1, 2. ¿Kasache nüküjeeka achiki Jesuu suluʼu Juan 4:35, 36?

SOʼU chainjachin Jesuu Galileamüin, alatapünaashi nia süʼütpünaa wanee aʼttiee ajaʼapülaaitka (Juan 4:3-6). Choʼujaʼalaa neʼe pienchi kashi süpüla yapain shia süpüla asüʼüjünaa. Nüküjaka Jesuu wanee kasa ponoko maʼin naaʼin na nikirajüinkana: yapasü tü aʼttieekat süpüla asüʼüjünaa (paashajeʼera Juan 4:35, 36). ¿Kasache nüküjeeka achiki Jesuu?

² Eeshijaʼa naashajaale Jesuu süchiki nakotchojünüinjanain na wayuukana süpüla anoujaa nünain. Soʼu kaʼikat tia, aküjashi pütchi Jesuu sümüin wanee wayuu samariajeʼewat. Naaʼinrüin tia mayaainjeʼe nnojoluin anajiraain na judíokana namaa na samariajeʼewaliikana. Sümaʼinruʼu nüküjain Jesuu namüin na nikirajüinkana süchiki yapain tü aʼttieekat, wainma na samariajeʼewalii antakana nünainmüin sünainjee tü süküjakat tü wayuu naashajaakalü amaa Jesuu. Antüshii naya wayuukana süpüla naapajüin nünüiki (Juan 4:9, 39-42). Anuu tü nümakat wanee wayuu ekirajaakai süchiirua sukuwaʼipa tü Wiwüliakat süchiki tia: «Sünainjee nantamaatüin naya wayuukana sünain aapajaa nünüiki Jesuu [...], müshii naya aka saaʼin wanee aʼttiee eekai yapain süpüla asüʼüjünaa».

3. Püküja süchiki apünüinsü kasa eejeetka anale tü jülüjakat waaʼin nachiki na wayuukana.

³ ¿Kasache jülüjaka waaʼin nachiki na wayuu waküjakana amüin pütchi? ¿Jülüjasüche waaʼin yapain naya süpüla anoujaa? Eejeerü apünüinsü kasa sünainjee tia. Maʼaka sükotchojünamaatüin süchon wanee aʼttiee süpülapünaa sülatüin sükalia, aküjeena maʼin waya pütchi sümaa jülüjain waaʼin sülüʼülüin nükalia Maleiwa. Tü wane shia talateerüin maʼin waaʼin süka waaʼinmaain tü aküjaakat pütchi. Saashin tü Wiwüliakat, talatüsü maʼin naaʼin na wayuukana wanaa sümaa sükotchojünüin süchon tü aʼttieekat (Is. 9:3). Tü chiiruaajatkat kasa shia jülüjeerüin waaʼin wawalayuujeenain naya otta wachajaajeerüin sukuwaʼipa süpüla waküjain pütchi namüin wanaapünaa sümaa tü kamalainkat namüin.

4. ¿Kasa wekirajaainjatka anain sünain ekirajaayakat tüü?

 ⁴ «Mepisalii naya», eeshiijaʼa namüle na nikirajüinkana Jesuu nachiki na wayuu samariajeʼewaliikana. Nnojotpejeʼe müin tü jülüjakat naaʼin Jesuu, jülüjasü naaʼin nanoujeenain naya wayuukana. Müinjatia tü jülüjakat waaʼin nachiki na wayuu waküjakana amüin pütchi. Mapuʼusü sukuwaʼipa nutuma Pablo. Sünain ekirajaayakat tüü, wekirajaajeerü anain apünüinsü kasa naaʼinrapuʼuka Pablo. Jamüshijaʼa nia, nütüjaa aaʼu tü nanoujakalü anain na wayuu nüküjakana amüin pütchi, niyaawata aaʼu tü kamalainkat namüin otta jülüjasü naaʼin nuwalayuujeenain naya.

