu Mateo 19:9 tü nuuʼulaainjatkalü anainjee nuʼwayuuse wanee wayuu. Müshi nia: «Chi eekai nuuʼulaain suulia nuʼwayuuse, sümaa nnojotsüin sümaʼüjiraasüin nümaa wane wayuu naata nuulia, müleka kaʼwayuusere nia nüchikua, kaainjalashi». Piamasü kasa wayaawataka aaʼu sünainjee tü nümakat Jesús: (1) tü nuuʼulaainjatkalü anainjee wanee wayuu nuʼwayuuse shia sünainjee amaʼüjirawaa akuwaʼipaa otta (2) kaainjalashi chi wayuu ooʼulaakai suulia nuʼwayuuse sümaa nnojoluin sutumasirüin amaʼüjirawaa akuwaʼipaa jee kasaarüle nia sümaa wane naatajatü. a

Nuuʼulaale wanee wayuu nuʼwayuuse sünainjee nümaʼüjiraain nukuwaʼipa sümaa wane jierü naata suulia, ¿taashisüche nukuwaʼipa süpüla kasaalüin nia sümaa wane jierü naatajatü? Nnojotsü shiain nüküjeein achiki tia Jesús. Jamüshijaʼa nümaʼüjiraale nukuwaʼipa wanee wayuu sümaa wane jierü naata suulia nuʼwayuuse, shiainjatü aneekaka nuʼwayuuse motuinjatüle saaʼin naainjala jee suuʼulaainjatüle nuulia. Suuʼulaale nia sümaa sukumajirüin sukuwaʼipa tia laülaapialuʼu, taasheerü sukuwaʼipa süpüla kasaalüin shia nümaa wane jee müshia chi toolokoi taasheerü nukuwaʼipa süpüla kasaalüin nia sümaa wane.

Eesüjaʼa moteere saaʼin tü jietkat naainjala chi suʼwayuusekai sümaa nnojolin suuʼulaweein nia. ¿Jama nnojoire nüleʼejeein chi toolokoi sümaa nuʼwayuuse jee nüchajaale sukuwaʼipa laülaapialuʼu süpüla nuuʼulaainjachin suulia? Mülejeʼeya tia, nnojotsüjaʼamata taashin nukuwaʼipa süpüla kasaalüinjachin nia nüchikuaʼa sümaa wane jierü naata suulia nuʼwayuuse, jama moteein saaʼin naainjala jee nnojolin suuʼulaweein nia. Ayatüle macheʼein nia süchiirua nuuʼulaainjatüin nuʼwayuuse jee kasaarüle nia sümaa wane, amaʼüjiraashijaʼamata nukuwaʼipa nüchikuaʼa. Suluʼujee tia, outkajaweena apünüinshii laülaashii nümaa süpüla nusoutuin saaʼu naainjala (1 Cor. 5:1, 2; 6:9, 10).

Nuuʼulaale wanee anoujashi suulia nuʼwayuuse sümaa nnojoluin jutatüin nukuwaʼipa süpüla naaʼinrüin tia jee kasaarüle nia sümaa wane naatajatü, ¿jameetche nanüiki na wawalayuukana süchiki tü palajatkat nuʼwayuuse jee süchiki tü jeketkat nuʼwayuuse? ¿Jamüsü sünüiki tü Bibliakat süchiki tia? Saaʼin sümüin tü palajatkat nuʼwayuuse, ¿ayatayütche aʼaniraain nukuwaʼipa sümaa? ¿Ayatüshiche kaainjalain nia sümaa tü jeketkat nuʼwayuuse?

Wayaawatapuʼu aaʼu sümaiwa paala kaainjalain wanee wayuu sümaa tü jeketkat nuʼwayuuse ayatayürüle katüin soʼu tü palajatkat nuʼwayuuse, nnojorüle kasaalüin shia nümaa wane jee nnojorüle sümaʼüjiraain sukuwaʼipa nümaa wane. Wanaa sümaa nüküjain Jesús nüchiki chi wayuu ooʼulaakai suulia  nuʼwayuuse süpüla kasaalüinjachin nia sümaa wane, nnojoishi nia aashajaain maʼin süchiki tü jierü ooʼulaaushikat nutuma suʼwayuuse. Shia nüküjaka maʼin achiki kaainjalain chi wayuu aaʼinrakai tia süka nümaʼüjiraaichipain nukuwaʼipa sümaa tü jeketkat nuʼwayuuse. Sünainjee tia nümakat Jesús wayaawata aaʼu nnojoluichipain ayatüin nia kasaalüin sümaa tü palajatkat nuʼwayuuse.