5. ¿Jamüsü niʼraajaka maʼin Pablo nakuwaʼipa na judíokana?

⁵ Aküjawaishi pütchi Pablo suluʼu nekirajülee na judíokana. Jamüsüjaʼa soʼu chajachin nia Tesalónica, nüküjain namüin na judíokana jamaluʼuluin tü sümakat tü Ashajuushikat. Naaʼinrüin tia soʼu apünüin saawanoʼu (Aluw. 17:1, 2). Anakajasaʼa naaʼin Pablo suluʼu nekirajülee na judíokana, jama joʼuushin nia naʼaka (Aluw. 26:4, 5). Niʼraajüin maʼin Pablo nakuwaʼipa na judíokana, müshijeseʼe nnojolin mmoluwaain nia sünain aküjaa pütchi namüin (Filip. 3:4, 5).

6. ¿Jamüsü naataka nakuwaʼipa na wayuu nüküjakana amüin pütchi Pablo chaa Atenas?

⁶ Oʼunushi Pablo suluʼujee tü mmakat Tesalónica otta suluʼujee Berea sünainjee müliain nia natuma na wayuu ayoutakana tü pütchi nüküjakat. Oʼunushi nia chamüin Atenasmüin. Chapa nia chayaa, nüküjain namüin na judíokana otta namüin waneinnua wayuu anoujakana nünain Maleiwa jamaluʼuluin tü sümakat tü Ashajuushikat. Naaʼinrüin tia suluʼu tü ekirajüleekat judío (Aluw. 17:17). Nüküjapa pütchi metkaaraluʼu, naataitpa nakuwaʼipa na wayuu nüküjakana amüin pütchi. Eejana na gentiilekana otta na atüjakana naʼakajee na griegokana. Eiwaʼalajatia neʼe naapüin süchiki tia pütchikat. Müshiijeseʼe namüin nümüin Pablo: «[Aashajaashi pia] wamüin süchikü wane kasa waneejatü maʼi» (Aluw. 17:18-20).

7. Sünainjee tü sümakat Aluwataaushikana 17:22, 23, ¿kasa naaʼinraka Pablo süpüla nüküjain pütchi namüin na chejeʼewaliikana Atenas?

⁷ (Paashajeʼera Aluwataaushikana 17:22, 23). Nnojotsü wanaawain nutuma Pablo sukuwaʼipa tü nümakat namüin na wayuu chajanakana metkaaraluʼu sümaa tü nümakat namüin na suluʼujanakana tü ekirajüleekat judío. Eesüjaʼa nütüjaale Pablo saaʼu kasain nanoujain anain na wayuu chajanakana Atenas sünainjee nünanajüin tü kasa nakumajakat süpüla naʼwaajüin namaleiwase. Jülüjaa müsü naaʼin Pablo tü wanaawakalü atuma tü nanoujakalü anain naya wayuukana sümaa tü sümakat tü Ashajuushikat. Anuu tü nümakat wanee wayuu ekirajaakai süchiirua sukuwaʼipa tü Wiwüliakat: «Süka judíoin Pablo otta  nunoujain nünain Jesuu, nütüjaa aaʼu nnojoluin naʼwaajüin na griegokana chi Maleiwa naʼwaajakai na judíokana otta na anoujakana nünain Jesuu. Nüchajaainjeseʼe Pablo sukuwaʼipa süpüla nayaawatüin saaʼu nnojolin meʼraajuuin chi Maleiwa nüküjakai achiki namüin». Aküjashi pütchi Pablo wanaapünaa sümaa nakuwaʼipa naya wayuukana. Nüküjain namüin niain nüküjain achiki chi Maleiwa naʼwaajakai sümaa nnojolin neʼraajüin nia. Mayaainjeʼe nnojoluin natüjaain saaʼu tü sümakat tü Ashajuushikat, nnojotsü jülüjain naaʼin Pablo mepin nakuwaʼipa naya wayuukana. ¿Jülüjasüche naaʼin Pablo nuwalayuujeenain naya? Aa, jülüjasü naaʼin müin naya aka saaʼin wanee aʼttiee eekai yapain süpüla asüʼüjünaa. Müshijeseʼe nüküjain pütchi namüin wanaapünaa sümaa tü nanoujakalü anain.

8. (1) ¿Kasa waaʼinrajatka süpüla wayaawatüin saaʼu tü nanoujakalü anain na wayuu waküjakana amüin pütchi? (2) ¿Jameetche wanüiki nümüin wanee wayuu nüküjale wamüin nunoujain?

⁸ Maʼaka naaʼinrüin shia Pablo, jülüja waaʼin tü kasa wayaawateetkalü aaʼujee tü nanoujakalü anain na wayuu waküjakana amüin pütchi. Eesü süpüla jülüjain waaʼin tü kasa eekat sünain nepia, kasaichin nanülia, jamüin naʼanaaya otta jamüin nanüikipala. Müle shia watuma, wayaawateerü aaʼu kasain iküleesia kaluʼuin naya. Otta eesüjaʼa naküjale tia wamüin uwatuwoʼushi. Anuu tü sümakat wanee wawala pürekutsoot pesiaat soʼu sülatüin tia sümüin: «Nnojotsü yaapünaain taya süpüla tooʼuleʼerüin pia suulia tü punoujakalü anain. Yooteesü neʼe taya pümaa süchiki...», müsü shia.

9. Püküja süpüshi tü nanoujakalü anain na wayuukana wanaawaka sümaa tü sümakat tü Wiwüliakat.

⁹ ¿Kasache eeka süpüla yootuin achiki waya nümaa wanee wayuu eekai nunoujain? Jülüja waaʼin wanaawale tü nunoujakalü anain sümaa tü sümakat tü Wiwüliakat. Eeshijaʼa nunoujale sünain waneeshin neʼe chi Maleiwakai, niyaawatüle saaʼu niain Jesuu oʼtteʼerüin wayuu otta nunoujale sünain nnojoleerüin müliain wayuu mapeena. Yootule waya nümaa süchiki tü nunoujakalü anain wanaawaka sümaa tü sümakat tü Wiwüliakat, kamalainjeerü nümüin tü pütchi waküjakat nümüin.

10. (1) ¿Kasa jülüjainjatka waaʼin waküjapa pütchi nümüin wanee wayuu? (2) ¿Jamüsü jülüjainjatka waaʼin tia?

¹⁰ Jülüjeesü waaʼin eein na wayuu nnojoliikana anoujain sünain süpüshuaʼa tü ekirajünakalü anain naya suluʼu tü iküleesia kaluʼukat naya. Watüjaapa saaʼu tü iküleesia kaluʼukat naya, jülüja waaʼin tü nanoujakalü anain. Anuu nünüiki David, wanee pürekutsoot chejeʼewai Australia: «Eeshii na paliraakana atuma tü nanoujakalü anain sümaa tü nekiiruʼujeejatkat neʼe». Anuu sünüiki Donalta, wanee wawala chejeʼewat Albania: «Eeshii yootule waya namaa na anoujakana naashin, naküjapejeʼe wamüin nnojoliin nanoujain nünain Maleiwa». Naashin wanee misioneero  chejeʼewai Argentina, eeshii na anoujakana sünain tü kanüliakat trinidad, nnojoliipejeʼe naya anoujain sünain niainya neʼe Jesuu chi Maleiwakai nümaa chi naaʼinkai. Anuu sooʼomüin tü nümakat: «Pütüjaale saaʼu tü nunoujakalü anain wanee wayuu, yooteechi pia nümaa süchiki tü nunoujakalü anain wanaawaka sümaa tü sümakat tü Wiwüliakat». Jülüja waaʼin kasain nanoujain anain na wayuu waküjakana amüin pütchi. Müle shia watuma, waaʼinreerü tü naaʼinrakat Pablo, wanaaweerü tü waküjakat namüin sümaa tü nanoujakalü anain (1 Cor. 9:19-23).