Nuuʼulaale wanee wayuu suulia nuʼwayuuse jee kasaarüle nia sümaa wane naatajatü, nnojoluitpa süpüla sümüinjatüin ayatayülüin saʼaniraain nukuwaʼipa sümaa. Wayaawata aaʼu nnojoluichipain nia ayatüin kasaalüin sümaa tü palajatkat nuʼwayuuse jaʼitairü katayülüin soʼu, jaʼitairü nnojoluin kasaalüin shia nümaa wane otta nnojorüle sümaʼüjiraain sukuwaʼipa. b

Suʼttiajee pütchikat tüü aashajaashii waya nüchiki wanee wayuu ooʼulaakai suulia nuʼwayuuse sünainjee nümaʼüjiraain nukuwaʼipa. ¿Jama nuuʼulaale suulia nuʼwayuuse sümaa nnojoluin nümaʼüjiraain nukuwaʼipa sümaa wane naata suulia jee kasaarüle nia sümaa wane? ¿Jama nümaʼüjiraale nukuwaʼipa süchikijee nuuʼulaain suulia nuʼwayuuse jee kasaarüle nia sümaa wane mayaainjeʼe nnojoluin suuʼulaweein tü nuʼwayuusekat nuulia? Naaʼinrüle tia wanee wayuu, kaainjalashi nia. Kasaatshi nia laülaapialuʼu sümaa tü jeketkat nuʼwayuuse. Sünainjee tia wayaawata aaʼu nnojoluitpain saʼaniraain nukuwaʼipa sümaa tü palajatkat nuʼwayuuse. Anuu sünüiki tü rewiisütakat Aapiria Wayuu ojuʼitaka peʼureeroʼu 15 soʼu 1980, süpana 30: «Nnojoluitpa süpüla nuuʼulaain tü jeketkat nuʼwayuuse süpüla nüleʼejüinjachin sümaa tü palajatkat nuʼwayuuse, jama nuuʼulaaitpain shia, nümaʼüjiraaichipain nukuwaʼipa jee kasaalüichipain nia nüchikuaʼa».

Sutuma tü wapansaajakat sünain pütchikat tüü, nnojotsü jülüjainjatüin waaʼin mojutuin sukuwaʼipa kaʼwayuusee namüin na anoujashiikana otta nnojoluin mojuin maʼin tü amaʼüjirawaakalü akuwaʼipaa. Nuuʼulaale wanee anoujashi suulia nuʼwayuuse sümaa nnojoluin sutumasirüin amaʼüjirawaa akuwaʼipaa jee kasaarüle nia sümaa wane, outkajaweena apünüinshii laülaashii nümaa süpüla nusoutuin saaʼu naainjala. (Kasaarüle nia sümaa wanee anoujasü, outkajaweena apünüinshii laülaashii sümaa süpüla susoutuin saaʼu saainjala, jama sümaʼüjiraaitpain sukuwaʼipa). Mayaainjeʼe nnojoluin ayatüin kaainjalain nia sümaa tü jeketkat nuʼwayuuse, alatüinjatü wainma juya süpüla saapünüin süchikuaʼa aʼyatawaa kaawainsü nümüin suluʼu tü outkajaaleekat. Motuinjatü naaʼin na waneinnua tü naainjalakat otta müsia jülüjainjatü naaʼin na laülaashiikana jamüin saaʼin tü palajatkat nuʼwayuuse saalinjee tü naainjalakat otta jamüin naaʼin na nüchonnii joʼuuyuu nüpütakana namüiwaʼa (Mal. 2:14-16).

Süka wainmain kasa mojusü eeka sünainjee nuuʼulaain wanee wayuu suulia nuʼwayuuse sümaa nnojoluin sutumasirüin amaʼüjirawaa akuwaʼipaa jee kasaarüle nia sümaa wane, shia anaka aluʼu kojutule wamüin sukuwaʼipa kaʼwayuusee maʼaka kojutuin shia nümüin Jehová (Ecl. 5:4, 5; Heb. 13:4).