11. Sünainjee tü sümakat Aluwataaushikana 14:14-17, ¿kasa naashajaaka achiki Pablo namüin na chajanakana Listra süpüla kamalainjatüin namüin tü pütchikat?

¹¹ (Paashajeʼera Aluwataaushikana 14:14-17). Jülüjasü naaʼin Pablo tü kamalainkat sümüin wayuu jee nüküja nümüsia tü pütchikat wanaapünaa sümaa tia. Wanaa sümaa chajachin nia Listra, aashajaashi namüin na wayuukana süchiki tü kasa neʼraajakat maʼaka saaʼin süchiki aʼttiee jee tü talateetkalü atuma naaʼin. Aashajaashi nia namüin süchiki tia süka eein na nnojoliikana atüjaain saaʼu tü sümakat tü Ashajuushikat. Mapüleesat nutuma Pablo ayaawataa saaʼu tü naashajaakalü achiki.

12. (1) ¿Kasa waaʼinrajatka süpüla watüjaain saaʼu tü kamalainkat namüin na wayuukana? (2) ¿Kasa waaʼinrajatka süpüla waküjain tü pütchikat wanaapünaa sümaa tü kamalainkat namüin na wayuukana?

¹² Jülüja waaʼin kasain kamalain namüin na wayuukana jee waküja tü pütchikat wanaapünaa sümaa tia. ¿Kasa waaʼinrüinjatka süpüla watüjaain saaʼu kasain kamalain namüin na wayuukana? Jülüjainjatü waaʼin tü kasa wayaawateetkalü aaʼujee tü kamalainkat namüin. Jamüshiijaʼa wantüle nümaʼanamüin wanee wayuu ajaralakai, aashajeʼerakai karaloʼuta, akumajakai neʼejena jee aaʼinrakai waneirua kasa, eeshii süpüla yootuin waya nümaa süchiki tia müleka anashiire shia nümüin (Juan 4:7). Sünainjee nüsheʼin wanee wayuu, eesü süpüla watüjaain saaʼu jalejeʼewalin nia, kasain niʼyataain anain otta jaralüin tü equipo kamalainkat nümüin. Anuu nünüiki wanee wawala Gustavo nünülia: «Aashajaashi taya nümaa wanee jimaʼai 19 nuuyase. Eejatü sünain nüsheʼin niyaakua wanee eeʼirai eʼnnaajünakai maʼin. Tasakirüin nia sünain tü ayaakuaa sünainkat nüsheʼin,  nüküjaka tamüin jamüin kamalainka nümüin niiʼirain chia eeʼiraikai. Süchikijee tia, ekirajaashi nia sünain tü Wiwüliakat, wawalaichipa nia maaʼulu».

13. ¿Kasa waaʼinrüinjatka süpüla kemeʼeriain wanüiki waküjapa süchiki wekirajüin wayuu sünain tü Wiwüliakat?

¹³ Yootopa waya nümaa wanee wayuu süpüla wekirajüin nia sünain tü Wiwüliakat, kemeʼeria wanüiki nümüin. Waküja nümüin aneerüin nukuwaʼipa sutuma tü nikirajaainjatkalü anain (Juan 4:13-15). Jamüsüjaʼa wanee wawala wanaa sümaa shiʼrüin wanee diploma suluʼu shipia wanee wayuu süküjaka amüin pütchi, shiyaawata aaʼu ekirajülüin tia wayuukot. Süküjaka sümüin wekirajüin wayuu sünain tü Wiwüliakat shipialuʼu jee müsia sünain tü outkajawaakat. Oʼttüsü tü wayuukot sünain ekirajawaa sünain tü Wiwüliakat. Waneemüin kaʼi süchikijee, oʼunusü shia sünain tü outkajawaakat otta mapa oʼunusü shia sünain tü outkajawaa miyoʼu piantuaka juyawai. Wanee juya süchikijee tia, woutiisasü shia. Wasakira waaʼin sünain tüü: «¿Kasache kamalainka namüin na wayuu taküjakana amüin pütchi? ¿Kasa taaʼinrüinjatka süpüla kemeʼeriain tanüiki taküjapa süchiki tekirajüin wayuu sünain tü Wiwüliakat?».

14. ¿Kasa waaʼinrajatka süpüla wekirajüin na wayuukana wanaapünaa sümaa tü nakuwaʼipakat?

¹⁴ Wekirajüle wanee wayuu sünain tü Wiwüliakat, yapainjatü watuma tü wekirajüinjatkalü anain nia. Wekirajüinjachipejeʼe nia wanaapünaa sümaa tü nukuwaʼipakat otta tü kamalainkat nümüin. Waneekatüjülüinjatü tü wetsiikulo naashajeʼerüinjatkat, tü video weeʼiyatüinjatkat nümüin jee tü kasa eʼnnaajünakat nutuma. Jülüja waaʼin tü kasa kamalainjeetkat nümüin jee tü pütchi atanaleetkat naaʼin (Prov. 16:23). Anuu sünüiki wanee wayuu chejeʼewat Albania, ekirajaaka sümaa Flora, wanee wawala pürekutsoot: «Nnojotsü tanoujain sünain süsoʼiraainjatüin naaʼin na outushiikana». Nnojotsü apüleeruaanüin saaʼin tü wayuukot sutuma tü wawalakat shiiʼiree sunoujeein sünain tia. Anuu sünüiki tü wawalakat: «Tayaawata aaʼu shiʼraajüinjachin Maleiwa palajana süpüla sunoujain sünain nüsoʼireʼerüinjatüin naaʼin na outushiikana». Wanaa sümaa shikirajünawalin sutuma tü wawalakat, shikirajawalin shia sünain aipüralin maʼin wayuu Jeʼwaa, kekiin maʼin nia jee pülashaatain maʼin nia. Anoujasü mapa tia wayuukot sünain süsoʼiraainjatüin naaʼin na outushiikana. Aʼyataasü maʼin shia maaʼulu nümüin Jeʼwaa.

15. (1) Saashin Aluwataaushikana 17:16-18, ¿jamapuʼusü nakuwaʼipa na wayuu chajanakana Atenas? (2) ¿Jamüsü nnojotka mepin nakuwaʼipa naashin Pablo?

¹⁵ (Paashajeʼera Aluwataaushikana 17:16-18). Aʼwaajapuʼushii maleiwayaasü na chajanakana Atenas, yarüttapuʼusü nakuwaʼipa jee nanoujapuʼu anainrü tü nekirajakalü anain na griegokana. Nnojotpejeʼe jülüjain naaʼin Pablo mepin nakuwaʼipa jee nnojoishii niyüülajüin naya sünainjee airuʼuluin nanüiki nümüin. Mayaainjeʼe eʼrüipuʼuin wayumüin Pablo jee müliapuʼuin nutuma na anoujashiikana, anoujashi nia mapa (1 Tim. 1:13). Maʼaka jülüjain naaʼin Jesuu nunoujeechin Pablo, jülüjasia naaʼin Pablo nuwalayuujeenain na chajanakana Atenas. Nnojotpejeʼe amülain neʼe tü naaʼinrakat Pablo (Aluw. 9:13-15; 17:34).

16, 17. Püküja süchiki jamüin eeka süpüla sunoujain wayuu maʼleekalia.

¹⁶ Anoujasü wayuu maʼleekalia nakalioʼu na nikirajüinkana Jesuu. Nüshajüin Pablo namüin na wayuu chajanakana Corinto, suluʼu tü mmakat Grecia, mojulaapuʼuin noʼutku naya wayuukana otta yarüttapuʼuin nakuwaʼipa. Anuu nünüiki namüin mapa: «Alaʼajaanüitpa jaainjala juulia» (1 Cor. 6:9-11). «Neeʼirateerü nakuwaʼipa jee anoujeena naya», ¿müsüche tü jülüjakat waaʼin nachiki naya wayuukana?

¹⁷ Maaʼulu yaa, wainma na eeʼirateekana nakuwaʼipa süpüla noushikajaain süchiirua nukuwaʼipa Jesuu. Eesü süpüla sunoujain wayuu maʼleekalia saashin Yukina, wanee pürekutsoot pesiaat chejeʼewat Australia. Soʼu wanee kaʼi chajatü shia suluʼu wanee oikaalee. Shiʼraka wanee wayuu  kanasü sütoʼuta otta jerutsü maʼin süsheʼin. Anuu sünüiki Yukina: «Wainmajüsü taaʼin saaʼu taküjain pütchi sümüin. Taküjapa pütchi sümüin, tayaawata aaʼu kamalain maʼin sümüin tü sümakat tü Wiwüliakat, tü süshajitkat sütoʼutajee shia süpüshi tü sümakat tü karaloʼutakat Salmos». Ekirajaasü mapa tia wayuukot sünain tü Wiwüliakat jee oʼunusü shia sünain tü outkajawaakat. *

18. ¿Jamüsü nnojotka anain mojule tü jülüjakat waaʼin nachiki na wayuukana?

¹⁸ Naashin Jesuu, na wayuukana müshii aka naya saaʼin wane aʼttiee eekai yapain süpüla asüʼüjünaa. ¿Shiache nüküjeeka achiki wainmainjanain maʼin na wayuu anoujakana nünain? Nnojotsü shiain tia. Süküjatüjülia tü Wiwüliakat palirüinjanain na wayuu anoujakana nünain (Juan 12:37, 38). Nütüjaa aaʼu Jesuu tü suluʼukat saaʼin wayuu (Mat. 9:4). Mayaainjeʼe nütüjaain saaʼu tia, aküjashi maʼin Jesuu pütchi sümüin wayuu maʼleekalia, nayapejeʼe naaʼinmaain maʼin na palitchoin anoujakana nünain. Süka isain wachiki watüjaain saaʼu tü suluʼukat naaʼin na wayuukana, nnojo mojuin tü jülüjakat waaʼin nachiki jee süchiki eere waküjain pütchi. Jülüja waaʼin wawalayuujeenain na wayuu waküjakana amüin pütchi. Anuu nünüiki Marc, wanee misioneero chejeʼewai Burkina Faso: «Ooʼulaʼalaa müshii suulia ekirajawaa na wayuu anoujainjanayaakana taaʼinruʼu. Akaajasaʼa na ‹nnojoleena anoujain›, tamakana amüin, anoujashii mapa. Shia anaka aluʼu wooʼulaale nuʼunirüin waya chi naaʼinkai Jeʼwaa».

19. ¿Kasa jülüjainjatka waaʼin nachiki na wayuu waküjakana amüin pütchi?

¹⁹ Eere waküjain pütchi, eeshiijaʼa palitchonle saaʼin wamüin na wayuu makana aka saaʼin aʼttiee yapaka süpüla asüʼüjünaa. Soteepejeʼe waaʼin tü nümakat Jesuu namüin na nikirajüinkana. Naashin niakai, yapasü tü aʼttieekat süpüla asüʼüjünaa. Eesü süpüla neeʼiratüin nakuwaʼipa na wayuukana jee noushikajaain süchiirua nukuwaʼipa Jesuu. Kojutushii naya noʼuluʼu Jeʼwaa (Ageo 2:7). Jülüjale waaʼin kojutuin na wayuukana nümüin Jeʼwaa jee nümüin Jesuu, kapüleerü waaʼin tü nakuwaʼipakat otta jülüjeerü waaʼin tü kamalainkat namüin. Nnojoleerü jülüjain waaʼin naatajanain naya woulia, jülüjeerü waaʼin wawalayuujeenain naya.